شعرٍ مثل يافاهمين التماثيل

شعرٍ مثل يافاهمين التماثيل

كلٍ يجي شعره بحسب اقتداره.

من عاش ينظر بالسنين المقابيل

يذوق من عقب البروده حراره.

الطيب يخلق من قلوب الرجاجيل

ماهوب في بنك التجاره تجاره.

والرزق من عند الولي بالتساهيل

ماهـوب بالقـوه ولا بالشطاره.

من عاش في حيله وكذب وتهاويل

ياسرع من عقب الطلوع انحداره.

والشور ماينفع قلـوب المهابيل

كالزند وان حرك تطاير شراره.

لو تامره بالعدل يعرض عن الميل

يمشي على رايه بربح وخساره.

والطبع ماينزال غيـره ابتبديل

مثل الجدي مرساه ليله نهاره.

والحنظله لو هي على شاطي النيل

زادت مرارتها القديمه مـراره


الشاعر .. عبدالله بن لويحان رحمه الله