اخترنا لكم

[الحمدان]

‏تفنن في طروق الحب شرقني وغربني
معك يا زين دوخات الهوى ويا حلو مشواره

وغرد في سما سمعي ابي تحكي وتطربني
سواليفك مطر عمري ربيعي ضحكة ازهاره

.....

[الحمدان]

وشلون ابنساك وأنسى اجمل أيامي
دام إني ذقت المحبه من عناقيدك

ياخذني الشوق معك لأجمل احلامي
ويرميني الصبر في شارع مواعيدك

.....

[الحمدان]

‏ارقا مراقي العز من دون الادنين
‏العمر واحد والمعزه مناوي

‏لاصرت من قوم ً كرام ً مسمين
‏خلك لدرب الطيب دايم شفاوي

.....

[الحمدان]

‏حنيت لك واشتقت لـك واحتريتـك
‏واهديت لك قلبٍ على الدوم مشتـاق

‏علـيّ يشهـد خالقـي مانسيــــتـك
‏حبك سكن في خافقي وسط الأعماق

.....

[الحمدان]

تعال واحضن كل ضلعن لك يحن
يامنيتي لك شـوق اعيشه امانـي

جيتك وفا ملهوف كلي لك احـن
انبضك عشق وبوح قلبي معاني

.....

[الحمدان]

‏ياسالِبَ القَلبِ مِنّي عِندَما رَمَقا
‏لَم يُبقِ حُبُّكَ لي صَبراً وَلا رَمَقا

‏لا تَسأَلِ اليَومَ عَمّا كابَدَت كَبِدي
‏لَيتَ الفِراقَ وَلَيتَ الحُبَّ ما خُلِقا

.....

[الحمدان]

ياساتر الحال لاتكشف لنا خافي
لعيون الأصحاب والا عيون شماته

يضحك على ونة المجروح متعافي
ويشعــر بهـا واحـد عـانا معـاناتـه

.....

[الحمدان]

‏ياطير ياللي بالهوى تتبع السرب
‏قلبي بعد ماطرت ينقل رفاته
‏
‏لولاك مايلقى الشعر داخلي درب
‏ولاشفت لي به وقفةٍ والتفاتــه

.....

[الحمدان]

من عادتك كنت لامريت من عندي
تلقي عليَّ السلام وتبتسم يازين

والآن بتمُر يا المزيون وتعدي
لامرحبا لاصباح الورد لا أهلين

ما تدري ان التجاهل حـَزّ في كبدي
كنك طعنـته بخنجر سـام ذو حدين

.....

[الحمدان]

‏والله ان هالات عينك تزود الزين زين
‏ما تقلل من حسن هالعيون الطاغية
‏
‏القمر مازيّنه غير هاك الندبتين
‏ولا هو من دونها لمبةٍ متصاغية

.....

[الحمدان]

يارب يسّرها على كل ضايق
‏وارفع ستار الهم عن كل محزون

‏ولو كان في درب السعاده عوايق
‏تهون مع رحمتك يا خالق الكون

.....

[الحمدان]

السخافه مشكله ياهل السخافه
والتّفسخ مايجيب إلّا انحطاط

والترندات المخلّه والتفاهه
ماتجيب إلّا تدهور وانحباط

محمد جريد

[الحمدان]

الليالي ما تعوض كل نادم
‏والقصايد ما تفسر كل خيبه
‏
‏التشبث بالحياة وبالاوادم
‏قل دين وقل عقل وقل هيبه

.....

[الحمدان]

وجه الحياه البائسه يفتن الموت
والحرب يكسيها وشاح المنايا

والصمت يقتل كل حاجه بلا صوت
حيث الفراغ المزدحم بالنوايا

.....

[الحمدان]

مرحبا بك والصدر مفتوح بابه
‏والله انه مرحبا بك واقلطي به

‏هاك فنجال الغلا عقب الرحابه
‏واقدعي من حلو شوقي واهتني به

‏يوم جيتي زالت غيوم الكآبه
‏اشهد انه مرحبا بك يا حبيبه

‏بينك وبين المطر وصلة تشابه
‏لا حضرتوا صارت الدنيا عجيبه

.....

[الحمدان]

ياصـاحبي لا تـوقف تحـت رجـوى الامـل
‏واستقبل المقبلات بكل وجـهٍ ضحوك

‏عش واقعي في حياتك واترك المحتمل
‏ولا تحقر الضـعيف ولا تغـبط المـلوك

‏تراك تشـكي علي وانا استـمع لك خمـل
‏وش عـاد لا غـابو احبـابك ولا ودعوك

.....

[الحمدان]

‏الا يا وجودي وجد عودٍ كفيف وتاه
‏سرت به مقادير الزمن لين قفت به

‏يسوق القدم لكن عيت تطيع خطاه
‏ولا عاد يدري وين رجله تخطت به

.....

[الحمدان]

‏لا تشوف الناس ضعفك وانكسارك
‏لو عظامك تنكسر ما جبروها

‏انتصب كنّك طلعت من المعارك
‏ماخذٍ ثار القبيلة كلّ ابوها

.....

[الحمدان]

‏اخذيني من ايدي وطيري بي على هام السحب
‏ماعاد ابي عيني تشوف العالم المتكبّرين

‏انتي المصير المُقترب وانتي الطموح المُرتقب
‏وانا اخر انواع الرجال العاشقين الصادقين

‏اقري قصيدي والله ان اغلب قصيدي له سبب
‏شوفي بنفسك كيف كان وكيف صار وتعرفين

.....

[الحمدان]

مرت سنين من الحياة بسهولة
‏وبمرورها ودعت نصف امنياتي

‏طوبى لروعة ذكريــات الطفوله
‏بالفعل أجمل مرحله في حياتي

.....

[الحمدان]

‏بين هقوات المشاعر ونظرات العيون
‏كل شفرات المحبه مثيره للجدل

‏لاتضيعك الهقاوي وتخلفك الظنون
‏تحسب ان الوضع عادي وللفاقد بدل

‏وين ابلقى لي مع اللي يروحون ويجون
‏قلبً ليا راح يرجع واذا مال اعتدل

‏المحب اليا تعدا محطات الجنون
‏لو يدلونه على الدرب لايمكن يدل

.....

[الحمدان]

‏لا أحـد يقول الشعر ماهو مرجلة
‏لا والله الا الشعر عندي راس مال

‏الشــعر له بــين العــوارف منزلة
‏له قدر عــالي في مفاهيم الرجال

‏من قــدره بالفعل يخـــتار أجزله
‏والشعر ديوان العرب في كل حال

.....

[الحمدان]

‏يناديك همس الغيم والماطر الهمّال
‏وجمر الشموس وبارق الليل والقمرى

‏وقف لك حنين الامس وقفة رضا وإجلال
‏وطاحت قِدمك اخر حصوني من الذّكرى

‏عرفتِك مثل اجمل قصيده تمر البال
‏وذِكرتك مثل جرح لو اموت ما يبرى

.....

[الحمدان]

‏أنتِ أم السِّنين المقبلة والمقافي
‏كيف اشيِّد مشاريهك وأثبِّت وتدها

‏يا فداك الصَّحاري والمدن والمرافي
‏ونجمةٍ كلّ ما طلّت يبشّر سعدها

‏في هقاوي كلامٍ كلّ ما قلت وافي
‏ضيّفتني عيونك ما هو أشرّ وأدهى

‏اتركيني ورى ضحكتك أعنّ القوافي
‏ضحكةٍ وش علي إن ضاع عمري بعدها

.....

[الحمدان]

‏فالوساع الحور ما يجمع شتاتي
‏ودي أزبنها وأنا زبن المجنّا

‏ما أنثنى عزمي لو إن الريح عاتي
‏لين فرّع ليّن العود وتثنّى

‏غير لا يشغلك فقري من غناتي
‏أنا مخلوقٍ على شان أتعنّا

‏أنا وافكار القصيد ومفرداتي
‏كان بتروحين وين نروح حنّا

.....

[الحمدان]

‏حتى الحزن يبي من الواقع نجاه
‏ما يزبن إلا في صدور الطيبين

‏إللي عيونه ما تشوف إلا عناه
‏ماعاد يثّر في محانيه الحنين
‏
‏إللي عطيناه الثقه ربي عطاه
‏فرصه وحيده ما تكرّرها السنين

‏حنّا ثقتنا غاليه مثل الحياه
‏ماهيب تعطى للأوادم مرتين

.....

[الحمدان]

أستغفر الله كل ماصبحت وامسيت
على قصوري في مواجيب ديني

يالله تعتقني إذا مني اخطيت
وتجعل ثـرى الجنه جزى والديني

.....

[الحمدان]

ياللي على غيبتك هلّت مدامعنا
لا واخسارة وفاي وسابق ايامي

اشبعتني بالكلام اللي بلا معنى
لكن بالافعال شفني جايع وضامي

.....

[الحمدان]

‏يارب عنا على التقوى وزدنا ثبوت
‏في مغريات الحياه اللي علينا تمر

‏ نلهى والايام تجري والليالي تفوت
‏والعمر محدود والدنيا الدنيه ممر

.....

[الحمدان]

هـودت لفـراشي علـى بالـي انـام
وجردت فكري من صواديف مابه

كنت احسب اني غارق بين الاحلام
الله واكـبر يـاشـعـور الــكـئآبـه

اثـر الرقـاد اكبـر عـدوٍ للايتـام
اسقتهم ايام الطفوله شــرابه

.....

[الحمدان]

بكره يزين الدرب ويتغير الحال
‏وننسى غثى الماضي ونحمد الله

.....

[الحمدان]

‏ملفته مثل ضحكه في هدوء المكان
‏نادره مثل طبعٍ في الاوادم قليل

‏واضحه مثل قوس تحت غيمه مطر
‏مرهفه مثل لحن في الزمان الجميل

‏راكده مثل حاجه ماطلبها العزيز
‏مدهشه مثل صدفه بعد صبرٍ طويل

.....

[الحمدان]

الصمت صوت الصبور الي كواه الكلام
والصـد عين الحليم الي يقود العماء

.....

[الحمدان]

سعودي وافاخر يوم حكامنا آل سعود
ويوقف لنا التاريخ هـجري وميلادي
🇸🇦

[الحمدان]

كن حبك حكم سلمان وامير الشباب
صار قلبي مملكه وانت امير المملكه

.....

[الحمدان]

‏حنا هل العاداتَ وحنا اللي نفك المنيّع
‏كم دولةٍ صالت علينا وارتكينا لهَا
🇸🇦

[الحمدان]

رفرف علمنا فوق بحر وتضاريس
فوق القمر لنا على السطح قسما

المملكه ما دنسوها الجواسيس
فيها بيوت الله وكبار الاسما

وعبدالعزيز مؤسس العلم تأسيس
وسلمان عز ودولة العز تسما

ومحمد محمد بعيد المراميس
يرسم بداية دولة العز رسما

العز بوجود الحرار القرانيس
لين اصبحت دوله كبيره وعضما

عصما تدرس كافة العلم تدريس
وتبقى لنا مع طول الايام عصما

دام عزك ياوطن

[الحمدان]

خذ العفو وترفع عن الناس لو يخطون
‏ومن ظن فيك بسوء خله على ظنه

مطلق العتيبي

[الحمدان]

حــــب الوطـن...

عشنا على حب الوطن عشق والهام
فطرة عشق لملوكنا الصيرميه

وبعروقنا يسري وطنا من اعوام
وبقلوبنا نبـض الـمشاعر عذيه

واجسادنا دون الوطن درع وحزام
وافكـارنا بحكم الشـريعه رضيه

حماك ربي يا وطن ذخـر الاسلام
وحكامنا اللي يحكموها سويه

رذاذ الحبر

[الحمدان]

ابتسم وافخر عسى عمرك طويل
ياسليل المجد يا أمير الشباب

رايتك بيضاء على النهـج الاصيل
وهامتك ترقى على متن السحاب
🇸🇦

[الحمدان]

السوالف من فمك شهدٍ محلّا
والليالي كلها بْوجهك سعيدة

والشعور اللي معك مـا كنّه إلّا
الشعور اللي يجي عقب القصيدة

.....

[الحمدان]

تبي تزين الامور وينشرح صدرك
العسر بعده يسر لو طالت المدّه

اظن بالله ظن الواثق المدرك
مهما تضيق الصدور وتكبر الشِدّه

.....

[الحمدان]

لاضاق صدري قلت يارب رحمـاك
‏ياللي بذكرك ينجلي ضيق صدري
‏
‏استغفرك واتوب لك واطلب رضاك
‏ماغيرك احدٍ عن خفأ النفس يدري

.....

[الحمدان]

مادام انـا ويـاك دايـم ملاهيـف
ومتقاسميـن حبـنـا بالنصيـفـه

انا خوي للسهر والسهـر ضيـف
ومن عادتي لا حل ضيف استضيفه

حبك نزل بين الضلوع المهاديـف
الصـدق بيـن والنوايـا شريفـه

مع غيرك انت ماتطيب السواليـف
ياللي على قلبي مزوحك خفيفـه

.....

[الحمدان]

انتي غناة اللي دعا عقب ماتاب
يوم استجابت دعـوته قبل يبكي

وانتي جبر خاطر عقب لحظة اعتاب
للي حصل جبر الرضا قبل يحكي

وانتي امل للي سجد وسط محراب
وجته السكينة قبل للرب يشكي


رذاذ الحبر

[الحمدان]

لاتاخذ الدنيا على محمل الجد
إضحك لها لو تبكي الناس منها

.....

[الحمدان]

ابتسم للوقت لو تقسى الظروف
من سحاب الكون ماضاقت سما

كم كفيف قلبہ المُبصر يشوف
وكم بصير قلبہ الميت عمى

.....

[الحمدان]

فاقدلي غالي يسوى عيوني
لعنبو فرقى الحبايب فيه حرّه

وأن طلب قلبي فقلبي له يهوني
جعل يفداه العمر خيره وشره

وأن نشدكم عن مكانه علموني
ذا مكانه في الضلوع وذا مقره

.....

[الحمدان]

مانسيتك وانت غالي ولك عندي طرف
لو دياري عن ديارك مسافه وانهوه

والله اني يوم أمرّك ترا لي الشرف
لو على مقداع تمرة وفنجال قهـوه

.....

[الحمدان]

أتثيقل والثقل ماهوب درعٍ واقــي
كل ماتطري على بالي تجيني خفّـه

انهزمت من الفراق وحزن قلبي راقـي
والشجاع إن حب توخذ بندقه من كفَّه

.....

[الحمدان]

سجها والعمر رحله على وجه الحياه
لاتحسب حساب بيض الليال وسودها

ولاتلحق نفسك حسوف يمال الغناه
حث نفسك لين تبلغ ورى مقصودها

.....

[الحمدان]

فتنة عيونك النجلاء الوساع الغيوره
سلهمتها عتاب وكبرياها مكيده

مثل مايفرق أحساس القصيد بحضورة
أنتي الفارقة والمترفة والفريدة

.....

[الحمدان]

كل ماسجيت جابت طواريك الهبوب
‏لاسلى قلبي من الحزن وعيوني بعد
‏َ
‏جعل ماجاني من الحزن كفارة ذنوب
‏يوم ما وجه الليالي يبشر بالسعد

.....

[الحمدان]

مجدنا فاخر ويبقى مْع مرور الوقت فاخر
وطبعنا عز النفوس وضربنا ضرب المعلّم

مانوطّي روسنا إلا للصلاه وللمباخر
ومانمد أيمانّا الا للمقهوي والمـسلّم

دام عزك ياوطن

[الحمدان]

مقتنع بالزمان ومستريح الضميّر
القدر في يد الله والصبر في يدي

.....

[الحمدان]

إيه يا أول من بـنى بيتـه عـلى خفـاقي
ما أنت باللي مر في عمري وأخذ له لفه

انت حلم لو كسـرته كني اكسـر سـاقي
مثل حلم القدس في رام الله وفي الضفه

.....

[الحمدان]

ليلة البرد مليانه مْن الذكريات
كل ذكرى جميله هبّ نسناسها

جعل من يحيي الاجساد عقب الممات
ميتين المشاعر يحيي احساسها

.....

[الحمدان]

قهو المشاعر لاجاتك وانت راعي مكان
ورحــب بـها كــــــل ما مرت على فالها

قولة هلا منك تسوى الهيل والزعفران
وصفراً يداوي عماس الراس فنجالها

.....

[الحمدان]

لاتفتّش فالصدور ولا تتبع كل عله
كل قلب وله ميول وكل عقلٍ واتجاهه

ولا تكلّف في قبولك والقبول اللي من الله
ما تجيبه بالفلوس ولا تجيبه بالوجاهه

.....

[الحمدان]

الليّ بدون أسباب صد وتجاهل
ماعندنا إلا غير نفس التصرف

يجوز في بعض الأمور التساهل
إلا التساهل بالمقام المشرّف

.....

[الحمدان]

هذا ولي العهد من ميم إلى حد نون
اسمٍ حروفه مع الامجاد متقاوله

هذا هو اللي ليا دنّق على المكرفون
روس الدول دنّقت قدمه على الطاوله

دام عزك ياوطن

[الحمدان]

حلوه ودلوعه وتمشي على الهون
‏والزين فيها من جميع النواحي
‏
‏والصاحي الي شافها صار مجنون
‏ويشوفها المجنون ويصير صاحي

.....

[الحمدان]

اهـيـب رجـال صـامت وارفـعه بـالمقام
إذا تــكـلـم يــحــدد مـسـتـوىٰ مـوقـعـه

الـعـود يـنفح بـشمه والـحديث إحـترام
احــد مـعـه مــا يـقـوله واحـدا مـا مـعه

قول الرجاجيل عفه والسكوت إحتشام
والـهرج يـنقص مـن المخلوق او يرفعه

والـصمت هـيبه ومـيزان الرجال الكلام
بـعد الـكلام اعـرف الرجال حين اسمعه

براق مارب .. اليمن

[الحمدان]

‏يـامـصـدرالشوق يـانـبـع الـغـلا كـلـه
تـعـال نـاظر رسـومك داخـل جـفوني

لاتـزعـجك ضـحكتي لـلـناس والشّله
اجـامل بـضحكتي لو زادت اطعوني

حـبـك مـلك خـافقي والـعرش محتله
دوك الكلام الصحيح ودوك مضموني

.....

[الحمدان]

أقدار ما ندري على وين تجري
‏لكن عساها بكل الأحوال خيّره

.....

[الحمدان]

أكابر ان قلت ما تطري على بالي
ويكذب القلب كان البعد ما ضره

.....

[الحمدان]

‏زله لسان الأدمي بعض الأحيان
تقطع علاقات الرفيق برفـيقه

كم رفقه دامت زمان وازمان
عقب المعزه أنتهت في دقيقه

.....

[الحمدان]

‏خلك على النيه تجيك التوافيـق
‏لو أغلب قلوب المخاليق ظلماء

‏اللّه يبل الريق في حزة الضيق
‏لاشحت كفوف المخاليق بالماء

.....

[الحمدان]

يا سعود كان الناس يدرون عن شيّ
‏أشياء ترا ما تدري الناس عنها
‏
‏يدري بها اللي يازن الشمس والفيّ
‏مكفن أسرار القلوب بكفنها
‏
‏أنا بشر شتى هموم البشر فيّ
‏وإن شفتني مانيب جزعان منها
‏
‏ترا ماغير أضحك وأجاملكم شويّ
‏وأدمدم جروحٍ نبشها زمنها

.....

[الحمدان]

‏عز نفسك جعلهم مايرجعون
ومن يبيعك لاتراعي خاطره

.....

[الحمدان]

بـس ارفعي راسك بليّا نقاشات
‏تلقين نفسك بالسحاب إنرسمتي

‏وفي مبسمك تلقى الرحيق الفراشات
‏بين الزهر والغيم ليش انقسمتي

‏كن البروق اللي تكاشف فلاشات
‏تبي تصوّر بسمتك لا ابتسمتي

.....

[الحمدان]

لا تنخدع والناس موّاتت ضمير
غير المصالح مايمر في بالها

أحبّك اللي كنت تسمعها كثير
هو واحد اللي حبّك وما قالها

.....

[الحمدان]

عطيتك محبه صادقه مابها تشويه
وجعلتك بقلبي منفرد فيه وحداني

وغيرك بغاني بالمحبه وانا مابيه
دام انت عندي ويش ابي بواحدٍ ثاني

تراني ليا شفتك اسج الفكر وشقيه
واشوف القمر واقول عندي قمر ثاني

غلاتك بقلبي شي يطغى على التشبيه
كيف اوصفك والوصف يعجز به لساني

.....

[الحمدان]

ماني بخير وكل ماجيت ابنساك
ألقاني أرجع من جديد لجنوني

عطرك رسايلنا تفاصيل ذكراك
تبت يديهم لاشتياقك خذوني

كل ماأقول إني قدرت اتخطاك
تذبحني الذكرى ويبقى جنوني

للحين احبك واعشقك واتمناك
وللحين اشوفك في عيوني عيوني

.....

[الحمدان]

مايشبهونك ولا بِه حولهم ديره
لو كلّ واحد عطاني بيده أعيانه

غيرك لو يروح قلت ان روحته خيره
الا انت روحتك عمر يصكّ بيبانه

هو انت الغير واللّي ما ابي غيره
وانت اللي اوقف الدنيا على شانه

.....

[الحمدان]

‏ليتني لا احتجت للراي ما اخذ غير راي
شايبٍ في سوق الايام قد باع وشرا

.....

[الحمدان]

لا تجاملين الناس محدٍ منّـور
النور نوركَ والمَزايا مزايـاك

إذا ضَحكتي كل قلبٍ تعـور
وإذا التفتي كل عينٍ تمنـاك

واللي تباري خطوتك وش تدور
إلا بَقايا من حضورك ومَمشاك

.....

[الحمدان]

انت الشعور الصادق وغيرك سراب
وانت المقرّ الثابت وغيرك ممر

غلاك بضلوعي تربّع لين ذاب
يفوح مثل العود من فوق الجمر

يا أغلى البشر وجهك علاج الإكتئاب
ومْواصلك مثل السحاب المنّهمر

حتى ولو قلبي شَعر بالإغتراب
انت الوطن واجمل ملذّات العمر

.....

[الحمدان]

من طاب طبنا له بكل الـمـنـاويـل
ومن خاب ترجع خيبته فوق راسه

في روسنا حكمه وحـنكـه وتبجيل
وكلا نفصل فـوق حجمه مقـاسه

ولاكـل برق لاح يطمع به السيل
تخيب في بعض البروق العساسه

لو زان برقه في نصوب الـمخاييل
قـــاع يــمــره ماتـغـيـر يـبـاسـه

.....

[الحمدان]

ياليت ربي بس حلل لنا شي
فتح القبور ومعايدة ساكنينه

ودي اعايد ميّت في داخلي حي
اللي عجزت انساه وانسى سنينه

رحمك الله يا سلطان

[الحمدان]

يقولون من لاخاف درب الخطايا زل
وتمام العقل من خاف من وجه خلاّقه

تذكر رقابة خالق الكون عز وجل
وتذكر عطاه وستره وفايض آرزاقه

وتذكر وقوفك يوم تاقف ماعندك حل
في يومٍ يشيب الراس من شدة آرهاقه

.....

[الحمدان]

‏من لا يودك وش تـبيبه تـوده
عله مـراح مقيط واللي تقـفاه

لا بد عقلك فـي المواقف تـرده
حتى يعرف الصح ويميز اخطاه

مـايتبع الـرغـبات ويضيع حده
ويقل مـقداره وتـنقص مزاياه

.....

[الحمدان]

ليت الزمان الي مضى يرجع اليوم
وترجع لنا ايام القلوب النظيفه

ايامنا هالحين ظالم ومظلوم
ونيات بعض الناس ماهي عفيفه

.....

[الحمدان]

مواقف الطيب محسوبه ومشهوده
ورجلٍ بلا طيب لا يذكر ولا يحسب

واللي كسبها بعرفه قبل مجهوده
فعايله طيّبه ومجالسه مكسب

.....

[الحمدان]

يا فرحة العيد مالك فالحنايا شريك
دوّر وتلقى ورى الأضلاع عيديّتك

انسف جديلك قبل تنسف مذارع يديك
الغيم تاجك وسطح الأرض زوليّتك

حتى الفساتين وعقود الذهب تحتريك
الكل منها يبي يلمس خصوصيّتك

.....

[الحمدان]

تعال صارحني علمني شجاك
خل الغياب اللي بليّا سبايب

طال الفراق وعذب القلب فرقاك
راح العمر وانت عن العين غايب

احرمتني يازين شوفك و لاماك
وشبّيت من صدك بصدري شبايب

.....

[الحمدان]

انا مسالم ما احب العداوات
العمر فاني والليالي قصيره

ترى السكوت أحيان مثل الإجابات
الصمت نعمه له معاني مثيره

ماهو ضروري تعيش عندك علاقات
العزله احياناً علاقه كبيره

.....

[الحمدان]

الصمت ابلغَ من جميع العبارات
حكمه ولا تدخل في اشياء كثيره

ومـن تكـلّم قـل حبيبي سلامات
السِلم أفضـل للـرجال الجـديره

يامـا تحمـلّنا ومـا بي نــدامـات
حتى ونفـسي مـن قبلهم ضريره

.....

[الحمدان]

أنا مامعي وجهين ولا ألعب على الحبلين
واذا جيت أعاتب شخص أعاتبه بفراقي

أغيب بهداوه لين حتى الامور تزين
مع كامل الحب ومع خالص أشواقي

اذا الله كتب نرجع سوا زين على زين
واذا عادك بتبقى كذا كمل الباقي

.....

[الحمدان]

‏لاتبدي أسـرارك على سـاير الناس
احذر ترى بعض الاوادم مغرّه

خـذ الكلام اللي من الراس للراس
واعرف ترى الايام حلوه ومرّه

لاتخدعك هرجت عديمين الاحساس
ان كان تـبي العافيـه والمسرّه

خل الذي بالصدر يبقى على ساس
مايفرح اللي ناوي(ن) بالمضرّه

.....

[الحمدان]

‏رح مايخاف من الدروب إلا الضرير
فك أيدك اللي في يدي متجوّده

لا عاندت نفسي بتقنع بالمصير
وإن ماقدر قلبي جفاك أعوّده

أنا كذا ولا كذا ماني بخير
بتنقّص من الجرح ولا تزوّده

ماهي بواقفةٍ على الجرح الاخير
مبطي وروحي عن غلاك مهوّده

.....

[الحمدان]

يكفي أني مالحقتك بنقصان
وحتى الخطا منك قبلته وعذرته

وعلى كثر ماصابني منك خذلان
الا ان قلبك بالجفا ماكسرته

حاولت اداري خاطرك قدر الامكان
ويا للاسف طيبي جحدته ونكرته

روح والدروب وساع والطيب معان
ولاتلتفت في قلبي اللي دمرته

.....

[الحمدان]

صدّو ولا قالو لنا ليش صدّو
وحنا بعد جاز الفراق ونسينا

شالو على سود النوايا وشدّو
وحنا على بيض النوايا بقينا

.....

[الحمدان]

يا ساكنــــين القلـب يسعد مساكم
بالعووود والعنبــر ونفحــة عطوره

والله ورب البيـــت ماقـــد نساكم
واشلون ينسى من سكن في قصوره

في داخلـي ماحد وصـل مستواكم
زايــد غلاكم صعب نوصف شعوره

لو تعرفــــوا مقــدار زايـــد غلاكم
مايوصفه شاعـــر بكامــل سطوره

.....

[الحمدان]

‏دلل حبيبك وافهمه واعتني فيه
وفي كل موقف حط نفسك مكانه

تبسم بوجهه ورحب بطاريه
واحفظه في قلبك سوات الامانه

بيع الخلايق كلها لجل تشريه
المستحيل الصعب سوه عشانه

حبه ولا تسال عن أيام ماضيه
ولا تفكر بالغدر والخيانه

خل السهر يسرق دقايق لياليه
اجمل زمن بيمر عمرك زمانه

.....

[الحمدان]

ضحيت بالواقع على شان الاحلام
وضحيت بالغالي على شان غالي

حتى الغرام اللي كسر قلبي العام
ماني بحاله كان ماهو بحالي

ماينحسب عمر البنادم بالاعوام
بعض السنين نعيش فيها ليالي

وجه التشابه بين قلبك والايام
القلب خالي والليالي خوالي

.....

[الحمدان]

ياناس أحبه والمحبه مقادير
هذا هوى نفسى وهذا قدرها

فز الخفوق وقلت يالله عسى خير
وأثر الليالى عاد غايب قمرها

ياصبح عمرى يا صباح التباشير
نوره ملا قلبلى وروحى غمرها

عقب الفراق اللى تعدى المحاذير
يبس غصون القلب جافى دهرها

ياناس أحبه والمحبه مقادير
هذا هوى نفسى وهذا قدرها

والحب ماله يا هل الحب تفسير
قلبين والله بالمحبه غمرها

لاجيت أصور حالة الحب تصوير
وأرد عن حالى لخلى خبرها

لقيت وجدى فوق كل التعابير
كل الشعر قطرة وروحى بحرها

مع شوفته نشوه وفزة وتخدير
وعيون خلانن تعانق نظرها

يفز له قلبى كما نزعة الطير
والرجل كن اللى تحتها غدرها

ربع بروحى عقب ماهى معاسير
سحابةٍ هلت بقلبى مطرها

وأسقى بها زرعة هوانا بتقدير
غرسة غرامٍ بالمحبة بذرها

ياعاذلين القلب والله مخاسير
واللى درى عن حال عينى عذرها

.....

[الحمدان]

يا مساء الخير والدنيا بخير
يا مساء مسكنہ بيض القلوبّ

يا مساء الورد بأحساسً مثير
انتشىّ ريحة وعطر كلّ صوبّ

.....

[الحمدان]

طبعك هو اللّي على الفرقى مقدّرني
‏واحس نفسك على التجريح مجبولة

‏تعرف تقول الكلام اللّي يكدّرني
‏بسّ الكلام الحلو ما تعرف تقوله

.....

[الحمدان]

‏اضبط لسانك بالحكي واحسن الظن
‏حتى مع العالم يزيد احترامك

‏ترا اللطافه والادب تعتبر فن
‏ألزم حدودك ترتفع في مقامك

.....

[الحمدان]

‏لو ان عند الناس بعض القناعه
‏ويمان بالمكتوب ماصارو ثنين

‏احدٍ من همومه يبي اليوم ساعه
‏واحدٍ من الفرحه يبي اليوم يومين

.....

[الحمدان]

خفـــــي عليا يا العيون الانيقه
ماجيت لك الا لك القلب مشتاق

ماشـــفت مثلك اي انثاء رقيقه
لاتضلمي قلبي بصدك والاحراق

وانا الذي حاسب لك احلا رفيقه
والقلب حقك مالكي كل الاذواق

راعي الاصاله والصفات العريقه
وساكنه في داخلي كــــل خفاق

لاتكثيرن الصد هاذ الحـــقيقه
ماطاق كلماتك لها القلب ماطاق

قلبي معاك العمر سالك طريقه
اترفقي فيني وزيدي تــــــرفاق.


.....

[الحمدان]

كيف طاوعك قلبك تــــفارق محبيك
واحنا الذي نشكي بقسوه غيابك

وانا الذي صارف ببحر الهوا شيك
والقلب يترقب بــــقوه جـــوابك

وان كنت زاعل قلنا وايش يرضيك
وان كنت غاثي جي وكثر عتابك

انت الذي تستاهل القلب يــفديك
با الله عاجل لا تزيــــــد غيابك

.....

[الحمدان]

‏إن غبت يبقى الشوق جالـس محلك
وإن جيت حل الحب في موقع الشوق

غـلاك عنـدي فــوق ولا أحـدٍ وصــلك
ولك منـزلٍ في القلب ماجـاه مخلـوق

.....

[الحمدان]

‏يابسمة الشوق يارمز الغلا السامي
ياأروع إحساس صادفني وحسيتـه

جاني خيالك يسوق الحب قـدامــي
واقبل بطيفك وعانـقني وضميته

.....

[الحمدان]

لو هو صحيح الاوادم تفهم الخافي
ما كان قال المثل والخافيات أعظم

أهم شي كلمتي والموقف الوافي
والناس تفهم مثل ما ودها تفهم

.....

[الحمدان]

‏كيف باكره قلبك اللي ملا روحي ضما
وانت اول شخص احبه وانا ما اقابله

ليتنا فالوصل نشبه للأرض وللسما
من خلقها الله تعالى وهي متّقابله

.....

[الحمدان]

مسائك ورد يا قلباً بعيد هناك
ومسائك شوق ولهفة وصالك

فداك الـخافق الي دوم يتمناك
عسى تمسي وانا يازين في بالك

.....

[الحمدان]

تلك العيون النَّاعِسات عذوبة
ومن المحاسن زِيـد في رمشيها

لكنها رُغم المــآسي لم تَـــدع
تلك المشــاعر أنّ تفوز عليها

.....

[الحمدان]

الصدر صندوق القلوب المغاليق
والقلب صندوق السدود الغميقة

لايدري بسدك يكــود المطـــاليق
اللي معك في كــل شدة وضيقة

.....

[الحمدان]

‏إياك لاتحزن ترى الرزق مضمون
ابذل سبب والله عليه التوافيق

اللي خلقك من العدم خالق الكون
هو الذي يرزقك في ساعة الضيق

ولا تكون أنسان بالوقت محزون
وانته تحت رحمة ولي المخاليق

أرفع مقامك فوق لاتتبع الهون
وخلك عشيرٍ للوجيه المطاليق

.....

[الحمدان]

‏عن ود غيرك شايمٍ شومة حرار
‏ولعاذلي حدب السيوف اسلّها

‏ما غير اقزرها بالاسم المستعار
‏وانت المبدا بالاسامي كلها

.....

[الحمدان]

‏ منــي مسـآء الخيـر والفل والــورد
‏ والحب والبسمه ونبـض التفــاؤل

‏ أدري بأن الـجـو مايـل إلى الـبــرد
‏ بــس المشـاعر دافـيـه بالتواصـل

.....

[الحمدان]

‏أشوف صورتك ودموعي تسابقني
‏و ياكثر ما جيت أبمسحها وأخليها

‏ فارقتني وضحكتك عيت تفارقني
‏ والله يقلع أبوالفرقا وطاريها

.....

[الحمدان]

‏ســلم على الوافي اللـــي نيته زرجه
‏اللي على الطيب و فعول الوفا دارب

‏ان غاب عـن صف ربعه بان له فرجه
‏له وقفــةٍ دون ربــعه كنـــه محارب

‏واليا حضر فالمجالس ما كثر هرجـه
‏واليا هرج هرجته تجمد على الشارب

.....

[الحمدان]

ترى يمرّ بصـــدر الانسان ضيقة
‏تأخذ بصدره يـوم يومين وتـروح

‏والمزح له وقت ومكان وطريـقة
‏بابه ماهو في كل الاوقات مفتوح

.....

[الحمدان]

‏لوهي حقيقة كل مطرود ملحوق
‏ما فاتـــنا شيٍ من اللـــي طردناه

‏نطرد وتبعـــدنا مسافات وفروق
‏وللـــي نريــده فاتنـــا ما لحقناه

.....

[الحمدان]

يوم شفت له خاطر مع غيري تركته
‏ماهي من عادتي أخلي بخاطره شي
‏
خالد الفيصل

[الحمدان]

عليك السلام ورحمة الله على الباقين
‏وعلي الرضا لا ميّل الشوق خفاقي

‏ياوجهٍ ماندري وش ترك للبشر من زين
‏خذا نصف زين الناس وأعطاهم الباقي

.....

[الحمدان]

‏يموت العذر ويموت العتب دام الغلط مرجوع
‏ويبقى الحُبّ مرسول السلام اللي يواسيني

‏تطمّن يا حبيبي لا تقول وصالنا ممنوع
‏وأنا في كل يوم ألقاك بين دعاي وآميني

‏تمادى فالطعون الخضر ما دام العتب مرفوع
‏ترا قلبي ملاذك لا نويّت تطيح من عيني

.....

[الحمدان]

‏ما ودي اشعر بتقصيري مع احبابي
‏مع انهم كلهم ما قصروا فيني

‏عاتبتهم لين ما ملوا من عتابي
‏وخلوني لحالي الله لا يخليني

.....

[الحمدان]

‏يا جميله كان للعمر فرصه ما تعاد
‏الليالي كيف ترحم قلوب الصّابرين

‏إن نشدك الوقت عني تراني فالمراد
‏قولي إنه ما تعدا سلّوم الأولين

‏ما شكى من قل مشرب ولا من قل زاد
‏إلا من قل المواصل ومن كثر الحنين

.....

[الحمدان]

‏ادري انك حلم والحلم يمكن ما يطال
‏لكن انا راضيٍ فيه جعله ما يصير

‏اتركيني بين الأحلام انا احب الخيال
‏الخيال أحلى من الواقع الواقع مرير

.....

[الحمدان]

‏انا صديق العصير ومقدم الصفره
‏ليا اقبل الليل يسحب بشته الضافي

‏الشمس كنها تحوّل في بطن حفره
‏وانا أتهايق وراها وأرخي اكتافي

.....

[الحمدان]

الحياء يرفع مقام المرء ويبّين علوّه
‏دوّر الأخلاق قبل إنّك تدوّر من ترافق

‏النقي ما بينه وبين الدِني عُصْبة أخوّة
‏والضحى ما بينه وبين المساء أوجُه توافق

‏السمو سمو الأنفس والفقر فقر المروّة
‏قاتل الله النفاق وقبّح الله المنافق

.....

[الحمدان]

‏يا سيد الزين يا سيـد الحـلا كـله
‏في ذمـتي ما يـجي في منـزلك ثـاني

‏لا صرت قـلبي برمش العيـن محتلـه
‏وزود على القـلب تفكيـري وعنـواني

‏خـذ مـا ينـاسبك واللي مـا تبي خلـه
‏يا أجمل حروف شعري واجمل ألحاني

.....

[الحمدان]

‏اتـفـقـنـا ما نقـول الا الصحيح
‏واختلفنا كيف تعريف الصواب

‏الضمير المستتر مـاهـو صريح
‏والجواب المختزل ماهو جواب

‏مشكلتـنا كلنـا نبغـى المـديــح
‏ما نبي نسمـع على الـزله عتـاب

.....

[الحمدان]

‏نشدت لـي شايب عـن زبده علومه
‏جـاوب سوالـي وعينه جـالـها لمعه

‏اربـع تـهـز الـصبور وتـكـسر عزومه
‏جور الولد والفقر والشيب والدمعه

.....

[الحمدان]

‏اه يا جيـــلٍ عن اقــرانه فريد
‏جيل عز وجيل طيب ومفخره

‏ما لحقـنا عصركـم مير الاكيد
‏ناشـــنا منكـــم شذاه وعنبره

‏يا زمان الطيب والذكر الحميد
‏ليت عمرك حلم ليــل ونسهره

.....

[الحمدان]

‏بيض الله وجـه مـن ينفع خويه
‏صآحب فـي صاحبه رآعي عوآيد

‏ودك إليا حطـو اسمه في الهويه
‏يكتبون الذخر في وقت الشدآيد

.....

[الحمدان]

‏لا تعوّد ذكرياتك على شخص ومكان
‏وكل حـــاجه ترتبــط بالمحبه كبها

‏ولا تبــالغ فالتعلق ترى طبع الزمان
‏يسرق الحــاجه على كثر منت تحبها

.....

[الحمدان]

مع الرخاء نلقى خويّ استراحة
‏ونلقى مع الشدّة خوي الشدايد

‏الصقـــر ريشه غاليٍ ٍ في جناحه
‏وريش النعامة غالي ٍفي الوسايد

‏من كافــح بيلقى حلاوة كفاحه
‏في كل شـــيّ الا الردى والمكايد

.....

[الحمدان]

‏عداك الملام وشرهة الولف يا نزّاح
‏عن دياري اللي منت بأول خسايرها

‏تبعت السراب الين سلمك للمرواح
‏ولديت وعيوني تزوّر عبايرها

‏قنعت وتركتك للزمن والزمن فضّاح
‏على مهله اسرار المخاليق يظهرها

‏بقى لك معي ذكرى ليا غمّض المرتاح
‏تمشط بقايا كبدي بروس أظافرها

.....

[الحمدان]

‏يارب انا عبدك ضعيفٍ بلياك
‏وعفوك تراه اكبر طموحي وامالي

‏الفضل فضلك والعطايا عطاياك
‏مكاسب الدنيا ماهي راس مالي

.....

[الحمدان]

لاصار لك شخص تحبه وتغليه
لا تدخله في كل طاري وسيره

سكر عيون الناس لاصرت شاريه
محدٍ في هذا الوقت يعطيك خيره

.....

[الحمدان]

يقولون متكبر واقول اتكبر ليه
‏وانا في ذرى ربي وعبده وابن عبده
‏َ
‏طويل الذراع ان عّرض اسمي تعلق فيه
‏وضعيف الروابع كني امشي على كبده

.....

[الحمدان]

يا عين اخوك اعذره لا طاحت دموعه
ما يوجع النشمي الا طيحة النشمي

انا عشانك حزين ولوعتي لوعه
تبيني اضحك علَشانك على خشمي

.....

[الحمدان]

لولا الحياء والملام وهرج عذاليّ
‏لا أقول بيتٍ يراودني وخبيته

‏فلان كل الوجيه اللي على باليّ
‏وفلان كل القصيد اللي تغنّيته

.....

[الحمدان]

أخفض تناهيدك على قد سمعك
وأحذر تقول أسباب حزنك لمغليك

ترى القريب إذا عرف سر دمعك
إذا تردى يعرف شلون يبكيك

.....

[الحمدان]

يقول ابن جدلان :

الناس في أول لقى ميه على ميه
مشكلتي إني ما اصيد الناس من بدري

عفوي واعامل عباد الله بعفويه
واطير فيهم وأقلطهم وسط صدري

كم واحد تحسبه ماشي على النيه
وتلاحظ إنك على النيه ولا تدري

[الحمدان]

غزة تنادي والألم يسبق الصوت
ولا حـيـــاة لكـل مـن لـه تـنـادي

لن الضمائر يا عرب صابها الموت
كن ماحدث لإخوانكم شيء عادي

.....

[الحمدان]

ياصديقي لاتزيد الثرثره
ضع لنفسك حد ياولد الحلال

واعلم أن كثر الثرثره مسخره
بي تطيح قيمتك بين الرجال

لاتكن رجل وطبعك طبع مره
بالصفات التاليه قالت وقال

ولاتكن مثل الجمل فالمعصره
بالمكايد والفتن والاحتيال

.....

[الحمدان]

ﻣﻦ ﺑﺎﺡ ﻋﺮﺽ ﺍﻟﻨﺎﺱ ﻋﺮﺿﻪ ﻳﺴﺘﺒﺎﺡ
ﻭﻣﻦ ﺟﺮﺡ ﻏﻴﺮﻩ ﻟﻘـﻰ ﻣﻦ ﻳﺠﺮﺣـﻪ

ﻭﺍﻟﺬﻳﺐ ﻳﺤﺬﺭ ﻻﺳﻤﻊ ﺣﻮﻟﻪ ﻧﺒﺎﺡ
ﻭﺍﻟﺜﻌﻞ ﻣﺎﻳﺤﺴﺐ ﺣﺴﺎﺏ ﺍﻟﺪﺭﺩﺣﻪ

ﻭﺍﻟﻄـﻴﺮ ﻻﻗﺪ ﺻﺎﺭ ﻣﻜﺴﻮﺭ ﺍﻟﺠﻨﺎﺡ
ﻳﺼﺒﺢ ﻓﺮﻳﺴــﻪ ﻟﻠﻄﻴــﻮﺭ ﺍﻟﺠﺎﺭﺣـﻪ

ﻭﻣﺎ ﻃـــﻮﺍﻩ ﺍﻟﻠﻴـﻞ ﻳﺠﻼﻩ ﺍﻟﺼﺒﺎﺡ
ﻭﻣﺎ ﻧـﺮﺍﻩ ﺍﻟﻴـــﻮﻡ ﻏـﻴﺮ ﺍﻟﺒﺎﺭﺣــﻪ

ﺿﺎﻋﺖ ﺍﻻﺧﻼﻕ ﻭﺍﻟﻤﻌــﺮﻭﻑ ﻃﺎﺡ
ﻓﻲ ﺳﻮﻕ ﺍﻻﺳﻬﻢ ﻭﺍﻟﺒﻨﻮﻙ ﺍﻟﻤﺎﻧﺤﻪ

ﺯﻣﺎﻥ ﻛﺎﻥ ﺍﻟﺨﻮﻑ ﻣﻦ ﻏﺰﻭﺍ ﺍﻟﺮﺑﺎﺡ
ﻭﺍﻟﻴﻮﻡ ﻳﺎﺧﻮﻑ ﺍﻟﻌﻨﺐ ﻣﻦ ﺷﺎﺭﺣﻪ

الذي ﻣﺎﻳﺤﺴﺐ ﻟﻠﻔﺸﻞ ﻗﺒﻞ ﺍﻟﻨﺠﺎﺡ
ﻻﺑـــﺪ ﻳﺘﻜﺒـﺪ ﺧﺴﺎﺋــﺮ ﻓﺎﺩﺣـــﻪ

ﻣﺎﻋﺎﺩ به ﺣﺎﺟﻪ ﻟﻘـﻼﺏ ﺍﻟﺠــﺮﺍﺡ
ﻣﻦ ﻣـــﺎﺕ بي ﻧﻘــﺮﺍ ﻋﻠﻴﻪ ﺍﻟﻔﺎﺗﺤﻪ

.....

[الحمدان]

احـذر عـنـادك ان سـبـب لـك عمـاء
حتى ولو ضنك ببعض الناس خاب

فـلا تـقـرر يـا صـديـقـي قـبـلـماء
تفحص خويك في حضورك والغياب

احيان غلـطـه تدخلـك عـذب اللـماء
وتعيشك انته وضميـرك فـي عذاب

مقتول عند المـاء ولا بشـح الظـماء
وايـاك تـلحـق بالـذي يـصبح سـراب

.....

[الحمدان]

مساء الخير والانوار والود والرضاء
وبالفل والأزهار امسي على الجميع

مساكم سعادة تملأ الأرض والفضاء
ودعوات مقبوله من الواحد السميع

بقلمي

[الحمدان]

اصــغـرت فـي عـيـني الـدنـياء وذلَّـيـتها
مـاتـستحق الـعـناء مــن اجـلـها والـتعب

لــو هــي جـديـره بـحـبي كـان حبـيتها
تـركـت لـيلـى تـدلـل في عـيون العرب

دنــيــاء دنــيـه ولا تــغـلاء لو اغـلـيتها
تـــزول فـيـهـا مـنـاصبها وتـفـنى الـرتب

قـال المثل حط نفسك ويـن ماحطيتها
مـايرفـع الـنفس غـيـر اخـلاقـها والادب

يــامـن تـكـافح علـى دنـيـاك و اوفـيـتها
الـعـمـر لافـــات مـاتـرجع زبـيـبه عـنـب

قـصدك تـكحِّل عـيـونك وانته اعـميتها
ماشفت احد شل من دنياه ماقد حسب

لاالذي اغتناء فيها ولا الذي قال ياليتها
والكل خـسـران فالدنياء لنفس الـسبب

.....

[الحمدان]

العقل نعمه ووهبه من الرب الكريم
الله أنه يرحم أهل العقول القاضيه

والفهامه ماتجي غير من رجل فهيم
بالليال الحاضره والليال الماضيه

والجزاله حكمة القول لاجا من حكيم
والجهل ياصاحب العرف نار حاميه

.....

[الحمدان]

يا رفيقي ما تناسيتك دقيقة
لو يضيق الوقت وتضيق الثواني

لك بقلبي والغلاء ذكرى عميقة
ولك مكانة ما وصلها شخص ثاني

صحبتك يا صاحبي صحبة عريقة
راسخة في قلبي وحدب المحاني

لعنبو من باع فِالدنيا رفيقه
لجل كسب المال وبلوغ الأماني

صاحب اللي بالوفاء يلمع بريقه
من يصون العهد ويسوق المعاني

واحذر السيء يضمّك في فريقه
واترك الشخص المراوغ والأناني

يا رفيقي ما نسيتك بالحقيقة
كيف بنسى شخص مستوطن كياني

بين قلبي والوفاء باسمك وثيقة
وعد منّي ما يغيرني زماني

.....

[الحمدان]

الناس تجري كل ساعه في فلك
من ضاع بالماضي خسر مستقبله

ماكل من تشتاق له يشتاق لك
وكل من يشتاق لك تشتاق له

قد يوصلك ذا ماتمنى يوصلك
واللي تمنى يوصلك ماتوصله

وربما تهتم في شخص اهملك
ومـن تعناء با اهتمامك تهمله

انسان مايعرف طباعك يجهلك
وانسان ماتعرف طباعه تجهله

والي ماتجيبه عندما هو يسألك
يقدر يجاوب قبل ما انته تسأله

ليش ماتفكر بالنجاء قبل الهَلك
وبالتواضع توصل اعلى منزله

.....

[الحمدان]

اكسب رضا الشيبان واحفظ صلاتك
ومالك ومال الناس صاحي ومجنون

.....

[الحمدان]

أثبت لك اكبر دليل إن الزمن جاحد
‏وإن المفاهيم عند الناس مختلطه

‏أفعالنا الصح يلغيها غلط واحد
‏وأفعالنا الصح ماتلغي ولا غلطه

.....

[الحمدان]

في حياتي مابقى حاجةٍ تغلى عليه
‏فدوته حالي ومالي وضحكي وزعلي

‏والذي علاّه بأفعال جدانه وابيه
‏انه بعيني يفوق الغوالي من هلي

.....

[الحمدان]

تمرك العابرين وما تسلم عليك
إلا غريب طوته الأرض .. بسنينها

قال أنت جالس لحالك تنتظر من يجيك
قلت أنتظر نفسي اللي ماعرف وينها

.....

[الحمدان]

الله يـمـسـيـكم علـــى ماتحبـون
‏والله يـقويكم لـ طـاعـته ورضـاه

‏ياجعل من عسرت مطاليبه تهون
‏وياجعل من له منوةٍ يلحـق مناه

.....

[الحمدان]

‏نبعد عن زحام المخاليق ونغيب
‏والبعد بعض احيان للراس راحه

‏يبعدك عن كثر الحكي والاكاذيب
‏وبينك وبين الناس يعطي مساحه

‏لو ان بعض البعد مابه مكاسيب
‏لكن فيه الصدر يلقى انشراحه

.....

[الحمدان]

‏كنت أحب الصبر وأحلامي تـضـيع
‏وضاعت الأحلام يوم إنـي صـبـرت
‏
‏كنت أقول أكبر وأحققها جـمـيع
‏ما تحقق شـيء غـيـر إنـي كـبـرت

.....

[الحمدان]

ياكثرهم وقت الرحا والسوالف
ويا قلهم بالضيق ولا صرت محتاج

قوم ليا اقفو ما عليهم تحاسيف
بعض الوجيه فراقها طب وعلاج

.....

[الحمدان]

لا تنتظر من ناقص العقل حكمة
ولا تنتظر من فاقد المرجله خير

ولا يفرك في الردي لمعة اسمه
الريش ما طير نعامة وهي طير

.....

[الحمدان]

‏صاحبي لو كان للناس والدنيا أمان
ما تموت زهور الأحلام قبل نشمَّها

.....

[الحمدان]

‏ياسبحان من حط الشتاء للبشر ترفيه
تقول الرحابه والسعد فيه مزروعه

.....

[الحمدان]

فيني شموخ من الجبال الرواسي
وهيبــــه ملگ في گلمتي لاتگلمت

على النقاء والطيب مرفوع راسي
بنتن لشيخ من اعلـــومــــه تعلمت

.....

[الحمدان]

من رافق الطيب شرب صافي الماء
ومن رافق الهافي جفا الما كفوفه

....

[الحمدان]

‏قدمت لك كل التحايا والاشواق
ياروح روح اللي يحبك ويغليك

والله تراي لشوفتك صرت مشتاق
لو غبت عني دوم عيني تراعيك

يالي غلاك بوسط قلبي بالاعماق
لو رحت عني دوم ماني بناسيك

.....

[الحمدان]

‏ﻋﻠﻴﻚ ﺃﻫــﻴﻢ ﻣﻦ ﺍﻟﻈﻤﺎ ﻛﻞ ﻣﺎﻏــﺒﺖ
ﺗﺒﻌﺪ ﻭﺃﺟﻴﻚ ﺑﺼﺪﻕ ﺍﻻﺣﺴــﺎﺱ ﻭﺍﺭﺩ

ﺟﺎﻣﻠﺖ ﺟﻴﺖ ﺍﻗﻔﻴﺖ ﺻﺪﻳﺖ ﻋﺎﺗﺒﺖ
ﺗﺒﻘﻰ ﺍﻟﺤﺒﻴﺐ ﺍﻟﻠﻲ ﺑﻪ ﺍﻟﻘﻠﺐ ﺷـــﺎﺭﺩ

.....

[الحمدان]

‏تعال ياملح الغلا ولذة الشوق
تعال ياروح الحروف بقصيدي

تعال واسمع نبرة الوجد برفوق
تعال واقرى في عيونك جديدي

.....

[الحمدان]

ياحروفــي وإن حصــل مني خطـأ
‏خبّري المحبوب مو قصدي سهيت

‏ياحروفـــي والله اتعبني البطــآ
‏كل ما طالعت أشباهـه بكيــت

.....

[الحمدان]

‏ماني اجمل بنت لكني جميله
‏من عرفني صعب ينساني بسهوله

‏فيني خفة دم لو اني ثقيله
‏وفيني جرأة عين لو اني خجوله

.....

[الحمدان]

‏مع حروف الوفا تشرب معانيها من الاعماق
‏وعـلى نهر الغلا صارت زهور اشواق مياله

‏سكنت بداخلي حتى غديت النبض للخفاق
‏عطيتك من وفا روحي غمرتك باطهر اشكاله

‏احبك حـب لـو قلته تضيق بلفظه الافاق
‏احبك حـب ماحبه سـواي ولا احد قالـه

.....

[الحمدان]

يكفيني انـك في حـياتي حياتي
ويكفيني اني في حياتك حياتك

انت امنيه من بـيـن كـل امنياتي
وانا امنيه من بـيـن كل امنياتـك

انا مـزعــزع راي وانـت ثـبـاتي
ممكن اعرف شلون عقبي ثباتـك

.....

[الحمدان]

الصبر زيـن وراعـي الصبـر ماجور
‏ولابــد لليـــل الظـليـم انبــلاجه

‏لـولا عـزايـمنــا لهـا فــالـزمـن دور
‏ما شفت واحدنا تنهّـض حجاجه

‏اضحك وخلّك دايـم الدوم مسرور
‏محدٍ يبا ياخـذ من الـوقت حاجه

‏ما قِدمك الا بيـت فالقـاع محفور
‏ثم عقبـها بتـواجـه اللـي تواجه

.....

[الحمدان]

‏فديت قلبك لاتسولف عن الصد
‏عندي وعندك من جروح الجفا خير

‏عطني علوم الشوق والشعر والود
‏ملييت من صوت العتب والمعاذير

.....

[الحمدان]

مالي معك حل إلا الصمت والحيرة
‏‌ تـركـت درب العتب من كثر مافيني

‏‌ طـبعك تغيّر معاي وصعب تفسيره
‏‌ تجرح شعوري جفى وتقول تغليني

.....

[الحمدان]

‏والله انك لــو تغيب وتلتهي بظــروفك
‏انك اغلا من حظر واغلا مساكن روحيّ

‏ياوليفي لو تشوف العين كيف تشوفك
‏والله ان تقول لجروح المفـارق رووحي

.....

[الحمدان]

‏سوالفك تكفي عن الشعر ياروحي
ياللي على راحات كفينك ارتاح

فيك الحلا والذوق يامنبع الذوق
هاك الغلا من دلة الشوق قد فاح

.....

[الحمدان]

والعـين تاهت والمواليـف عنوان
‏والشوق حاگم شعب فيني تجبّر

‏والليل عـازف والغرابيل الألحان
‏واقلبي المضيوم تكفى تصبّر

.....

[الحمدان]

‏اغار انا لاشفت غيري يحاكيك
‏واموت انا ياعمري مليون مره
‏
‏اي والله احبك ومن قلبي اغليك
‏وحبك ياروحي وسط قلبي مقره

.....

[الحمدان]

جيت اتقهوى الغلا من دلة اوصالك
واذوق طعم الحلى من ريقك الحالي

صبه فديتك ولا تبخل بفنجالك
انت المعزب وقلبي ضيفك الغالي

.....

[الحمدان]

‏يا مدعين المحبة زايفين الشعور
سوق المشاعر جحدكم قال محدن شرا

شرهاتكم تلحق الموتان وسط القبور
ونياتكم ما تقدي الساري اللي سرا

خافوا من الله ترا الدنيا متاع الغرور
ارخصتو الحب كنه سلعةٍ تنشرا

الحب حاجة ما تدخل ضمن آخر ظهور
يبقى مخلّد لو ان صاحبه تحت الثرى

.....

[الحمدان]

ﻫﺎﻙ ﺍﻟﺠﺮﻭﺡ ﻭﻫﺎﻙ ﻣﻌﻬﺎ ﺍﻟﻤﻌﺎﺫﻳﺮ
‏ﺁﺳﻒ ﺗﺮﻯ ﻛﻨﺖ ﺃﺣﺴﺐ ﺇني أﻫﻤﻚ

‏ﻻﺗﺬﻛﺮ اللي ﻓﺎﺕ ﻭﺃﺷﻮﻓـﻚ ﺑﺨﻴﺮ
‏ﻭﻻﺗﺤﺴﺐ إني ﻓﻲ ﻏﻴﺎﺑﻚ ﺃﺫمـك

.....

[الحمدان]

اشاهدك متصل وقول في نفسي
ياليت تقلي ولوحتى مساء الخير

وان قلت شبدأ انا اتحاكا ولك مسي
اخاف تجرح شعوري بالسكوت والضير

ارحمني ياذاك حبك قد ربش حسي
وانت جالس تدردش تعتني بالغير

آخر ظهورك اشوفه وآنا بس منسي
ماتدري عني متى ادخل ووقت السير

حولتني في الصحاري عنتره العبسي
هايم مشرد بأرض الله مثل الطير

ونا الذي كنت ريد الحب رومانسي
لكنني اخطأت في التفكير والتقدير

مجروح من داخلي وفي الكتف قوسي
مااقدر ادافع على نفسي ولا لك شير

اعبر بحورك ولا أعرف متى ارسي
ماقد جنيت منك غير الصد والتبرير

بجولة الحب مستني على تكسي
ارصد مرورك ولوم نفسي على التقصير

سلبت عقلي بحسنك ياالرشا المكسي
لكنني مالقيت منك ولا تعبير

توجتك التاج واعليتك على الكرسي
بخرت عرشك ولكن مانفع تبخير

حطيت حبك وتقدريك على راسي
وصرت حبك وقلبي قد تفائل خير

لكن خساره فؤادك قد طلع قاسي
وصمتك المستمر قد زادني تاثير

.....

[الحمدان]

أي والله إني أحبّك والمحبه جمر
يشبها الشوق وتدخن عباراتها

يامرحبا وأقلط بصدري وأخذ لك عمر
لا بارك الله بدنيانا و صكّاتها

.....

[الحمدان]

فديت وقتن حطّ في دربي رفيق
واحدن يضحك معي واضحك معه

واحدن لا صار وسط القلب ضيق
بالسّوالف والمزايح والسعه

وإن حكى بأسلوبه العذب الرّقيق
يسرق من الجوف قلبن يسمعه


.....

[الحمدان]

يا وجهك اللي عطاه الله ملح وقبول
محظوظ من يقدر يشوفك ويقدر يجيك

من يوم ماصرت محبوبي وقلبي يقول
اسف على أيامي بدونك وشكرًا عليك

.....

[الحمدان]

تصبح على خير والنية هي النية
الشوق يمسي بي ويصبح على بابك

وانتي بسرقة مشاعرنا حرامية
ياويلك من الله إذا فاحت أطيابك

لا تتركي الكبد بالأهمال مشوية
دخيل قومك وناسك وأقرب أحبابك

.....

[الحمدان]

المـال كانـه مـا نـتـفـع فيـه راعيه
هـو والعـدم واحـد بـكـثره وقـله

كم جـامـعٍ مـالٍ وهو ماهتنى فيه
غــيره بـنى بـه ثـروتـه واسـتغـله

من لاغتنت نفسه فلا المال مغنيه
يفنى ومضمون الغنى ما حصل له

.....

[الحمدان]

لاتخسر الطيب على شان زله
ياما عن الزلات ناسٍ تغاضت

سلّم عليه وقابله في محلّه
وأترك كلام اللي بالاعراض خاضت

ناسٍ تفرق بين خلٍ وخلّه
ويغيضهم صلح العرب لاتراضت

.....

[الحمدان]

يا صاحبي دنياك حظوظ ومقادير
تضحك معك والله يعينك عليها

ناسٍ بقوّه حظها يطرح الطير
وناسٍ تطير طيورها من يديها

.....

[الحمدان]

‏أسمـع مـن العقّـال حتـى تستفيـد
وابعد عـن الجهّال قـدر المستطاع

يدلّك العاقل على الراي السديد
ويـدلّك الجاهل على درب الضياع

.....

[الحمدان]

‏أمْدَحْ الطيب وزود في مديحه
والمدايح للردي عيب وخساره

وانتبه خلك صدوقٍ بالقريحه
لاتعيب أنسان مرفوعٍ وقاره

الصراحه طبع للناس الصريحه
والفخر للنفس هو راس التجاره

والمصادر خلها دايم صحيحه
لاتجي في علم مجهولٍ مساره


.....

[الحمدان]

ودي يجي المحتاج والخير موجود
واعطيه في ما املك يداي وجيوبي

ولا يجي يمي من الوقت محدود
في ساعه ما املك بها غير ثوبي

.....

[الحمدان]

ياللي تبي تزعل من الحق مسكين
تزعل وترضى والعرب مادروبك

الناس ماهم عنك لوقلت دارين
قبل تعيب الناس صحح عيوبك

يامعدل المايل ترى الناس صعبين
ياليت تفكيرك بشيٍ يصوبك

عامل جميع الناس بالمنطق الزين
واطلب عسى مولاك يغفر ذنوبك

.....

[الحمدان]

المزح مثل الملح يفسد إذا زاد
لكن لا تفقد ما يقوله لسانك

معاد للكلمة إذا جات معْواد
يا طيب المجنا لسانك حصانك

ولسانك أما جملك بين الأجواد
ولا على قول الرجاجيل هانك

.....

[الحمدان]

يالله دخيلك من طعون المناقيد
ومن غلطة العاقل وقل المروه

ومن كلمة تفهم على غير ماريد
يمسك طرفها منك خبل مفوٌه

.....

[الحمدان]

أقنع بحالك والضروف المحيطه
دام السعاده بالــرضـا بالمقادير

بسيط وأحب الحـيـاه البسيطه
خلّك على ذا القاعده وأبشر بخير

.....

[الحمدان]

مافيه مخلوقٍ من العيب سالم
الا النبي المصطفى منبع الجود

والله جعل بالناس جاهل وعالم
واسعد بشر من كان بالفعل محمود

ولاخير باللي للمخاليق ظالم
حبله قصير وعنده الحق مفقود

ليته قبل موته يرد المظالم
والعمر لو طالت لياليه محدود

.....

[الحمدان]

‏ارفع مقامك فوق لاتتبع الهون
من عاش في حب المراجل عشقها

ومن عاش بالدنيا على الذل مغبون
كم حاجةٍ في خاطره مالحقها

......

[الحمدان]

الصاحب اللي مايجي منه تقصير
يبقى بعيني دوم راعي طويله

ادمح له الزله واسوق المعاذير
وارضيه وارضى عنه لا جات ميله

.....

[الحمدان]

من لاحسب قبل النسب معدن الخال
لاينشـد المولـود مـن ويـن عيبـه

ومن لادفع في ما قف الربـع مثقـال
لاينتظـر تعطيـه ربـعـه زبيـبـه

ومن لاطلب للمشكلـه نـاس عقـال
يجيـه مـن عميـان الاريـا كتيبـه

سمعـت ما قالـوه قبلـي بالامـثـال
من لاكسـب كلمـة نِعـم وش تبيبـه

.....

[الحمدان]

تسوقنا الاقدار ونسوق الاقدام
يومٍ لنا يحسب ويومٍ علينا

للخلف ماننظر والارزاق قدام
ومقسومنا الطيّب تحوشه يدينا

العمر يمضي والرجل يبني أحلام
والوقت يهدم حلمنا اللي بنينا

مانعرض الذمه لشاري وسوّام
ومعروفنا ينساه ابن الذينا

.....

[الحمدان]

لاتحرق أعصابك على شي ماضي
مافات فات ومستحيلٍ رجوعه

خلك على ماجاك صابر وراضي
ولحدن خبر دنياه تمشي بطوعه

ولا لك على حكم الإله أعتراضي
والصبر مبدى كل نفسٍ قنوعه

واشتك على خلاّق سبع الاراضي
اللي جلى عن كل مهموم رَوْعَهْ

.....

[الحمدان]

‏لا تنقدونـــــي لــو عليكــم تأخرت
يا احبابـي الغاليـــن ماهو بقصدي

نفسيتــي صعبــــه ومنهــا تأثرت
والحظ الاقشر حال بالياس ضدي

ياما من اتعاب الزمـن قد تصبرت
وشلت فيـه احمال ماهــي بقدي

والان عذري لو تباعــدت وادبرت
فتــــره عساها يا رفاقـــي تعدي

.....

[الحمدان]

‏لاتسأل الشـــوق عنـي وانت أدرابي
نفسي تمنـاك وانـت أغلـى حبايبها

أغلى من عيوني الثنتيـن وأصحابي
وأغلى من الناس حاضـرها وغايبها

ياراعي الحـب حبك ذوب اعصابي
والهجـــر والبُعـــد ذابلها وذايبها

والروح تشكي غلايا جــور الاغيابي
بالله عليـــك يا غــلايا ليـه سايبها

.....

[الحمدان]

‏طبعـي على جبـــر الخواطــر تربيت
ودرب التواضــع والتفاهـم مساري

ماعمــــري اتخليــــت وإلا تغليت
ولا خذلــت انســان فــي انتظاري

وانا بفعل الطيــب دايــــم تعليت
وصنايع المعروف عنــدي ضماري

ولاجانــي الصاحــب اغثته ولبيت
وفعل الجمايـل في حياتي شعاري

.....

[الحمدان]

‏جیتك علی طاري مساء الورد مشتاق
جیتـــك وانا محتـــــاج منــك زيارة

عملت لك منشـور ونشرت هشتاق
خايف یبيت الشـــوق خـــارج دیارة

ياساكن أعمـــاق أنا حيـــل مشتاق
وعقلي مـــن الأشــواق خارج إطاره

إحساس قلبي يرتجي ضمــة إعناق
ولا غيــر شوفــــك من يطفي نياره



.....

[الحمدان]

‏تبعـد على عيني وباقـــي في القلب
وسط الخفوق اللي ذبحها التنهات

غالي ومايعلـم غلاتك سوى الرب
اللي زرع حبك معي داخـل الذات

مهما افترقنا يا حياتـي في الدرب
ذكرك مساير خافقي كل الاوقات

واتذكرك دايم ولاانساك يا حب
وطيفك بروحي مافرقني ولامات

.....

[الحمدان]

‏جیتك علی طاري صباح الورد مشتاق
جیتـــك وانا محتـــــاج منــك زيارة

عملت لك منشـور ونشرت هشتاق
خايف یبيت الشـــوق خـــارج دیارة

ياساكن أعمـــاق أنا حيـــل مشتاق
وعقلي مـــن الأشــواق خارج إطاره

إحساس قلبي يرتجي ضمــة إعناق
ولا غيــر شوفــــك من يطفي نياره


.....

[الحمدان]

‏حاول توازن بين عقلك والإحساس
‏وعيش الحياة اللي تبيها لذاتك

‏إن كنت بتوّقف حياتك على الناس
‏بتموت ما سويت شي بحياتك

.....

[الحمدان]

من يرخصك بالتجاهل اكرمه بالرحيل
‏ومن يقطعك بالمواصل احذر تواصله

.....

[الحمدان]

الليّ بدون أسباب صد وتجاهل
ماعندنا إلا غير نفس التصرف

يجوز في بعض الأمور التساهل
إلا التساهل بالمقام المشرّف

.....

[الحمدان]

‏يا لله العجب وشلون ورد الحب صار اشواك
‏جرح قلب المشاعر من قبل لايجرح إيديها

‏دموع القلب لو كفت مواجعها لعين رضاك
‏عزفها الناي باوتار الحزن وابدى خوافيها

.....

[الحمدان]

أجـي قد الهقاوي البيض لو فيهـا علي إرهاق
ما أجي قد الظروف اللي علي الوقت فارضهـا

.....

[الحمدان]

ياللي لك الشعر يُكتب والمشاعر تذوب
الشوق ماهو بيرحم والطواري بلا

تعال ما فيه واحد خالي من الذنوب
اما كذا مواصل العشاق ولاّ فلا

ان كان للحب دوله تستضيف القلوب
من غيرك اباييعه واقدّم لْه الولا

انا معك خاطري واسع وصدري رحوب
حتى لو اني حزين وخاطري ما سلا

.....

[الحمدان]

صدق الشاعر الامير خالد الفيصل :


من باعني لو تكون أجداده أجدادي
بعته وبعت الديار اللي سكن فيها

[الحمدان]

تشيب العقول ولاتزال القلوب اطفال
تحب الفرح واقل حاجه تبكيها

.....

[الحمدان]

علاج الكبود من الغثاء تلت الموتر
وفرقا الغثاء ومزاحم الناس والصجه

.....

[الحمدان]

‏لا تقول ان الليالي فرقتنا
لاتقول ظروفنا عيّت علينا

الليالي يوم ودك جمّعتنا
يوم ودك كل شيٍ في يدينا

يوم همّلنا الليالي همّلتنا
كيف تعطينا وحنا ماعطينا

الليالي عن هوانا مانهتنا
البلا حنا على البعد انتهينا

.....

[الحمدان]

تركتك تروحين من يوم حسّيت
إنّك عمر والعمر مقدر أعيده

عزّيت نفسي فالغياب وتقوّيت
حتى لو إن أقرب سعاده بعيده

لو قلت أحبّك فأي جمله وصدّيت
من صدقها بتصير جمله مفيده

اعتبري إنّك بيت دايم وأنا بيت
يمكن يجمّعنا القدر في قصيده

.....

[الحمدان]

تعال شوف الي ما عمره تاه تاه
والي ما عمره ضاع ضاع القايله

عساني اخر من يضمه في الحياه
واٌول مـــن يضمه بــكرت العايله

.....

[الحمدان]

يابنت انا فالحب ما اداني اللعب
ما الله مفهمني بلعب الكراسي

لو اتنازل واتجاوب مع الشعب
قلبت قلبي فندقٍ دبلوماسي

ماطعت عقلي لين قلب العنا تعب
وانا الضحيه بالخلاف السياسي

والذكريات مسببه ليّه الرعب
اللي تغربلني ليا صرت ناسي

.....

[الحمدان]

اللي ماعرف يلبس ثياب الصداقه زين
ولو يدّعيها يفضحه وجهه الغابر

ماحنا على بوق المواثيق مترَبين
ويدري بنا اطيب منه في ذي ويكابر

طويل اللسان يعَيّن اللي طويل يدين
على فركة الخشم وعلى وطية الصابر

.....

[الحمدان]

ليا شانت وجيه الليالي وقلّ الراي
وخلايا الدماغ من التفاكير مضطربه

عط الراي عمرك لا تشاور به الحكاي
لو ان الطواري سربةٍ من بعد سربه

فلا تزتمل وتقول ماجت على مشهاي
فرجها ليا ضاعت على فارج الكربه

ترى شرهة البندق على وقفة الرماي
مثل شرهة الفارس على زرقة الحربه

.....

[الحمدان]

ساترين وجيهنا بالعوايد والسلوم
ومن خِلقنا ماطلعنا على يدين احد

ننطح كبار المواجيب ونسد اللزوم
ومانعرف الا هلا وارحب وهل من بعد

حتى مع قل الفوايد ومع كثر الرسوم
النواجد مسفهله واهل باس وجهد

ماتضيق الا على اللاش وعيال الرخوم
وان حدتنا شهب الايام سقناها جلد

.....

[الحمدان]

الليل توّه راح منه النصيفه
وأنا من التفكير والضيق زاهق

والغالي اللي كل ما مر طيفه
قامت دموعي عن بعضها تفاهق

راح وترك لي ذكرياتً خفيفه
اليا طرت في خاطري قمت أشاهق

أثر المُحب اللي يفارق وليفه
يصير عقله مثل عقل المراهق

.....

[الحمدان]

بالثقة والعزم والعقل أتحلا
عارفٍ وش مستواي ووين حدي

ماني مغرم بالجديل اللي تدلا
أنا مغرم بالنعارة والتحدي

أكتب أبيات الغزل لأجل أتسلا
والا أنا ذا الخربطة ماهيب عندي

.....

[الحمدان]

احضر ومثلي صهيله يسبق قدومه
واغيب لكن تجيب الكسب غيباتي

لو ان مالي جناح ونفس ملزومه
ماكان تفخر مواكيري بهداتي

خلقت فالراس عز وفالنسم زومه
وتدنيقة الراس ماهي من خياراتي

من كثر ما ابوي علمني على القومه
نسيت كثر المطيح وقوّ وقعاتي

.....

[الحمدان]

ياعيونٍ .. في أنتباهتها تغاضي
مرّي المتضايق وخليه الأرحب

وأشغليني لي ثلاث شهور فاضي
وّدي أرجع من جديد أحب وأنحب

.....

[الحمدان]

امي وليفة خاطري نور عيني
حتى وهي قربي لها احن واشتاق

كل مااضيق بها الزمن تحتويني
يارب تشرح صدرها كل ماضاق

.....

[الحمدان]

‏ياهيه ياللي تنقل القال والقيل
‏وتحطني في موقفٍ ما حصلي

‏بيني وبينك دعوةٍ تالي الليل
‏اخذ بها حقي وانا في محلي

.....

[الحمدان]

يا آخر الليل عطني العلم من بدري
ويش انت ناوي ترجع لي من الذكرى

إن كانها حزن فـانا ممتلي صدري
وإن كانها خير يمكن ضيقتي تبرى

.....

[الحمدان]

الحب غفوه نوم في جفن سهران
سحابه الاشواق والوصل ديمه

والبعد جرح انسان في داخل انسان
تبطي وسومه بالحنايا مقيمه

.....

[الحمدان]

‏لا تهدر اوقاتك ومالك وحالك
‏الا على ناسٍ تحبك وتغليك

‏لا تنتظر فالوقت منهو صفالك
‏من راح خلّه جعل ربي يعافيك

‏فنجال شاهي وانت جالس لحالك
‏عن شوفة العالم تعزّك وتغنيك

.....

[الحمدان]

‏لا تساومني على جاهي وقدري
‏ويش ابي بالعمر من دون الكرامه

‏ان لفيت اهلاً وسهلاً وسط صدري
‏وان بغيت تروح مرواح السلامه

.....

[الحمدان]

‏تدري متى تعرف ضعيف الروابع
‏من يلحق الحاجه حسافه ومنّه

.....

[الحمدان]

‏يالله انا طالبك عفوك وحسن الخشوع
‏تقبل صلاتي وتغفرلي وتهديني

‏احمدك واشكرك فالدنيا وعبدك قنوع
‏معاد حاجه من الأيام تغريني

‏اسجد لوجهك عظيم الشان ذل وخضوع
‏فضلك عن الناس والمنّات يغنيني

.....

[الحمدان]

يا من تحبّ ابيات الابداع جدّا
كتبت لي بيتين يمكن تفيدك

الشعر فنجال الصباح المبدّا
ماهو بكيف الحال عطنا جديدك

.....

[الحمدان]

من طاروق مطلق الثبيتي وصياف الحربي
الله يرحمهم و شدتني أبيات منها

قال مطلق الثبيتي :

أنته عيونك يوم تنظر بها مثل الكشاشيف
دايم تحرّى بيننا للصباح وللهجادي

رد صياف الحربي و قال :

حنا ليا قمنا على الهون فرقنا المواليف
وإلا أنت غير إتحرث الجمر من تحت الرمادي

[الحمدان]

راكب إللي لو يطوفك ما قدرت تطوفه
سيّد الألوان لا فضّي ولا فيراني

وشوشة مراوحه يوم إشتغل وبلوفه
وشوشة عجمي يسولف له على قحطاني :)

لين قال :

ليتني بالشعر يوم أبرد حشاشة جوفه
يستحي منّي ويذكرني ولا ينساني

مدغم أبو شيبه

[الحمدان]

ضاقت الآرض صارت كنها خصر خلّي
ليتها ماخذه من عين خلّي رحابه

آمشي مع الدروب أنا وهمّي وظلّي
جرة خطاي فوق القاع جرة ربابه

لين قال :

كل شغمومً يشوف المعارك تسلّي
يسمع الرمي كنه سامعٍ له دُعابه

جمال بندر

[الحمدان]

جماهيري الشعّار والمفرده والقاف
أنا مجرم الأبداع ويحق لي لا أجرمت

على شطر بيتي كل الإبداع حج وطاف
تولّو جميع و يمّمو حيث ما يمّمت

مطلق بن شويه

[الحمدان]

ماهيب قباً جموح ولا غزال ٍ لعوب
حورية ٍ حولت مع َ نزول الحيا

يغار منها القمر ويصير وجهه شحوب
اما عن الشمس تاخذ من ضياها ضيا

لو مرت العاشقين الاوفيا فالدروب
ماعاد خلت بدرب العاشقين اوفيا

.....

[الحمدان]

‏الي بدون أسباب صد وتجاهل
‏ماعندنا له غير نفس التصرف

‏يجوز في بعض الأمور التساهل
‏إلا التساهل بالمقام المشرّف

.....

[الحمدان]

يا دار الاحباب كلن له من اسمه نصيب
وانا نصيبي من البيبان مقفولها

غربت نفسي بنفسي لين صرت الغريب
اللي عجز ياصل الديره وهو حولها

احتاج لاطيب خوي واحتاج لافضل حبيب
لين الغلا والهموم يقل مفعولها

ياصاحب الخاطر المكسور خلك قريب
عندي قصيده حزينه يمكن اقولها

.....

[الحمدان]

دموع الفقد ما يقدر يكفكفها طرف منديل
تقول ان الحزن يغرف دموعي من طرف غيمه

.....

[الحمدان]

عباديّه شعوري لو تبكيها لحون العود
محاجرها قصيده والدموع حروف قافيه

……

[الحمدان]

تعلقت بك واثر التعلق مثل الادمان
يضر البن آدم بس مايقدر يخليه

فلا تستفزك غيرتي في بعض الاحيان
أنا لا ملكت الشي ما ابغى خشيرً فيه

.....

[الحمدان]

‏تعجبني اللي في الشعر ذوقها ذوق
ماھوب حي الله قصيد يعجبها

دايم نظرھا وإختياراتها فوق
تعرض مفاتن ذوقها في أدبها

.....

[الحمدان]

القهوه اللي تعدّل راس شاربها
ماهي تعدّل مزاجه لانها حلوى

تبقى المراره على كبده تحاربها
ويقلّب الراي ملوى تقتفي ملوى

يبني هجوسٍ كثير الهم خاربها
لعل نفسيته تصبر على البلوى

حتى يعلق رسنها فوق غاربها
مادامها من غرابيل الزمن تلوى

.....

[الحمدان]

أتخيل وجهك الزين وأمسسي عليه
كل وجهٍ غير وجهك مايغري ناظري

.....

[الحمدان]

مفروض كحل العيون يزيد فيه الغلا
ولا ينشرى الا لعين المهره الشارده

الكحل في عين عذرىً ماعليها حلا
مثل القصيد القوي فالحفله البارده

.....

[الحمدان]

نشّت من القبله قنوفٍ محاديب
‏يا حيّ فضل الله وحيّ المخيله

‏لاعاد تنشد عن سموم اللواهيب
‏البرق يلعج والنسايم عليلـه

.....