ياللي تمنون الفلل والملايين

يـالـلـي تـمـنـون الـفـلـل والملايين
مـانـي معـارضـكـم بماتطـلـبـونـه

ادعــي لـكـم واقــول يـاربـي آمين
حـقـق لـهم يا رب ما يرغـيبونـه

لكـن تعالـوا يالربـع نـاقـف شوين
بـالله عليـكـم هرجـتـي تسمعـونـه

ترو الحظيظ اللي سليـمٍ مـن الدين
وجماعتـه فـي مجلسـه يدهلونـه

ويقدر على وصل الضعوف المساكين
ويقضي لزوم اللي بحاجه يجونه

وان حل ذكره بمجلـسٍ قيـل نعمين
وليـا سعـى فـي مطلـبٍ يقـدرونه

وعنـده عـيـالٍ عــن الرذيـلـه بعيديـن
راس الابــو بأفعالـهـم يرفعـونـه

وعنده من الخفرات وحـده عـن اثنين
تربّـي عيالـه وسـر بيتـه تصونـه

ودايـم يكـون اول صفـوف المصلين
ولـه بيـت ملـكٍ عيلـتـه يسكنـونـه

وكافيـه ربـه شـر انـس وشياطين
شـر المظـل وشــر مــن يلمـزونـه

هـذا قبـل يوضـع علـى راسـه الطين
وقبـل الـربـوع بحـفـرةٍ يدفنـونـه

وإلا بعدْهـا مابقـى مـن المنـى شين
إلا رجــا رحـمـة حكـيـمٍ بكـونـه

ارجيـه يلطـف بـي ومـن النار ينجين
انـا ومـن لطـف الـولـي يرتجـونـه

واليا حصل صحة وستر وحفظ دين
باقي الامور ان ما حصـل يجـاز دونـه

سطم فهد الخليل