تهب الريح وإلا ماتهب الريح يالأشجار ** أنا لا زلت أشوفك أجمل الأشياء وأعلاها

تهب الريح والا ماتهب الريح يالاشجار

أنا لازلت أشوفك أجمل الاشياء وأعلاها





لأنك تفرزين الأكسجين العذب والأثمار

وحن نحول إفرازك خبائث وانتحاشاها





يكبر الفرق من قعر الجحود لقمة الإيثار

ويكثر أشياء نعرفها ولا نعرفش معناها





كليناك .. ولبسناك ,, وجلسناك .. وشعلنا النار

يافضحي كم خذينا عمرها ولاشكرناها





أنا آسف عن الحطّاب .. والحمّال .. والنجّار

أنا آسف عن كل الخطايا اللي خطيناها





أنا آسف بقلب الشاعر اللي ممتلي أزهار

يقيس الكائنات بفعلها ,, ماهو بأسماها





خلقنا الله نكمل بعضنا فالكون .. والصرصار؟

أكيد أن له فوائد بس حنا ماعرفناها





يجوز انه مفيــد أكثر من الثرثار والغدار

ومن كمّ النساء .. اللي تفاخرها بـ اعظاها





يـ ابن آدم علاما الكبر والتكبر والأكبار

ترى أجدادك تحت هالأرض هاذي اللي توطاها





يجي يوم وتكون جدار أو أحجار أو غبار

قبل ربي يحشر الناس ويطلع خفاياها





ويجي يوم أتمنى تكون غصن فعالم الأشجار

ويجي يوم أتمنى تكونها قبل أتمناها

للمبدع سعد علوش