فوق هام السحب ( الشعر الشعبي) على متن القوافي

[الحمدان]

أكتب غزل واكتب فراق ومعأناه
وأنا ترى خالي ولا لـي حبيب

بقلمي

[الحمدان]

‏عن عيون الناس تسترني ثيابي
وكل حيّ ٍ غير ربي مارجيته
ٰ
ويوم شفت إن الكفن ماله مخابي
كل مايطري على بالي شريته

.....

[الحمدان]

‏كن المساء فـي طلتك يكتمل ذوق
‏الله على ذوق المساء في حضورك

‏ياللي عليك الشعر ميت من الشوق
‏ماتدري ان النور يازين نورك

.....

[الحمدان]

ماشفت مثلك بالبشر حد ثاني
انت الوحيد اللي تحلي سنـيني

اشتاق لك واكتب شعوري اماني
وارسل لك احسـاسي ولهفه حـنيني

وادورك والقاك بين المحاني
بوسط قلبي منزلك ياضنيني

.....

[الحمدان]

ياللي معاهدني على الحب والطيب
‏اسعدتني والقلب زاد انشراحه

‏لا شفت مرسالك تزيد التراحيب
‏وانسى الدوا والقلب ينسى جراحه

‏معك معك ولو ملا راسي الشيب
‏هذي الصراحه لابغيت الصراحه

‏أوعدك ياروحي وانا ما اعلم الغيب
‏القلب بيتك والعيون استراحه

.....

[الحمدان]

‏الناس تعشق كلهم حسب الاذواق
ونا عشقتك عشق حسب ذوقي

يا ما رسمتك شمس تشرق بالافاق
وشتاق إلك يغلا غرام ابخفوقي

ياموطني لك حب يسكن بالاعماق
يغلا قصيدي في عذوبة طروقي

.....

[الحمدان]

ياتاركيني بين همي والافكار
روح المعنى في هواكم أسيره

لاتجعلوني شارد الفكر محتار
لاعاد بصر فيني ولا عاد بصيره

مليت وانا اعزف على نفس الاوتار
وانتو تجافوني بنفس الوتيره

جفت بحور الشعر وانا اكتب أشعار
قلت او عسى قلبك يصحي ضميره

.....

[الحمدان]

كتاب حبك والعناوين عندي
واخر ضهور الحب والشوق عندك

انا معك والروح حارس وجندي
لك طول ما قلبي معلق بيدك

غالي وحبك داخل القلب معدي
منقول من فكرك وداخل وريدك

حتى وصل فكري وداخل وريدي
واشتق نفسي في تواصل بريدك

.....

[الحمدان]

‏يسوقني شوقي لصوتك واسوقه
ماغير صوتك يشرح الصدر لاضاق

مثل العسل صوتك دواء للي يذوقه
يطفي لواهيب الحنايا والاعماق

يامن سرق قلبي وعيني بذوقه
ماتدرى ان الشوق جمر وحراق

.....

[الحمدان]

‏ياكثر مامرت على عيوني عيون
تمرني وأسأل عليك إنت وينك

ماهمني لو بالثواني يمرون
تكفي عن عيون المخاليق عينك

.....

[الحمدان]

‏ﺍﻟﻘﻠﺐ ﻣﻮ ﺧﺎﻟﻲ ﻣﻦ ﺍﻟﺤﺐ ﻭﺍﻟﺸﻮﻕ
ﻟﻜﻦ ﻛﺘﻤﺖ ﺍﻟﺸﻮﻕ ﻓﻲ ﻭﺳﻂ ﺻﺪﺭﻱ‏
ㅤ
‏ﻭﻗﻔﻠﺖ ﺑﺎﺏ ﺍﻟﺤﺐ ﻋﻦ ﻛﻞ ﻣﺨﻠﻮﻕ
‏ﻭﻣﻨﻬﻮ ﻧﺸﺪﻧﻲ ﺑﺎﻟﻬﻮﻯ ﻗﻠﺖ ﻣﺪﺭي

.....

[الحمدان]

‏بين الرموش وبين عينك تعاليل
تآخذني الاشواق لحظة نظرها

دعج العيون ام الرموش المظاليل
زانت حياتي يوم قلبي عرفها

.....

[الحمدان]

ارفع حجاجك واضرب الجمعين والدنياحريق
وابشر بنا وان يبست ارياق العرب بحلوقها

سند على كتفي وتدري انك مسنّد بالعريق
لك خوه لو أموت وأحيا مانسيت حقوقها

وأن ماوصلتك لاتنشد لاعدوً ولا صديق
سيلّ دموعك وأعرف أن الارض ماني فوقها


خالد العتيبي

[الحمدان]

ماردني دون اندماجي مع الناس
الا مشاريهٍ تكسّ الكرامه

ماشفت لي بمرافق الجمع نوماس
هجرتهم واخترت درب السلامه

ناسٍ تلمّع ناس والناتج إفلاس
نفاق والصادق عليه الملامه

بعض المجالس دير رهبان واجراس
تصدّر المجلس ربيب الغشامه


عبدالله المفضلي

[الحمدان]

تعبنا من مدارى خواطر وحب خشوم
وصبرن على اللي هرجته مايثمنها

أليا جات من فم المغفل بدون وسوم
حذفها على اذن اللي معه ماتشاينها

تحمل وحاول ماتعرض لبعض اللوم
وخف الكلمتين اللي لك ايام ساجنها


اجابر البريدي المري

[الحمدان]

معي صورةٍ حيه لشخص ٍعزيز ومات
ياليت الصور لا ماتوا أصحابها ماتت

لو إن البنادم يقدر يرجّع اللي فات
أبي من سنيني بس خمسة عشر فاتت

.....

[الحمدان]

مالا يسرك تسمعه لاتقوله
ومالا رضيت بفعلته لاتسويه

.....

[الحمدان]

قبالها نورٍ يشع وفي ملامحها تمون
كل الدلع بمشيها والموت سحر عيونها

فيها شموخ ومقدره متميزه فوق الظنون
زين وحلا ضافي عليها والحيا من دونها

.....

[الحمدان]

من قلبي الولهان ماجاك تقصير
بدّاك من بد الخلايق وحياك

تحية لأجلك محبة وتقدير
على النقى حنا ترانا عشقناك

اللي تبيه بصير لعيونك يصير
المستحيل نطوّعه لين يمناك

إي بالله إنك غير ومحبتك غير
مير البلا مدة يمينك وفرقاك

زودٍ على الثنتين ماشفت أنا خير
عجزان لاردك وعجزان لانساك

.....

[الحمدان]

ماتعرف ان القلب مجروح يازين
مطعون ياضبي الفلا من سهامك

احس بك لوكنت مبعد عن العين
نبضات قلبي هايمه في غرامك

كلمة (احبك) حطها بين قوسين
تبقى معك طول العمر بااستلامك

انا اعرف احساسك معي والوفاء دين
اطنان غيرك ما تعادل جرامك

ايننت وانا ياقمر منكم وين
يامن تذوبني عذ وبت كلامك

تعال انا ماالله خلق مني اثنين
وتشوفني في كل ساعه امامك

.....

[الحمدان]

‏الله يسعد لي مسااك ودنياك
‏وجعل الفرح يبقى ويملا حياتك

‏حتى المساء اللي اعيشه بلياك
‏صرت أتنفس فيه من ذكرياتك

.....

[الحمدان]

‏الله من قلب المفارق ليا اشتاق
لاجاه نص الليل في الشوق غارق

كم قد سمعنا في قصص ناس عشاق
هذا لقي خله وهاذا مفارق

وانا على وموج المحبه ولشواق
قد صرت في حبه متيم وعاشق

خلن له الميزات راقي وذواق
حالي وبسماته كما البرق بارق

.....

[الحمدان]

ماكل حي تفقده جاك مشتاق
وما كل مخلـوقٍ لقى ما تمنى

عند الله المعبود توزيع الارزاق
كل ٍيجيه الرزق لو ما تعنى

.....

[الحمدان]

‏من راقب الناس شاف الهم والحسْره
ضاعت حياته وهو مشغول في غيره

دايم ونفسه من التفكير منْكسره
الناس تسْعد وهو مازال في حيره

عزالله أنه خذاه أبليس في أسْره
ماقدر اللي عطاه الله من خيره

.....

[الحمدان]

قدام ياخاين انا وانت قدام
ونشوف من ترسي عليه الهزايم

بيتن على بالي تردد من العام
دايم وانا ضايق اردده دايم

بين الخيال وبين تحقيق الاحلام
لقيت لي حظٍ على طول نايم

حاولت فيه ايام واشهور واعوام
لاهو مفطرني ولاهو بصايم

الحظ لامنه تردى ولا قام
تبي تشوف من الظلايم ظلايم

.....

[الحمدان]

اللي طعني قبل مده عطاني قفاه
وحاولت اجازيه عن طعنه وعيّت يدي

جزاه ماهوب عندي عند ربه جزاه
ماهوب من زود طيبي بس ماني ردي

.....

[الحمدان]

ان تكدر خاطرك ازعل على هون
لا تفجر بالخصومه والسفاله

منت نبي معصوم ولا هو بفرعون
ترى الفجور يهد كل جماله

.....

[الحمدان]

فمان الله ياحبٍ تغلغل في حنايا الزور
فمان الله يا اغلا من نسم صدري وشرياني

.....

[الحمدان]

سبحان من خلاك بالامس غالي
ونرضا من اجلك الشقا والمضره

امس قريب ما تفارق خيالي
واليوم ماتطري على البال مره

.....

[الحمدان]

أحبـك لو يموت الحب وتصير القلوب قبور
و أنا مهما منحتك من غلاي أشعر بتقصيري

أحبك من هنا حتى طلوع الفجر حتى النور
صحيح انك قدر محتوم بس أجمل مقاديري

.....

[الحمدان]

بعض الثقة تدفع ثمنها حسافه
شعور موجع يصعب أحيانا وصفه

أخطر عدو لا كان أقرب مسافه
صديقك اللي يسند الكتف كتفه

.....

[الحمدان]

ماسلمنا من سكاكين القرايب
ولا سلمنا من اقاويل الصداقه

ابشع الصدات صدات الحبايب
واشنع الطعنات طعنات الرفاقه

.....

[الحمدان]

فمان الله والعذر السمين أبلغ من التبرير
عفى الله عن خطايا اللي خطايانا على شانه

فمان الله يالغصن الليِّان اللي هَجرك الطير
هذا طيرك يبلغك السلام بروس جنحانه

.....

[الحمدان]

متصنع الطيب لايمكن يجي طيّب
يتعب من الطيب ويعود على طبعه

.....

[الحمدان]

أنتِ طمأنينة الروح وشعور السلام
في قربك النفس ماتاخذ تدابيرها

تمر الأيام في قربك على مايرام
يابهجة عيوني ويا أغلى مساييرها

.....

[الحمدان]

عطيتك محبه صادقه مابها تشويه
وجعلتك بقلبي منفرد فيه وحداني

وغيرك بغاني بالمحبه وانا مابيه
مادام انت عندي ويش ابي بواحدٍ ثاني

تراني ليا شفتك اسج الفكر وشقيه
واشوف القمر واقول عندي قمر ثاني

غلاتك بقلبي شي يطغى على التشبيه
كيف اوصفك والوصف يعجز به لساني

.....

[الحمدان]

أحبك جنون ومرحلة طيش وإستهتار
وأشوفك سوالف عزلتي وإهتماماتي

لو إن الليالي جارحة والزمن دوّار
يصبّرني أنك فرحتي وإبتساماتي

تخيّرني دروب المساري عشان أختار
وأنا ما بغيت الّا دروبك يا مولاتي

أخاف إنهزامي في حياتي وأخاف النار
وأشوف إنهزامي معك مثل إنتصاراتي

.....

[الحمدان]

أحبه وأحبّ ازعله وأحبّ رضاه
دفا عمري وترويق بالي وتفكيره

لو اني اذوق المرّ منه اقول الله
عذابٍ معاه ولا سعاده مع غيره

.....

[الحمدان]

‏خلك مع اللي لا درى بضيقتك ضاق
‏وابعد عن اللي لا درى بضيقتك صد

.....

[الحمدان]

نعرف نحل حبالها لا تلوّت
ونقودها قود الرسن للعسايف

.....

[الحمدان]

‏ما عاد لـ الأحلام والوقت قيمة
‏ وما عدت متحسّف على تضحياتي
‏ٰ
‏ كانت سنين الطيش جدّا عظيمة
‏ محتاج أرتّب من جديد أمنياتي

.....

[الحمدان]

‏أدري أنك مثل حالي مبتلش بظروفك
‏و كل شيٍ فالمحبه صار ماله معنا
‏ٰ
‏الصداقه والشعر وتشوفني وأشوفك
‏خير من حبٍ يفرقنا ولا يجمعنا

.....

[الحمدان]

ماتضيّق سود الأيام من صدره رحب
‏مؤمنٍ بأن البسيطه وأهلها فانيه

‏جعل دنيا فرقتنا عن أغلى من نحب
‏يجمع الله بينّنا فالحياة الثانيه

.....

[الحمدان]

‏مضى مامضى واللي مضى ينذكر بالخير
‏ولا عاد ينفع ودك اني ولو انك

‏شبع قلبي من ملاوع الضيق والتفكير
‏الين اكتفا ولا انت ما ينشبع منك

.....

[الحمدان]

‏اعطيته اشعوري وبالشعر خصّيته
‏الروح بيته وغيره ما سكن فيها

‏احلوّت ايام عمري يوم حبّيته
‏وطيفه اذا مر باحلامي يحلّيها

.....

[الحمدان]

‏أقسى من الدمع صوتٍ تقتله ونّه
‏والونّه اللي تجي من شوق غلّابه

‏لإنسان من كثر ما تغليه وتحنّه
‏تختار فرقاه وأنت تضيع في غيابه

.....

[الحمدان]

‏جيتك أدور من ضما روحي وسط عينك غدير
‏جيتك وانا كلي فرح والحزن سايق موكبه

‏ما جيت أدور حب عابر أو أدور شي مثير
‏ولا جيت أدور دور في فلم المحبه ألعبه

.....

[الحمدان]

يهبّ فيني حنين بكل هبّة نسيم
والذكريات القديمه طارفٍ بابها

غشاني الشوق يا وجهٍ في بالي مقيم
إشتقت لك والمشاعر حثّت ركابها

.....

[الحمدان]

رح للسعة وش دخلك بالنوايا
‏مالك بسر صدورنا لك علنها

‏وكانك من اللي يبحثون الخفايا
‏حنا من اللي لا لقاها دفنها

.....

[الحمدان]

الهرجه اليا جتك من غير ميزان
‏أفضل طريقة ردها صد عنها

‏صدتك عنها تجرحه قدر الإمكان
‏وده يرجعها ويدفع ثمنها

.....

[الحمدان]

‏لملميني خايف أنه ما بقى فيني بقايا
‏وقلبي اللي تاركه بين الحنايا مالقيته

.....

[الحمدان]

‏سمعتوا بتناقض ضيدان بن قضعان
‏يوم يقول بأول قصيّدته

‏فمان الله يا أول من سكن بين الضلوع العوج
‏عسى دربك سفير ويا عسى الله ما يخليني

‏لاكن شوقهِ طغى اخر القصيدة وقال:

‏فمان الله سق ركبك على درب السنين العوج
‏ولكن طالبك لا أقفيت عني لاتخليني

[الحمدان]

‏حنا تقاسمنا الخطأ كابرت يوم إنّي صواب
‏وذي زلّتي اللي كنت أجنّبها وأخاف أزلّها

‏قفّلّت باب العذر يوم إن العذر فيه ارتياب
‏ولافطنت لكلمة آسف يوم قلت افطِن لها

‏هذا أنا ما أعاتب المخطي ولا أسمع عتاب
‏فرقا وراها عـزّي أغليها غلا وأجلّها

‏سابقت خطواتي وأنا قلبي يونّ من الغياب
‏لكن وش أبغى غير عزة نفْس تسبق ذلّها

.....

[الحمدان]

‏الجروح الغافيه ذا الليل كنها مستجّده
‏ودها تكشف خفايا خاطري واخر علومي
‏ㅤ
‏لي من الضحكات والراحه ونوم الليل مده
‏يا الله بعلمٍ يسر البال ويبدد همومي

.....

[الحمدان]

‏مانكشف اسرار الصديق المقفي
نوفي معه لآخر حياته ونبكيه

وليا ذكروه بسو نزعل وننفي
ونذكر محاسن سيرته يوم نغليه

.....

[الحمدان]

مرحبا ياليله السبت والليل الطويل
اقلطي بصدري الي من الشوق امتلا

جيتك ماهي غريبه وصدك مستحيل
كان لك عندي محبه وتقدير وغلا

.....

[الحمدان]

ياقبلة الاحساس ياللي بالغلا مالك خشير
يوم الليال ملاح انا مرجعك وانته مرجعي

فرشت لي في بادي الامر النمارق والحرير
مع كل مطلع شمس ووعودك تراود مسمعي

.....

[الحمدان]

الجادل اللي تقول الخدّ مثل الجمر
ماودّك إنّها تنوش القاع رجلينها

غرو نحرها القمر في ليّل خمسة عشّر
والموت من رسمة الشفه ليا عينها

.....

[الحمدان]

وجهي مع الطيبين ايطيب ويجمل
وعلى هدوئي تطابخ غبن عذالي

ألحمدلله مجمّل علم ومكمل
وان شانَ وقتي حشا ماشانت أحوالي

.....

[الحمدان]

‏قلبي مع اخبارك وكيف الزمن فيك
وكيف الليالي معك ياجعلك بخير

بعدك يزيد الشوق ياجعلي افديك
لك وحشه من بد كل البشر غير

.....

[الحمدان]

يجذبني اللي في حضوره مُميّز
ويعجبني اللي في غيابه له الشوق

شخص ٍتفرّد في حياته تميّز
تنافس الأخلاق مع قمة الذوق

.....

[الحمدان]

ودي على شوفتك والشوق طاويني
ارحم عيونٍ على لقياك شفقانه

.....

[الحمدان]

عزتي للي كل ماجات حزًه نومه
جاته هموم بقعاء واعطته بالخامس

من يلومه لاسهر كل ليله من يلومه
الهموم تعاقبه ومعاقبه ذا النامس

مطلق العتيبي

[الحمدان]

غنّت الارض والطاري لاذعذع نسيمه
قمت اغنّيك والشتوّيه اوّل شهرها
ٰ
يا عسى كلّ ما شدّيت تلحقْك ديمه
وين ماجيت لك ديره ترشرش مطرها

.....

[الحمدان]

مقابلك بعد الغياب يطول العمر القصير
إقرب وانا اقرب ماورانا الا المقابر والنعي

سفر الدغيلبي

[الحمدان]

اللي بغى وصلك وقربك يدلك
من دون لا انت تعلمه او تدله

ونصيحتي لا جيت لاتجي كلك
الا على اللي بالغلا جاك كله

.....

[الحمدان]

والله أني عليك أضمى محبه وأجوّع
والمواصيل قلت ماهي بَكافيه

أيه محتاج ضمة شوق بين الضلوع
ضمني وسط صدرٍك ضمة دافيه

.....

[الحمدان]

سعد من قلبه على الفرقا شمالي
مايھمه فالهوا وصل وقطاعه

.....

[الحمدان]

‏يمدحون النوم لاضاق الفضا
‏نومة الضّايق تراها فايده
‏
‏وش يطفي بالصّدر جمر الغضا
‏غير تطنيش الأمور الزايده

.....

[الحمدان]

ودعتك النسناس ياورد الاشواق
كرامتي تحكم علـي بانصرافـي

يكفي ثلاث سنين مرت على ساق
عين فراش لك وعيـن لحافي

....

[الحمدان]

‏تغانم الشوق دام القلب تحت امرك
مشاعري فيك ماتشبع إذا جاعت

لا دار وقتك وطوّل ربي بعمرك
عرفت وش قيمة الفرصه ليا ضاعت

.....

[الحمدان]

هو خايف اني ماعاد ارجع وانا مثله
‏خايف من الرجعه اللي مالها داعي

.....

[الحمدان]

تبي الكلام الصدق بيني وبينك
‏اسمع معي هالبيت مادمت وياك

‏من باع كل الناس من شان عينك
‏حطه بعينك واجعله نور دنياك

.....

[الحمدان]

سلم على اللي فاقده ولا فقدني
وقله كثر ماقلت لعيونه اشتقت

محلله عن كل وعدٍ وعدني
ومسامحه عن كل ليله تضايقت

.....

[الحمدان]

حطو خبر عاجل تراني انا جيت
‏ولا جيت جياتي تنومس قبيله
‏
‏يامتابعي بالخير والورد مسيت
‏وبالشعر وأبيات القصيد الجزيله

.....

[الحمدان]

‏وش رأيكم في شخص بارد مشاعر
يحمل جنون العشق وأسلوبه الصمت

صحيح هو طيب ويراعي الخواطر
لكنني من صمت بوحه تألمت

.....

[الحمدان]

نعيش بالقمه وما صابنا صاب
ونقبض شعار العز براحه يدينا

نضحك في الدنيا مع كل الأصحاب
وما ندري الدنيا لنا او علينا

وماهمنا من جاء معانا ومن غاب
فوق السحاب نعيش مهما حيينا

.....

[الحمدان]

غلاك في روحي ترا صار مزروع
حتى المشاعر ترجمت لك غلاها

انا وقلبي والاحساس إلك طوع
والروح لو راحت من اجلك فداها

.....

[الحمدان]

‏دايم بدايات المحبه مثيره
ورسايل الجوال تشهد علينا

اول رساله ماهي بمثل الاخيره
تدرجت بشويش لين انتهينا

.....

[الحمدان]

‏مافيه داعي للزعل والانفعال
‏ومجادل الجاهل وكثر اللجلجه

‏خلك على ماقيل شيّال الثقال
‏ومن يبي يزعجك صمتك يزعجه

.....

[الحمدان]

‏سوالفه من حرير وضحكته ونسه
‏رقراق نهرٍ على طول السنه يجري

‏اللي تبي صبّحه بالخير أو مسّه
‏هو كل ألاوقات بس الناس ما تدري

.....

[الحمدان]

راودتها مثل الشكوك وجيتها مثل اليقين
يوم اضحكت قلت الكبر لله يا متكبره

واقفيت وانا اكبر من التبرير والعذر السمين
حتى لو اني خاطري ما كل شي يصبره

ماني بظالم يوم اقول اقبالها ماهو بزين
الظالم والله كيدها الي كل يوم تدبره

.....

[الحمدان]

انحنى لاجلك شعوري واعتذر
وسافرت لاجلك حروفي والشعور

غادرت موطن حناني في حذر
تسمح لشوقي وحبي بالمرور

خذ بقايا شوق قلبي لا تذر
من قديم الود حرفٍ اوسطور

.....

[الحمدان]

الشوق في عيني تشوفه يناديك
‏تحكي غلاه العين قبل الشفاتي

‏أفهم ترى ماغيرك احدن يساويك
‏أنت الغلا وكل الغلا في حياتي

.....

[الحمدان]

‏زان حالي في لِقاك وطاب فالي
‏انت وجهك من يشوفه مايملّه
‏
‏كيف مفضى لك وانا بعز انشغالي
‏وانت لحظة معك تسوى العمر كله

.....

[الحمدان]

للود والمعروف ماني بجاحد
بس الخفوق اظن مايعشق ثنين

القلب واحد والمحبه لواحد
مارضى شريك لي لو فيك قلبين

محمد بن فطيس

[الحمدان]

‏علمت قلبي تكون له كل نبضه
وعلمتني وشلون اعشق جنونك

وعلمتني أشتاق لك كل لحظه
بس ليه ماعلّمتني الصبر دونك

.....

[الحمدان]

ملل وضيقة لا تقولين وش فيك
محتاجها واقول ياربّ تصحى

دلوعةٍ لو تبتسم للشبابيك
كل الهموم اللي بهالكون تمحى

.....

[الحمدان]

اثقل ديون الطيب دين الجماله
‏وألذ طعم الطيب طيب المواقيف

‏وازكى دروب الطيب درب العداله
‏وابرز صفات الطيب رد المعاريف

‏واللي تجمل فيك بأغلا حلاله
‏لاتتركه لاعارضنه صواديف

‏ترا الجزاله مالها الا الجزاله
‏والمرجله قد قيل تبغا تكاليف

.....

[الحمدان]

ما دام باب النصح للكل مفتوح
خذ لك من اكوام النصائح نصيحه

من يأمنك بالروح لاتجرح الـوح
ولا تترك الروح الجريحه جريحه

.....

[الحمدان]

‏أكافح سرايا ضيقة الصدر بالتسبيح
‏مثل ما تكافح رمدة العين بدواها

‏تطيب الجروح الواجدة والهموم تطيح
‏من القلب كان الله بلطفه تولاها

‏ عسى المقبلة فيها من الجود هبّة ريح
‏وعسى الماضية تُغفر من الله خطاياها

.....

[الحمدان]

صدوف الليالي مابها يمكن و بعدين
وسنين العُمر ماهي على كيف راعيها

.....

[الحمدان]

‏القصايد سلوة النفس والإبداع ذوق
‏وكل بيتٍ يلفت العين يسلم شاعره

.....

[الحمدان]

‏ياوقت انا زاهدٍ في معظم حقوقي
‏الا الكرامة ياوقتي ما انت ماخذها

‏وليا انهشم خاطري وانلوية شدوقي
‏اهل الندم ماتضم الا نواجذها

.....

[الحمدان]

‏حطني بين المروفه وبين الاهتمام
‏عاشقٍ في إيديك جنّاته وجهنّمه

.....

[الحمدان]

ويحملني الحنينُ إليكِ طفلًا
‏وقد سلبَ الزمانُ الصبرَ منّي

‏وألقى فوقَ صدركِ أُمنياتي
‏وقد شقيَ الفؤادُ مع التمنّي

‏وأسلمتُ الزمان زمام أمري
‏وعشتُ العمرَ بالشكوى أُغنّي

‏وكان العمر في عينيكِ أمنًا
‏وضاع الأمن حين رحلتِ عني

.....

[الحمدان]

‏دردشتك معلقه حتى يضيفك
‏تسجن العشاق في سجن انفرادي

‏كل سهم هيّن الا من وليفك
‏ماتموت الا من السهم الرمادي

.....

[الحمدان]

‏أم العيون اللي هدبها بلاجيك
‏والباقي من أوصافها آمرّ وادها
‏
‏يمرّها المستعجل ويضرب بريك
‏وينسى مواعيده ويرقب وعدها
‏
‏ياليتها ماقالت الله يعافيك
‏والله ماشفت العافيه من بعدها

.....

[الحمدان]

يسوق روحي شوقها والوله سوق
نحوك وحولك يدرج القلب ويحوم

راقي وكلك ذوق واطلالتك ذوق
والذوق لولاك انت يا الذوق معدوم

ولولاك ماقاسيت من لوعة الشوق
الي حرم عيناي من لذة النوم

.....

[الحمدان]

راعِ المعاريف مايذكر معاريفه
يكفيه عن ذكرها من شاف ميقافه

واللي بوقت السعه يمدح مواقيفه
لا جاء نهار المواقف عاش من شافه


خالد بن مدعث

[الحمدان]

ما يغش المسلمين الا دموع الظالم
لابسٍ بشت الإمام وفي الذنوب مفلّي

يدّعي بالحق ويصادر حقوق العالم
يعرف شروط الصلاة ولا يعرف يصلّي


خالد بن مدعث

[الحمدان]

ياللي تنشد عن جديدات الاخبار
الوقت خذ له بالرجاجيل فره

شريم جاله برطم وولع النار
وكليب خلا شبة النار مره


محمد المقحم

[الحمدان]

اللي يصوّر ضيفته في السنابات
ويقولشوفوني تراني مضيّف

والله ما اعده من اهل الجمالات
والكل يدري انه سخيف وضعيّف

و اللي يحب البهرجه والفلاشات
كلٍ يعرف إنّه (......)مصيّف


ابوسامي

[الحمدان]

ياصاحبي وش مزعجك من مديحي
يعني ليا ذموني العالم ارتحت

تقلط على هيلي وهبات ريحي
وعلى ارحب لياجيت وابقه ليا رحت

مالك شبيه الا قرون الوضيحي
الله خلقها فوق وفعولها تحت

ياماكثر اللي ودهم في مطيحي
لكن لاطاحت عزومي ولاطحت


سالم جخير

[الحمدان]

مسا الخير ياجمل ذكريات ولقا وايام
معى كل نفحة عطر تطري ملامحها

عـرضها شريط الذاكره عرضة الافلام
على بـالي اللي صار جمهور مسرحها

دخل جوها اللي عاشبه رحلة استجمام
عسى الله يسامحها عسى الله يسامحها

لها دمعة ًبالعين تصعب على السوام
ولها زفرتن باقصى المعاليق تشرحها

.....

[الحمدان]

يبى يمر الفقر من بيت الغناه
ويبى يمر الجرم من باب العفو

أمّا لقيت الحظ يكسر لك حصاه
ولّا لقيت اللي حكوا لك ما وفوا

.....

[الحمدان]

لاتقرب الغيبه تراها نشايب
تنشبك في العالم وتلقى العقوبه

وش تستفيد اذا تقفيت غايب
ياخذ حسناتك وتاخذ ذنوبه


ناصر ثويني

[الحمدان]

يا دار الاحباب كلن له من اسمه نصيب
وانا نصيبي من البيبان مقفولها

غربت نفسي بنفسي لين صرت الغريب
الي عجز ياصل الديره وهو حولها

احتاج لاطيب خوي واحتاج لافضل حبيب
لين الغلا والهموم يقل مفعولها

ياصاحب الخاطر المكسور خلك قريب
عندي قصيده حزينه يمكن اقولها


خالد مبارك

[الحمدان]

اكثر اللي ضيّق اخلاقي وفوّر دمّي
موقفٍ يوم القيامة ماحسبت حسابه

مقدر اعطي حسنةٍ وحدة لبويه وامّي
واعطي اللي كنت ماحبّه وكنت اغتابه


مسلط الحميدي

[الحمدان]

عن ضيقة الخاطر وعن شين الاخلاق
كم موجعه توجع لكنها تعدّا

وقّف ولو ماتوقف الا على ساق
ولا ترجي رخوم العــرب واتفدّا

المشكله ماهيب في ضيق الارزاق
وماهيب في مـن طاب والا تردّا

المشكله لا اشتقت للي مايشتاق
هذي هي اللي توجع القلب جدّا


مهدي سميطان

[الحمدان]

كم واحدٍ ضيّع حياته بدنياه
سعى ورى ارزاقه وخلاّ صلاته

وكم واحدٍ ناجا بدنياه مولاه
قايم بدين الله وعايش حياته


مسيعيد الفهد

[الحمدان]

تجمل ترى والله ما للجميل إنكار
ولاينكره من كان في راسه مروّه

عسى راعي أبشر ماتقفي به الاقدار
ولا ينقطع ذكره ولا ينطفي ضوّه


سلمان بن رازن

[الحمدان]

نضحك لو إن الزمان يزيد بأحزانه
يوم الرّدي لا مشى تقصر خطاويّه

ونصير للأجنبي واحد من أخوانه
يوم اتّصدد عن الوقفه بني خيّه


تركي عواد

[الحمدان]

الاقشر اللي فالعمل مايساعد
ومن جاه ماحصل كرامة وتقدير

باكر ليا حاشه نظام التقاعد
ماعاد يلقى من يمسيه بالخير


عبدالله بن عون

[الحمدان]

الله ولا بعض الكلام اللي يحطك في حرج
الكلمة اللي ما تجمّل خلها في فالها

ودك يقولون العرب وش فيه ساكت ماهرج
ولا يقولون العرب ليته سكت ما قالها


حزمي سعد

[الحمدان]

رجلٍ يجي تكميل عند المشاكيل
ورجل طلع بين المشاكيل صيته

هذا يدل بيوت كل الرياجيل
وهذا يدلون الرياجيل بيته


نايف ابا العون

[الحمدان]

لاتجامل العالم ولا تعبد وجيه
ولاتهاون للرياجيل وتهون

والله ماترضي الناس باللي تسويه
لرضيت لك عشره زعل منك مليون


عمران الزراقي

[الحمدان]

اللي ليا مدْح ابن عمه تعومس
وقام يتعقد ناظره عند الاجناب

تراه ليا اشتد الطلب ما ينومس
خسارة فيه العوارض والاشناب


مدشوش الاكلبي

[الحمدان]

هقيت فيك الطيب واثري مغامر
الله يسامحني على هقوةٍ ظلم

جعلك لبو قدام وابشر وتامر
فدا يابوبشوف وارد لك علم


حمود خلف

[الحمدان]

‏لولا المباخر ماعرف طيب الطيب
ولولا المواقف ما عرفنا الوليده

وانا اشهد انك كاسب العز يالذيب
ياللي علومك فالمواقف سديده


نايف التويجري

[الحمدان]

الردي لامن خدمته وموضوعه كبير
لا هو بذاكر جميلك ويمكن يجحده

والسنافي لو خدمته وموضوعه صغير
شفت معروفك يبّين على ولد ولده


عبدالله دليهي

[الحمدان]

انا ادري ان العمر ماراح يجمعنا
غضّي النظر عن علاقتنا وطاريها

بضحك على كل باكر مالها معنى
وابكي على كل أحبك ما نطقتيها


.....

[الحمدان]

أخس نوع من الخلايق ثلاثه
يالله عساهم للفناء لايزيدون

أولهم اللي فيه ثقل وغثاثه
ومسويٍ حاله على العالم يمون

والثاني اللي ما يخلي الخباثه
ويمثل إنه بالشرف خيرة الكون

والثالث اللي فيه مثل الغلاثه
على خفايا الناس واللي يسوون


يوسف العضياني

[الحمدان]

سولف وحاول ما تكثّر سوالفك
الهرج مفتاح الصدور المقافيل

اما يحطك في مكانٍ يشرفك
والا يحطك مضحكة للرياجيل


وصل العطياني

[الحمدان]

ماني مغني كل ماغنوا الناس
بعض القصايد بنت عم الفضيحة

أما تجيني فكرةٍ تقعد الراس
والا أستريح وتستريح القريحة


وصل العطياني

[الحمدان]

أنا رجل يعرف وش له وش عليه
والا ماعندي بشنب أطلق شنب

ماتحركني حركات السّفيه
لابهت والا ظلم والا كذب

الذكي يسمع هل الرأي الوجيه
والغبي مع قل عرفه قل أدب

فيه نقص اللي يشوف الزود فيه
والعرب ماهم سوا وعلى حسب


عبدالله علوش

[الحمدان]

‏عسى لنا مع مقاديم العرب خانه
ومن حظوة اهل التردّي مالنا حظوه

احد ٍ نخلي مشاغلنا على شانه
واحد مانجلس معه حتى على الفضوه


سلطان بن بتلاء

[الحمدان]

ماهو دليل الاسم بفعول الاجواد
احذر تقارن بالاسامي شريحه

احيان شخص اسمه يخلّد للاحفاد
واحيان للمترديه والنطيحه


احمد السليس

[الحمدان]

دون الخوي والله إني ماني بناطر
الضيقه اللي بصدره ما يدرجها

عمز وتاقى رفيقن يبهج الخاطر
يصادم الروس لين الله يفرجها


محمد بن شافي

[الحمدان]

يا أهل المصالح مالكم عندنا شي
نعرف خوافيكم ونعرف خطاكم

لو نكشف الاوراق ونزيد بالكي
نلقى العجاج اللي يلوث سماكم


محمد بن شافي

[الحمدان]

تجاهل الجاهل على شان ترتاح
وأسمع من العارف لا منّه تكلّم

لاتندفع وتنطّح اصياح بصياح
أصمت وحاول تستفيد وتعلّم


بدر العايذي

[الحمدان]

اول شروط الصاحب الله يسلمك
الصاحب اللي صحبته ترفع الراس

إن شاف لك هفوة سترها وعلمك
وإن شاف لك ميزة يعلم بها الناس


عبدالله الطلحي

[الحمدان]

‏طابت خواطرنا من مطارد الناس
من طردهم مدري وش اللي جنينا

اللي يبينا منزله هامة الراس
واللي يبى الصده لايشره علينا


عبدالله الدخيل

[الحمدان]

الله ولا خوة ضعيف الروابع
الي على ربعه يحد السكاكين

صحيح ماتشبه بعضها الاصابع
وحنا عن ضعوف الاوادم غنيين


سعد الرويبخ

[الحمدان]

بين الردى والطيب فرق وعلامات
وترى المواقف تكشف اللي تخفى

صيت الكفو يبقى ولو قيل لك مات
وألا الردي ينسى نهار يتوفى


سلطان بجاد

[الحمدان]

‏مانيب اعارض عابر في طريقه
لاصار مابينـي وبينه علاقه

اقفي عن المقفي عساه بحريقه
اخير من طرد المقفي فراقه


مشعان الطنباوي

[الحمدان]

جنّب دروب مكسرين المجاديف
اللي نجاحاتك تسبب مرضهم

وأبعد عن اللي يجحدون المعاريف
ان مالقوا ضيفه تعشوا بعضهم


سمران القثامي

[الحمدان]

ترى التواضع يجعل الشخص غالي
والكبر شين وعادته يقتل الحي

ناسن تشوف نفوسها بالعلالي
والواقع الملموس تطلع ولاشي


أحمد الذبياني

[الحمدان]

الوجيه اللي على الحشمه تربت
من نواها بالردى يفدى لحاها

والوجيه اللي على الفزعات لبت
جعل منهو ينقل النمه فداها


بندر بن مبارك

[الحمدان]

غفلنا وإنشغلنا بالزمن ياربنا رحماك
ورجعنا خاشعيـن ولا معنا الا هقاوينا

وقفنا عند بابك مالنا مطلوب غير رضاك
معاصينا كبار وعفوك أكبر من معانيها


مشعل الزعبي

[الحمدان]

‏خلّك مع نظاف النفوس البسيطين
اللي ما تربطهم معاك استفادة

الطاهرين الطيّبين النقيّين
ما لك مع أصحاب السعادة سعادة


مشعل الزعبي

[الحمدان]

الله يمحق بارد الوجه والحيل
في كل مجلس بالنميمة مساهم

خبلٍ عجز يلحق فعول الرياجيل
وقام يتردى بالحكي في قفاهم


عمران الزراقي

[الحمدان]

‏سلام الله على الصدر الوسيع ودامح الزلات
مخيب ظن نقال الهروج وراعي الفتنه

تقول مركبٍ بذنه جهازٍ لانكر الأصوات
يعرف الهرجة اللي طالعة من جيفةٍ نتنه

إليا جته العلوم التافهه راحت تقل ما جات
وإذا جته الحمول الكايده عرض لها متنه


عبدالله بن عون

[الحمدان]

‏ترى الردي لو تدفنه بالمعاريف
لاغاب عن عينك ليالي نساها

ولا جاء لزومك ما لقيته ولا شيف
ما بان به طيب الرجال وعطاها


الهاب بدر

[الحمدان]

‏من قال قل المال عوق الرياجيل
قولوله ان المال تبت يدينه

العوق والله طيحته في يدبخيل
ولا الكريم معان والله معينه


جزل العتيبي

[الحمدان]

لا بارو الاصحاب في وتردو
يالحيتي في شاربي ماتهونين

لاشفتهم في حزة الضيق صدو
مالي بهم في حزة اليسر واللين


جزل العتيبي

[الحمدان]

العبد لامنّه عصى طوع مولاه
تولّجه شيطان الأنـفس وذلّه

وان كان ربه بالمرُوفه تولّاه
نادى له منادى السعادة ودلّه


عبدالله الشلوي

[الحمدان]

اساير الوقت وعيوني على الساعة
والهم يزداد لا دارت عقاربها

يالله دخيلك من الهجران ووجاعة
ومن دمعةٍ ترقب لمرجاع غايبها


احمد السليس

[الحمدان]

يهب يامجلسٍ لا جاله الشايب
يجلس فالاطراف والجهال في صدره

يقفّي الشهم عنه وخاطره طايب
لا رافعٍ قدره ولا طارحٍ قدره


عبدالكريم المحينيش

[الحمدان]

‏ياللي تدرّق عن وجيه المواجيب
جنّب نحور نحورها وإجتنبنا

ما انته بغالبنا على مزارق الطيب
والا الردى تقدر عليه تغلبنا


عبدالكريم المحينيش

[الحمدان]

من يحب سلومنا حنا نحبه
ونتمنى كل يوم إنّا نشوفه

من قوانين الشجاعة والمحبه
ماتبعنا اللي يعرضنا كتوفه


ناهي الجابري

[الحمدان]

ياصاحبي خذ الهدوء من ناحيه
ومن ناحيه اخرى خذ الشي الأصح

مالك ومال العالم المتناحيه
اللي علينا بالكلام تلْح لَح

حنّا بلشنا فالعقول الصاحيه
مهوب عاد اللي عليها قلّ صَحّ


سفر بريك

[الحمدان]

يالعبد لاتشكي همومك على العبد
اشتك على اللي في يدينه مصيرك

تشكي على المخلوق من دبلة الكبد
واللي دبل كبدك دبل كبد غيرك


نايف ابا العون

[الحمدان]

ايه اعترف اني معك حيل حساس
اضيق لو ماقلت لي كيف حالك

كريم لكنّك معي ابخل الناس
في شوفتك في مواصلك في اتصالك

تعال واسمعني من الراس للراس
البيت هذا ثبته وسط بالك

عطني عمر ثاني وقلبين وإحساس
وانا اوعدك أنساك واعشق بدالك


ثامر شبيب

[الحمدان]

يامن تبسم فَمْك هذا ماهو فم
هذا من الحان السماء الكريمة

لمة خدودك مثل جمعة بني عم
تجمعوا من شان رد الظليمة


رضا حليس

[الحمدان]

ان شفت لك باب مسكر ومسدود
غيره مية باب وطريقٍ تدله

محدن بميّت في رجا شخص محدود
كم شخص يكره حاجةٍ خيرةٍ له


عبدالله بن شايق

[الحمدان]

ترا مزحنا في مخالط الناس كله ذوق
ولا يكسر العزّة ولا يخدش الحشمة

ضعيف الروابع كل ما زم خشمه فوق
عطيناه درس من التواضع على خشمه


عبدالله بن مجحود

[الحمدان]

يازين مكتوبك وياحي ذا العين
وحنا على ماقيل سمعٍ وطاعه

مانزل رقاب الكفو والسلاطين
الا الهوى و الموت مابه شفاعه


ابو وسام

[الحمدان]

مانزّل الدمعه سوا فقد غالين
يطيح لو نلبس قناع الشجاعة

احدٍ يجي طاريه من حين لاحين
واحدٍ يجي طاريه في كل ساعة


ابو نواف

[الحمدان]

ماكل بشت تشوف راعي فعايل
كم بشت يبغى بشت غيره يذريه

ولا كل رجلٍ كل ماقال طايل
بعض الرجل قوله فلا يعدي يديه

كم واحدٍ يتعب عيال الحمايل
تجملو به بس مابينت فيه


عايد حواس

[الحمدان]

اسياد وانصادم شغاميم واسياد
قبل يسود الحكم مكه وطيبه

واليوم حنا اخوان وامجادنا امجاد
مثل القريب اللي ينومس قريبه


ابوسامي

[الحمدان]

نعشق ‎سمان الهرج والقاف الثمين
يوم اغلب القيفان مامنها جدا

به ناس شعّارن وبه مستشعرين
احدٍ حبى واحدٍ مشى و احدٍ عَدا


ابو نواف

[الحمدان]

‏يميّز الانسان .. عقله وثقله
‏وانا بعمري ماتصنعت ثقلي

‏اخاطب الجاهل على قد عقله
‏واخاطب العاقل على قد عقلي

.....

[الحمدان]

‏لاستانس الخافق ذكر من يحبه
‏ورجع يراجع فى الوناسات مافات
‏
‏يا مرتع القلب الحزين ومربّه
‏يزين بك مثل الذهب صدر الابيات
‏
‏هيهات ينسى القلب شخصٍ يحبه
‏وهيهات يدله خاطري منك هيهات
‏
‏ونبع الغلا عندك وعندي مصبه
‏ومن الوله في خافقي لك ولايات

بن فطيس المري

[الحمدان]

أنا الثقيل الثقيل اللي معك ماثقل
عطاك مالا عطى غيرك ولا قال هات

أحبك بقلب لا والله بقلب وعقل
محبة العفِّه اللي مابها مغريات

.....

[الحمدان]

دام عز النفس باقي يا زمان الكوبه
‏والله إن شبحي بعيد وعزتي تغنيني

‏القدر حُكمه كذا والاّ الزمان اعجوبه
‏ما لقيت من الفرح ذره ولا يسقيني

‏العطا مد الكريم معجل بالتوبه
‏لا نوى يونسّ خفوق ولانوى يشقيني

‏جعل رزق الاوله من حظنا مكسوبه
‏وجعل خيره والفرح من مدته يعطيني

.....

[الحمدان]

يامهرة العز عيشي اجمل اوقاتك
ست الاصايل فريده صعب ترويضك

‏جزل القوافي تفاخر في مناجاتك
طاغي حظورك جميل وصعب تعويضك

....

[الحمدان]

‏ما بالقلوب البيض فتنه وتحريض
إمجمله واصحابها جملوها

.....

[الحمدان]

‏عزيز النفس مايقبل محبه بابها مسدود
‏ولا يمشي على دربٍ يذل الراس ويضره

.....

[الحمدان]

‏جالس لحالي على مركاي متمركي
‏أراجع اللي مضى وأبكيه وأفتكره

‏ما غير أردد قصيدة متعب التركي
‏توديع الأحباب مثل الموت له سكره

.....

[الحمدان]

‏مرحبا يام خصرً كن طاويه جوع
‏من يشوفه يحلْف انه مجوّع شهر

‏حط فيك الله مْن الزين من كل نوع
‏ لبةٍ تسحر وعين وقوام وطهر

‏ والله اني قنوع وفيك ماني قنوع
‏ودّي أسوق لك كل العذارى مهر

‏ قومي وطفي اللّمبه وشبّي الشموع
‏وقولي لفارعات الطول موتن قهر

.....

[الحمدان]

‏يوم اقّبلت قام السحاب يتزبّر
‏عيونها والموت ما بينهم فرق

‏الرمش اقام الفرض والجفن كبّر
‏وعيونها الثنتين صلّت بنا شرق

.....

[الحمدان]

وش يفيد البوح لو نبغى نبوح
دام بعض البوح يوصل للندم

.....

[الحمدان]

‏من تجاهل وجودي ماحسبله وجود
‏علم اهل القلوب اللي غطاها الصدا

‏والكبر نقص بالناس ماهو بزود
‏والردي طول عمـره من ردا في ردا

.....

[الحمدان]

‏ان غبت عنكم بالجميل اذكروني
ولا تبخلوا نحوي بخالص دعاكم

وعن كل ما جاكم خطأ سامحوني
قلبي على طيب النوايا معاكم

.....

[الحمدان]

‏ياللي تربيتوا على الذل والهون
‏راع الضعافه ما يخلي الضعافه

‏حتى لو انكم قلتوا اللي تقولون
‏مافي مجالسكم حقوق الضيافه

‏ظنوا عساني فوق منتو ماتظنون
‏ياهل التبجح بالجهل واللقافه

‏صرتوا على قل الكلافه تمونون
‏قلة سنع ماهي بقلة كلافه

‏صارت مبادينا رسالة تليفون
‏وسلومنا صارت مجرد خرافه

‏ماعاد به شي مع الوقت مضمون
‏حتى سحاب الصيف صرنا نخافه

.....

[الحمدان]

يارب خاطرنا من الوقت مكسور
والهم فينا مثل عالي جباله

كلن بهذا الوقـت يشكي من الجور
وكلن تقهوى من مواجع دِلاله

.....

[الحمدان]

إن ضاقت أيامك وتحتاج تغيير
لا تظهر الأوجاع والحزن خبّه

العمر ضحكة ضيّعتها المقادير
وماعاش غير اللي رضا بحكم ربّه

.....

[الحمدان]

ماعادت الايام هي نفس الايام
ولاعادت الناس الحبيبه حبيبه

احتار فكري قبل تحتار الاقدام
الدرب موحش والمشاعر غريبه

.....

[الحمدان]

‏خاطري لا زال يهمس لك غلا
‏كل مره من يسار ومن يمين

‏اشهد ان القلب ما عمره سلا
‏غير صوبك واسمعوا يالحاسدين

.....

[الحمدان]

كانك تذكرني على البعد لحظات
فأنا على كثر الوله مانسيتك

تهزني الذكرى على كل مافات
لاغبت عن عيني بقلبي لقيتك

حزني وشوقي والليالي لك إثبات
إنـي على درب الغلا ماجفيتك

.....

[الحمدان]

‏ما يلحق التقصير عزمي وباسي
‏لكن ظروف الوقت عيّت ترفق

‏ما عاد ابي عقل الذكي والسياسي
‏اليوم ابي حظ الغشيم الموفق

.....

[الحمدان]

‏ليتك تعدي على خير يالثلث الاخير
‏ويتبيّن نور الاشراق للي يرقبه

‏أنا حالي في ظلامك مثل حال الاسير
‏اللي تاخذه الطواري لداره واعربه

‏اتظاهر بالسعاده واقول اني بخير
‏واتحاشى الليل والذكريات المتعبة

‏الفراق يضيق الصدر ويحوس المرير
‏والهوى غلاب والشوق ملعون رقبة

.....

[الحمدان]

الحب مثل النوم والوصل الاحلام
‏والشين من الاحلام صد المحبين

‏نوم ٍ طويل ٍ عمره اشهور واعوام
‏وان قمت ففهمها فراق وسهر عين

‏وانا رقدت وعمري اربع عشر عام
‏وصحيت في شهر اربعه عام الالفين

‏نوم ٍ ثقيل ٍ كله احلام واوهام
‏ونصيبي من احلامه الجانب الشين

محمد بن فطيس

[الحمدان]

صافحت في كفي خيال العزيزين
واثره جنون الشوق صافح يديني

.....

[الحمدان]

نذرنالك تجي وندعيلك تعود
عمت سچينا وشيب نذرنا

شعر عراقي

[الحمدان]

آنة منَيلي لو مَا عَلي ويايّ
نَعمة من اللّٰه لَمن صَار مَولاي

وادِم فُقرة ماَنملُك مِساكين
بَس عَدنة عَلي مكَفينة وَهواي

شعر عراقي

[الحمدان]

ماني بدايم وانا مبسوط ومروق
احيان ماودي ان احدٍ يحاكيني

واليوم كن قلبيٌ بلوعاته مطوق
من صد عني فهو متجملٍ فيني

.....

[الحمدان]

‏تبي الصحيح أني بلياك مفقود
جسمي هنا والروح عندك وهايب

تفداك عين تنظرك وأنت موجود
ويفداك قلب يذكرك وأنت غايب

.....

[الحمدان]

قد قالو العاشق خفوقه دليله
وانا خفووقي طاح في كف يمناك

وان كان حبك يستفز القبيله
ماهمني لو تزعل الخلق لرضاك

.....

[الحمدان]

‏أقـدّر الصادق وأحب الوفيين
وأكنّ للشخص الكريم إحترامي

أكره دروب المصلحة والرديين
من خلقتي بالكون هذا نظامي

.....

[الحمدان]

ضايق ومستانس وراضي وزعلان
مدري وش اللي جمًع الكل ​فييني

احيان اجر الصوت مغرم وطربان
واحيان اجر الصوت وتھل عيني

.....

[الحمدان]

‏ياصدري اللي على الكتمان متعوّد
ياكبر قدرك مادام الناس ماتدري

خلك على واقعك بالصبر متجوّد
لين الله يبدل الأحوال ياصدري

.....

[الحمدان]

ما هو صحيح القلب للقلب شاهد
لو هو صحيح أصبحت مفتون فيني

بيني وبينك حب من قلب واحد
ليته يجيك من الهوى ما يجيني

وليتك تعرف الشوق لي صار واجد
وليتك تعرف أوجاع كثر الحنيني

.....

[الحمدان]

يا ليتنا نجرح مثل باقي الناس
‏ونكسر خواطر من كسرنا ونقسى

‏لكننا من كثر ما نملك احساس
‏نجبر خواطر من كسرنا وننسى

.....

[الحمدان]

‏فـي ميادين الغلا طفنا وطفنا
‏وغيرنا بـالحب كم طاح وتعثر
‏
‏ياعسى مانختلف واليا أختلفنا
‏اختلفنا مْن يحب الثاني أكثر

.....

[الحمدان]

بنيت لك في خفوقي بيت لك وحدك
‏محدن سكن فيه غيرك وانت به تدري

‏حتّين طاوعت نفسك وانتهى ودّك
‏وارخصت بعد الموده بالجفا قدري

‏هدمت بيتك كسرت ابوابه ابيدّك
‏واغلقت باب الهوى مابيننا بدري

.....

[الحمدان]

‏هذا نصيبي مع الايام من صغري
احيان اقوى الحزن واحيان ما اقوى

لوتدري الناس ويش اشيل في صدري
ماعاتبتني على شغلات ماتسوى

.....

[الحمدان]

‏مهره عنيده ساسها هيبة شيوخ
بنت النشاما والفعول الجزيله

المتعبه بِترويضها كل مطنوخ
الكايده والنادره والأصيله

.....

[الحمدان]

يالله توسّع خاطري دامني حي
وتجعل هناي وراحتي في صلاتي

يارب مابي خاطري يكسره شي
ابيك تسعد ما بقى من حياتي

.....

[الحمدان]

الله يطول عمرها قولوا آمين
اللي ليا من شفتها إنزاح همي

هي دنيتي هي جنتي قرة العين
وان قيل منهي قلت ماغيرها امي

.....

[الحمدان]

اي والله إن الزمن غيّر عناويني
ماعدت انا الاولي ياوقتي التالي

اول ليا رحت ادوّر من يخاويني
واليوم ما ادوّر الا السجة الحالي

.....

[الحمدان]

ياسايق الفنجال يامدرج الكيف
ياللي لذيذ البن الأشقر تسوقه

صبه لمنهو يحتزم فالمواقيف
اللي علوم الطيب دايم تشوقه

.....

[الحمدان]

أشتقت والي حط في قلبي الشوق
ما فيه ليل يْمرني ليل هادي

في داخلي غصّة وفي صدري فْتوق
ولا رحت أدوّر عند غيرك ضمادي

فرقت في عيني ولا فيه مخلوق
ينافسك والي ينافسكْ غادي

ياليتك العادي ولا تملك فروق
واستسهلك ويْكون فرقاك عادي

.....

[الحمدان]

‏لا النوم نافع ولا التفكير نافعني
‏أنام وأصحى على باقي وصوفك
‏
‏بالله قلي شعوري هذا وش يعني
‏طمني الله يطمن همك وخوفك

.....

[الحمدان]

‏أغليك والدنيا حظوظ وتوافيق
يالي غلاك بخافقي انفرض فرض

ودعتك الله عن عيون المخاليق
لأنك ملاك يعيش في كوكب الارض

.....

[الحمدان]

‏اثر البيوت بدون اهلها ولاشي
يجلب محبتها غلا من سكنها

في مامضى نشفق على البيت والحي
واليوم لا مريت صديت عنها

.....

[الحمدان]

فـي نسيمك أجمل انواع العطور
وفي وجودك نور من كل الجهات

الحياه احساس والهام و شعور
وانت اجمل من ملذات الحياة

.....

[الحمدان]

‏ما كان عندي وجودك باب وأتسكَّر
يامطول الليل يوم يمر من دونك

تحسّسّ الصوت هذا زين وأتذكَّر
كم داعب أذنك قصيد ونوَّم عيونك

.....

[الحمدان]

‏ياخاطري لا يزعجك من يقفون
طرد المقفي للنشاما ملامه

من جاء نرحبه من القلب مليون
ومن راح قلنا رافقتك السلامه

.....

[الحمدان]

‏فيني ملامح من حكايات وجروح
‏طبع الزمن يترك على الوجه بصمه

‏مھما احاول اخفي الجرح بمزوح
‏ تجي ظروف الوقت وتعيد رسمه

.....

[الحمدان]

‏لاصار طبعي يابيض الوجه دماح
‏لاتحسب اني ميت القلب والروح

‏بعض الخطايا موجعه كنها رماح
‏وبعض الخطايا تاخذ شوي وتروح

.....

[الحمدان]

قلوب البشر ياصاحبي لها مفاتيح
وكل قلب مفتاحه بوصف وعلامة

وإذا تبي مفتاح من غير تصريح
افتح قلوب الناس بالإبتسامة

.....

[الحمدان]

حداني على الفرقا وانا كارهن فرقاه
عليهَ الله اكبر كيف كسر مجاديفي

.....

[الحمدان]

مرات حاجه تحدك وانت ماودك
ومرات زود العشم يورث الخيبه

يردك اللي تحسبه يوم ماردك
ويذلك اللي تبالغ في مواجيبه

.....

[الحمدان]

وينك تعال حروف الشوق لك ولهى
ياقرة العين يا نفسي وما فيها

اناظر الوقت واسرح بك وثم اسهى
واقلب الذكريات بكل ماضيها

.....

[الحمدان]

عمر التجاهل ماحفظ قيمة انسان
وعمر التجافي ما يحل الصعايب

احذر تكون انسان مخطي وغلطان
في قلب من عدك جميع الحبايب

.....

[الحمدان]

وحنا صغار نقول ياليت نكبر
حتى نعيش بواقع مانطوله

واليوم حنا نقول ياليت نصغر
حتى نعيش أيام ذيك الطفوله

.....

[الحمدان]

المحترم يُحترم ونبادله الإحترام
والسفه لاهل السفاهه ضربهٍ قاضيه

وان جاتنا الكلمه الهزله تراها كلام
ما حن بفاضين نردع كلمهٍ فاضيه

.....

[الحمدان]

‏الجفا مثل الشتا برد وصقيع
والمواصل للقلوب أحلى دفا

ان شراك الخل ابدا لا تبيع
المحبه عهد والدنيا وفا

.....

[الحمدان]

ما قطع كف الوفا غير الشكوك
وما جبر كسر القلوب الا الوفا

وما رفع للناس لاصف الملوك
غير جود الكف وانسان عفـا

يوم تنجح ياكثر من يحسدوك
ويوم تفشل ياكثر من قد جفا

ويوم لوشافـوك تعلو جاملوك
وان تطيح بيوم خلوها احتفا

.....

[الحمدان]

‏أنسى هموم البارحه واضحك اليوم
واضحك على نفسي إذا قلت مرتاح

هو القدر والخير والشر مقسوم
آمنت باللي في يده كل مفتاح

.....

[الحمدان]

‏لا تساومني وأنا أدري وأنت تدري
إني أعاف الجفا لكن ما أخافه

خابرٍ قدرك بصدري بس صدري
ما تعوّد يلحق المقفي حسافه

.....

[الحمدان]

مهما يضيق الحال لابده يزين
واللي يغيب يعود بعد البعادي

ومـن يقدرنا على الرأس والعين
حنا معه بالطيب وصدق المبادي

.....

[الحمدان]

‏وجهك اجمل وجه واجهته وصوتك هادي
‏كيف اصد من الحلا هذا وكيف اخونه

‏لجل وجهك بايعٍ عمري وجاي مفادي
‏والله ان مالي حياةٍ فالحياه بدونه

.....

[الحمدان]

‏الناس والدنيا منازل بلا ساس
رحيلها وان طولت مقتفيها

هذي هي الدنيا وهذي هي الناس
خسران من علق هقاويه فيها

.....

[الحمدان]

إعفني من لمحة الحزن فالوجه الوسيم
‏وإعفني من لمعة الدمع فالسود الوساع

‏ولا تخاف أنساك مانساك يالضيف المقيم
‏انت كنزٍ ما يضيّع وسرٍ ما يذاع

.....

[الحمدان]

‏اوجعتني وانت ماتدري لو انها مزوح
‏وفهمت وش مقصدك منها وقاسيتها

‏اسكت الحزن فيني وتنطق العين بوح
‏حسبي على دمعتن لرضـاك هليتها

.....

[الحمدان]

اغار من شوقي اذا جاك مشتاق
وشلون يسبق شوف عيني لعينك

لك الغلا من داخل الروح ينساق
اسقي ثواني لهفتي من سنينك

.....

[الحمدان]

‏لا خان غالي غيره الفين غالي
واليا جحد واحد ميه يذكرونك

ما راحوا الطيبين واذْكر مقالي
الطيب واجد لو تدقّق عيونك

لا تعامل الناس بغرور وتعالي
عامل مثل ما ودّك يعاملونك

.....

[الحمدان]

جعلني عون لربعي اليا طال الطريق
وجعلني با العز والصبر محضوض وقوي

وجعلني قدام لا اموت ما ازعل صديق
وجعلني مارد محتاج ولا افشل خوي

.....

[الحمدان]

‏ان ضاق صدرك بين هم وحاجه
‏لاتبدي اسرارك على غير موثوق

‏ولو كل من يمرض عرفنا عـلاجه
‏ماضاعت الدنيا ولا مات مخلوق

.....

[الحمدان]

‏خل في صدرك على الدنيا قبول
‏واعرف ان الشمس تشرق لو تغيب

‏وعود لسانك ليا ضاقت يقول
‏الأماني في رجى الله ما تخيب

.....

[الحمدان]

عودت قلبي عليك وشلون عودته
قدرت تسكن باحساسي وشرايني

ناداني الشوق لعيونك وطاوعته
خليت قلبي يحبك غصب عن عيني

.....

[الحمدان]

‏ينكسر غصن الزّعل لا إرادي
نظرتك تغفر وضحكاتك سكينة

والله إني ما أهيم بكل وادي
بس ميّت في قسى قلبك ولينه

.....

[الحمدان]

‏سوالفه من حرير وضحكته ونسه
‏رقراق نهرٍ على طول السنه يجري

‏اللي تبيّ صبّحه بالخير أو مسّه
‏هو كل ألاوقات بس الناس ما تدري

.....

[الحمدان]

‏على غزير الدمع ضميـت الاهـداب
صديت لين الدمـع يقفـي سحابـه

بعض الوجع يمكن تداويه الاعشاب
وبعض الوجع ياويل من هو سطابه

.....

[الحمدان]

بعيد عن بعض السوالف والمشاغل والزحام
البال مبطي ما هدا والقلب جرحه ما رفا

أرضٍ خلا في جوها سجه وراحة وانسجام
لا أحدٍ يلحقني عتب ويقول وش فيه اختفى

....

[الحمدان]

‏الشوق لاحسيت به قول مشتاق
‏وابدي شعورك له ولو كان عابر

‏مايمنع انك تظهر اللي بالاعماق
‏لأن الوصل ما يدوم للي يكابر

.....

[الحمدان]

الطيب كايد والليالي محاصيل
‏والطيب اللي للظروف ايتصدّى

‏واللي تعذر عن لـزوم الرياجيل
‏ابرك من اللي قال تم وتردّى

.....

[الحمدان]

دقت الساعه على مَوعد لقاك
والعيون من الفرح يرثى لها

من كثر ما خَافقي عَاشر غلاك
ضَم كل طيوفك وغنى لها

.....

[الحمدان]

كبدي اللي من الايام فيها وفيها
كنها حدر جمر وكنها فوق مله

البشر ماهي بتنباع لجل اشتريها
وانا ماعفت احد من رخص ولا ممْله

عزة النفس تمنع من تربى عليها
وانا قلبي ماقلت اخذه ولا قلت خله

الحقيقه بتسمعها ولو ماتبيها
انتهى كل شي وربي وربك الله

.....

[الحمدان]

أنتي اللي تستحقين مالا تملكين
‏من كنوز الارض ومن الحفاوه والرحاب

‏والله إنك يوم تمشين بين العابرين
‏ودي إن الارض تحتك ذهب ماهي تراب

.....

[الحمدان]

‏ألا ياقلب لا تشره عليه ولي متى غيره
‏يغيب براحته خلّه يروح بعالم النسيان

‏كفاك تدوّر أعذار لغيابه فضّها سيره
‏تماديت بغلاه ومن تمادى بالغلا خسران

‏يقولون القمر لاغاب يضوي له على ديره
‏وانا أقول الحبيب ان غاب يضوي له على خلّان

.....

[الحمدان]

‏لا يهمّك طالع الذكريات بنص عين
‏واحرق صورّي ليا مرّك البرد وتدفّ

‏سهله تعيش الليالي وفي صدرك حنين
‏بس صعب تعيشها وانت ماعندك هدف

‏ما نويت اطاوع العقل لو انّه رزين
‏انت غالي بسّ الايام ملعونة جدف

‏رغم حوم الشك حولي بقى عندي يقين
‏لو تفرّقنا الليالي بتجمعنا الصدف

.....

[الحمدان]

عن البال ما راحت طواريك لجل تعود
مثل كل ليلة طيش مرَّت على تايب

طبيعي بان الناس تستشعر الموجود
وأنا أستشعرك موجود وأستشعرك غايب

.....

[الحمدان]

اعذارك الواجد كنها فلوس الحرام
مهما بلغ كثرها والله مافيها بركه

.....

[الحمدان]

مما قيّل في بيت المحبُوب :

- فهد الشهراني يقول :
أمرّ بيتك وأقبّل بابه وسوره
وأتعجّب انك سكنتيه وسكنتيني

- ابن مشيط يقول :
والقلب بيتك وحدك وأنت في حدّك
مايسكنه غيرك ولا رخصته إلا لك

- ابن فطيس يقول :
وأمر بيتك من بعيد ولا أجيه
وأنا لو أنه في يدي ما تعداه

- محمد السلطان يقول :
كيف أمرّك وأنت خابرني تحت شجْرَتك باقي
أنت بيتك ياحبيبي ماتَركْتِه لأجل أمرَّه

[الحمدان]

‏حمرة شفاياها مناقع زعفران
‏أبطت مراويح السحاب تكدها

‏عينٍ رهاويه وعنقٍ صولجان
‏وزينٍ يخلي كل عين تودها

‏عجايب الدنيا لا سبع ولا ثمان
‏ثنتين في يمنى ويسرى خدها

.....

[الحمدان]

ياصاحبي والضيق متولج الجاش
باين على وجهي من الضيق أدله

ماكني الا ضايع الفكر منداش
ودرب السنع عيت عيوني تدله

.....