الناس قالوا كل مطرود ملحوق

الناس قالوا كل مطرود ملحوق
وانا اخالفهم بالمثل والسبايب

يا ماطردنا بالهوى حب معشوق
وما طالنا غير العناء والتعايب

لكن تجي لاجابها الحظ من فوق
ويصبح منامي فوق حلو الترايب

والرازق المعبود والعبد مرزوق
يا ما عطى للعبد جل الوهايب

ياهل الهوى حب الغظي ساقني سوق
وانا على شانه تعَّبت الركايب

مركب غرامي يشتكي هزَّت الشوق
وتمطر عليه من المحبه سحايب

لاقلت للمجمول انا فيك مشفوق
قال ابتعد اشوفك اليوم شايب

مايدري اني بالهوى صرت مطفوق
لو تابوا العشاق ماني بتايب

ياليتني ماشفتها داخل السوق
من شفتها ياناس والقلب ذايب

أبو خديدٍ كن تلمع به بروق
وريح الشمطري بين شقر الذوايب

عليك قلبي ياهوى البال محروق
مير ارحميني قبل عوج النصايب

نجم الاسلمي