قررت ابوح بعلةٍ شيبتبي

صاحبي وان قلت وش فيك شيبت

اقول نكبات الزمن شيبتبي

عاشر سنه وانا من السبت للسبت

اكتب ويمحى كف الايام كتبي

رتبت من حولي وانا ما ترتبت

وفيت لاشك الظنون غدرتبي

احسنت ظني بالبشر ما تحزّبت

والناس في سو النوايا هقتبي

قلبت موازين الحقايق وعوقبت

حتى اقرب الخلان رد وشمتبي

وَجّبت خلاني ولا عاد وُجّبت

الناس ما ادري من خطا وش لقتبي

تخيّل اصحابي بعد ما تعذبت

يمر واحدهم ولا يلتفتبي

وانا الذي عنهم ضحى الضيق ما غبت

من شانهم رجلي مع الدرب جتبي

ومن شانهم عن رغبة النفس جنّبت

احسبني القاهم ليا وقفتبي

اثريني اسقي صبخةٍ ما بها نبت

عرفتها يوم الهبوب عصفتبي

آسف صديقي خاب ظنك وانا خبت

يالصبر سامحني همومي غدتبي

اليوم غصب اوادعك لو تغرّبت

المعذره كل الدروب انتهتبي

كبّرت عقلي واستحيت وتأدبت

حتى سكاكين الشماته سطتبي

واليوم ما فيني على الصمت والكبت

قررت ابوح بعلةٍ شيبتبي


الشاعر .. مقبل الشمري