ديوان الأمير بدر بن عبدالمحسن

[الحمدان]

انا احبك مابها زيف وخداع
رغم الذي نخفيه .. واللي نخافه

أودعك .. ليت الألم لحظة اوداع
إلى مضت .. ننسى الألم والحسافه

وأفارقك.. لوالسفر .. يم وشراع
وبعد الفراق .. اللي نوده نعافه

لا صار مافي البعد راحه لملتاع
بالله وش نفع التعب والكلافه

من الجفا والصد .. يكفيني اذراع
لا جف نهر الحبماتت اضفافه

املي يدك رمل وترى هذي القاع
ومدي النظر .. تدرين وش هي المسافه

البدر

[الحمدان]

قام الفهد .. فهد العرب ..
قال الكويت ترجع لنا .. لو ما رضيت ترجع لنا ..
ضاق الفضاء .. باللي حرب.. ذاق الهزيمة .. وانسحب ..
قام الفهد .. فهد العرب ..
قال الخليج .. ارضٍ لنا ..اهل الخليج .. هم اهلنا ..
ضاق الفضا باللي حرب .. ذاق الهزيمة .. وانسحب

البدر

[الحمدان]

تشرق الشمس .. من جروح الامس .. من دموع الامس
ينتهي الليل الطويل .. يرجع الظالم ذليل
انتصرنا بقوة الله .. ربنا الفرد الصمد
انتصرنا .. بقدرة الله ثم بإيمانك فهد
وانتهى الليل الطويل وهذي الشمس

البدر

[الحمدان]

ياليت ابو تركي يشوف .. فـ الحرب كيف افعالنا
الشيخ ورث لها سيوف .. ونعمٍ بكل ابطالنا
للحمل اركينا الكتوف .. لو هي ثقيلة أحمالنا
حنا على الصاحب نروف .. وقبر العدو برمالنا

البدر

[الحمدان]

يا رافع الجبهه .. جعل الردي يفداك ..
لا ما على الجبهه .. ما دامها في حماك ..
انت يالجندي السعودي .. صخرةٍ تحمي حدودي
وللبطل اهدي ورودي .. والقهر لعداك
سيفنا وقت الحرايب .. درعنا لا جا السلام
عزنا هذي الكتايب .. نورنا وسط الظلام
انتم احفاد الصحابة .. وانتم جنود الامام
كلكم عزم وصلابة .. دون هالبيت الحرام

البدر

[الحمدان]

ما لاحد منه الله اللي عزنا ..
روحنا كتاب الله وقلبنا السنه ..
وان طمع فينا العدو ما عليه منه ..
ابشري يادار نا .. السعد فالك
وافرحي ياارنا .. بوقفة رجالك ..
انت بين ضلوعنا رملك جبالك ..
من ظهر فـ أرض العرب واعلن جهاد ..
من توحد قبلنا وحرر بلاده
من بنى هذا الوطن .. حنا يا ساده ..

البدر

[الحمدان]

ليلٍ على الخفجي تشقق نهاره
في عيوننا صبحٍ وفي عيوننا ليل
الله على مبتدينا بغاره ..
هو ما درى اننا للملاقى مغاليل
جوكم هل التوحيد وهل الجساره
وجوك النشاما .. صدق .. ما هي تهاويل
ومن الحرس والجيش .. ذقتوا المراره ..
خلوا جنايزكم .. جدوعٍ بعد سيل ..
يا طالبين الحرب .. ما هي عياره ..
دارٍ الى شبت حطبها .. رجاجيل ..
حنا عمار الخصم .. وحنا دماره ..
وحنا الى ضاقت .. نحل المشاكيل ..
بارك الله غرسنا .. ربنا المعبود ..
يظهر الله شمسنا .. في الليالي السود ..
والمعارك عرسنا .. وعطرنا البارود ..
يالعدو مالك طريق .. والله ترابي حريق ..
والاخو والا الصديق .. ما يخون عهود ..
ارضنا ارض الوفا .. هو جزا الطيب الجفا ..
ياعدو والله كفا .. لكل صبر حدود

البدر

[الحمدان]

خضار البحر في عينك
وملح البحر في اهدابي

وعيا البحر لا يسكن
أبد في صفحة كتابي

قصيده من خضار وملح
يا أول وأخر احبابي

انا من شفتها عيونك
ترى ما جفت ثيابي

ولو آخر قصيدي بيت
كتبته حب في عيونك

ولو يحمل همومي بيت
سكنت البحر وعيونك

ويبقى البحر وعيونك
وينشف في قصيدي البحر

ويبقى العشب وعيونك
ويزهر في متون الصخر

ويبقى الحب وعيونك
رغم كل الصحاري نهر

وانا والجرح والفرقا
وهذا الحزن بسبابي

ولو ادري البكا له بيت
اسوق فْـ دربه ركابي

ابي لا غابت عيونك
ابل بدمعي ثيابي

البدر

[الحمدان]

دايم يذكرني النخيل
غير الطفولة والرياض
وصوت السواقي والهديل
مواجع الضي النحيل
على وجنتك
كان الظلام والله كثير
وما ادري وش اللي وهقه
واختار خدك فـ الأخير
وشعاع خدك شققه
دايم يذكرني النخيل
غير الطفولة والرياض
وصوت السواقي والهديل
مواجع الضي النحيل
على وجنتك
نجدية الضي والعتم
ما بين راسك والقدم
لي مجد لي مي ورطب
وسنابل الياس والغضب
ولي مواعيد النخيل اللي مضت
وحكاية الضي النحيل مع وجنتك

البدر

[الحمدان]

لين العود قلبك ما يلين
قاسيٍ ما درى عن لين قدك

ما درى عن عذاب العاشقين
يا قمر والقمر غصبٍ يبين

انجز الوعد لو ما هوب ودك
كان ما هوب لي للساهرين

لاتخاف السما بينك وبين
عاشقٍ ساريٍ في نور خدّك

لاغدى لليل مجروح وحزين
ظالمي في الهوى الله يعين

ما ظلمني لطيف الروح صدك
ظالمي في الهوى شوق وحنين

لين العود لابد السنين
تبعدك يوم عني أو تردك
لنت يا صاحبي أو ما تلين

البدر

[الحمدان]

تعبت اناظر فوق
واتعلق بشوفي
تحتي الثرى مشقوق
وهمك على كتوفي
ولاتناظرين بعيد
وبلادي في عيونك
توي قطعت البيد
لرضاك وبدونك
ماعاد فيني اعروق
ودمي على سيوفي
لاتمطريني ورد
مشقوقه كفوفي
مثل الثرى والقلب
قمح ونخل محروق
وجدراني حروفي
تعبت اناظر فوق
تحتي الثرى مشقوق
قمح ونخل محروق
ماعاد فيني عروق
ماتنزلي لخوفي ؟

البدر

[الحمدان]

لو كان في كفي رميته في كفك
يفداك مافي الحب من صادق الحب

تحبنّي؟ياعلّني بعض ضعفك
قلبي جرادٍ باد ما حصّل العشب

أنا قديم الهم وأنفع لعطفك
أما الهوى ياسيدي مركبه صعب

يا ليت لي صهوة جوادٍ وأخطفك
للشمس لنجوم المجرات للشهب

تحبني وأقول من زود لطفك
شكراً صدقت وألف شكراً على الكذب

البدر

[الحمدان]

سيدي قم
ما خبرت اللي يحب يشتهي النوم
سيدي قم
لاتنام وفي السماء باقي نجوم

يا جريح البارحه
كيف طبت اليوم

سيدي يا سيدي قم
سيدي الليل للعاشق نهار

قم معي نجمع نجوم الظلام
سيدي لو عرفت الانتظار

ما غفا لك جفن يا عذب الكلام
اه لو تدري الهوى والسهر مقسوم

يا جريح البارحه
كيف طبت اليوم

سيدي يا سيدي قم
سيدي لا تناظرني بغضب
ودي تحس مثلي بالغرام

سيدي ما وراك الاالتعب
ليت عيني مثل عينك تنام

اه لو تدري الهوى والسهر مقسوم
ويا جريح البارحة كيف طبت اليوم
سيدي يا سيدي قم

البدر

[الحمدان]

لا تدعك القلب ترجي يظهر المارد
ويقول لبيك عبدك باح مكنونه

قنديلك اللي انطفى ليل الشتا البارد
سيان عنده وفيت او توك تخونه

ترجّل الفارس اللي لاجله تطارد
يازين شلفاك ملت تطعن طعونه

كل ماحداك الضما جيت الضما وارد
كنك تعاف القراح وتشرب عيونه

شاب العتب وانقطع ما بيننا الوارد
ولولا الندم ما غرس فـ ابهامه سنونه

والحزن سيف على ارقاب الفرح جارد
وكل بسمةٍ في ديون الصبر مرهونه

إن صادفك في طريقك بالي الشارد
قله يموت الهوى باعيش انا بدونه

.....

[الحمدان]

أبا اتنفس دام لي بالنفس حق
ياللي قصيدي فيك من حر الأنفاس

والله يالولا عبرة الحبر الأزرق
دمعٍ نثرته من عذابي بقرطاس

لاأقول أحبك لين بدموعي اشرق
وقبل الصديق يحس بي نايد الناس

إلى متى وصلك من العمر يسرق
دونك ودون الوصل بابٍ وحراس

أنا ف جبيني الشمس تظمى وتعرق
وانته بشوب القيظ ريٍ ونسناس

البدر

[الحمدان]

يا صاحبي والليالي سود
يا صاحبي والزمن صافي

اللي إلى احتجت له موجود
واللي إلى من وعد يافي

ما هو على المرجلة محدود
تقول مكتوف بكتافي

ما جور ياللي رقيت إسنود
عرض الجبل وانيٍ حافي

يوم الردى مسكنه فـ لحود
مسكنك في راس مشرافي

والله لوفي التحرص زود
كان العمر ما نقص وافي

وليت الرخا لا اجتمع والجود
تقاسمه شهم وسنافي

.....

[الحمدان]

حبيبتي
ردي سلامي للهوى عذب السلام
وأغلى الأماني وللأمل كلمة ملام
قولي له إني ما هقيت
إني الى نحت وشكيت
ترجع ليالينا سوى شوق وغرام
سنين مرت وما أدري عن الأيام
يقولوا تفرق الأحباب
وانا أقول القمر ما غاب
من أول يوم تواعدنا
أثاري الوقت يخدعنا
ويبعد عننا الأحلام
قولي له إني ما هقيت
إني الى نحت وشكيت
ترجع ليالينا سوى شوق وغرام
حبيبتي يا نظر عيني
أشوف الليل ما بيني وبينك وكل الناس
أحس فـ نظرتك معنى
ودربٍ كان يجمعنا على الإحساس
قولي له إني ما هقيت
إني الى نحت وشكيت
ترجع ليالينا سوى شوق وغرام

.....

[الحمدان]

كل ما أقفيت ناداني تعال
وكل ما أقبلت عزّم بالرحيل

وكل ما أجنبت واعدني شمال
يا أهل الحب ضيعت الدليل

الحقيقة غدت مثل الخيال
هو عدوّي وهو أغلى خليل

شفت أنا الظلم من بعض الدلال
يجرح القلب لو كانه جميل

أشهد إن الهوى ما به عدال
هو خلي وأنا قلبي عليل

وكل ما قلت له يا ابن الحلال
المحبة عطا وانت بخيل

التفت لي وهو عجل وقال
لذة الحب في الشي القليل

البدر

[الحمدان]

واطيري اللي زودوا فيه الأثمان
اشعل ظهر والصدر يجهر شعاعه

لو له شبيه في الملى هو غزالان
راجي عل زينه يزود بشجاعه

خذته ولاني يا هل الطير ندمان
من عادتي ما نيب اسوم البضاعه

الى ركز في مجلسي طير حوران
وتجمعوا عندي كثير الجماعه

وشلته على كفي كثير الغثا هان
عندي غدى للهم مثل المناعه

لا صرت فيما تطلب النفس بلشان
اترك طمان القاع وارقا برفاعه

وباكر تصاريفه على عالي الشان
من يضمن الدنيا ولو ربع ساعه

البدر

[الحمدان]

أول اليوم عانقت الشفق
وآخر اليوم عانقني شفق

وأنا بين التلاقي والفراق
أدفن العمر وأحفر لي نفق

يا حبيبي وأنا مثلك غريب
عن حمى النوم غربني أرق

اقطع الليل لديار النهار
واغسل الدمع من شط العرق

ولا جمعني بك الموعد لمحت
ألف نجمٍ توهج واحترق

أجمل العمر طفلٍ من غلاه
قمت أضمه لصدري واختنق

وباقي العمر لو عمره يطول
ما يجي سطر في ذهن الورق

من بقول اللقا غير الوداع
بينهم فرق واجد ما صدق

أول اليوم عانقت الشفق
وآخر اليوم عانقني شفق

البدر

[الحمدان]

ليلة تمرين عطرك السافر
فضح وردالبساتين
وكثر الكلام
صحيح جرحت الظلام
بالخد وبنور الجبين
ليلة تمرين
يا عذبة التجريح
شفتك بعرس الريح
والشال الذهب
يحجب سنا الشمس الذهب
كانت عيونك حزن
كانت غضب وكثر الكلام
ليلة تمرين
يا غيرة الورد
جرحها الكلام
حبيبة الورد
عاتبها الظلام
مرت بليلة برد وكانت دفا
عطر ودفا وليه الملام
يامجرحة صدر الظلام
بالخد وبنور الجبين
ليلة تمرين

البدر

[الحمدان]

أطوي الجديلة في كفوفي وهي ليل
ولا من طويت اليل صار الجديله

حلمٍ جمعني فيك ما كان بالحيل
حلمٍ ولكن شوفتي لك قليله

ناديت لك لين إسمعتني المواصيل
واشتقت لك كن العمر صار ليله

ولمستك بروحي وكانت قناديل
أصابعي والقلب نار وفتيله

ما هو غريب أبتل من جارف السيل
لا شك ينبت في عروقي خميله

.....

[الحمدان]

يا بنت أنا للشمس في جلدي حروق
وعلى سموم القيظ تزهر حياتي

أطرد سراب اللال في مرتع النوق
ومن الظما يجرح لساني لهاتي

عاري جسد والليل هتّان وبروق
دفاي أنا والبرد سمل العباتي

إن عذربوني بعض خلانك صدوق
يا بنت أنا عشق الخلا من صفاتي

وشمٍ على رمال( المتاييه) مدقوق
لا شك من منهم يسوي سواتي

أنا بدوي ثوبي علىالمتن مشقوق
ومثل الجبال السمر صبري ثباتي

ومثل النخيل خلقت أنا و هامتي فوق
ما عتدت أنا احني قامتي إلا فصلاتي

وإلى إفتخر بأفعال يمناه مخلوق
يا بنت انا فعلي شهوده اعداتي

الله خلقني وكلمة الحق بوفوق
وملكت الأرض ( وراس مالي عاصاتي )

البدر

[الحمدان]

الليل له قلب
وانا في قلب الليل قلب
وانتي احساس الأخير
ابهنا الوعد القصير
وبعذابي اللي بيصير
لا وقف قلب الليل
شمس النهار ترقى السما
وجهي الغروب
وبعض الظلام شالك
بعض اللي في بالك أنا وهم الدروب
اللي بتفرقنا بعد لحظة بعد لحظة
وهج الشعاع ما يطفي النجمة
قولي معي ما يطفي النجمه
شمس الوداع ما تطفي البسمة
خلي احساسي الأخير
ابهنا الوعد القصير
وما عليَّ من اللي بيصير
لا وقف قلب الليل

البدر

[الحمدان]

لو تغيبي ولو رحل وجهك حبيبي
في غيابي عنك أشوفك وفي عذابي منك أشوفك
صدقيني ما نقص هالليل بعدك إلا قمرا
وما فقدت من النهار إلا شعاع الشمس بكرا
واجمل الناس حبيبي
لو تغيبي لو رحل وجهك حبيبي
تصغر الدنيا وتضيق
كلّ مافي الدنيا أعرفه إلا بيتي والطريق
أنا أحبك ذا نصيبي إبعدي عني وغيبي
صدقيني مانقص هالليل بعدك إلا قمرا
ومافقدت من النهار إلا شعاع الشمس بكرا
لك ليالي ما سألتي ولي ليالي ما سألت
ولو دريت إنك زعلتي كان أفرح مازعلت
بس داري مافي قلبك إلا قلبك
واختياري إني أحبك والا أحبك
ومن عذاب الحب يكفي لو تجرّح قلب واحد
وإنتي يا حبي وضعفي لا يهمك كله واحد
لجل تتغير فصول ويبكي الغيم في عيوني
وتزهر جبال وسهول اضحكي بيّا وبدوني
وصدقيني ما نقص هالليل بعدك إلا قمرا
ومافقدت من النهار إلا شعاع الشمس بكرا

.....

[الحمدان]

اللي طعنّي بين الاضلاع وأدمى
هذاك ندٍ لي ونعمين فارس

ومن ينطح الوقت الردي قلبه أعمى
كم عامرٍ خلاه بالقاع دارس

يابنت مالي قلب بالحب يرمى
كفي سهام الفاترات النواعس

الما عيوني أظهريني من الما
وأنا غريق الدمع والريق يابس

ظميان من مثلي من الناس يظما
وأنا على أحلى الينابيع حارس

والله يالولا فيّة عيون سلمى
ماشوف كل الناس ضاحك وعابس

من طاب لي بالنور ماني بظلما
ومن جادلي بالغيث ماني بحابس

البدر

[الحمدان]

ينزع الحر للعالي المنيف
عادة الحر لطام يعاف

ذلني الشوق يالقاسي اللطيف
ولحظة الوصل من صدك تخاف

انا قلبي جناحٍ له رفيف
يتبع الشمس في الريح الصلاف

للوعد جيت من لون الخريف
وللوعد جيت من طعم الجفاف

ومر في ساعتي وقت ونزيف
ومر في خاطري حزن وزفاف

آه وينك انا مثلك كفيف
وليه قمراك تطلع ما تشاف

البدر

[الحمدان]

طريقنا واحد
امشيه معي
أحباب كانك تبين
أصحاب اللي تبين
يكفي متى ما توصلين
تتذكرين
إنك حزينه وانا حزين
كافي كلام
مابي وعد
أو التزام
طريقنا يمحي الظلام
نمشي مسافات الرجوع
ودرب الهوى كله خضوع
ارمي الجرايد والهموم
لا تجبري عيونك تنوم
لا واسمعي همس النجوم
وهم الوداع وكثر الحنين
وكافي كلام مابي وعد
أو التزام

البدر

[الحمدان]

لا تشد القيد
تجرح يدي أو تجرح القيد
قيدك غدى يوجع يدي
سجني أنا انت وسجنك أنا
والحب الحب عبدي وسيدي
لا لا تشد القيد
دمي جرى دمك
همي إني اشوفك في يدي
وإلاّ يدي همّك
في معصمي صرت
إنت السجين في معصمي
وكانك تصبرت أنا مقوى الصبر
دمعي في عيني وصرختي تملا فمي
سجني وسجاني أحزانك احزاني
وشلون ابنساك وشلون تنساني
محبوس في عيونك دمع
وزنزانتي تقطيبة الحاجب
وحاول توارى في الجفا
يا وجهه الصاحب
بتشوف نفسك في يدي
قيدٍ رقيق
قيدٍ سلب حريتي
ليته طليق
يا صاحبي ما به ابد قيدٍ طليق
لا لا توجع يدي
سجني انا انت وسجنك انا
والحب الحب عبدي وسيدي

البدر

[الحمدان]

ما أقول أنا لبيه وما أقول سمّى
يا عيونه اللي ما صفت لي وتكدّرت

يا صاحبي بكفيك مدحي وذمّي
كان الجفا تقصير يا زين قصرت

يا من نثر برماح الأهداب دمي
لو للجروح ضماد وصلٍ تصبّرت

لا شك ما انته يا دعج العين يمّي
لا والذي اطغاك زين وَتكَبّرت

ظامي هوى وشربت من فيض همّي
ويوم ارتوت روحي من الدمع صدرت

البدر

[الحمدان]

لا تجرحيني جرحك العام ما طاب
داوي بحنانك ما مضى واجرحيني

ياللي حنانك نظرة بين الأهداب
ردي علي بعض العزا ناظريني

خافي على قلبٍ يحبك إلى ذاب
ذاب الهوى في خفقته والحنيني

لولاك ما زار القمر ليل الأحباب
ولا لوحت شمس المحبه جبيني

ولولاك ما يلفي على الدّار غياب
ولا تبكي اللي فارق الدار عيني

في غيبتك كل الملا عندي اغراب
ما أحدٍ أبي قربه ولا أحدٍ يبيني

لا ياغلا كل القرابه والأصحاب
ضاع العدل في الناس لو تظلميني

البدر

[الحمدان]

أحد سأل عني
وأحد نسي يسأل
يعذرني الأول
محد سأل عني
أحد نسي صوته
واقبل ينادي
وأحد نسي صوته
ساعة سكت فيني
يعذرني الأول
أحد يبيني احتار
وأحدٍ هو الحيره
والله الأماني كثار
ومابه أحد غيره
اللي نسي يسأل
هذا حديث الجرح
ماهو أبد مني

البدر