مجاراة الشاعر /عبدالكريم منصور الشمراني

دار الهواء فوق الشجر بإندراجه
وانا هجوسي تتعبه كل ماراج
القلب نسمات العليل ابتهاجه
والفكر خلته الدواكيك مسهاج
فج خلا لاضاق صدرك علاجه
يغنيك عن بعض المجالس والازعاج
سحابه البارح قفتها عجاجه
يلعب بها صلف الهواء مثل الامواج
هبت هبوب مدورين اللجاجه
يفرح بزله صاحبه كل هراج
من غير سبه عاقد لك حجاجه
لو ان ماله مع هل الطيب مدراج
اثر العوج دايم يحب العواجه
لو ينعدل يرجع لساسه وينعاج
مايستوي طعم القراح وهماجه
ولايستوي نقع الصفا مثل هداج
الله ولا منة محسب خراجه
شين اللغا ومن البطر لابس تاج
والله مايذبحك ياكود حاجه
لاصار في وجهك حيا وانت محتاج
بالعسر يسر وللهموم انفراجه
يجيلها من والي العرش مخراج
ارفع يدينك للسماء ثم ناجه
يظهرك لو دونك شرابيك واسياج
الشاعر: مجعد بن متعب الخميلي الرشيدي
~~~~~~~~~~~~~~
مجاراة الشاعر: عبدالكريم منصور الشمراني

يا مرحبا بالكفو وقت المواجه *
ترحيبتن تربك محطات الابراج **

كلن من العالم يدور مزاجه *
شحصن لقاه وشخص كم دور وداج **

وحسب العمل كلن يحصل نتاجه *
ويابخت من زرعه كفو يوم الانتاج **

شفت الهوى كالسجن ما اقوى سياجه *
ومن خش في سجن الهوا نسي الافراج **

الحب يقتل في العرب والخواجه *
كم واحدن قد مات ماحصل علاج **

رجلن ليا جيته ذبح لك نعاجه *
ورجلن ليا جيته يجيك أكبر احراج **

الصبر للرجال يلبسه تاجه *
مثل الجمل يصبر وياكلك لي هاج **

الجود نورن منبعث من سراجه *
ينفعك لو انك ورى ساحل العاج **

كلن على نهجه يمشي نهاجه *
والمنهج الطيب كما لبس ديباج **

والشعر من دون المعاني سماجه *
وبعض القصايد خلها وسط الادراج **

هذي مجاراتي وعمق الزجاجة *
عديتها والبيت مليان حجاج **

صلوا على اللي في حديث ابن ماجه *
واللي سرى في ليل الاسرا والاعراج **

{وسلامتكم} ....