سر ياقلم واشرح على بيض الأوراق

سر ياقلم واشرح على بيض الأوراق
من ماتصور لي معانٍ لهن ذوق

من هاجسٍ بين المعاليق دقاق
يبدي له أنواع من أفراح وغلوق

خل القلم لملون الحبر دفاق
يمضي نهاره بين الاصباع مخنوق

يدرس مشاكل خاطرٍ كل ما ضاق
كن النحر من ونة الجوف مفتوق

انا لشرهات التماثيل عشاق
لوني على قفر التماثيل مسبوق

الفكر يومه انه لشره المثل تاق
تراي وصيته عن الهزل والبوق

معطيه وصفٍ يتبعه قطر تفاق
عن منهج القاضي ترى الطرق مطروق

لاخير في جيلٍ يلفّق تلفّاق
الجيل عنوان اهله فيه ملزوق

والناس كل له تعابير واشواق
والهم على الطامع مشاريه وحقوق

وليا اشتبهنا مصدر الحق فراق
الحق للأول بلا شك وارهوق

الله على والعمر ما دام برفاق
ما دام عن دورات الايام مرفوق

شوف الغدير بحاجر الروض لهاق
والبيت توه باطراف النقع مطقوق

أنا هوى بالي طويلات الاعناق
دلال رسلانٍ لهن وسط وعنوق

جيب الهشيم وشفت للنار سوراق
شفت السنا عن مسحب الجمر مفروق

اليا فاحت اللقمة ترى الهيل لحّاق
يازين كف الهيل بالنجر مصفوق

أشر بدق الهيل يامال الاعناق
خلّ الشفاوي يسمع الهيل مدقوق

ليا من راعي الكيف من مرقده واق
ادعه على الفنجال والحي مرزوق

يوم الهدوس بسكرة النوم غراق
يامحلا صوت الفناجيل مسيوق

بيتٍ يزورونه شريفين الأخلاق
بيتٍ شريف وراعي البيت ماثوق

ياحلو مجلسهم تحت عفر الاوراق
في خايع نبته شمل كل خنتوق

وليامشي دواج في بعض الاصفاق
جاب الزبيدي من نشانيش رقروق

مدهال من يعبالهن صلف الاطلاق
واللي تشايل ديدها تقل جالوق

صفرا إلى حنت عطيفه تفهّاق
جاها حويرها من الحبس مطلوق

وناسة الخاطر يزيلن الأغلاق
ودنياك ما داوم طربها لفاروق

صيور زفرات الهبايب بالأدواق
لابد من يومٍ يصير الهوا دوق

من حسب الدنيا على جبر ودقاق
ماطاب عيشه لويحوّق الذهب حوق

ماضاع حرفّي على السفن حدّاق
ولادام من عد الذهب وزن وعروق

والبخل مايغني رديين الأوفاق
كثيرهم ثوبه على المتن مشقوق

لو تشنقه ما ادرك ثمن موس حلاق
إن كان ما حدٍ خلصه مات مشنوق

والجود مايضعف زكيين الاعمال
اللي عن الزابن دفع منهم السوق

مكرمين الضيف بكبار الاشناق
جل الغنم وإلا عداوٍ من النوق

وصحونهم ماتنقدر كود بحلاق
من كثر مافيها من الذبح معلوق

وقصيرهم في مبركٍ دمث ورقاق
كنه عن العيلات في راس شاهوق

يفداهم اللي لا شرف السلم هتاق
اللي ولد جاره من ابناه ملفوق

وصلوا على المختار مالاح شعاق
ما انزاح ليل وبزت الشمس بشروق


مرشد البذال

شكرا لك على المشاركة
رائع ماتقدموه من ابداع وتميز
ننتظر المزيد منكم
لكم مودتي

المشاركة الأصلية كتبت بواسطة نسيم الليل

شكرا لك على المشاركة
رائع ماتقدموه من ابداع وتميز
ننتظر المزيد منكم
لكم مودتي

الغاليه نسيم الليل
أشكرك لتعقيبك الرائع والمميز
كُل الموده والتقدير لاعدمتك

شكرا لك
بين مواضيعكم نجد
المتعة دائماً
وفقكم الله لقادم اجمل

المشاركة الأصلية كتبت بواسطة ريحانة شمران

شكرا لك
بين مواضيعكم نجد
المتعة دائماً
وفقكم الله لقادم اجمل

ألاخت الغاليه ريحانة شمران
منوره بمرورك الرائع والمميز
لك مني أجمل تحيه وتقدير لاعدمتك