بديت في مشراف والجو عسّاف

بديت في مشراف والجو عسّاف
في خايعٍ ما دوجوا به أنذال

وشبيت ضوٍ في الرفا تشعل أطراف
ودنيت معاميلٍ عريبات الأشكال

أحمس لها البري على جمر الأسلاف
نيمة يماني.. ريحها يقعد البال

في دلةٍ صفراء من الودق نحّاف
رسلان تزهى لا تكيّت على الجال

والنجر صوته يرجف القاع رجّاف
يصوّت لـ طرقي تعنّى ولا زال

يُساق لـ القروم ذربين الأوصاف
أهل الرباع ومكرمة كل مرمال

ما هوب لـ الخمة ولا كل هلاف
خطو الردي اللي عن الطيب ميّال

خاو السباع اللي على المرجلة وقّاف
واترك ضعيف الروابع.. خايب الفال

ترا الخوي سيفٍ لـ جنبك و سيّاف
محزم ظهر.. لا مالت بحملك أحمال

هذي سلوم البدو يا زين الأعراف
تبقى على مر الزمن مضرب أمثال

بن شملان الصلاحي الدهمي