ديوان قصائد لشعراء المملكة العربية السعودية (متجدد)☘️☘️

ريحانة شمران
كل الشكرآ لك على هذا الجهد والتفاني
والطرح المفيد والمتنوع ايها المميزه
دمتي في احسن حال والله يرعاك
ويبارك فيك

ريحانة شمران
كل الشكرآ لك على هذا الجهد والتفاني
والطرح المفيد والمتنوع ايها المميزه
دمتي في احسن حال والله يرعاك
ويبارك فيك

لاتفرح إن الوقـت أسعدك واعطاك
لا بــد مـن ســود الليالي تبكيــك

دنـــــيا تقلـــب علــها مـــا تــولاك
تمسي عزيز وتصبح من الصعاليك

إليا أقبلت تخفي عيوبك عن أعداك
وإليا أدبرت تظهـر عيوبك لاهاليـك

اغنم من صروف الدهر كانه أمداك
قبل اللحد عن ظاهر الأرض يخفيك

وترى التشكي للمخاليق يشـنـاك
يحط من قدرك ويفـرح امعــاديـك

وكـثر التـشره يجعل الناس تجفاك
ولا عاد تلـقى بيـنهـم من يخـاويك

ولا تمادى في زعل من ترضـاك
ما دام جاء عاني على شأن يرضيك

ولا تخــاوي من على أبوه بـــــداك
هذاك وان طال الزمان يغدر فـيــك

والـجـاهل احـذر لا تجـادلـه يـبلاك
في كـلـمة بين المخاليـق تعـمـيــك

والهرجةَ العوجى لو أنها تنصــــاك
حـاول تجـاهـلهـا وخلها تـعـديـــك

ولا تضيّع هـقـوة اللي تـهـقــواك
مادام جاء بين المخاليق ناصيــك

واحـذر تـهـزأ يـا فـتى بخلق مولاك
تـشـوفـها باقـرب قـريـبٍ يوالـيــك

ولا تفرح بزودٍ على الحق وإن جاك
زودك ترى نقصٍ على حق ذوليـك

وخل القناعة ميزةٍ من مزايـــــــاك
مـع الـقـناعـة كــل شـيءٍ يكفيك

وان جت لك الدنيا على غير مشهاك
اصبر.. ترى بالصبر تدرك أمانيك

لا تامـن الدنيــا تـرى الوقـت فتــاك
لا جاء القدر كثـر الحـذر ما ينجيـك


الشاعر .. احمد الناصر الشايع

لحيت بك لحٍ لو اللح مذموم
من خوفتي تنسى الغرام ونسيته

اذكرك بالحب يومٍ ورا يوم
وما خفت من كثر التجاهل لقيته

ان مت منك يقال ما يلحقه لوم
الحسن في وجهك من الزين بيته

ظلمك عدل لو اقضي العمر مظلوم
انت الوحيد اللي بعقلي هويته

الزين في غيرك من الغيد معدوم
زينٍ بتاج احلى السوالف كسيته

لك صورةٍ في ناظري دايم الدوم
كنك تكلمني ولو ما حكيته

أنت القمر والخلق من حولك انجوم
تكتب لي برمشك جوابٍ قريته



السامر

سنة سلام الحب و الـرد واجـب
سلمت ابي غالي سلامـي تـرده

حبك مهوب إحساس بالحب كاذب
أنـا محـبٍ وسـم حبـك بخـده

القلب لك من غيمة الشوق عاشب
زرعتني في روضة الصبر مـده

يا مترف الإحساس بالكبر حاسـب
لا يشتعل شوقٍ وصل منـك حـده

حبك و أنا و الشعر مجداف قارب
لا ترخي الخيط الحريـر وتشـده

جيش الحسن بعيونك السود غالب
لا ترفع أعلامك على مـن تـوده

و أنا لكاس الهم و الحب شـارب
رأسي عنيـدٍ فيـك محـدٍ يصـده

بالحب لك يجذب خفا الروح جاذب
لا تستثير الشـوق بالصـد هـده


السامر

يابو نصيحة مانبي لك نصيحه
تجارب الايام كفت و وفت

الواقع أصبح يستفز القريحه
لو الصحف طويت والأقلام جفت

ما عاد باقي غير الألسن صحيحه
جميع الأبدان الصحيحه توفت

أهل العقول الراجحه مستريحه
إن كان ما دارت عليهم ولفت

من يوم ما سوو جهاز وشريحه
لي قلب ناغزني ولي عين رفت

ما عاد أحد يحسب حساب الفضيحه
أغلب عقول المسلمين إستخفت

اللي تحسبه ضلع محد يزيحه
من وين ما لاح الفلاش يتلفت

يا مصورين الضيف عند الذبيحه
أوضاعكم صارت من الزفت لأزفت

مابه مديح بلا فعول مديحه
عنكم ركاب المدح من صبح قفت

أنا أعرف المترديه والنطيحه
حتى ولو تحت المشالح تخفت

المدح يزهى و العباره صريحه
( رجل ليا أركى للثقيلات خفت )


الشاعر .. رزين الثلابي

يـاطـيـر يـاطـيـر يـاطـيـر الـسـعــد يـالـلــي تــــرف الـجـنــاح

لا واهــنــيــك لـــيـــا ضـــاقــــت عــلــيـــك الأرض خـلـيـتــهــا

وإن رحت وإن جيت ياطير السعد تسبق هبوب الرياح

وأظــــن مـافــيــه ديـــــره فـــــوق وجـــــه الأرض مـاجـيـتـهـا

مانـتـه بمثـلـي تـجـي وتــروح مايـصـعـب عـلـيـك الـمــراح

لـــكــــن يــالــيـــت جـنــحــانــك مـــعــــي يــاطــيـــر يـالـيــتــهــا

كـلـه عـلـى شـــان ازور الـلــي رمـانــي بالـعـنـا واسـتــراح

الـــلــــي عـــلــــى شـــانــــه الاقـــــــدام عـنــتــنــي وعـنـيـتــهــا

في ماض الأيام أشوفه قدم عيني في المسـا والصبـاح

والـيـوم حـتـى العـلـوم الـلـي تجـيـنـي عـنــه مـــا أوحيـتـهـا

ولـيــا نـشــدت الـعــرب مـاحــدٍ يعلـمـنـي عـنــه ويــــن راح

وأتـعــبــت نـفــســي وبـالـنـشــدة كـثــيــر الــنـــاس بـذيـتـهــا



حبيب العازمي

على خد الثرى نسعى عسى سعي القدم مشكور
عسى حجاتنا في تالي الاعمار مبروره

عسى ذنب الجهل والعمد والغفله يجي مغفور
الى عرضت صحايفنا على الاشهاد منشوره

الا يانفسي الجهلا ترى الدنيا متاع غرور
ترى الايام لو طالت على الاجال مقصوره

ترى عقب الترف والعز والراحه وظل قصور
يزورك هادم اللذات والاقدار ماموره

ترى نشوة ربيع العمر ما تبقى زمن ودهور
تمر ايامها عجله وتذبل نضرة الصوره

مثل حلم الكرى لو طاف بالنايم وشق بحور
يعود به ومن عادت حلوم الليل مبتوره

خصيب القاع لو عجت زماليقه بريح زهور
وغريف وانثنى عشبه وغنت فوقه طيوره

يزول ويندثر ريفه وعمره ما تعدى شهور
يروح وتنجرد خده وهي من قبل معموره

الا يالله ياعالم خفيات الدجي والنور
تروف بحال من نفسه على الايمان مفطوره


الأمير .. خالد بن سعود الكبير

ياباغي الجنة صلاتك صلاتك
لاتنشغل عنها بدنياك تنجيك

تنجيك بأمر الرب من ملهياتك
إبليس والنفس الخبيثة وتحميك

بعد الشهادة هي سعادة حياتك
وإن مت للجنة عساها توديك

أخلص بها لله وادفع زكاتك
وأتبع بها صومك وحجك لواليك

أركان خمسه سيدة واجباتك
للمنعم الوهاب ربك ومنشيك

هذا ومعها سته إن كان فاتك
في قلبك إعقدها عقيده تقديك

امن بربك صدق تامن عداتك
وامن بيوم البعث ربك بيحيك

وامن بكل الكتب والرسل ..جاتك
في المصحف اللي تفتحه بين اياديك

وامن ترى للرب جند فواتك
لو شفتهم بالعين بان الخلل فيك

وأقدار ربي حق خلقت سواتك
امن بها من دون ريب وتشكيك

أركان سته حطها جوف ذاتك
عقيدة التوحيد للحق تهديك

امن بها من قبل ساعة وفاتك
قبل إنسلال الروح من بين فكيك

وختامها الإحسان كنز حسناتك
أد العبادة كنك تشوف باريك


الأمير .. خالد بن سعود الكبير

شرفني الله بالعمل في الإمارة
إمارة تخدم جميع المسلمين

العز فيها والشرف والحضارة
والمرجلة في خدمة الدار والدين

ما هيب تقليد ولا مُستعارة
ما مثلها إلا ما بين نخلة وسيفين

أسس لها عبدالعزيز الصدارة
وبراية ما ترتخي للسلاطين

لا واهني من دارنا مثل داره
ما مثلها قريب وإلا بعيدين

البعض لي سافر يدور سفارة
وأنا إذا سافرت سارني البين

يا مغني أبياتي تراها عبارة
عما يدور خاطري أمس والحين


الأمير الشاعر خالد الفيصل