اخترنا لكم شعر نبطي وفصيح

[الحمدان]

ما نسيتك جعل ينساني زماني
كيف تبغى انساك وانت العمر كله

دوك هذي كلمتةٍ بلت لساني
والله احبك واموتك حب والله

عاد ودي يوم جيتك لو عشاني
جادلك هذا ابي كفك تفلّه

ودي أبحر فيك يا بحر الاماني
كل عرقٍ من عروق القلب بله

ليه تضحك حط نفسك في مكاني
اغنتك عن شوفتي صورة مجلة

.....

[الحمدان]

ماني من اللي يتبعون المقفين
ولاني من اللي يعبدون الزوايا

ترى التطاول شي مايرضي الدين
هذي صفاةٍ للحفاة العرايا

ياسيدي مابيك في ليلي تبين
بالله قلي ويش أبي بالهدايا

أبيك بس تفك قيد المساجين
اللي أياديهم تهز الحنايا

.....

[الحمدان]

تلمست لك عذر وتاملت بك ميعاد
من العام واقدامي على الدرب دواجه

اجي من هنا وانتي تروحين بي من غاد
تقل ما خلق ربي مواعيد ومواجه

ولا حن لك قلب ولا غصن فرعك ماد
ولا ارخصتي الدمعه وهي ملح وهماجه

ابسلبك من يمكن وبحاول وما فاد
وابذخرك لظروف المواعيد والحاجه

وابتليك لين اني واجهاد عليك جهاد
اذا اصلك والا دونك الموت وخلاجه

لك من السعه عين ومن الحاجبين حداد
انا وين اوديني عن الرمش وحجاجه

ولا انتي من اللي يظهر بحسنها الاضداد
ولا عينك النجلا تبي كحل ودعاجه

يصوت بك المخطر على الروس والاشهاد
عليك العوض كانك تمنين بعلاجه

حرام اننا نقضي على بعضنا بعناد
متاييه في بحر تلاطم بنا امواجه

اذا احتجت يا قلبي على الظلع الاطول ناد
على واحد عرض السموات محتاجه

.....

[الحمدان]

مرت من الغيد الفوارق وحده
ما هيب مثل العالم المراره

هذي حريقه جاهزه ماباقي
ما باقي الا وتشتعل شراره

عطر يداوره الهوى وتضمه
وتجامله وتهدي استنكاره

تتشقلب وجيه البشر لاعدت
وتعلق الدنيا على مسماره

خطواتها وحده وراها وحده
مقسمه بالشبر والمتاره

تمشي خطاويها برتم ونغمه
كنك تمشيها على القيثاره

واليا انثنت للارض تاخذ حاجه
اتقول طعم في طرف سناره

تحرق صدور المترفات ان مرت
اكثر من السيقار والسيقاره

اتوزع البسمه على اللي معها
اياك اعني واسمعي ياجاره

ارق من نسمة عبير غادي
تحت النحر وشوي فوق زراره

.....

[الحمدان]

ما عشقت من النجوم إلا السواري
وما كرهت من النفوس إلا الرديه

من خيوط الشمس يغزل لي نهاري
من يدين أمي الحنون الاجوديه

وفي بقايا الامس كان اخر وقاري
وكانت اخر خطوتين المقدريه

غرفتي قبري بعض حظي مزاري
حيز يعكس دنا الدنيا الدنيه

.....

[الحمدان]

ابيك بكل ما ربي عطاك من الحلا والزود
وابي كلك وابي قلبك وابي خيره وابي شره

قضى عمري وانا واقف على باب الرجا الموصود
واخاف اني ما عاد اقدر اصبر نفسي الحره

غيابك لعنبو هذا الغايب اللي ما منه فود
كسر حجر الضلوع وضيق الخاطر ولا سره

طلبتك لا تخلين العواذل تكثر المنقود
انا مضطر وطباع العواذل حيل مضطره

.....

[الحمدان]

دام المعارك صغيره ما علينا لزام
ينوب عن سيفي البتار اصغر جفير

قرات في ما قرأته من بلوغ المرام
اللي ترك شي لله عاضه الله بخير

.....

[الحمدان]

الشخص يلدغ من جحر ويتركه
وأنا لدغت عشر مرات لاكني

مازلت انوخ ركابي في مرابعه
يجفاه رأيي ورجليني يودني

ما كان صبراً عزيز النفس يمنعه
بل كان ضني وأضنه خايب ضني

هوجاس ياللي مضى لي وقت أصارعه
أنا سكين وهو ذا الحين ساكني

لابد أبين خصيمي قاتلي من هو
وادفنه حياً قبل برضاي يدفني

أنا سكيعً مشرد في شوارعه
وهو عزيز مكرم مادرا عني

القرش يرفع بيت لاعماد له
والفقر يهدم بيت العز ويدني

الله.. وربي..وديني لا أضيعه
شاء القضاء وجاني من يجنني

أبو جديل أليا منه نطق شنهو
شنه يشقق حشاي أو يلفعني

عين الحمام صفاءً في محاجره
ورمش ضليل لكن مايضللني

حاز الكمال جمالاً حتى أصبعه
والعين والخد والأذنان والسني

الله وأكبر عليه وكل مامعه
لاشفت زوله مقفى تقل يلفعني

غرونً وضعني جزافاً وسط مدفعه
و عقل قليبي وحاول بي وأقنعني

أن الذليل عزيز النفس يتبعه
والضن ضني وأضنه صايب ضني

.....

[الحمدان]

صاروا خبول الناس هم صفوة الجيل
والــســاده العقال مــاهــم بعـقـال

العقل وسلوم الــرجـــال المشاكيل
لو تنجلب في السوق ماجابت ريــال

.....

[الحمدان]

لو معك عرفٍ عن العوجا يردك
كان أخذنا معك بالهرج و عطينا

قد درسنا خارطة مزحك و جدك
و التزمنا الصمت عقب اللي لقينا

تخطي الأسناع لو ما هو بودك
من علومك قد شبعنا وارتوينا

ما يجاري لخبطة جزرك و مدك
غير من يقدر يشيل جبال سينا

إن تساهلنا معك جاوزت حدك
وإن هرجنا صارت الشرهه علينا

.....

[الحمدان]

يا خل سامحني لقل الكلافه
لو كان قدري غير ما قلت لك ليه

هذبت لك جرحي وشعري وقافه
وعنيت لفراقك ولو كنت شاريه

بالأمس كان الحب والشوق آفه
واليوم ما كنك بكيتي من التيه

جف الغرام ويا سبايب جفافه
مالك وسط روح المعنّى مشاريه

لو كان دمعك بحر يسقي ضفافه
ما لان لك قلب ٍ ابد ما عرفتيه

هذا الزمن عشقه مجرد سخافه
يمكن لاني ما عرفت الهوى فيه

على جدار الوقت بذكر خرافه
واكتب انا يا وقت مجروح غاليه

يمكن يحس اللي كتب بأعترافه
انك حبيبي قالها قلت له لييه

.....

[الحمدان]

بالله قولوا للسّفيه الـلابه
ماهو قبيلي كانها صارت أفعال

وإن كانها بالشّعر يامرحبا به
باشرب قراحه وأترك لمثله حثال

دام السّهر عنده سوالف صبابه
ودام الحنين بنظرته قد مياّل

ودام الشّعر عنده حبيب وغيابه
وأقصى همومه بالشّعر ساعة وصال

أنا السّهر عندي بلى مبتلابه
شيئٍ إذا جاني مواضيعه ثقال

وأنا الحنين إن مرّبي مايشابه
إلا حنينٍ مر برجال لرجال

وأنا الشّعر عندي خوي وقرابه
يشره علي لاخطيت وأفرحة الأنذال

باشعل جفوني للسًهر والكتابه
ودّي بشعرٍ ما بعد قبلي إنقال

ودّي بشعرٍ مايعرف الرًتابه
شعرٍ بعد موتي بيحييني أجيال

بقولها والله ولاني بآبه
ما دامني بالشّعر نقّاض فتّال

أحيان أغلي من غلى رجل لابه
وأحيان أبغض لابه لبغض رجّال

.....

[الحمدان]

يضيع بدفتري شعري..واضيع بزحمة الافكار
ادورني ولا القاني .. وادوّر بي ولا ألقابي

وأحس إني تعبت ولالقيت لها الغياب أعذار
يجمّلني مع منهو .. يبيله عذر لغيابي

وجيتك ياخويّي جرح .. انبت لو نزفت اشعار
جيتك كيف ما أدري .. ولكن جيت واقرابي

قصايدنا غدت حنطه .. تسولف للرحى أسرار
وتنور الزمن يحرق .. رغيف الشاعرالصابي

انا ادري هالزمن يرفض مثل ياكليب شب النار
لانه مو زمن شب وحطبها يمك ايجابي

قرف كل القصيد اللي .. سمعت فجلست السمار
ترف كل القصيد اللي.. حكوا لي عنه اصحابي

ابسأل ليه مانكتب .. نشيد الصبح للأحرار
ابسأل ليه ماننسى.. قصيدة غابوا احبابي

شف الأبطال اطفال.. بنادقهم صبر واحجار
عسى فيهم صلاح الدين يغسل فدمه ترابي

عزاي فـ أمة تنبت .. مع مرالزمن ثوار
وعزاي فأمة ارقى.. بها وارقى وترقابي

.....

[الحمدان]

رجل يبي طاريه عند الأشانيب
ورجل يبي طاريه عند الحبيبه

رجل يودي بالسواليف ويجيب
ورجل سواليفه لفعله تجيبه

رجل يغض الطرف عن جارة صحيب
ورجل عيونه في محارم صحيبه

ورجل تسد بغيبته يومه يغيب
ورجل ولا تقدر تسد بمغيبه

ورجل يغيب ويفقدونه هل الطيب
ورجل ليا من غاب محددريبه

ورجل اذا أخطى يرى نفسه مصيب
ورجلاذا أخطى يراها مصيبه

ورجل تشوف بخوته لك مكاسيب
ورجل تشوف بخوته لك غليبه

قلت الصراحه مابها شك أو ريب
كل على طبعه يجيبه حليبه

اشره وشره كان تبغي المواجيب
عط حق تاخذ حق مابه معيبه

.....

[الحمدان]

الشقاء عذب قلوب الناس واسرف في ألمها
والدموع الي على اوجان الفقارى مستهانة

يستشفون السعادة والاماني من عدمها
والضمير الي حكوله ما تحرك من مكانة

دوروا حل المشاكل والمشاكل وش رسمها
غير تغييب الضمير وغير تضييع الامانة

.....

[الحمدان]

في قلبك القبلة وفي وجهك النور
وفي عينك الطالات وأم المعارك

العز لك منهاج والشرع دستور
والطيب ذكرك والخلود أختيارك

في طولة الأمجاد لاتاخذ الشور
الشعب كله ما يخالف قرارك

أضرب بنا العسرات وأقطع بنا بحور
لا حالكت دنياك شعبك نهارك

دام عزك ياوطن

[الحمدان]

عساه يؤخذ في الضحى قولو امين
اللي بنات الناس شغله وهمه

احداً يحاول ستر عذراء البعيدين
واحد يدور بالردىء بنت عمه

قد قالها بندر قبل عدة سنين
يثور معها الحر ويثور دمه

ولا الردي لو مرته بين قوسين
تزول عن عينه مزول المغمه

.....

[الحمدان]

يا من سجد وجهي لوجهك ولا زال
يجني ثمار السجدة إللي سجدها

أنا بوجهك من عنى الوقت لا مال
وشر النفوس المبغضات وحسده

آمين