فوق هام السحب ( الشعر الشعبي) على متن القوافي

[الحمدان]

‏لـو كان كلمة أحبك تختصر دربك
رددتـها بالمساء والـصبـح لعـيونـك

بس الحقيقـة غـلاك أكبر مـن أحبك
وأكبر من الشوق بين ضلوع مجنونك

....

[الحمدان]

والله إن قلبي على جيتك فرح وشفوق
وابرك من الجيّه ان جات عند حلولها

ملّ قلبٍ عن هوى الغيد ما والله يتوق
لين عيّن باشة الغيد وادمن زولها

....

[الحمدان]

أنا بدوي عشت الفخر بالبداوه
واللي سلبني فالهوى حب بدويه

أشب نار الطيب فعل وسطاوه
ماعشت عمري في رجى مدة عطيه

...

[الحمدان]

‏غلاك في قلبي يباري الشرايين
وينوب في بعض المواجيب عنها

أثر الغلا ياناس مثل السلاطين
إليا نزل في قوم يحكم وطنها

....

[الحمدان]

‏ياقلب لاشفت الزمان أستفزك
أصبر ولا تزعل ترى الوقت دوار

خلك عزيز وعز من هو يعزك
ولا تخاوي كل خاين وغدار

....

[الحمدان]

ياصاحبي خل السوالف على جنب
بعض السوالف مالها أي داعي

يبقى الكلام اللي من القلب للقلب
لاصار من يلقيه فاهم وواعي


....

[الحمدان]

‏كل البشر تخطي وترجع وتخطي
‏واللّه يحب العبد لاصار توّاب

‏بس البلا لاصرت تخطي وتبطي
‏ماتدري إن الموت مايطرق الباب

....

[الحمدان]

ياكثر ماتطري على البال واطريك
‏في ضيقت الايام لاضاق صدري

‏واللي يخليني اليا ضقت اناديك
‏اني معك عارف غلاتي وقدري

‏وانك بوقت الضيق مارخصت غاليك
‏ماهي خساره معك لاراح عمري

....

[الحمدان]

اكتب لعيونك عسى مايحسون
‏عذال حبك وانت عارف مكانك

‏اكتب عشانك والمخاليق يقرون
‏حتى مساء الخير كله عشانك


....

[الحمدان]

‏ياطير وسّع خاطرك فوق الاشجار
واصدح بزينات اللحون الجميله

لو بالخواطر ضيق واحزان واسرار
الصبر غايات النفوس النبيله

....

[الحمدان]

‏عن الغلا والذوق تبقى الوحيد انت
لك قدرك في قلبي وهيبه وهامه

اسمك في الاخلاق والطيب دونت
وانت الرفاهيه وانت الفخامه

....

[الحمدان]

‏ياضيقة الصدر وين أروح عن دربك
تركتي صدور خلق اللّه وجيتي

ماشفت فالناس مثل وصالك وقربك
تتغيرت الناس وإنتِ ماتغيرتي

....

[الحمدان]

‏يقول لامن غبت بتحب غيري
قلت الغلا حاجه تجي دون سبه

بس الكلام اللي يدور بضميري
هو فيه احد مثلك علشان احبه


....

[الحمدان]

‏إليكم مع التحية....

مع كل يوم جديد
عش حياتك قريراً
مطمئناً
موقناً واثقاً
بأنه لا أحد يستطيع
أن يغلق باباً فتحه الله لك

بقلمي

[الحمدان]

خلك مع اللي بكل الأحوال شاريك
‏وابعد عن الي لا قسى الوقت باعك

‏اللي بحاله ثم ماله يفاديك
‏لا اشرّتْ له لو هو على الموت طاعك

بقلمي

[الحمدان]

يالله توسّع خاطري دامني حي
وتجعل هناي وراحتي في صلاتي

يارب مابي خاطري يكسره شي
أبيك تسعد مابقي من حيات

بقلمي

[الحمدان]

‏اﻟﺸﻮﻕ ﻣﺎﻫﻮ ﺑﺎلحكا ﻳﺎﻟﻌﺎﺷﻖ ﺍﻟﻬﺎﻳﻢ
ﻭﺵ ﻗﻴﻤﺔ ﺍﻟﺸﻮﻕ ﺩﻭﻥ ﺍﻟﻮﺻﻞ فهمني

لاﻏﺒﺖ ﻋﻨﻚ ﺗﻘﻮﻝ ﺍﺷﺘﺎﻕ ﻟﻚ دايم
ﻭﻻﺻﺮﺕ ﻣﻮﺟﻮﺩ ﻣﺎﺷﻮﻓﻚ تكلمني

....

[الحمدان]

‏الوجه أعرفه زين ماني مشبّه
هذي تعابيره وهذي وصوفه

ماكنت أشوفه يومني كنت أحبه
وساعة كرهته وين مارحت أشوفه

....

[الحمدان]

خذني قريبك لاجفاك أقرب قريب
خذني العطا كان الليالـي ما عطن

خذني وطنك إليا شعرْت إنَّّك غريب
أجمَل شعور إني على شانك وطن

....

[الحمدان]

ضايق ومستانس وراضي وزعلان
مدري وش الي جمع الكل فيني

احيان اجر الصوت مغرم وطربان
واحيان اجر الصوت وتهل عيني

....

[الحمدان]

‏ماحد يشق القلب من غير تفكير
‏حتى الأطباء ترتجف ثم تحتار

والحب شَق الجوف من دون تخدير
وبَناء قصور بداخل القلب وانهار

هذي حقيقة قلتها صدق تعبير
وأرسلتها في جهر فعلي والاسرار

....

[الحمدان]

‏القلوب اسرار والدنيا عبر
‏والعمر لو طال تاليه الرحيل

‏والخواطر كسرها ماله جبر
‏لو يعيد الوقت ماضيه الجميل

....

[الحمدان]

الطيب والاخلاق سيماء تُعرف
في وجه صاحبها على طول مهما

بعض الاوادم قلبه انقى وانظف
من منظر السكر ومن صافي الماء

....

[الحمدان]

لو يـطول الـبعد والحيله قليله
ولو يمر الوقت من دون إتصالك

إلتقي بك في خيالي وأشتكي له
وأستمد الروح من صورة خيالك

...

[الحمدان]

‏مدري علام الناس تقسى على الناس
هذا جهل وإلا غرور وتعالي

حنا بشر والأصل من طينة الساس
لو قيل ساس الراس من راس عالي

....

[الحمدان]

‏راح يمضي هالحزن مثل ماتمضي السنين
‏والفرح له وقت ويمر ينهي المسألة

‏شفني اتظاهر بضحكة وانا قلبي حزين
‏مقتنع بان انكساري مجرّد مرحلة

....

[الحمدان]

‏علم اللي ما استفاق وعلم اللي
‏متعبٍ نفسه على قلة سناعه

‏إن بغاها باللي أحسن جيت كلي
‏وإن بغاها باللكاعه باللكاعه

....

[الحمدان]

‏إستعذت من الدروب اللي نهايتها حسافه
‏قبل ترميني ملذات الزمن في جوف غِبّه

‏ما يخاف المؤمن اللي فيه من ربه مخافه
‏مصدر الخوف الحقيقي واحدٍ ما خاف ربه

....

[الحمدان]

‏يسعد مساء اللي نحبه ونغليه
‏اللي غلبه الشوق بأول صباحه

‏احلا مساء الخير لعيون طاريه
‏واحلا مساء النور فيه انشراحه

....

[الحمدان]

‏ترى الغلا ماهو مجرد سواليف
‏شعور ينتاب الخفوق ويتله

‏يصير مابين القلوب المواليف
‏داخل صميم القلب يعرف محله

....

[الحمدان]

‏لاتوصيني ولا احتاج في حبك وصاه
‏لو ظروف الوقت دون وصلك حايله

‏الغلا لك والمحبه على كل اتجاه
‏لايهمك دام حبك بقلبي شايله

....

[الحمدان]

‏من عقب ماكانت الأيام تجمعنا
ماكنت متصور أنك تبتعد عني

شكراً على كل حاجه مالها معنى
وآسف على الأهتمام اللي بدر مني

....

[الحمدان]

‏أنا اشهد ان الذوق معروف راعيه
وانا اشهد ان الزين يغري حضوره

طاريك عندي كنه العطر لافاح
يابدر في كبد السماء شع نوره

....

[الحمدان]

‏اذا ارسَلَت تصيبنـي لهفه وشـوق
‏ويصير وجهي مكتسي بالبشاشه

‏واخش جو العشق واروق واتوق
‏حتى ولو هي حروف بوسط شاشه

....

[الحمدان]

‏كبريائي بالغلا ماهو تسلّي
‏ندرة الأشياء تغريني وابيها

‏ما أداني امتلاك الحاجه اللّي
‏كل واحد يقدر يحصّل عليها

....

[الحمدان]

‏نعيش بكرامه فالحياه وشموخ ملوك
‏لو الوقت قصر ماحسبنا لتقصيره
‏
‏عطتنا التجارب حسن سيره وحسن سلوك
‏وفي كل ميقافً مشرف لنا سيره

....

[الحمدان]

‏ماعاد فيني بقايا يانسيم الهبوب
‏الأيام ما عاد تسعد لذّة وصالها
‏
‏أعوذ بالله من موت الغلا فالقلوب
‏هذي هي الموتة اللي ماحسبنا لها

....

[الحمدان]

ماكل من غابوا عن العين ينسون
‏البعد مايرخص من الناس غالي

‏ولو إلتهينا احبابنا مايهونون
‏يبقى الغلا لو فرقتنا الليالي

بقلمي

[الحمدان]

‏ادري ان حبك خطيّه وانا عييت اتوب
‏سامح الله قلبي اللي تمادى ف الخطى
‏
‏انت وصلك ذنب واغليه من بين الذنوب
‏خصّ لامن جابك الشوق من عقب البطى

....

[الحمدان]

‏فاقده ياجعلني ما اذوق حزنه
‏والله اني فاقده حد الثماله
‏
‏اذكر انه لاجلس والناس وزنه
‏يختفون الناس واشوفه لحاله

....

[الحمدان]

‏والله ان حبك على الكبد طابعٍ له وسم
‏ووالله ان تبطي سنينه ماينزل مستواه
‏
‏انت شيٍءٍ قد بغيته وربي ماقسم
‏وانت سرٍ محتفظ به على طول الحياه

....

[الحمدان]

‏اكبر مصيبه لاتعلّقت في شخص
‏مخلص لغيرك وانت مخلص بحبّه
‏
‏تعطيه زود الحب وتاخذ لك النّقص
‏تعطيه شوق وفوق غيرك يصبّه

....

[الحمدان]

‏ليــہ اختصرت الشوق بس لعيون
‏وليه المشاعر ماتبي غيرك أحباب

‏ليه القصايد لا اوحشتني يجونك
‏گن القوافي بغيبتك جملة أغراب

....

[الحمدان]

‏لاتخفي الشوق كانك في الهوى صادق
‏خل المشاعر تسولف عن هوى قلبك

‏صارح حبيبك ترا كتم الهوى حارق
‏ماهيب صعبة تراها كلمة احبك

....

[الحمدان]

‏انكسَاري شوق وغيابكَ ملام
‏وكل نبضهَ في خفوقي تشكرك

‏لو يطول الصمَت فعيون الكلام
‏انت اخر شخص افكر اكرهك

....

[الحمدان]

‏أصد عن غيرك من الناس وانصاك
‏وأَنا ادري انك موطني لانصيتك

‏الموت ماھو صفعة الغير لرضاك
‏الموت لامن جيت لك مالقيتك

....

[الحمدان]

‏القناعة كَنز حتى في شعورك
‏إرض بالمقسوم لاتطلب مشاعر

‏وان كسرك الوقت لاتشكي كسورك
‏الكسور اصلاً بداية كل شاعر

....

[الحمدان]

‏ذكرياتك كلها ماغاب منها غايب
‏يوم قدني باتشالا جاتني مجتمعه
‏
‏كل ذكرى في وجعها مثل دمعة شايب
‏طول عمره ماهقا انه ينكسر من دمعه

....

[الحمدان]

‏شوفني رغم ابتعادك ماسليت
‏لو غصن حبي من الشـوق انحنا
‏
‏ماعطيت الحب غيرك ماعطيت
‏كيف أبعطي شي مو ملكي أنـا

....

[الحمدان]

‏حد حبي لك على حد الجنون
‏وساعتك لاغبت عن عيني شهر

‏لاتضايقني ترى قلبي حنون
‏من غرامك ماحصدت الا السهر

....

[الحمدان]

‏رافقت لي ناسٍ على الـطـيب يمشون
هـم الاصل والـطــيب هــــم الفخامه

طيب اللقـى بصدور رحــبه يــــهـلون
ومن رافـق الـطيبين يـكـبر مــقــامه

عن الكلام الشين حـشـمـه يصــدون
بعـــيونهم توصيف طبع الشهامه

....

[الحمدان]

الحیاة ادروس والدنیـا کتـب
‏ورحلة ابن آدم رفوف المکتبـة
‏
‏کل حرف من دروسه له سبب
‏وکل درس فی حیاته تجربه

....

[الحمدان]

‏ﻳﺒﻘﻰ الغلا ﻟﻮ ﻓﺮﻗﺘﻨا اﻟﻤﺸاﺭﻳـﻪ
‏ﻭﺍﻟﺸﺮﻫﻪ اﻟﻠﻲ ﺑﺍﻟﺨﻮاﻃﺮ ﺗﺮﻭﺣﻲّ

‏ ﻛﻠﻦ ﻳﻌاﺗﺐ ﺑﻌﺾ ﺍلاﺣﻴاﻥ ﻏاﻟﻴـﻪ
‏ﻭﺍﻟﺤﺐ ﻳﺒﻘﻰ ﻓﻮﻕ ﻛﻞ ﺍﻟﺠﺮﻭﺣﻲ

....

[الحمدان]

راح الزمان اللي به الناس للناس
جانا زمان الناس تكره بعَضها

مالك مكان ان كنت طيّب وحسّاس
حولك أوادم تتعبك من مرَضها

....

[الحمدان]

‏لاتخاف من المفارق تراه احيان زين
‏دام قلبي جاك ولا عرفت تعامله
‏
‏ودي بفرقاً طويله لون قلبي حزين
‏ولا وصالٍ فيه منه وفيه مجامله

....

[الحمدان]

لوسرقت العقل واحساسي وروحي
‏ولو خذيت العمر وافراحه وحلمه

‏انت اكبر امنية ترضي طموحي
‏تخلق البسمة على وجهي بكلمة

....

[الحمدان]

لهفتي تشبه شعور الابرياء
‏ في ملامح طفل يخفي غلطته

‏ جيتك بعفويتي ماهي رياء
‏ حُبك أصدق شي نفسي سوته

....

[الحمدان]

‏ماقلت احبك ولا قد قلت ما احبك
‏احب مالي عيوني وانت تسواها

‏لو تدري شكثر تعني لي تعرف انك
‏اخر امل في حياتي واول مناها

‏يا كثر احس ان بك مني وبي منك
‏روح قسمها على شخصين مولاها

....

[الحمدان]

إرتقي بالطّيب وارقى بالعطايا
وابعد اللي مايقدّر عن دروبك

دوّر اللي عينه تشـوف المزايا
ماهو اللي عينه تدوّر عيوبك

....

[الحمدان]

‏غالي ولو تخطي على القلب عاذرك
‏سو الّذي يرضيك واللّي في بالك

‏خابرني ميّت في غرامك وخابرك
‏تموت في حب التّملّك وأنا لك

....

[الحمدان]

صدمه تجيك مـن ابعد الناس تجرحك
يمكن تعديها بحسبة ثواني

لكن ل جتك مـن اقرب الناس تذبحك
عشان تنساها تبي عمر ثاني

....

[الحمدان]

بعض الكلام اللي ماتحسب له حساب
‌‏ في قلب غيرك مايمر بسهوله
‌‏
‌‏خلك مع العالم تعاملك من باب
‌‏اللي ماترضى تسمعه لاتقوله

....

[الحمدان]

ماكل مافي الصدور ياعزيزي ينقال
دام والصمت ماخيّب ظن من شاله

به جروح مع مرور السنين ماتنشـال
تستقر بالخفوق وتهز الروح وامغاله

....

[الحمدان]

‏تعبت أدوّر في مواعيد الايام
‏ساعة زمن فيها على شان اشوفك

‏مرّت سنه والعام واللي ورى العام
‏وانتَه مثل ما انتَه ظروفك ظروفك

....

[الحمدان]

‏عطني حنانك ياحبيبي ولاهنت
‏واعطيك انا ودي وصافي حنينّي

‏وعطني وعد تبقى معي وين ماكنت
‏واعطيك عمري ومابقى من سنيّني

....

[الحمدان]

لاتبعد هناك شك وغيره تروعي
خلك على عهدك الزاهر في اعماقي

آمن بجاه الغلا والشوق وضلوعي
ما زاار قلبي غلا غيرك ولا لاقي

...

[الحمدان]

‏من غلاه ونظرة عيونه عطاني
‏الوفا والشوق وشعور المحبه

‏جعلني فدوة عيونه لاخذاني
‏صوب بحرالعشق وشاطيه ومصبه

....

[الحمدان]

‏ارفق بقلبي يابعد كل مغليك
‏لاتاخذك دنياك في جو ثاني

‏ارفق بقلبً يجمع الدم ويعطيك
‏قلبي لحبك في عروقه اناني

....

[الحمدان]

‏يامساء الود والورد وشذاه
‏للجميع بدون ما اسمي أحد

‏كل شخصٍ مره الحرف وقراه
‏ياعسى وقته تباشير وسعد
‏
بقلمي

[الحمدان]

أغيب لكني اذا غبت موجود
‏في قلوب خلاني وربعي وناسي

‏الله يقدرني على الطيب والجود
‏ماني مثل غيري جحودٍ وناسي

....

[الحمدان]

‏يا اللي تناسيت الغلا مانسيناك
تصبح وتمسي وانت بالقلب ساكن

حتى ولو غبت ولا عاد شفناك
نبكي على الذكرى ونبكي الأماكن

....

[الحمدان]

‏ماني وكيل ادم على كل من خاب
من طاب طاب ومن تردى تردى

اللي يبي يزعل بلا ذنب واسباب
درب السلامه مر وإلا تعدى

....

[الحمدان]

‏ماهمني من قال واللي يقولون
‏ مادام ربي عالم بكل نيّه

‏ترى الحكي لو زاد او كان مدفون
‏مايهزني مادامت الروح حيّه

....

[الحمدان]

‏ترا طبوع الناس انواع واشكال
عمر الاصابع ماتساوت فالايدين

احدن طبوعه تبري القلب والبال
وحدن طبوعه فعلها تبكي العين

....

[الحمدان]

مع البشر لازم تكون احترافي
ميز وحاول اكتشاف الفوارق

عمر الخيانة ماتجي عند وافي
عكس الأمانة ماتجي عند سارق

....

[الحمدان]

‏ما انتهى حبك لو انه يبتدي تقصيرك
‏والله ان لك حب لايوصف ولا يتصوّر
‏
‏كيف ادور بالحياه انسان ثاني غيرك
‏وانت كل اللي عليه بذا الحياه ادور

....

[الحمدان]

لا وادعتك الكرامه وش تبي بالحياه
الناس لولا الكرامه ماعتلى شانها

واللي يحسبن وقتي ضايعً في رجاه
انا حياتي شموخ العز عنوانها

....

[الحمدان]

‏والله انك فوق ماحولك نزول
‏والله ان نفسي لقربك هاويه
‏
‏زادك الله فوق خلق الله قبول
‏من يقول ان البشر متساويه

....

[الحمدان]

‏اثر القلوب تذوب من بعد الاحباب
‏وأثر الغياب غياب وصلك وصوتك
‏
‏وأقسى جروح الوقت صوتك اذا غاب
‏وأعظم عذاب القلب لحظة سكوتك

....

[الحمدان]

‏لو جمعت الشوق في لحظة لقاك
مايساوي شوق هالكون الكبير

من غرامك ضعت في لذة هواك
ودّي أبقى معك لو عمري قصير

....

[الحمدان]

حُبِك دوايْ وفرحتي وإبتسامي
وترنيمة حروف الغزل مِن خفوقي

نوريْ بدربي وحُب طاهِر وسامي
احيا بقايا العُمّر وازهر بشوقي

....

[الحمدان]

يامدعي بالعشق والحب والشوق
عطني دليلك بالغلا والموده

الحب وصل واخلاص وشوق وحقوق
ماهو تواصل بين مده ومده

....

[الحمدان]

لامن جفاك الوقت بعيون غاليك
احذر توصلها حدود الكرامه

ان كان في قلبه محبتك بيجيك
وان راح قله مع دروب السلامه

....

[الحمدان]

مكتفي بك مابقا للناس داعي
ياعوض نفسي عن الكل وكفا

وين ما هبيت وجّه لك شراعي
أحتزم طاريك وأبحر لك وفا

....

[الحمدان]

ناس غلاهم داخل القلب ماراح
‏يمشي معك في خآفقك وين ماتروح
‏
‏سبحان من سخر غلا بعض الأرواح
‏بعض البشر تفديه لو يطلب الروح

....

[الحمدان]

ياقديمي فالمحبه ترى مابه جديد
‏مابه الا حرّ شوقٍ شوا كببدي شوي
‏
‏والله أني بين ذَا العالم وكنّي وحيد
‏سارحٍ فكري معك ياعذاب المهتوي

....

[الحمدان]

‏ياحروف الشوق بالله غردي
‏وارسمي البسمه على وجه الحبيب

‏قولي إنه بالقصائد مقصدي ‏
والحياه بخير دام إنه قريب

....

[الحمدان]

ﻳﺎﻟﻠﻲ ﺑﻘﻠﺒﻲ ﻟﻚ ﺑﺤﻮﺭ ﻭﻣﺮﺍﻓـﻲ
ﻭﻳﺎﻟﻠﻲ ﺑﺮﻭﺣﻲ ﻟﻚ ﻣﻮﺍﺛﻴﻖ ﻭﻋﻬﻮﺩ

ﻋﻬﺪ ﺍﻟﻬﻮﻯ ﺑﺎﻗﻲ ﻭﻟﻮ ﻛﺎﻥ ﺧﺎﻓﻲ
ﺍﻫﻮﺍﻙ ﻟﻮ ﻣﺎﻧﻲ ﺑﻠﻘﻴـﺎﻙ ﻣﻮﻋـﻮﺩ

....

[الحمدان]

قالت العرب قديماً :

لو تجري جري الوحوش
غير رزقك ماتحوش
رزقك مقسوم وموجود
محدٍ سابقك
ولا أنت سابق احد
اللي فاتك ماهو لك
واللي لك ماهو فايتك

بقلمي

[الحمدان]

‏مساء الخير ياسيد الأدب والذوق
عسى الله ياغلاي يسعد اوقاتك

على همس المشاعر وانتثار الشوق
حروف الشعر ضاعت في متاهاتك

....

[الحمدان]

‏تعال وأسكن حياتي وافرض اسلوبك
تشيلك العين كان القلب ما شالـك

بقوم في واجبك وأعطيك ماجوبـك
وأحميك مَن عين عذالي وعذالـك

....

[الحمدان]

‏لاتقول ماشفنا من الوقت راحه
صل الصلاه بوقتها وأنت ترتاح

هذي الصراحه كان تبغى الصراحه
وهذي هي الأرباح ياراع الأرباح

بقلمي

[الحمدان]

انت دخلت القلب من خلف شاشه
واسلوبك الراقي خذاني وانا حي

أكيد لأنك ذووق وڪلك بشاشه
مثل القمر لاغاب يبقى له الضي

....

[الحمدان]

‏اليا حرمك الله من اللي تمنّاه
خيره من الله والسعد مقتفيها

واليا عطاك الله قل الحمد للّه
نعمه من الله واحمد الله عليها

....

[الحمدان]

قلبي علـى موطن عيونك هداني
حتى أمتلى قلبي مـشاعر نبيله

وشلون أمثل قلبك بشي ثاني
وأنت المثال لكل حاجه جميله

....

[الحمدان]

أبختلي في وحدتي وأترك الناس
يمكن أحصل في إبتعادي وجودي

وإذا غزاني الهم والضيق والياس
ناجيت من يسمع دعاي بسجودي

...

[الحمدان]

‏نصوم ونصلي وندعي ونرتجيك
‏رضاك مكسبنا وعفوك رضانا

‏موحدين وكلنا منك واليك
‏عساك يا غفار تغفر خطانا

...

[الحمدان]

‏أضحك وأسولف واتواصل مع الناس
‏والناس ماتدري عن اللي بصدري

‏وأخفي حزن قلبي ولا أبيّن إحساس
‏خايف عيون الناس بالضيق تدري

‏بغيت افض الصمت هوجاس هوجاس
‏ثم قلت ياصدري على البوح بدري

....

[الحمدان]

‏يشد فيني الحنين لماضي أيامي
‏ وأحن له كثر ماهو داخلي يقسى

‏ مهما تمر السنين وتمضي أعوامي
‏ مازلت مشتاق الى أيام لا تُنسى

....

[الحمدان]

‏مجنون فـي حبك ومجنون طاريك
طيفك يزور الروح في كل لحظه

أهوجس مع نفسي وكني أحاكيك
لاشفت أسمك زاد فالقلب نبضه

بالهجر قلي يالهلي كيف اجاريك
وانته ملكت طول قلبي وعرضه

سر المحبة يالغلا عند باريك
حبك مسهرني ولا اغمضت غمضه

ان قلت اداري وصلكم كيف اداريك
وانته سماء حبي وبحره وأرضه

....

[الحمدان]

جاني شعور انك تبيني وجيتك
احس باحساسك وانا في مكاني

ابعد ولكن في خفوقي لقيتك
متربع مابين ذيك المحاني

...

[الحمدان]

‏يامنتهى الذوق كلمني وخبرني
عن صحتك يا أعز الناس وأغلاها

وعن زايد الشوق طمني وبشرني
وعن المحبة بقلبك كيف دنياها

...

[الحمدان]

حبي لك أكبر من ظنونك وتخمينك
‏وأكثر من اللي على بالك ومن بالك

‏وشلون أدور على تسعة وثلاثينك
‏وأنا لي سنين أدور عنّك لحالك

...

[الحمدان]

‏اقول ياصدري من الضيق لاباس
إن مرّ في بالك لحن حزن غنّه

لازم تذوق اللي يذوقونه الناس
هذا الفراق اللي يقولون عنّه

...

[الحمدان]

بعض البشر يوزِن بلد لو وزنّـاه
والبعض مايسوى عتاب إنتقادي

والبعض لو كلمة نطقها سمعناه
‏والبعض ماحد يسمعه لو ينادي
‏
‏والبعض لو ساعة تأخر فقدناه
‏والبعض لو غاب العمر امر عادي

والبعض يدرك محتوى ماكتبناه
والبعض بـالفطرة غباء لا إرادي

...

[الحمدان]

‏نفرح اذا قمنا بواجب مع الناس
ونحزن اذا قلت علينا المواجيب

ونعيش مايعلى على رووسنا راس
ونموت لوما نقضي الطيب بالطيب

ولا نطرد المقفي ولا نهدم الساس
ولا نقبل الباطل ولا نقرب العيب

ولا باس ياناشد عن الحال لاباس
على مانت خابر يا زبون المراقيب

...

[الحمدان]

ياعيون الخلق ماعيشتي عيشة ملوك
او تظنوني مـن اهل الجيوب الدافيه

لامعي مشروع مالي ولا عندي بنوك
تحت ثوب الستر عايش وثوب العافيه

...

[الحمدان]

من يزرع الكيد لاخوانه جنى كل كيد
ومن تكبر وقع في حفرة الإنتكاس

ومن تصيد وهو ظالم يقع شر صيد
ويصبح الراس عنده ذيل والذيل راس

ومن بخل حرص في الأموال سارين فيد
ومن هدم جدر غيره ينهدم له أساس

صلوا فرزق الخلائق بين ناقص وزيد
وذكر خير الورى اغلى من زبرجد وماس

...

[الحمدان]

أماتمد ومدت ايدك طويله
ولا تنحى مالها غير الاجواد

اليد لا مدت عطاها بخيله
في رزقها لابارك الله ولازاد

...

[الحمدان]

انا بالحرف زخرفت النواسخ
بحرف الخاءجعلت الشعر منسوخ

انا شامخ على كل الشوامخ
وراسي بالسماء شامخ ومطنوخ

انا كالحيد متماسك وراسخ
وراس الخصم ابيض هش مشروخ

احب اجني عسل دوعن وراوخ
احب اقعد مع الهوجاس في كوخ

احب العز في روس المشايخ
اعاف الدهر لاشاهدت ممسوخ

اذا ماكنت فوق الفرش واتخ
تخولن واشتحط خليك مطنوخ

نفيخ الكير قالوا خس نافخ
بحرف الخاء نفخنا حرف منفوخ

...

[الحمدان]

‏المرتجي من خالق الناس ماضاع
‏والمرتجي رزقه من الناس ضايع
‏
‏لاتشتكي للناس من ضيق الاوضاع
و‏اكسَب غناة النفس لو نمت جايع

...

[الحمدان]

‏عوى الذيب ياساري وباقي الأمل يحداه
يدلك عوي الـذيب في الحل والترحال

عوى الذيب في ديرة عرب ماتعرف عواه
يسوقوا شهاب الموت ماودهم خيال

سقى الله ديار البدو لو حط صادق ماه
مرابع تعز الضيف لو اتشحشح المكيال

عزيزة على الشيبة وعندي كبيرة جاه
عساها على القوة ولا ضامها العيال

....

[الحمدان]

‏الناس من حولك يشوفوك مرتاح
ويحسدوا حظك اذا كنت رايق

مايدروا ان النفس مليانه اجراح
والقلـب من كثر المواجيع زاهق

حال البشر نظراتهم عكس ياصاح
مايشعروا باللي خفته الحقايق

يقيموا وضعك على ضحك وامزاح
ولو كان قلبك داخل الصدر ضايق

....

[الحمدان]

ان ضاق صدرك بين هم وحاجه
‏لاتبدي اسرارك على غير موثوق

‏ولو كل من يمرض عرفنا علاجه
‏ماضاعت الدنيا ولا مات مخلوق

....

[الحمدان]

يارب الأحلام وأحلامي تحدّاني
‏مالت على يدي وأزريت أحقّقها

‏ارزقني الفرحه الّلي يوم تغشاني
‏أحتاج فتره طويله لين أصدّقها

....

[الحمدان]

تطري مع السجه هواجيس وعلوم
وانا من الهاجوس ماني بخالي

ياسجة البارح ويا سجة اليوم
مدري متى يرتاح قلبي وبالي

....

[الحمدان]

‏تفاءلوا بالخير ياتيكم الخير
ماللحياه بدون الآمال قيمه

َالصبر مفتاح الفرج والتباشير
والياس مفتاح الحزن والهزيمه

....

[الحمدان]

الكلمة الزينة على الراس والعين
والثانية في صفحة اللي نطقها

المنبت الطيّب يجي منتجه زين
ولاّ الخبيثه بيّنه من ورقها

....

[الحمدان]

يارب لي في صفحتي أحباب
الطيب منهم كل الأيام عادة

افتح لهم يارب في جنتك باب
واكتب لهم في كل لحظة سعادة

بقلمي

[الحمدان]

هات الغلا والحب والصدق والشوق
وهاك الغرام اللي ندر في زمانه

بعطيك قلب ٍفي سما الحب مرموق
وعطني شعور سامي في مكانه

....

[الحمدان]

‏نلبس قناع افراحنا دون صورة
نخفي ملامح حزننا داخـل الجوف

نضحك وكن اليوم زايد سرورة
وبالصدر كتمه والجوارح بها خوف

....

[الحمدان]

بعض الحسابات أطباعها ترفع الراس
‏حشمه وشيمه والحياء مكتسيها

‏من معدن صافي كما معدن ألماس
‏نعم المربي وسبعة أنعام فيهم

بقلمي

[الحمدان]

‏توقّف ملذّات العمر بين شُرب وزاد
ولا ألذّ من صوتك إلى جا على حلّه

جعل كل يومٍ قد مضى لي معاك يْعاد
أنا مايكفّيني معك مامضى كله

....

[الحمدان]

‏من أقوى مراحل قوة الشخصية ‏تواسي إنسان بنفس الموضوع
اللي تعاني منه

‏ماكل ساكت ماعلى خاطره شيء
‏ولا كل صرخات الحناجر لها صوت

بقلمي

[الحمدان]

‏ابتسم للوقت واضحك للحياه
لايروح الوقت في هم ونكد

عيش يومك واحتسب للي وراه
من يعد الوقت يبلش في العدد

....

[الحمدان]

‌‎نسامر نجوم الليل وضوء القمر ماغاب
والأحلام ماضاعت والآمال منشوده

وتمضي الليالي والعمر والحياه أسباب
وكُلن يجازا في العمل حسب مجهوده

كبار الهقاوي باقيه في قلوب أحباب
مدام المودّه بين الأحباب موجوده

....

[الحمدان]

‏شيمة الانسان ميزان اعتداله وانحرافه
تنذره لاشافت الأوضاع ماهي مستتبه

إن عجزت إنّك ترد النفس عن شيٍ تعافه
ماقدرت تحطّ نفسك فالمكان اللي تحبه

....

[الحمدان]

‏إلا أنت خلك معي ولا تجافيني
غيرك يروح وجعله مايجي ثاني

لاصرت قريب مني وما تخليني
ماهمني من هجر قلبي وخلاني

....

[الحمدان]

‏يامحاصرني بذكرك من الأربع جهات
ماتركت لساحة البال سجه ولهوه

ارتبط وجهك مع الورد والما والنبات
وارتبط طاريك مع كل فنجال قهوه

....

[الحمدان]

ياقلب لاتحزن على اللي ماوقف
وقت الشدايد تعرف إنه قد نساك

المشكله يوم المحبه من طرف
واللي تحبه ماصدق قلبه معاك


....

[الحمدان]

ترى الحياه اللي بلا دين وأخلاق
‏حياة ذلٍ ماوراها سعاده

‏يعيش صاحبها على هم وأرهاق
‏ولوزاد ماله ماتريح فؤاده

‏ويربح بها اللي دوم للخير سباق
‏اللي عمر وقته بكثر العباده

‏ومن طيب حظه ماتشكّى ولاضاق
‏والصبر دايم له طبيعه وعاده

بقلمي

[الحمدان]

‏تكثر وجيه الناس والعمر فاني
وكم وجه من لوحة حياتي محيته

إلا انت وجهك في رفوف الثواني
من وين ما وديت وجهي لقيته

....

[الحمدان]

أحلى كلام الحب ماقالت شفاك
وأغلى عيون ٍ ناظرتني عيونك

وأحلى وعد في الحب وعدٍ بلقياك
وأغلى مراسيل المحبه يجونك

وأحلى دقايق عشتها حب وياك
وأغلى عهد في الحب والله ماخونك

....

[الحمدان]

أجمل حكاوي الشوق تسكن لسانك
‏وأغلى الدقايق كلھا يوم أحاكيك
‏
‏اللي بقوله وأنت عارف مكانك
‏لاتبطي بوصلك ترى القلب يدعيك

....

[الحمدان]

الناس ماتدري وش اللي ورانا
مب كل شي داخل القلب ينقال

نعطيهم الضحكه ونخفي عنانا
نسكت ونحمد ربنا بكل الأحوال

....

[الحمدان]

عز الله انا في شدايد عرفناه
محبته ذنب ومن الذنب تبنا

يوم انها طيب ومواقف غلبناه
ويوم انها كذب وضعافه غلبنا

....

[الحمدان]

‏دلة أهل المفارق كل ساعة تفوح
بين جمرة عذول وبين كلمة خوي

كـل حاجة مع الأيام يمكن تروح
غير حبٍ تربع في ضلوع ابدوي

....

[الحمدان]

‏ماعاد خلّيت للأشواق صوبك مرور
ماتدري إن الحبايب يُخلقون أبرياء

عاملتني بإصطناع الكبرياء والغرور
وأنا لسان الغرور وسيّد الكبرياء

....

[الحمدان]

‏قالوا حبيبك يقرا الابيات قلت إيه
وانا ادري انه فاهم ويش يقراء

قالوا قصيدك خافيات معانيه
قلت الخفى للناس لكن هو ادراء

....

[الحمدان]

‏ماحد يشق القلب من غير تفكير
‏حتى الأطباء ترتجف ثم تحتار

والحب شَق الجوف من دون تخدير
وبَناء قصور بداخل القلب وانهار

هذي حقيقة قلتها صدق تعبير
وأرسلتها في جهر فعلي والاسرار

....

[الحمدان]

هلا فيك ياروح الغلا والوله منقاد
هلا فيك من نفس ٍ من البعد مكتوفه

هلا فيك تبقى للهوى والعشق وقاد
هلا والغلا في داخلي ضاعت وصوفه

ياغاية حبيب ٍ هام بك يوم ربي راد
عرفنا الغلا منك والأسباب معروفه

....

[الحمدان]

مـن صدّ عـني قـسم بالله ماردّه
‏لو هو طبيبي وانا في حاجة علاجه

‏احـب طبع الـوفا والـوافي اودّه
‏واللي يخون العهد ماني بمحتاجه

....

[الحمدان]

‏انا كل ماجيت انتظر جيت المحبوب
‏تركني اسير الوقت وقصده يجنني

‏وهذي دروب الحب والحظ والمكتوب
‏يالله عسى المحبوب ظنه على ظني

...

[الحمدان]

ترى صدور الناس مثل المخازن
‏ياما بداخلها من الشر والخير

‏وأكبر نجاحك في الحياة التوازن
‏والصبر لاصكت عليك المقادير

....

[الحمدان]

أجعل أسمك فالمقام الأولي وأصنع مصيره
‏يوم تقسيم الفعول ويوم ترتيب الأسامي

‏حتى فالدين الصفوف الأوله غير الأخيره
‏الاجر يفرق ليا صليت فالصف الأمامي

بقلمي

[الحمدان]

‏من يماشيني على الطيب يبشر بسعده
‏يعتبر روحي بروحه ولو راحت فدى

‏ومن يماشيني بعكسه فيلزم مقعده
‏والله انه لانزل من صعود ولا بدى

‏لاعملت الطيب فاللي يعرفه يشهده
‏والردي تعمل به الطيب ويعود ردى

‏وكل من سويت به علم طيب وجحده
‏كم جميل حط في غير موضعه وغدى

....

[الحمدان]

‏ترى الغلا يعطى من الروح للروح
‏وانت الذي تسكن معاليق روحي

‏اسرار حبك دونها الصمت والبوح
‏وعطر المشاعر من غلاتك يفوحي

....

[الحمدان]

شحت علينا أشـعارنا والقوافي
‏وزادت مواجعنا على العدل و الميل

‏مـن نام منكم جعل نومه عوافي
‏وراعي الغلا معذور لو يسهر الليل

....

[الحمدان]

فارض قدرك على القلب حبك من سنين
‏المشاعر صادقه والجوارح صامله

‏والله ماشوف المخاليق كون بنص عين
‏وأنت لامريت لديت عيني كامله

....

[الحمدان]

يازين السلوم الطيبه لاغذاها الطيب
ويا شـين الـعرب لاجـنبت عن مذاهبها

بقلمي

[الحمدان]

كم ضحكة ماكانت إلا لغز للشخص الفهيم
‏وكم كذبة مشيتها من باب تفكير الكبار

‏وكم واحد بعامله بالمثل لكني عظيم
‏وكم كلمة بادلتها بالصمت وانهيت الحوار
‏
‏وكم زلة عديتها لو أنها جت بالصميم
‏وكم فعلة خليتها للوقت لين الوقت دار

....

[الحمدان]

اغليّه وسنافي ومرفوع هامه
‏ومنصى لمن لحقه من الوقت خلّه

‏كل مانصيته ما يغير كلامه
‏يبرك لحملاً مايشال ويشلّه

‏اعرف ظروفه زين واعرف نظامه
‏مايرتكي بعزومه الا على الله

‏له في محلّي كبر قدر وكرامه
‏ولي في محلّه دولة مستقله

....

[الحمدان]

لاصرت ماتلتفت في لمعة بروقي
‏فالله يجملك وأنـا الله يجملني

‏يعني لو إني عليك أموت من شوقي
‏والله ما أجيك وانت الي مهملني

....

[الحمدان]

ياللي خطفت بكل مافيك الأضواء
‏قلبك وطن عمري وغيبتك غُربه

البيـت هذا ماهو بْحاجة إهداء
‏مجرّد إنّي أكتبته دال دربه

....

[الحمدان]

حنا اختلفنا فالمشاعر والكلام
‏الوضع باين والعقول تصوّره

‏تجيني تسلم وارد لك السلام
‏مع كلمتين وضحكتين مزوّره

‏مافيه داعي للتشره والملام
‏كلن ضميره فالحياه ينوّره

‏ان جيت عينت الغلا والاحترام
‏وان رحت قلبي ماقدرت تعوّره

‏مانيب من متسولين الاهتمام
‏ان ماحصل ماجيت منك ادوّر

....

[الحمدان]

أملك من الأسلوب مالا يسرك
‏وأملك من الأبداع لاقالو إبداع

‏لاتنقض علومن علينا تضرك
‏وصدورنا ماهي ترا دايم وساع

....

[الحمدان]

سألت عنك الشوق والذوق والحب
وناديت لك في كل وقت ودقيقة

يمرني طيفك وانادي له ارحب
وانا ادري انه طيف ماهو حقيقه

....

[الحمدان]

‏مرحبا بالي حضوره سر بالي
‏له معزه وسط قلبي يمتلكها

‏الغلا له وسط قلبي دوم غالي
‏له محبه وسط شرياني شبكها

....

[الحمدان]

‏من باب الإعجاب لاتسأل عن إعجابي
‏إسألنّي تحب وبجاوبك حبيتك

‏اي والله إني عشقتك يا آخر أحبابي
‏وصديت عن مجمل الناس من جيتك

‏في وجه غيرك مسكر عيني وبابي
‏غالي وزاد الغلا يوم إني أغليتك

‏شفني ليا مر طيفك فزة أهدابي
‏وشلون لامنّك ندهت إسمي ولبيتك

....

[الحمدان]

‏اقلطي وسط الضلوع اللي تهلي مرحبا بك
والمكان اللي جمعنا قبل مدّه عارفينه

قبل نبدأ بالسلام بنظرة عيونك عتابك
والطهر والحزن واللوعات وانتي والسكينه

جابك الماضي المعتّق بالشعر والليل جابك
والحزن في كل مره يلمسك تبّت يدينه

....

[الحمدان]

‏ان قعدت تطاوع فلان وتطاوع فلان
‏ينقص المجهود والعزم والفرصة تفوت
‏
‏ارض نفسك واترك الناس يرضيها الزمان
‏العرب ماتمدح الشخص لين انه يموت

....

[الحمدان]

يهبّ فيني حنين بكل هبّة نسيم
والذكريات القديمه طارفٍ بابها

غشاني الشوق ياوجهٍ ف بالي مقيم
إشتقت لك والمشاعر حثّت ركابها

....

[الحمدان]

الهرجه اليا جتك من غير ميزان
‏أفضل طريقة ردها صد عنها

‏صدتك عنها تجرحه قدر الإمكان
‏وده يرجعها ويدفع ثمنها

....

[الحمدان]

رجل كلامه مثل ضرب الدبابيس
‏ ورجل كلامه مايجي فيه زله

‏ورجل لاجل ربعه يجيب النواميس
‏ ورجل يجيب الكارثه والمذله

....

[الحمدان]

‏رساله لي ولك....

هكذا هي الحياة
تحمل في طياتها
الكثير من الأقدار
حلم يتحقق
وحلم يتعثر
لقاء بلا موعد
وفراق بلا سبب
لا البدايات التي نتوقعها
ولا النهايات التي نريدها
وتستمر الحياة بحلوها ومرها

بقلمي

[الحمدان]

‏رسالتي لك....

لا تراقبني من بعيد
وانت تحترق شوقاً لحديثي
دع كبريائك جنباً واخبرني
كم اشتقت الي
واعدك
وساقول لك وانا ايضاً
كم اشتقت إليك
ثم
فكيف تكف الروح عن الروح
والروح في الروح تقيم
العين لاترى عيباً في روح أحبتها


بقلمي

[الحمدان]

‏ماكل بنت في المواقع رديه
بعض البنات فعولها توزن جبال

تلقى بها عفه وطبع اجوديه
واذا حكت ينصت لها الف رجال

....

[الحمدان]

‏هذي هي الدنيا متاهات وأحزان
‏كلن يدور راحته ما لقاها
‏
تبي لها صبر مع شوي نسيان
‏مع ضحكة تخفي دموعك وراها

....

[الحمدان]

آه ياضيم المواجع والسنين
ما ورا درب الهيام الا التعب

وآه ياقلبٍ سرا فيه الحنين
كيف غربني وأنا وسط العرب

....

[الحمدان]

يارب لو جيتك من الحزن شاكيك
ماغيرك انت ذي يفرج همومي

ماخاب من في ذا الحياه التجا فيك
مالي سواك انت وربعي وقومي

....

[الحمدان]

محدن عليها بسالي والحياه ماتدوم
كم وأحدن غثّته وكم واحدن سرّته

ارفع يدينك لربك من يزيل الهموم
اللي جميع الخلايق ترتجي رحمته

....

[الحمدان]

خذني من العالم المزحوم واسرقني
ياموطن افراحي وياهادم احزاني

لو العمر ينقسم قسمين صدقني
لأعطيك الأول وأحبك موت بالثاني

....

[الحمدان]

يعجبني اللي فاهم ويفهم الناس
‏وليا سالته قال ما اوحيت ماشفت

‏تقول ماعنده مشاعر ولا إحساس
‏متغابي وساكت وهو يفهم الكفت


من الذكاء احياناً تسوي نفسك غبي

بقلمي

[الحمدان]

أكتب شعوري وسط شعري لو تبي
وارسم خيالك وسط قيفان الشعر

أنت الهوى والشوق وغاية مطلبي
أنت الحياة أنت العمر أنت العطر

....

[الحمدان]

‏عن شعور التجاوز يقول عبدالله السراهيد :

‏البارحة ذكرتك وما تبسّمت
‏ يبدو علي إني بديت اتخطى

[الحمدان]

يا مساء الخير وهبّات النسيم
ويا مساء النور ونقول السلام

السعاده رزق والمعطي كريم
أسعد الله قلب من رد السلام

بقلمي

[الحمدان]

‏لو أدري إن الروح ياصاحبي تكفيك
‏أرسلت لك روحي على باب بيت

‏ولو الغلآ بالقلب ياصاحبي شيك
‏گل الغلا إللي برصيدي عطيتك

....

[الحمدان]

‏قلي صراحه عليك الله علمني
وش خافي احساسك المبهم وتاليته

كاتم شعورك وهذا اللي مجنني
لاخفيت عني شعورك لي ولا ابديته

ويش اجبرك بس حاكيني وكلمني
كل ماتقرب شعوري منك صديته

قول الصراحه فديت امك وطمني
اما سكوتك ورب البيت ما اقويته

....

[الحمدان]

‏أو ليتني طيفٍ يزورك بممساك
وأشاهِدك وأقول يانفس طيبي

بالحيل أحبَّك وأعشقك وأتمنَّاك
يشهد على ما أقول دمعٍ سكيب

....

[الحمدان]

‏انا لو ينسّيك الزمن ماني بناسيك
محبتك قصه ما اقدر اكتب نهايتها

لو الوقت يرجع قبل اعرفك وقبل اجيك
وقبل الهقاوي تنثني دون غايتها

بـ أروح انتظر ف أول مكانٍ جمعني فيك
وبـ أعيد تجربتي معك من بدايتها

....

[الحمدان]

‏ي معاتبيني راعو الظرف تكفون
الحال ما يحتاج كثر العتابي

وضعي ملخبطني ولا عنّه تدرون
ولا استطيع ابوح به في جوابي

ياالربع انا همي في الصدر مدفون
واحب اخفي داخلي كل مابي

ومن مانشد عن حالنا قلت بتهون
وغصتي بالصدر ماحد درابي

....

[الحمدان]

اسلم وسلم واخذ من شعوري ماتبيه
‏مابقى بسماء المعاذير شمس ولا قمر
ٰ
‏ودي اني ما اخسرك بس يالله ماعليه
‏خاسرٍ قبل اخسرك هقوه وفرصة عمر

....

[الحمدان]

‏أقصى عروق القلب تنبض لك أشواق
يامن غلاك بداخل القلب مالك

لا زارني طيفك تجي كل الاشواق
أكبر شعور القلب عانق خيالك

مشتاق لك مشتاق والقلـب خفاق
والروح توله يا الغلاء في وصالك

كم صاح قلبي في غيابك وكم ضاق
وفي كل لحظه ما تناسى سؤالك

....

[الحمدان]

بإنتظار الأيام إللي قالوا عنها :

بكرا تصير أحلامنا تشبه الشمس
ونصحى على جوّ الفرح والأماني

يارب

[الحمدان]

لولا عِناد الخَيل ماكان خيَّال
وما كلُّ خيَّال يروِّض عَنِيدة

[الحمدان]

الله يمسيكم من الخير بالخير
ويكتب لكم طيب الحياه وسعدها

ويكفيكم شرور الزمن والمقادير
ويرزقكم الجنه وزايد رغدها

....

[الحمدان]

يارياح الورد هبي بالسلام
واطرقي باب الاحبه باحترام

وافيضي العطر من بين الغمام
واطربي كل البلابل والحمام

وابعثي من هاتفي احلى سلام
لمن لهم بالقلب أغلى مقام

....

[الحمدان]

في غرامك طحت طيحة كسيرٍ في قليب
‏انقطع صوته وكن العرب فيها صقه

‏مدلي حبل المواصل وساعدني وأطيب
‏الهجر مافي يده غير حبل المشنقه

‏كل يوم ما يجيبك هو اليوم العصيب
‏اتحرى من بزوغه مغاييب شفقه

....

[الحمدان]

في هالزمن ياصاحبي عيش دنياك
لا لاتحاول تفهم اللي حواليك

تكشف لك الأيام من كان يهواك
ومن هو يمثل دور انسان يغليك

وناس ليا شافوا الزعل في محياك
تسابقوا من فيهم اللي بيرضيك

صعبه تلاقي فالبشر بعد فرقاك
من يذكرك بالخير لاحل طاريك

....

[الحمدان]

بعلمك وش داخل الصدر واهديك
بيت على بحر الأحاسيس موزون

يومي ليا منه إبتدا وانتهى فيك
إي والله اني اسعد إنسانه بالكون

....

[الحمدان]

مادريت أن القلوب العاشقه حسّاسه
لين من وثـق قيادي حطني في كمّه

شالني والحب ذعذع وأحتمی نسناسه
والعهد بيني و بينه ماتبور الذمّه

واحدٍ طوّع عنادي قبل أليّن باسه
والجوارح كلبوها بـ وصلتها يمه

أتجمد فوق صمته وأحترق بأنفاسه
وأتبخّر من هيامي وأنثره والمّه

....

[الحمدان]

ياوجودي كل مارحت بـ لحالي
كل قاعٍ جرهديّه غدت كنها

جفرةٍ مادوننها عِرق ورمالي
طامنه حتى الذعاذيع تدفنها

....

[الحمدان]

احبك ومن حبك خسرت اقرب الاصحاب
اذا عاتبوني فيك وعتابهم مابيه

احبك ولاتسأل حبيبي عن الاسباب
انا لو اعرف اسباب حبك قدرت انهيه


حمد السعيد

[الحمدان]

رحنا وجينا وصار الصبر مثل السلاح
‏ماعندنا كان ماطاعك زمانك طعه

‏نخاشر الطير لو انه يرفّ الجناح
‏ونسوق الاقدام ودروب النشاما سعه

....

[الحمدان]

هل السلام عليكم جايةٍ من سلام
ناسٍ تسلم علي والكره في عيونها

ترى العدو المبيّن يستحق إحترام
العله اللي عداوتهم يخشونها

وأنا لو الكره يزعجني تراه اهتمام
حياتكم لجل كرهي لا تخلونها

تعبت أعلمكم إن الحب وإلا المقام
يعطيها ربي ماهم بالناس يعطونها

يا لايمي ماعليك ولا عليهم ملام
لـ أهل المعالي طرايق ما تعرفونها

السكته اللي على رضاها يدور الكلام
بدري عليك أنت وأمثالك تسوونها

....

[الحمدان]

الشوق يكبر وقدرك بالغلا يكبر
شف ودّك اللي خذاني وين وداني

من كثر ماشتاقلك وأغليك وأتصبر
قام يتلعثم حنين القلب بلساني

أخاف أبين مدى حبك و تتّكبر
وأخاف أبين صبر قلبي وتنساني

....

[الحمدان]

ياغناة القلب يامدهل الصدر الوسيع
يوم صدر الشاعر الذرب محدً يدهله

جيّتك تكفيه عن جية العالم جميع
قافل مخرج مكانك وقافل مدخله

انت شوفك خير وامطار وسيول وربيع
وشوف غيرك مثل شوف الديار المضمحله

....

[الحمدان]

‏تمركّ العابرين وما تسلم عليك
‏إلا غريبٍ طوته الأرض بسنينها

‏قال أنت جالس لحالك تنتظر من يجيك
‏قلت انتظر نفسي اللي ما اعرف وينها

سعد علوش

[الحمدان]

جعل غصن ما يذري ولا تحته مقيل
تحرقه سود الليالي على دافورها

رفقتن ماهيب توزن من الوزن الثقيل
بيعها بأرخص ثمن لاتطاوع شورها

....

[الحمدان]

قهويت صدري من طواريك فنجال
وعيا الفؤاد يرد فنجال طاريك

فنجال شوقن يشكي الحال للحال
فنجال ماينمد إلا لمغليك

....

[الحمدان]

ابلجٍ بين الـكرامه ودول ام البهار
‏مرحباه تسابق ضيوفه بتسليمها

‏رغم فقره كل ليلٍ يقلط له فقار
‏وفيه هقوات المطاليق تاصل تيمها

‏للظفر فالرجل شاره وفي وجهه شنار
‏قبل ينوي بالعزيمه وفي تقديمها

‏لحيةٍ تكريمها العود الأزرق والوقار
‏ولحيةٍ غير ازرق الموس وش تكريمها

....

[الحمدان]

‏الصبر زين وتالي الصبر الافراج
وخلك على درب التصبر مبادر

واليا تصافق حلم قلبك بالامواج
الله على تحقيق الاحلام قادر

....

[الحمدان]

ياجافي الغصن لاتبكي على أوراقه
‏بعد البطى خل دمعك لانزل يرقا

‏خلّك مع اللي يحاول يصنع أشواقه
‏يتصنّع إن الهوى في خافقه يرقا

‏العام علمتك إن ماعاد لي طاقه
‏واليا افترقنا ترى الفرقا هي الفرقى

....

[الحمدان]

على الطريق اللي نهاياته بدايات انطلاق
‏يبدا الخيال يعيش جوه والقديم يجدده

‏خلوني اخذ راحتي وارتاح من ضيق الخناق
‏محتاج لي سجّه تعيد الراحه المستبعده

....

[الحمدان]

‏مايموت الشوق واغصانه نديه
ولايموت اسم يھذري به لساني

يشھد الله كل ماتطري عليه
تسرح افكاري وأعيش بجو ثاني

....

[الحمدان]

الله من ضيقةٍ في الصدر ما تنشكى
إلا على الواحد الحيّ السميع المجيب

أبا تذيكا عليها لو مامن ذكى
لاتنكشف ضِحكة العدا وحزن الصحيب

وإن زادت الضيقه اللي تاليتها البكى
ببكي لحالي قبل لايبكي أقرب قريب

....

[الحمدان]

يرتاح لك قلبي من بد كل الناس
فيك جذبني الشعور اللي أحبه

صعب أوصف شعوري والاحساس
كيف أوصفه مدري لكنّي أحب

....

[الحمدان]

‏طويت صفحات الهوى والتلاقي
وقلت اتسّلى واترك الجرح للوقت

والقاك في قلبي ولازلت باقي
قمت اتامل في رسايلك واشتقت

....

[الحمدان]

‏لاتوصي وأنت ماتحتاج في حبك وصايه
وين أروح ووين أوجه وأنت في كل النواحي

مايفرط فيك غير اللي معه قلة صحايه
مستحيل إنه يفرّط فيك مستبصر وصاحي

....

[الحمدان]

عن ماعجز فمي بدت فيه عيني
‏يامرحبا فيك وحكى العين مفهوم

‏خليني ازبن حضنك وعانقيني
‏اليا متى وانا زبن كل مضيوم

‏جيتك فرصة عمر جات بيديني
‏ومن لا استغلّ الفرصه يعيش محروم

....

[الحمدان]

لاتلتفت للناس وتقول قالوا
عليك في نفسك ولا تتبع الناس

وان كان هم فى غفلة الوقت مالوا
خلك جبل واثبت على مبدأ وساس

....

[الحمدان]

ليت الليالي ترجع شوي ونعيد
ذاك الزمان اللي من الهم خالي

يوم الوفا والطيب ماله مواعيد
عادة قلوب الناس في كل حالي

....

[الحمدان]

ف اعتقادي نبضة العشق الهيام
وف اعتقاد الروح له مذهب ودين

وفي عيوني نوور يرمز للسلام
لمعة اشعاعه محياك الحسين

....

[الحمدان]

يابحر لاتسأل عن اشواق روحي
ماعاد في روحي من الشوق تعبير

والهاجس اللي مايترجم جروحي
ماعاد ودي منه للجرح تفسير

....

[الحمدان]

ياحــب مالــه حــد في قلبي ولاشي له طــرف
ياحب يجري في دمي ياحب ماشي له وصوف

ياحبــي المجنــون يامــن كان قلبي لك هــدف
ياحب قــد جاني بنضــره مثلمــا حد السيـوف

انتي الهواء انتي الدواء صرتي لايامي الشـغف
ياحب مامثــله وعيني غيــرها يحــرم تشـوف

شلت الجميع في كف وانتي يانضر عيني بكف
حبك يساوي الكل واتحدا العواقب والضــروف

....

[الحمدان]

‏ياسهيل اليماني قل لنجم الثريا
المراحل طويلة اركدي يالنجوم

وارحبي يا الغصايب لو ضويتي وهيا
مايخاف المساري الا ردي العزوم

وامرحي يالسنافيه جميل المحيا
في حماية بني عمك دفاع وهجوم

....

[الحمدان]

لولا الفرايض ماعرفنا بالسنن
ون افترضنا كيف ماكانت تكون

مابين سوء الظن والظن الحسن
جات النتايج كلها عكس الظنون

إن احدا قفا من الحق ألتعن
ون احدا واجه فهي بين العيون


صالح الاحمدي

[الحمدان]

صدورنا الجوفاء مليئة بالمحبة والوفاء
توفي لمن أوفى بعهده والوفي يبقى وفي

لاسر يخفى بعدما طال التباعد والجفى
وانا بمنفى صار فيه الصقر مثل الهجفي

ومن تشفى في حبيبه بعد ما ابليس اصطفى
يضيع فرشه والدفاء محموم عمره لا دفي

....

[الحمدان]

لاتبتعد واجد ولا تقترب حيل
بينك وبين الناس اترك مسافه


من شان مايلحقك لومٍ ولا ميل
ماتنفعك عقب الخطيه حسافه

....

[الحمدان]

الحب له لهفه وانا لهفتي فيك
ياللي ملكت ارضي وسماي وزماني

انا لعينك اترك الناس وآجيك
وانت اترك الدنيا دقيقه عشاني

....

[الحمدان]

‏لاتعاتب الغايب وتقول وش فيه
ولا تسيء الظن حى تشوفه

من الغلا إن غاب عنك تحاتيه
ومن الوفاء إنك تقدر ظروفه

....

[الحمدان]

بنيت لك مابين قلبي والاحداق
منزل وزخرفته بأرقى الزخارف

وزرعت حبك ياحبيبي بالاعماق
وفرشت لك فيه الحنان والعواطف

واليوم ابعلنها ولو خاطري ضاق
واودعك وآقول ياحب آسف

مادام تالي حبنا هجر وفراق
ماشي على فُرقى الأناني حسايف

....

[الحمدان]

عسى الغرور اللي أصابك بالعما
يزول عن عينك لكي ترجع تشوف

تظن نفسك نجم في كبد السما
والناس من حولك ملايين وألوف

لولا العمى ماصار حالك مثلما
غزال من زود الغرور اصبح خروف

....

[الحمدان]

قالوا دع الحبر ينزف واقلب الصفحه
قلت اتركوني بحالي مالكم بي خص

الصفحه اللي كتبها احساس في روحه
ماهي بصفحه رخيصه قابله للقص

بقلمي

[الحمدان]

لكم مني مع التحية....

سلام مني لاهل التواضـع والاخلاق
‏واهل الوفاء والصدق واهل المروه

‏اللي نواياهم كما بيض الاوراق
‏تقديرهم واجب علينا بقوه

بقلمي

[الحمدان]

‏رددت لك بالود والصدق والحب
اجمل معاني سقتها لك قصايد

ياملهم احساسي ويامالك القلب
غلاك في روحي عن الوصف زايد

....

[الحمدان]

‏المحبه ثلاث ارباعها اهتمام
‏وانت لاجيتني ماهمك إلا تروح

‏المحبه بدايتها نقيض الختام
‏أولتها هدايا وآخرتها جروح

....

[الحمدان]

ليه يا الحظ الاقشر ماتفارقني
وين مارحت اشوفك دوم قدامي

ليه دايم كما ظلي ترافقني
ليه دايم تحطم اجمل احلامي


بقلمي

[الحمدان]

لاتكثر اقوالك اذا مالك افعال
المفترض مثلك من القول خاجل

سهله عليك تكون عادي ورجال
لكنها صعبه عليك المراجل

....

[الحمدان]

هم يَحسبون بأن الناس تقصدهم
في كل مافعلوا في كل ما قالوا

والناس ماحسبت يومًا لهم خبرًا
فلنتركِ الظنّ إن الظنّ قتالُ

بقلمي

[الحمدان]

لأجل عين اللي على عيني يمون
العيون احرمتها حلو المنام

ساهرٍ بين العواصف والسكون
والمودة نارها برد وسلام

انتقي عذب المعاني واللحون
وانظم لعينه طواريق الغرام

....

[الحمدان]

مؤسف إنّه على قلبي وقلبه يجور
ومحزن إنّه قريب وما قدرت اقربه

باروا الناس واللي ماهقيته يْبور
سرّه البعد والصوت الحزين اطلبه

....

[الحمدان]

‏شوفتك قربي تسعد القلب والروح
‏والوقت قربك ربح ماهو خساره

‏انت الهوى لانفاسي والعشق والبوح
‏وانت اعذب ابياتي واحلا عبـاره

....

[الحمدان]

‏خل عنكْ الكلام اللي يقولون عنه
البشر مايعرفوني ولا يعرفونك

ان بغيت الصحيح وهرج مافيه منّه
والله اني عجزت اعيش عمري بدونك

....

[الحمدان]

تكفون خلوني ترا منزله غير
خلوني اسلا لايجي له مجالي

قفى وعذره فوق كل المعاذير
عذره معه حتى والوغاب غالي

....

[الحمدان]

رسالتي لك....

لاتكن ذلك الشخص الذي نَسِيَ قلبه وَعاش بعقله
‏فَأصبح قاسٍ على النّاسِ وَبلا مشاعر
‏وَلاتكن ذلك الشخص الذي نَسِيَ عقله وَعاش بقلبه
‏فَعاش حياته بين النّاسِ مجروحاً
‏وَليكن دوماً قلبك صديق عقلك
‏حتى ينبض قلبك بما في عقلك
‏فَتجمع بين الحكمة وَالقوة
وَبين الرقة وَالطيبة

بقلمي

[الحمدان]

ايه انا اهواك يالخل العنيد
وحالتي من دون وصلك في خطر

كم كتبتك بالشعر وحرفن فريد
وكم نزفتك سطر واردفته سطر

....

[الحمدان]

‏مو گل صدفه للبشر تجمع احباب
ولا كل فرصه في حياتـك سعيده

يمكن يكون احيان اغلاق الكتـاب
أفضل ترى من فتح صفحه جديده

....

[الحمدان]

‏ياساعتي لو مات نبض المواقيت
‏وقت الفرح تكفين لاتنكرينه
‏
‏حنا نعيش وكننا في توابيت
‏السن يضحك والحنايا حزينه

....

[الحمدان]

ياليتني أجرح مثل باقي الناس
واكسر خواطر من كسرني واقسى

لكني من كثر ما أملك إحساس
أجبر خواطر من كسرني وأنسى

....

[الحمدان]

‏ياعاشق الدنيا تراها محطات
تعيش في ديره وتفنى بديره

لاياخذك طرد الهوى والملذات
اذكر محطات الحياه الاخيره

بقلمي

[الحمدان]

ياحروف الشعر وابيات القصيد
انشدي عنه وداري لهفتي

ارسلي حرفه وحرفي من جديد
خلي ابياته تعاند وحشتي

....

[الحمدان]

‏للقلوب أقفال وللماضي حنين
ومن معه مفتاح قلبي ضيّعه

لاقدرت أبوح بالسر الدفين
ولاقدرت أشكي من اللي أوجعه

....

[الحمدان]

‏قال الوفا بين المحبين موجود
والشوق خصلة من خصايل وفانا

القلب لو مشغول بالحب مردود
يطري علينا بكل لحضه هوانا

....

[الحمدان]

‏أبشرك سكرت من دونك الباب
ولا عاد يشملك السكن والضيافه

اسلم وسلملي على كل من غاب
الخاطر اليا عاف له شي عافه

....

[الحمدان]

من يصون الود له مني سلام
ومن نساني ياعسى ربي معه

الهوى لاصار مافيه احترام
مايناسبني ولا احب اتبعه

....

[الحمدان]

مايفيد الوجه لوفيه الجمال
إذاجمال الروح معدوم الأثر

ومايفيد القول من دون الفعال
ولايكون الفعل إلا لو ظهر

....

[الحمدان]

‏قل للقلوب إللي تحدك على اقصاك
إنك معي لوشمس الاحلام غابت

وقل لليدين إللي تبي لمس يمناك
إيديك نامت في يديني وذابت

....

[الحمدان]

‏ليتك معي محتاج لك كل ساعه
حتى وانا مابين نفسي وبيني

من الوله ماعاد فيني أستطاعه
أتخيلك في كل لحظه بعيني

....

[الحمدان]

‏الزمن مشكور كثّف لي دروسه
وانت من ضمن الدروس وْلا جهلته

حُبك اللي قد جرح قلبي بَـ موسه
عن سبب جرحه بَموت ولا سألته

ماهقيت الحب تتعبني طقوسه
لين جربته وعفته واعتزلته

....