نومك طرب وأنا بنومي هواجيس

نومك طرب وأنا بنومي هواجيس
ماساهرك بالليل كثر الهمومي

أسهر اليا نامت عيون الهداريس
وبالليل اساهر ساهرات النجومي

اونس بقلبي مثل صلو المحاميس
الله يلوم اللي لمثلي يلومي

اشوف عدلات الليالي مقابيس
ولحدن من الدنيا عظامه سلومي

تضحك وتخفيلك خفي الهناديس
تفطر لنا يوم ويومن تصومي

اعمل وتلقى وافهم العلم بالقيس
دنياك لو زانت تراها نقومي

قالوا جهلت وقلت جهلن بلاقيس
الجاهل اللي مايعرف اليمومي

من لايدوس الراي من قبل ماديس
عليه داسوه العيال القرومي

ومن لايقلط شذرة السيف والكيس
تبدي عليه من الليالي ثلومي

ومن لاخذا الدنيا بميز وتقييس
مثل الذي يسبحر بحر يعومي

البني مايصلح على غير تاسيس
ومن لاتعلم ماتسر العلومي

واليا توافق مشور السو وابليس
تبر منه وستر ربك يدومي

كل القلم من كتبنا بالقراطيس
وركابنا مع كثر الاذلاج تومي

ولا خير في كثر الحكى والتماليس
قول بلا فعل يجيبه وهومي

والعز فوق معسكرات السواديس
اليا قصدت اللي بالاشيا رحومي

قبن تنازا بالنشاما كراديس
والطير في روجاتهن يحومي

بالليل اصالي حاميات المحاميس
والصبح اصالي كل قبن قحومي

اربع اسنين ودمع عيني اماريس
العين تسهر كن فيها هزومي

واليا ركبت معالجات المضاريس
يبرد على كبدي لهيبه سمومي

صوابنا بالحيل عمق اليا قيس
وطريحنا في مثبره مايقومي

ان جن بنا مثل النعام الاماريس
لاخف عجل مع رقاق الحزومي

استلحق اللي يطلبون النواميس
اللي من الاقصين وادنا اللحومي

ون جن بالميدان مثل الدواويس
وتخالفن من فوقهم السهومي

عرجن باهلهن كنهن القرانيس
على الطريح مصوبرات كضومي

ثلومي على اللي ينقلون العبابيس
واهل الفرنج وكل رامي لحومي

واليا اختلط عج الرمك بالملابيس
المسعد اللي حظ ربعه يقومي

الشيخ من يعطي الفقار المفاليس
عساه بالدنيا بعز يدومي

حر اليا دبت عليه النواميس
يشهر وعن دار المذله يشومي

واليا اكترب من بعض الاشيا نسانيس
اعزم ولابد الفرج بالعزومي

ثوب الشرف لبسه نظيف الملابيس
ينجيك بيام الكرب والزحومي

يجلى صدا قلبي ضبيح المهاريس
لاقام شراب القهاوي يحومي

وادلال فوق النار دايم مجاليس
اكرامها حق علينا لزومي

من صنعت الصبه وخمس التخاميس
بريتن يعملبها كل يومي

وبهارها هيل بليا دنافيس
كيف يعد للنشاما القرومي

عده لحماي العياد المراويس
والا الحصان اللي بقينه ؟؟؟؟

الين يطيب النا المثل والتوانيس
والكيف طاب لمن يفك القحومي

وصلاة ربي عد رمل الطعاميس
على شفيع الخلق يوم اللمومي

الشيخ تركي بن حميد

أخي العزيز الحمدان
شكرا لك على هذه التواجد الفعال
والمشاركات النافعه والمفيده
فبارك الله فيك وجزاك الله خير