وقتٍ يميّل بي واعدلْه ويميل

وقتٍ يميّل بي واعدلْه ويميل
مبطي وانا حالي مع البهذله حال

اصبر على ضرب السيوف المصاقيل
واقفي عن الحاسد ولا اشيل مثقال

لكن بلاي اني كرهت التماثيل
شيٍّ يسميني به الناس محتال

والخلق تفرح به من الراس للذيل
واكبر بلا يومه رفع روس الاذيال

وانا يصبرني على القهر والويل
قلبٍ على صادق نواياه ما زال

لا جيت اجامل ما لقيت اي تعليل
للكذبه اللي بالمعاليق تختال

آحسها مرّه على الكبد بالحيل
واشرب لها من صافي الود فنجال

علّ العذر يسبق خطاياي و يزيل
ذنبٍ لقى بين السواليف مدخال

يا صاحبي خلك من القال والقيل
ما ينفعك بكره هل القيل والقال

شف صاحب الناقه وشف صاحب الفيل
شف كعب وش سوى و شف كعب وش نال

ماني مزينها لك وْرود واكليل
والاّ مواريها بتشبيه وامثال

الحرمه اللي ما تحصل رجاجيل
تسترجل وتصبح مع الوقت رجال

تآمر ويسمعها مخنذل وخنذيل
تمشي ويتبعها محمّل وحمّال

لا بارك الله في وجيه الهناديل
ناسٍ برجلين المَرَه تفعل افعال

لا دزّتَه رجل المره كنه السيل
يدهمْك و يزلزل مواطيك لا سال

وان شافتَه باعَد تجرّ المواويل
لين الخطا يركد على صوت موال

يا صاحبي رجلك ولا مَدحة الخيل
ما بالمشي سَبّه ولا دام خيال

رايك تمسّك به ولو فيه تضليل
ازين من علومٍ بلا قيد وعقال

والصبح يكشف مساري هل الليل
والليل عيد اهل الخطايا والانذال

واللي على شانك يجاملْك ويميل
يا ما عشان اللي يعاديك قد مال


عبدالرحمن العمري