ديوان قصائد لشعراء المملكة العربية السعودية (متجدد)☘️☘️

مريم ..!!


تقول مريم عسى لك بالليالي مقام


وأقول كان إستجد الوجد ماني مقيم
يا مريم إن كان ما تطرب غصون الحمام


فلا تهزّين عذق الذكريات القديم
في قلبي جروح وف عيني بقايا كلام


وإنتي رميتي وجتني رميتك بالصميم
فإن طحت سترك علي عن الشّمت والملام


ماني بناقص عيون الشامته والخصيم
لا فزّ قلبي عليك ولا جفيت المنام


ولا تبعتك ولا هب الصبا والنسيم
العابرين بفضاء الله قومٍ كرام


لذا ف كف الزمان بغربلتهم كريم
لو يسكنون الأراضي روسهم ف الغمام


متوحدين الشعور ب هالزمان السقيم
دعيني أدعو ثلاث أيام عدّ وتمام


وأقلب ردائي وأناجي علّ تمطر بديم
وإلا إسقي عروقي الذبلى بكاس الغرام


وأنفخ لك الروح في عظم الكلام الرميم
وإن قلتي الدرب شام أقول ماهو بشام


ولا مقامي معك بين الرُكن والحطيم
جيتي من اللا مكان وجيت عبر الزحام


ولا أنتي العذرا ولا آنا النبي الكليم
أنا فقط شاعرٍ يهوى يصب المدام


ف قلوب تثمل على كاس الشعور الحميم
فإن خيّم الليل كنت النور عبر الظلام


وإن طال مسرى تعكّزت الغنى للسديم
معي معي لين أحط قلوبهم في سلام


وأسلّم الصبح ذنب البارحه وأستقيم
فيني من الغي شيٍ ما ينوش الحرام


وفيني من الخشيه الشي الكبير العظيم
ربي عساني أكون لمتّقينك إمام


وأعوذ بك من لواء أهل الشعر للجحيم
قد كان يامريم بصدري مواجع كلام


وأخترت يبقى وجعها في ظلوعي مقيم
فإن إستدرتي ف هوناً كلنا للعدام


وإن إستخرتي فمن عرض البشر والحريم

نواف التركي

سوق المترفين ..!!


كذا من دون زخرفة الحديث وبهرج التوظيف


كذا من دون تعقيد وخرابيط وكلام أفلام
يقولون السماء تمطر ولكن يا مزون الصيف


شبعنا من خرافات الوصول وكذبة الأوهام
مبادينا سرابٍ بأخره طعم الأسف والحيف


وأمانينا محالٍ في طريقٍ يقتل الأحلام
صدقنا لكن الصدق يتوارى مثل وجه الطيف


ولا ينفع سوى الكذب المقيت بعالم الأرقام
خويي والمنابر عوّدت عقب الثراء تشريف


علاها الفارغين وعظّم الوقت الردي أجرام
تدق صدورها مدري طبول الوهم والتسويف


وترجع كل ما حمي الوطيس تنكّس الأعلام
لك الله يوم أبرّق ما لقيت اللي ك حد السيف


ولكن يا كثر يوم أتلفّت شرهة الأقزام
أدق النجر في ظلما السنين ومابقى للكيف


سوى النزر القليل وتغرق الدنيا بالإستفهام
هنا تتأرخ الدنيا ورق يروى بلا تحريف


هنا يتدوّن الصدق الكريم وتسقط الأزلام
هنا والشعر مثل البرق مثل الحلم مثل الظيف


هنا والفكر سوق المترفين ومبعث الألام
هنا والصبر يترنح فوجه المهزله والزيف


هنا والشاعر أعذر من ملام وجفّت الأقلام

نواف التركي

شايف حالي ..!!


لا تجرّب في حديث اللعب طولة بالي


ولا تنبّش لين تلقى الكلمه المقبوره
شفني أبعد قد ما أقدر للمكان الخالي


وأتنائى عن زحام الألسن المسعوره
يعني الله يصلحك ماهو قريب وصالي


ولا أتشكل لأجل عين الشاعر وجمهوره
عند نفسي مايجي مثلي وشايف حالي


لا .. وأشوف إني بعين المبدعين إسطوره
شاعرٍ مكسور بين الصمت واللا والي


جغرف الأرض بقدم رجله وقلّ حضوره
ما يونّس فالدروب إلا صدى موالي


وإبتهال الجرح يوم أطلّعه من طوره
وما يحرّك هاجسي غير الطويل العالي


لا أرقب القلب الظلوع ولاحت المعموره
يمكن أجني ضيعة الماضي وسوّ أعمالي


ويمكن إن الروح في هذا الأمر مكبوره
فاهم إنت شلون ..؟ ماحن الفؤاد لغالي!!


عارف إنت؟إن الطرق في غربتي مهجوره!!
كان تقدر ..!! لا تحب أشباهي وأمثالي


دون أوضح لك وخل السالفه مستوره
روح حب اللي تحب وخلني في حالي


واجد اللي يجهل إحساسي وطيب شعوره
تبلش بقلبي لأنّه ما بقى فأمالي


غير أدرجها لحظن الغبّه المحفوره
وأنت ربي يحفظك عقب الكلام التالي


كان عندك صورتي قطّع عروق الصوره

نواف التركي

غثى ..!!


من زمن والقصايد كل أبوها غثى


فوق رجمٍ على الوادي يطلّ أستغيث
أرقب المبعدات ضعونهم لا حثى


وقتي فراقهم وأقفوا بحلمي حثيث
كنّ قلبي كريمٍ طاح بيد خبثى


يرمي الطيب جزل ويذكرونه رثيث
يعلم الله ياما فوق صدري جثى


شيٍ إن جيت أبتنفس بقلبي يعيث
لين صوتك بسمعي مرّ حتى عثى


فيني وقام يقطف كل حزنٍ خبيث
أقطفي من بساتيني قصيد الرثى


وأبعثي من رميم المفردات الحديث
أحصدي ما علق بالذاكره من غثى


حرريني من الصمت الهزيل الغثيث

نواف التركي

ما أنت الأوّل


ما أنت الأوّل كثير اللي هنيّا سكن

لو توايق تشوف بعينك الأمكنه

كيف أضحت بعد ما هملوها وكن

كل واحد سرق عمري بما أمكنه

كنت أغني على أطلالهم وان يكن

مايضيع العمر دام الفرص ممكنه

كنت واقف وأنا منهد مني ركن

وكل وجهٍ خذلني للغياب أركنه

كنت ساكت ولكن الخناجر حكن

ضجّن بصمتي اللي ماهو بمسكنه

لا وربي ولكن شيمةٍ ما شكن

لو هم أغراب ما عودتها كنكنه

لكن الموت جتني من قريب وبكن

العيون وبقى حكيٍ عجزت ألكنه

ودي أطلق جناح المفرده وأستكن

وودي أنسى ولكنّ الصدر مسكنه

وأنت يا أنك تكون أو لا بقلبي تكن

كان تقدر ترمّم مابقى ف أمكنه

وكان مثلك مثل من روّحوا فليكن

من هنا .. أفقدك .. قبل أفقد بك الأمكنه


نواف التركي

سكّر


بالله شف صاحبي زوّد له السكّر

تراه سكّر ويشرب سكّر زياده

وأنا زبونك زمان إذا أنت تتذكّر

متساويه عندي وكل العمر ساده

أطرق براسه شوي ومال ثم فكّر

فيني وراح ورجع في يدّه قلاده

قلت:أنت مجنون! قال:وجوّي معكّر!

قلت:شتبي بالقلاده؟ قال: يا ساده

شريتها قبل خمس أيام ومفكّر

ع العيد نازل مصر وألبّسه غاده

رفعت عيني لعينه وأثر قد بكّر

بالدمع قبل أسأله ..وش طاري أعياده؟

قلت:أنت من كم ....؟ قال: أربع وتتنكّر!

قلت: أبك والله وفيّه ماهي ب عاده!

قال: إيه .. يابيه .. أنا آسف ومتشكّر

قلت: العفو .. والصبر يا فتحي ضماده

قال: إنته رايق أوي فتحي ومتسكّر

قلت: الله اللي بيفتح باب ل عباده

مو قبلك الناس سمّوا صقر ما وكّر

وصلاح .. ولا إستعدنا القدس وأمجاده!

عاد إنت ما الله فتحها ..جب لنا سكّر

عشانك اليوم بشرب سكّر زياده


نواف التركي

المشهد الأخير ..!!


البارحه ليت لي عنها ملاذ ومجير

النور منهك وساطي فالعيون الظلام

والصبح ماهو قريب ولا بقى في جفير

عيني من السْهِر لا طلقه ولا من حزام

يا سيد البال مات من الكلام الكثير

مابين شرهه ..حياء .. تقدير ناس ..وحرام

لين إمتلى الخرج صمت وجاء يحث المسير

البوح ..وآنا أتصدّد عنه لين إستقام

قدّامي وكان لا بد الرحى تستدير

وإن طاح حب العتب ف إقرى عليه السلام

وإن قلت صدرك كبير أقول سرّك ف بير

يردون يمّه عطش.. يقفون منّه صيام

لا يشغلك هرطقات البعض.. يوم النفير

يبين حكي الفضا لا أشتد وقع الحسام

لو عذربوا نزفك إنّه من عروقي غزير

ما عابك إنك عظيم تمد مدّة عظام

يغرون بك نقص أنفسهم ولا فيه ضير

مادامهم يعرفونك حر مالك عمام

إقلط علي مالك بقلبي شريك وخشير

مبطي وأنا أمر ساحتهم مرور الكرام

ياحادي الشعر مبطي من غلاك أستخير

واليوم ذودك على فكري تسوقه حيام

تجي ..تحث الخطى يمّي ووضعي خطير

وتوقظ لي الذكريات وتستثير الغرام

تجي ..وتفتح شبابيك الغياب وتثير

وجدي على بيت طين وعاشقين وحمام

وأروح أرواد عصّي الدمع حتى يحير

في مدمعي لين ينبت في عيوني ملام

للحاره الشاهده حزن الفراق الأخير

وشلون تقدر عقب مي الشوارع تنام

وشلون تقدر تلمّ الأرض قطعة حرير

بالله وشلون ما تبكي عيون الغمام!!

لا شاعرك مستريح من السفر والهجير

ولا أنت تقدر تعود وما بقى بي حطام

ويراودوني على الذكرى وحلم الفقير

وأهرب بقلبي عن عيون البشر والزحام

لو أملك الريش كان أنفض جناحي وأطير

وأروح أخاوي بجنحاني طيور اليمام

تعبت واللي خذاك آقول طيّب .. بخير

وأتعبني الشعر يوم أبعث رميم الكلام

وأنفخ به الروح وأكسيه الشعور ويصير

بإحساسهم همّ ليت الحرف أخر مقام

للحزن ..ماكان صرت ل هالمواجع خفير

أرقب له الخاليات الموحشات السقام

ولا غزتني تجاعيدي وتوّي صغير

وما كان للصدر من غبن السنين إحتدام

لو ما العزاء إني بوجه الوقت خصمٍ كبير

وإني على كثر طعناته كسبت إحترام

الناس .. ما كان يلفح وجنتي زمهرير

برده ولا أنخى دفا ربعي ولوهم حشام

والحين ياحادي إحساسي وجيشك مغير

يمّي عسى طاب خاطرك وعرفت المرام

ياحادي الشعر منك ومن عناك أستجير

أطلق وثاقي تعبت من السهر والهيام

ياطول ليلك وأنا ما باقيٍ في جفير

عيني من السْهِر لا طلقه ولا من حزام


نواف التركي

ممكن أغنّي على الطاروق


يا معدّي المرقاب هو ظل مرقاب

نرقاه لا ضقنا بكثر الرتابه

بيدٍ لك الله كله تراب بتراب

ولا أشوف في كبد الخضيراء سحابه

لله يا وجهٍ من العام ما غاب

حاضر بقلبي لو طرقني غيابه

يمر بي وتطير من صدري أسراب

شعر وغنى وأطياف حزن وربابه

لولاه ما ورّيت جرحي للأغراب

ولا حضرت ولا عشقت الكتابه

ولا وقف جفني على الدمع بوّاب

ولا سريت بهاجسي يم بابه

عليه يا كثر أصبعي عضّه الناب

ليت الذي ودّاه في يوم جابه

ماكان أضيق إن سولفوا سيرة أحباب

ولا كان أجوب الليل حزن وكأبه

يا سيدي لو قلت لك طاب ما طاب

جرحي ولكن للضلوع إكترابه

خوف العيون اللي تدوّر بي أسباب

وخوف الملام وخوف سم القرابه

ما غير أدرّج قلب مرمي ومنصاب

وعيون خلق الله مخالب ذيابه

الله يعلم ما ذكرتك ل الأصحاب

ولو كان في قلبي من الضيق مابه

ودّ العرب لو أفتح لسيرتك باب

وأنطقك مثل أهل الغلا والصبابه

لكن وحقّك لين يغمرني تراب

لأحفظك لو تمسي ضلوعي خرابه

بيني وبينك دم وعروق وأنساب

ودونك قصر حظي ولا به غرابه

أدون منّك حلم ما يوم قد جاب

شلون بتجيبك حظوظ الغلابه

مدري ولكن يابعد كل من غاب

ماعاد ف عيون الليالي رحابه

ولا عاد فيني قلب يستحمل عتاب

والمقبلات من الزمان تتشابه

يا معدي المرقاب عيّنت مرقاب

نرقاه عن كثر الغثى والرتابه


نواف التركي

هذي هي أخباري


الدرب هذا طويل ويتعب الساري

خذا من العمر عمر ولا أكتفى مني

مقفي مخلّي وراي ربوعي وداري

أدوج صدر البسيطه ضيق وأغنّي

ألبّس الحزن ما يستر به العاري

وأخيط من كبريائي ضحكه ل سنّي

هذي هي أخباري اللي مبطي أخباري

ما جد عقبك جديد ولا سأل عنّي

غير أنت لا جابتك دنياي بالطاري

ومريت مثل المطر بالشوق متحنّي

تتأكد إنك مقيم بداخل أفكاري

وإنك رصيدي .. قصيدي .. ملهمي .. فنّي

وتتطمن إنك قدرت بطول مشواري

تغيّب الكل وأبقى فيك متعنّي

ياسيد الروح لحن الدوح متواري

وأغص بالدمع يوم أكتبك لكنّي

ما أبكيك لأني على هذا الوله ضاري

ولأني خذيت العبر من وقتي ول أني

أخاف يدري بك اللي ما هو ب داري

وأصير مرمى وصبري يخلف بظنّي

وإن طاح ستر الجراح وبارت أعذاري

والليل رتّب شناط بعاده وجنّي

رماح هذا الصباح وطاحن أقماري

ودفنت الأحلام ظلم وصرت به كنّي

أدور داخل رحاة الوقت وأشعاري

تقتاتها الناس جوع وتطرب ل ونّي

الدرب موحش .. طويل وطيفك الساري

معاي نقطع فجوج الأرض ونغنّي


نواف التركي

كلمتين أبيك تسمعها


إصبر علي منصدم روحي بأجمّعها

أبطلق أبهام هذا الغبن من نابي

إصبر علي باقيٍ دمعه بأودعها

من سجن عيني تروح وفدوة أحبابي

لو كان عيب الرجال يهل مدمعها

لكن وشأقول خان الدمع بأهدابي

حاولت أكابر بها لكن نزل معها

مع الأسف من حسبته صفوة أصحابي

أسكت تراها كبيره لا ترقعها

شف خنجر الغدر بيدك ويش سوّابي

شف دمي اللي عليه وشوف موضعها

لله درّك منيشن صح لأعطابي

كنت أذخرك للسنين وسوء طالعها

وشلون قبل العدو خنجرك يبدابي

دع عنك روحي ودع عنّك مواجعها

يطيب هالجرح ولاّ عمر ما طابي

في خاطري كلمتين أبيك تسمعها

قبل أتوكّل على الله وأعلن غيابي

الروح هذي وطن خضرٍ مرابعها

وأطهر من أنك تدوس برجلك ترابي

ولو تغرب الشمس بعيوني لمطلعها

ما أفتح عقب طعنتك للخوّه أبوابي

المشكله مو سنيني كيف أرجعها

المشكله كنت أحسبك صفوة أصحابي


نواف التركي