فوق هام السحب ( الشعر الشعبي) على متن القوافي

تعال اضمك دفه الروح بروح
طفه عنا قلبي ولهفة حنيني

أنا بدونك كنني طير مذبوح
يامنتهى أحلامي ويا نور عيني

طيفك ببالي اين ماجيت واروح
الله يلم الشمل بينك وبيني

.....

كل شخصٍ له مزاج وميزةٍ تحسب له
‏الذوايق تختلف والحكم حكم القاضي

‏كل شيٍ في الزمان اللي مضى نطرب له
‏والعيون اليا بكت ما تبكي الا الماضي

‏السوالف فالخلا مع شايبٍ عند ابله
‏افضل من السينما ومن الكلام الفاضي

.....

لـك فــي عيوني دار عز ومھـابه
‏وفـي وسط قـلبـي للغلا كل تقدير

‏ولك فــــي الحنايا شي مـا ينحكا به
‏حتى أحـاسيسي معه دايمٍ غير

.....

‏لاتعاند شوفنـــي عايـــــش وحيد
مامعي في الكـون معشوقً سواك

انت ساكـــن يا الغـلا بيـن الوريد
ما احـد قبلك وصـل في مستواك

يا رقيــق الطبـع يا الذوق الفريد
ليت تعـرف داخلـي معنى غلاك

انت عشق وانت حب وانت عيد
وانت نـــور الكون وانـواره معاك

.....

‏ياصاحبي كنت أمس محشوم
واليوم صد بجيتك وأختصرها

خلك بعيد أبعد من العام لليوم
وأدنى من أحلام النجوم وقمرها

بعض الكلام الي تحليه مسموم
وما كل كف صافحتك تغدرها

كم طيبٍ سأقته الأقدار لرخوم
ويا كثر ناس ننخدع في صورها

.....

‏الناس نامــت مابقــي حد صاحي
ماغير انا واحساس قلبـي والافكار

نمسي نقضـي الليل بين النواحي
ونترجم اشواق المشاعر بالاشعار

هذا شعور اللي في الهجـر طاحي
واللي غدا قلبه من العشق منهار

يمسي يناجي الليل لين الصباحي
والرووح مشتاقـه وقلبـه على نار

.....

‏بعض البشر لا غاب عن ناظر العين
احـس كل الناس في الكـون راحت

وبعض البشر لو غاب ايام واسنين
مااشتاق له قلبي ولا النفس ناحت

انا اشهد ان البعـض ماله شبيهين
بافعاله اللي مثلما الطيـب فاحت

غالي وحُبـــه حــل بين الشرايين
ومكانته وسـط القلوب استباحت

.....

‏ياليـت لو للجســــــم ورشــة صيانه
للبرمجـه قابـــل على الفــك والربط

من شان افرمــت بالجسد كل خانه
واعالــج أوضاعـــــي بإعادة الضبط

اما كــذا حالــــي تدهـــــور امانه
فيرس نظامي خابطن داخلي خبط

كثر السهر هــد الجســد من كيانه
وكثر القلق والهم رافع لي الضغط

.....

‏القلب مغـرم في سمينات الارداف
ياجنس حوى ما احــب الرشاقه

روحي تحـب اللي بدينه بالاطراف
واللي بهــا سمنــه وخفــة لياقه

هذا انا المغــرم ولاعندي إخلاف
موافق بهـا اتزوج وادفـع سياقه

زين البدينه داخلي مالها اوصاف
والقلــب يعشقها لاخــر نطاقه

.....

‏اوقــات اتمنى مــــن النـــاس واحد
يستوعب احساسي اذا جيت احاكيه

يحس بي فــي ضيقتــي والشدايد
ويداوي اوجاعــــي برقــة حكاويه

يا اهل الشعور النفس صارت بدايد
والصدر ضايــق ما لقي من يداويه

والروح محتاجــــه رفــاق وسنايد
والقلب يبغا في العمر من يواسيه

.....