ما ينسينا الخطا حب الخشوم

ما ينسينا الخطا حب الخشوم
ولايطهرك المطر عشرين عام

مخطي ترضى لنا ظلم الظلوم
ومخطي ترضى على شعبك يضام

بايع شاري على شعبك تسوم
مايهمك بالحلال وبالحرام

لاجل شعبك بيننا كنت محشوم
لكن الحشمة خسارة باللئام

يوم فشلنا صواريخ الخصوم
رحت ياوجه الفلس ترمي كلام

من شمال ومن جنوب أمسيتو قوم
وانت تنخى كل مجرم بالظلام

واتفقتوا خذكم الله يا الرخوم
تطعنون الجار وظهور الكرام

لاحيا فيكم ولانفس تشوم
غركم فينا محبتنا السلام

كل غدار تجهز للهجوم
من طمعكم ماحسبتوا للملام

المعارك ماخذت ليلة ويوم
سلموا جند الخطا ما بالحزام

وعود الغازي من الغزو مهزوم
وامست دياره من افعاله هدام

وطاحت قصور التماني والحلوم
واكتفيتوا في طلب ظل الخيام

نحمد الله شيخنا راعي عزوم
والعظايم مالها غير العظام

قام والي يطلب العلياء يقوم
ماينوم اليا بغى غيره ينام

انتهض مثل العقاب الي يحوم
لين جات صقوركم مثل الحمام

شيخنا قرم تحدر من قروم
الملك ابن الملك ابن الامام


الأمير خالد الفيصل