فوق هام السحب ( الشعر الشعبي) على متن القوافي

[الحمدان]

تدري من المرتاح مرتاح الضمير
اللي عن الدنيا بربه مغتني

.....

[الحمدان]

الجادل اللي تعداها قصيد الملام
يا ليتني ما تماديت وتحدّيتها

كتبت فيها البيوت اللي بعضها حرام
وانا علي الحرام اني ما مسيتهـا

.....

[الحمدان]

أضحكي يا جعل تفداك الكثيره والقليله
أضحكي يانسمة أيلول الشهيره في نهاره

كله ولا تذرف الدمعه من العين الكحيله
أنتِ عيونك تدلل والطلب رهن الإشاره

.....

[الحمدان]

من قلة الحيله ومَن زود الاحزان
لو اركي الدلة على الصدر فاحت

.....

[الحمدان]

قلوبنا من طيبهـا تحفظ الطيب
واللي يجينا من ردى الناس ننساه

.....

[الحمدان]

لا شانت بوجه المحب المقادير
يسري مع الهاجس وبرق الخيالي

يسرح بهـالدنيا بحلو التفاكير
ولولا الأمل ماتت ظنون الرجالي

.....

[الحمدان]

خلك جبـل صلف الهـوى ماتهـزه
تصفق وتركد والجبل في مكانه

للصمت وقـت وللمشـاريه حــزه
واحيان في بعض التغافل ذهانه

.....

[الحمدان]

احن واشواق الغرام اعصفت بي
وقلبي فراقك ساعة ما يطيقه

محبّتك يا روح روحي صطت بي
والدمع في عيني من اجلك غريقه

.....

[الحمدان]

لفاني السهر يسحب ردونه على المعتاد
وقرّبت له مركى السوالف وحييته

.....

[الحمدان]

من ذاق طعم الصبر زين يقول طعم الصبر زين
لو الفضاء في عيونه الثنتين وسع البنجرة

تجارب الأيام ما مرت مرور العابرين
وأيامنا لو قصرت معنا ماهيب مقصرة

.....

[الحمدان]

ودي اواسيك وارد دمعك للعيون
واخذ احساسك واترجم شعورك واسمعه

بس انا ما اعرف اواسي ولاهم يحزنون
كل ما واسيت لي شخص رحت ابكي معه

.....

[الحمدان]

تدري إني في ميادين الشعر سويت ثورة
ادعي الساحة على سطح الثريا واعزمها

سفر الدغيلبي

[الحمدان]

يا عيونً تسهر السبت وتنام الربوع
السهر لاعانق الحزن جاب الي وراه

ااه ياطول المسافه ويا صعب الرجوع
عقب مشتنا الليالي على غير اتجاه

.....

[الحمدان]

دخيلك من عيونك واحمر الخدين والنظره
ودخيل الليل لا لوّن شَعرك وكحّل اعيونك

ودخيلك من قوامك لا تثنى وانتثر سحره
ترجاك القصيد ولا وصل زينك ومضمونك

.....

[الحمدان]

الخوا ما يقطعه غير شوفك يا مليح
خل عنك اللي يقولون فنجال قهـوه

.....

[الحمدان]

تموت القلوب الخاليه بين زين وشين
وتبقى القلوب اللي على الحـب مبنيّه

.....

[الحمدان]

تعبنا من الايام والعالم الفاضين
‏نجامل وآثر ساس البلا يوم جاملنا

.....

[الحمدان]

مـــا همني حكي الخبول الملاقيف
قدري واعرفه فوق ذيك السحابـه

راسي من العزه طلوعه مشاريــف
ورثي شموخ الطيب طاري ولابه

.....

[الحمدان]

‏صرت أدور في جروحك مايثير إعجابي
‏الخطا في عيني أهون من فراغ الخانه

‏يوم حبيتك شعرت ان الجميع أحبابي
‏كنت أشوف بعين قلبي وأعترف بلسانه

.....

[الحمدان]

‏على كثر الوجيه الغايبه عن راسي المزحوم
‏حضر وجهك .. نيابة عن عموم وجيه غيَّابي

‏يعسّ بـ قاع بالي فيضة جروح، ومناقع لوم
‏وينصب له خيام من السهر ويطيّر أسرابي

‏خذاك الحلم من نوم العوافي لين صح النوم
‏وخذاني ليل لا جيت أرقده وقّف على أهدابي

.....

[الحمدان]

‏أنا عاشق جاك معلن " بالهزيمه "
‏يوم ربي لك مع العشاق ساقه

‏ارتكابك للقلوب أكبر جريمة
‏يا حسينِ الوصف وعْلو الاناقه

‏تاخذ العشاق للعشق وْ نعيمه
‏بالكلام الذرب - وأسلوب اللباقه

‏انخلق " شهدك " للارواح السقيمه
‏ليه تحرمني .. وتمنعني مذاقه

.....

[الحمدان]

‏يا رقيقة مدّي الحسْن وتمادي
‏واشرحي لليل مفهوم الوسامه

‏وافتحي شبّاك تفكيري ونادي
‏كل نجم اخايله .. تارك علامه

‏اضحكي للغيم دام الجو هادي
‏مثلك انتي ؟ له غلاه وله مقامه

‏رافقتْك الشمس يا قمرة فوادي
‏لو تدور الارض ، عدّتك الملامه

‏القصايد مالها موقف حِيادي
‏في عيونك يعلن الشعر انهزامه

.....

[الحمدان]

‏انت الجديد انت القديم انت لحظات
‏كل الثواني في حظورك سعيده

‏انت القصايد كلها وانت الابيات
‏وانتم دواويني قصيده قصيده

.....

[الحمدان]

‏اقبلت مثل الصبح لا من كفكف الليل البهيم
‏ومليت عين الي معك مبصر ومع غيرك عما

‏اثر صباح الخير منك مثل ذعذاع النسيم
‏وانا ماني باهتم في مبدا صباحي انما

‏ من كلمتك في ذمتي ذمه و والله العظيم
‏أني ما عاد ادري انا في الأرض ولا فالسما

.....

[الحمدان]

‏عليه جسم غير عن كل الاجسام
‏ مهما لبس من لبس تقول متعري

‏ وعلى كثر ما شاف من خير وانعام
‏ جميع مـا ياكل بـ جسمه يمري

‏ على المفاصل كنه يربط حزام
‏ والجلد كنه داهن بسمن بري

.....

[الحمدان]

سيّدة معشر هل الزين ربّات الدلال
‏فدوتك حرف الشعر يا مُناتي فدوتك

‏معجزه من عند ربي و آيه فالجمال
‏شوفتك نعمه ولاني بمرخص دمعتك

‏لا لمحتك انسكر كنّك الخمر الحلال
‏من تمايل خصرك إلين نبرة ضحكتك

‏اعشقيني و اغدقيني بلّذات الوصال
‏موتي وموت المشاعر بلحظة صدتك

.....

[الحمدان]

أعرف مكاني وترتيبي وتقديري
وماطيح حتى لو إن احياناً أتعثر

اللي خسرني هنيئاً له هوى غيري
واللي كسبني هنيئاً له وأنا اكثر

.....

[الحمدان]

داريت حاجات الضماير عن الخلق
‏دام الرجاء في يد منشي السحايب
‏
‏جداي و العبرات في مدخل الحلق
‏خلت حبال الصوت نبرات شايب
‏
‏كل الوجع بيهون يا صدري الغلق
‏بكره يبا يصفي نسيم الهبايب

.....

[الحمدان]

‏والله اني حافظك يالغالي بقلبي وعيني
‏حافظك وادرى عليك وكلني لك وانت غالي

‏راهنٍ روحي بمرضاتك وماتملك يديني
‏ياحسين الوصف يازين الطبايع والخصالي

.....

[الحمدان]

‏اجدد مع ذكراك عقب الغياب عهود
‏وانا والله اني خـابرٍ مانـت نـاسـيـني

‏محبتـك عـندي كـل ليـلٍ ويوم تـزيد
‏تـزيد وتجـدد دام انـا وانـت حـيـيني

.....

[الحمدان]

يا من جرح قلبي وخلاني عليل
أشتقت لك تكفى لوجه الله تعال

مالي غناعنّك اذا اعلنت الرحيل
ومستحيل انسى ونسيانك مـــحال

لعيونك الثنتين اجيب المستحيل
وادفع لها ما في يميني والشمال

.....

[الحمدان]

حي الغلا حي المحبه والأشواق
حياك ياقلبن بالأحساس وافي

أهلاً هلا ياللي له القلب يشتاق
ومهما أقول وقلت ماهو بكافي

غلاك مثل الصبح في لحظة إشراق
في داخلي يظهر جميع الخوافي

.....

[الحمدان]

‏مدام انا وانتي علــى الارض حيين
ياسعـــد عينك لـــو بكيتـــي شويه

والله لانسيك الزعـــل لين ترضين
وامهـــد لك الدنيا فجـــوجٍ فضيه

واحماك مثل حماية الجفن للعين
وكلش فـــداك اليا بغيتـــي شريه

يفداك ماشافت عيونك من الزين
لو ان متر الثوب مـــن خمس ميه

لو اني اسجل علـــى ذمتـــي دين
زودٍ علــــــى مـــايمـــلكنـــه اديه

.....

[الحمدان]

‏صرنا نراقب بعضنا من بعيد لبعيد
‏هو يحتري جيتي وانا احتري جيته

‏هذي حياة العنيد إليا عشق له عنيد
‏كلٍ ينتظر الثاني وحسب مزاجيته

.....

[الحمدان]

‏يـا معاتب الناس لاتعتب ولا تشره
موارد الطيب بين الناس معروفه

والي تجاهل حقوق وواجب العشره
اجعل حقوقه من التفكير محذوفه

.....

[الحمدان]

كنت بكلامك تاخذ الحزن عني
واليوم غبت وراح عني كلامك

ياصاحبي وشلون خيبت ضني
يا باخلاً بإحساس قلبك علامك

.....

[الحمدان]

لو طلبت الروح خذ روحــي هديه
وان طلبت القلب خذ قلبي فداك

انت اغلا مـن معـــي بين البريه
مامعــي مخلوق يتساهل غلاك

قلتها لك والقسـم من طيب نيه
من شعور انسان ميت في هواك

ولو تحب اكتب على هذا وصيه
مستعد اوصـي لهم كلي فداك

.....

[الحمدان]

‏ياللـه يلــي ما خفـى عنـك الحــال
يـاعـالــم مـافــي القـلــوب الخفيــه

تكتب لنا البسمـه وتشرح لنـا البــال
وتغفـر لنـا مـن كـل ذنب وخطيــه
‎
.....

[الحمدان]

‏المـــرجلة ماهي بعلم وشـــهادة
والعلم يابن الناس له فضل معلوم

المرجلة لو صـرت راعــــي ارادة
والله عطـاك ايمان واخلاق وعزوم

والصـــدق والهـمة ملاك القيادة
ان ما وصلت اليوم توصل بها يوم

للناس في كل المجالات عـــادة
واحد جزاه الطيب واخر له القوم

احـــد يهــدم في المواقف عناده
واحــد عناده يجعل القاعد يقوم

دنيــاك يابن ادم عـــزوم وركـادة
ولا تقضيـــها ســواليف وهمــوم

علوي الباشا

[الحمدان]

اغـليـه لـو إنـه بـعيــد عـن العـيـن
دام الـمـشاعـر فـي غـرامـه رهـينـه

الحب عـنـد الـنـاس كـلـمه و حرفـين
والحب عـنــدي لـه مـعـانــي ثـميــنه

.....

[الحمدان]

الله يعطي ابوي من عمري عُمر
‏والله لا يجعل لي من دون امي حياة

آمين

[الحمدان]

غلطان من قال البشر ما بهم فرق
أحـدٍ دوى للقلب وأحـدٍ يعله

.....

[الحمدان]

ايام عاشت بنا وايام عشناها
وايام ما كنّها عاشت ولا عشنا

إمّا بدايات بآلـغـنـا بمعناها
وإلا نهايات لم يبقى لها معنى

.....

[الحمدان]

‏لا تْغيب وأنت المصير اللي مامنَّه هروب
‏وإشراقتك تسلب النجمات من ليلها
‏
‏وشلون أضيق بحضورك وانت كل الدروب
‏اللي ليا ضاق صدري سقت رجلي لها

.....

[الحمدان]

خذاك الغياب وماخذاني عليك الغل
‏عشان السنين اللي مضت ماقدرت اقوى

‏احبك ولا عندي لنسيان عينك حل
‏موادعك شي اكبر من الحزن والبلوى

.....

[الحمدان]

تمر البال يا زهر الصباء معْ غاديات النود
‏ حديث أحلامنا يصعب على الملهوف نسيانه

‏معك ذقت الأمان ومعك أحس إني بدون قُيود
‏ أنا قلبي أمانة في يدك و يشوفك آمانه

‏يا كم عاشق تهاوى في بلاطك يالعيون السود
‏ يجاهد فيك نفسه والعيون السود فتانة

.....

[الحمدان]

لقيتك امل من ضاع عمره ورى الحرمان
‏وبديتك و انا اشوفك عوض ماضي ايامي

‏جمعني معاك اليسر عقب العسر سبحان
‏من يضحّك الخافق بعد جرحه الدامي

‏تحضنت وصلك كني الضامي الهلكان
‏يالين ارتوى فـ مواصلك قلبي الضامي

‏عليك الغلا منساق والشوق شانه شان
‏وعليك الرضا يا واهس الشعر و الهامي

.....

[الحمدان]

‏تروح مْن السنين أقسى السنين وينولد ترحاب
‏إذا شفتـك و حسّيت الليالي .. معك محفوفة

‏أضيق و معك تتيسر ظروف وينفتح لي باب
‏ورحاب الارض تاتيني على البيبان مصفوفة

‏وهبك الله إلى قلبٍ ماخاف من الزمان شجاب
‏مدام إنْك الحبيب اللي لغيرك العين معيوفة

.....

[الحمدان]

شعوري يوم أحس إن النصيب أقوى من الاهداف
‏شعور اللّي تصيبه في ضلوعَه طلقة المحتلّ

‏أنا مهما نقلت من الحمول اللّي ماهي بخفاف
‏أشوفك حلم لا يُعلى عليه ولغز ما له حل

‏مع إن الناس من حولك كثير ولا عليك خلاف
‏يراودني شعور إنك حَبيبي يا حَبيب الكل

.....

[الحمدان]

ياحرفي الي ضاع مابين الدفاتر والرفوف
‏اللي رسمته من تنهاتي ومن حبر قلمي

‏ضحيت لاجله في حروف وقمت لاجله في حروف
‏وصبرت لو النار من فوقي ومن تحت قدمي

‏يا صاحبي يالي على شانك تحديت الظروف
‏مهوب انا الي تتركه بين الخناجر والسيوف

.....

[الحمدان]

‏على النسيان ما مرَّ الطريق ولا كساك إنصاف
‏مثل ما اواجه أقدار العمر ذكراك أواجهها

‏تبين بكل غيمة ما تضرّ وكل غصنٍ جاف
‏أشوفك فالوجيه اللي أحبّ وفاللي أكرهها

.....

[الحمدان]

رجعت من الزعل تايب وتاب الله على من تاب
‏وسمحت من الزمان اللي تكسّر فيه مجدافي

‏حبيبي جعل مايقفى مواصيلي معاك غياب
‏أنا مالي بعد غيمك سحاب يبلل أطرافي

.....

[الحمدان]

أبتسم لي ضاقت بـ وجهي جميع اربع جهاتي
‏واقترب لي لا شعرْت إني فـ هالدنيا وحيدة

‏مالي إلّا وجهك اللي به زهابي وامنياتي
‏وصوتك اللي لا سمعته صارت سْنيني سعيدة

‏عادك اوّل من عرفت و عادك أحْلى ذكرياتي
‏يا هواي اللي لو يْعود العمر بـ ارجع اعيدة

.....

[الحمدان]

‏أستبحتي حرمة المجنون بإدراك وعنايه
‏وألتفتي له بعقلك وأرتكزتي في صميمه

‏أمتلكتي غايته لو كان ماله فيك غايه
‏وأنتصرتي في عيونه وأعترف لك بالهزيمه

‏من كثر ما يعشقك ما قالك بالحب رايه
‏خايف الأيام لا تطلع عواقبها وخيمه

.....

[الحمدان]

‏ويــن الذي غايــب عن العـين يا ناس
اتفرمــــت احساسي معــه في غيابه

بُعده هدم بالعقل فكري والإحساس
والقلـــب يشكي يا رفاقـــــي عذابه

أمنتـك الله لو معـك قلــب حساس
ارفق بعاشـــــق ذاب ماحــد درابه

أمسـي أفكر فيــك وأحـس باليأس
واتخيـلك في وهــــم قاسي سرابه

.....

[الحمدان]

‏فقدت من الليالي صوت ما غيّب صداه سنين
‏سكن بين القصايد نغمةٍ تطرب لها آفـاقي

‏فقدت أنسامك بصبحٍ هدوءه غاية المسكين
‏ووجهك كان عنوان الصباح وموعد إشراقي

‏اشـوفك في وجيه الناس من رحلت الين الحين
‏ملامـحٍ ترسم الذكرئ طريق يــزلزل اشـواقي

.....

[الحمدان]

‏أشوف إن المفارق مشكلة وأنتَ تشوفه حلّ
‏مثل ما الحب أشوفه إنه غِنى وتشوفه آغاني
‏
‏تمر أحلى مواعيدي معك مثل العمر وتزل
‏واخاف انك تجي في موعد وما عاد تلقاني

.....

[الحمدان]

يا قبلة غرام ٍ مبتداه الليالي ذيك
‏يوم الحب كل ٍ فيه قد خاض تجربته

‏لا تلعب عليك ظنونك أني ما عاد أغليك
‏لا والله غلاك يزيد من سبته لسبته

‏ترا قلبي اللي هام فيك وتعلق فيك
‏لو أنه يقلطني على الموت ما هبته

‏ اللي حب مثلك مستحيل أنه يخليك
‏لو أنه يحط السيف الأملح على رقبته

.....

[الحمدان]

هني والله اللي فيك مايقبل التبديل
‏يبيع الحياة إن قيل له لأجلها بعها

‏يعرف إنك أجمل ماخلق بين هذا الجيل
‏جمالك مهوب الحاجة اللي يضيعها

‏ترى الحب مايقبل من العاشقين بخيل
‏ماخاض الهوى غير أكرم الناس وأشجعها
‏
.....

[الحمدان]

‏أنا احبك بس ترى عيبي مع الغيره
‏ولا اقبل يشاركني احد من قبلك وبعدك

‏رسم وجه الفرح فيني بعد حبّك تعابيره
‏اشوف الحبّ في وجهي وكنه يقول من قدك

‏ابيك تمارس شعورك معاي بكل معاييره
‏ابي عطفك ابي لينك ابي هزلك وابي جدّك

.....

[الحمدان]

على طاري الغلا ومعاتب الغالين لـ الغالين
‏إلى شفت الكلام بـ يجرحك ماعاد كملته

‏أداري خاطرك واقدرك من اول وذلحين
‏يا حلمٍ راح نص العمر في رجواه ما طلته

‏لاياخذك الغرور وقولتي لك كل شيٍ زين
‏لو ان اللي حصل ماهو بـ منك ماتحملته

.....

[الحمدان]

ياضحكة حياتي لا تمرّ الفرص وتفوت
‏طريق الوصل مدري متى نقدر نعبْره

‏ياقوّ الغرام اللي حكمني حكم طاغوت
‏وياشين الغياب وطيحة الحظّ والثَبرة

‏حَدَتنا الظروف القاسية لينْ شفنا الموت
‏وجبرنا الزّمان اللي مانقدر على جبْره

.....

[الحمدان]

‏أعذريني لا طلبت العذر وارضي يا مليحه
‏واستغلي فرصة أحلامي قبل يمكن صوابي

‏كيف قلبك يخفي المشروه وعيونك صريحه؟
‏المعاتب بالعيون أقسى من طعون الجنابي

‏أقلطي بأسلوبك الطاغي على صدر القريحه
‏واستقري لين تجنين العذوبة من عذابي

.....

[الحمدان]

عليك سجّات الهوى ترسل مناديب العتاب
‏لين اتوحّى من ورى النسيان صوتك واذكره

‏الدار ما عادت بعدكْ الّا مضارب من خراب
‏هذي منازلها خلت واللي بقى مات اكثره

.....

[الحمدان]

‏هلا يابسمة الوجه الحزين وخاطر الملتاع
‏هلا يانسمة الليل العليل وضحكة أيامي

‏عرفتك وانتهى عصر الحسافه والتوجد ضاع
‏ولقيتك واقعٍ أجمل مدى من سالف أحلامي

‏أنا وشلون لو أبعد وأقول إن الدروب وساع
‏وأنا مالي سوا دربك عظيم ومصدر إلهامي

.....

[الحمدان]

بين الكثير مْن التساؤل والقليل مْن اليقين
‏المشكلة ماني بأعرف المشكلة وأحلّها

‏أنا تعبت مْن الوصل والبعد والناس أجمعين
‏وقلوب تبغيني وأنا ما عاد أبيها كـلها

.....

[الحمدان]

رجف غصن الجريد وصارت ورود الربيع اشواك
‏وبان الفقد في وجه الصبور الثابت الكامي

‏ودريت إنك رحلت وغاب حسّك والقبر مثواك
‏وماتت بسمة الحي العتيق ببارد أنسامي

‏ثبتت بوقفه الشامخ وأنا منهار من فرقاك
‏وتسارع نبض قلبي لين صار النبض بعظامي

.....

[الحمدان]

‏أصير لِك ناس واجد وأنت وزعهم
‏وأبقى على طول في بالك وفي قلبك

‏أنا أضعَف الناس وأقواهُم وأشجعهم
‏وأنا أكثَر اللي يخاف يحب واحَبك

.....

[الحمدان]

اي والله اقدّره واقدّر ظروفه
لكنّ مدري متى الايام تجمعنا

الساعة اللي تمر بدون مااشوفه
كنها قصيده طويله مالها معنى

.....

[الحمدان]

من يزرع المعروف في غير قاعه
يحصد محاصيل الحسايف والأوجاع

.....

[الحمدان]

إذا صار لك شخص تحبه وتغليه
وحالت ظروف الوقت دونك ودونه

حاول وحاول قدر الامكان ترضيه
ومن لا يخونك لا تحاول تخونه

فتى الجوف

[الحمدان]

شريت لي معزا علشان أبنساك
ولقيتها بالحيل تشبه وصوفك

العين عينك والحلايا حلاياك
وحتى الوقوف أحيان يشبه وقوفك

وحتى مقفاها يشابه مقفاك
نفس القفى ممسوح كنه ردوفك

ياكيف أبسلى في حياتي وأبجفاك
وأنا وحظي فالبهايم نشوفك

.....

[الحمدان]

الشوق ما يفهم ظروف ولا عذر
الشوق يعني وينك أحتاجك تعال

.....

[الحمدان]

أجمل صدف عمري على مرّ الأعوام
ساعه تلاقت نظــــرة العين بالعين

صدفه بلا موعد وبك خافقي هام
ومشيت في درب الهـوى والمحبين

.....

[الحمدان]

‏إي والله إني أنطح الدنيا بقلبٍ من حديد
‏لكن سلم لي على قلبٍ ليا شافك ذوى

‏قدام وجهك تنحني الأغصان ويذوب الجليد
‏وقدام صوتك تمطر الأمزان ويهب الهوى

.....

[الحمدان]

عاملني بلين لا ترهي علي بقساك
‏انا من الحب ما ارد القسى بالقسا

‏اهتز لك قلبي اللي من حنينه كساك
‏وانا فريدة من الإحساس ومن النسا

.....

[الحمدان]

‏يا دربٍ من طمأنينه مثل دعوة رضا وآمين
‏وقلب أشوف به ربعي وكل أصحابي والخوّه

‏جيت بوجهك الواحد ووقفاتك عن العشرين
‏وخابت ناسٍ بعيني ولا خيّبت لي هقوه

‏يا جعل يفدا تبسّامك ردّي القوم وأبو وجهين
‏بوجه همومي بسماتك ذخيرة قلبي والعزوه

.....

[الحمدان]

غيابك حضورٍ له بصدر البيوت شهود
‏وش اللي يغيب ضحكتك والغلا ثابت

‏أحنك مثل ما أحن وجهي من المنقود
‏وأعدك ليا عديت الأيام وش جابت

.....

[الحمدان]

بعض البشـــر تغليه لو ما تشوفه
يجذبك له شيٍ غريب بالإحساس

تسمع كلامـــه ثم تقـٌـرا حــــروفه
‏تبحر معه تنسى مشاكلك والناس

.....

[الحمدان]

يسريني الحنين اليا لمحت من الوله تذكار
‏وأنا كل ما يسريني الحنين أدورك وينك
‏
‏حبيبي حافظِك بين الحنايا والقلُوب اسرار
‏ترا ما بيني وبينك بقى ما بيني وبينك

.....

[الحمدان]

‏مو كل صـدفه للبشر تجمع احــباب
ولا كل فرصه في حياتـك سعــيده

يمكن يكون احــيان اغلاق الكتـاب
أفضل ترى من فتح صفحه جديده

.....

[الحمدان]

احبك والهوى نعمة وحبك نعمة الرحمن
‏ولو كان الهوى غلطة فحبك كل غلطاتي

.....

[الحمدان]

‏القلــب لو يكتـب علـى بيـض الاوراق
كتــب علــى بيـض الدفاتـــر فديتك

جيتك غلا جيتك وفـاء جيتك اشواق
عفـت الخلايـق كـل ابوهـم وجيتك

يامن سكنت القلب واعماق الاعماق
وسكنت روحي وصـارت الروح بيتك

.....

[الحمدان]

‏ليه أحس إن الليالي فالفرح دايم لئيمة
‏وليه أحس إن الأماكن تغترب منها سنيني

‏محزن إني عايش برجوى أمل ليلة رحيمة
‏وموجع إني خايف تموت الأماني في يديني

‏ودي ألقى فالليالي ليلةٍ ماهي يتيمة
‏تحتضني من عنا وقتي ومن لهفة حنيني

.....

[الحمدان]

القلب يكسره اللسان ولا تجبّره اليدين
‏ماهوب عظمٍ كل يومٍ تكسره و تجبّره

‏ماعاد عندي فرصةٍ تهدر من العمر الثمين
‏واللي بينشدها من أسباب الفراق تخبّره

.....

[الحمدان]

‏تباهى على غيرك ب حشمه وزين قبال
‏وعينٍ تصيب المبتلي فيك وتتلّه

‏من يلوم فيك الذايقه كل ماتختال
‏لك من القصيد أطلال ومن القمر طلّه

.....

[الحمدان]

مقبله تمشي ويتبعهـا الفضول
تحضن أطراف الجدايل شيلهـا

وفي لسان الحال نظرتهـا تقول
مرحبا بـحـر الــمـشـاعــر سيلها

.....

[الحمدان]

وين أنت ياللي كتبت الشعر لعيــونك
‏عطنــي تفاصيل حرفك وترك الخافي

‏ان كان حرف القصيد يحرك اشجونك
‏وشفيك ماتبدي إعجابك على قافـــي

.....

[الحمدان]

الجوارح طاغية بسّ القلوب مصدّه
‏والوصل عقب انقطاع احيان ماله داعي

‏حبلك المتواكل اللي تقصره وتمدّه
‏عايفه حتى ولو تلويه فوق ذراعي

.....

[الحمدان]

الغياب اجزل من أعذارٍ تجيب أسمنها
‏خلك اللي كمَّل غياب ومكانه خالي

‏حاشمك من رجعةٍ ماضيِّك أجمل منها
‏من متى والغالي إذا راح يرجع غالي

.....

[الحمدان]

أشهد إن القلب يجهل والحياه تعلّم
والضروف تقيّم الأصحاب واحد واحد

.....

[الحمدان]

‏ليت طبع الناس من طبع الغصون
‏إن تعلّت ظل وإن طاحت حطب

.....

[الحمدان]

‏انت عنــدي اعز من شافـــت عيوني
وانت عنــدي اعز مـن قلبـــي هواه

وانت عنــدي اعز مخلوقــن بكوني
وانت عندي شخص له قيمه وجاه

وانت عنــدي شي لايمكـن يهوني
وانت عنـــدي شي غالـي مستواه

وانت عندي من تربـع في جفوني
وانت عندي من سكـن قلبي غلاه

.....

[الحمدان]

ياسا كن أعمـــاق أنا حيـــل مشتاق
وعقلي مـــن الأشــواق خارج إطاره

إحساس قلبي يرتجي ضمــة إعناق
ولا غيــر شوفــــك من يطفي نياره

.....

[الحمدان]

الظروف تخلي الأنسان واحـد ثاني
‏لين يوصل مرحله ماعاد يعرف نفسه

.....

[الحمدان]

‏افتح شبابيك الامـــل واطــرد الياس
وعيش عمــرك دون غصه وضيقه

مهما يضيق الوقـت وتزيد الاتعاس
لابـــد يفتــــح لك إلهـــي طريقه

ياخوك لاتجرح شعورك والاحساس
ولا تحتمـــل من فوق مالاتطيقه

خل السعاده داخلك دون مقياس
وعيش عمـرك كن عمرك دقيقه

.....

[الحمدان]

‏بعض الغيـاب يعلمك كيـف تشتاق
وبعض الغيـاب يعلمـك مـن يودك

وانا ترى قلبـــي من الشـوق خفاق
والبال سارح طـول الاوقات عندك

وينك حبيبـي هدنـي كثــر الافراق
وكثـر البعاد وكثر هجـرك وصدك

ليتك تحــس بناري اللي بالاعماق
والله مــــا تبخــــــل عليـا بردك

.....

[الحمدان]

‏سمح خاطري واستثقل الصبر والمقعاد
‏لو انك الوحيد الفارع وصفوة الصفوه
‏
‏مراحي جهاد ورجعتي لك عنا وجهاد
‏بدا غافل الايام يصحى من الغفوه
‏
‏برود المشاعر شاخ بين القلوب وساد
‏ماعاد اعرفك بالشكل والاسم والحفوه

.....

[الحمدان]

‏حفرت بذكرياتك بصمةٍ ما جاء لها تقليد
‏مداها شعري الفارق وتاريخي وعنواني

‏أنا ماني بعابر في سفر عمرك بجرد البيد
‏أنا مزنٍ يهلّ الغيث لو شحّت به أزماني

‏أنا ما أقْبل النسيان لأني سيّد التخليد
‏لو تحاول تناساني ما رح تقدر تناساني

.....

[الحمدان]

‏شعوري معك يحتار يبدا معك من وين
‏تلوم السكوت ومن يشوفك معه عذره
‏
‏لا عمّ الشعور الصمت ناظر عيوني زين
‏كلام العيون اصدق من الصوت والنبره

.....

[الحمدان]

‏يا ساعي بما فيه الكفاية متى ترتاح
‏مع أهل القلوب الحاسدة لا تدوّرني

‏لو الله عطاك شوي من نظرة اللمّاح
‏لقيت الشيم من كل جانب تسوّرني

‏لا شفت العباد اللي تحرّك بدون أرواح
‏شكرت الله اللي بالمبادي منوّرني

‏يا كم واحدٍ يفرح على صاحبه لا طاح
‏وأنا والله إن طيحة عدوّي تعوّرني

.....

[الحمدان]

تبسّم لا خذا الله بسمتك يا سيّد الغيّاب
‏فدا وجهك تباريح السهر والشوق وعتابه

‏على وجهٍ يعوّض عن مطاليع القمر لا غاب
‏انا وشلون اشوفه يا حبيبي ما تغنا به

.....

[الحمدان]

‏ابتدا فصل الحياه المتعب المتشابه
‏وانتهى اكثر فصل حبيته وهو مشقيني

‏ما اقتنعت ان العمر عجّل وهج ركابه
‏لين عشت الواقع بروحي وشافت عيني

‏مادريت اني خلصت من الهوى واصحابه
‏لين صار الليل يجمعهم ولا يدعيني

.....

[الحمدان]

‏سامح الله من خذت مني هدوي وارتياحي
‏لين حدتني على بعض الامور اللي مابيها

‏مرحله مدري متى تعتقني وتطلق سراحي
‏ماقدرت آعيشها ولا أنتقل ل اللي يليها

‏لوتساعدني خطاوي رجلي بحزة مراحي
‏من يساعدني على روح يدب الشوق فيها

‏جيت واللوم يتخطفني من الاربع نواحي
‏ماني براضي على نفسي ولاراضي عليها

.....

[الحمدان]

‏تضيق الصدور وتختلف ساعة التوقيت
‏شجاع المفارق ضاق من فارق احبابه

‏من يقول بان اللي يجيبه قصيد وبيت
‏يا كثر القصيد اللي كتبته ولا جابه

.....

[الحمدان]

رحت أدور فالتفاصيل القديمة عن قديمة
‏أقبلت مثل الحياة ودبرت مثل المنايا

‏جات واضفت للحياة الفانية معنى وقيمة
‏وامتلت منها الرفوف وشجرت منها الزوايا

‏في خطاويها شموخ وفي مواقفها عظيمة
‏يا بعد رزنامـة الأيام ويافتن الصبايا

[الحمدان]

‏علموه اني على الوصل دايم محتريه
‏وعلموه ان كـان وده يجـي لا يستحي
‏
‏المحبه وسط قلبي على ماهي عليـه
‏والميانـه هي هي والغـلا ما ينمحي

.....

[الحمدان]

أنا فجرك وأنا صبحك وأنا عصرك وأنا ممساك
‏وأنا اللي لا خذلك الوقت ما خليتك لحالك

‏أنا كفك وأنا سيفك وأنا رمحك وأنا شلفاك
‏وأنا اللي لا عدوك الناس أول شخص يطرا لك

‏أنا وجدك وأنا شوقك وأنا قلبك وأنا مضناك
‏وأنا اللي لا هزمك الشوق اجيك اوقف قبالك

.....

[الحمدان]

‏كم لي وأنا فاقدك و اتفقدك في كل الوجيه
‏يا همي اللي لا أقدر أقوله و لا أحتلت اكتمه

‏وشلون ما ترحم حبيبك وأنت حبك مبتليه
‏الدم يجري في وريده وأنت تجري في دمه

‏وين أنت يا قِبلة هوى روحي وروحي تفتديه
‏يا من همومي تنجلي لا شفت ضحكة مبسمه

.....

[الحمدان]

يتعّبني اللي كل ما جيت اجاريه
‏بالطيب يسبقني ثمانين خطوة

.....

[الحمدان]

صغيـرٍ بسنّـه غير عندي ما هـو بصغيـر
يا مـغلاه في قلـبي ويا كبر مـنزلـتـه

أجمَع له سمان الهرج خوفٍ من التقصير
واذا جيـت ابـشـرح له كـلامي تهيـزلـْته

يجيني منّه هيبه معزه سحى تقدير
اقـابله عـندي علم واروح ما قـلـته

سعد بن جدلان رحمة الله

[الحمدان]

سلام الله على أول من عزف جرحي من الأحباب
‏سلام فيه من عمق المحيط وعرضه وطوله

‏على إللي قبل أعرفه ما أنفتح للحب عندي باب
‏جميع أبواب قلبي عن جميع الناس مقفوله

‏أحبه وأعشقه وأغليه والدنيا جناح ذباب
‏ما تسوى في عيوني هندبة كابه ومريوله

.....

[الحمدان]

‏ودي بقـربك واحـــلم اني احاكيك
ويشدني لك شــوق صمته ذبحني

دايم بعـيني ويـن مَا رحـت الاقيك
حبك ترى عن حب غيرك سـرقني

يا ساكــن أعماقــي أنا ميتـن فيك
وعشقــك تملكني وحبـك اسرني

وعقلي بكل الوقت يسرح بطاريك
والشوق لك ياحـب روحي حرقني

.....

[الحمدان]

‏لا زلت اللي ورا قوس الحنايا باقي وموجود
‏على كثر الوجيه العابره ما حركت ساكن

.....

[الحمدان]

على ما تشتهي خذني معك يا شوقي المعتاد
‏الا ياروح روحي وين ما ودك أنا راضي

‏ توسّدني وطن لو ما وسع صدرك فضاء وبلاد
‏أنا كل الدروب اللي تبيها حاضر وماضي

.....

[الحمدان]

لي متى عمري موقف والسنين تفوته
‏ليت الايام اللي راحت ترجع وتاخذني

‏فاقد الي مستحيل ارقد ولا اسمع صوته
‏جعل يسقى يوم انام وتيلفوني باذني

.....

[الحمدان]

‏لو يتيح العمـــــر فرصــه في حياتي
كـان ماحبيـــــت فــي الايـام غيرك

انت غايــة مطلبـــي وانـت امنياتي
وانت قصـري في الهوى وانا اميرك

اعشقك عشق الهواء مـن كل ذاتي
واعشقـك كلك مـع شـرك وخيرك

واوعــدك مادام باقـي فــي حياتي
والقسم طول العمر ماارضا بغيرك

.....

[الحمدان]

ماعادك اليوم ياصبري الجميل بـ جميل
‏تناهشتك الظروف وشـوّهت صورتك

.....

[الحمدان]

‏سامح الله من خذا مني هدوي وإرتياحي
‏لين حدني على بعض الأمور اللي مابيها

‏مرحلة مدري متى تعتقني وتطلق سراحي
‏ما قدرت أعيشها ولا أنتقل للي يليها

‏لو تساعدني خطاوي رجلي بحزة مراحي
‏من يساعدني على روحٍ يدب الشوق فيها

.....

[الحمدان]

استر عيوب الناس وتعيش مستور
الله خلق والله عن الناس ادرى

.....

[الحمدان]

انتي الفخامه والحلا وانتي الذوق
وانتي الغرام اللي بعشقه سحرني

ما جاز في عيني من الكون مخلوق
غيرك ولابه شخص قبلك فتني

.....

[الحمدان]

‏ما نيب مجبور أخاطب على قد العقول
‏والله إن بعض القناعات عندي مُهمله

‏الكلام تشوفه الناس حل من الحلول
‏مثل ما أشوف التجاهل يحل المشكله

.....

[الحمدان]

‏اقلط على عوج الضلوع و تفيا
واشرب فناجيل الغلا في محلك

.....

[الحمدان]

‏فيك زين الماضي وزين الحداثه
‏كاسبتهم من جمال وجامعتهم

‏مغريات الكون فالدنيا ثلاثه
‏القمر والشمس وأنتي ثالثتهم

.....

[الحمدان]

‏ماكل شخصٍ يملي الطيب عينه
‏بعض البشر لو زاد طيبك تمرد

.....

[الحمدان]

خل الوفاء ياصاح دايم شعارك
حتى ولو محد معك كان وافي

ولا تساير شخس خالف مسارك
ذي ماتشوفه غير لاهي عوافي

واحفظ لسانك دوم ساعه حوارك
واحذر يكن قولك لفعلك منافي

اجعل كتاب الله افضل خيارك
وسنه المختار لك نهج كافي

تعيش طول العمر كاسب ضمارك
والاخره تشرب من انهار صافي

.....

[الحمدان]

‏استر عيوب الناس تستر عيوبك
يا اللـي لسانك للمخاليق فضّاح

واترك ذنوب الخلق وانظر ذنوبك
ترى الزمن دوّار والسّر ينباح

.....

[الحمدان]

‏نخطي ونستغفر عن الذنب ونتوب
ونرجع على نفس الخطا ما درينا

يارب يا من رد يوسف لـيعقوب
عفـوك وغفـرانك وحلمك علينا

.....

[الحمدان]

‏كم ميت تحت الثرى يذكرونه
بالطيب كنه فالبشر بينهم حي

كم حي من فوق الثرى يجهلونه
ميت وهو حي ولا يذكر بشي

.....

[الحمدان]

لا غبت عن عيني تغير احوالي
غالي و لا مخلوق عندي يساويك

تدري ويش اللي يشبهك يا غزالي
تدري ويش اللي يمكن اشبهه فيك

ما يشبهك بالكون يا راس مالي
إلا الحنين اللي سكن قلب مغليك

.....

[الحمدان]

‏كيف ينساني وكيف اتناسى منه كيف
‏وحاجتي له حاجة الناس للماء والهواء

‏اشهد ان من حب من قلب لا يمكن يعيف
‏واشهد ان البعد عقب الغلا ماله دواء

.....

[الحمدان]

‏تقلبنا الحـياة الفانية ضيق وتعب وأرهاق
‏ونضحك كنّ مافينا من الضيقه ولا حاجه

.....

[الحمدان]

قالوا خويك منهو اللي تخاويه
قلت المخوه عارف وش مداها

اخاوي اللي ما تغيرّ مباديه
واسرارنا فالعمر بير وغطاها

يفهم مبادي نظرتي قبل احاكيه
يعني قبل لا اقولها له قراها

ترى الخوي الصدق من طاب طاريه
له وقفة جعل الخلايق فداها

وان كان تبغي زبدة الهرج يا هيه
هي كلمتين ومن بغاها لقاها

من يبكي لحزنك حذاري تبكيه
ما كل عين تبكي اللي بكاها

واللي تجمل فيك لا بد توفيه
لو به جمايل ما يوفى جزاها

.....

[الحمدان]

يالله بدعوه من حدا والديني
القى اثرها في حياتي وانا حي

ويالله برزق لا طلبته يجيني
في ساعة الحاجه وانا مامعي شي

آمين

[الحمدان]

ما نجبرك للحب ياللي تغليت
الله يسهل دربك اللي مشيته

ماجاك مني غير طيبي وياليت
تذكر مواقيف الوفا ما نسيته

يا ما علشانك من القلب لبيت
ويا ما علشانك قلوبٍ جفيته

ويا ما علشانك نويت وتمنيت
ويا ما على لقياك حلمٍ بنيته

.....

[الحمدان]

‏جرحـتـنـي من غير طعنات وسلاح
الله حسيـبك منك أنـا ويـن أروحي

الـيـا بغـيـت اسـلا شـويـات وارتـاح
إيـهـب نسنـاسٍ بـعـطـرك يفوحي

ماظـنـتـي فـ غيابك القلب يـرتـاح
ودلال شوقك وسط صدري تفوحي

وليلـة مـجـيـك كـانـها ليلـة أفـراح
إتعالج جـروحٍ وتـنـقـض جـروحي

.....

[الحمدان]

لا ما سكتنا ذل يا سـود الايام
بـس الحيا شيـمه عليها ربينا

.....

[الحمدان]

‏يطري علّي معاتبه والمـشاريه
والمشكله لاضاق صدري طريته

مشاعري دايم على البال تطريه
مانـي فـقـيـر أحـبـاب لكـن عشقته

.....

[الحمدان]

من يبلغّني عن الغآيب خبر
من يخلصّني من قيوُد الحديد

ذآك له طاري يشابه للمطَر
كلّ مآ يطري نبت فيني قصيدْ

.....

[الحمدان]

‏عقب الغلا ومزارق الطيب بالطيب
‏صار الغلا والطيب ذكرى قديمه

‌‏الله يعين اللي جروحه معاطيب
‏وباقي على مبدأ وشيمه وقيمه

.....

[الحمدان]

‏اناشــــدك بالله يا شــــوق باللهون
قلبي فقـد يا شـــوق كامــل عزومه

على الحبيب اللي في الروح مدفون
الغايـــب اللي في خيالـــي رسومه

ياشوق خذنـــي وين ماكان ويكون
ودي ازور الحـــب واعــرف علومه

حتى ولو قالـــوا لي الناس مجنون
انا اعرف المجنــون ماحــد يلومه

.....

[الحمدان]

‏ما غفيت اليــــــوم والبارح كذالك
حيـل انا تعبــان واشواقـــي ثقيله

حالة الاشـــواق ماترحـــم لحالك
دائماً تغـــزي القلوب المستحيله

ياخفـوق القلـــب بالله ما جرالك
جاوبيني الشـوق من اشعل فتيله

ادري ان البُعـد حطـم لك منالك
يا حبيـــب الروح ارحمنـي قليله

.....

[الحمدان]

من علق آماله العظمى بربٍ عظيم
ما شال حمل الليالي السود مهما جرى

.....

[الحمدان]

اعذب صباح الخير من قلب و لسان
لاعذب حبايب مثل غيث السحايب

صفوة بقلبي قدرهم عالي الشان
صباحكم خيرات يا اغلى الحبايب

.....

[الحمدان]

بالخير يا زين البشــــر جيت امسيك
يا من فــؤادي مــن صميــمــه يحبك

واكتب حروف الشعر واهدي معاليك
ورود وافــرش محتــــواهــــا بدربك


.....

[الحمدان]

الصدر ضايـق والعرب مـادرت بـه
‏وين الذي لا ضاق صدري فهمني

.....

[الحمدان]

‏سكوتي عن الزلات ما هو سكوت الخوف
‏وانا اقدر على تلجيم الافواه وحكاها
‏
‏تشيمت والزله ليا جت على المكشوف
‏ليا وحيتها سويت ماني بوياها
‏
‏على سلمنا المتوارث الواضح المعروف
‏تعلمت اهمشها كذا واتناساها
‏
‏انا من كثر ما شوف كني ما عاد اشوف
‏تعرّض عليّ المخطيه واتعداها

.....

[الحمدان]

‏انطق بقول الحق والحق راحة
ما فاد في العالم فنون التعامـل

جاملتهم يقلون وين الصراحة
صارحتهم قالو ما تعرف تجامل

.....

[الحمدان]

‏كنت ابيك تكون شي وصرت شيٍ ثاني
‏والخطا ما هو خطاك انا الخطا بعيونه

‏يوم اهيم بصوتك الفيروزي الرحباني
‏وآتخيل كل كلمة من فمك موزونه

‏خاب ظني ليت ظني فيك ما خلاني
‏ابني احلامي على حاجه ماهي مضمونه

‏وليت ماجاني من احساس الندم ماجاني
‏شيٍ يحطم صميم القلب قبل ركونه

‏الجفا اللي عقب لذة وصلك الإنساني
‏والسلام البارد اللي عقب طول المونه

‏اعتذر لك عن خطاب اسلوبي الوجداني
‏الآدمي مهما حصل يبقى رهين ظنونه

.....

[الحمدان]

‏لا تحط المشاعر بين كيف وليه
واضحه لو تركز فالشكل والذات

المحب الحقيقي لا تشكك فيه
اذبحه بس لا تطلب عليه اثبات

.....

[الحمدان]

صبرنا على قل الدراهم وكثر الدين
وحفظنا كرامتنا من اللاش وازعاجه

نسلف وحنا متسلّفين ومحتاجين
ونفزع لراعي الحاجه وحنا على حاجه

.....

[الحمدان]

‏دام ان رزقـي عـند رب المـخـاليـق
‏مالي ومـال النـاس واللـي وراها

‏يا رب تجـعـل كل عـمري توافـيق
‏ونفسي من الزلات تـغفر خـطاها

.....

[الحمدان]

‏تسوق ألطف أنسام الغلا ضحكة محياك
‏على روح من طالت عقوده وهو ضامي

‏ياسبحان من خلاني أدورك .. وألقاك
‏وأشوف أبسط حقوقي معاك أكبر أحلامي

‏لا تستغرب إن بعت الوجيه وشريت رضاك
‏وأنا مرخص ليومٍ معك .. جملة أيامي

‏تمثنى فجوج القلب ، وأسلى وسجّ خطاك
‏على عين حاسد ضحكتي لك .. ولوّامي

.....

[الحمدان]

‏يا غريبه يُخلق المَرء فالدنيا جَنين
‏ما يعرف ظروفها الصافيه والغابره

‏يطرد أيّامه وتطرده وتمرّ السنين
‏لين تلحقه المنيّه وتقطع دابره

‏إلحقيني قبل لا أسلك طريق الراحلين
‏العُمر ساعاته قصار ، وأنتي خابره

‏كل أبونا بين ساعه وساعه عابرين
‏وش يضر العابر ليا ضحكت له عابره

.....

[الحمدان]

‏إي والله إني بخير وكل أموري بخير
‏لو كان دمعة عيوني ما تشوفونها

‏أنا أكثر إنسان في صمته كلامٍ كثيير
‏ويخبي أشياء كان الله في عونها

‏الحظ ماله خَوي والحزن ماله ضمير
‏وإن قلت يا هونها ما هوب يا هونها

.....

[الحمدان]

‏أقسـى من الدمـع صوتٍ تقتله ونّـه
‏والونّــه اللي تجي من شـوق غلّابـه

‏لإنســان من كـثر ما تغليه وتحــنّه
‏تختار فرقـاه وانت تضيع في غـيابه

.....

[الحمدان]

‏طوتك السنين الجرد يالشارع المهجور
‏حتيت الشجر ماحط لك بالخطى معبر

‏يعلمك عن طول إنتظاري ظلال السور
‏لامر الحنين بشارعك والضجيج أدبر

‏الأكبر من غيابك حضورك بدون شعور
‏تخيل يكون حضورك من الغياب أكبر

‏معك هقوتي مثل الصور في رفوف الدور
‏تمّر السنين بعمرها بس ما تكبر

.....

[الحمدان]

‏الوجيه اللي تمر تمر ما تغريني
‏ماتحرك غافية صدري ولا سمّاره

‏غير وجهٍ ضحكته تلزمني وتعنيني
‏فاقده ومعلّق الضحكه على مسياره

‏يبتدي فيه الشعور وينتهي به فيني
‏كنه يمر الشعور فقلبي ويختاره

.....

[الحمدان]

‏غفلت فالدنيا وسجيت فيها
‏وخذتك الايام التعيسه على جنب

‏ماتدري ان الراحه اللي تبيها
‏سجده بعد غفله وتوبه بعد ذنب

.....

[الحمدان]

يا قوافي الشـعر غني من جـديـد
‏واطربيني اكســري صمت الزمن

‏وارسمي الاحلام في بيت القصيد
‏وابعــدي عن عــين خفاقي وسن

.....

[الحمدان]

‏أشوفك وطن وتشوفني رحلة استجمام
‏وأشوفك عمر وسنين ما هي بمنعاده

‏معي قلب واحد لو تقسمه خمس أقسام
‏يحبّك بكل أقسامه الخمس وزياده

.....

[الحمدان]

‏النّاس من بعدك هَلَا وانتَ لبّيه
‏الحاضر انتَ وماضي النّاس ماضي

‏لا تنشغل في غيرك الله يخَلّيه
‏وإليا انشغلت أَبنشغِل معك راضي

‏فاضي وبحَاتي معك من تحاتِيه
‏حتى لو إنّي كنت ماني بِفاضي

.....

[الحمدان]

‏يا كثر حبك بقلبي والغرام أكثر
‏وتخيل وش كثر أحبك وأنت غربالي

‏يا خلطة المسك والريحان والعنبر
‏الريح تستاذنك يالطيب الغالي

‏روح وين ما تشتهي روح قد ما تقدر
‏أنا أول الناس في قلبك وأنا التالي

.....

[الحمدان]

‏مسيك بالخير يا موضوعي الأول
‏انت السبايب ورى موضوعي الثاني

‏لولاك ما كان للشارع و لا ميزه
‏يا أحلى مواعيدي ووصلي وحّرماني

‏يا أوفى العلاقات مع زحمة علاقاتي
‏ جّعلك بعد كل من جاني وخلاني

‏جعلك بعد كل من جيته وخليته
‏يا آخر محطاتي و يا خير خلاني

.....

[الحمدان]

‏لا تغيّرك الليالي ويغريك الغياب
‏وتحداني والجفا منك حاديني حدي

‏نبض قلبي يوم ودّا ونبضه يوم جاب
‏ما يقول الا عسى الله يسامح ويهدي

‏وين أيمم شوف عيني وأنا اخيلك سراب
‏كل ما ضميت زولك تلاشى من يدي

‏مذهبٍ حالي بطاريك يا مال الذهاب
‏مابقى فالقلب من سبّتك عرقٍ ندي

.....

[الحمدان]

‏الطيبه الزايده تفتح على الشخص باب
‏ما ينكب الشخص غير الطيبه الزايده

‏سوّ الجمايل مع اللي كل ماطبت طاب
‏وأبعد عن اللي مزاجه لازم تصايده

‏و اتعب ورى المرجله والصبر خله زهاب
‏لا تصدق اللي يقول المرجله كايده

‏وان شفت مالك حضور اختار درب الغياب
‏أطيب لك من الحضور اللي بلا فايده

.....

[الحمدان]

‏حتيش يا واهج القمرا على اول ظهور
‏عود تمالك شعورً كنت متمالكه

‏خل الليالي تجمل وابتعد ومعذور
‏لليالي العمر مثل العمر متهالكه

‏لليلً تصدع من غيابك تصداع سور
‏لو يكمل البدر تبقى ظلمته حالكه

.....

[الحمدان]

توسّدي صدري المملي شموخ وْغرام
‏صكّات الاحزان في وجهي وفي شاربي

‏انا عرينك ليا صارت حياتك حطام
‏وانا سلاح انتصارك قومي وحار بي

‏عليك احس انّ قلبي مثلَ ريش النعام
‏رهيف لا هب نسناس الوَله طار بي

‏ابحرت في عاتي امواجك مع ان الملام
‏تجري رياحه بما لا يشتهي قاربي

[الحمدان]

‏والمحبـه والـغـلا بينـي وبـيـنـه
‏أكـبر من الشـك وظنـونٍ تشابـه

‏من طهر قلبـه ومن طيبـه وليـنه
‏أغـلب الدعـوات منـه مستجابـه

‏فـي رضـا قلبـه وفي نظرات عينـه
‏كـل لـيـل يـمرنـي مـا عـاد آهابـه

‏لاضحك شفت المحبه و السكينـه
‏وان تكلـم شفـت لـه عـز ومهـابـه

.....

[الحمدان]

‏يا رفيق الذكريات ويا شريك فؤادي
‏كل ظنٍ فيك ظنيته تجي من فوقه

‏يتسلل صوتك من الذاكره وينادي
‏لين يفتق جوفي اللي كنت أخيط فتوقه

‏ايه يا لبيه يا موتي ويا ميلادي
‏جعل حزنٍ مرني ما تونسه وتذوقه

‏يا وقودي وإندفاعي بالحياة وزادي
‏يا حشاشة جوفي وقلبي ودم عروقه

.....

[الحمدان]

‏ودّي إني في المجره وأسولف للنجوم
‏لا أتكلم مع هل الأرض ولا أسمع كلام

.....

[الحمدان]

‏واجبك عن هرج الردي تقفل الباب
‏ خله يثور بندقه في زهابه

‏الداب سمه في عروقه والإنياب
‏ لا تامنه والسم في وسط نابه

‏اما لدغك وصار من ضمن الاسباب
‏والا دخل في داركم وحتجابه

‏قدام لا تفتح على نفسك ابواب
‏ابعد عن اللي ما ينومس جنابه

.....

[الحمدان]

‏راع الوفاء نفرح بشوفه ولقياه
‏طيبه رياجيل المعرفه تعده

‏وراع الرداء يا سعد عيني بفرقاه
‏لا صار فعله لرديه يحده

.....

[الحمدان]

‏عشتك كتاب وتايهٍ في فصولك
‏تعبت افهرس في صفاتك واعدّك

‏لو كان لي حظٍ يجود وينولك
‏ما ماتت اشواقي على اسوار حدك

‏باقي على ذكراك وارقب وصولك
‏عسى الدروب تزلّ يوم وتردّك

.....

[الحمدان]

‏الذنُوب اكثار والخاطر هزيل
‏والأجر مطلُوب والدنيا رحى

‏العمر يمشي مثل عابر سبيل
‏والقِدَر ما ميّز اكبار اللحى
‏
‏البخيل اللي نسى نفسه بخيل
‏ماتصدق عن مفاصله و وحى

‏ركعتينٍ قبل ما ظلك يميل
‏اطلب التوبه وقم صل الضحى

.....

[الحمدان]

‏مافي يدي جنه ولا في يدي نار
‏وشلون ابغفر ذنبك اللي جنيته

‏تعبت ادور لك عذر بين الاعذار
‏لكنّ عذراً يقبلك ما لقيته

.....

[الحمدان]

‏من لا يداري خاطرك لا تداريه
‏بعض المدارى للخواطر مذله

‏كم واحد تتعب على شان ترضيه
‏ويصير ظنك فيه ماهو محله

‏والصحبه اللي من وراها مشاريه
‏احظر تجامل صحبته رح وخله

‏عليك باللي كل ماحل طاريه
‏كلمة نعم تنساقله وتحصله

.....

[الحمدان]

‏والله إني في المحبه مشتريك
‏خل قلبي يآخذ إلي ماخذا

‏أعشقك وأغليك وأحبك وأبيك
‏ايش تبي أقول أكثر من كذا

.....

[الحمدان]

إن دعاك الحب في شوق وعناق
‏أرمي الماضي على ليلٍ شنيع

‏وإن تفارقنا قبل يوم الفراق
‏أبكي بشرهة على الحب الوديع

.....

[الحمدان]

‏عليك الامان اظهر تراني من التفكير
‏تعبت اكتب الابيات وتروح دون اسمي

‏انا فاقدك بالحيل واتعبني التغيير
‏من حسابي الوهمي إلى حسابي الرسمي

.....

[الحمدان]

‏لا تقارن مع قصير الشبر شبرك
‏ولا تنازل عن شيمك ولا تراجع

‏ولا تواضع للوضيع يضيع قدرك
‏منت مجبورٍ على بعض التواضع

.....

[الحمدان]

‏ترى الجمايل في بطون المجانين
‏أخير منها في بطون الصحاحي

‏على الأقل لو أنكروا فعلك الزين
‏لك عذر ماتشره على غير صاحي

.....

[الحمدان]

‏راعي الردى لا تجبرونه على الطيب
‏العبد ماله غير ما الله كتب له

‏أشهد شهادة حق مدح الردي عيب
‏مثل الصلاة اللي على غير قبله

.....

[الحمدان]

‏اليوم كلَّ علينا يفلت لسانه
‏ومن الكلام العوج لا تآمن الأبلم

‏مبادي الناس والأخلاق خربانه
‏نمشي بجنب الجدار وليتنا نسلم

.....

[الحمدان]

‏مقام الفتى في منصب العز ساعه
‏ولا ألف عامٍ يصحب الذل جانبه

‏ترى العز لو فالنار زينٍ على الفتى
‏والذل لو بالخلد مازان صاحبه

.....

[الحمدان]

‏ما شبعنا غير من أكل القهر
‏ولا روينا غير من هل من مزيد

‏حسبي الله فيك يالوقت الغبر
‏تضرب الطيب بيدٍ من حديد

.....

[الحمدان]

حي من يطري على البال ذكراه
حي من يملك بساتين الموده

عندي أمل والأمل دوم بالله
الحي يشوف الحي لو بعد مده

.....

[الحمدان]

‏اللي زعل من دون سبه وانا اخوك
‏يضرب براسه لين يسمح ويرضى

‏لو ترضي مبارك زعل منك متروك
‏هذا زمن فيه اكثر الناس مرضى

.....

[الحمدان]

‏يالله تجعل في نعيمك خلاصي
‏لاوقفو كل الخلايق على جنب
‏
‏انا صحيح اني فعلت المعاصي
‏لاكنّي افعلها وانا احس بالذنب

.....

[الحمدان]

‏ياشين هرج الناس بالقال والقيل
‏اللي يخلون الصغيره كبيره

‏اللي يجيبون السوالف تهاويل
‏منافقه بين القصير وقصيره

.....

[الحمدان]

‏لا يفجعك الفراق الا بديت اطرّي المنكاف
‏ترى ربي خلقك لحالك وخالقني لحالي

‏ليه اكترث للشمس لاهفّت ورا المشراف
‏وهي لا هفت اول ما يقفي عني ظلالي

.....

[الحمدان]

‏يا عيـون اللـي مـن ظلاله مذيّر
‏ما يدانـي لمحة العين البصيره

‏من قوانـيص الضبا قدهو مطيّر
‏شايفٍ شحن البنادق بالذخيره

‏فيك من عنقه ومبسمه الصغيّر
‏والعيـون الناعسات المستديره

.....

[الحمدان]

‏على النقا نبقى ولو عاقنا عوق
‏ويبقى الوفا منا و فينا و إلينا

‏ووجيهنا بيضا و هاماتنا فوق
‏وإن ضاقت الدنيا ما ضاقت علينا

.....

[الحمدان]

‏ما يصبر على الوقت غير رجّال
وما يسرج العنقا غير خيالها

ما كل من قال للمرجله فعّال
ولا كل من طلب المعالي نالها

.....

[الحمدان]

اشلون تهجرني وأنا مالي على الهجر أحتمال
‏وشلون تهملني وأنا مانيب أطيق أهمالها

‏وشلون تقطعني بسيف البعد قطّاع الوصال
‏وأنا لو أقطع عرق قلبي ما قطعت وصالها

‏وشلون ما تشتاق ما ترحم ما تذكر ما تسال
‏وشلون ما تطلق يدين كبلت باغلالها

.....

[الحمدان]

ابي سجّهٍ يسلا بها القلب لا غنيت
لعل الجروح تطيب والهم ينزالي

.....

[الحمدان]

أنا أغليك من بد الخلايق ولا أدري ليش
‏ومن حبك أعطيتك على القلب ملكيّة

‏عطيتك وأنا عمري تعدى سنين الطيش
‏ولا خذت من عندك ضمانات بنكيّة

‏أمدك غلا من قلب صادق ومدك ويش
‏ سوى كيّة منك على الضلع مركيّة

.....

[الحمدان]

من عرفك وما قضى عمره طروب ومسفهلي
‏من لقاك وما لقى الدنيـا مثل وجهك جميله

‏منت بالظبي الجفول ومنت بالظبي المفلي
‏الظبـا مـا تسجن العاشق ولا تخلي سبيله

.....

[الحمدان]

‏مغتني بالله لامن عطا يغني عطاه
‏كل مده من طرف بحر جوده وافيه
‏
‏والنفوس اليا استعزت تعلمها الغناه
‏مكسب الإنسان فالوقت ستر وعافيه

.....

[الحمدان]

‏يا غاية القلب هاك القلب دون الوصاه
‏جميلك ف جيتك وايامنا فانيه

‏يوم استوت عندي وراح الامل فالحياه
‏جيتي وشفت الحياه بنظرةٍ ثانيه

.....

[الحمدان]

بارك الله بالهوى والليل وأنفاس المدينة
‏وقصّر الله خطوة الغالي وقلل من سفرها

‏استراح الضيق وايديني مشابك في يدينه
‏ودّي إن سنيني بذيك الثواني مختصرها

‏كيف يقدر شخص يجمع راحة الدنيا بعينه
‏لا نظر لي كنّه يجمّع ذنوبي ويغفرها

.....

[الحمدان]

‏اعتقد والحياة بكبرها مُعتقد
‏مبتداها وصول ومُنتهاها رحيل

‏عشّ كمَا شئت لا مُنكر ولا مُضطهدّ
‏وايقن ان ما ورى غيب المنايا دليل

.....

[الحمدان]

اشوف واسمع واميز فالعرب وأدري
واعرض عـن علوم ٍما كنّي بها داري

.....

[الحمدان]

لا تزيد المواجع خلني قد نسيت
لا تقلب بقلبي صفحة الذكريات

.....

[الحمدان]

‏لا تدور من ورى العالم شعور
‏اشعر بنفسك ونفسك تشعرك

‏وأي واحد قال لك هذا غرور
‏قول له بكره تجي واذكّرك

.....

[الحمدان]

‏لا تامن العالم ولا تامن الغيب
‏دنيا تقلب بين حزن وسعاده

‏واللي مع الله ما يجي قلبه الريب
‏والله يدبر ما يشـاء في عباده

.....

[الحمدان]

‏من حبه الله يحبّب فيه خلق الله
‏لو كان ماهو من الأسيـاد والسّاده

.....

[الحمدان]

‏لو مالت ظروف المقادير ما ملت
‏الراس صامل والمنازل رفيعه

‏واذا تحدتني هموم الزمن قلت
‏بكرة تزين ورحمة الله وسيعه

.....

[الحمدان]

‏العمر ماهو خطأ لا راح لجل أجودي
‏يستاهل العمر منهو بالمواقف عطى

‏أما الرفيق اللي تعرفه رخيص وردي
‏هذا هو اللي وجوده في حياتك خطأ

.....

[الحمدان]

‏ماني بربان لكن الزمن رباني
‏سابح سبع البحور اللي محد سابحها

‏لابغيت العقل عقلي بالعرب قداني
‏وان شطحت اشطح بشطحه محدٍ شاطحها

.....

[الحمدان]

‏الطيب ماهو سهل والا الردا هّين
‏والناس بالطيّبه تشرا وتنباعي

‏والمنطق المحترم والجانب الليّن
‏اطيب من الكلمه اللي مالها داعي

.....

[الحمدان]

‏مرحبا من سبب ولّا بليَّا سبايب
‏يا سبب كل جرح ويا دوا كل علّة

‏يا حبيبي بدون أدنى شكوك وطلايب
‏والله وبالله اللي كوَّن الكون كلّه
‏
‏إنك الحاضر اللي كن ماهوب غايب
‏وإنك الغايب اللي ماتغير محلّه

‏وأنك أغلى من أغليته وسيد الحبايب
‏دام قلبي يحب وربي وربك الله

.....

[الحمدان]

‏سيّد الليل وأنفاس الفجر والمغيب
‏من شرا شوف عينك ماشكى غشّها

‏لو عصافير حيّك ماتشوفك حبيب
‏ما بنت في نوافذ غرفتك عشّها

.....

[الحمدان]

‏دموع الرجال تِعيب وتضر بالسمعه
‏وبالذات لا طاحت على سالفة زله

‏احايل عيوني كل ما طاحت الدمعه
‏على شان ما نبكي ونبلش بخلق الله

.....

[الحمدان]

ما وعدتك وجيت الا وكلي رضا
‏والله اللي عليمٍ والله اللي شهيد

‏الغلا لك بقلبي والغلا ما انقضى
‏والدليل ان حبك منتمي للوريد

‏لو تقاضي حبيبك مثل حكم القضا
‏ما تخلا ولا فكر يروّح بعيد

.....

[الحمدان]

‏ما ادري كسرني قلبي وظني الزين
‏والا جبل هقواتي اللي تهاوا

‏والا أنت ياللي منْك ما نامت العين
‏خلّيتني ويّا الجروح أنتخاوا

‏جيتك بجرح ورحت منّك بجرحين
‏والجرح من غالين صعب ايتداوا

.....

[الحمدان]

‏عطيتك اللي ما عطيت اقرب الناس
‏وعلقت فيك أحلام عمري وضاعت

‏لي قلب مايقسى وصادق وحساس
‏ولي عين ماصدت وخانت وباعت

‏ولك قلب طيب بس ما عندك احساس
‏ولك عين ماشافت جروحي وراعت

‏جيتك على وضح النقى رافع الراس
‏وطوعت لك نفسٍ عزيزه وطاعت

‏ابعتبر حبك مثل غلطة إحساس
‏وانت اعتبرني مثل فرصه وضاعت

.....

[الحمدان]

‏فنـجال قهــوه وأبتـسامه وسعة بال
‏تلقـى المســاء يروق لو كنت ضايق

‏لا تقـول مـالي خلـق وتـكـدر الحـال
‏حـــاول تـعيــش من التفـاؤل دقـايق

.....

[الحمدان]

بعض العرب غطى على ريحة العود
‏نظيف قلــــــب وخوته ترفع الرأس

.....

[الحمدان]

‏يا صاحبي ماني على خبرك الــعام
‏أنـا تـغـيــرت وتـغــيــر زمـــانــي
‏
‏شفني بعد صارعت قـسوات الأيام
‏مـن كــثـر ما عانيت ما عــاد أعـاني

.....

[الحمدان]

‏زمان اول تحوّل غصب ولّا طوع
‏ابي اعرف متى وشلون يتحوّل
‏
‏يغيّر هالزمن والحلو فالموضوع
‏انا اللي ما تغيّر من زمان اول

.....

[الحمدان]

عذرك هزيل وسالفتك أجوديه
بعض الحكي ماهوب مفروض ينقال

ان كان قصدك بالخطا طيب نيه
لا تصير طيب حاول تصير رجال

.....

[الحمدان]

ما حسبنا للزلايب ولا هرج الرخوم
خشمٍ نقدر جنابه وخشمٍ نلطمه

ومن علينا يحمل سلاح ويحرش خصوم
والله ان نسلب سلاحه و نخلع محزمه

.....

[الحمدان]

لا شفت من يزعل بليّا خطا منك
‏حاول عن اسباب الزعل لا تقصّى

‏أمّا لقى نمّامٍ مسولفٍ عنك
‏والّا على ما قيل خبلٍ موصّى

.....

[الحمدان]

أمشي على طيب الفكر والنوايا
وان طابت النيه ترى سعيها طاب

لاصارت الحاجه بايدين الردايا
اقفيت أردد منة الناس بتراب

.....

[الحمدان]

ارتح من صدوف المقادير وامن
‏واضحك وعيش المقبلات بشقاوه

‏عاد انت لو تدري مسمّى على من
‏من الفخر عطيت ابوك السماوه

.....

[الحمدان]

حيّ الله اللي قباله عالمٍ ثاني
‏أسج به عن غثاء الدينا وما فيها

.....

[الحمدان]

عليك الغلا مردود يا الغايب الموجود
‏سوالفك غابت مير طواريك ما غابت

‏غيابك حضورٍ له بصدر البيوت شهود
‏ويش اللي يغيّب ضحكتك والغلا ثابت

‏أحنّك مثل ما حن وجهي من المنقود
‏وأعدّك ليا عديت الأيام وش جابت

.....

[الحمدان]

المحبة من الله والغلا له سبايب
وانت سبة غلاك اني احبك من الله

.....

[الحمدان]

الديره اللي غلاها زاد فيني وفاض
واغليتها من غلا اهلها وسكانهـا

يجتاحه الشوق ويغازل فصول الرياض
ويكتب قصيد الغزل كله على شانهـا

.....

[الحمدان]

قعدنا نداري خاطر الناس لين الناس
تـعدت حدودٍ مـالها حق تاصلها

.....

[الحمدان]

‏اكثر ثلاث اشياء بها هم واحراج
الموت والفرقا ودرب الخيانة

واللي على قول المثل مالها علاج
رسميتك مع شخص عقب الميانة

.....

[الحمدان]

‏لك في عيوني همس وحروف وابيات
ولي في عيونك من دفا الحب تجديد

يا سيد إحساسي تموت المسافات
في داخل عيونك وتحيا المواعيد

.....

[الحمدان]

‏عطني وعد انك معي طول الأيـام
‏واعطيك عهـد انك حيـاتي وذاتـي

‏اخاف تتعبني معك وارسم احلام
‏والقاك بكره صرت من ذكرياتي

.....

[الحمدان]

يا ليل الاشواق حبه بالحشاء مبني
وأشواق بعده في الشريان ملصيه

يا طاير الشوق انا اترجاك وصلني
واهده من اعماق قلبي اجمل إتحيه

البعد يا صاحبي في الليل يجبرني
اصيغ الأبيات باسم الزين ليليه

البعد والهجر وغيابه يزعلني
و حالة القلب تراها يا اخوي مرثيه

يا الله انا ارجوك و اترجاك تجمعني
مع الحبيبه نار الشوق مخفيه

وكلما اخفيه با ا لصفحات يفضحني
لان مستوئ حبها ميه علئ ميه

ماخاب في حسنها وفي ذوقها ظني
كانها كما الشمس لي عن السحب معليه

هموم قلبي تغادر لو هي شافتني
وتصبح همومي من الوجدان ملغيه

كتبت الاشعار وباعز ف باسمها لحني
لهافي القلب والاعماق حنيه

.....

[الحمدان]

يحق لك يا ام الرموش المظاليل
سلي مظاليل الهدب واطعنيني

انا قطعت لشوفتك هجعة الليل
وانتي زرعتي ليل الاحزان فيني

لا تتركيني لليال المقابيل
صدي تغلي بس لا تتركيني

كل المشاكل في عيوني تساهيل
دامك بخير وساكنه وسط عيني

اشواق صدري قامت تحط وتشيل
وانا الذي لا اشتقت لك تعرفيني

لمصافحك بعانق الحزن والويل
حتى لو افني ما بقى في سنيني

ما دامك اقرب لي من الجدي وسهيل
بيجيك يوم وبلمسك في يميني

من يعشقك تسهل عليه الغرابيل
ويكفيني انك بس ما تجرحيني

وانا بلا نقص بجميع الرجاجيل
اطلق شنب ما ياخذك من يديني

لاني ليا حبيت حبيت بالحيل
ودامي عشقت استاهل اللي يجيني

حامد زيد

[الحمدان]

خل السوالف انا مشتاق لعيونك
عجل وشف لك طريقة نلتقي فيها

اترك هلابك وكيف الحال وشلونك
لا تنشدني عن الحال وانت مشقيها

لا تخلي الشوق يذبح حال مجنونك
لاجتك الفرصة طلبتك لا تعديها

واذا انت عايش انا ما عيش من دونك
العيشة اللي على هالحال مابيها

لو هي على الناس كل هالناس يفدونك
وانا حياتي فدى لعيون غاليها

اسالك بالله ترفق بي على هونك
مافيه داعي معك حالي تعنيها

لوفتشوا عنك وسط هالروح يلقونك
كنك مع الروح يا عمري مخاويها

ولو طالعوني على غفلة يشوفونك
اغلب اوقاتك بوسط العين تقضيها

دامك معي ياحبيبي لا يهمونك
لا يا بعد اول الدنيا وتاليها

عيني وقلبي من اللهفة ينادونك
عجل وشف لك طريقة نلتقي فيها

.....

[الحمدان]

ياليت العمر يتوقف
على حالة هناء جنبك

نعيش فيها ولا نخفف
من الشوق اللي من مايوصف

ونتهادا ورود الحب
ونروي فيها نشوة قلب

واقلك انت محبوبي

حبيبي تعبت الايام
تنادينا في حاضرها

صبرنا وصحة الاحلام
وفرصتنا في حاضرها

احبك يارشيق القد
احبك في اللقاء والصد

احبك والدموع عالخد
احبك مهما كان الرد

وانا في حالتي معذور
بربك لا تلوم مجبور

وانت مناي مطلوبي

يارتني املك الافراح
واتصرف بها وحدي

واعرف كم بقي لي جراح
وكم ساعة هنا عندي

واخلي فرحنا دائم
واخلي عمرنا هايم

واقول للشوق مين انت
توكل روح ياظالم

ونتهادا ورود الحب
ونروي فيها نشوة القلب

واقولك انت محبوبي

.....

[الحمدان]

مهما تردّى وقتنا لازم نطيب
‏ما نكسر بْـخاطر ولا نجرح شعور

‏نعاف من ينسى جمايلنا ويعيب
‏ونحبّ من ينصح إذا فينا قصور

‏نموت من خذلان صاحب أوحبيب
‏ونعيش لوّ أقدارنا عيّت تدور

‏ان ما حضرنا بْـما يجمّلنا نغيب
‏بعض الغياب أجمل كثير مْن الحضور

.....

[الحمدان]

اجعلي لي بين نهديكِ فِنا
قد رأيتُ الصَّدرَ طباً شافيا

احضنيني واسكبي شهدَ اللمى
أحيا في أنسٍ وأنسى ما بيا

ومن الزندين فرشٌ ناعمٌ
وصفي لي حسن بدرٍ باديا

فإذا ما حن قلبي أَرتَوي
من رحيق الثغر شهدا صافيا

سأخوض البحر وحدي سابحاً
لا يهابُ الصَّبُ موجاً عاتيا

أسعدي قلبي المتيمِ وامنَحي
للفتى المحرومِ حظّاً وافيا

فعيون الليل غضت طرفها
لنعيشَ الوقتَ حباً صافيا

.....

[الحمدان]

يالليل هذه علومي وآخر آخباري
للحين ضيقي على دربك مسريني

لاتنشد ان شفتني في عتمتك ساري
ما اخترت غيرك من الدنيا يخاويني

.....

[الحمدان]

يا بنت مامثلك في جميع الاصايل
يزهاك مدح الشعر اقصاه وادناه

بنت الرجال وبنت نعم الحمايل
بنت الاصل والعز والطيب والجاه

.....

[الحمدان]

ياللي علينا بالمحبه تغليت
‏بالله توكل رافقتك السلامه

‏ لا تحسبني بتبعك كان صديت
‏ما أتبعك دام الراس وسطه كرامه

‏من صد جازيته بصده وصديت
‏ومن يتبع المقفي يقل إحترامه

‏وكانك نويت تذل هالراس أخطيت
‏والله لتبطي ماتنزل من مقامه

‏أنا ترا لا قفيت ياهيه أقفيت
‏ما عاد أرجع لو تقوم القيامه

.....

[الحمدان]

‏لا حدتك دنياك والربع صدو
اصنع من ظروفك لهم قطعة اعذار
َ
ماهو اكيد ان الجماعه تردو
ظروفهم في حكم علام الاسرار

.....

[الحمدان]

‏لو الهوى المحبوس في جوف صدري
يظهر على الدنيا غشا العالم هــيام

فيني غرام فوق محمول صبــري
وفيني خيال فوق تصوير الافلام

.....

[الحمدان]

لآخـر لـحـظـة مـن عـمـري
اقـولـكـ انـت مــحـبـوبـي

وحـبـكـ فـي دمـي يـجـري
وطـيـفـكـ نـور فـي دروبـي

يـالـيـت الـعـمـر يـتـوقـف
عـلـى حـالـة هـنـاء جـنـبـك

نـعـيـش فـيـهـا ولا نـخـفـف
من الـشوق اللي مـن مـايـوصـف

ونـتـهـادا ورود الـحـب
ونـروي فـيـهـا نـشـوة قـلـب

حـبـيـبـي تـعـبـت الايـام
تـنـاديـنـا فـي حـاضـرهـا

صـبـرنـا وصـحـة الاحـلام
وفـرصـتـنـا فـي حـاضـرهـا

احـبـكـ يـارشـيـق الـقـد
احـبـكـ فـي الـلـقـاء والـصـد

احـبـكـ والـدمـوع عـالـخـد
احـبـك مــهـمـا كـان الـرد

وانـا فـي حـالـتـي مـعـذور
بـربـكـ لا تـلـوم مـجـبـور

وانـت مـنـاي مـطـلـوبـي

يـارتـنـي امـلـك الافـراح
واتـصـرف بـهـا وحـدي

واعـرف كـم بـقـي لـي جـراح
وكـم سـاعـة هـنـا عـنـدي

واخـلـي فـرحـنـا دائـم
واخـلـي عـمـرنـا هـايـم

واقـول لـلـشـوق مـيـن انـت
تـوكـل روح يـاظـالـم

ونـتـهـادا ورود الـحـب
ونـروي فـيـهـا نـشـوة قـلـب


.....

[الحمدان]

طاب المساء والمحبة والسمر
على ضفاف المعاني والقصيد

في حضرة الطيب وانوار القمر
والذوق والفن والسحر الفريد

يحلى اللقاء دائما باغلى البشر
ويكون للوصل فرحة يوم عيد

ننسى التعب والمواجع والكدر
كأن الأرواح عادت من جديد

الأصدقاء خير ما جاب القدر
وبهجة الروح والعمر السعيد

.....

[الحمدان]

أَلَم تَرَني بُليتُ بِذي دَلالٍ
خَلِيٍّ لا يَرِقُّ وَلا يُبالي

أَقولُ وَقَد أَخَذتُ الكَأسَ مِنهُ
وَقَتكَ السوءَ رَبّاتُ الجَمالِ

.....

[الحمدان]

عذب ومنهو يردك لا تعذبني
البال مرتاح والأعصاب مرتاحة

لا ينكسر خاطرك كيفي وعاجبني
اجرح ترى صاحبك مبسوط بجراحه

.....

[الحمدان]

يا رب حقق كل حاجة بنفسي
ادعوك يا عالم بتأويل الانفاس

تجعل غدي يفوق بالخير امسي
وزيل عني كربة الهم واليأس

وجيرني من كل جني وانسي
مغرور متكبر وظالم ودساس

واجعل حياتي مشرقة مثل شمسي
وزيدني من قوة العزم والبأس

واجعل لباس العافية خير لبسي
فالعافية تغني عن الدر والماس

لا ضاقت الدنيا تذكرت درسي
من والدي والدرس حكمة ومقياس

اصبر عسى والصبر فيه التعسي
وعيش عمرك دايما رافع الراس

كل التعب مهما تجرعت منسي
الا الشكى وكثرة الذل للناس

.....