05-04-2025, 11:47 PM
|
#1 | ||
|
مساعد للمدير العام ومستشار للمنتدى
 |
البارحه مادق فالصدر هوجاس
البارحه مادق فالصدر هوجاس
ولا تضايق صدري من الطواري لا ناحت الورقا ولا هب نسناس ولا نشدت عْن الرفيق المباري ليلة غريبة لا مشاعر ولا احساس ساري ولا ادري ليه بالضبط ساري مغير اجر الصوت واجر الانفاس واخذ و ادرج في فجوج الصحاري من شافني يوم ادرج قال عساس ماكن هذي دار جدي وداري الارض مثل العرق والعرق دساس ترد راعيها عليها اجباري احاول اقراء ما بقا بين الاقواس لو ما بقى لحروفه الا مواري من يكتب الذكرى على حمر الاطعاس لا يلحق الشرهه هبوب الذواري وجداه يوم الحرّ ماتم قرناس قبل تحطه فالشباك القماري فقد الشغف خلاني افقد معه ناس معاد اعرف اصبر واجامل واداري اضحك مثل ضحك المجامل فالاعراس واعوي لحالي مثل ذيب الغداري واحاول اشب الامل واحرق الياس بيني وبين الذات ذات الصواري على رجا حلمٍ لمع مثل الالماس واقفا على غفلة وطال انتظاري والمارد اللي كان للحلم مقباس عيا لا يطلع مع خشوم الغواري والحمد للي رحمته تذهب الباس الباري اللي يجعل الجرح باري من شافني وانا على حد الافلاس يحسبني املك صك بنكٍ تجاري ماني من اللي لا ابتلش يرخي الراس الشي هذا دوره عند غاري ولاني من اللي للمعاريف دساس احفظ جميل الناس واحفظ وقاري للطيب شان وللثناء وحدة قياس ويقدره رجلٍ على الطيب ضاري مافيه نعم بدون طاله ونوماس ولا فيه صيت بدون كاتب وقاري وانا بنات افكاري معربة ساس مهيب سلعة بين بايع وشاري واللي بنات افكاره لساير الناس يبيعهن فالسوق مثل الجواري عناد الشيباني
|
||
|
|
|
|
العرض الشجري