فوق هام السحب ( الشعر الشعبي) على متن القوافي

قصيدة الاستغاثة

بديت باسم الواحد النافع الضار
سامع دعاء يونس بجنح الضلامي

اللي نصر عبده على احزاب الاشرار
رب تخاضعله رقاب الانامي

نخضع له ونسجدله اجلال وكبار
الهنا في طاعته مانلامي

واللي بعدها نبتدي بدع الاشعار
من هاجس يبدع بجزل الكلامي

ياخذ من خيار المعاني ويختار
ويروي بها عطاش الكبود الحيامي

الشعر له في محضر الطيب محضار
ولا يسمو الا في لقاء كل سامي

وانا ماجيب عن المواقيف معذار
احضر مع اهل الطيب واكرب حزامي

امشي قدم ويمين ماعود يسار
وارفع نضر عيني على العز امامي

شاعر ولي فالشعر مارد ومصدار
ليا وردت العد ماجيت ضامي

وانا حضرت بلازمي بين الاخيار
طبع (ن) لجداني وابوي وعمامي

في حلة (ن) تجمع طويلين الاعمار
روس الشيوخ مجملين المقامي

شيوخ قوم جالهم صيت واخبار
في وقتنا الحاضر وماضي العوامي

حضرو مقام اللي له المدح والكار
اسمه يعد مع اولين الاسامي

طاريه بين الناس ممدوح الاذكار
تاج الشرف لبسه وشد الحزامي

في ماقفه صامل ولا دور اعذار
شجيع راس وقلب صلب العضامي

وافي خصايل من طويلين الاشبار
قسمه مه اهل المجد راس السنامي

ابو فلاح مدله الضيف والجار
النادر الحر العديم القطامي

حر شهر مجناه من ماكر احرار
كريم يمنى من سلالة كرامي

جده متعّب فاللقاء قحص الامهار
يمسي جنوب ويصبح الصبح شامي

يصبح بدار ويمسي الليل في دار
عقيد قومه فاللقاء والزحامي

طلق ليا عدو بعيدين الانضار
تاريخ مجده مايجيه الملامي

من عزوة تسقي المعادين الامرار
الاد روق وصفهم مايضامي

وعلى الرسول الهاشمي سيد الابرار
صلو عدد ماهل وبل الغمامي



خلف بن زهيميل الحربي