الله يجازي من يسوي سواتك

الله يجازي من يسوي سواتك

وبذنوب من سوى سواتك يجازيك

مشيت درب الثقل وتحب ذاتك

ما تدري أنه للمهالك يودّيك

غرّك جمالك يا خسارة حلاتك

ما تدري إن ما غير طبعك يحليك

بتقول زينك يشفع لسياتك

الحسن ماهو عن وفا الحب يعفيك

لو التواضع والوفا من سماتك

بعت الحبايب كلهم دين وأشريك

لكن عجزت أغيرك يا جراتك


على الغياب اللي بلا عذر ينجيك

خطاي في توضيح وشي غلاتك

وخطاك في توضيح وشو تغليك

وشلون توصيني وتنسا وصاتك

وتصد عن صوتن تقطع يناديك

ما فاتك التجريح والعذر فاتك

وتبغي الراي الحين ما عاد يمديك

صحيح أحبك بس هاذي جزاتك

بعلمك درس يفيدك ويحييك

تدري وش أبيض من خفوقك عباتك

وتدري وش اللي غرني نظرتي فيك

أدري بتستغرب تصبر وجاتك

قصيدة من واحد كان يبغيك

وتبغي تناظر وإنت عايش مماتك

شف وحدتك والناس تجلس حواليك

وتبغي تشوف أشجع رجل في حياتك

شفني وأنا راحل على كثر ما غليك


محمد بن فطيس

الغالي الحمدان
تسلم يداك على القصيدة الرائعه وصح لسان الشاعر
مجهودك رائع اخي العزيز
بارك الله فيك
لك ودي وعبير وردي

المشاركة الأصلية كتبت بواسطة ريحانة شمران

الغالي الحمدان
تسلم يداك على القصيدة الرائعه وصح لسان الشاعر
مجهودك رائع اخي العزيز
بارك الله فيك
لك ودي وعبير وردي

والله ياهلا بالغاليه
ريحانة شمران
منوره بمرورك الرائع
لك مني أجمل تحيه وتقدير لاعدمتك