عديت لولاح ٍ طويل ٍ مهايف

عديت لولاح ٍ طويل ٍ مهايف
للحر الاشقر في علاويه مسكان

وللريح في شامخ ركونه هفايف
لاسقاه من وبل الشخاتير ودان

لانه شعف قلبي وزاده شعايف
وذكر علي صويحبي ناعم البان

لا عاد مبدا ً بالرجوم النوايف
من واق راس الرجم جا منه ندمان

وحولت للموتر واخذت الكلايف
نويت للمطراش ماني بكسلان

مالي لزوم ولا ذكر لي وظايف
الا دواليب الحشا شب نيران

طرى عشير ٍحط قلبي نصايف
وبيني وبينه يقنب الذيب سرحان

ماني من المطراش والبعد خايف
باجيه لو دونه قرايا وشعبان

اركب الدربيل روس الحتايف
واهزع وانشد كل ماشفت بدوان

بدو ٍ يعنون القلوب الولايف
شهرين باوطان ٍ وشهرين باوطان

يمشون في شف البكار السهايف
ليا لاح وسمي ٍعلى جو ساقان

ومصيافهم لازاف نبت المصايف
بيمن حجول وبين خثل وحيزان

معهم غنوج ٍ للعشاشيق عايف
وانا تسلهم لي بخدرات الاعيان

سود ٍ هدبهن للمحاجر لحايف
من ناوشنه بالهوى طاح مرضان

عين القضيب اللي دعي للعلايف
جاي ٍبه الطاروح من يم حوران

عدل المناكب والمواكر كلايف
جبر الثنادي واسود الريش عريان

وان بلجت لي الثمان الرهايف
عفر ٍتحط عروق كبدي هذيان

يذبل عسلها بين حمر الشفايف
تقول واشعا من اللون دمان

هيما ًشناح الطول نبيا ردايف
والعنق نابي فوق والعود ريان

والصدر بارز والخواصر نحايف
وعفر ٍمثل لون الدراريج سيقان

ونهود حمر ٍفي حشاها وقايف
مابين تفاح ٍومابين رمان

لولا الجدايل دونهنه سدايف
شفت القمر في مفرع الصدر لابان

جدايل ٍ تلفح سواة السفايف
يلحق سبلها روس الاقدام لحقان

غيد ٍمن الغزلان فيها وصايف
ركزت معنق والتفاته وحجان

تلحني لحة قطيع ٍسنايف
جاي ٍبها من ديرة القوم عتبان

لو بان لي منها الجفا والجفايف
صديت عنه ورحت ميس وقنعان

خل ٍطواني طي بيض الصحايف
واومابي اوماي الهبايب للاغصان

وعيني عبرها كل يوم ٍذرايف
دموع ناظرها كما وبل الامزان

والقلب عن كل الاوادم مسايف
ويلاحي الورقا بجرات الالحان

لولا الضلوع الي تضبه كتايف
يبا يجي له من سبايبك جنحان

يا زين خلك بالمضانين رايف
واعطف على صاحبك ما انته بخسران

خلك تعوضه بالجفا بالخلايف
والسر لا تبديه والامر كتمان

اكمل جميلك بالعلوم الطرايف
وما تفعله محسوب مافيه نسيان

لا تستمع باهل الهروج الخرايف
اللي مصادرها مناجيب شيطان

ناس ٍتحط الها وقيده وحايف
وتولع النيران من بين الاخوان

حتى المقفي يلحقونه قذايف
لو كان ماله فيه مدخل وبيبان

سهل العتيبي