اخترنا لكم شعر نبطي وفصيح

[الحمدان]

اذا ارتخت هاك الوساع المظاليل
‏حلفت بان الصبح والناس عميا

‏انا البدو وانتِ مطر باول سهيل
‏عليك كبد القوم يا نجد ضميا

.....

[الحمدان]

بقى ذنب واحد من ذنوبي عجزت انساه
‏بعد ما هداك الله يا قلبي على التوبه

‏لك الشوق يا ذنب تركته لوجه الله
‏عسى سيئات الشوق ماهي بمحسوبه

.....

[الحمدان]

‏فاقدٍ سمعي هلاه ومرحباه بلا سبايب
‏واقفٍ صوتي على آخر سالفه لحظة رحيله

‏يوم تتركني وأنا وجهي من الأيام هايب
‏وانت ما كانت تهيّبك المسافات الطويله

‏لين مرّت ليلةٍ كنت انتظرها وانت غايب
‏صبحها كنت احسب انه عاد عيدك ياجميله

‏وعاد انا اللي كنت اشيل الذنب لين اجيك تابب
‏واتحامل لأجل حبٍ من وراء صدري سبيله

‏كيف رحت وخاطرك طايب وهو ما كان طايب
‏من جبر کسره ومن عدّل مع الأيام ميله

‏من رسم في وجهك المهجور ضحكات الحبايب
‏بعد طفّى سرمديّ الليل قمراه وفتيله

‏من نفض صدرك وعرض حزنك وجيه الهبايب
‏يوم كنت تجامل الضحكة في الأيام الثقيله

‏من ذكر معك البعيد ومن نسي معك القرايب
‏لين صرت اصحابه وربعه وغاليه وخليله

‏من عطاك سنينه اللي راح ماضيها نهايب
‏وقال يا كثر السنين اللي معك لو هي قليله

‏يوم أفز لشوفتك وافرح واحث لك الركايب
‏كنك الماء اللي تفز لشوفه البدو المحيله

‏اعشقك عشق الطفل وأقدرك تقدير شايب
‏واحتويك عن الليالي اللي سوالفها بخيله

‏ما دريت الا بعد ما رحت مرواح الذهايب
‏ومرّك اسمي لين عيت ضحكتك ل اترتكي له

.....

[الحمدان]

ولا زلت أحبك وأدري أنك أهم أشياي
وأشوفك أمانٍ كل ما أحتجته أجي له

ليا أشتقت لك والأرض راحت قصيد وناي
يا صبر المحب ليا بكى من مواويله

لو أمشي على الماء لا ذكرتك نبت ماطاي
خزامى وورود وكل وادي دَرج سيله

عسى باقيٍ لي معك ضحكه ترد رضاي
ولي عمر مهما فاتني معك باقي له

.....

[الحمدان]

يعمّ الصمت وتطول المسافه والوله ما قلّ
وأنا ما عشت أدور فرصتي وأمرها عادي

أتلّ خطاي في عرقٍ من الصحراء وأنا ما أدلّ
طريقٍ لو تعلّق فوق جفني طوّل سهادي

تمثنيت الحنين وضاع صوتي فالسهلّ والتلّ
هنا ما هبّت أنسام الهوى مع مفرق الوادي

يا رب الآدمي والليل والبيداء ورب الكل
أنا لولاك أضيّع صيدتي وأكسّر شدادي

يا كم ضاعت ليالي وأنجرح صبح ورفيقٍ زلّ
على نفسٍ قدايمها علي تعاتب جدادي

ما بين أذكر وبين أنسى وبين أسعى وبين أملّ
مراحل والمراحل بينها موتي وميلادي

.....

[الحمدان]

تنازعني عليك النفس والنفس آفة الغاوين
‏يا صعب مجاهد شفوف الهوى والنفس غوّايه

.....

[الحمدان]

أنا لا بغيت أسج وأسلى مع الهوجاس
تذكرّت همٍ في الحشا صار له مده

ذبحني غلا من دونه الباب والحرّاس
وهو بينهم دمعاته مجرحّه خده

ألا يا عيونٍ لجلها خاطري حسّاس
ترا الوقت مجبرني على البعد والصده

فإذا جاء نصيبك وافقي له يا بنت الناس
ولا تحترين اللي زمانه وقف ضده

.....

[الحمدان]

‏على سكة متاهات المشاعر وآخر المشوار
‏خذتني لهفة أشواقي على ذكرى بداياتي

‏غريب استوطن أعماقي وسبب حالة استنفار
‏وضيع كل تفاصيلي بعد ما شتت شتاتي

‏نطق حرف ونزف جرح وتحرر عقلي المنهار
‏وكتبتك للسكوت اللي تكلم عن متاهاتي

.....

[الحمدان]

‏أنا مهما جفيتك.ردّني لك يا حبيبي الشوق
‏وأجي كنّي مسولف لك قبل ليلة عن أحلامي

‏مكانك هو مكانك ما وصله بغيبتك مخلوق
‏يا أول من فتح باب الكلام وصدّق أوهامي

‏حبك والله إنّي ما قدرت أقولها مخنوق
‏وخايف أخسرك لو أخسرك وش قيمة أيامي

.....

[الحمدان]

كل ما بانت خيوط الشمس من شرق المدينة
‏ما ذكرت إلا سناك وما فقدت إلا مجيّه

.....

[الحمدان]

جليس وحولي الدنيا دمار ولا عليها باس
أنا مستمتع بحزني لو أنه زوّد الجيَّه

أعيش مع الحزن مُتعه عجزت أعيشها مع الناس
وتعبت أرجي الدنيا تجيب أيام ورديّه

أنا أذكر حزني التافه وأنا أذكر ضيقة الأنفاس
أنا أذكر دمعة عيوني وأنا أذكر رجفة يْديّه

بعدك الوقت غيرني وصرت أجلس مع الجلاس
بعد ما كنت في عزله وفي حاله رماديه

بعد ما كنت أزرع لك وأجيك وفي يديني فاس
ترا أرضك بعد فقدك تموت ولا هي بـحيّه

تغيّر كل شيء فيني وبدلّت الأمل بالياس
وكل أشياءك اللي تهمّ ما هي ذات أهميّه

[الحمدان]

وين انت ياللي عالـمـشاعر تسـلـطـنت
واشـغلـتـني عن كـل كـائـن ومخـلـوق

كل الـعـيـون تطـيح من عـيني الا انـت
الـيـا ذكـرتـك هـزنـي طــاري الــشــوق

.....

[الحمدان]

يا وجودي كل ما هب نسناس الشمال
وجد من حده زمانه على الي ما يبيه

ويا وجودي كل ما اضحيت ثم مال الظلال
لاغفت عيني ولا ذقت شي مشتهيه

وجد من قفى وهو في رجا كلمه تعال
والتفت من عقب ما اقفى ولا احد لد فيه

وياعذابي لا دنا الليل من روس الجبال
وانقضى يوم من العمر ماعاد ارتجيه

وانتي ابعد من سمى الحلم ووصالك محال
يابعد من هل دمعي ضحى الفرقى عليه

ياغناتي لا تحسبين دمعي يوم سال
ضعف ولا خوف ولا كذا ولا كذيه

والله اني من رجال يضدون الرجال
لكن الحظ الردي ساق دمعي كلبيه

والله اني كل مادار حوليك الجدال
قمت كن الموت يشر على قبري بيديه

والله ان قد لي وانا اصد لا جالك مجال
صدت الي لا تضايق تذكر قبر اخيه

ومن سألني قلت مدري واذا عاد السؤال
قلت له تكفى سؤالك ترى ماهو وجيه

وش تبيني اقول عن من ترى ذبحي حلال
والخطاء منها علي صرت احبه واهتويه

عذرها لو ماتعذر مثل واضرب مثال
واحد ما يعرف الحر الاشقر يشتويه

وان رجعنا للتواصيف لله الكمال
لانتهى ليل المزايين جاتك تبتديه

كنها غفل مع البدو طاويها الحيال
ما يميز وصفها الا نبيه من نبيه

واهني الي وصلها وذاق من الزلال
رشفه مع غفله الناس من فيها بفيه

وعزتي للي سواتي عشق ما لا يطال
ويوم طاله ضيع الحلم بين امه وابيه

ياول احلام الطفوله على حد الخيال
الرجا بالي حمى البيت من حمله بريه

حال دونك سيف عنتر وتاسع حول حال
باثر حول حال دونك وانا ادعي هيه هيه

هيه يالي غرك الحسن واطغاك الجمال
والله ان اموت ما شفت لاوصافك شبيه

لو يسام الحسن والتيه بجنيه وريال
ما بقى في سوق غيرك ريال ولا جنيه

كيف اهدك للمقادير وانتي راس مال
راس مال ومال والمال ما يعطى السفيه

حافظك حفظي لعيني ورمشي لك جلال
وانتي تشحين بالماء وانا شفي مويه

شايف ظلمك وساكت وطال الليل طال
لاتركتي طعن قلبي وانا ما قلت ليه

لو بقى للهيل صبر على فوح الدلال
ما بقى للقلب صبر على شي يجيه

كنت احسب ان الغلا زال واثره لا يزال
في الحشى ما كنه الا دخيل في الوجيه

ساقني حبك على الموت وسنيني هزال
والظروف اقسى من الظلم للعرض النزيه

وانتي تسوقين عقلي على حد الهبال
تحسبين ان من بغى شي يقدر يشتريه

ولا انا ياوجد حالي وجود ما يقال
وجد من ضحى بغاليه لرضى والديه

ويا وجودي ياول العمر قبل البس عقال
وجد من باع اخر العمر في رغبه ذويه

ويا وجودي كل ماهب صوتك من شمال
وجد من حده زمانه على الي ما يبيه

ضيدان بن قضعان

[الحمدان]

راكب الي ماتجيبه بالبيد
ولايجيبه بهبهاني ولا وضيحي قطر

ادهم وسم الجميح على جنبه جديد
مهبل الي يوم عرض يحسبنه شفر

جمس شكمانين ملقبينه با الوليد
من سرابه ما يغبط القصيبي والجبر

كاتبين في ضمانه حديده ما يبيد
تمرة قاري عليها حفيد ابوبكر

كن وجهه لانطحته تشعشع يوم عيد
وانقفيته كنه السيل لاسال وحدر

وان عرضلك في مزاياه من عنق الفريد
وان ركبته تحسب انك على سطح القمر

دقته نغمة عبادي على سلم فريد
لا عزف الاول وجاوب عاشر وتر

لاشتغل قالت شكامينه اركد يا حديد
والقزوز تقول للقاع روح يا فقر

كن شكمانه الايمن صدا عبد المجيد
وكن شكمانه الايسر صدا نايف صقر

والبلوف تقول للكهربه هل من مزيد
والسيور تقول للمروحه اين المفر

كل اغانيهم على درب واصل يا عنيد
لين تلفي قصر شيخ العليا شهر

سايقه من صلب ربعي وله باس شديد
ما يخاف البعد والليل والموت الحمر

.....

[الحمدان]

العذر لويحسب على الرجل تقصير
فرضٍ ليا اخطا للرياجيل يبديه

وبعض الخطايا تحتملها المعاذير
وتدمح وتحسب شبه غلطه وتنبيه

وبعض الخطايا ما لها اي تبرير
ولا عاد فيها لا لماذا ولا ليه

لكن على شان الرجال المناعير
يدمح خطا المخطي من الهيه للهيه

الا ليامن عادها عقب تحذير
واخطا علي بالعمد مالله بحاديه

واصبح بحلقي من حساب الزارير
وبذ الخفا واطغى غروره تماديه

آقف واضيع كل حشمه وتقدير
ومن قال يا ضيدان ما قلت لبيه

واجيه لو دونه جموع وطوابير
واسوي اللي ما تمنيت اسويه

واللي يصير يصير ويصير
لابو صبيٍ ما يعادي معاديه

واهل النخل لوحسبوا للعصافير
ماتهيوا ماء بيرهم في سواقيه

والنوخذه لو ما احتمل للاعصاير
امداه لاقفى يقطع الياس راجيه

ضيدان بن قضعان

[الحمدان]

ياهل الذيدان أبوجعشه لحاله
ودها بالجمل والا بالتحدي

راعي الوضح الغوالي ساق ماله
لين جاب اللي مع الغدرا تشدي

وكن غلاها مخيم أصحاب الجلاله
ومن لمحها مسرع عود يهدي

والفحل لامن عرض لك كن سباله
مقدم المزنه على النو إمتبدي

لاعطتك انحورها كلا طراله
إن راعيها على المدح إمتعتدي

من محمد محزمن له طاب فاله
في نهار ذاك طاب وذا إمتردي

طيب من طيب إبيه وطيب خاله
وكل بيهم صلب أبوي وصلب جدي

ولو أبذكر خصلتين من خصاله
بيحت بيت القصيد وباح سدي

كن ربي خالقه طيب وجماله
يوم ولد اللاش يسفه ما يهدي

ضيدان بن قضعان

[الحمدان]

طلي علي من شرفه القصر من فوق
وتبسمي لي واضحكي في وداعي

أومي بكفين الغلا واشعلي الشوق
في قلب شيخ جاك في ثوب راعي

حده غلاك يجيك ياشيخة الذوق
لو كان ما للحب والذوق داعي

واقفى يتل القلب معلوق معلوق
في درب فرقا ما وراها اجتماعي

ما يتبع المقفين ياكود مطفوق
وانا رصيدي ما تحوشه ذراعي

لو كنت ضايع كل مطرود ملحوق
يكفيني انك كنت سبة ضياعي

.....

[الحمدان]

البارحه يوم شمس الشعر تسطع بي
وانا أتحرى لشمس الله من الشرفه

ولعي على واحد قبلي تولع بي
ما يوم غنى ولا أسهر للهوى طرفه

الين حتى تولع بي وولع بي
نار من الشوق صاليها لحق طرفه

من بعدها ياشقى حالي ويا تعبي
نفسي عن الشعر واهل الشعر منصرفه

مانيب يم الشعر يالشاعر الشعبي
يا بتوع مش عارف وشي ما أعرفه

تبي تهز الجبل بمسدس لعبي
والناس من وارد المنصور منجرفه

لاتستفز القصيد ولا ترفع بي
الشعر ما هوب مهنه لأجل تحترفه

وأن كان يا محترف تقدر على لعبي
خلك على جنب لين اشوف لك صرفه

ما أحد عبالك ولا لك عندنا معبي
يا كود باب مداه أكبر من الغرفه

وأنا من الناس ياسهلي ويا صعبي
بحر تشوفه ولا تقدر على غرفه

مسكون بالشعر من راسي ليا كعبي
والشعر ملكي وكل الناس معترفه

أنا ملك مير يوم أصبحت من شعبي
حذفت تاج القصيد وصابني قرفه

.....

[الحمدان]

يا موزع النعم خل النعم لصحابه
ما ينعطي غير للي يستحقونه

النعم ينعطي لرجلٍ فاتحٍ بابه
للضيف وليا بغوه بحال يلقونه

اللي بوقت اللزوم يبين مضرابه
سيف تحده لزومه ما يحدونه

والاالردي لاتقول ونعم يظرى به
يرهي على نعم وهوه قاصر ٍ دونه

ليا قلت له نعم قام يفتل أشنابه
يحسبك صادق ما يدري نعم وشلونه

يطمع بشيٍ يموت الخبل ما جابه
ثم قال أنا جبت نعم اللي يقولونه

بعض البشر يحلمون احلام كذابه
ومن لاعرف قدر نفسه عدّ طبلونه

يجيك مسرع مايدري ويش يبلابه
من قلة العرف ما يمشي علىهونه

اما على الاقربين اشتال مشعابه
والابعرض المقفي سلّ مسنونه

تناول الغايبين و كثروا أحزابه
اللي على قلة الخيره يدفونه

واهل العقول سكتوا ماقالوا الجابه
لا ينقصونه بشي ولا يزيدونه

قالوا هذا فيه عاهة وابتلشنا به
والا هذا فيه شي ٍ ما يعرفونه

وخلوه يسرح ويمرح خاب من جابه
ما نومس اللي من الصغر يترجونه

.....

[الحمدان]

انا ويش اسوي في زمانى يا بن الناس
زماناّ مغامر والثقه فيه تخدعني

يحاول يوقفني على شفه من ياس
وعيت دروباّ تاسع الناس تاسعني

اخذبي على درب الشقاء والعناء مرواس
ولا باقي الا في المهامه يضيعني

تحملت من جور الليالي بدون قياس
ولو حملها ميل على المتن واوجعني

وصبرا ّ على الشده شجاعه وقوه باس
لكن الضروف القاسيه ما تطاوعني

ليا اجتمعت الثنتين حاجه وشيمه راس
وهذي تنزلني وهذيك ترفعني

رفعت النظر والله عطاني نظر واحساس
وهي ميزه في كل الاحوال تنفعني

ولو كان بين الصم والبكم لي مجلاس
هذا ما يكلمني والاخر ما يسمعني

حياه التجارب علمتني وانا حساس
وخلتني اعرف نظره العين وش تعني

وانا لو بدت لي حاجه عند بعض ناس
اريد الكلام وعزه النفس تمنعني

.....

[الحمدان]

ياهل البيت الخضر سكرو بابه
سكرو بيبانكم يا عرب عنا

وامسكواورع الهوى اللي بلشنابه
كل ماجينا من الزام قابلنا

هزرمش العين والاضحك نابه
ضحكة ٍمنها النجوم يتهاونا

امسكوه ببيتكم قبل نبلابه
وأن طلع لا تامنون العتب منا

لا يكلمنا ولا يطلع الجابه
لو صباح الخيركنه يلعنا

مايخاف الله ولايرحم اصحابه
جاهلا ًبعيونه السود يفتنا

اتمنا حرب مدفع ودبابه
والعيون السودعنّا يصدنا

بس ياهل الورع متنامن اسبابه
ما يرد الموت لا انتم ولا حنا

ورعكم يلعب ودنياه لعابه
ما درى انا قد لعبنا وهونا

ما لقينا في طريق الهوى ثابه
زتنافي بحر الاهوال واهملنا

الهوى عله ولاتوجد اطبابه
دايما ًراعيه مفتون ومعنا

ودنا بيت الهوى نقطع اطنابه
ونطلب الوالي عسى العفو يشملنا

.....

[الحمدان]

كنت أدور بك علي والظاهر اني
من كثر ماني معك ما كنت فيه

مدري أنت اللي بعيد هناك عني
أو أنا اللي بالفعل ماني هنيه

أكتبك وأقراك واستمحيك كني
ما نزفت يا هَوّس مؤلفيه

شاعرك لا رحت عَنه وجآ يغني
يغرق الكُراس في بحر ازرقيه

ما لقيتك وأفقدك هذا لأني
ما مشتيك وآصلك لجل إنِ أتيه

حلمك الوردي إذا بتفوق مني
تطبق أجفانك علي تقول أبيه

وقلبي إن قلتي أبيه بلا تمني
أدخلي على المعاليق وخوذيه

أكسجين وصدرك يتنفسني
خوختينك كل ما تتنفسيه

في أسانيد الهوى يُحكى باني
ماني من الي يعبدون الوجيه

إن قهرت أقهر جبل وإن طاش جني
أسفهه وإن سألت أسأل سفيه

.....

[الحمدان]

يا ونتي يا ما بصدري من الضيق
من حسة لا جت بداخل ضميري

كنيتها في مغلقات الصناديق
لين انكسر منها الضليع القصيري

قالوا قدرت الصبر ما فيه تبريق
قلت اه من يقدر على الصبر غيري

مير انتهى واليا انكفى الميّ ما حيق
سود الليالي عرقلت خط سيري

والله لو اشرب ماي سحب غداريق
ما ظنتي يبرد ظماي الغديري

ولو اشرب الذوب المصفّى على الريق
زاد السعير اللي بكبدي سعيري

خط لفاني حرّق القلب تحريق
امحق بشاره جبتها يا بشيري

انا على عهدٍ واظنّ العهد بيق
اخر زمان وكل شيء يصيري

راحوا هل النمات مثل الزواريق
يسعون عدواني بقرقا عشيري

الله يجازي من سعى بالتفاريق
عن جنة الفردوس بالزمهريري

.....

[الحمدان]

يا حبيبي سمّ بالرحمن وش فيك امتضايق
أنت باقي فوق سطح الأرض ليش تعيش حَدره

فيك ضيقة لو توزع نصفها بين الخلايق
ما بقي مخلوق في ذا العالم إلا ضاق صدره

أعتقد ما كلفك ربي تعد له الدقايق
والفضا ما كلفك بمراقبة شمسه وبدره

والهروب من الحقايق ما يغير في الحقايق
والزمان بقصد والا دون قصد يجيك غدره

اعتصم بالله و لا ابغى اشوفك إلا و انت رايق
من يطيع الهمّ يفقد هيبته و يقلّ قدره

.....

[الحمدان]

أبد لا تعتذر منت السبب في العارض اللّي صار
أبد لا تعتذر واللّي حصل كلّه من أسبابي

مراعاتي ظروفك علّمتك تولّف الأعذار
وطيبة قلبي اللّي علّمتك اللعب بأعصابي

رح الله قد عطاك إنّي ماطالب قاتلي بالثار
بنفس البسمة آقابل عدوّي وأقرب أقرابي

لأنّي كنت أحبّ البحر ما كنت آعاكس التيّار
وأخلّي الموج يرجع بي مكاني مثل ما جابي

لأنّي في قرارة نفسي آشوف السنين إقفار
رضيت بحظّي اللّي ما رضى للحين يرضى بي

أنا يخطي عليّ الناس وأسابقهم بالإستغفار
وأقدّر للحرامي وقفته مرّة على بابي

أبد مسموح منت أوّل عباد الله من الزوّار
مجرّد خمسة حروف إحتواها فهرس كتابي

ولاكنت أوّل الخطوة ولا صرت آخر المشوار
ولا كنت أوّل أحبابي ولا صرت آخر أحبابي

مدام الله خلقني مثل ما شفت آدمي محتار
فليش آعيش في جلباب غيري وأنكر ثيابي

أنا الصوت الصدى همس العصافير وشذى الأزهار
أشوف إنّي سبقت الوقت ثم آنوّخ ركابي

أنا السرّ العجيب اللّي تزول بحلّه الأسرار
ويحضر كلّ شيّ بحضرتي ويغيب بغيابي

تطيح وتحرق الدنيا جدايل شعرها بالنار
وتقوم وتوقف الدنيا على شعرة من أهدابي

د. عبدالواحد الزهراني

[الحمدان]

مات أبونا وأمنا قعدت دهر ما جالها خطاب

والواحد منا يشيل أكبر حجر ويطق راس الثاني

من هو المجنون يتزوج مرة ذولا عيالها

ثم عشنا دهر لا حنا نفكر في الزواج ولا هي

لين جانا بو علي متلبسٍ مشلح وراكب خيل

بعضنا قال ارفضوه وبعضنا سلم بالأمر الواقع

ثم من يقدر يرد الفاس الى منه وقع في الراس

واثر جدي كان مليونير تاجر واثر محدٍ داري

وأمنا سارت وريثة ملك ابوها بعد ابوها مات

واثر عمي بو علي ما صدق أرسل في علي واخوانه

كوش على البيعه وسمى البيت كله بيت بو علي

والله يا عم أبو علي يا بعضنا أنه ميتٍ من جوعه

يشحذ الكبريت من جاره ويدَّيَّن ريال بخوه

ما دامك عايش على مال أمنا واحنا نقلك عم

يا تنادينا نجي ناكل معك يا طلق أمن

د. عبدالواحد الزهراني

[الحمدان]

أبد لا تعتذر منت السبب في العارض اللّي صار
أبد لا تعتذر واللّي حصل كلـّـه من أسبابي

مراعاتي ظروفك علـّـمتك تولـّـف الأعذار
وطيبة قلبي اللّي علـّـمتك اللعب بأعصابي

رح الله قد عطاك إنـّـي ما طالب قاتلي بالثار
بنفس البسمة آقابل عدوّي وأقرب أقرابي

لأني كنت أحبّ البحر ما كنت آعاكس التيـّـار
وأخلّي الموج يرجع بي مكاني مثل ما جابي

لأنـّـي في قرارة نفسي آشوف السنين إقفار
رضيت بحظـّـي اللّي ما رضى للحين يرضى بي

أنا يخطي عليّ الناس وأسابقهم بالإستغفار
وأقدّر للحرامي وقفته مرّة على بابي

أبد مسموح منت أوّل عباد الله من الزوّار
مجرّد خمسة حروف إحتواها فهرس كتابي

ولاكنت أوّل الخطوة ولا صرت آخر المشوار
ولا كنت أوّل أحبابي ولا صرت آخر أحبابي

مدام الله خلقني مثل ما شفت آدمي محتار
فليش آعيش في جلباب غيري وأنكر ثيابي

أنا الصوت الصدى همس العصافير وشذى الأزهار
أشوف إنـّـي سبقت الوقت ثم آنوّخ ركابي

أنا السرّ العجيب اللّي تزول بحلـّـه الأسرار
ويحضر كلّ شيّ بحضرتي ويغيب بغيابي

تطيح وتحرق الدنيا جدايل شعرها بالنار
وتقوم وتوقف الدنيا على شعرة من أهدابي

.....

[الحمدان]

خلاص بطلت لا اسمع ولا اتكلم
ما غير عينٍ تشوف ويدٍ قصيره

طفلٍ حبا في خفوقي كان يتعلم
كنت اعشقه حيل با حسانه وتقصيره

طفلٍ يلم بجنونه شي مايلم
علمني الصدق ولا صدق والحيره

علمني اجتاز ليل داخلي ظلّم
واكتب على الغيم عشق وسالفة ديره

يا ما همس في خفوقي ليه تتألم
والشعر ثنتين يا شره ويا خيره

والشعر مثل الشجر يثمر ويتقلّم
وان حركوا هالشجر طارت عصافيره

ابا اتكلم وطالت بي وانا اتحلم
والوقت ما يملك الا الوقت تفسيره

يا سود الايام منهو كان يتظلم
من شاعر كان همه للبحر سيره

من شاعر للفنا يهذي ويتكلم
والشعر عينه تشوف ويده قصيره

.....

[الحمدان]

الشعر فيني سراب ودفتري ظامي
ما يوم فيني سحايب صدق بلنّه

الدفتر أعمى وشعري حيل متعامي
ما للبصيره على الدفتر ولا منه

كنت أكتب الشعر كذب فكذب وأنغامي
زيفتها والصحيح هناك خلنّه

خلاص يا دفتري خلاص يا أقلامي
مليت هذا الخداع اللي يحبنّه

ما عاد أكذب وربي لأعلن اسلامي
وأكفر بشعرن يحفظنه وقالنّه

الشعر ياخي حلال الناس وأوهامي
ليه أكتبه لجل يقرنه وينسنّه

ابكتب الناس والشارع واحلامي
والشاعر اللي بنات الفكر حبنّه

أبحلم إني أبحلم حلم متسامي
لو قالوا الناس حلم إبليس بالجنّه

هالقلب طير ٍ يرفرف مابعد حامي
محابل الخوف في صحراي صادنّه

أبنسل الخوف وأشعل جرحي الدامي
أقسم بربي لا وردهن ويرونّه

.....

[الحمدان]

الله يا الأيام ياهي كم علينا تموون
كم كسرت في خواطرنا ولا نسأله

كم شاغلتها حقيقه وأعتقتنا ظنون
كم علمتنا لبعض وبعض ما نجهله

مره تجينا تخدرنا بهز المتون
تضحك علينا وهي للحزن ما أعجله

هذا أنا كل مابي مشروع للجنون
والليل هذا يحرك رغبةٍ ممحله

لا الوجه وجهي ولا ذييك العيون العيون
ما عاد باقي سوا دمي وأبي أبذله

لو هان بعض المشاعر بعضها مايهون
عندي ولا أحلى من الصعبه وأنا أستسهله

خلاص أبخرج على نفسي وأعيش مغبون
وأقبل من الووقت شيٍ كنت ما أقبله

أبتوغّل بليلٍ ضارب بالطعون
وأكتب على جبهة التاريخ هالمسألة

ليه الفقارى لهم حلم عظيم ويخون
ليه المبادئ تميل وماحد يعدله

ليه انكسرنا مثل صحرا جفتها المزون
يهبّ فينا الظما من وين ما نهدهله

عفوًا انا كنت شاعر قبل شعري يكون
والليل هذا يهددني وأنا بِقتله

.....

[الحمدان]

البنت هذي لا اضحكت ما بها دم
كن البرد والزعفران أكتساها

مدري تركز لا حكت لك عن الفم
أو تلتهي تقعد تلقط حياها

وليا مشت كل المسافات تلتم
وكل الدروب بخطوتينه تباها

.....

[الحمدان]

الوسم برقه لاح لاح وناض ناض
سرى سرى وان على نوه سريت

والوبل هل ، وعل لين الغيض فاض
وافيض من فيض المشاعر ما فضيت

ادري على العارض ولا فيه اعتراض
ياليتني يوم استوى الممشى مشيت

افرد له ضلوعي وله قلبي فياض
وأروى وكني في ضماي ولا رويت

البل ليا وردت ضمى تاطى الحياض
وانا ليا كرعت في حوضك ضميت

ياحي وجهك وجه ياصاف البياض
وياحي صوتك صوت يا أحلى اوبريت

مشتاق لك ياغض غضات الغضاض
انشهد اني عنك لحظه ما سليت

ليت الكويت تصير فعيوني رياض
وليت الرياض تصير فعيونك كويت

.....

[الحمدان]

الى ضاقت علي ميلتها لأهل الرمك والجيش
وأخذت من الأصايل مهرة يختال راعيها

الى جت كن أبوها من سلايل خيل صقر قريش
والى اقفت كن ابن شالح بسوط الموت حاديها

أغني في ظهرها لاغدا للذاكره تنبيش
هجينيات ابوي اللي ورا صبحا يغنيها

وامرّ من العذارا غادة لاضقت قالت ليش
تتل الداء وتصرف له دواء لعيون غاليها

نفوس الذل تسقط والنفوس الساميات تعيش
وراعي الكلمه اللي يستحي منها يبديها

احسب ان المبادي عملة ماتقبل التغشيش
سقا الله يوم قلت : اي والله أن أموت شاريها

أردّدها .. صغيّر سن .. توّي مانبت لي ريش
أثرها عيّدت بأهل الكراسي في كراسيها

عساني ماصغرت من احترامي نقطة التفتيش
وعساني ماكبرت من المنصّات وتهانيها

الى زل ّ السفيه استصغره حتى من التهويش
والى استفزع بربعه قلت : ما أحلى فرك أذانيها

والى ضاقوا عليّ حتيش وأن طاشوا بعد حتيش
والى وصلت مداها جبت عاليها لواطيها

عطاني مانع الفتنه مناعه من هل التشويش
ونجّاني من عيال الحرام ومن بلاويها

من اعراض العرب لاطفالها تقتات لقمة العيش
ياويح أهل الكبود الناشفه من كفّ واليها

الا ياماكثر الضوضاء والا يا ما حلا التطنيش
والا يا ما أطول الدعوى والا يا وين قاضيها

عسى الله مايحد القرم للعيشه ورى البخشيش
وش الأشناب لاقام الدهر ينفض مخابيها

تعفرت كم ثعل لين أعتبرني صاحبي درويش
وانا لي كلمة رخص الكلام وعشت مغليها

على فرقا جلاليب الضماير في مزاد الطيش
تنومسني مزونن ماخضع ماها لباغيها

بلا سجّاد .. لانذر عليّ الا افتراش الخيش
أعزّ لهامة كني على الغيمه موصيها

وانا لو ما حترفت الرمي لين اسرفت بالتحويش
ظهرت من الميادين وعطيت القوس باريها

الا يالله طلبتك سمعة ماتقبل التهميش
ولو متّ افقر الناس وهلي فقرانه يديها

عسى ماهو صحيح ان المبادي ماتوكل عيش
اذا هو صدق .. أجل عز الله اني رايح فيها

.....

[الحمدان]

في مكان تفاخر فيه روس النصايب
و امتلت من عظام الناس فاضي قبوره

كل شي يتراجف فيه حتى الهبايب
والذهايب توارى والنصايب فخوره

وقفت بي قدم رجلي وكلي عجايب
والبكا حولي اسمع له تمرد و ثوره

لين جاء واخجل عيون تودع حبايب
مؤمن جفف الدمع بحديث و سوره

عن يميني بيوت السابقين والذهايب
وعن يساري بيوت اللاحقين محفوره

اسمع اصغر ذنوبي كنه يصيح تايب
والقدم ما نشدت بموقفه عن شعوره

واذكر انه تشره لحظه وكان هايب
قلت خل الطواري ما طلبتك مشوره

دامها جت من الله مرحبا بالمصايب
لو ثقل حمل نفس المسلم اللي صبوره

جيت اشيل الجروح المشرقات العطايب
طيب الله ثرى اللي فارق العين نوره

ما ركزت النصيبه واعتلت راس شايب
كود ابادّل ذاك القبر لا جيت ازوره

عل ما تبخل بماها عليه السحايب
كودها تستر اطراف النصيبه زهوره

كل حزن ملا الدنيا على القلب ذايب
وانقلي يالجروح الحمل لو زاد جوره

كنت اعزي مجاريح بعاد وقرايب
واترك الخاطر لعيني تجبر كسوره

تغرف الحزن وتصب العباير صبايب
وان خلص دمعها لعيون ابوي معذوره

شايل صورته في البال لو كان غايب
ليته اللي يشيل لشخصي اليوم صوره

كان لي ظن في صغري ولا هو بصايب
احسب ان القبور من الحياة مهجوره

عل قبره نعيم وصالحاته سبايب
هي عزاي بوادع مودّع جاه دوره

.....

[الحمدان]

تراها الصوره اللي جا عليها فالوداع علوم
فديتك ما سواها حرّك الخفّاق واوجاعه

عسى يا احلى هدايا الكون منت بمن حلال القوم
عسى يمّي يجيبك من تركتك عنده اوداعه

معاك اضيع يا عمري وابي لو ساعةٍ من يوم
تضيّعها معي وانسى وش اليوم وكم الساعه

عشيرك من يد الترك ليد الفرس ليدين الروم
هذا هو يعربيٍ لا نسى حلمك ولا باعه

تعال الكل ينشد عنك وطيور الخيال تحوم
وانا مابين طيف وصوره ودفتر وسمّاعه

من اول ما اصبح استفرد بنكهة سرّك المكتوم
واهيم بكل شارع واندهك واخرج عن الطّاعه

أطارد شمسك اللي لآخر الدنيا بدون غيوم
والى منّي ذكرت اعيونك ومغناي وشراعه

أجي يم البحر واحكيله اوّل ما عرفت العوم
وفوق الشّاطي ارسم وجهك اللي سافر اشعاعه

والى جا الموج يمّي ضمّت ايدي وجهك المرسوم
وطاحت نجمتينٍ مرّت الخدّين مرتاعه

واعوّد للحدايق ما بقى من زادي الا اللوم
أدوّر عن عبيرٍ كم وكم نسمه من اتباعه

أداعب وردها والفل والريحان واليشموم
ولا هو ملمس الورد الطبيعي يا اجمل انواعه

وانشّد عنْك اناشيد وعصافير وشجر وكروم
وكرسي باهتٍ لونه وسبع اخيوط لمّاعه

واشوفك في فساتين وذهب ومعلّق بمنظوم
واخبّر بك سرايا كل سوق وغالي بضاعه

واشيل اوراقك ام حروف وقلوبٍ تشيل سهوم
واغنّي ما طرى واطبع عليه الطاري اطباعه

واعوّد للوساده في مساً ماله قمر ونجوم
اصحّي صورتك من نومها وتفز فزّاعه

أنام بحضنها لين الصباح يقول صحّ النوم
وافيق بوجه نجمٍ من صباح الخير مطلاعه

.....

[الحمدان]

يمه الغربة وفرقاك ملتمه
دمعة العين هذي ما لها داعي

يابعد راسي انتي ليه مهتمه
الوجع لي سواة الناي للراعي

آخر أخباري الذمه هي الذمه
والوصايا هذيك تقدي شراعي

مابه الا السواد يحاود اليمه
ولا به الا البياض اللي ورا أضلاعي

وأشعل ما يفارق ليل حضن امه
وأخضر كل صبح من أول أتباعي

يتعب البرق ما أتعب النظر يمه
وانشديهن بعد ما قلت أطماعي

أنجبن لي عروسة حلم أضمه
أو بعد توها تشرب عطش قاعي

واذكري كيف كان العود ابو عمه
ايتعلى صهيله وأرخي أسماعي

امنياتي بدرب ودي أتمه
آخره صعب وأصعب منه مرجاعي

يوم كلن فزع له خاله وعمه
يكفي اني وردت العد بذراعي

أرفع الراس بين الروس ما همه
وأتباهى وأنا الغرقان بأوجاعي

يمه.. الحر طبعه يعشق القمة
وأنتي اللي فطمتيني على أطباعي

الهواء دام راسي حي ويشمه
والله اني لا سوق هناك ذعذاعي

غربة تلوي ذراع أشجع الخمه
لا تخافينها لو تقلب أوضاعي

يمكن تبعثر الرجال وتلمه
بس بدري عليها تلوي ذراعي

.....

[الحمدان]

جيت يا كثر السوالف والقصايد
الدلال مبهره لعيون غاده

جيت اسمرها واحط لها وسايد
من شجون قتلها للبرد عاده

جيت اغني والغلا كله ودايد
عل ذيك النار ما تصبح رماده

جيت ابي من وصلها جروح جدايد
القديمه ملها الليل وسواده

مثل ما ملت عتيقات القلايد
وجيت البسها من اشعاري قلاده

غيرها ما ابي رخا وقت الشدايد
ولا تبي لحدن بعاشقها شهاده

ان رظت ما اظن يرظي الناس كايد
لو تظايق ظاع مفتاح السعاده

كم لقيت اللي لقيت من النقايد
من نصيب طولت كبوة جواده

كم قظى ليلي وانا اطارد شرايط
الدموع لحاف والهاجس وساده

لا عند تحنان ولا الصبر فايد
قلت اسوق الدرب يكفيني جلاده

وجيت اصب الشوق يوم الشوق زايد
عل خاطرها خذا منه مراده

والا انا لي تالي اللقيا عوايد
قهوة من جمرها سكر زياده

.....

[الحمدان]

‏الحب لو طال لازم يحتويه الغياب
‏اما تغيب المحبه أو تغيب الوجيه

.....

[الحمدان]

نحلم ولا شفنا من احلامنا شي
الحلـم حالي والمقادير مرّه

.....

[الحمدان]

‏أحيانن الصمت عن بعض الحكي قيمه
‏وأحيان بعض الحكي يشرح تفاصيلك

‏وأحيان بعض الخطاء يعطيك تعليمه
‏وأحيان بعض الخطاء يقطع مواصيلك

.....

[الحمدان]

احنا على العز عشنا مستوانا رفيع
والجوده احنا ملكناها وعشنا بها

نخاوي اللي معه معروفنا ما يضيع
ونفتخر في مخاواته ونرقى بها

واحنا له العون واحنا له تدخل سريع
ونجيب له ذا تعب وابطى ولا جابها

.....

[الحمدان]

بعض العرب يحرجك من قمة الذوق
‏ويكبر بعينك من كلامه وذوقه

‏وبعض العرب كنه من الضيق مخلوق
‏لا جاك جاك الضيق ترعد بروقه

.....

[الحمدان]

يحـدني عقـلي على كثرة الصمـت
والصمت في بعض المجالس معزه

أختار مـن جــزل الكلام إن تكلمت
أمـا السكـوت أو الكـلام المنـــزه

.....

[الحمدان]

القل قل الحيا والوازع الديني
والكثر كثر الثنا لله سبحانه

سبحانه

[الحمدان]

مرت علي الليالي بين حزن وهموم
والروح بين الضلوع تشب شب الجمر

لا رد حـزني دموع ولا تقاطيع نوم
والسهد يامر على عيني وجفـني أمر

البس شقى الوقت كني لابس لي هدوم
وادوّر لضيق صدري وسط صدري ممر

.....

[الحمدان]

قالت صباح الخير يامودماني
قلت الحياه ابغرتن صبحتني

اول سلام معاقبن باليماني
بصابعن مثل الذهب خامستني

قامت تبسملي بغر الثماني
حتى على الموت الحمر وردتني

تضحك بغرٍ كنها القحوياني
بشفيها ذوب العسل لو عطتني

في خدها الموت الحمر له غواني
بعيونها اللي ساحره كهربتني

اموت واحيا بين عشر الثواني
لارقرقة بعيونها واخزرتني

خزرة غلا في ضحكتن بغنجاني
منها حياةٍ لي وفيها اجرحتني

تظهر لي رموزن تحشر احشراني
فيهن نياشين المحبه دعتني

لا شفتها قلبي يروج اروجاني
وين اعرضت ليه وين انطحتني

لولاه تردعها الضلوع المحاني
كان الحياه مع العرب فارقتني

.....

[الحمدان]

ياصحن دالهٍ عن مترفات القبايل
لين جاني من ارهقني ونكد عليه

قام يضحك ويجذبني وجيت امتهايل
لين مفتاح قلبي ضيعنه ايديه

مثل ماضاع قلبك بالسنين الاوايل
يوم تشرى الهوى بالذمه العامريه

لاتسايل ولاتنشد اوخذنا القوايل
رغبة النفس ودتنا حياض المنيه

وانت تدري وعندك للمحبة دلايل
كل ماخض ماءًا فالحوض ترد الضميه

ياطبيب الهوا حنا لقينا الهوايل
نظرةٍ تعجب الناظر لها جاذبيه

ماتميز من الخدة شقار الجدايل
اشتعال البروق بمزنة عقربيه

خده اشقر عليه اشقر ليا الردف مايل
فيه نورٍ وله نار تطارد سويه

مثل عنق الغزال اللي بوسط الجمايل
يوم فز وتشمحط موحيله وحيه

كن جوهر اعيونه ياصحن يوم اخايل
حد سيف شطير او خنجرٍ نافعيه

وان تبسم بيض بين حمر عسايل
بايحوني تراني مت ابكتب وصيه

.....

[الحمدان]

يا عاذلي كثرت حكيك وكررت
نصايحٍ لا شك ما يقبلني

مهما حكيت وقلت واعلنت واسررت
اذاني الثنتين ما يسمعني

انا بسكراتي من الحب مافكرت
وانته تبي تشره علي تعذلني

لو يتهيا لي بوسط الفضا طرت
سويت لي جنحانٍ يساعدني

واليا بغيت اصل هوى البال سيرت
مراكز التفتيش مايمنعني

اجيه لو اني على عمري اخطرت
وربي اليا منه رحمني ظمني

ياصاحبي من زود حبك تدهورت
منك الهموم الجايرات اضهدني

نقلت حملٍ لو يحمل على الفرت
شفته على الواحد بحمله يحني

عزرتبي يازين الاوصاف عزرت
وانا بن عمٍ لك ومسلم وسني

يحقلك ذبحي لو اني تغيرت
واليوم ذبحي وش تبي فيه مني

اعطف علي شوي في ماتخيرت
شيٍ يخلي خاطري يرجهني

لو هو بشوفك بس مناك لاسرت
والا العلوم الباقية يقمحني

يامورد الخدين من عمري اعذرت
واسبابها سودك اليا سلهمني

هاك العيون اللي اليا شفتهن حرت
تقول فيهن كهربٍ يجذبني

اليا شفتهن هللت لله وكبرت
اللي مسويهن وفيهن فتني

.....

[الحمدان]

الشيخ لاقام يتهرّب عن الناس
تراه مع ورك المطيّه تدلاّ

لوهو ولد شوخن بعيدين الارماس
اليا استهان بحق الاجواد ولاّ

لاجنّب الواجب ودلبح مع الساس
وانحاز مع بعض الوجيه يتسلاّ

مثل الجمل ماعنده شعور واحساس
اليا ملا بطنه تياسر وفلاّ

واللي يبيله سمعتن ترفع الراس
يرقابها روس العلا ويتعلاّ

ياخذ مثل سلمان بالطيب مرواس
مشرّع البيبان في كل حلاّ

لاجيت بيته شفت من كل الاجناس
تشرب وتاكل والمخابي تملاّ

ينسف على العالم ملايين الاكياس
واللي مكذّبني يجي ويتحلاّ

ذولا مصاديرن وذولاك جلاّس
مثل الورود اللي تعطن وتعلاّ

هذا الذي بالطيب ماهوب ينقاس
اللي على طول الدهر مايملاّ

شيخن نظيف العرض من كل الادناس
مزبّن المظيوم ريف المقلاّ

زودن عليه بقوة الراس والباس
عوق العديم اليا غلض واستجلاّ

الله يجيره من صواديف واتعاس
حيثه علينا مثل قيفن مظلاّ

ولاخطاة الشيخ جعله للافلاس
بخيل ورزيل وجامعن شين دلاّ

اليا ذلف ذلفة دهام بن دوّاس
اللي عن الديره واهلها تجلاّ

.....

[الحمدان]

سبحان من سوى الأوادم من الحور
أنا شهد ان الله هو اللي يسوي

زول ٍ خلق من نور وبخدته نور
نور من الخالق ما هو نور ضوي

أدعج غنج خده به الملح منثور
تقول بدرٍ بان بفتوق نوي

وعيون تذبح بالهوى كل منعور
سود ومضاليلٍ على القلب سوي

نيشانهن رمانت القلب ياسرور
وحرابهن من دم قلبي تروي

هو مسرفٍ فيه وانا فيه مجبور
حبه ملا قلبي وجوفي وجوي

من زود حبه كن كل البني عور
لا غاب عني قمت ادوج وأهوي

أبو جديل اشقر على المتن منشور
يا هني من بيديه فيه أمتلوي

أنكان شدوا يم وسمية الثور
واحسرتي لا قالوا البيت طوي

وان مت من مركوز الأنهاد معذور
اللي عليه هالزمان امتكوي

ولوهو عطاني صاحبي كبر الأظفور
قلت الدوا منك وعلى الله بروّي

.....

[الحمدان]

احدن ذهب صافي ولا هوب مغشوش
ما مسّه بْكفّه مزوّر و غشاش

واحدن كما المعدن اليا صار مرشوش
يغريك بالصوره و من داخله ماش

وقت الرخا يزبد على الناس و يهوش
واليا وصل حدّ الصعيبات ينحاش

واحدن بلا هذي ولا ذيك و يدوش
كنّه بلا معنى في الارض دوّاش

واحدن شرى ثوب النواميس بقروش
واحدن يبيع اغلى مباديه ببْلاش

ما عدت اميز بين صاحي و مربوش
بالذات في وقت به الطيش ما طاش

ياللي تبي علم بالاعراف منقوش
نقش نقشْه اللي على الزور ما عاش

دام السما تمطر بْديموم و رشوش
والارض ما فاضت بْديموم و رشاش

و الله لو تنبت شواربك برموش
ما يثمر احسانك في النذل و اللاش

لا صار له حاجه بنى عرش و عروش
حدّ القمر لجلك و قلّطك بفراش

قلبه على الفلّه و عينه على الحوش
ناس على رجس التناتيف تعتاش

و اليا قضيت اللي بغى كنّ به روش
عمر الوفا في سلمهم لمعة فلاش

.....

[الحمدان]

محدن رمى طبعي من الناس بالعيب
حرّ حشم نفسه عن انصاف وارباع

سِلم العرب سِلمه من المهد للشيب
كلّ على شِبره وانا جيت بالباع

شحّيت بالزلّه في الجهر و الغيب
صح اني ابن آدم ورى النفس تبّاع

لكن بلى نفسي تحبّ المواجيب
يا ذيب وش نفع الغنم قولة امباع
وش ينفع المعزه رغا التيس يا ذيب

احدن يبي يرقى من القاع للقاع
واحدن ورى حدّ المشاريف طنّيب

احدن غفت عينه على فنّ وايقاع
واحدن قضى ليله في الشكّ و الريب

و الله واناصادق لو الطيب ينباع
لآبيع من لحمي عشان اشتري الطيب

.....

[الحمدان]

هرج النميمة لا يجي في فيك
وإياك عرض الغافل إياي وإياك

تبدي حديث الناس وفيه تشكيك
وتهيم بين الناس بالكذب وشراك

واعرف ترى منهو حكالك حكا فيك
وأصبحت مبغضنا وحنا كرهناك

.....

[الحمدان]

أدّب ولدك إن كان تبغيه يشفيك
لو تزعل أمه لا تخلّيه ياطاك

أما سمج واستسمجك عند شانيك
ويفر من فعله صديقك وشرواك

وإلاَّ بعد جهله تراهو بياذيك
لو صاحت أمه لا تخلّيه يالاك

.....

[الحمدان]

يا ذيب وإن جتك الغنم في مفاليك
فاكمن إلين إن الرعايا تعداك

من أولٍ يا ذيب تفرس بياديك
واليوم جا ذيبٍ على الفرس عداك

يا ذيب عاهدني وأعاهدك ما أرميك
ما أرميك أنا يا ذيب لو زان مرماك

.....

[الحمدان]

احفظ دبشك اللي عن الناس يغنيك
اللي إليا بان الخلل فيك يرفاك

وطالع ترى مكة ولاها ابناخيك
لو تطلبه خمسة ملاليم ما أعطاك

اجعل دروب المرجله كلها من معانيك
واحذر تمايل عن درجها بمرقاك

.....

[الحمدان]

الحر مثلك يستحي يصحب الديك
وان صاحبه عاعا معاعات الأدياك

صديقك اللي بالعطايا يمانيك
انصه بقضيا حاجةٍ قبل ينصاك

أما تجي منه العطايا تباريك
وإلاَّ تعذر دون مالك إلياجاك

.....

[الحمدان]

عفا الله عن عين للاغضا محاربه
وقلب دنيف زايد الهم شاعبه

أسهر إلى نام المعافي ومدمعي
قد انهل من موق النظيرين ساكبه

وأقول إلى ما ضاق صدري ولج بي
رفيق شفيق جيدات مذاهبه

دع العذل عني يانصيحي وخلني
فشرواك ما يرضي هوان لصاحبه

إذا ما هدان أضعف البعد عزمه
وقد عاش في ذل على وسق غاربه

.....

[الحمدان]

أنا ذبحني طويل العنق والقامه
وكنت اتمنى ذبحني بس يدريبي

توه دلع من يلومه تضحك ايامه
ياليت يبقى قبال العين وقريب

يغفر له الذنب وارقى بالهوى رامه
ولو عذربوني انا ادرى في عذاريبي

من كان يدري موجد القلب وهيامه
تنزف جروحه ألين تموت والطيب

كلي حلاله عزيز العمر قدامه
ياطيب حضي إذا هو وافق انصيبي

من شان عينه ورمش العين والشامه
مسموح كان يحب يزيد تعذيبي

.....

[الحمدان]

اخذت في دنياي خمس مـن الخمـس
ومثلـي يحسـب كـل مـن قـر فكـره

احسب حساب اليوم وابكي نهـار امـس
الـي قضـى كلـه بخيـره ومـكـره

كم من نفوس فالهوى تنغمـس غمـس
النفـس مثـل الطيـر والغـي وكــره

وامشي بحر الشمس خوف من الشمس
وش حر شمس اليوم مـع شمـس بكـره

للخاطر الـي يشـرح الخاطـر العمـس
وبيـت معمـر بسـم ربـي وذكـره

لو ينهمـد حالـي ولـو ينحمـس حمـس
اصبر واجازي فضـل ربـي بشكـره

اخاف من يوم يصير العـرق طمـس
من الهوايـل زايـد فـوق حكـره

والخلـق ملتميـن واصواتـهـم هـمـس
مصيبهـم مـن مايشـوفـون سـكـره

.....

[الحمدان]

قالو تود وقلت ود ٍ يهوّل
ما مثل ود ٍ في ضميري و لا ود

لا وقتنا الحاضر ولا الوقت الأوّل
مافيه من وده تجاوز وراء الحد

ياكود انا وأظن ودي مطوّل
حيثه مواريثٍ عن أباء وعن جد

أحب لي ملحاً قراها متوّل
من شافها بالعين ما أغضى ولاصد

راع النظر لازم عليها يحوّل
ملحاً سنادٍ زينت العنق والخد

وان ساقها الراعي يباها تجوّل
قامت تهوس تقول فيها ولا بد

يازينها قدام ابوها تشوّل
إليا إنطلق ثعله على اللحي وإنهد

وغدى بفنيات صوته يموّل
يجرّ موّاله ويزبد ويرعد

.....

[الحمدان]

ما يضحك الجاهل الا من كثر جهله
لا زاد همك ترى ما للحكي داعي

غنى صبي القصيد وجاوبه كهله
والوقت يعصى شهر وسنين ينطاعي

لقيت قصر المديح ولا لقيت اهله
من جاك ينشد ترى ماهو بفزاعي

لو قال يمدي ترى ماللقدر مهله
لا الحظ يشرى ولا الاعمار تنباعي

ما هو بانا اللي يعود حين ينده له
اصعب من اقفياتي لا اقفيت مرجاعي

يحق له يفرق اللحظه عن الوهله
دايم ولكن خطا لو يمدح اوضاعي

ويحق له لو يعاتبني على مهله
دايم ولكن خطا لو يلوي ذراعي

يا صاحبي والله ان المساله سهله
كل واحد شيخ صعب تحصل الراعي

ما يبكي العاقل الا من قصر جهله
لا زاد همك ترى ما للحكي داعي

.....

[الحمدان]

ياعاشق الصمت بيبان الحكي فضه
أدخل بها يمكن الاحزان تنساني

مض الزمن بالحكي والسالفه مضه
ما باقي الا انت والا مت وحداني

مابيك تذخر تعب كل التعب قضه
مرتاح لا صرت تأمرني وتنهاني

لك وردتين على صدر الترف غضه
لا مال غضك تهاوت لين تلقاني

ليل جمعته تحت تاج الذهب قضه
من هامة النور والقى ليلي الثاني

حتى تجيك الجروح الزرق منقضه
من خاطري لين ينطق حبك لساني

لو تشعل الجمر ماني خايف عضه
اكتب بلونه مواعيدي وعنواني

ما شفت غيرك عشان اقول يا حظه
هنيت نفسي معك من كل وجداني

.....

[الحمدان]

الا هبي بصحنكِ شعر يروي مسمع الغاوين
صدور الناس يتعبها الكلام اللي يعيدونه

من دموع النوى والارملة والشايب المسكين
وصرخات الهلع في رحلتن ما هيب ميمونه

تباكينا على روحن قسمها المعتدي نصفين
واخذ من فوق نصفه زود نصف و شيّد ركونه

فلا الأشجار تعطيه الولا ولا غصون التين
ولا الرمان رمانه ولا الزيتون زيتونه

يا طول الوقت في رجوى حفيدك ياصلاح الدين
تحرّاه الشعوب وترسم الاحلام لعيونه

متى يطلع لنا من قلب يـافـا ما يسر العين
وفي يده رماح التابعين ولونهم لونه

يذكّـرنا تهاليل النصر في معركة حطين
وحلم(ن) ما يموت وماتت الابطال من دونه

على المتخاذل ابعد من حجر مكه لسور الصين
وعلى المتفائل اقرب من بدع زايد لبينونه

نبي نقلب عليهم طاولات الخوف والتخمين
ونبي نطلع لهم من كل درب(ن) ما يعرفونه

من الفنجال من كحل النساء من شوكة السردين
شبح من حيث ما ولّـت نواصيكم تشوفونه

مثل ما تحفظ بطون الصخور الماء الزلال سنين
تحفظ صدورنا مجد التراب اللي تدوسونه

.....

[الحمدان]

رجم الهوى الي ينرقى ما رقيته
ولا بعد في غارب الضلع عديت

ولا شكيت من الهوى واشتكيته
ولابعد جربت حر التناهيت

لكن عقب عديت طلعت بهيته
انشهد اني ي رجاجيل حبيت

كلن نسى خله وانا مانسيته
ما غير اهوجس به ليا أصبحت وامسيت

حتى حسابه في تويتر بليته
لا حطله حرفين سويت رتويت

واليا كتبله قطعة أبيات جيته
لو ماهي تستاهل الرد رديت

وعاقبت أخوها الأجودي لا لقيته
وشلون أبوك وربعكم وأهل البيت

دبلت كبده بالحكي وأبتليته
وان قال ودك بالعشاء قلت ياليت

اقولها من شان أزوره بـ بيته
وأنا ليا حط العشاء ما تعشيت

محروم من وصله كثر مابغيته
تميت لي ثالث سنه ماتشاويت

ياصاحبي صاحبك من دون صيته
لاهوب كذاب ولاهوب هلفيت

و يوم انت ماميزت ريشه شويته
وهو يفتت ذاير الصيد تفتت

وانا من اللي لابغيته لقيته
ولا طلبني واحدٍ ماتوانيت

لكن طحت بمشبكٍ ماهقيته
والمشكله طايح وانا ماتواسيت

.....

[الحمدان]

وش بلانا من جلسنا وحنا ساكتين
اول ايام السكوت اخر ايام الغلا

ادري انك ودك تروح لكني حزين
روحتك وانا بحاجتك ما فيها حلا

ودي اسمع منك قبل انتفارق كلمتين
اتوارا في ذراها عن عيون الملا

انتهى عمرٍ من الحب يا سرع السنين
أنجلا والله مدري على ويش أنجلا

النهايه طعمها مر والتهميش شين
لو يحس المبتلي بانكسار المبتلا

يعلم الله ما درا غير رب العالمين
ابتسم للناس وانثر.دموعي فالخلا

المواجع كنها قبر ما تاخذ اثنين
واحد يدله ويسلا و واحد ما سلا

يا قلوب العالم المقبلين الراحلين
اه من ظلم الولايه وتمثيل الولا

سعد عيني قبل ما اكون مثل الاخرين
وبري حالي يوم بدلت لبيه بهلا

دورو لي قلب يصبر ولو اشريه دين
غير قلب صب فيه الحزن لين امتلا

.....

[الحمدان]

يا جدي آدم عليك أفضل صلاة وسلام
الوضع ماهوب يا جدي على ما تحب

ما دام بيني وبينك فوق مليون عام
وجب علي أعترف لك بالحقيقه وجب

أنا يا والدي وضعنا ماهو على ما يرام
بعلمك بالعلوم وخل صدرك رحب

من يوم ما نمت في قبرك وطال المنام
الواقع مخيف والدنيا تثير العجب

أنفض غبارك أنا غاضب وعندي كلام
لا بارك الله فالشاعر إذا ما غضب

من عقبك أحفادك أنقسموا وأخس إنقسام
عاتبهم أرجوك يمكنه يفيد العتب

النار من بينهم وصلت حدود الغمام
وقودها الناس ما فيها رماد وحطب

مذاهب وكل مذهب فيه مفتي وإمام
زحمة ديانات تجلد بعضها فالخطب

والدين مبدأ ونفسٍ سامية وإحترام
ماهوب بذرة كراهية ودورة نشب

والدين منهج وكيفية حياة ونظام
ماهو نزاعات ياصل دمها للركب

في ثورة النور ما زلنا نعيش بظلام
سلومنا عقدتنا يا سلوم العرب

أحلامنا علقوها في حلال وحرام
تخيل الحب يا جدي ما هو مستحب

في مجتمع يحتقر من يعترف بالغرام
ما يعترف بالغرام إلا قليل الأدب

تصدق انا وصلنا لآخر الإنفصام
صرنا نقيس الرجولة بالدقن والشنب

ومن علي الطلاق إلى علي الحرام
بناتنا أرخص من المعدن بسوق الذهب

تركض بنا خيل جهلٍ ما عليها لجام
وسحابة الهم يومياً تصب وتهب

وقبايلٍ تحسب أن الجهل ذروة سنام
يفخر بعضها على الثاني بكثر النهب

ما دام حنا عيالك وأنت جد الأنام
أجل على ايش التفاوت فالحسب والنسب

حنا غدينا مثل جسمٍ بليا عظام
والجسم ما يرتفع لا صار جلد وعصب

يبه حفيدك كبر من قبل سن الفطام
شابت نواصيه من هول الزمان وتعب

دورتك بكل شبرٍ فيه ريحة سلام
عشان أعلمك عنهم مير ما الله كتب

من حقي أقول رأيي لو لحقني ملام
قبلي نبي الله بقول الصواب أنصلب

من يزرع السلم في ناسٍ تحب الخصام
مثل من يدور بعيدان الأرطى رطب

ودعتك الله يبه ماني مكثر كلام
لكن قبل لا أتركك ترتاح عندي طلب

سلم على جدتي حواء كثير السلام
قل يمه عيالك اختلفوا على أتفه سبب

محمد السكران

[الحمدان]

ليت مالي عين تدمع ولا قلبٍ رهيف
ودي أن الزين والشين في عيني سوى

مؤمن أن الله تعالى وانا عبدٍ ضعيف
ناويٍ بي خير لو كنت مدري وش نوى

فاقد علاجٍ لروحي ليا جاها نزيف
هو صحيح انسان لكن على هيئة دوى

لعنبو من هل دمعه على فرقى وليف
والله أن فرقى الرجاجيل ملعونة ثوى

اه يا بابٍ مصفح ويا سورٍ منيف
ما وراك الا سنافي وعالي مستوى

لو تعرفون انه انقى من الثوب النظيف
ما كسرتو خاطر الذيب يوم انه عوى

طحت لجله طيح الاوراق في فصل الخريف
يوم طاحت جف ماها وطيرها الهوى

.....

[الحمدان]

ليتني ما رحت أزوره ولا شفته حزين
انكسرت وضاق صدري وعضيت أصبعي

ما قدرت أحب خشمه ولا يده اليمين
بيني وبينه صفايح حديدن مصنعي

جامعٍ له هرج واجد احسب الوضع زين
يوم شفته ضاع هرجي وضيعت سنعي

قلت له كيف الأحوال قال الله يعين
قلت بلحالك قال ايه بس الله معي

رغم ضعفه ينطح الهم بالجنب المتين
تنطبق فيه المدايح بشعر الآصمعي

ما خبرتوا قلب يصبر على غبن السنين
مستعد اشريه وادفع لراعيه السعي

.....

[الحمدان]

يغني قصيدي ما درى ان القصايد فيه
يصفق على جرحي ويطرب على احزاني

إذا قال صح الله لسانك نشدته ليه
انا ما ذبحني غير صح الله لساني

من سنين وانا اخذ من الموهبه واعطيه
اجيب الذهب لعيونه السود مجاني

احبه ومن زود المحبه ما احب اجيه
إذا جيته يـجيني بلا ما بعد جاني

انا ابيه يدري كيف مدري لكن ابيه
ولا ابيه يخلف هقوتي ويتعداني

اذا ما غديت الأولي فالمكان اخيه
انا اتعب على الاول ما يعني لي الثاني

.....

[الحمدان]

يا رب خذني بين اياديك تايب
قدام اجيك علوّ الامتان مشيول

لو ما ني العبد المطيع المثايب
وما ني بسيفٍ فوق اعاديك مسلول

لكني اطهر من مزون السحايب
كاني من مياه السماوات مغسول

ان جيتني ياليل وش انت جايب
يا مرحبا والي يجي منك مقبول

نفسي لها مده لعينة صلايب
من دونها باب الوناسات مقفول

كلن يشوف اني مقصر وغايب
وانا مقصر صدق مدري وش اقول

قمت اتعذر بالشغل والطلايب
وأنا قسم بالله مانيب مشغول

ومقفلٍ جوالي بلا سبايب
الحين لو دقيت تلقاه مقفول

عيّت على صدري تهب الهبايب
لا اداني الجمعه ولا اداني الضول

ما كن لي بين الحبايب حبايب
لو اضحك شوي اتعومس على طول .

خسرت ربع طيبين وقرايب
أحبهم لكن مابي منهم الزول

مانيب والله يا رياجيل خايب
تدرون بي مانيب هامل ومجهول

معي بلا عجزت عليه الطبايب
يتكني وانا ما عندي له حلول

تمكنت بي لي شفت العطايب
وليا بغيت اصدها سجلت قول

وأشوف في ذا الناس سبع العجايب
انقلبت الطاسه من العرض للطول

راحت مراجلنا مراح الركايب
ماعاد يبغى المجتمع غير مبدول

حتى مجالسنا لحقها الغرايب
تشوف فيها شي ماهوب معقول

باطرافها تلقى سنافي وشايب
ومصدرين من المهابيل مهبول

مايستحون من الخطا والمعايب
والبث فيها حي ماهوب منقول

الماء القراح مغثربته الشوايب
واللغز لغزن صعب ماهوب محلول

وين الحصان الي يفك النشايب
اللي كفلني يوم مانيب مكفول

تجيه راسك موجعته المصايب
وتروح كنك ماكلن لك بنادول

من عقب ما كنا اخوان وصحايب
ماعاد اشوفه غير في سته أيلول

ياليتني بين اللحد والنصايب
اشوا ولا اشوفه من الحول للحول

[الحمدان]

زمجري يا سحابة بالرعد من قبلة
وأبرقي لين يدخل بالدرايش نورك

وأمشي مشية سجين ٍ قاصرين ٍ حبله
وخلي اللي سواته يفرحه ممطورك

بأمر ربي تجي القطرة بحجم الدبلة
والبروق تْكاشف كنهم ديكورك

وسيّلي دار من زينة يخالط نبله
قولي أنك دعاوي من طرف مسحورك

.....

[الحمدان]

سولفي يا دار الأمجاد يا وكر الحرار
عن قطامي ٍ شَهَر فيك للعليا سنود

عن محمد سيّد الجود وأصحاب القرار
سيف سلمان المسلّط على رقبة الحسود

بشته مذهّب على المتن من شمس النهار
لأنه أكبر من مدارات وأوسع من حدود

المهابة ما ترصّع على تاج الوقار
لين ما يقتادها نقوة عيال السعود

كل حلم ٍ خططه بالقلم فالعلم صار
الليالي كلها بيض ما عادت بسود

والله أنه شايل الشعب في قلبه شعار
ومن يشيل الشعب في القلب يبقى بالخلود

علّم العالم علوم التقدّم بالمسار
كيف تتطوّر ولا تترك سلوم الجدود

ومن يحط المرجلة في السياسة ما يدار
يلطم العايل على الخد ويبل الكبود

.....

[الحمدان]

يوم غاب النجم الآخر وأنطفى
شانت البسمات بالصبر الجميل

ما غفت عيني ولا قلبي غفى
عنك يا ملح الرفاقة والخليل

وفيك ما فرحّت هرّاج القفى
لو يجيني كل ساعة بالدليل

يا خفيف الروح صادقت الجفا
وأنا صادقت الدموع اللي تسيل

قلت لي نرجع بعد بالك صفى
وأنا أدري وأنت تدري مستحيل

.....

[الحمدان]

دام الذهب لو تردى وقت يبقى ذهب
شفت التجارب تبيّن كل معدن دفين

غنيت لحن الشموخ ودمعتي تنسحب
وقررت أودع غرامك بس في كلمتين

ما عاد فيني صبر يابو الحسب والنسب
الله يسامحك والفرقا على القلب دين

لكنّ قبل المفارق ودي اطلب طلب
عشان خاطر هوانا لا تقفي حزين

.....

[الحمدان]

البارحه مشاعري ما بين مجروح وكسير
والقلب يصرخ للحزن ويقول تكفى وشتبي

غلطان يومني بنيت أحلام وذراعي قصير
كسبت همي وأحتراقي وأشتياقي وأتعبي

يا راضيه بالكوخ والخبزه ومقيال الحصير
كنتي ذكيه لكن العاشق طلع هو الغبي

ودي أكمل سنة العشاق لكن الفقير
مفروض ما يطمح سوى للزاد ولا المشربي

عام ورا الثاني وأنا أحبك وأحس أني أطير
وأقول في بحر الهوى يا زين ممشى مركبي

الين رحتي والحزن من سطوته دمعي يحير
في محجري وأقول يالله صبر أيوب النبي

رحتي كبيره بس مقدارك بميزاني صغير
رحتي لواحد غير سلهامة عيونك ما يبي

شاري جسد بفلوس وقصور وعمارات وحرير
وأنا كنوزي بس في حبي وشعري ونسبي

وأنا الذي الذي شريت روح وكنت بعيوبك ضرير
عينك على غيري وأنا كنت أحسبنك مطلبي

لكن ذي صرخه بوجه الهم والدمع الغزير
ماني من اللي لا رماه الوقت يقضيها حبي

مامت من فرقاك الا تو شفت البعد خير
وعرفت أن البعد عنك هو غناي ومكسبي

بصبر على الدنيا وأراقب كيف دورات المصير
والعز عزي بالعقل والذل يخسى ويهبي

وأعيش راضي بالقدر وأنساك وأسلى وأستخير
والذيب لا فاته ظبي يلقى تس 900ع مية ظبي

ومدام في صبري كبير أموت بأذن الله كبير
ووصيتي لا مت غني فوق قبري والعبي

.....

[الحمدان]

أنا مابي من الدنيا ..وصول للعيون الدعج
وأظن الصدق يكفي..لو أموت..وورثي احرامي

حبيبي جاهل طاغي ..يحسب إن الجوارح ثلج
وأنا مالي شفاه وفم..صوتي ضيّع احلامي

إذا حبك ذبحني صد ّ..كل له بموته نهج
تشهّد بالعجاج البيد..قبل تموت قدامي

أنا غصن ٍ..وأنت اوراق..والعاذل خريف وعج
و وش عذر الورق والغصن..لا يابس ولا ظامي

غديت الشايب اللي عاصب راس الزمان الحرج
كبير حز ّم الدنيا على متنه ..ولا قامي

شليلي بالعفاف ابيض .. على حالته يومه نسج
تدور الناس والدنيا..وأموت وورثي احرامي

.....

[الحمدان]

انتي بكف وباقي الخلق في كف
متعليه في وسط قلبي ولك شان

في غير وصلك مالقلبي ترى شف
محتاج لك يانور عيني وشفقان

لا جابوا اسمك صرت انا تقل مختف
مالي على نفسي الى اطروك سلطان

من غير حبك غضت عيوني الطرف
ياللي جمالك صار للزين عنوان

اريد انا قربك ترى ياغذا الحرف
وان ما حصل موتي ودنياي سيان

.....

[الحمدان]

عـيون الـحب لا يمكن تناظر
عـيوب الـخل لوهو عيب كله

تـماري فـيه وبـوصفه تكابر
تـرى مـن فوق خلق الله محله

رفـيق الـليل في الشباك ناطر
واثـاري الـليل شـباك لـخله

حفظ احلى الكلام وصار شاعر
بـصبر يـنتظر والـصبر مله

حـبيب عـشت في دنياه عابر
حـسب قـوله ويا شعري فقله

انـا ضحيت له وارجي وصابر
واذا عـيـا اقـول الله يـحله

عـلى الـملتاع الا يا بعد باكر
يـبي الـسلوان والذكرى تظله

صحيح ان الهوى سحر المشاعر
يـراه الـصب عـز لـو يذله

عـيون الـحب في قلبي تناظر
تـشوف الـلي عيوني ما تدله

[الحمدان]

‏الآدمي لاطاب نبعة وطبعة
له عندنا حشمة وقدر ومكانة

اما نحشّمه حشمة اهله وربعه
والا نحشم اهله وربعه عشانه

.....

[الحمدان]

كم يزيد الصمت هيبة نفوس الصامتين
مثل ما يكشف خوا ناقص العرف الكلام

ودك تحدد لبعض الأوادم كلمتين
السلام إن جيت وان جاك مردود السلام

.....

[الحمدان]

‏خلك وسيع البال وتحصل الخير
وخلك مع العالم حسين التعامل

وسامح رفيقك لا حصل منه تقصير
واصبر ترى مافي المخاليق كامل

.....

[الحمدان]

‏مهمـا فعلت مـن المعـاريف فـ النـاس
يبـقـى رصيـدك فـ اللـيـال الـصعـيـبه

حتى لو انه ضاع في بعض الاجناس
لابـــد صـكــات الـلـيــالــي تـجــيـبـه

.....

[الحمدان]

منهو تربى في حياته على ساس ‏
تبطي يدينٍ حاولت هد ساسه

.....

[الحمدان]

‏النفوس العظيمة تعرف اللي تبيه
‏ما تدور رضى العالم وتركض وراه

‏من يجامل وجيه ويستحي من وجيه
‏راح عمره وهو يمشي بدون إتجاه

‏البس اللي يعجبك واكل ماتشتهيه
‏دامك في طاعة الرحمن عيش الحياه

‏لا تروح لـ مـكان الا وراحتك فيه
‏ولا تجي من مكان الا بسيرة وجاه

.....

[الحمدان]

‏ياوقت يـ اللي فيك ماني بمرتاح
ارفـق ترى شيّبت يا وقـت راسي

ما باقـي مـن اعمـارنا كـثر ماراح
وانته علينا صرت يا وقـت قاسي

نبى وراك مـن الـفـوايد والاربـاح
ولا عاد نحسب ربحها من فلاسي

احيان نقـضيها سعاده مع افـراح
واحيـان نقـضيها هموم ومآسـي

.....

[الحمدان]

‏مايـرفـعـك مـن بين كـل الـرياجـيل
ويعطيك كلمة ( نعم ) لاجا مجالي

الا فـعـول الطيـِب فـي كـل حلحيل
الـيـا نـصـاك وصـرت فــيً ظـلالـي

وقت القسى تظهـر جميع التفاصيل
ويـظهـر مـن اللـي يرتكـي للثقـالـي

ووقت الرخا مال السوالف مداخيل
كـل(ن) يقـول الـطيّب انـا لـحـالـي

.....

[الحمدان]

‏صبرك على نفسك وصبرك على الناس
يعطيـــك عــن كثــر المشـاكل منـاعـه

لا تــأيد المخطـي ولا تحنـي الــراس
والصبر فـي بعـض المواقـف شجاعـه

.....

[الحمدان]

‏ما ني بمتضايق وماني بمهموم
سهران لكن ليه سهران مدري

الله عطانا عيون ما تعرف النوم
نوم الهناء ياللي تنامون بدري

.....

[الحمدان]

‏لا تُلْحق الـدنيا كـثير التحـاسيف
لو يلحقك فـ الوقت منها خلافي

اضحك وقزرها مزوح وسواليف
وقلبك على كل المخاليق صافي

ايامنا ماهـي بـ دايم على الكيف
واعمـارنا ماهـي بـ دايـم عوافي

.....

[الحمدان]

‏يالله استرني بلطفك دام سترك ثوبي
واغفر لعبدٍ كساه الذنب واصفح عنه

ما لنفسي غير نورك في ضلال دروبي
والمُنى عفوّك وحسن الخاتمه و الجنّه

مذنب ولاجيت اقارن رحمتك بذنوبي
اذكر ان ذنبي عظيم وعفوّك اعظم منه

سبحانه

[الحمدان]

‏لولا الظنون الطيبه مات الإحساس
ولولا التسامح بالحياه إنقرضنا

ولولا الأمل تهنا على سكة اليأس
ولولا مخاسير الزمن ما أتعضنا

.....

[الحمدان]

‏يا كثرهم لا قلت دله وبرّاد
ويا قلهم لا قلت خدمه بسيطه

ويا سرعهم لا قلت هيا على الزاد
على الصحن طاحوا سقيطه سقيطه

.....

[الحمدان]

العاقل اليوم حاله مثل حال الغريب
‏يستغرب الناس من حوله وتستغربه

.....

[الحمدان]

أتشرف شايل اسمك ياوطن عزّي ومجدي
يا وطن ساكن بقلبي ساكن قلوبٍ كثيره

أتشرف فيك والله يا غلا قلبي وسعدي
يا دفانا و يا ذرانا في ليالينا العسيره

وان دعتناالدار جينا كل منّا مستعدّي
ما تردد في قراري ولا أجي حي استشيره

رايتي مرفوعه عالي وسيفها دايم بيدّي
ورافعٍ صوتي فديتك يا ثرى كل الجزيره

وكل من فكر يمسك ياوطن أسلاف جدّي
لازم يفكر بموته قبل يفكر وش مصيره

ياعرب كلّي سعودي وكلّي عزوم وتحدّي
ودام عزك يا وطنا فخرنا في كل ديره

دام عزك ياوطن

[الحمدان]

يا ناس خلّوني معه وإتركوني
محدٍ معوّضني غيابه إلا غاب

أغليه بس شلون لا تسألوني
الحب من ربي يجي ما له أسباب

شوفوه بعيوني قبل تعذلوني
شوفوا حبيبي ماهو بمثل الاحباب

ترضون ولا كيفكم تزعلوني
أنا حبيبي سيد تلعات الارقاب

مافيه مثله بالبشر صدقوني
مزيون متواضع وطيب وجذّاب

واذا مدحته قال لا تمدحوني
ماني من اللي يستحقون الاعجاب

يقول بس الزين فيني عيوني
وأقول أنا ذا بلا بوك يا عقاب

.....

[الحمدان]

ما ضاقت إلا قرّبت في فرجها
لا تشغلك ضيقة ولا يتعبك حزن

حاولت تجبرها وتعدل عوجها
وعند الردي كل العطايا بلا وزن

وانا فدا عيونك و ظاهر حرجها
والدمعة اللي كانت اطهر من المزن

.....

[الحمدان]

العمر طرقه والليالي راحله
والصبر لو غنيت به ما زادني

يم المواني ما قبلني ساحله
لو لي تظاهر بالفرح ما رادني

كني عليه من الشقا لا ناح له
تضحك عيون العاصفه لا صادني

ليت المسا لا رتادني ينزاح له
شيٍ على صدر الجفا ما فادني

.....

[الحمدان]

امنت بك يا رب والموت سنتك
وحنا جنايز والمصير المقابر

يا الله غفرانك وعفوك وجنتك
في يوم ما فاد الطغاه المكابر

.....

[الحمدان]

يا عضيدي فالحياة و راس مالي
لا وقفت تعيد تشكيل الخريطه

دون وجهك ما حسبت حساب غالي
والعسيره لا نصت مثلك بسيطه

يا حزامي لا عبس وجه الليالي
و استفاق الهم و الدنيا شطيطه

و الله انّي ما التفت في ضيق بالي
لا ذكرت انّك على وجه البسيطه

.....

[الحمدان]

حنّا مع الطيّب على كل حاله
ان طاب طبنا و ان تعذّر عذرناه

الله يوفقنا الوفا و الجماله
و اللاش عنّا يقلع الله نحاياه

.....

[الحمدان]

نار المراجل علـى ما قيل وهاجه
و اهل الوفا تاخذ الحاجه وتعطيها

و ليا نصانا عريب الجد في حاجه
تضيق فينا الوسيعه لين نقضيها

.....

[الحمدان]

الفقر فقر الدين و العمر ساعه
ما هو بفقر المال والاّ العلاقات

لا صار وقتك بين طاعه و طاعه
شطّب على دنيا الفنا و الملذات

.....

[الحمدان]

لا صار مال الرجل مبدا وشيمه
ولا له مع اهل الطيب وجه ٍ ولا جاه

يدخل على الله لا يفارق حريمه
ويحط في صالة هل البيت مركاه

.....

[الحمدان]

الحمد لله و التمجيد و المنّه
و الشكر له و الثنا و الفضل سبحانه

شهرين نردف بها الونّه ورى الونّه
سكر بها المسجد المعمور بيبانه

نبكي على الفرض به نبكي على السنّه
و الصف الاول و محرابه و شيبانه

و اليوم يا مرحبا يا ريحة الجنّه
يا قطعة ٍ من رياض الحق مزدانه

.....

[الحمدان]

ضعفي محبة لا تقول اني ضعيف
عز الله انه كان لي قلب قوي

تقول لك قلب من الرقة شفيف
واقول ليته عن عذابي يرعوى

لي عام روحي لا تهيد ولا تقيف
ما غير تلعب فالضلوع و تنزوي

جرحتني جرح على جرح كليف
و خليتني مثل الغريب ابلا خوي

تبيني اجلس لا يجي هرجك عنيف
تبيني اغادر غديتلك جلوي

.....

[الحمدان]

فَيا نَادِبِي سِر فِي قرَاها وَمَسْنَدِي
إلى حَيْ بَينَ أطلاَلْ نَجْدٍ جثُومَهَا

إلىَ سِرْتها مِنْ دَار ميّ وَغَربتْ
ونَابَاكْ مِنْ طُفَّاحْ نَجْدٍ خشُومهَا

أوَّلْ موارِي دَارهُمْ لِكْ جلاَلَهْ
حَاشَا الإلهْ وَبَاقِي الدَّارْ زُومهَا

علمي بهم قطن على جوْ ثَادِقْ
سِقاهَا مِرنَّات الْغَوادِي ركُومهَا

مَرَابيع لَذَّاتِي وَغَايَاتْ مَطْلبِي
وَمَخْصُوصْ رَاحاتِي بهَا في عمُومهَا

.....

[الحمدان]

يا علي صحت بالصوت الرفيع
يا مرة لا تذبين القناع

يا علي عندكم صفرا صنيع
سنها يا على وقم الرباع

نشتري ياعلى كأنك تبيع
بالعمر مير ما ظني تباع

شاقني ياعلي قمرا وربيع
يوم أنا آمر و كل امري مطاع

يوم أهلنا وأهل مي جميع
نازلين على جال الرفاع

ضحكتى بينهم وأنا رضيع
ما سوت بكيتي يوم الوداع

هم بروني وأنا عودي رفيع
يا علي مثل ما يبرا اليراع

طوعوني وأنا ما كنت اطيع
وغلبوني وأنا قرم شجاع

وجد عيني على ظبي تليع
عندكم كن فى خده شماع

شيبتني وأنا توّي رضيع
جاهل توّ في سن الرضاع

سايمين الهوى يا من يبيع
سايمين الهو لاهل الرفاع

وانت يا لايمي جعلك تضيع
ما تماري بها مثل الشعاع

ودي اسلاه والكون الفنيع
سلوتي ياعلي ما تستطاع

دون مي الظبي وام الوضيع
والثعالب وتر بيع الشراع

ورأس ريع دخل فى بطن ريع
مستطيل ووديان وساع

محمد بن لعبون

[الحمدان]

ياذا الحمام اللي سجع بلحون
وشبك على عيني تبكيها

ذكرتني عصر مضى وفنون
قبلك دروب الغي ناسيها

أهلي يلوموني ولا يدرون
والنار تحرق رجل واطيها

لا تطري الفرقى على المحزون
ما أدانى أنا الفرقى وطاريها

أربع بناجرفى يد المجمول
توه ضحي العيد شاريها

أنا اشهد انه كامل و مزيون
مثل البدر سنا الليل شارع فيها

يامن يياصرني انا مفتون
الروح فيها الذي فيها

يامن يعاوني على الغليون
والدلة الصفراء مركيها

سته بناجر وأربعه يزهون
وان اقبلت فالنور غاشيها

أبو هيا طرب يشيل فنون
ما ثمن الدنيا وطاريها

.....

[الحمدان]

حي المنازل تحية عين
لمصافح النوم سهرانه

والاَّ تحية غريم الدين
معسر ووافاه ديانه

منزل فريد البها والزين
عطبول مكحولة اعيانه

ودي بنسيانها ومن اين
ينسى محمد لخلانه

اطيع انا في هواه اثنين
سلطان قلبي وشيطانه

اتبع هواها من اين إلى اين
واحظى بشوفه ورضوانه

وابغضت الادنين والاقصين
واحببت قومه على شانه

يالايمي به شوين شوين
ديان قلبي وديوانه

ما شفت برقٍ سري ما بين
ذيك الحواجب بليوانه

وما ذقت مابي رماك البين
بين شفتيها و برهانه

ومجدَّلاتٍ على المتنين
سافات خانه على خانه

والبطن والخصر والنهدين
والعنق والعين وأوجانه

والورك والساق والفخذين
من بينهن فلقة الدانه

ولا دعاك الولع ياشين
دعوى المدوه لظميانه

وين اشتكى ما دهاني وين
مشكاي لله سبحانه

واقول يا أهل الهوي عزين
ما قال محسن لعثمانه

.....

[الحمدان]

ذا حِس طارٍ او ضميرك خفوقهْ
يدقّ به من نازح البين دَقَّاق

الحيّ هُو حيك وطابت وفوقهْ
والدار هي دارك وهذيك الاسواق

.....

[الحمدان]

يا رحي يُلهى لها كف الفلق
دارها الافلاك والدنيا دقيق

ناشت العربان والشمل افترق
في فريق حال من دونه فريق

شتت الخلان وادعتهم طقق
ركبة الماشوم لحصان سبيق

سيف غارات الليالي ونذلق
مغفر السلطان وخوٍ له شقيق

.....

[الحمدان]

يا سنين لي مضت مثل الحلوم
كنهن في دار ابن عوام عام

عل غريم الشوق يشبع منك يوم
شبعة المسكين بايام الصرام

او تلمين الشمل لم الهدوم
يا ليالي السعد عودن بالتمام

قالت اللي فات ماهو بمعلوم
ردته لك وانت سالم والسلام

.....

[الحمدان]

‏تـرا الـرجال انـوع بالـوجـه والجاه
والقرم والـقـاصـر ما فـيـهم تـشابـه

احـدن ليا صكـتك دنيـاك تنـصـاه
واحدن ليا شـان الزمن صـك بابـه

.....

[الحمدان]

‏استحينا وأثر ما هم مستحين
يحسبون الشمس في راحة يدي

والله إنـهم صادقين الأولين
الردي مهما تسوي له ردي

.....

[الحمدان]

‏ناس تهل الدمع باسباب الفرح
وناس تهل الدمع من حزن حصل

وناس كما هي في فرح ولا ترح
ما تبكي الا عند تقطيع البصل

.....

[الحمدان]

‏العدو احيان ما منّه مضرة
غير حقدٍ ينقله في وسط جوفه

البلاء في صاحبٍ كل ما تبره
يجحد المعروف ما كنه يشوفه

.....

[الحمدان]

لا صار ساس البيت مبني على الطيب
كـثـرة عـواصيـف الـزمـن ما تـضـرّه

يبقـى بعين اهل الوفاء والمواجيب
قــدره كبـيـر ولا نـقــص ربــع ذرّه

.....

[الحمدان]

عز الله إنا كل بابٍ طـرقناه
‏ما كل مانرهي عليه يتهيّا

‏من يبذل المجهود حنا شكرناه
‏اللي ليا جيناه رحـّب وحـيّا

‏واللي من اول للثقيلة ذخرناه
‏ما اقول عيّا لكن الحظ عيّا

‏اللي له اقرب من يساره ليمناه
‏ابعـد علينا من نجوم الثريّا

.....

[الحمدان]

والله ما أواطن عيشة الذل والعار
‏مدام لي شيمة ونفسٍ قنوعه

‏ولو الوسادة من صلافيح الأحجار
‏للراس خير من الترف والميوعه

.....

[الحمدان]

لا تعتب على دنياك يا الخاطر المجروح
‏تبا تروح من دنياك والنفس ما ارتاحت

‏تمر السنين وكل ساعه تجي وتروح
‏ولك ساعةٍ فالعمر لا جات ما راحت

.....

[الحمدان]

‏نمسح خطاء اللي ماقصد يخطي
وان عاد واخطا ترفّعنا عن احراجه

وان كرّر الثالثه والله لا يبطي
يدوّر مْن السماء والأرض مخراجه

.....

[الحمدان]

ابات الليل في رجوا صباحه
وادق من الندم بالعود سني

ولا ثوبي غدا يطرخ شلاحه
يدق القاع ردنه ومتثني

عليهم صار خدي به قراحه
من الفرقى وشفني ويش كني

.....

[الحمدان]

يا سامعٍ مني وصية ناصح
أظن بعض الناس ما دريو بها

الأوله صر مجهدٍ بالطاعه
تفرح إلى جا حد وزن ذنوبها

والثانيه هدي الرسول اعمل به
تستر نفسك في لقا محبوبها

والثالثه احذر اجروح لسانك
ترا جروحه ما تسر طبوبها

الرابعه احذرك عرض الغافل
واعرض على نفسك جميع اعيوبها

والخامسه لياك توذي جارك
ولا توقف للنساء بدروبها

السادسه لياك تجفى ضيفك
أعط الرجال حقوقها وما جوبها

السابعه احلم على اللي جاهل
ولا تكثر للصديق اعيوبها

الثامنه صر للقريب متواضع
صر له ذلولٍ عن اطبوع اصعوبها

التاسعه احذر جاهل او عالم
إلا إلى وردت عليك اخطوبها

العاشره صر للرجال املازم
يبين لك من ما ترا تجروبها

هذي وصاتي للرجال احفظها
واسمع اوصات البيض يا مثيوبها

.....

[الحمدان]

فكرت بالدنيا وهي مثل لجه
بحور وكل في البحور يغوص

احد قليل الفود لو كثر غوصه
واحد من الغبه يجيب افصوص

ما ياخذ الدنيا قوي بحيله
ولا حازها بالحرص كل حروص

ولا يحرم الارزاق في الناس عاجز
ولو كان هماته محازم خوص

تراها من الباري تقسم وهايب
على هذا من هي النبي نصوص

.....

[الحمدان]

يوم المقاسيم والأرزاق ساقتني
وانا عن اهل الهوى مقفي ومنحاشي

البكرة اللي تبوج الدوّ لاقتني
تمشي على هونها يبرى لها الحاشي

هميت انا بوقها لا شك باقتني
وانا نصوح ٍ لها ما نيب غشاشي

بغيت انا مسكت الحاشي وعاقتني
يوم انها تلتفت وتطالع الماشي

حولت من مرقب العشاق وارقتني
راع الهوى لو تعلاّ منه ما عاشي

يوم اني اقنص وبارودي على متني
وانا تراي آخذ الشوكة بمنقاشي

واليوم صديت والأيام صدتني
ما عاد لي بالهوى ومتابع اللاشي

.....

[الحمدان]

السد باح وداخل القلب متلول
ودنيت رسم القيل يا سامعينه

شاروا علي الربع عاذل ومعذول
وجوني ينصحون وصار مثل الرطينه

قالوا اقعد قلت ما ناب مهبول
بس اقصروا يا اهل العقول الرزينه

الجسم في الأرياف والقلب متلول
وما ذقت انا هجس انكم ذايقينه

طبيت نجد وصرت بالدين مشكول
الله لمن حمله حمل ثقيل يعينه

يا نجد حديتيني انشرك واقول
من بربك تالدينه وما تبينه

جيتك وانا عاقل وبك صرت مهبول
خوف على ما في يدي تاخذينه

اخذتيه بالمد ولاعاد لي قول
كم خيّّّّرٍ في مرزقه تفجعينه

عقب الخباري شربنا صار بدحول
والزاد اشوف تجارنا جاحدينه

عقب الغنى قمت ألبس الثوب مشلول
وافرح إلى جبنا العشا مشترينه

يوم على الثنوه ويوم على التول
في نجد شاب الراس من قبل حينه

قل الدسم والشوف ما يقطع الزول
الدر ما يعرف ولو هو شنينه

تقول ذا طبعي ولاهوب مجهول
أنشد ترا شيابكم خابرينه

.....

[الحمدان]

ناح الحمام ونحت مثله إلى ناح
وشعاد لو جاوبت ورقٍ ينوحِي

يا ونتي ونّة كِسيرٍ إليا طاح
ساقه إلى الركبه غداله اشلوحي

البارحة كلٍ بحلو الكرا ساح
وأنا اشتكي حر المصيبة ابروحي

إليا بغيت أسلي عن القيل وانساح
كدّر صفا صبري عشيرٍ مزوحي

أجادني عقب العشاء رمح شلاح
والناس ما تدري بخافي اجروحي

وأثر عديل الروح دومي وذبّاح
وأنا أحسبه قبل هذا نصوحي

وأثر معه لي مقاميع وارماح
لوا على وين التعازيل يوكي

.....

[الحمدان]

ما بين هزلك يا حبيبي وجدي
متعه خيال وجنة للمحبين

لو التقي وياك في حلم وردي
أكحل الدنيا بزهر البساتين

بامسح عن العبرات عيني بيدي
وأخلي الدمعه بعيده عن العين

عشان لو ببكي وأبيح بسدي
يكون في نفسي ولا الناس دراين

اشكي لقلبي كل ما كان عندي
واضحك بنفس الوقت والكل لاهين

لا صار حبك هو ملاذي مردي
لو ما تجي هالحين للوقت بعدين

.....

[الحمدان]

جفاني النوم يا عيني جفاني
إلا وشلون يتركني زماني

غريب أنك نظر عيني وتخلف
مواعيد الهدب لك والأماني
وتخلف شي تخلف أنت تخلف

يقين الوقت حرمان الثواني
الا ما كنت أحبك صرت أحبك

ولولاك أنت مابي حد ثاني

مواني كل هالدنيا مراسي
ببحر الكون يا كل المواني

.....

[الحمدان]

أبعدهم ما يلحقه كود نابية السنام
حايلٍ ما فوقها كود خرج شدادها

أرقب الطبخه تجيك وسنع تصريف العلام
واجدٍ لك مقعدك لين يفوح قنادها

مرحبين ومسهلا عد نجمٍ في ظلام
بالذلول اللي أقبلت من ديار أبعادها

نحف حالي نحف عسوٍ إلى قد هو صرام
أحذفه اللي رقا في طويل أعيادها

.....

[الحمدان]

ليته يناديني وانا بس اناديه
واجاوبه يا حسين ولو كان مره

عليه قلبي يابسات عراويه
اقفا ابقلبي من ضلوعي يجره

ذالي ليال قاعده في حراويه
ليننها زادت علي المضره

قمت اتوجد وجد من مات غاليه
قبره اقباله كل يوم يمره

أو وجد من خاوه والليل ممسيه
ينخا ولا حد من هل الهجن مره

خلي طريح والضواري اتحاضيه
بالمقطعه وامقابله ضلع حره

على الذي ماشفت حي ايحاليه
شيخ على القوم المعادين شره

.....

[الحمدان]

قلبن فر وأفتر مثل المروحه
فرها فرت جديد قوين سيرها

ان ضحك لي صاحبي سر قلبي وافرحه
وان تغلى صاحبي زاد عيني شرها

صاحبي ناوي يذبحني وانا مقوى اذبحه
شب في كبدي سنا نار زوّد حرها

.....

[الحمدان]

ذكر الموده للعرب ما بها باس
لكنها على المولع مصيبه

حب الرفاقه شيب القلب والراس
وباق الموده له بديل قريبه

باقي العرب تلقا بديله مع الناس
واخوك لو درت البدل ما لقيبه

.....

[الحمدان]

يا علي يا خوي وين بدواني غدو
لا خبر لا مديد ولا بقلبي بنيس

راحو العربان في شف قطعان البدو
في هوى الخلفات ما راوزوا يوم الخميس

نحف حالي ياعلي نحف مدراة السدو
وزوع قلبي زوع حر ليا شاف القنيس

.....

[الحمدان]

الا يارفيق الدرب خلك على يمناي
ونا هقوتي بك هقوتي ما تخيبها

وعاهدك في درب الردى ما تسير اخطاي
ولا اهين نفسي وأتهاون بواجبها

والا يا بنات الفكر بالشعر يمي جاي
لعقل ٍ يدير النادره لين يكسبها

ترى الشعر في عقلي ودمي وكل اعضاي
جرى بالعروق وكل الاحساس صاحبها

وانا اللي حداني في شجوني وفي مسراي
دروب الغرام وما جرى من مصايبها

مادام الوداع وفرقة الشمل والاقفاي
قريبه عسى ما عاد يومٍ يقربها

الا ياوزين الروح ياغايتي ومناي
على هون لين النفس تلحق مطالبها

تعال انتعاهد ونتوادع ونقطع راي
ترى ساعة الفرقى تحرك عقاربها

ونا يوم اسوق النفس يمك بحكم ارضاي
ابارك لها بالخطوه اللي تقربها

.....

[الحمدان]

ترجيته عليه الله واكبر
ولا فاد الرجا واحترت حيره

تغير طبعه الاول تغير
نسي حبي وانا شبيت غيره

على ما جاك يا قلبي تصبر
وقل يا الله عسى با الامر خيره

حلف لي با الوفا لاشك قصر
عهود الغش مدتها قصيرة

أنا والله لوجاني وتعذر
فلا أقبل عذر من خاين عشيره

وباقي الحب عزالله تكدر
وخل الحلو يتريح ضميره

اذا جيته عسى رجلي تكسر
ولو قصدي الهوى عينت غيره

انا قادر على النسيان واقدر
على الاسفار من ديره لديره

ولا هو كفو نتعب له ونسهر
وهو مرتاح عند الله كبيرة

ألايا نعبوا ذا الحظ ألاقشر
عليهم حذني عيشه حقيرة

ألايا قلبي أصبر لا تحسر
خلاص انسى الصغيرة والكبيرة

.....

[الحمدان]

جتني تخبر بيوم الانقطاع
اللي جرى حبها مجرى دمي

قلت الخبر قالت أمر الله مطاع
في حكم ربي وذاك الآدمي

كل ماجيت باقول الوداع
تموت كلمة وداع في فمي

قالت ترى الروح بعدك في نزاع
وربما كان عرسي ما تبي

هديتي والهديه ماتباع
احفظ لذكراي عندك خاتمي

أمانة الله سري لايذاع
وقلت للحزن لا تستسلمي

ياشمعتي في دجى الليل الضياع
انتي سبب علتي هل تعلمي

والله لو الكي فيه انتفاع
لهل حتى عيوني تنعمي

.....

[الحمدان]

دلعوك أهلك وتوك صغير
واكتمل عمرك وصارت طبيعه

ما تغير لا تحاول تغير
أمر ياذا الحلو ما تستطيعه

وانت ما تعرف رجب من قصير
والعمر توه على أول ربيعه

ما ربيت الا وسط بيت خير
عايشين أهلك بدنيا فظيعه

كلما شفتك علينا تسير
ودي اسكن قصر والبيت أبيعه

مستواك أعلى وحسنك يحير
والحلى والدل أخذته جميعه

والجعود السود والوجه المنير
لو كلامك بالذهب ما تبيعه

.....

[الحمدان]

يا غزال البيد كنت احسبك خالي
لكن اتصبر وربك يسويها

والهوى ما يعرف الجد والخالي
والمحبة من يبيها يداريها

شاكيآ حالك وانا شكيا حالي
كل نفس عذبتها بلاويها

اتركوا من شغله القيل والقال
جايب قصة وقصة يوديها

المحبة دايمآ مرها حالي
جربتها نفسي الله يعافيها

قل لخلك راعني يا هوى بالي
عشرة ايام مضت لا تخليها

الوفاء ما يظهر الا من التالي
هذي العشرة وهاذي معانيها

صورة المحبوب دايم تروالي
كل ليلة في حلا النوم أراعيها

زول خلي صار من بد الازوالي
قصة الحب الطويلة وما فيها

.....

[الحمدان]

هب الهوى واقبل علينا شمالي
وانعش عروقٍ بعضها كان مشيول

ارتاح قلبي يوم خلي وفالي
وأنا من اول حاير الفكر مشغول

لابعد من حب أول وتالي
وأنا أشهد ان انتا من البيض مدلول

الصاحب اللي ما بخل في وصالي
يفداه عمري وعن هوى كل مجمول

بس اسمعوا ياللي سمعتوا مقالي
مير لا اخطيت في بعض ما اقول

.....

[الحمدان]

رحال عن ديرتك رحال
أسلم عليكم فمان الله

يا بعد عمري وراس المال
يا أعز وأغلى عباد الله

صبرت واليوم صبري طال
ودعتكم وأمرنا لله

رحلت يومك بريت الحال
أهوم انا في بلاد الله

طاوعت بي نمت العذال
وأقوالهم منكم لله

واشعلت نار الغرام اشعال
ما رفت حالي لاجل الله

ليتك ترى دمعي الهمال
سحايب تشتكي لله

وافراقكم ما طرى في البال
واليوم يا قلبي استعن با الله

.....

[الحمدان]

الأيام دواره حذيرك نذيرك
وما فات منها مات لاترتجيها

ومن حد ها التاريخ ماني عشيرك
محبه تنزل روسنا ما نبيها

تعوضني الأيام عنك بغيرك
وكلآ له اعماله يحاسب عليها

أبا راقبك من بعد واعرف مصيرك
أنا وأنت في الدنيا وذا الناس فيها

أنا كنت في كل الامور استشيرك
أتلقى الاوامر منك واعتز فيها

ومن وين ما تمشي مصيري مصيرك
أبا اقابلك في اي ديرة تجيها

واذا كان قلبي ما هوى شخص غيرك
فباقي حياتي وش ابي بس فيها

.....

[الحمدان]

الا يا حمامة صوتها للعرب مسموع
سلامات هل جاها من الوجد ما جاني

عليك البكى وانا عليه سيول دموع
وكل يساعد في البكى مننا الثاني

فلاني بحزنان ولا خاطري مفجوع
ولكن سبب ما بي نزح دار خلاني

مساكين من حبل الوصل بينهم مقطوع
وكان السبب في قطعته بعد الاوطاني

فرحمة على اصحاب الهوى لو يموتوا جوع
بعيشون في برخلا بين ظلعاني

الا يا حمامة والعتب بيننا مرفوع
تعيشين في وحده وانا اعيش وحداني

تعالي نساعد بعضنا لو غدينا ربوع
تخفف من احزانك واخفف من اشجاني

.....

[الحمدان]

فوق بحر الهوى تجري مراكبنا
نقضي الليل كله فوق موجاته

نرضي احبابنا نوفي بواجبنا
من نقض عهدنا نقطع علاقاته

ما لنا غير خالقنا يحاسبنا
نبلغ اهدافنا والنفس مواته

با الصراحة نخاطب من يخاطبنا
لين يظهر لنا قصده وغاياته

الردي لا حشى ما هو بصاحبنا
حيث عاداتنا ما هي بعاداته

الوفى عند جاهلنا وشايبنا
راعي الطيب ما يحسب خساراته

نعرف اللي من الغيرة يحاربنا
الغلط حيلته والغيض قواته

انتهينا وصفينا تجاربنا
نعرف الهرج الى من جاء مجالاته

.....

[الحمدان]

يا عشيري لفاني منك ما حس بالي
شايفٍ الجفا من عقب هاك اللباقه

صعب رد الجزا في وقتنا يا حلالي
كيف تقدر فراق اللي عناكم افراقه

كان قلبك تنكّر والهوى عنه زالي
او صفّها لك من العربان غيري عشاقه

انت تلقى وانا القى من يمضّي الليالي
كلها عبر دنيا ما بها راس طاقه

سالمٍ راس مالك لك وانا راس مالي
سالمٍ لي وبعض الزود مرٍ مذاقه

من جفاني جفيته يا حسين الدلالي
فان ما يتبع المقفين كود العلاقه

الملك فيصل رحمه الله

[الحمدان]

ألا يا من لقلبٍ كل ما جا الليل جاه خلاج
يلوج ويجتلد بالصدر والعربان ممسيني

انا متحيرٍ ما ادري عن المدخال والمخراج
الا واعمس رايي ما لقيت اللي يقديني

الا يا مجيب دعوة من تصافق قوقه الامواج
أنا بحماك يا وال الخلايق لا تخليني

ألا يا وجْد روحي وجد من خلّوه بالمسهاج
كسير الساق بنحور المعادين المغلّيني

الى من دك هاجوسي ولو اني على ديباج
ولو جَنّي جميع البيض غيره ما تسليني

الا واهَني مخلوقٍ يفرّج ضيقة الادلاج
الى منه دخل بالسوق غادٍ له مياديني

ترى بعض العرب عمْلَه بروحه مثل عمل سراج
يضوي للعرب والنار في قلب المسيكيني

الملك فيصل رحمه الله

[الحمدان]

الجود مبداه الندى والعز للبيت المكين
وايامنا تلقح ويالد خيرها مع شرها

والامر لله وان بغاها ماتعدى كلمتين
يجري مراويح السحايب الليال يفرها

والذل وجه اهل الردى والعفو مبدا الطيبين
واللي نفخ تال الرماده في عيونه ذرها

والرجل من قبل الدحم يتكي على الضلع المتين
والا يعقل الطرقه اللي ما ربح من برها

الليل ياجزل القصيد الله يعين الصابرين
ان ما قطعنا خبة سحب الذياب تمرها

مثلي ومثلك فالمواقف والمساري والسنين
اثنين خوتهم على برد الليال وحرها

روح على صدر معودني على صرف الثمين
واسمع بيوت قبل تكتب قيل لله درها

اونس لوقتي خنجر فاقصى ضلوعي من يمين
كنه ليا هسست عيوني من غليل يجرها

ادرك مياسمها على كبدي وتسري فالوتين
واتبع سهرها في عيوني واتطعم مرها

وافز واقف وادرج قبل المطيح من الدفين
واغشى ولا ميزت عود من جديد يكرها

لي غاية تتعب لها روس الرجال الخالدين
وانا سمى اهل المسمى وان شعلت اسرها

ماجوز لين الحق مداها يامعين انك تعين
والا ان روحي نازع الارواح قام يغرها

من عقبها ياللي مضالك فالمجافي ليلتين
الله وكيلك تكفي الدنيا ويكفي ضرها

عيني حجاب احبابها والراحلين الراحلين
اشوم عنها وانت ميز فالعلوم وزرها

لحدت قبلك غالي من غالي من غالين
وقفيت ماسيلت عبره والضلوع تجرها

.....

[الحمدان]

الا يالغرام اللي بدايتك كاين حي
نهايتك كاين حي كالمبتدى والا

سكنت القلوب العاشقه منت ساكن حي
وياما وياما من سبايبك كم والا

نهايتك شمسٍ حارقه ماتحتها في
ولا لك من الوافين صاحب ولاخلا

اخاطبك من مبدى جروحٍ تبقت في
وعذابٍ على دروبك مابقى ولاخلا

وانا والله اني لابخيلٍ ولا لاشي
معاش الذي يقضي مدى العمر ماهلا

لكن انت دايم كل مشيك ولا لاشي
هلالٍ عليك ايهل واهلال ماهلا

كشفناك عبر النت والـ f وام بي سي
وصبرنا عليك وصبرنا المنتظر كلا

هذا الشكل والمضمون لكن وضعك سي
ماتنفع معك حاشا ولو اختها كلا

قبل لاتهيا ياغرامي لنفسك هي
مناخٍ ملايم فيه تسكن وتتسلا

.....

[الحمدان]

المملكه بيت العرب والعروبه
ما هيب بيتٍ للمفاسد والارهاب

عن كل خدشٍ فالحياه محجوبه
ومحصنه عن كل شيطان بكتاب

ومضفي عليها العدل بشته وثوبه
ومن دونها حدبٍ يقصن الارقاب

دام عزك ياوطن

[الحمدان]

جيتك مسلّم مسالم لا تحداني
أقول لك كلمة ماهي على بالك

أقول الأول تراه أنته وأنا الثاني
في سيرة الحب أوقع لك على ذلك

يا صادق الود ليه أعلنت هجراني
أن كان من جد فال الله ولا فالك

ماني مصدق ولو أتغيب تنساني
وإذا تناسيت تأثيرك على حالك

صحيح أبا اعيش في لوعه وحرماني
لكن أبا أصبر ولجمع صبري ألا لك

أنا عطيتك عهد والصبر برهاني
وأن كان فكرت أبا أنساك إتهيالك

وأنا مفوضك تأمرني وتنهاني
عيوني لخاطرك والقلب منزالك

.....

[الحمدان]

الهنوف اللي ملامحها تشد الناظرين
قا بلتني كيف مدري كيف انا قابلتها

المهم اني وقفت وكان عندي كلمتين
قلت وحده مرتبك والثانيه ما قلتها

قلت كلمة من خايف كنت اباكمل منين
مير يا حسرة لضيق الوقت ما كملتها

كل ما فالامر نظرة ساحرة من طرف عين
ارسلتها لي وانا رد اعتبار ارسلتها

قلت ابكتب قصتي في جملة للعاشقين
ما طلعت بجملة تكفي اذا حللتها

واختصرت الامر صبرا يا معين الصابرين
واعرف اني معك يا قلبي نعم طولتها

والغلا يا قلب تذكر وقتها وداك وين
لو معك حيلة قبل تضحك علي احتلتها

يا معاتبني معذبني على طول السنين
رحلتي من حيث ما وديتني واصلتها

.....

[الحمدان]

قال الوداع وقلت وين انت ماشي
قال استفزك قلت طلعت روحي

قال امتأكد قلت رغم اندهاشي
ارجوك قدّر موقفي لا تروحي

قال استريح ومن عظيم ارتباشي
اضحك فرح وانا دموعي تفوحي

قال انت تضحك ليه والدمع جاشي
مدري كلامك جد والا مزوحي

قلت انتفاهم قال ليه النقاشي
اسمح لقلبي بالصراحه يبوحي

هذا صحيح الحب والا بلاشي
يا حبي الاول وبلسم جروحي

يا غيث قلبي من صدوق المناشي
يفداك برق" في جبيني يلوحي

رمش" لك الحاف"ورمش"افراشي
يا منتهى عزّي وغاية طموحي

.....

[الحمدان]

احلم ترى ما صار فيه الكفايه
العفو عند المقدرة وانت قادر

ان كان لك رغبة ومقصد وغايه
حققتها لكن بالعفو بادر

من البداية لين حتى النهايه
وافي معك ما كنت في يوم غادر

والعكس بالهجران تحسن جزايه
ومجندٍ لك في حياتي كوادر

يا منتهى درب الشقا يا شقايه
انته من انواع الشقا نوع نادر

اكسب رضا نفسك وترهن رضايه
مدري متى عنك التكبر يغادر

مدري خطاك الصبر ولا خطايه
نبا نتأكد من جميع المصادر

.....

[الحمدان]

ان شفت لي حاجة ما هيب تعجبني
أصد عنها تقل ماشفتلي حاجه

وماصد عن واحد بالضيق يندبني
أوقف معه وقفة يقدح بها سراجه

أجامل الناس والا وأكبر غبني
من واحد يدرج العالم بمدراجه

محابل السوء ماتحبل وتقضبني
لا والذي فضل محمد بمعراجه

كف تطالب وراء حق وتطلبني
فزعة ضحى مال و لاجاه ومواجه

أقوم واثني ولابه شي يرهبني
مايغلي الموقف إلا شدة أحراجه

مواقف تنسب السالم وتنشبني
أبلش بها كان وقتي مطلق حجاجه

.....

[الحمدان]

هات لي علم الغرام من أوله
ما بقى إلا كلمتين قولها

لا تقصر شرحها لي طوله
ولا تنقص عرضها من طولها

اصغر الأخطاء تفضل هوله
وكان ما صبت الهدف جت حولها

هات سلطان الشكوك وخوله
حجة المحتج من مدلولها

وكان نفسك من عهدك محوله
السوالف طحت في مجهولها

ظن ظنك والشكوك تموله
هرجة العاذل ظهر مفعولها

الغلا يضحك على من دوله
والقضايا عزها بحلولها

.....

[الحمدان]

وحالي اللي من الهجران منذويه
كما ذوى نبت قاع ٍ يابس الجذري

واالجفن جافى الكرى والكبد منكويه
وهاذي نتيجة معاناة الهوى العذري

عزالله اني حريص ولااقرب الهويه
ونذرت ما امرّها غير آخذٍ حذري

وهويت لي هويةٍ مع دربها دويه
ولا عاد لا فاد لا حذري ولا نذري

ظامي ونفسي من الاسقام مرتويه
والحال ماعاد منها الاّ النسم يذري

على وليفٍ عليه الروح ملتويه
لو قالوا الناس عامي قلب ومهذري

وفاتي وعيشٍ بليّاه مستويه
الاّ انّ في عيشٍ بليّاه وش عذري

.....

[الحمدان]

سرى الليل يا قلب العنا بين غيظ وهيض
تحسّب لمستقبلك وتراجع الماضي

أخذك الرجا والياس بين الرضا والغيظ
لأمانيك والذكرى عن اللازم الحاضي

ألا واه من ذكرىً لهمّ الحشا تنقيض
تطرّي على الزعلان مايزعل الراضي

ما فدت من الاستعجال غير الندم والريض
وطغت حسرة إقبالي على سلوة إعراضي

لاعادت طواري الهقوه اللي مع التخفيض
هاك الحين دوب تشيلها سبع الاراضي

تهقويت بالاثمار والظلّ فى الحمّيض
ما دامه نبات وقمت اداريه وآحاضي

وعدّلت له كل السواقي بعذب الفيض
وعوّدت لاجله عالم اثار ورياضي

وصبرت وتحمّلت الشقا فى الشتا والقيظ
وكمّلت خمس سنين فى الشاظي اللاظي

جميع الليالي سود حتى الثلاث البيض
يروح التعب والصبر فيها على الفاضي

.....

[الحمدان]

فيني الهدوء اللي سكن فيه الأزعاج
‏نرفز حدود الصـبر واجتاح حـدي

‏سجين فكر وغفوة عيوني ازعاج
‏واللي بودي ما هو بكيـف ودي

‏أنام وابني في سماء أحلامي أبراج
‏واصحى وتصحى عيون الأيام ضدي

‏محتاج اعيش العمر ماني بمحتاج
‏ولو باح سـد الناس ماباح سدي

.....

[الحمدان]

بين الضياع وبين كثرة شتاتي
محتاج انا لي برّ يا كثر امانه

يا كثر ما حاولت بمحاولاتي
ووقتي بدى يكثر عليّ اللعانه

مليت من روتيني وأغنياتي
ومليت من قلبٍ تزايد حنانه

اطلع وانا والله ماعرفّ جهاتي
وارجع وانا مدري وش ارجع عشانه

خايف يروح العمر دون امنياتي
واخاف حلمي ما يجي في مكانه

واخاف ما أخشع وازل بصلاتي
واخاف قلبي لا يخل اتزانه

واخاف اموت ولا احصل نجاتي
واخاف اضيع بلحظة الاستهانه

يارب وحدك عارفٍ في مماتي
ووحدك تعين الي طلب استعانه

تجعلني ابقى في ثباتي ثباتي
واعوذ بك من ذل وقت وهوانه

وتغفر جميع ذنوبي وسيئاتي
ويا رب تجعلني اصون الامانه

آمين

[الحمدان]

جف صوت الحروف وشح فكر الكلام
‏وانعقد حبل .. فوقه عبرة جانيه

‏كل ماقلت هانت بذكر الله .. وانام
‏ناخ ركب الجروح اللي لفت عانيه

‏كل ليلة بـ صدري .. مؤتمر لسلام
‏وينقصف ما يكمل بالفرح ثانيه

‏الطف الكذب قولة بـ أن حالي تمام
‏والمعارك بـ صدري طحن متفانيه

بين خابت ظنوني بين كثر الملام
ارجي الله جزانا ثمرة دانيه

كيف بقنع عزومي تستمر ل الامام
وانا حكمة حياتي فانيه فانيه

.....

[الحمدان]

‏ياصدري فتحت ازرار ثوبي وشلت الكوت
‏ابي تنطفي نار في الأضلاع مشبوبه

‏انا معي ضيقة شايب سمع طاري الموت
‏يشوف الحكي صوبه وهم ماهم صوبه

‏يعرف ان وقته زل وان العمر موقوت
‏ولا هو بعايش كثر عمر انقضى دوبه

‏فنو جيله اللي عمرو في البلاد بيوت
‏ليا شافها من عقبهم ضاق به ثوبه

ولا عاد به ناس تزوره ترد الصوت
‏يقضي فراغه منطوي يحسب ذنوبه

‏الا ياصدر لا ضايقك همك المكبوت
‏توجه لـ رب يشفي ويقبل التوبه

‏لو انك ب ليل وموج بحر وفي بطن الحوت
‏اذا انك دعيت الله .. نجاك بأعجوبه

.....

[الحمدان]

أخلفني الوقت مخلف كل متنبّي
‏أنا اشهد إني بحاجة من يواسيني

‏بين الرفاقه مثل خطوات متصبّي
‏أكنا من اللي على يسراي ويميني

‏أسرق من الونّه اللي ضيقت لبّي
‏ولا أزعج الدمع إلين الدمع يعميني

.....

[الحمدان]

‏كنّي بديت أخاف عُمر الثلاثين
‏خايف لا اجيه بدون حلم وهوايه

‏بفقد شعور القادم افضل وبعدين
‏وبفقد آمان التجربّه و الغوايه

‏وبتغيب عني الوان و ابقى بـ لونين
‏ويبدا يناظرني القلق فـ المرايه

‏وبشوف فـ عيوني شعور المسنين
‏و المنتصف ما بعده الا النهايه

.....

[الحمدان]

‏أغلب رفوف الكتب ما حرَّكت ساكن
‏كثر ما حرَّك شعور القلب "مسودّة"

‏مثل الهوامش وأمان شْعوري الراكن
‏يدرى إختلاس العيون العابرة : ودّه

‏وش أنتظر له ؟ لـ طيف أن مرَّ الأماكن؛
‏صدري يجرّ النسم، كنّ النسم نِدّه؟

‏قرَّبت منّه قميصي ليلة ، ولكن
‏لا من دُبر قدَّه ، ولا من قُدم قدَّه

.....

[الحمدان]

وجودي على اللي لا ذكرته جلست ابکیه
‏خذاه الذي يجعل جدا الناس في العبره
‏
يوم ان راسه حي هم الدهر ما اشكيه
‏يا طيبه على زلة خطايه ويا صبره

اشوف الحياه امان في ضحكة حجاجيه
واشوفه سند المجتمع كله بكبره
‏
لا جات الامور الكایده یاقف ويكفيه
‏ويدرا على غاليه حتى من الابره
‏
ضغوط الحياه القاسيه عودتني اجيه
‏اسلم عليه واشكي همومي على قبره
ِ

.....

[الحمدان]

‏ينتابني ضيقٍ من أوجاع وآلام
‏وينتابني ضيقٍ على غير سبّه

‏رجعني التفكير عامٍ ورا عام
‏في غرفةٍ ما زارها إلا الأطبّة

‏وعرفت وش تعني تفاهات الأيام
‏وتصاغرت نفسي شعور المحبّة

‏الي عليه أعلق آمال وأحلام
‏وراعيه يجرحني ولا خاف ربه

‏الله يجيب العافية والتبسام
‏وتقبل علينا أوضاعنا المستتبّه

.....

[الحمدان]

‏والله اني ما قدرت أنساك بالمره مع إني
‏كل يوم احاول اشغل نفسي بحاجه جديده


لكن النسيان شي اكبر من عزومي ومنّي
‏يا شريط بذاكرة راسي وراسي يستعيده

‏انت ياللي منك دموعي ومنك ضحك سنَي
‏ما قدرت أذوق بعدك طعم الأيام السعيدة

.....

[الحمدان]

خذ السهر من عيوني خل عيني تنام
‏الليل نفسه تعب مني كثر ما أسهره

.....

[الحمدان]

‏السهر بيّن على العين و اتعبها كثير
لاتلوم اللي فقد شي خايف يفقده

.....

[الحمدان]

صديت عن بعض المخاليق بالعمد
لا هو كبر مني ولا هي حماقه

لكن بعض الناس يالله لك الحمد
ما فيه امل معهم تدوم العلاقه

.....