إذا كان الفرح يرسم على وجه الشقي حاله

إذا كان الفرح يرسم على وجه الشقي حاله
علام الأرض ما تقوى تحمّل مشيتي وخْطاي

غشى بحر الفرح صدري وخذاني اليوم في جاله
وبديت آحس ما بالكون يسكن عاشق شرواي

رجع لي خلي الغايب بعد ما حرّم وصاله
وأنا اللي طول هجرانه جرحني وأيّس برجواي

صحيح إنه رحل عني وترك قلبي على فاله
رحل وأتلى العهد منّه/ طلب أنساه/ وقولة: باي

رجع لي وخابر قلبي يحبه فكل أحواله
رجع لي والسبب أدري صفا قلبي وطول دعاي

وأنا كالعاده أتناسى قسى طبعه وغرباله
عشانه بس ما يندم إذا حس بكثر شكواي

رقص حتى القلم فرحه وسطّر مابدى فباله
وأنا اللي ربعي من اسبوع ملوا من كثر مغناي

تعالوا ياعشاشيق الطرب غنوا لي مواله
أبعزف لجله أبياتي وأخلي له قصيدي ناي

تعالوا صفوا بجنبي ونوقف كلنا قباله
رجاء مع بعض وبصوت واحد ردّدوا وياي

هلا باللي كثر حبّه ينسّيني قسى أفعاله
هلا بالقلب/وعروقه/ونبضه/والنفس/والماي

هلا باللي كسب رهنه على عبدالله وناله
يغيب.. ولارجع يدري بأنه ما براسي راي

هلا في تاج راس الحسن جاني تسبقه هاله
من التصفيق والتصفير أحسه واسمعه باقصاي

هلابه كثر ما خلا بغيابه حالتي حاله
كثر ما شارعه يشكي وأنا (تمتير) رايح جاي

يقولوا أصحابي ف(خلي) رجع في وضع يرثاله
وقالوا فرصه وجتني عشان أحطه بمخباي

وأنا ادري الحِسْد ذابحهم وكل قال ما قاله
عصافير الشجر طارت وأنا عصفوري بيمناي

وزنت الناس في كفه.. ورجح في كفه لحاله
غلاته لا بغيت أوصف مداها ترتبك أعضاي

أحبه حب لو أحلف ف(ليلى) قيس ما شاله
أحبه موت ياعالم وأنا داري بكبر بلواي

وأنا ياسامعين الصوت لو كانت بها ثقاله
أمانه لا تلوموني إذا مليتوا كثر غْناي

عبدالله الظفيري