ديوان قصائد لشعراء المملكة العربية السعودية (متجدد)☘️☘️

قصيدة الهيل والنعناع والقرفه
الشاعر: زايد الرويس زايد الرويس
#العصر الحديث
#المملكة العربية السعودية
0
141 مشاهدة

أمر من عند بيتك والمح الغرفه

شبّاكها يشتكي غفوة ستايرها

واخذ نفس من قصيدي واشهق بحرفه

واجدّل ابيات شعري من ظفايرها

واحس قلبي يغضّ شوي من طرفه

ويذوب في ملحها قدام سكّرها

الترفه اللي كثر ما احبها ترفه

أضيع فيها من اولها إلى اخرها

في صوتها الهيل والنعناع والقرفه

وفصمتها مسكها ما مل عنبرها

لو حبها ذنبي اللي كنت مقترفه

حبيتها اكثر وللزلات غافرها

ولو حبها الموت ما مانعت في صرفه

لعروق قلبي قبل حتى لا اشاورها

ولو حبها صبح يتسلل من الشرفه

حلفت لعيونها ماني مسكرّها

لكنه الحب عشته زين واعرفه

معها لقيته وعشته في مشاعرها

لو انها بس لا ملّت من الغرفه

تمر شبّاكها لعيون شاعرها!