ماحيٍ الا مقتفيه المماتي

يا عيال ياللي تفهمون الوصاتي
وصية اللي جرب الوقت تجريب

جربت من سمر الليال افتخاتي
مع مثلهن من بيض الايام تقريب

ياكثر ما مارست انا في حياتي
وكم ليلة يخطي بها الحظ ويصيب

وكم ليلة راحت عليّه فواتي
وانا بغفلة تطلع الشمس وتغيب

وتغيب ثم تطلع وانا بلهواتي
ما اذخر لباكر كود مايذخر الذيب

ولا هو جزع مما جرى واشتماتي
بس اني اذكر عن هكا الوقت تعريب

ماحيٍ الا مقتفيه المماتي
ولا شب الا بعده العجز والشيب

ولا بد ما تقضي ليال الحياتي
امرض واطيب وعقبه امرض ولا اطيب

وخلاني للساقه كثير التفاتي
قل الزهاب ولا بوجهي معازيب

ماعندي الا سيتي وحسناتي
لا ازيد بالحسنة ولا انقص من العيب

يالله ياكاتب فروض الصلاتي
ياقابل التوبة من العبد ومجيب

تجعل لنا من باب جودك نجاتي
يالله ياللي تعلم السر والغيب


محمد بن شبيب الحداري