سمعت لي كلمةً مدري وش أقصاها

سمعت لي كلمةً مدري وش أقصاهــــا
حزت بصدري وانا ماني بهارجهــــا

لوكــل كلمه الى جتنا تبعناهـــا
بعنا الثمينه بســــعرً ما يخارجهـــــا

لــو مــرت السمع ما كنــا ســمعنــاهـــا
ونقفل الـــراس عنها لايبـــرمجهــــــا

ومــن يــم هــــذا لهـــذا ما نــقــلناهـــــا
والنـاس واجـــد وتلقى من يروجهــــا

ومـن جـابها بيـن خــلـق الله ووداهــــــا
لـو بــه مراجــل ترى نفسه يسـمجهـا

ومن عامل الناس في سابق خطاياهـــــا
يقعد بدارً خــــلا مــا داج دايجــهــا

في كنة ً تشوي الجربوع رمضاهـــــــا
تابس غصون الشجر من حر واهجها

والناس بالحق حكم الشيخ ما أرضاهــا
مــاتـرضي النــاس لــوأنــك تحججها

وياللي تبي الطيبه خذها وعطناهــــــــا
خــل الطريفه طـريه لا تــثــلجــهــــا

وأقضب طريق الاوادم وامش ممشاهـا
اتبـع دروب العرب وانهج مناهجهــا

وأرسم لنفسك أحــــدودً لا تعداهــــــا
من حط نفسه بدرب الضيق يحرجها

وأن كان نفسك هواها قام ينحاهـــــــــا
حط الاعنه بروس الخيل وأسرجهــا

وفـــــكـــر بـمـنـكـافـهـا قـدام مغزاهــا
وأضرب احساباتها وتشوف ناتجهـا

وكـلً بـعـضـده يموح الدلو برشاهـــا
وتلقى كبود الضوامي من يبرهجهـا

وان كـان تـوك عـلى صدرك تهجاهـا
حـنـا تـرانـا نـدرس فـي مـنـاهـجهـا

مــن يــم مــصـبـاحتهـا نـبعد معشاهـا
الــى قــعــد راعـي الضلع يـدرجها

لـوهـي صعـيـبه الى انعاجت عدلناهـا
واللي تجي مستقيمــه ما نعـروجهـا

نــهـتـم فـى وزنـهـا وأبـرام معـنـاهـــا
ومـن الكرســتال والـلـؤلـؤ نـتوجها

مـثــل الـجـواهـر الـى منـــا نظمناهــا
واسلوكها من جديد الزري ننـسجها

مـخــايلً تــرتــدم والصدر منشاهــــا
ان دك بـالبـال هـاجوسً يـهـيجـها

واليا امطرت ضاقت الوديان في ماها
تأخذ الى الحول ما يبست مدالجهـا

وأن صـدت النـاس عــنــا ما تبعناهــا
ما تـقــفي الناس عــنــا وانتولجهــا

وأن جــاتـنـا الطيبه بالطيب زدناهــــا
الـطـيـبـه بالعسل والسمن نـمزجهـا

وأن جــاتـنـا الثانيه نصبر ونرفاهـــــا
يمكن الى فاق راعـيـها يعــالجهــــا

وأن عــادهــا عــودة ً ما عاد ينساهـا
من حربة في صميم الصدر نولجها

مـسـمـومـة يـبـلـش الـدكتور بأدواهــا
مـايـقـنـع الخـبل لـين انه أيلامجهــا


عبدالله بن زويبن رحمه الله

‏

اخي الغالي الحمدان
قصيدة رائعة
اشكرك كثيرا على مواضييعك الهادفة
تسلم يداااك

ودمت بسعاااده

شكرا على الطرح المميز

بارك الله فيك وبعملك
ولك اجمل تحياتي
دمتم بخير

شكرا على القصيدة اخي الحمدان
بارك الله في جهودك

وأسال الله لك التوفيق دائما
ونفعا الله وإياك بما تقدمه

شكر على القصيدة
دام لنا عطائكم المميز والجميل
تحياتي الوردية ...
لكـ خالص احترامي

أهلاً وسهلاً بكم جميعاً
كنتم رائعين وجميلين
بمرورك وتواجدكم
لكم مني أجمل التحايا واطيبها لاعدمتكم

أخي العزيز الحمدان
شكرا لك على هذا التواجد الفعال
والمشاركات النافعه والمفيده
فبارك الله فيك وجزاك الله خير