فوق هام السحب ( الشعر الشعبي) على متن القوافي

[الحمدان]

ياكثر ما نخفي من اوجاع ودموع
‏وياكثر ما نشكي ولا احـد سمعنا

‏ماجـور ياقلب من الحــزن موجوع
‏نوفي لهـم بــس الوفاء ما نفـعنا

......

[الحمدان]

‏ابتسم للـوقت واضحـك للحياه
لا يـروح الـعـمـر في هم ونكد
.
عيش يومك واحتسب للي وراه
من يعد الوقت يبلـش في العدد

......

[الحمدان]

واثق بنفسي لاتقدمت خطوات
‏تبقى الثقة مصدر مهم بكياني

‏للكايده عندي عزومٍ منيعات
‏دايم على القمة تلاقي مكاني

‏مرقابي بروس الجبال المنيفات
‏وعيني على غيثٍ به الخير باني

‏انقّي الكلمه واحاسب للاوقات
‏وعن الكلام الشين يكرم لساني

......

[الحمدان]

‏ترحب بغيري وانا واقفه هناك
‏امسح بقايا الدمع بأطراف كمي

‏يعني نسيت ايامنا والغلا ذاك
‏يعني رضيت الجرح ياكبر همي

‏وشلون بقوى غيبتك واتناساك
‏ياحرقه اعصابي وياحرق دمي

بعد الفراق انا يا وين بلقاك
لا انت بولد خالي ولا ولد عمي

......

[الحمدان]

ما باقي معاي أعصاب يا بالي المشدود
أنا بس مره ودي أحس بك داله

مايلحق غيابي لا ملامه ولا منقود
إذا فـ الحضور القلب بـ إحساسه لحاله

بقت عزلتي غايه، لو أن العمر معدود
أهديّه يوم أكتب من الشعر وأقرا له

حبيبة سنيني لو أباعد أنا موجود
أنا وحشتك، والليل، والباب، وأقفاله

لا طوّلت بغيابي، مردي معك موعود
نسيم الصبا حملتّه لـ قلبك رساله

حبيبك - مسافاته حنينه - لا زاد يعود
فؤاده يشوفك أم وعيونك عياله

......

[الحمدان]

مدري ملى صدري البارح حنين وهيام
ولا برى قلبي المهوم .. طول البطا

تخاصموا عقلي وقلبي أشد الخصام
ضميري الحي بكى جرحي اللي سطا

ياحظ من ينجرح جرحٍ يقص العظام
الموت جرحٍ عليه الروح ستر وغطا

تغانم أيام عمرك .. والهمام الهمام
قبل يروح العمر منك مراح القطا

مجاهد النفس خصلة من خصال الكرام
ومن يذكر الطيب ماهو ضاريٍ بالعطا

ومن يتبع النفس لو زكى وصلى وصام
يابعده من الصواب، وقربه من الخطا

......

[الحمدان]

انت مزهدني من الناس مافيها جديد
‏وناس واجد من يدي قد قطعت آمالها

‏ماخذٍ قلبي وقلبي من النوع الفريد
‏وودي اصارحك بعلومه اللي قالها

‏كل بنتٍ قابليه ومنسبها جويد
‏ودها تفخر بك وفي حماك لحالها

‏خل عاد اللي ثنتها على حبل الوريد
‏وخلت شماغك يسلم على سلسالها

......

[الحمدان]

اظن بعض المدح شتمٍ وتوبيخ
لا صار ماهو واردٍ في محله

المدح للمطنوخ نسل المطانيخ
اللي فعول الطيب عنده جبلّه

ماقال انا حاتم ولا قال انا شيخ
لكن فعوله قالت العلم كلّه

......

[الحمدان]

والله ما مثل التوكل على الله
يملا لك الدنيا سعاده وتوفيق

واللي يردد دايم استغفر الله
تلقاه مايدري عن الهم والضيق

......

[الحمدان]

‏لا تعترض للي طريقه مجنبك
‏ولا تترك اللي فالشدايد يخاويك

‏وإعرف مواجيب العرب قبل واجبك
‏إن كان عقلك في حياتك يقديك

......

[الحمدان]

لا تعلمنا عن اللي هرج فينا وقال
‏اعتبرنا لين هالحين ماندري عنْه

‏لو نبا ندنق على الطايح يطيح العقال
‏والعقال اللي على روسنا ما اغلى منْه

‏الجريدة عشر صفحات قيمتها ريال
‏لو كلام الناس محسوب ما هذا ثمنْه

......

[الحمدان]

جيتك عقب بذ الخفا يابس الريق
‏الجيه اللي ضيّع الله جهدها

‏من مسة الحاجه وقل التوافيق
‏وظروف ما تنقال وأمّر وادها

‏وحديتني الله يحدك على الضيق
‏بالضيقه اللي ما اتنفس بعدّها

......

[الحمدان]

‏بين العيون اليـا تـلاقت سواليف
اصدق من اللي نكتبه بالرسايـل

لغـه عجيـبه للقـلوب المــواليــف
مشـفــره فـيـهـــا رمــوز ودلايـــل

للعاشق الولهان نـظـرة ملاهيـف
على هوى مشهات قلبه اتخايـل

......

[الحمدان]

خل في صدرك على الدنيا قبول
واعرف إن الشّمس تشرق لو تغيب

وعود لسانك ليـا ضاقت يقول
الأماني في رجى الله ما تخيـب

......

[الحمدان]

‏أستقبل الجاي واللي راح خله يروح
‌‏عيش الحياه بـ هداوه لاتعيش بـ قلق

‌‏الضحك والحزن والأفراح حتى الجروح
‌‏كلها بياديك ،، وأنت أختار مما سبق

......

[الحمدان]

‏دام الولي يعلم بصادق نواياك
لاتلتفت لأهل النوايا الرديه

دنياك ماتاتي على كيف مشهاك
أكثر قلوب الخلق ماهي خليه

حتى خوي الروح يقفي وينساك
تزين له دنياه وينسى خويه

هذي هي الدنيا واذا جاك ماجاك
توجه بوجهك لرب البريه

اسجد وقل يارب أنا طالب رضاك
وطالبك تفريج الهموم القويه

......

[الحمدان]

هذي هي الدنيا لها اقبال واقفاي
‏وماجابته سود الليالي خذنه

‏لاتقول انا عارفٍ داي ودواي
‏وقلبك طواريق الهوى يسهجنه

‏ترى سنين العمر تومي به اوماي
‏كم واحد عقب الطرب نوخنه

......

[الحمدان]

يا ملح الأيّام عيّت .. تستقيم البخوت
‏لي عقد احاول واحاول غير ما الله قسم

‏عيّو عليك الحرار مشرعيّن البيوت
‏صوارمٍ في مجالسهم يفوح الدسم

‏زبدة خليط الكلام اللي يهتك السكوت
‏يبقى و تبقين في خيرة قصيدي وسم

‏والله مانسى معاريفك علي لين اموت
‏ما دام فالقلب نبض و فالريايا نسم

......

[الحمدان]

ماطاح دمع العين بس طاح رجّال
‏يسوى دموعي كلّها و أجتهادي

‏في ليلةٍ ذاع الخبر و الردى حال
‏بيبني و بين اللّي أعدّه عتادي

‏ياحرّ كبدي ليت هذا العمر زال
‏قبل المحه يقطع حبال أعتمادي

‏تنصاني الرميه و أدّور على أنذال
‏و أثر البلا في رميةٍ من زنادي

......

[الحمدان]

النفس عن شرواه عيّت لا تختار
ما ترتضي غيره و نفسي مصرّه

بالصدر له هيبة وحشمة ومقدار
و بين الضلوع العوج يبقى مقرّه

......

[الحمدان]

‏قمة الاخـلاق .. والذوق الرفيع
لاتركت الكـبر وأرخيت الجناب

وأعتبرت الخلق في عينك جميع
كلهم لادم وادم من تراب

......

[الحمدان]

في هالزمن اصبر على اللي تواجه
‏الناس تطعن في قفا ميت وحي
‏
‏ان جيت قالو جيته لاجل حاجه
‏وان غبت قالو غايبٍ له على شي

......

[الحمدان]

‏يارحـلة الايـام ويـن الفـرح ويـن
وين الوفـا والصـدق وين الـمحبه

وين الصدق بالحب وين المحبين
وين اللي يعشـق بالـمشـاعر وقلبه

ماعـاد في معنـى وفـا بيـن قلبـين
اقصـر دروب العشق صارت مسبـه

......

[الحمدان]

العز هيبة والشرف يرفع الراس
والكذب سلعة مالها أي قيمة

والبيت مايبنى على غير مقياس
لابد توضع له قواعد سليمة

خذلك من الدنيا تجارب مع الناس
واسلك دروب أهل العقول الحكيمة

واعلم بأن الناس آلاف الاجناس
والعيب يجلب لك عواقب وخيمة

......

[الحمدان]

تهيج المشاعر في غرام العيون السود
وأجر القوافي في عيونك و أغنيها

يا مسك المحبه و التلاقي و ريح العود
فدتك المعاني و القصايــد و قاريها

أنا مـن كثر ما أشتاق لك يا نعيم العود
أسابق طيوفك في خيالي و أناديها

......

[الحمدان]

‏يا ملاكٍ مرني في صورة إنسان ، و تهيّا
نازلٍ للأرض من سبع السماوات يتنزه

فيه من شمس الصباح وفيه من نجم الثريا
يقبل و تقبل معاه اليا لفى ، مليون عزه

يجمع من الزين ما يغوي قلوبٍ ما تغيّا
بيرق الحسن المسمّى بـ إيده اليمنى يرزّه

......

[الحمدان]

من تجمل فيك لا تجحد جميله
جاحد المعروف وش خانة حياته

ومن تردى فيك خله في سبيله
لا اتردى فيه وتسوي سواته

......

[الحمدان]

شرهتي دايم على الطيّب كبيرة
والردي ما همني مهما يسوي

والحكيم اخذ برايه واستشيره
وان طفت ضو الردي شبيت ضوي

......

[الحمدان]

‏خلك خفيف النفس راقي وجذاب
لا تـصير بعيوون المخاليق علـه

اضحك وفرفش لكن بحب واداب
اعرف حدود المزح وأعرف محله

بقلمي

[الحمدان]

‏اهدي لكم من جزل الأبيات باقه
‏واقول جعل القاف يكسب رضاكم

‏علي حسب سلم الوفاء والصداقه
‏واللي مايرضيكم لعله فداكم

‏بيني وبين الشعر ود وعلاقه
‏اغليه واسوقه لكم من غلاكم

‏الحمدان ......

[الحمدان]

أنا وين أنام ؟ وطيفك يقول صح النوم
‏يسولف علي ، لين الفجر ينتثر نوره
‏
‏ثلاثه .. تجيب العيد بالعاشق المحروم
‏نسيم الليالي ، والطواري ، وابو نوره

......

[الحمدان]

ماني بحاجة ناس مَ عندها إحساس
أنا بحاجة شخص لا طحت ، جـــاني

يَ كثـر ما نسمع تـــرى الناس لـلناس
بس الحقيقة طبع هالناس - ثانـــــي

......

[الحمدان]

‏مايلوي ذراع الصبر غير الأقدار
أو دعوةٍ نامت بمتن السحابة

شيٍ نبيه ويمضي العمر ماصار
وشيٍ يصير وماحسبنا حسابة

......

[الحمدان]

لمتابعيني قدر لو ماتكلمت
وبـالقلب شيً ما نطق به لساني

للي يواصل أو يتابعني بصمت
شكـــري وتقديري وجـــل إمتناني

الحمدان .....

[الحمدان]

‎صبرنا على ماجابه الوقت زين وشين
‌‏ولا حطمت صكات بقعاء عزايمنا
‌‏ٰ
‌‏نحشم الرفيق ولا طردنا ورى المقفين
‌‏وعلى نخوة الناخين نحذف عمايمنا

.....

[الحمدان]

‏لا تزعجون الصدر في كثر العلوم
‏ماينقل الهرجه سوى عجز الضحى
‏
‏الطيّب لـ ربعه ولو خابوا يقوم
‏وإلا الردي من فوقهم مثل الرحى

......

[الحمدان]

مثل الجبال الراسيات الشواهيق
‏بعض الرجال وبعضها كالنّثيله
‏.
‏وإليا لزّمت إلزّم خوي المطاليق
‏وجنب عن اللي خوّته لك وسيله

.....

[الحمدان]

ترى صدور الناس مثل المخازن
‏ياما بداخلها من الشر والخير
‏ٰ
‏وأكبر نجاحك في الحياة التوازن
‏والصبر لا صكت عليك المقادير

......

[الحمدان]

ماتجاهلت العوايد وضيعت السلوم
‏يوم غنت كل نفسٍ على طاروقها
‏ٰ
‏اترفع عن كثير السوالف والعلوم
‏والبشر اعرف مواجيبها وحقوقها

......

[الحمدان]

‏خالد الفيصل يقول
ليتك معي ساهرٍ ليل الهـوى كلَّـه
ما انوم أنا وإنت لأجل الحبِ سهراني

ترى السَّهر مع حبيبك يبري العلَّـه
لي صرت شفقٍ وهو عليك شفقـانِ

[الحمدان]

‎الوفا في الناس مايسمى خطا
الخطا لاصرت من النفس ‎امغلوب

‎والالم لاطاح في القلب وسطا
يتعبك لاصار من يمنى ‎امحبوب

......

[الحمدان]

‏لو أن الخواطر جبرها مثل جبرالساق
جبرنا خواطرنا على ماحصل فيها

لاكن الخواطر حاجة داخل الاعماق
وجاها من صدوف الزمن مايكفيها

......

[الحمدان]

دخلت⁩ ⁦ في⁩ ⁦ الحُب⁩ تصنيفه وّرد إعتبار
‏وإجتزت كل المراحل مرحله مرحله

‏واليوم توي عرفت إن المحبه دمار
‏تأثر على ماضي العاشق ومستقبله

‏صمدت حتى وصلت مرحلة الإنهيار
‏كِنت أحسب ان اخر المشوار مثل اوّله

......

[الحمدان]

تقول كيف الحال مدري مواساه
ولا كذا من بـاب روتين و حقوق

على العموم بخير والحمد لله
ماغير جيتك ضايق ورحت مخنوق

......

[الحمدان]

‏إن شانت الدنيا ترا العمر مقسوم
محدٍ حياته جت على ما يريده

دايم تفائل بالامل واترك اللوم
عش لحضتك واللي مضى لا تعيده

......

[الحمدان]

تعبت من الجفا لاني ابيه بخيره و شره
ولكن عزتي ضدي تشوف افعاله بمجهر

رضيت استسلم لعقلي وقلبي مارضخ مره
يقول ان فازت العزه ترى الفرقا بعد تقهر

احس اني من الحيره صغيرٍ ماسكٍ جمره
اباكابر و لكني لقيت ان حرقتي اكبر

......

[الحمدان]

يارب في خاطري ضيقه ولا لي سواك
ضاقت علي البسيطه واخلفت نظرتي

ولي عبره يوم تخنقني واطالع سماك
وترجم الخوف من رهبتك في عبرتي

وأنا بدونك يارب حياتي للفنى والهلاك
من دون رحمتك يارحمٰن وش حضرتي

......

[الحمدان]

آبيك تعرف آن آلنآس آجنآس
ۆ مو كل من ينطق آحبك يحبك

بعض آلبشر يغرك بصدق آلآحسآس!
ۆبعض آلبشرر سآكت ۆقلبه يحبک

محمد بن فطيس المري

[الحمدان]

ماكل شخـــص بقلبه جــرح يتكلم
ودموع عينه،حبيسه في محاجرها

وقلوب بعض البشر،،،، ماعاد تتألم
من كثر مامــرها مــاتت مشاعــرها

......

[الحمدان]

ما هو على كيف المخاليق تختار
‏ما فيه أحـد يعرف نهاية مصيره

‏حكم الـقدر واقع ولا تنفع أعذار
‏لكن ترى .. بعض المقادير خيره

......

[الحمدان]

وعند الموادع راعها شوف الاضرار
‏وحاولت اهديّها واداري فزعها

‏قالت في حلقي عقد وايديني سوار
‏ومن بعضها ما باقي الا طبعها

‏قلت احلمي والله ماني ببوار
‏ ما مسك الا ايدي وايدي معها

‏شوق ً ورا صدري مثل واهج النار
‏ لا مرته ونة خفوق ً لسعها

......

[الحمدان]

عاشقك ما يفرق بينك وبينه
لا حشود الجيوش ولا طلايعها

كل ما مدّ شوفه غازلت عينه
نجمةٍ في سماك وراح يتبعها

......

[الحمدان]

وش يفيد السفر من ديره لديره
وانا ما اسافر الا وانت قدامي

كل ما افض سيره تنفتح سيره
ويش خليت ب اوراقي وب اقلامي

ماخبرت الزمن وقفني ب حيره
لين شفتك وزادت عقبك اوهامي

كل ما شفت حلم القاك تفسيره
انت من واقعي ولا من احلامي

......

[الحمدان]

على طاري غلاك اللي ذبحني
تذكرتك وانا اللي مانسيتك

وعلى كثر الغياب اللي جرحني
عذرتك في غيابك واحتريتك

......

[الحمدان]

ما عاد تلقى فالزمن قلب صادق
القلب واحد والولايف ثلاثيـن

راحت قلوب الناس مثل الفنادق
تستقبل الزوار لو هم ملاييـن


......

[الحمدان]

معوّض خير يا حي تهقوى في الزمان ومال
سنينك لو رقيت بعدلها يطرحك مايلها

تعلّم واعرف إن الدرب قدامك سهل وجبال
جبال تطولها وجبال بعيونك تخايلها

ومعوّض خير يا حيٍ وردت الماء بدون حبال
يطول بك الوقوف وشربة الماء ما تحصّلها

وقوفك عند راس البير مايسقيك لو فنجال
ولا ينفعك شوف الجمه اللي منت طايلها

ومعوّض خير يا حيٍ خدعك من الرجال أشكال
تشوف أشكالها وتحطها أرفع من منازلها

تعلّم من زمانك لا تصير من أجهل الجهال
ترى في كل يوم تجيك عبرة لا تجاهلها

إذا ربي وهب لك عقل تلقى في الرجال رجال
تعرف اللي يطلّع قيمتك واللي ينزلها

ترى من بعض ما يندي الجبين ويحرج الرجال
ليا ساق الميانه في نفوسٍ ما تقبّلها

ومهما شفت في صاحبك من نخوة وطيبة فال
ترى بعض السجايا كثرة الإلحاح يقتلها

معاريف الرجال ديون وديون الرجال ثقال
ليا صرت متعافي ليش تغرق في جمايلها

رصيدك في حياتك سمعتك مع طيبين الفال
رجال الطيب والمعروف بالمعروف عاملها

ولا تبدي بجاهك في مقام ما يسر الحال
ولا تشفع لناسٍ ما تنومسك بفعايلها

ليا جاتك تعذّرها مدام العذر له مدخال
ووقت الجد قول لها الصحيح ولا تجاملها

وخذ مني نصيحة لا تصدق كل ما ينقال
يجرك للنميمة لين يطرحك بحبايلها

يجيلك ناقل النمّات بهروجٍ تغث البال
سوالف في قفاك وحظك أطيب يوم تجهلها

يبرّر بالحمية والصداقة شينة الأفعال
يجمّل صورته بعلومه اللي ما تجمّلها

ولو كانت حميّه فيك رد المخطيه في الحال
ولا كان استمعها في قفاك وجاك شايلها

ترى من جاب لك ودّى وهذي عادة النقال
يحاول يقتنص من فمك كلمة لأجل ينقلها

ومثل ما قال عندك راح عنك وعند غيرك قال
وزوّد عشر فوق الكلمة اللي كنت قايلها

تجنّب مجلسه لا تجلس إلّا مع كريم خصال
تحمّل ميلته وإن ملت ميلتك يتحمّلها

ولا تصبر على الجار الردي لو هي ثلاث ليال
تضرك جيرته لو كان بيبانك تقفلها

وبيع الدار بأول سومةٍ تعرض على الدلال
ورزقك عند ربٍ كاتب اللقمة وكافلها

وبنتك لا تزوجها الردي لو هو كثير المال
تربيها على الطالات وتشوّه سلايلها

وكم من لاش يرمي خيبة ابنه فوق رأس الخال
لو إن الخال من روس الرجال ومن دلايلها

ليا منك عرفت تميّز الطيّب من البطال
وفادتك التجارب في الحياة وفي مسايلها

وكشفت الفرق ما بين الصحيح وحيلة المحتال
وتعلمت الفراسه في الوجيه اللي تقابلها

بعد هذي ترى مالك غنى عن صحبة العقّال
يدلّونك برايٍ ينقض الدعوة ويفتلها

يقولون الرجال اللي سوالفهم حِكم وأمثال
ليا من ضاعت الحيلة يدل القوم عاقلها

نصيحة واحدٍ جرّب وشاف من الزمان أهوال
يقدّم لك خلاصة هجرةٍ جرّب هوايلها



عبدالله الطلحي الهذلي

[الحمدان]

لـو كـل واحـد يجـي وده علـى وده
‏ما طال صبر العقيم لشوف مولوده

‏راعي القناعــه ليا منه الزمـن حــده
‏يرضـى بحظ ٍ ذخر جـوده و مآجوده

‏يا بيـض الأحـلام لاتمسيـن مسـوده
‏بشايـرك في نواصـي الخيـر معقوده

......

[الحمدان]

‏كنا نلوم الليالي .. والسبب منا
‏ونقدم اعذار ماتخفى على واعي

‏ثم اقتنعنا بعد طول الزمان إنا
‏خضنا معارك كثيرة ، مالها داعي

......

[الحمدان]

‏على كثر مازليت للحين فيني دين
‏اسوي ذنوب كثار واصوم واصلي

‏انا إنسان واحد عاشوا بداخلي أثنين
‏الأول مطوع ولكن الثاني امولي

......

[الحمدان]

لا تناسوا طيب راسك وانت راسك طيّب
‏وقالوا انك يوم جات الحرب مانت بمعنا

‏الله الله فالشبوح اللي ماهيب قريّب
‏الشعر يمكن يفرقنا ولا يجمعنا

‏جامل الجهال واضحك مثل ضحك حبيّب
‏لا ابتلاه الشاعر اللي مايعرف المعنى

......

[الحمدان]

‏عطاني وصاله دون قيدٍ ولا تحديد
‏بلاني بروحه ولا أنا ما تمنيته
‏َ
‏تزاينت وضعي واثرني يا رفاقه صيد
‏خذاني اسلوبه بالهوى لين صافيته
‏َ
‏جزاته على الله ليه عرضني التنكيد
‏عقب ما توثق في ضميري وحبيته
‏َ
‏تصرم حبال الوصل والحال ما به جيد
‏خذا الشوق حقه وابتلى عقب عافيته

......

[الحمدان]

‏قـالوا من انت وقلت واحد مـــن الناس
إنـسـان عــادي مـامـعـي شــي زايـد

ما امـلـك الا شـوف عيـنـي والأنـفاس
واحساس مـرهف انســجه فـي قـصايد

......

[الحمدان]

لْيا اقبلت قام يتكفكف دجا الليل
‏كل الديار المظلمة نوّرتها

‏ولْيا ادبرت غطّت جسدها المجاديل
‏بين الخلايق لو تعرّى كستها

‏إن كفّته مثل الغصون المحاميل
‏وإن فلّته قام يتثنّى تحتها

‏كنّه سبيب اللي ليا ماحت الذيل
‏راسه تعدّى راسها ورقبتها

......

[الحمدان]

ابدع هجوسٍ كنها تمر الأسعاف
والا تشابه مثل ذوب النحالي

وانا لحالي جالس اراس نفناف
في راس ضلعٍ زايدن عالجبالي

وارد قافي في عديمين الاوصاف
لباسي جنبي يوم رد السوالي

المخشي اللي وامنو كل مختاف
والشيخ صالح مثل زيد الهلالي

وابو شرف ياسعد صايح وغطراف
يادوس خصمه مثل دوس النعالي

حلف لي يحميها مزارع ومشراف
وابا ع العشه و وادي الجمالي

عند رجالٍ كنهم زكة اشراف
اهل الجمايل واهل صفر الدلالي

خل العرب كم كثرو من تحلاف
لكن مانختاف والحظ عالي

لو اعتقبنا ماحصل بيننا خلاف
يمين ماترضى بقطع الشمالي


معتوق الزبيدي

[الحمدان]

احن حن الرعد واعوى عوى الذيب
لا بات جايع ما لحق على الرعيه

على الشباب اللي مضى عقبه الشيب
واعلام كانت روحت من يديه

يا هجرنا اللي رحت كم فيك من طيب
كنت احتزم في حزام البندقيه

واليوم اسير كن في العظم تصليب
عجز يداويني حكيم (الصحيه)

بان الجفا من قريبي والاصاحيب
وذيك المحبه بعدها مكرهيه

شنيوني الاصحاب مالها تسابيب
والشيب ما هو عيب ولا خطيه


معتق الزبيدي

[الحمدان]

اليـا حـكينـا نـعرف الـزين والشيـن
وخـبل العـرب لاشـار مـا نـنتشيـره

اكـرام لكـن بالـسـوالف بـخيـلـين
ما نـجـيب ل أعـراض الأجـاويد سـيره

نـصـد لاشـفنـا خـمـال الـقريبين
صـدة قـصـير عـن مـحارم قـصيـرة


سعد المطرفي

[الحمدان]

عساالله يرحم من طلعت بعده رجال
وحط الك اسم والناس تعرف بساميها

تجمل وحصل نعم وانته ورثت المال
ورثت الك دنياًغيرك اللي تعب فيها

اورثت الك اسم لاكن بعت الاسم بريال
اسامي رجالن يرفع الراس طاريها

نصيحه تروح تغيراسمك من الاحوال
واسامي ثلاثه من بطاقتك تلغيها


مزيدبن تعلي

[الحمدان]

ماكل هـرجـه عـابـره نـعـترضـها
اللي ماهي صوبك لاتلقي لها بـال

حتى لو انك عـارفـن وش غـرضـهـا
الصمت قالو من ذهب عبر الامثال

ماغيّـر نـفوس البشر عن بعضهـا
الا الحـسد ومتابع القيل والقال

واهل القلوب السود نعرف مرضـها
لو جـرة السـارق مثـل جـرة الـذال


زويد الهويملي

‎

[الحمدان]

الصيت لاصار طيّب والنبا عاطر
وقلبك بالايمان متطيّب ومتعطر

لوكان رزقك على قول العرب (قاطِر )
الناس ب اخلاقها المبسوط والمضطر

مرٍ تشين الظروف ويصفي الخاطر
ومرٍ تزين الظروف وتخرب الخُطَّر

لاتحسب اللي يمَضِّي حِجِّته شاطر
الشاطر اللي عن المنقود متشطِّر


زامل السبيعي

[الحمدان]

‏حنا على الدنيا ولو طالت ! ضيـوف
كــم واحدٍ عن عيــن غاليــه قـــفّى

الموت مايعرف مطانيـخ وضعــوف
ليا ومــره الــرب ! كفــى و وفّـــى

أسألك ياربـي وانا بـ داخلي خـوف
رضــاكـ قبـل يقــال خالد توفّــى


خالد نافل

[الحمدان]

الـمرجله مـاهي ذبيحة وتـصوير
مـا تـَرفع الـرجال ذبـح الـذبيحة

المـرجـله نخـوه و وقـفـه و تـقـدير
مـزارقاً عـلى الـسلوم الصحيحة

قـوله (نّـعم) بين الرجال المناعير
مـا حـاشها رجلاً يدينه شحيحه

من لا كسبها والعمر توه صغير
اليا كـبر تـصعب عـليه الـمديحه


نواف زويد

[الحمدان]

اللي سكت عن كلمة الحق شيطان
لو لحيته شبرين ربه حسيبه

سلّم على اللي فاهم الدين بتقان
اللي ..ملذات الزمن ماتجيبه

يمشي على السنه عقيده وبرهان
وتيار وقته بالفتن مايصيبه


سندالعريمه

[الحمدان]

عزالله ان الوقت هذا ماهوب زين
ضاعت مفاهيمه وشانت علومه

تغيرت فيه القصص والعناوين
وزادت معاناته وكثرت همومه

ابو الحصاني يظهر الصبح ويبين
والذيب في مخباه ما حدن يلومه


أبو مشعان

[الحمدان]

الصمت يغنيني عن القال والقيل
لاصار بعض القول كله سماجه

أصمت و كني مااجيد التماثيل
من خوف لا خبلن يكثر إزعاجه

صوته يلعلع دون فهم وتفاصيل
هو يحسبنك مندمج بندماجه


سعود الرخيص

[الحمدان]

طبيعة مزاج الأدمي يظطـرب ويروق
ولكن سلم البعض وأفكاره تحيّر

يبي له مع الأجواد مدح وذكر وحقوق
وهو بين يوم ويوم له طبع متغير

عسى من علاقاته بنامثل وضع السوق
إذا زان سوقه رآق وإن شان يتغير

يحصل له اصحابٍ على دقته والذوق
مثل حضرته يطب فيهم ويتخير


النجم العالي

[الحمدان]

يا وقتنا اللي على جورك معودنا
في كل يومٍ علينا سيفك تسله

وحنا على قسوتك عادي تعودنا
نصبر ولا نقبل الميلات والذله

حتى لو الحظ بالدنيا معاندنا
ناخذبالأسباب ونقاوم بحول الله


النجم العالي

[الحمدان]

جاك النذير اللي يبى ينقذك من بيت الخراب
ماجـاه احـد مير الشهـامـة جابته لك ياصبي

من نفسه يسوق العذر من نفسه يرد الجواب
فاعل يحب الخير و الاشكـال في فـكـر الغبي

الا مـصـمـل في طـريـقً ما وراه الا العـذاب
وفي بالـه انه معتبر مثـل الصحـابـه و النبي

يامسيلمة لا مـر ذكـرك قلت و الله و التراب
ماهو بـعـاد اجيـك ادور عـذر تخسي و تهبي


محيا الكسر

‎

[الحمدان]

القلوب البيض تصبر على مالا تطيق
والسبب طيب النوايا وزينات الظنون

كم دخل غيبوبة الوقت وازرا لايفيق
ابلـجٍ وقت المواقيف يكبر فالعيون

ايتضايق كل ماحسّ له صدرٍ يضيق
واستغلـّوا رحمته عالمٍ مايرحمون

والانانيةلياجات في صدر الصديق
استغل اسم الصداقة على اتفه مايكون


محمدالدهيمي

[الحمدان]

البعد عن ضوضاء المدينه والازعاج
وفراق بعض الناس للروح راحه

ترتاح نفسك من عنى كل هراج
وفكرك عن الروتين تطلق سراحه

في مرتعن ما داج به كل دواج
نسمة هواه علاج شاكي جراحه


الهاب بدر

[الحمدان]

يغنيك رب العرش عن فزعة اللاش
لا تطلب الفزعات من غير اهلها

اللاش ماحاز المراجل ولا حاش
ولا يطلع القمة يدور سهلها

عليك باللي فزعته تنعش إنعاش
ولا يرتكي للقالة إلا جملها


رحيم العالي

‎

[الحمدان]

يرقّـع عيوبـه ويتصنّع علوم الطيب
يصرّف عذاريبـه وهي مـا لها صِرفه

خَطاي يعَديبـه عنده انّه عَـدَاه العيب
حكى بالخفى حتى هَفى في شِفى جِرفه

اشوفه خروف يفكّـر انّي اشوفه ذيب
وانا شَـفّ روحي ينقطع شوفـه وعِرفه


......

[الحمدان]

اضحك مع الدنيا ترى العمر فاني
ان كان ماجاك الكبّر جايك الموت

القلب مغرافه كلام٠ اللساني
والكلمه اللي تايعه شوتها شوت

والهرجه اللي ضايعه ي الحصاني
منتّه بوياها ليا فاتها الفوت

احسب ٠٠حساباتك لغدر الزماني
ويومن على الأمتان تنقل بتابوت


حمود العطاوي

[الحمدان]

اغسل يدينك من قليل المروّه
واحذف وجوده من حياتك ودنياك

خلّك مع اللي يقدّرون الأخوّه
ان طحت هبّوا مع يسارك ويمناك

ولَمّ الشمل يصنع من الضّعف قوّه
وكن صادق النّيه بسرّك ونجواك

واللي تشوفه صح ومفيد سوّه
ودينك على الدنيا مفازك ومنجاك


علي المحنشي

‎

[الحمدان]

الصدق عنوان المراجل والامجاد
وترا البشاشه نصف الاخلاق يا سعود

في مجلسٍ دايم على الطيب معتاد
فيه الوفا والهيل والجمر والعود

عـوايدٍ ما هيب في يديننا اجداد
هذي صفاتٍ من على جدود وجدود

والطيب فعله ما غدا عند الاجواد
لو غاب راع الطيب يبقى له شهود


مقرن بن رازن

[الحمدان]

اصحابنا صارو عقـارب وحـيّات
بين الكـراهـيه وبين الحمـاقــه

مـع البعيد الهم نفـوذ وعلاقـات
ومـع القريّب يقطعـون العلاقـه

افكارهـم تمشي على كل مجهاة
حتى المنافـق ما يخلّي نفـاقه

يجيب علمٍ ما يجيبه عربسـات
لوان مالـه مع هل الطرش ناقـه


الرايد

[الحمدان]

قـلـوب الرجال اتصد ولها من الاسباب
وسيع العذر من كـلمة تـوجع الوافي

وانااللي ظربني صاحبي ظربة المشعاب
عـلى غير معنى ساقها بين الأنجـافي

وخـلاني ابعد منه واقرب من الأجناب
واسج القدم مع كل وسعه ومحرافي

لياضقت عديت الـمشاعر على مرقاب
مجالي وسيع وزحمة الناس تنعافي

‎
ابن دغيش

[الحمدان]

ان زانت الدنيا تبى تفتح ابواب
وان ميّلت مالي عليها استطاعه

والصاحب اللي بيني وبينه اعتاب
ما عدّه الا من عيال الجماعه

متخرجً من مدرسة عكف الاشناب
وعمره لو انّه دون حاجتك باعه

وضيقات صدره كنها مقطع سناب
ان طوّلت اربع و عشرين ساعه


مزيد المويس

[الحمدان]

رفيقك اللي مايبادلك بالطيب
اكوه على عرق النيا لين تسويه

خله يعرف ملزمات المواجيب
حد على الدرب الخطر لين يعطيه

اللي يبيع المترفات الرعابيب
يحسب كثير المال لازاد يغنيه

تمجدوا يامدورين المناسيب
لاتشبكون انسابكم مع شراويه


مرزوق الصبحي الحربي

[الحمدان]

بعض الصداقه كنها ذبذبت برج
برجً يجينا منه الارسال. ويروح

دونه. مسافاتً و. لافاتها عرّج
في موقعً مافيه للناس مصلوح

الحب. مايبنا على كثرت الهرج
كثر الكلام. يعل ويفتّح اجروح

وان كان حبك حيتً داخل الخرّج
منك اوراك وماحصل منك مسموح


حمود الجداعي

[الحمدان]

ياصاحبي منته عن الناس مسؤول
ولا انته بلا حاكم ولأنته بقاضي

الناس يبن الناس صاحي ومبدول
ومشاكل العالم طوالٍ عراضي

اللي يبي نفسه سنافي ومقبول
لااااااابد يستخدم نضام التغاضي

لو مانجامل كل فاضي ومشغول
صرنانشوف إن كل مشغول فاضي


ابن دغيش

[الحمدان]

عـسى بارد الجنّه وحوض النبي والحور
جـزا واحـدن مـوجـعني اليـوم فقدانه

وعسى مجلسه في جنة الخلد منبر نور
يـجـاور بـهـا رب الـسـمـوات سـبـحانه

رحـيـل الأبـو يـتـرك فؤاد الولد مكسور
بعد كان لا ضاقت لقى الأمن بأحضانه


عبدالله بن رشيد الجش

[الحمدان]

‏يا عنفـوان الصباح المشرق الباهي
طلــــي علينا وضـــوي نورنا منك

لاتنشغــل عننا وتكــــون متلاهي
والله مالـي بطاقــه ابتعـــد عنك

كيف اقدرابعد وقلبي بالهوا تاهي
وانا في الحـب ماخيبت في ظنك

وافي معك دوم لاناسي ولاساهي
وانت ياخي عسى ما نحـرم منك

......

[الحمدان]

‏تعال عطر الذوووق في طلتك فـاح
دام اجمل الساعات ساعةحضورك

مجرد اقرا حـرفك النفـس ترتــاح
والروح تستانـس بشوفـة سطورك

يا مرحبا مليوووون ياطب الاجراح
ترحيـب من قلبي يلامس شعورك

يامن وجودك يجعل البال مرتـاح
والقلــب يتغنى بلحظــة عبـورك

......

[الحمدان]

عليك الله يا الحي القديم الي سكنا فيه
سنين العمر ردتني تجول داخل اسوارك

لقيت الدار لكن ماقليت احد من اهله فيه
وفوج العج فتح بابهم وكشف اسرارك

وليت اني اشوف الناس ترجع مثل ماضيه
قسم بالله ماهلت دموعي داخل اجدارك


......

[الحمدان]

جرَبت اصدقائي في الشدايد وفي رخاااي
قليلين في الشدة كثيرين في الرخا

وخاويتهم والقلب مخلص لهم اخاااي
وهم في الحقيقة مايريدون لي اخا

فغبني على جودي وغبني على سخاي
مع ناس ماتستاهل الجود والسخا

......

[الحمدان]

عليك في منفذ الحب الحقيقي بلاغ
بتهمة انك لويت ذراع ما تلتوي

اقول احبك وانا ماقولها من فراغ
اقولها من غلا صادق ودافع قوي

لعابك العطر وانفاااسك بخور الشماغ
وضمتك جنة العااشق وحصن الخوي

اصيغ لك من حروف الشعر مالايصاغ
واحاول اروي احاسيسك ولا ترتوي

واخاف حبك يسبب لي شلل فاالدماغ
اذا احرقت نارك الماضي بما يحتوي

......

[الحمدان]

‏يجذبني اللي في حضوره مميز
ويعجبني اللي في غيابه له الشوق

شخص ٍ تفرد في حياته تميز
تنافس الأخلاق مع قمة الذوق

......

[الحمدان]

الجمايل باقية طول الأبـــــــــد
والوفاء لأهل الوفاء طول السنين

والنقاء والطيب ما هو ملك حـد
غير أصحاب النقــاء والطيبيـــن

يا صديق الصدق قدرك ما يعــــد
والأخــوة ماتغيرها السنيــــــــــن

والأسد يا صاحبي يبقــــــى اسد
والذهب مهما دفن يبقى ثميـــــن

......

[الحمدان]

‏اذكرونا بالدعاوي الصالحه
غيرها من بيننا ما هو يدوم

واتركوا بعض الوجيه القالحه
كل واحد منّنا بيجيه يوم

......

[الحمدان]

ماجمعنا الحظ بالمركب سوا
لكن . الارواح . ضمة . بعضها

لو حرمنا الوقت والظرف التوا
المشـــاعر . ماتاثر . نبضــها

هكذا العشاق لو طال النوا
ماتبدل. الولا . في . حظها

يابعد آهات. ماغيرك . هوا
عهد والابيات يثبت ومضها

......

[الحمدان]

‏يغيرني اسلوبك ماغيرني الوقـــت
ان جيتني مسموح وان رحت مسموح

عليك في صدق المشاعر تفوقــت
ومعاك شفت الصمت يغني عن البوح

اشوفك اول راحتي لاتضايقــت
ايام كنت النبض والقلب والروح

لاغبت عنك تقولي وينك اشتقـت
واليوم ماني في معاتبك مصلوح

......

[الحمدان]

من وين لي ناصح يوافقني الراي
مخالفيني كرهوني النصيحة

كم جيتهم لاجي ثر الخوف ملجاي
واهديت نفسي للسيوف الصريحة

اقفي من الحاضر مأمّل في الجاي
واعود من عنده بحجّة جريحة

رايي ضعيف، أدري به تخيب دعواي
مغير ما بحته لذي يستبيحه

بل عادني دونه وما دونه سواي
لا العالم بكفّة فكفّي رجيحة

والقى العواصف ماهي تثير شكواي
بالعكس اقول لريحها حي ريحه

يا شفّ عنّاني وحمّلني اقصاي
وأخفيك لكنّ القصائد فصيحة

بارضيك أنا في وقت يا كاسب ارضاي
ما فيه غيرك يستفز القريحة

حاتم السقاف
اليمن

[الحمدان]

من راقب العالم يشوف التعاجيب
ومن طاول الدنيا يشوف الغرايب

لا كامل الا وجه من يعلم الغيب
ولا رابح الا اللي من الذنب تايب

......

[الحمدان]

من عف كف ومن تألم تعلم
ومن عاش بالواقع ترك كل الاحلام

ما يندم الساكت كثر من تكلم
ولا يامن العاقل صواديف الايام

......

[الحمدان]

انت الوحيد الي له القلب منصاع
‏غـصباً على راعيـه ! بالحب ناوي

‏تبعك قلب .. وصاحبه ما هـو تبّاع
‏من شان وصلك جاك هاوي وغاوي

‏تكفى ويكفيني من العمر ما ضاع
‏حافظ على قلبٍ هقى بك هقاوي

......

[الحمدان]

‏من يوم خيبوا بعض الناس ظّني
‏زادت طموحاتي ثقه ما تلاشت
‏
‏خسرت بعض الناس يمكن لآني
‏أخلاقي ، مع رغباتهم ما تماشت

......

[الحمدان]

مـن اتعبه صمت الجـفا لا ينـادي*
أصعب شعور إن قيل صوت الغلا خاب

والقلب الأبيض بـ الزمان*الرمادي
يشبه ضياع الحـق في وقـت كـذاب

......

[الحمدان]

‏في ذمتي ماهوب معجزني الرد
أنا اعتبر صمتي جزء من كلامي

صدّي عن اللي ما يبادلني الود
شيمه لنفسي واحترام لمقامي

......

[الحمدان]

انّ جابها الله والمشاعر سليمه
يبغى لها حمد وشكر وتسبيّـح

وان ما كتبها الله فلا به هزّيمه
حنا بشر نحتاج ونقوم ونطيـح

ولنا مع الايام ذكرى أليمـه
ولنا ليالي من سعدها مفاليّح

......

[الحمدان]

‏⁧ الحياة⁩ :
‏
‏دنياً توضح لك و تكشف لك دروس
‏ودروسها منها اللّبيب إيتعلّـم
‏
‏بتعلّمك لين تغـدي كنّك القوس
‏لاكن قبل ما تلتفت لك تـولّـم

[الحمدان]

‏( الرجل ) لا جاته ( الزلّه ) يشوم و يَدْمح
‏ما جهل هذا الكلام إلا ضعيفٍ ( جاهل )
‏
‏لا ( تردى ) ثـم تجينا بعدها تستسْمح
‏التسامح طبعنا بس أنت ما تستاهل

......

[الحمدان]

اقهري من لا يحبش يالغلا وابتسمي
‏و افرحيني و العواذل مادرينا عنها

‏قسمش من الزين فوق الوصف وانا قسمي
‏بسمةٍ ماشيف في ذا العالم أجمل منها

......

[الحمدان]

طبعي اجنّب عن الناس و اصد
لا شفت مالا يستحق اهتمامي

في ذمتي ماهو بمعجزني الرد
انا اعتبر صمتي جزء من كلامي

لكن عندي كل حاجه لها حد
قبل توصل هيبتي و احترامي

صدّي عن اللي مايبادلني الود
شيمه لنفسي و احترام لمقامي

......

[الحمدان]

نعطي ولا نتبع عطانا بالاقوال
ونبذل ونسكت وكننا ما عطينا

ان باعو الشيمة بدينار وريال
حنا دخلنا سوقها واشترينا

......

[الحمدان]

‏القلب مايمشي .. على وِد راعيه
حاولت أغصبه .. لـ المحبّه وعيّا

للحين يذكر شخص قفّى وناسيه
يبغى وصاله . . والوصل ما تهيّا

......

[الحمدان]

‏دار خلك لا غدا مايجتمع مع دارك
تشعفك من صوبه النسمه وشوف البارق

حتى لو تصلي فروضك ، وتقرا اذكارك
يسرقك طاري الهوا مثل المزوح السارق

......

[الحمدان]

بتزين واللي خالق الخلق بتزين
عندي امل بالله لو هي عسيره

كم واحد يمسي علي الهم والبين
والصبح ربي كاتب له سريره

حنا علينا الفعل ونزيده يقين
نومن بحكم الله شره وخيره

اقدارنا كتبت على لوح واجبين
والي كتبه الله عسى يكون خيره


......

[الحمدان]

ان كان حبي لك هو اعظم خطاياي
ما اقول يا نفسي عن الحب توبي

اجمل خطاياي واخر حدود دنياي
واصدق معاذيري واطهر ذنوبي

نزعات روحي لك تباري نواياي
والقلب يمّك والمشاعر سعوا بي


......

[الحمدان]

يقول سعد ابن جدلان :
يالبيه ياللي هزّك الشوق يالبيه
حر الشوق يجمعنا ونرجع كما كنا

ويقول عبود ابن سعد ابن جدلان :
يالبيك مادمت اقدر اقول يالبيك
وانا قبل اعرفك لا اتواطى ولا ألبّي

[الحمدان]

ماعاد في درب المحبين مصلوح
يكفيني اللي ماتقبل فؤادي

كنت أحسبني في معاليقه الروح
لين أكتشفت إني له أنسان عادي

أبطيت في دربه وأنا أعود وأروح
لين أحترقت وصرت أنسان هادي


......

[الحمدان]

جتني تدوش الوطا عنقاً سحاويه
الصبح قدامها والليل خالفها

غيداً تواصيفها ….. ماهي بعاديه
تمشي على كيفها محدن تنكفها

ماعندها لـ القلوب الخضر ماويه
تدوشها بالتغنج لين .. تتلفها


......

[الحمدان]

غضي بزينك لا يشوفونه الناس
اخاف ترفات البني يحسدونك

حطي يدينك فوق خدك ولاباس
زين الحيا كله بنظرة عيونك

نوره وفيك ومن الغلا قلب وحساس
ليل الشعر توه يغطي متونك


......

[الحمدان]

ياسالم اسلم وسلملي على نوره
وزود سلامي على مركوز الانهادي

ابو قرون على الامتان منثوره
من فوق دمث النحر يازين ورادي

والخد براق صيفٍ ..اشرق بنُوره
وشوفة لطيف الحشى تكفي عن الزادي

لعل دار سكنها.. الزين معموره
ويستر عليها الولي من كل حسادي


......

[الحمدان]

انا البارحه مابين لوعه وضيقة بال
سقا الله ليال الونس وابن ادم مشقّى

يبا يعرف الحرمان والوجد والغربال
من يحب له مزيونةٍ عودها مسقّى

يابولبةً من فوقها الجادل الميال
ما خلاّ غرامك للعذارى ولا بقّى

......

[الحمدان]

عن عُمق وَصف حدّة الرمش
عند الشعّار :

مضارب رموشها اللي (حدّها حدّ ) سيف
مكانها الصدر .. واللي غيرها فـ الطرف ،
جابر النشيرا



قالو اللي بصدرك ضرب سيف الزناتي ؟
قلت لا والله .. إلا رمشٍ ( أحد منّه ! )

[الحمدان]

‏هيه ياللي غرك الحسن و أطغاك الجمال
‏و الله ان اموت ما شفت لأوصافك شبيه
‏
‏لو يسام الحسن والتيه بجنيه و ريال
‏ما بقى في سوق غيرك ريال ولا جنيه
‏
‏كيف أهدّك للمقادير و أنتي راس مال
‏راس مال و مال و المال ما يعطى السفيه


......

[الحمدان]

الطيب قصرٍ ما تجيه العذاريب
‏والتربية هي سور قصره وساسه

‏ فمن لا تربى في شبابه على الطيب
‏ماهوب متربي ليا شاب راسه

‏
......

[الحمدان]

احلى لقى لا صار من دون ميعاد ..
‏صدفه كذا مثل السماء يوم ترعد !

‏رشة مطر : ودك بهـا دوم تنعاد ..
‏احيّت جفاف الأرض من دون موعد

‏
......

[الحمدان]

‏اعشق قصيده لاتهيض وغناه
‏واعشق تفاصيله واغني لحونه

‏هذاك لو يامر على القلب يفداه
‏اللي خذى قلبي وزلزل ركونه

‏اتخيله والقاه لو كنت مالقاه
‏واضمه بصدري واقبل عيونه

‏ ‌......

[الحمدان]

‏مادريت ان ضحكة الوقت خداعه
‏شفت مدخالي ولاشفت مطلاعي

‏لابغيت اسـج ولّا انبسط ساعه
‏دق قلبي من ورى حدب الاضلاعي

‏......

[الحمدان]

‏لو يسكت الشاعر .. شعوره ما سكت
‏عن ( ليلة البارح ) و عن موضوعها

‏في حضرة إللي : لا بكت ولّا إضحكت
‏تصنع لي أجواء نادره .. من نوعها

‏جت من غياب ومن فراقي ما إشتكت
‏و أنا أدري إن الشوق بين ضلوعها

‏عاتبتها : و إبتسمت شوي .. و بكت
‏ياحلوها .. ياحلو حتى ( دموعها )

......

[الحمدان]

عودك معزّل ومتنهّض ومفتول
اليا تعدّل رمح واليا انحنى داب

ومعنّقك فارع وزامي ومنتول
وصدرك جمع ما لذ كلّه وما طاب

......

[الحمدان]

الحُب تلميحه و تلميحته يا هي
ألذّ من كلمة أحبك مية مرّه

جاني من الحب ما يلفت تنبّاهي
و أخاف يطغى الشعور و ينكشف سرّه

شيءٍ طرح قلبي و شيءٍ طرح جاهي
و غدرٍ ماهو يغدره جساس بن مُرّه



......

[الحمدان]

لا تذي الناس ولا تخطي ولا تظلم
ترا حقوق البشر ماهي بمغفوره

لا تحسب إنك نجيت ومنها تسلم
ياويل من مات ونفسٍ منه مقهوره


......

[الحمدان]

أتعاطى مفاتنها بكل أنسجام
وكل جرعه عن الي قبلها زدتها

من حلاوه طريقة حكيها فالكلام
ودي إليا انتهت من سالفه عدتها


......

[الحمدان]

‏« المجامل »

‏يافهد ترى المجامل ما يقضي لك لزوم
‏من يساوم بك على سـوق حي الله بعـه
‏منيف الجرّاش

‏لو نواياي تستر ما انكشف من ثيابي
‏المجامل بـِ من لايستحقه مصيبه
‏محمد مريبد

‏المجامل بعض الأحيان مايقضي لزوم
‏لأبو النفس الضعيفه لأبو جدها
‏سلطان الهاجري

[الحمدان]

جيتها وانا الشجاع اللي يقول الموت وينه
ونطحتني بالعيون السود وارهقني حورها

ماهقيت السيف الاملح ينلثم من ياسمينه
لين عنت خيل فتنتها علي والله نصرها


......

[الحمدان]

فيك من لطف الفقير وفيك من طبع الإماره
يا الهنوف اللي .. يعزز زينها قوة نسبها

الجمال اللي جمع بين البداوة والحضارة
صبه الله .. والله الي في مفاتنها وهبها

العيون تشن غاره .. والرموش تشن غاره
وإن تفاديت العيون الموت من طعنت هدبها


......

[الحمدان]

‏رتب حديث النفس قبل المخارج
‏واكتب ردود الفعل بوجيه الأحباب !

‏لا تكتب إحساسك على قول دارج
‏عمر الزمن ما خلد شعور ، كذاب⠀
‏
......

[الحمدان]

ما عادت الأيام هي نفس الأيام
ولا عادت الناس الحبيبه ، حبيبه
ٰ
احتار فكري ، قبل تحتار الأقدام
الدرب موحش ، والمشاعر غريبه


......

[الحمدان]

تعال دام الليالي عمرها بدري
خلّ القلوب النظاف تعيش ملتحمه

ما والله أعطيك غير اللي ورى صدري
قلبٍ يحب الهدوء و يكره الزحمه


......

[الحمدان]

‏وأنت من كلّ الدروب السانحات، وعمري
‏جعل روحي فدوة أيامٍ معاك أبغاها

‏ما درى قلبك عن التغريب؟ ليته يدري:
‏عن مساري غيمةٍ؛ جرْد القصِيْد أغراها

‏يوم أغني فالسّنين الماضية من عذري!
‏كانت أيَّامك -يا أبو وجهٍ جميل- أحلاها


......

[الحمدان]

على الزعل والضيق حنا كبرنا
ما عاد في اشياء تستاهل الضيق

واذا اعتزلنا الكلّ محدٍ جبرنا
العزله أصدق من وجيه المخاليق

حتّى على صدّ الحبايب صبرنا
الحلم لولا الصبر مافيه تحقيق

من كثر خيبات الحياه اعتبرنا
العمر لحظة واليالي توافيق


......

[الحمدان]

يا كثر ما نسمع من الناس لبى
ويا كثر ما نسمع مقولة فديته

وإلا الصحيح إليا انكشف ما تخبى
بـ تشوف شي يصدمك ما هقيته


......

[الحمدان]

‏تقولين من قدي ليا قلت فيني بيت
‏وأنا أقول بيتٍ ينكتب فيك من قدّه
‏عبدالله السراهيد

‏يشوفها الشاعر اللي مبطي من الجديد
‏ويقوم منها .. وهو مليان صدره شعر
‏هداج

‏أنا الهايم الّلي كل ما أوشك على الإفلاس
‏أجيك ويديني خالية .. وارجع بـ دُرّة
‏بندر الدويش

[الحمدان]

‏ضيدان بن قضعان يقول في وصف محبوبته ابيات توقفك من الذهول والانبهار :

‏عليها يشبهون أغلا الذهب واللول والمرجان
‏وهي ماتشبه إلا ماتشوفه في مرايتها

‏أنا لو شفتها مهره لها فوق السحاب عنان
‏متى ماهب ذعذاع النسيم تفل غرتها

‏ماشافوا المترفات أحلى وصوف شافها ضيدان
‏من الغيره عيون غمضت وعيون شافتها

[الحمدان]

‏اللي يـحـاول يـسـتـفـزك بالكلام
‏ضحّك عليه الناس لاتضحك معه

‏وإن قال هذي من ميانه واحتراااام
‏قل اذكر الله واسمع العلم اسمعه

‏بعض العلوم اخف من ريش النعام
‏لا فرّقت شمل ولا هيب مجمّعه


......

[الحمدان]

‏حاول توازن بين عقلك والإحساس
‏وعيش الحياة اللـي تبيهـا لـذاتـك

‏إن كنت بتوّقف حياتك على الناس
‏بتمـوت مـا سويت شي بحيـاتـك


......

[الحمدان]

‎بعض البشر لو غاب له يوم ؟ يُفقد
حتى .. ولو إنه .. عن القلب ماغاب

يصحى على خير وعلى حُب يرقد
ويشوف كل الناس في عينه ‎أحباب


......

[الحمدان]

قالوا خويك منهو اللي تخاويه
قلت الاخوه عارف وش مداها

اخاوي اللي ما تغيرّ مباديه
واسـرارنا فالعمر بير وغطاها

يفهم مبادي نظرتي قبل حاكيه
يعني قبل لا اقولها له قراها

ترى الخوي الصدق من طاب طاريه
له وقفة جعل الخلايق فداها

......

[الحمدان]

‏لولا الغلا محدٍ شكى بعد وفراق
ولولا الوفا ماللمواثيق قيمة

كم من سجينٍ ينتظر عفو وإطلاق
إلا سجين الذكريات القديمة


......

[الحمدان]

‏غلاك في قلبي مـعـتّق من سنين
ما يوصفه كاتب و راوي و شاعر

توارد الافكار بـين الملايين
ومن بيني وبينك توارد مشاعر

......

[الحمدان]

ﻛﻨﺖ ﺃﺣﺴﺐ ﺇﻥ ﺍﻟﺮﻭﺡ ﻣﺎﺑﻌﺪﻫﺎ ﺭﻭﺡ
ﻭﻻ ﻓﻴﻪ ﺭﻭحاً ﺣﺒﻬﺎ ﻣﺜﻞ…… ﺭﻭﺣﻲ

ﻭﻋﺮﻓﺖ ﺇﻥ ﺍﻟﺮﻭﺡ ﺗﺮﺧﺺ ﻷﺟﻞ ﺭﻭﺡ
ﺭﻭحاً ﻏﻼﻫﺎ ﺯﺍﺩ ﻋﻦ ﺣﺐ ﺭﻭحي

......

[الحمدان]

إن قالو لأجل عين تكرم مدينه
ماني بقايل لأجل عينه تكرم مداين

وشهي المداين عند رمشه و عينه
إلا تطيح أرقاب و تعتق رهاين

......

[الحمدان]

حبيبتي..والشوق يزوي هدبها
‏جتني على جنح الصَبا عطر واحساس

‏جرّت عناقيد ٍ حياها جذبها
‏تقول زملوق ٍ على كفّ نسناس

‏والشفّتين … اللي تخمّر عنبها
‏تخثّرت حب وسواليف وأنفاس

‏قالت عصيّ احلامنا وش سببها
‏قلت الظنون وغفوة الحظ، والناس


......

[الحمدان]

ان تتحول العلاقه إلى رسميه مع الشخص الي كانت بينكم اقصى مراحل الميانه لايوجد اسوء منها وكأنه شخص غريب
يقول جابر النشيرا :

‏رغم الثقة تعتريني شِكّة المستريب
‏و اقول جعل الليالي بالجهل ما تدور

‏يا وجدي ان عوّد المألوف مثل الغريب
‏ذي والله الحاجة اللي تستفز الشعور

[الحمدان]

الخواطر يامعودها الكساير
ما تطيب ولا يفيد بها الجباير
.
صار صدري مثل ميدان الرمايه
في نهارٍ تشتعل فيه الذخاير

......

[الحمدان]

يحط ايده على قلبه يصبّر خاطره بـ مجار
‏وش هي هذي الدنيا على واحدٍ فقد سلواه

‏وقف صامد محد فيهم يعرف إنّه وقف منهار
‏يسولف عادي ويضحك يناقض خارجه جوّاه

‏اخذ دور إن يده بالماء وهو يدّه وسط هالنار
‏يحس اللي أحترق قلبه قبل لا تحترق يمناه


......

[الحمدان]

ما اخطي ولا ارضى بالخطا والغلايب
عزيز نفس وسلم جدي ما اخليه

واللي علي يزعل بليا سبايب
يزعل بكيفه لين الايام ترضيه

والله ما اتعب من وراه الركايب
ولا ناشدٍ عنه ولا هارجٍ فيه

عهدٍ علي ما دمت اشم الهبايب
من لا يبيني ياهل العرف ما ابيه

البال عن كثر المحاضاة طايب
كم واحدٍ شفت الغثا يوم احاضيه

من جا هلا به عد وبل السحايب
ومن راح جعل الله يسهل خطاويه


خليل بن هدلان

[الحمدان]

راحو رجاجيل الوفاء والمواقيف
اللي لهم بالوقت صوله وجوله

اهل الكرم والطيب واهل المعاريف
وليا بداء الماقف لهم وقفوله

راحوا وجوك مكثرين السواليف
ماتعرف. الواجب ولاهم بحوله

مداحت انفسهااضعاف المحاريف
رصيدها في بنك ماله عموله



ماجد النقريني
‎

[الحمدان]

والله اني ما نويتك بالردا وانت ادرا
انّي آوقف لها واعطيك حقّك وافي

المعرفة منْك علوا وانت ساري حدرا
شبحك قريّب ولا يشره عليك سنافي



العمدة

[الحمدان]

لا تشكوى من زمانٍ شكت منه شعوب
كم شبابٍ قبل حل المشيب يشيبه

سج رجلك بالبسيطه معَ بيض الدروب
والزمن لو طال عمرك لزوم يغيبه

رافق اهل العز والطيب صافين القلوب
من قرب من حامل المسك منه يطيبه

كل خطوى راس قومٍ مقدر ومحسوب
ارجحٍ دايم شبوحه ماهيب قريبه


خليل بن هدلان

[الحمدان]

عشنا على الدنيا هموم ومسرات
وعرفت من كثرالـمحن والتجارب

اردى صداقه بين كـل الصداقات
صـداقـة اللـي لـه وراها مـأأارب

واقـوى خـيانه بين كـل الخيانات
خـيـانـة اللي معك ماكـل وشارب

واقسى عـداوه بين كل العداوات
لاجـا عـدوك واحـد مـن الاقارب



مهنا السعدي
‎

[الحمدان]

يااهل العلوم اللي تجي بالقفيا
من شذبة العرقوب وش تستفيدون

ياجعلكم فدوه رجال الحميا
حيث انكم بالحقد من دون في دون

صارت خباثتكم تبين كذيا
واشوفكم في كل مجلس تزيدون



بدر الجميلي
‎

[الحمدان]

ياصاحبي لاتحاول تفحص اخلاقي
فحصني الوقت لاحولٍ ولاقوه

وان كان قصدك مغير اتغلّق الباقي
ماعاد تلزم معك رفقه ولاخوه


حمدان العصيمي

[الحمدان]

لحقني من ظروف الليالي ما جاني تو
ولالي من صدوف المقادير مجزاعي

عليهم وجودي وجد من ضعف عقب القو
طواه المرض والكبر والصيب قطاعي


......

[الحمدان]

أنا لي مزاجٍ كنه العود و الكبريت
أداريه من لمس البشر و احتكاكاته

أقاديه قود الورع لا أقبلت ولا أقفيت
أنا كل ما أكبر يوم تكبر مطماته


......

[الحمدان]

‎صبرنا على ماجابه الوقت زين وشين
‌‏ولا حطمت صكات بقعاء عزايمنا
‌‏
‌‏نحشم الرفيق ولا طردنا ورى المقفين
‌‏وعلى نخوة الناخين نحذف عمايمنا


......

[الحمدان]

‎كل شي تقدر تشتريه بحلالك
‌‏الا دوام العافية والرجولة
‌‏ٰ
‌‏الموت ماينشدك عن كثر مالك
‌‏والمجد ماتقدر بكذبك تطوله


......

[الحمدان]

نورك على رزنامة أيامي السّود
طاغي .. لو ستار الحياة يتسدّل

ماني مبشّر بالعوض وأنت موجود
أنت الأصل جعل الأصل ما يبدّل

......

[الحمدان]

جوّعت طيّرك ليه ياراعي الطيّر
ان كان ماله معك معلاف هدّه

فُكه وخلّه يطلب من الله الخير
لا تربطه مافي رباطك مـــــودّه

ولا ترى مافيك نقصٍ عن الغير
وان طار طيرك من يدك لا تعده

دبّر عشاه و سو مثل الصقاقير
تراه حـرّ ادنات شيٍ يسدّه


......

[الحمدان]

‏من لايثمن جيتك لانصيته
أحذر تحث خطاك يمه وتنصاه

جنب طريقه لاتجي يم بيته
خله على يسراك ومش وتعداه

للي ليا منك نصيته وجيته
يشوش ويرحب ويضحك محياه

أتلى العهد بالهم ساعة لفيته
الله يطول عمره وعمر شرواه

مسفر حزام السبيعي

[الحمدان]

ترى ابن عمك لو تغيّر با الاطباع
إليـا تـردى با الـردى لا تجاريـه

لا تنهشه لا غاب لو كان ما طــاع
هذا لحمـك ولو غلط لا تجـازيــه

الذيـب مـا يـأكـل جنوبه إليا جاع
ولا يأكل الحرجه لو الجوع حاديه

يلقى عليك مـن الرياجيل مهـزاع
لا صار ابن عمـك ودمـك تعاديـه


الهاب بدر

[الحمدان]

‏الطيب ماهو بالصور والسنابات
الطيب بالافعال يامدور الطيب

طبع الكريم اللي على قوله إثبات
سمح النبا ماغاب وقت المواجيب

تلقاه بالفزعه نهار الصعيبات
له رايةٍ بيضاء حصان الأطاليب

ولاخير باللي في لياليه شمّات
اللي عليه الناس تلقى العذرايب

......

[الحمدان]

‏كل خطواتي طواريك .. أنا مالي مكان
‏ذكرياتك فوق قلبي تغني و اتعزف

‏ما نبت في الجفن رفّه ولا فالقلب أمان
‏لين صرت أدوّر الشوف تدوير الصدف

‏صرت أنا والضحك عقبك على طول الزمان
‏الفقير اللي ليا جاته المدّه .. حَلف


......

[الحمدان]

‏كيف حال اللي من أشياء الشعور قريّب
‏وين بلقى لي جوابٍ صدق دون إحراجه

‏الملامح لو تغيّر والشعر لو شيّب
‏ما تشيب الذكريات ولا تغير حاجه

‏والله إن حالي يطيب أن قالوا أنّه طيّب
‏لو* تمر* أيامنا حتى بدون مواجه


......

[الحمدان]

اما عن الاماني :
‏تمنيت شي وقدر الله شي وصار
‏ولا لي سوا وجه الرضى لو تصنعته

‏
وأما عن الخيرة :
‏انا هقيت ان راحة العبد فيما اختار
‏واثر خيرة المولى لـ عبده مسنعته

‏
وأما عن العزيمه:
‏نطحت الزمان بقوة العزم والاصرار
‏ولا اقول طوعني ولا اقول طوعته

[الحمدان]

البلوك اللي يمر المعترض والسامج
‏ يمكن نشيله وننسى كل شيٍ سلبي

‏لا تفكر في بلوكٍ جاك من برنامج
‏خاف والله من بلوكٍ يحذفك من قلبي


......

[الحمدان]

‏مديد البال حبي لك مثل صبري طويل البال
‏احبك .. و المحبه ليتها ما فتحت عيني !

‏على قلبك و قلبك بيني و بينه كثير أزوال
‏حَكم حكم الزمن لموالفك تسبق شراييني

‏تشفق لك عيون وروح و ضلوع و شعر وأمال
‏تموت منطق لساني و تحييّ ربكه يديني


......

[الحمدان]

‏شعوري " الليله " شعور البدايه
‏بين القديم من السكك والمنازل

‏شعور من يبغى الرضا والهدايه
‏و يواجه انواع الحيل و المهازل

‏غرغŒب ماله من ورا الناس غايه
‏وبينه وبين " الواقعيه " عوازل

‏راحت حياته ينتظر .. ' و النهايه
‏يوم اقترب من كل حاجه تنازل


......

[الحمدان]

وقت الرخا كل الرفاقة مطاليق
‏وفي ساعة الشدة ياقل الجماعة

‏ياخوي من وقف معك حزة الضيق
‏احفظ وداده مثل حفظ الوداعة


......

[الحمدان]

لي على الطاعــة وديــن الله نشا
‏يلقـــى الغنيمة والمثــوبة والأجر

‏يودّع اهمومه ليا صلى العشا
‏ويستقبل ارزاقه ليا صلى الفجر


.....

[الحمدان]

أغراب والدنيا مثل صالة مطار
‏والنـــاس فيها قادمة ومغادرة

‏وأنا مسجـل في سجل الانتظار
‏ مدري متى يبدأ صعود الطائرة


......

[الحمدان]

أشوف بعض الناس مثل الجريده
‏فـي كل يـوم ٍ للمـلأ جايـب اخبـار

‏شـيٍ يـحـرّف بــه وشـيٍ يـزيــده
‏لـه نـشـرةٍ يـفـرح بـهـا كـل هـذار

‏يبحث عـن المستور وده يصيـده
‏شـفّـه ومطلوبـه إعـلانـه للأسـرار

‏الله يوقّــف مــا جـرا فـي وريــده
‏وتشخيص ماصابه به الطب يحتار


......

[الحمدان]

‏ليت رد الجمايـل مثل رد السلام
‏لكن الله جعلهـا مثل دين وقضاء

‏كنهــا في يمين اللاش برد وسلام
‏وكنها في يمين الحر جمرة غضا


......

[الحمدان]

‏لا تقتل المتعه ولا تخنق النــاس
‏واذا خسـرت ارضا بقل الخساير

‏تعاملك لاصار من دافع إحساس
‏يعلمك وشلــون تسمو الضماير

‏مشاعرك لو تكسرك ألف لا باس
‏الصــبر صبحٍ في ضحاه البشاير


......

[الحمدان]

حب البشر والكُره ماهوب مقياس
‏بـعـض البشر لأنك كـفو يكرهونك

‏ومافيه أحديقدريحقق رضا الناس
‏حـتـى أنت مـاكل البشر يعجبونك


......

[الحمدان]

‏ِ
‏اليا إبتلينا في هواجيس وأوجاع
‏نضحك بوجه أيامـــنا ما شكينا

‏وليا حكينــا نمتلك كنز الأسماع
‏وليا فعلنـــا نفعل اللـــي حكينا


......

[الحمدان]

عشنا الحياه ونعرف اللاَّش والدُّون
‏شفـنا تجــــارب غيــــرنا وإتعضنا

‏لو نتعـــامل فــي وكــــالة يقولون
‏يمكن بعضــــنا مايصـــافح بعضنا


......

[الحمدان]

‏خذ مني الكلمه مـن الـراس للراس
‏دام الـعـمـر عدى ولا هــو بـراجـع

‏الجرح ماعلمني اضحك على الناس
‏الجـرح علـمني أحتـرام المــواجـع


......

[الحمدان]

‏للنّاس ربٍ على اخطاهــا يحاسبـــها
‏دوّر على اللـــي يهمّك واحسن النيّه

‏احرص على الكلمه اللي لا نطقت ابها
‏تكسب بها حســنه وتدفـــع بها سيّه


......

[الحمدان]

‏ِ
‏نوعين من كثر اختلاطي مع الناس
‏من اصعب الانــــواع طبع وغريزة

‏حاول تجنب تجرح انسان حساس
‏واحــذر اهانة شخص نفسه عزيزة


......

[الحمدان]

‏سبحان خلاق المحبه بلا اسباب
ناس لهم ف قلوبنا جاذبيه

اصدورنا تفتح لهم كل الابواب
من دون لا رخصه و دون الهويه


......

[الحمدان]

‏مغتني من خير ربي قبل خيري
‏و مكرم(ن) نفسي و لو ما أتبع هواها

‏و ما رجيت .. الحاجة اللي عند غيري
‏عندي أشياء مات غيري ما لقاها


......

[الحمدان]

‏لاطابت النفس شامت لو تلج الضلوع
لو الضما حدها صدة عن السلسبيل

من يوم ربي خلقها ماتحب الخضوع
ماروضتها الزحول اللي تهز الثقيل

صلفه عنيده سنافيه عريبه قنوع
ماهي من اللي ليا هب الشمالي تميل

عودتها في ظلام الليل توقد شموع
وعلمتها مايدوم الا العزيز الجليل

......

[الحمدان]

إن شفتني مغليك احذر من الصد
ترى التغلي درب تشتيت الاحباب

ولا يغرك ممن يقول اثقل وشد
ترى اغرب الفرقا من شور الاصحاب


محمد بن فطيس

[الحمدان]

تعال واشرب من خفوقي فناجيل
قهوة غرامك طعمها شي ثاني

الهيل حبك والوفا له معاميل
والنار شوقي وسط ذيك المحاني

دلة هوانا حب واحلى محاصيل
يسمع صداها كل قاصي وداني

يرسم غلاتك في بيوته تفاصيل
يانور عمري فيك بسمة زماني

شوفي خفوقي والحنايا مداهيل
ماريد غيرك لو يجوني ثماني

......

[الحمدان]

حبل المواصل بين الاقراب مده
ارخه ليا شدوه واليا ارتخى شد

و إنس الخطا حتى تدوم الموده
من يذكر الهفوات ما يحفظ الود


......

[الحمدان]

تشكّل البعد في صدري غياب وحنين
والشوق لا هبّت الذكرى عطاها يده

لو يعرف القلب موعد غيبة الراحلين
تغانم الوصل لا حبابه قبل موعده


......

[الحمدان]

عيش يومك لا بدى صبحه و غنا طيره
و جدد أحلامك و غلفها بصبر و دعوه

و ظن في حاضرك دايم كل خير و خيره
للتفاؤل طعم حتى لو تخيب الهقوه


......

[الحمدان]

‏لا تتلف الروح لاجل الناس ترضيها
وهم ولا يوم سووها على شانك

‏تسعدك ارواح يمكن .. ماتدانيها
‏وتجيك الاحزان من ربعك وخلانك

‏يبقى لك اللي عروق الدم تسقيها
‏ابوك و امك و اخواتك و اخوانك

‏حتى حبايبك .. لا تتعب تداريها
‏بكره حبايبك بيصيرون عدوانك


......

[الحمدان]

‏ليت النوايا مالها ستر ولباس
‏تظهر من صدور المخاليق جردى

‏اللي تظنه غير عن كل هالناس
‏بكره تشوفه مثل هالناس واردى


......

[الحمدان]

‏الناس في اول لقى ميه على ميه
‏مشكلتي اني ما أصيد الناس من بدري

‏عفوي وأعامل عباد الله بعفويه
‏واطير فيهم واقلطهم بوسط صدري

‏كم واحد تحسبه ماشي على النيه
‏وتلاحظ انك على النيه ولا تدري


......

[الحمدان]

خلقت من روس قوم ٍ نارهم حيّه
‏كرامتي لو بغيت .. ازعل تواسيني

‏لو بعض الأحلام مدفونه ومنسيّه
‏علقتها في رجى اللي مايخليني


......

‏‌

[الحمدان]

‏ماجاء ردى مني ولا جيت بقصور
‏طبعي كذا دايم مع الخلق كـله

‏لي عزةٍ تطــغى على كـل دستــور
‏من خلقتي والطيب عندي جبله

‏ياقلب من قفى عن العين معــذور
‏نفــسي عزيـزة والمقــفي تمــله


......

[الحمدان]

‏بشرّوا من يلزم الصبر ويردّه حياه
‏بالغنايم دام ربي معين الصابرين

‏ينكسر ويهل دمعه بسجدات الصلاه
‏وعند خلق الله شامخ يقول الله يعين


......

[الحمدان]

‏بعض البشر لا غاب عن ناظر العين
احـس كل الناس في الكـون راحت

وبعض البشر لوغاب ايام واسنين
مااشتاق له قلبي ولاالنفس ناحت

انا اشهد ان البعض ماله شبيهين
بافعاله اللي مثلما الطيب فاحت

غالي وحُبـــه حــل بين الشرايين
ومكانته وسط القلوب استباحت


......

[الحمدان]

‏احسبني كل ما طالت المده سليت
واثر قلبي لو يطول المفارق ما سلا

كل ما عرض خياله على بالي بكيت
آخ يا ذيك اللييييياليي ويا ذاك الغلا


......

[الحمدان]

‏يامالك قلبـي وعينـي تراعيـك
لبيت قلبي يوم هـاض بغرامـك

أحترت من زود الغلا وين اوديك
حتي عيونـي ماتليـق بمقامـك

والله لو صدري يضمك ويحويك
لجعلك فوق القلب تبني خيامـك


......

[الحمدان]

‎مهما وصلنا من تطور حضاري
مافيه أجمل من حياة البداوة

كان الإخاء بين العرب دوم ساري
واليوم بين الأب وابنه عداوة


......

[الحمدان]

لاتـردف الونّـه عـلى شـيّ مقسـوم
‏قبلك ترى مـرت عــليّه وراحـت

‏ماعـاد لي ف الحب لوعات وهموم
‏ريّحـت نفسي من العنا واستراحت


......

[الحمدان]

حنّا ولو كثْرت علينا الشواميت
‏مانسكّر البيبان طيب ومروّة

‏والا الحرامي ويش يسرق من البيت
اغلى من احساس الدفى .. والابوّة


......

[الحمدان]

يـالله تســامحنا من الــذنب كلـه
عفوك قبل ماياتي الموت والشيب

يسعد صباحك يالحــزوم المطلة
فيها ديــار معــوجين المــراكيب

واهل المتارس من حضـر ما تــزله
اصحابنا اللي يفعلوا الجمل والطيب

عند العــرب للضيف عشرين زلــه
والجــار له سبعين عند المعــازيب

والجيــد اذا اخطا غلطته ما تــذله
الخيل تعــثر فى قــوي المصـاليب

والطيـب مكسب واطرحه فى محله
والصـبر حكمــه والليالـى تجـاريب


......

[الحمدان]

‏من كثر ما طاحو من العين غالين
‏لا شفت غلطة غــــالي أصد عنها

‏أدري ليامن طاح من محجر العين
‏ما يرجع بـ عينــي ليا طــــاح منها


......

[الحمدان]

‏من كان يزعل دون سبه وحاجه ؟؟
‏جعله مهف مقيط وارشاه يتليه

‏من يطرد المقفي خبال وسماجه
‏ومن ينكر المعروف ملعون ثاويه

‏طير الرخم يعجبك نوب ادّراجه
‏والحر يبقى حر فعله محلّيه

‏مما يغث البال جاب انزعاجه
‏فقر الكريم وتايه الفكر شانيه


......

[الحمدان]

كل ٍيشـــوف إنـه سليـــم الإعتقاد
‏وإن الله الـهـادي و هـــو المهتدي

‏الـبـخل في عيـن البخيلين اقتصاد
‏والضعف حكمة في عيون الأجودي

‏وأسـهل عـمـل للفاشـليـن الإنتقاد
‏كلٍ يسـب أهـل الردى حتى الـردي

‏حتى الجـبان يصـير طـارق بن زياد
‏اليا جـلس على البســاط الأحمدي


......

[الحمدان]

‏يفيد معك القصيد اللي يهز الانام
‏ولا ارتكي لك بسجادة ودعوة فقير

‏الله يجيبك مثل جيّتك لي بالمنام
‏يوم اني امسيت في حضنك وعيّنت خير

‏والله يحللك لي بعد الوصال الحرام
‏اللي ماهو عاد هذآك الحرام الكبير


......

[الحمدان]

‏فمان الله ياحبِ وقف ما كمل المشوار
‏عرفــنا مـفرق الدربين ما يحتاج تكميلة

‏بقت بـس المعزه بيننا مـا كـن شي صار
‏وصرنا اغراب عقب الود يادنيا من انتي له

‏فمـان الله ياقصـة غـرام اصبحـت تـذكار
‏صنعها الحب في لحظة ولا كمل تفاصيله


......

[الحمدان]

‏معك كم تمنيت الدقايق تكون شهور
‏دقيقة معك عن كل ما فات من عمري

‏عطيني وعد لو كذب يشعل بصيص النور
‏وإذا قلت وينه ماطلي فيه وأعتذري
‏
‏أحبك وأشوف إن العمر في مداك يدور
‏حنيني على لقياك ما يسعفه صبري

‏عسى الليلة اللي تفرش أحلامنا بالدور
‏سماها يتوه الفجر عنها ولا تسري


......

[الحمدان]

‏يا غاية الشعر العفيف و فرحة الصدر الحزين
‏خذ ما تبي من مُنطلق الانصاف و اترك ما تبي

‏مانيب ذاخر دون رغباتك صعيب و لا ثمين
‏لك كل شيءٍ تملكه كفّي عطا و الا سبي

‏بعد عرفتك صرت أشوف المغريات بـ نص عين
‏قناعةٍ فيني و أنا ماني سفيه و لا غبي

‏و من مُنطلق الانصاف قلبي لا تبيعه مرتين
‏تكفيه الأولى يوم شيّبته وهو عاده صبي


......

[الحمدان]

‏كسر الخواطر يكسر الضلع المتين
‏تصور إنك تعيش مكسور الجناح

‏يافاتنه لو مامعك عذرٍ سمين
‏مالج معي كود الموده والسماح

‏انا خذيتك جد وانتي تعرفين
‏ان الهوا والحب مافيها مزاح

‏صوت لك بعالي الصوت الحزين
‏ماعاد فيني للمواجع والجراح

‏بنيت قصرٍ لنظروه العاشقين
‏استغربو كيف انبنى وشلون طاح


......

[الحمدان]

عتمة الليل أنا اشعر لك بكل إمتنان
‏تحت جنحك قصيدي والدموع حلفا

‏الهوى مستحيل يهزّ قلب الجبان
‏الهوى للشجاع اللي لا واعد وفا

‏والزحول العصاه أهل الفعول السمان
‏كلبوهم تحت سيف الغرام ضعفا

‏من سبايب نحيلات القدود الحسان
‏هرجهن عذب غير قلوبهن من صفا

‏وانت يا ماخذٍ روحي عيانٍ بيان
‏الكريم إن عطا يغدق و إلى اعفا عفا

‏وجهك السمح اكافح به صدوف الزمان
‏وصدرك الغض احصل به حنان ودفا

‏وجرحك بقلبي أطول عمر وأجمل مكان
‏لا محته السنين ولا امثثل للشفا

‏طفل لا فاق يطلبك الرضا والأمان
‏و إن مسحت بيدك على جبينه غفا

‏اضمحليت بعدك يالله المستعان
‏لين بانت على وجهي رسوم الجفى

‏لا تحاول تعلمني طريق الهوان
‏يا منسّي لساني من عرفتك افا

‏والله اني لا موت و مانزلت الطمان
‏ولا عبدت الوجيه ولا تبعت القفا

‏اخذ مضمون حكيَ القلب قبل اللسان
‏انا احبك ومحتاجك وابيك وكفى


......

[الحمدان]

مد صوتك يا أوّل الأحباب قبل أسريك كلي
‏واسترد العارض المنشود لين أسرق جفافه

‏يا حبيبي كل ما شدّ السحاب وسال قلي
‏من تحب عيونك من الناس وإلا من تخافه

‏مر نورِك بين تلويح الحياة وبين ظلي
‏وعشت عن بارد هواه فشرهته وأوّل عجافه

‏أتمنى ضحكتك صوتك وش أحدد وأخلي
‏الجفاف يحدني والبيد زادتني صلافة

‏إن عذرت الطاري المرار في طية سجلي
‏ما عذرت عيونك النجلاء على قل الكلافة

‏أتماهى مع ديارك فيك ترحالي وحلّي
‏لين أرجع سيرة العاشق و را جسر الرصافة

‏السنين استأذنتني والهوى صوته مجلِّي
‏والطريق اللي تعرفه زين مليت انتصافه

‏وإن هدأ صوت الكلام احتلت في دقي وجلي
‏كف صمتك ما تقدر عيشي وتعرف كفافه

‏أتكاثر نظرتك في صفحتي وأحبّ قلي
‏من قدر غيرك على قلبي ومن حَبّ اختلافه

‏في مقامك أنسج الغيمة على الغصن المدلي
‏قِل لعودك يأخذ من البارق الوسمي لحافه

‏وأنت وحدك تمنح الأشياء مقامات وتجلي
‏ما بقى إلا شاعرٍ ما بلت غيومك ضفافه

‏هات ظلك قرب أيامك اخذني من محلّي
‏شدني لين الحقايق تحتضر فيها الخرافة

‏كيف عينك تقتل الرجال ورموشك تصلي
‏ليش صوتك يجرح الأيام وأحبه وأخافه

‏شرد الأحزان ما ردّ السكون إلا التخلي
‏عاشقك قدامه سيوفك وفزعاتك خلافه

‏واترك الصوت الرقيق إن زلت الريبة يهلي
‏وأبشر بـ شعر ٍتذوب الناس في وزنه وقافه

‏والقصايد مثلما قال الرشيدي ما تسلّي
‏المهم تخلي الشاعر يمهد لـ اعترافه

‏عاد قلبك وأعرفه وأجهل مشاويري وغلي
‏لو قدرت أجوده وشلون أبي أمل ارتجافه

‏الهوى دربه طويل وحرّ شمسك جايزٍ لي
‏كلما ازداد الشعور تقل لرضاك المسافة

‏لا تحاول يا بعد كل الأحبة خاطر اللي
‏ما تلدّد في ديارك غير من كثر الحسافة

‏إن رضيت أجيك كلي وإن زعلت أجيك كلي
‏أنت ذنبٍ لو يُعاد الوقت أبي أعيد اقترافه


......

[الحمدان]

‏والله إنّي يوم أبدّي على الهرج السكات
‏تندبل كبدي بكثر الهروج وقلها

‏مبتعد عن كل زحمة بشر مجلود ذات
‏بين يا ليت الليالي ويا لعلّها

‏وسارحٍ مع ذكرياتٍ قديمة وأمنيات
‏خايف إن كبدي عليها تموت بـ غلها

‏من تركني حاير البال مهزوز الثبات
‏لا صمل يِجهز على روحي ولا بلّها

‏التشبث فيه مثل التشبث فـ الحياة
‏بس أنا حتى حياتي بديت آملها

‏ما بقى من حبه ألا بقايا ذكريات
‏ودي إنه راح كله وأخذها كلها


......

[الحمدان]

‏جعل يسقى يوم عاد الغلا صدره رحوب
‏والتواصل دلته مايوقف دولها

‏فترة فيها تمتعت بوصال الطروب
‏قبل غارات المفارق تطق طبولها

‏ماضيٍ مازال عندي مقدر ومحسوب
‏وفرجته ما تستر الحانيات خلولها

‏كل ما فلّت شعرها سترها ستر ثوب
‏لين صرت اغار لا خشها مجدولها


......

[الحمدان]

‏عط الليل فرصة من جديلك يا روح الروح
‏معك ودي إن الشمس تشرق بعد بكرة

‏انا اشفق على لبيه من صوتك المبحوح
‏لا حلّ الظلام وعوّد الطير في وكره

‏تحت عنقك الفارع ورا زرارك المفتوح
‏ما باقي عليّ إلا ألحق السكرة السكرة

‏يغنّي على شباك دارك حمام الدوح
‏واغني عليك البيت والقاف والفكرة


......

[الحمدان]

‏يقول بدر بن عبدالمحسن رحمه الله :

‏وعدت نفسي ما أجي لك وجيتك
‏من بَعدها ما عدت أصدّق وعودي.

‏
وكملها الأمير خالد الفيصل:
‏ولو ممشاي في جمرِِ يفيده
‏مشيت على جمرها كنه عوافي

[الحمدان]

اترك حـلاتك ياعزيزي على جنب
غير الحـــــلا تعجبني بزود طيبك

كلك علــــى بعضك تجنن وتنحب
حظــــي كبير اللي جعلني رفيقك

مــــاأقول غير الله يخليك يارب
ويعمي عيونٍ من حسدها تصيبك


......

[الحمدان]

عطني علومك ، وطوّلها وفصّلها
‏وترحبّ أذني وقلبي وايدي وعيني

‏وأبعد عن الأرض وأبعد عن مشاكلها
‏وصوتك عن الناس والدنيا يكفيني

......

[الحمدان]

‏اتعبتنــا المراحل واوجعتنــا الشفوف
واثقلتنــا طمــوح محققــين الهــدف

عــادها با تـزين وريت عينك تشــوف
يا قضيــة كبيــرة مـا احتملهـا ملــف

......

[الحمدان]

ياذيب لا تركن علا بعض البشر
لاضاقت الدنياء علا الله الركون

وادعه لربك يحفظك من كل شر
واخفي همومك كيف ما كانت تكون


......

[الحمدان]

دق النجر واد الحطب واشعل النار
وهـات الدلال وقــرب ألبن والهيل

وافرش على الحدباء من الزل دوار
وارفع حجاجك للرجال المقــابيل

لانا عــرب للضيف حشمة ومقدار
فلا بدا كن طلعتـه طلعة سهيـــل

نعـز الغــريـب ونحتــرم كــل زوار
وبيباننا للضيـــف تمسي مهــاليل

ولانا عــرب نفـزع على قب الامهـار
اذا صاح صايح جاته الهجن والخيل

نعين الضعيف ونحمي الجار والدار
ويأمن بِنَا الخـائف وتأمن بِنَا الحيل

ولانا عرب ما نقبـل الضيم والعــار
ولا نحـني الهامـات في ساعة الويل

وفِي العرض والمعروف مانعطي اعذار
نــوفي ولــو فيــها فعـول ومقاتـيل

طبـاع العرب ماهي سواليف واشعار
يعيشـوا لها بالحيـل من قــوة الحيل

والمــوت ما يترك من الـرجل تـذكار
الا اذا ســوى ســوات الــرجـاجيـل


......

[الحمدان]

يا ضايق الحال مهما صار لو ضاق حالك
كافح كفاح الوحوش

إيآك تصبر على وضعك وتربط حبالك
جانب كبار الكروش

او تنتظر رزق من مخلوق مثلك يصالك
انظر لـ مولى العروش

لا ضاقت النفس من بقعى ولا قلّ مالك
افتح طريقك وهوش

المال كثره غنيمه وان قلوا رجالك
قلّت عليك القروش


......

[الحمدان]

يا عيون الخلق ما عيشتي عيشة ملوك
او تظنوني مـن اهـــل الجيوب الدافيه

لا معي مشروع مالي ولا عنــدي بنوك
تحت ثوب الستر عايش وثوب العافيه

......

[الحمدان]

‏على دار الحبيب أول زمانـي
أوقِّـف مُوتَرِي حب وغصايب

أضُم ترابهـا وأحضُن هـواها
وأعدنها من السبع العجـايب

الا يـالله تعــز الــدار بأهلــه
ونرجــع مثل ما كنـا قرايــب

حبيبي وين ما حلت ظعـونك
يحل الخـير وتهـون المصايب

أشوف الخوف من دونك أمان
واسوق الموت قدام الركـايب

واطـرِز في جبين الدهر قصـة
هــوانا يا بعـد كل الحــبايب

‎
......

[الحمدان]

قالو لي إكتب قصايد حب يابو هذيل
قلت المحبه وعيش السعد لهل الريال

واحنا المساكين راحة مثلنا مستحيل
ماشي لنا فالهوى مكسب ولا راس مال

سنين من يوم فارقنا الشعور الجميل
والسعد ياالله نشوفه بس مثل الخيال

ماآظن تعشق وحملك فوق ظهرك ثقيل
وقسوة الوضع ماخلت لعاشق مجال

غبني لمن كان مثلي شهم وافي أصيل
وصابه الدين والأزمه وقهر الرجال


......

[الحمدان]

استمد الصبر من ظنك بربك
والثقه والمعنويه والاراده

بالامل ما يستحل اليأس قلبك
والقناعة منها تلقى السعاده

واعلم ان الله سبحانه يحبك
لا منع عنّك قليل اعطا زياده


......

[الحمدان]

يا شعور الشعر يا شعر الشعور
يا شـعار الـلا شعور المسـتعار

يا بحـور الـنـار يا نار الـبـحور
يـا بـخـار القار يـا قـار الـبخار

يا نـفـور الفكر يا فكر الـنفـور
يا دمار الـعـقل يا عـقل الدمار

يا سرور البؤس يابِئس السرور
يا خـيـار الـشـر يـا شـر الـخيار

يا غرور الوحل يا وحل الغرور
يا مـسار السوء يا سوء المسار

ياصدورالضيق ياضيق الصدور
يا صغـار الـكـبر يا كـبر الصـغار

يا ضمور الحلم يا حلم الضمور
يـا نـهـار الـليل يـا لـيل الـنـهـار

ياضمور الوعي ياوعي الضمور
يا غبار الـعصر يا عصـر الغبار

يا زهـور العمـر يا عـمر الـزهور
انتـهي المشـوار والي صارصار

لا عتّب يا سوء تـقدير الأمور
فات حسن الظن مافات الفطار

......

[الحمدان]

فالقلب لك حبك ولك تقديرك
لا تقحم افكارك بكثر الحيره

اهم شيتبقى وكثّر خيرك
في جانبي دون النكد والغيره

يحق لك مالا يحق لغيرك
ماظن به داعي نعيد السيره

......

[الحمدان]

‏اسهـل مفـاتيح الـقلـوب ابتسامـه
‏ واترك عيوب الناس وتموت راضي

‌‏والصمت في بعض المواقف كرامه
‏وقـد قيـل ثلثين السعـاده تغـاضـي

بقلمي

[الحمدان]

تعال يا اللي فيك هالقلب مغرم
والروح تتنفس بشوفك هواها

َالله لو تدري بشوقي وتعلم
ما تغيب عن روحي ووصلك دواها

تابع حروفي بك ولك هي تكلم
والشوق تلقى دايما محتواها

روحي ضناها الوصل يا زين تسلم
بادر بوصلك لان شوقي كواها

ليا كنت صاحي فيك افكر واحلم
وان نمت جتني صورتك في بهاها

غيرك عيوني ما تبي وانت تفهم
لان حبك صاب عيني وعماها


......

[الحمدان]

لولاك يآ بعض المخاليق لولاك
مالي لزومً يوم مريت منّا

مريت ابي عيني تملى محياك
واصبحك بالخير وارجع لاهلنا

شبحة عيون هزّت القلب نفداك
ارحم رحمك الله لآ تمتحنّا


......

[الحمدان]

ارتاح إذا شفتك مهيص ومسرور
وضبح إذا شفتك مكتم وزعلان

ياليت وانا يبن الجواد دكتور
واضل اداويك طيلة العمر مجان

قلبي احسه دوم ضايق ومهجور
ماعـد نفع لــه اي صاحب وخلان

دائم يعيش في كل اليام مجغور
عيشت فرح ماقد لقي هاش لـــلان

......

[الحمدان]

‏تري الحروف خيول لا صرت شاعر
وما كل بيتٍ ينعسف لا كتبته

وتري القصيد أنواع جزلٍ وعابر
وما كل حرفٍ تنطرب لا سمعته


......

[الحمدان]

تغاضيت عن بعض الحكي ماني بمجبور
‏تحملت منك اللي ماعمري تحملته

‏لاترسل علي القلب الاحمر وهو مكسور
‏وانا منكسر لي قلبٍ ابيض ولا ارسلته

......

[الحمدان]

ان كان لابد من الفرقى فخل الغياب
‏نختار له منزلة مثل التلاقي واسم

‏ثم وص بي ذكرياتك لا فتحت الكتاب
‏ وقلبت صفحاتها وانا حزين ابتسم

......

[الحمدان]

تكشفكم الايام يا اهل التلويّ
بكره تبين الطيّبه والرديّه

يعجبني الواضح لو إنه عدوي
واكره صديقي لا تلوّن عليّه


......

[الحمدان]

ما الله خلقني للمخاليق تبّاع
ولا اشرب الشربه وغيري سكبها

أما خذينا مطلب الروح بذراع
وإلا تعف أرواحنا عن طلبها


......

[الحمدان]

ما غير فارس الدهما ذياب بن غانم

حامي سباق الخيل ملحق هزلها

لولا بخط الرمل شيفت منيتي

بسيف ذياب قد لا بازيد زالها

ومما قال ذياب بن غانم مفتخراً

يقول أبو موسى ذياب بن غانم

أنا فارس الهيجاء بيوم زحام

أنا فارس الشرقين والغرب واليمن

وأكذب من بين الرجال حرام

تشهد لي الأبطال في ساحة الوغى

لا صار بخشوم الحراب خصام


ذياب بن غانم

[الحمدان]

يقوله فتى الهيجا ذياب بن غانم
لا عاش من يحوي الردى لا عاش

يالله يا المطلوب يا قايد الرجا
يا خالق غير السهال دشاش

يا رب لا تقطع للأجواد طلبه
يا ساقي الأرض المحول رشاش

فارقت الأنجاد العذيات وأرضها
في أرضنا كم من يتيم عاش

بالله يا غادي على متن ضامر
تقطع فيافي سهلها ودشاش

سلم على سقام المعادي وقلهم
في نجد من عمر بلاده عاش


ذياب بن غانم