انكسار الضو

انكسار الضو
سيفك نفذ واستوطن الصدر واجتاح
كسر ضلوعٍ عوج تصرخ حسافه
كنت أحسِبِك درعي إذا سيف لي طاح
وكنت أحسِبِك خيلٍ أحب اكتنافه
كنت أطلبِك تضوي إذا البدر مالاح
واعبر بضوِك نهر واسكن ضفافه
ياللي حياتي عشتها معك جــــــراح
اشفي جروحك صبر حب ولطافه
هذا الطعن منك ردفتيه برماح
ياللي الالم في الصدر رمحك أضافه
طعنك عميق وللأسف كان بسلاح
هجر وفراق وصد بان انتصافه
حبك مثل زرعٍ وسط أرض فـــــلاح
لازم يجيــــله وقت يبـــدأ قطافه
ياللي سلكتي سكة الصد بجنـــــاح
مكسور طرفه وانجبر في انعطافه
هجرِك نزع قلبي ولوعه بســـــلاح
يفضح عذاب القلب منك ارتجافه
ياللي القصايد صغتها معك بالواح
فيــــها انكسار الضو مال انحرافه
ياللي وصفتك كِنك الخيل جمـــــاح
ياللي وصفتِك وصف فوق الخرافه
التوت بشفاتِك وفي الخد تفـــــاح
والطعم في وصلِك شبيه الكنـــافه
عطرِك مثل وردٍ على الخد فــــواح
شفت النحل ضمه وينوي اختطافه
معك ِ انطوى ماضي من الحب وانزاح
وأنتي بوسط القلب نلتي الخـــلافه
معك اغتنى ديوان شاعر بالأرواح
جاب القمر والشمس لجلك غلافه
واليوم غبتي وأصبح الليل سفاح
وبعدك حلول الليل نفسي تخافه
كنت أحسبك بحرٍ وأنا فيه سباح
حتى لمحت المـــــــــد بان انصرافه
يابنت كافي ضاقت الروح بارتاح
دامي شعاع الشمس وأنتي انكسافه
الشاعر
ناظم الهمسات
ابراهيم الشمراني