اتذكر النار يوم النار مشبوبه

اتذكر النار يوم النار مشبوبه
واتذكر العائق اللي بينك وبيني

واتذكر العاذل اللي مصّخ اسلوبه
ما يدري انك غديتي مني وفيني

ايقنت ان قسمة الارزاق مكتوبه
وشكرت ربٍ على النيات معطيني

من كثر ما صرت ابوس ايدي مقلوبه
نسيت شكل الخطوط براحة ايديني

ياذهول عقلٍ يشق الثوب وجيوبه
جيت بعيون المريب وقلت اخذيني

جيتك بقايا نفس و اطراف مكبوبه
وصرتي مغذي تغلغل في شرايني

يا زينها لا جت الخطوات محسوبه
ويازينك انتي وانا وياك يازيني

بساطتك مثل خبز البر و الروبه
وصعوبتك تكمن بانك عرفتيني

يا فرحة اللي بدا بالشي يا دوبه
احس من لذتك ما عاد يمديني

انتي اشاعات جيلٍ كان اكذوبه
وانتي علامة سقوط الكون من عيني

وانتي سبب قولتي" و الله و الكوبه"
يوم الخلايق بعد شوفك تلاقيني

يا نقطة النون مرفوعه و منصوبه
حطي نقاطي على حروفي و حليني

جيت اعترف لك بانك صدق ملعوبه
ويكفيني انك تربيتي على يديني

نواف الدبل