ياالله ياربـي عليـك التساميـح

ياالله ياربـي عليـك التساميـح
لولاك عرجات السنيـن عرجت بـي

منك أستمد العون رهبه وتسبيح
والعفو كان جروح وقتي صطت بـي

الحظ كوره والنوادي ضحاضيـح
سددتهـا بالعارضـه واحدرت بـي

شوطين أضافيه وركلات ترجيح
وآخـر نهايـه مابعـد سجلت بـي

أقول لحظه للجماهيـر وتصيـح
خسرتها كاس الفرح واخسرت بي

لو طاحت انفوس الرياجيل ماطيح
عليـت نفسـي للعـلا واعتلت بي

صم الجبال اللي حجرها صلافيح
لو جيت أهـز حيودهـا مادرت بـي

لكن لي مبـدا معـزه وتصفيـح
أبـوي سمانيبـهـا واستمت بـي

اذخر بواعيس الرجال الطحاطيح
وأبقى على هقواتها اللي هقت بـي

اقدر ظروف الوجيـه المفاليـح
اللـي ليامـن جيتهـا رحبت بي

قولت هلا واقلط على هبت الريح
ثروة غنى فيها أغتني واغتنت بـي

ماهو كلام ملاعبيـن المسابيـح
اللي نموذج كتبهـم غيـر كتبـي

ملقحين منمـق الهـرج تلقيـح
ياما حكت عنـدي ويامـا حكت بـي

تصوم وتصلي قيـام وتراويـح
لكنهـا بالـشـذب ماقصرت بـي

عيال رعيان الحلال السواريـح
لو حصلت ضحكن علي ضحكت بـي

لولا العصا كان الكلاب النوابيـح
عن مشرب العد العذي صدرت بـي

والصبر زين وللمغانـم مفاتيـح
واكحل عيونن بالحسـد تلتفت بـي

سلطان الهاجري