سجين الهوا

سجين الهوا لو طال عمره ماهو معتوق
مادام الوفى سجنه والاشواق حراسه
والا يا جميله غير علم الغلا والشوق
ابصب لك من خمر صيد الفكر كاسه
قصيدن على حبك يساقي ضمى المعلوق
ليا هل مزنه امست القوم عساسه
اداعب به شعورك واداريك حب وذوق
فرايد من العاشق ليا ترجم احساسه
على سكة الذكرى تسوق المشاعر سوق
عباير عيونن دمعها البحر بقياسه
عقب لاح للفرقى في مزن الغرام بروق
وانا دمعتي عجله وفكري بهوجاسه
البي ندى قلبي لو الحب غادن عوق
سقى العاشق الذله عقب عز نوماسه
انا حيلتي ذكرى واغني القصيد طروق
واصب العباير واقنع الصبر بسياسه
زمان المفارق تيه شمسه بدون شروق
نهايته سبع الموت لصكت اضراسه
سقى الله زمان الوصل والحب سهمه فوق
وانا شوف خد الورد والجفن ونعاسه
وانا اشوفك بزولك تبارين صفر النوق
عليك العباه وبالمشي حيل مياسه
تقولين بيت الشعر واسمع حلا المنطوق
وصدري من اللهفه تزاحم به انفاسه
زرعنا الغلا نخله ونبغى الوصال عذوق
تبسّم شفايفنا والاقدار عباسه
وعقب مارحلتي قصر حلم الغلا المرموق
تزلزل من الفرقى وحول على ساسه

يوسف الشمراني