أنا عشت بالشـدات ما عشـت بعنايـه​

أنا عشت بالشـدات ما عشـت بعنايـه​
وصحيح إني ابدوي لياقلتـوا إبـدوي​

عطاني زماني مـن تجاريبـه اكفايـه​
وعرفت الخطأ والصح والنقص واللّوي​

وبرق لي على الضيحة كما برقة مرايه​
وورّدني سراب من طمع فيه ما روي​

وبراني كما يبري القلم وسـط برّايـه​
ونزع مني أخلاقـي وخلانـي بـدوي​

فترى الناس ما كل يبي ينوخـذ رايـه​
ولا كل من جاب المواريد مـا غـوي​

ولا كـل حيـد تنقلـه يصلـح ابنايـه​
ولا كل جـدد لا تراكيـت بـه قـوي​

ولا كل من صادقت تبدي لـه الغايـه​
ولا كل من يضرب فجوج الخلا خوي​

سعد بن جدلان رحمه الله