وإن تسلَّيتْ يا وَجهٍ يدفّ النوايب

وإن تسلَّيتْ يا وَجهٍ يدفّ النوايب
الهبايب على بال القصِيْد أجوديَّة

جِيْت أدوَّر ورا جِنحك ربوع، وقرايب
والديار أمحلَتْ، وظنون بالي جرِيَّة

كيف أجوَّد عزومي، وأتلع الجِيْد غايب
قبل روحي تمادى بيْن جَرْح، وخطيَّة

لو أعرف القدَر عقب التعب ويش جايب
ما تعرَّضتْ.. تيار الهبوب القويَّة

يا سميّ الضيَا، ما أدري سمي الهبايب
وِش خذى منك عسَّاس الديار ضْحويَّة

يوم أوْقف لـْ عينك في وجيْه الكتايب
طِحت قدام رِمشك.. خالياتٍ يديَّه

أعرفك قبل أخلق لـ كلَّ كلمة سبايب..
من بنات الرياح -أردى وصوفك-: عبيَّة

كنت أسايرك؛ ليْن أميل فوق الترايب
وأرتمي.. ليْن أردّ أوَّل نهارك عليَّه..

ليه قلبي غدى من صوتك العذب ذايب
والهوَى شرَق، وعيون المشاوِيْر حيَّة

جعلني لا تساقيت الظمأ، والمصايب
أتردَّد على غصنٍ فدى العمر فيَّه

لو تركت الديار، ولو عقرَت الركايب
نَجد ما كانت إلَّا في حضورك عَذيَّة

رحت بينك وبيْن أوَّل حياتي: نهايب
ما معي حيلةٍ.. فـ دروْبك السرمديَّة

فالليالي شعورٍ.. يُوْدِع العقل شايب
وفي الموادع.. كلامٍ يوْرِث الكبد كيَّه

وأنت لولاك ما هلَّت عيون السحايب
ولا استمالت عصافيْرك: غصونٍ نديَّة

أتصدَّد، وأهاب من العيون النشايب
وأنت حتى عيونك.. فـ الهوَى حاتميَّة

كلّ ما قلت: يفداك الوَطن والحبايب
شفتك الدار، وحدود الوَطن، والهويَّة


محمد السلطان