عالم الذرة

أثرْك جالك بطين ونبت لك صرّه!!
يوم أنّي أزهم عليك ولاتحاكيني

ورثت ورث العجوز وجيت مجترّه
وصنفت نفسك من أصحاب الملاييني!

بالله أبنشدْك كم مرّه .. وكم مرّه
يجفونك أقرب بني عمك وتاتيني ؟؟

تشكي من الفقر .. وتعاني من الحرّه
وأقوم وأقسم معاشي بينك وبيني

واليوم تركب على المرسدس وتفرّه
كنّك حفيد الأئمّه والسلاطيني

لوّك بدال الأمريكي عالم الذرّه
يمديك أكلت الزوالي والبطاطيني

يعطيك من خيره !! ويكفيك من شرّه
عقب التكاسي وعقب الفقر و الديني

أن كان نفسك من المليون منغرّه
تراك خسران فالدنيا وفالديني

الله هو اللي يسر العبد ويضرّه
والا أنته (أربع حروفٍ) بين قوسيني

تراك مازلت تتبعنا على الجرّه
من عاد حنّا على ظهور البعاريني

قومٍ يدينا تحوش المال وتثرّه
على بيوت الأرامل والمساكيني

لو نملك الكون من بحره ليا برّه
مانمتلك به عمارات ودكاكيني

والا أنت نفسك من المليون منغرّه
يكفيك .. وأنا بياض الوجه يكفيني !!

الشاعر .. سلطان الهاجري