فوق هام السحب ( الشعر الشعبي) على متن القوافي

[الحمدان]

الرابح اللي عدّته خير الاعمال
على هدي خير البشر والصحابه

يرفع يدينه بالخفا خوف واجلال
يطلب رضا ربه ويخشى عذابه

الواحد اللي يعلم السر والحال
اللي عن الداعين ما صك بابه

سبحانه

[الحمدان]

خلك على النيه وخل النظر فوق
وفي معظم الحالات خلك حيادي

وتعاملك خله مع الناس بالذوق
وحاول تكون بكل الأحوال هادي

.....

[الحمدان]

تغيب شمس الكون والله ماغاب
يدير اعمال خلقه وهو مايداري

والرزق مكتوبن والاقدار بسباب
تجري كما تجري هبوب الصحاري

ويا الله عسا لدعواتنا يفتح الباب
يا واحداً ندعوك ليل اونهاري

ولا علها في جاه من نزل اكتاب
يجيبنا ربن عن الغيب داري

.....

[الحمدان]

يارب هونها على كل ضايق
وأشفي مواجيع ٍ خبير بمداها

يارب وإكشف للقلوب الحقايق
وإرحم نفوس ٍ غارقة في شقاها

لاني بمحتال ٍ ولاني ببايق
وأمي قبل لاتموت أدوّر رضاها

يارب ماني للمخاليق طايق
وأسرارهم ماني بكاشف خفاها

يارب أنا أحاول بكل الطرايق
ومحاولاتي ضايعات ٍ جداها

.....

[الحمدان]

لاتشمّتْ بالزمن وأحذر تعيبه
الزمن مخلوق والخالق بصير

وكل شيٍ جاك من هم ومصيبه
قدّره مولاك والكاين يصير

ولا تقول أن البلا حاجه غريبه
خُل صبرك دوم للأمر العسير

والله اللي ماحدن يعلم بغيبه
وكل شخصٍ عاش له عمرٍ قصير

.....

[الحمدان]

ماتضيق صدور والدنيا وسيعه
والله أرحمْ بالعباد اللي خلقها

فارج الشدات مداته سريعه
كل نفسٍ من عطى جوده رزقها

يربح اللي يعبده وامره يطيعه
ويخسر اللي صد والدنيا عشقها

كل شخصٍ له مزاج وله طبيعه
والله الخلاًق وعباده فرقها


.....

[الحمدان]

‏جمّل الله حال من يبغى الجماله
لو ظروف الوقت عن طيبه تحده

.....

[الحمدان]

قالوا تحبه قـلت والله احبه
قالوا يحبك قلت مدري وش أقول

بس أذكر إنه قد حلف لي بربه
إني عـلى باله ولو كان مشغول


.....

[الحمدان]

‏ ياويل قلبي منه يا كثر ما اغليه
‏ ويا كثر ماله في خفوقي محبـہ

‏ الغالي اللي في قصيدي محليه
‏ يسسوى حياتي والغلا والمحبـہ

.....

[الحمدان]

الشعر ما يروي عطش قلب مقهور
ولا يداوي جرح نفس مغبونه

لو نكتب الابيات باحساس وشعور
نار الحزن يفرض عليها لحونه

.....

[الحمدان]

طريت في بالي وفجأه تبسمت
وغمضت من لذة خيالي عيوني

الليل والذكرى وطاريك والصمت
هالأربعه في غيبتك سامروني

.....

[الحمدان]

ياطبيب الروح قلبي ماتحمل
العتاب الي وصلني من جهاتك

وانت من خليت ورد الحب يذبل
في بساتين امنياتي وامنياتك

وانت من تجرح وتزعل ليه نزعل
وانت سم الحب يقطر من شفاتك

ليش لي رديت باب العشق مقفل
وانت من اجبرتني ادخل حياتك

طارق محمد البداي

[الحمدان]

جيتك غريب ٍضايع الخطوات في ليلٍ طويل
‏أبصرت بك فجر ٍضحك لي نوره وغيثه همىَ

‏من جرب وصالك ماعاد يطيب له غيّرك بديل
‏يشوفك لحالك سحابه والبشر كلها ظمى

.....

[الحمدان]

الشعر ما يروي عطش قلبٍ مقهور
ولا يداوي جرح نفسٍ امغبونه

ولو نكتب الأبيات بإحساس وشعور
نار الحزن تفرض عليها لحونه

تبكي الحروف وتنحني داخل السطور
ويذوب صبر القلب وسط سكونه
يا ليت بعض الهم ينقال ويدور
ولاّ يزول بخاطره من يخونه

.....

[الحمدان]

لا تتلف الروح لجل الناس ترضيها
وهمّ ولا يوم سوّوها على شانك

والله ماتندم على الدنيا ومافيها
لو تعرف الوقت من موتك لنسيانك

.....

[الحمدان]

ترى التشكي للمخاليق يشــــــنـاك
يحط من قدرك ويفـرح امعــاديـك

وكثر التـشره يجعـل الناس تجـفاك
ولاعــاد تلـقى بيـنهـم من يخـاويك

.....

[الحمدان]

ماعاد لك توقيع ياللي على بالي
واسمك مغيب ليه و إحساسك الروعه

وإحساسك اللي غاب مثر على حالي
بس اترقب متى الإشراق وطلوعه

[الحمدان]

ليتك عرفت القلب ويش كثر يغليك
وليتك عرفت اني معك اصدق انسان

ضيعت فرصه ياحبيبي من ايديك
خلاص تبقى فعل ماضي من الان

لا لا تحـاول بـس ماعاد يمديك
فات القطار وخاطري منك زعلان

روح عسى سود الليالي تربيك
وتنصف لقلب صان حبك ولا خان

.....

[الحمدان]

ان كنت شاعر جيت والروح تفداك
لان شعرك مثل شعر الصعاليك

مثل الفرزدق وامرو القيس شرواك
وان كان مش شعرك فباترك طواريك

.....

[الحمدان]

لا تستحي لك الله إن صدري رحيب
‏إن كان في خاطرك نشده هاتها

‏لكن لا تنشدني عن الغايب وأغيب
‏في برزخ الذكرى و في لوعاتها

.....

[الحمدان]

ليت الحروف تقول ماهو بضلعك
وليت الكلام يحس مافيك ويعنيك

باقي على شرعي وخلك بشرعك
وليا لقيتك يوم اراجع حكاويك

.....

[الحمدان]

ما ينتهي حبّك ولو زاد الصدود
تبقى غلا روحي ونبض الشرايين

إن غبت طيفك في عيوني له وجود
وفي غيابك شمس عمري ما تميل

أنت الأمان وأنت فرحة كل عود
وأنت الحنين اللي بقلبي له سنين

دمت فحفظ الله وفي دربك ورود
ودمت فعيوني على مر السنين

.....

[الحمدان]

ودي المس حقيقة وجهك المزيون
وافهق الليل واشرب خمرة الحانه

كل لونٍ من الألوان ماله لون
لين اشوفه عليك وينطق لسانه

.....

[الحمدان]

‏بعض القلوب أوطان للحب والذوق
‏للطهـر أرض وللمشـاعر حـقايــق

‏لا غابت أيامـاً حـدانا لها الشــوق
‏يكفـي حضوره عن كثير الخلايـق

.....

[الحمدان]

بعض البشر يجمع شتاتك حضوره
في شوفته بهجه ومنطوقه علاج

لو فوق صدرك مع جبلها بحوره
يذوب باسلوبه جبلها والامواج

.....

[الحمدان]

خل البشر يا صاحبي دوم يحكون
مهما حكوا ما همنا في حكاهم

لو حن نحاسبهم على اللي يقولون
نص الخلايق ما مشينا معاهم

.....

[الحمدان]

سجدت للي له الثنتين والمنّة
وبداخلي من مطاليب العمر واجد

ولا طلبته سوا الفردوس والجنة
طاحت من عيوني الدنيا وأنا ساجد

.....

[الحمدان]

الله عطى نور القمر وقت ويغيب
والله عطاك النور في كل الأوقات

.....

[الحمدان]

‏‌ الصاحب⁩ اللي كل ما ضقت تلقاه
‏ودك تسمي بيض الأيام بأسمه

.....

[الحمدان]

‏عطيتك أكبر مثال ان المواصل جميل
‏وعطيتني درس بأن الوقت ماله أمان

.....

[الحمدان]

على كثر الشتات اللي يمـر ويربك افكاري
‏لقيتك ظـلي الثابت معي دايم على الهقوة

‏يا وجـهٍ كل ما ضاقت علي و شانت اقداري
‏ذكرته وانجلى ضيقي وصارت عبرتي غنـوة

‏تخيرتك ولو غيرك وجوده عندي اجباري
‏اعرف ان الحياة بدون وصلك ما هي بحلوة

.....

[الحمدان]

من تعنى لوصلك لا ترده ڪسير
ومن تباھى بھجرڪ أترڪه للعنى

.....

[الحمدان]

يالله توسع خاطري دامني حي
وتجعل هناي وراحتي في صلاتي

يارب مابي خاطري يكسره شي
ابيك تسعد ما بقى من حياتي

آمين

[الحمدان]

ما رضيت أكون هامش ولا أرضى بالقليل
وإن وطيت الجمر عادي ولا أوطى في وحل

.....

[الحمدان]

‏لا تستفزّك ذكريات الراحلين
‏مافيه أحد يبقى معك إلى الأبد

‏تظاهر بضحكتك لو قلبك حزين
‏ملامحك فيها من الغربة بلد

‏حاول تعيش العمر بإحساس السنين
‏عابر وإذا مرّيت ما ترجع لأحد

‏وإذا ذبحك الشوق وأوجعك الحنين
‏تذكّر إنّك ما انت اول من فقد

.....

[الحمدان]

‏حاول انك كل ما جيت تبطي ما تروح
‏ما سترت الشوق عنك وقلبي كاشفة
‏
‏اي نعم فيني هموم وتناهيد وجروح
‏وعيني من البعد تدمع وكبدي ناشفة

.....

[الحمدان]

‏شوفك علاجي عن حبوب البندول
‏لا صار يوجعني من الشوق راسي

‏وأنت المضاد وفيك ميزه على طول
‏تمحي التهاب القلب لو كان قاسي

.....

[الحمدان]

‏مهوب ذنبــي لاعصتني المقادير
‏واصبح خفوقي للمصايب وطنها

‏أحدٍ فــراقه عن عيـــوني تباشير
‏وأحدٍ فــراقه يآخذ الشوف منها

.....

[الحمدان]

‏يالبيه يامن لك بقلبي غلاٍ مخصوص
‏بسولف عليك ومن كلامي خذ الزبده

‏هني الغرير اللي على ضمّتك مرخوص
‏لا خالف يديك وغطّ كبدك على كبده

.....

[الحمدان]

‏انا اللي خذاه الحب والعشق دون إدراك
‏وحشّد حبك الطاغي على القلب قوّاته

‏ما ينساك عقلي يا هوى البال ما ينساك
‏تخاشر حبيبك سجدته في صلاواته

.....

[الحمدان]

‏لو مابقى من مفاتنها سوا الشامتين
‏يكفيني أنها الحياه اللي تمنيتها
‏
‏على كثر ماشكت من مجريات السنين
‏عن كل دمعه ولحظة حزن نسيتها

‏تطلب واقول العيون ملبيّه عين عين
‏حتى لو مرادها قتلي ما رديتها

.....

[الحمدان]

‏لاتسهج آعراض خلق الله وتشغلها
‏جــوّد لسانـك تــرى الايام دواره
‏
‏من يفتـح ابـواب غيـره ويتختلها
‏بكره لوجه الشماته تنفتح داره

.....

[الحمدان]

‏على قربه تطيّب الحنايا من الصدمات
‏مثل ما تطيب القاع لا علّها الوسمي

‏معه ما أتقيّد فالسواليف والضحكات
‏ومع غيـره أدق الثقل واغدي رسمي

.....

[الحمدان]

ماعاد ينفع فالشدايد ولد عم
مار الله الله فالدعاء والصلاوات

ماتو هل ابشر وازهل وتامر وتم
ولا الردي لامنه نفعه ولا مات

.....

[الحمدان]

الخطوه اللي ما تعزك بممشاك
لا تهتويها واقصر المشي عنها

لاصار ما ترفع مقامك بدنياك
احذر اتجاملها وترخص ثمنها

.....

[الحمدان]

عين الردي يقصر نظرها من الطيب
لو كان شوفه شوف زرقا اليمامه

يغويه شور قريـّبين المحاضيب
ويعميه من كسب الجميل الرخامه

.....

[الحمدان]

احفظ المعروف لاتنكر حصيله
والجمايل ردها للي فعلها

كل حاجه تتخذ حسب الفصيله
والفصايل طيبها من طيب اهلها

.....

[الحمدان]

ياقاضي الحاجات يامالك الملك
لا تحط لي بيدين الأنذال حاجه

يارب لوهي حاجتي أبره وسلك
جودك شرف وأفخر بجودك وتاجه

آمين

[الحمدان]

يالله بـرزقٍ يـدفن الـفـقـر فالقـاع
ويمسح عن الوجه المشلهب رسومه

تفتح له ابواب السما كل مصراع
مـاحال من دونه موظف حكومه

.....

[الحمدان]

بغينا عليك نمون حتى علينا تمون
فتحنا معك باب الميانه وسكرته

ورحنا وطبقنا المثل طيب المضمون
تلق الخلا وابعد عن الداب وشجرته

.....

[الحمدان]

أحب البشاشه وأكره الصاحب الـمنحوس
وأحــب البـساطـه والـحـيـاة الطبـيـعـيـه

تعبـنـا نكـافـح ليـن شابت نـواص الـروس
وعطـانـا الـزمـان دروس غـيـر إعـتـيـاديـه

فصول الحياة أخطر من الواقع الملموس
تـجــر الغـشيـم بغـمـزة عـيـون سحـريـه

.....

[الحمدان]

‏الذكريات تهون بس الخوف بعد الذكريات
‏ساعة حزن ودك يفوت العمر قبل تعيشها

.....

[الحمدان]

‏يا طيب ليلي لاجلست آتحراك
‏وافرح ليا شفتك تسولف قبالي
‏
‏يا البلسم اللي من سنين اتمناك
‏انت الغلا انت الوفاء والدوآء لي

.....

[الحمدان]

‏أنا حلالك واخذني لو تكرمت
‏أنت امنيه تسوى جميع امنياتي
‏
‏صوتك قبل ترقد وصوتك إلى قمت
‏اجمل شعور اشتاق له في حياتي

.....

[الحمدان]

يا مساء الأنوار يا قلبي أنا
يا مساء ذيك العيون الذابله

مال قلبي عنك يا قلبي غنا
ما ابي غيرك جميل أقابله

انت راحت بال من بعد العنا
شاعرك ﻻ طاب جوك طابله

.....

[الحمدان]

‏الصدق والإحساس والبوح والذوق
‏أربع لهن في داخل الخلق تشويـق

‏هذي تميز من بغى الحـب والشوق
‏وتغنيه عن باقى العرب والمخاليق

.....

[الحمدان]

‏ياما خسرنا والحياة استمرت
حنا من اللي ما نعدّ الخساير

.....

[الحمدان]

‏أدري تبـيني حيل وتمـوت فـيني
‏وأدري وجودي غير عن باقي الناس

‏وتدري مكانك بين رمشي وعيني
‏وحبك توزع بين دمي والانفاس

.....

[الحمدان]

‏شوفك يوسع خاطري كل ماضاق
ولا غيابك يجلب الهم والضيق

لا شفت زولـك تنفتح كـل الآفاق
انته حضورك غـيـر كـل المخاليق

اشبهك بالشمس مع وقت الاشراق
واحلا من الشهد المصفى على َالريق

.....

[الحمدان]

‏يا حبيبتي كل ما ضاق المزاج
منكٍ تسعدني الحكايا الدافيه

ما ابي دكتور يصرف لي علاج
شوفتك تكفي تجيب العافيه

بيني وبينكٍ مشاعر واندماج
بالمحبه والقلوب الصافيه

ابتدينا الحب يا طلق الحجاج
يوم عين الشك عنا غافيه

نورك اللي شاع في قلبي سراج
والف شمعه بعد حبك طافيه

وقبل حبك خافقي حوله سياج
كيف احب اهل القلوب الجافيه

انتٍ كلك حب صادق و ابتهاج
ومنكٍ تكفيني الحكايا الدافيه

.....

[الحمدان]

‏ويــن الذي عقـب الفجر يفتح الباب
ونجـــره يوقـظ كـــل نــايـم دنـيـنــه

وديوان بيته نصفه اصحاب واجناب
ولا بــاح مــن كثــر المكـارم كنــيـنـه

يضحك ويستبشر اذا جوه الاصحاب
وتقراء الكرم فـي وسط كفه وعينـه

.....

[الحمدان]

‏أبشروا بالخير يا أهل الصلاة
فعلكم طيب ومكسبكم ثمين

دامــكم لله تــــرخون الجـباه
خاشعين وراكعين وساجدين

الله كريم

[الحمدان]

‏احتجت والحاجه تحد الرياجيل
واللي يـســـد اللازمــه ويـن بيته

راحوا كـبار الروس مثل التماثيل
الهــرج واجد والـفـعــل مـالقيته

شبيب بن شاهر

[الحمدان]

‏عليك بالـقـرآن لا صـرت مـهـمـوم
ويزيح عن صدرك جميع الهمومي

وصل الصلاه بوقتها دايـم الدوم
تــرا البـشـر والعـافيـه مـاتدومي

سلمان بن دبسان

[الحمدان]

‏تسامحوا ياناس عن كل مافات
يالله عسى المعبود يقبل عملكم

العفوا خير وفيه للرب مرضاة
مافيه داعي لايطول زعلكم

تجاهلوا عن كل غلطه وزلات
وخلوا طريق المصطفى هو مثلكم

انتم بشهر المغفره والمسرات
واطلب عسى المولى يحقق أملكم

سعود عايد العلوي الحربي

[الحمدان]

‏لا تجــي بعضك ويبقى منك باقـي
لاتجي نصك قســى ونصك شعور

يا تجـــي كلك على قدر اشتياقـي
أو كذا خلك علــــى آخر ظهـــــور

.....

[الحمدان]

جـميل وقـته معي دايم يقدّرني
دوم المحبة عسى الأيام تحييها

على الوفا والكرم طبعه يجملني
يزرع ورود الأمل بأجمل معانيها

.....

[الحمدان]

كن المساء في طلتك يكتمل ذوق
الله على ذوق المساء في حضورك

ياللي عليك الشعر ميت من الشوق
ماتدري ان النور يازين نوورك

.....

[الحمدان]

شعر ليبي...

اعزاز بالسوايا نقصوا قرعتهم
وقلة الخير اتسير موش جديده

مامن سوايا شر من سيتهم
حاملينهن لخاطر وجوه عديده

وان كانهم ايمنو نعزقوا حيطتهم
علي طول مايعزق الزاهد بيده

اللي وجعني حيط لقاقتهم
الا حيطهم نقدر علي تبليده

زعميت السماء صبت بخماستهم
تعتهم وراي ايلقطو الحصيده

رمزى بولبرمه .. ليبيا

[الحمدان]

عندي عزم ننظر فيه شاوي
نين مغير تجرحلي نسيل

وعندي عقل يا جايب هجاوي
اتشق الكبد واتسمر الليل

مره يقول ننظر في فجاوي
بان اغياب رداعت الميل

سنادين صف اللي اجلاوي
شيالين للحمل الثقيل

ريت الدار خلوها اتواوي
بلاهم دوج فيها ما ايخيل

وفيها ناس ويسيرن حكاوي
غير احسين يبقا كي خليل

شعر ليبي

[الحمدان]

يدور الفلك نلقا الدرب امنير
بعيد عن اعزاز وعن ظلام ارياهم

واندير مزن لابد اس وانعير
وانبات وين متعلي على مرقاهم

ونبقالهم شاطب النوم انطير
انجي بينهم بالك وبين اغطاهم

واسع وقتا يبقا النفذ اقصير
وما انغلب في عكلة اخيوط سداهم

يالله يامن فالاحوال اتسير
وعالم اقلوب الناس ماجواهم

على ينفلت خير الشراب الخير
وما اطيحلي دمعه على فرقاهم

يالله أنحير مانبات امحير
ونفهم الي ما افهمه مسع فاهم

اكبرت وين عاد ماني اليوم اصغير
وناس واجده حيين درت عزاهم

شعر ليبي

[الحمدان]

سولف علي تراني أصغي بإهتمام
‏متشفّق ومبطي ومشتاق وبعيد

‏وانا بسولف لين أحس إن الكلام
‏بدايته لهّفه وتاليته قصيد

.....

[الحمدان]

‏أعرف إن القلوب تملّ مدة والنفوس تشين
ومعك الحزن لا منه غمرني زانت أخلاقي

.....

[الحمدان]

يابوي بشرني عسى القبر ممطور
جانا المطر بشر عسى خيره اسقاك

وعسى البرد حبه على القبر منثور
بشر عسى جنة هل الخلد مثواك

.....

[الحمدان]

السرور اللي يجي والسرور اللي يروح
انت سبة روحته وانت سبة جيّته

.....

[الحمدان]

تسلفت الحقايق مابكيت ولا ضحك لي ناب
‏أشوف أنك كلامٍ ما معي قوة على قوله

‏ماهو من طبعي أمل المدينة وأتبع الغيّاب
‏أنا يوم إني أتبع ضحكتك لي عام وشهو له

.....

[الحمدان]

جيتك مع الدرب البعيد اللي مساراته سراب
‏شرهات قلبي تذكرة والذكريات الامتعة

‏لا تنهر الحلم الكبير اللي على متن السحاب
‏حديتني على الجفا من ضيق ما هو من سِعة

.....

[الحمدان]

‏عدّ في صدري على وكرك وخلّك
‏وكمّل أيام الحياه بدون أماني

‏المحل هذا خلقه الله محلّك
‏ماخلقه الله مكان لشخص ثاني

.....

[الحمدان]

‏دام في الوصل خير ودام فالعمر يوم
‏ساعي في سبيل مواصلي لك سعي

.....

[الحمدان]

إزعل وترضيك اللّيالي والأيام
‏ماجاك منا شي يزعلك منّا

‏يغرك التفكير في بعض الأوهام
‏وتشوفنا مخطين وتصد عنّا

‏لا تحسب إنّا للمقفين خدام
‏من يتبع المقفين ماهوب حنّا

‏مالك علينا حق في وصل الأرحام
‏عشان نمشي لك على ما تمنّا

‏الروح تظهر والجسد جلد وعظام
‏والنفس من يتبع هواها معنّا

.....

[الحمدان]

السوالف بيننا لا تجي مثل الزهيب
‏وأتّناقلها العرب لكن اسمع ما يلي !

‏خل من بيني وبينك مثل خط الطبيب
‏مايعرف قراية حروفه إلا الصيدلي

.....

[الحمدان]

ما جا على الدنيا مقدر ومقسوم
‏وسود الليالي ماوراها مروفه

‏مدام روس الي يحبونك سلوم
‏المال ونفوس الحياه مخلوفه

.....

[الحمدان]

‏سنين العمر تطويني وأنا في عزتي هارون
وكم أيوب في صدري شكا صبره وإصراره

.....

[الحمدان]

‏محتفظ بك ولا لي في بديلك طراه
‏حفظ مال اليتامى في يدين اوصيا

‏جيت باعيش دونك بس وين الحياه
‏دام وجه الفراق اقشر ولا به حيا

.....

[الحمدان]

انت الحياه وطلتك تفتن القلب
حبك سقى ظامي فؤادي فديتك

أناظرك بالعين واشتاق وانصب
النبض نبضك والقلب صار بيتك

.....

[الحمدان]

رآحـو بـلآ مـوعـد وغـآبـظ؛ مـلآمـحـهـم
مـآ يـوجـع آلـفـقـد لـكـن تـوجـع آلـذگـرى

.....

[الحمدان]

الـذيـب مـاةيـرقـد لـيـا صـار جـوعـان
يـسـري بـتـالي الـلـيـل مـن شـان جـوعـه

مـثـل الـحـبـيـب ان صـار ضـايـق وزعـلان
سـهـران طـول الـلـيـل يـمّـسـح دمـوعـه

مـابـيـن جـوع الـذيـب وإحـسـاس الإنـسـان
تـبـقـى الـعـلاقـة بـيـن حـاجـة ولـوعـة

.....

[الحمدان]

ودي بك وانت تبغاني
باين عليه وباين فيك

تعال اسكنك بين ضلعاني
وسط قلبي وروحي تدفيك

وان تبي تسكن اعياني
عيوني فراشك ورموشي تغطيك

اعاني اي والله اعاني
دايم عيوني سهيرة وتبكيك

ياحبيبي والله العمر فاني
اغنم ايامك واغنم لياليك

ياجواهر والماس يا الكوكباني
لاواهني ايدين ضمتها اياديك

انا من الوحدة اعاني
فكل حزة اجيب طاريك

انا مجرد إنسان وحداني
ليتك تسليني وانا اسليك

كل واحد يبي الثاني
عسى الله يازين يهديك

بالله عليك لاتزود احزاني
لوتبي الروح والله لعطيك

.....

[الحمدان]

بعض العرب تطربك لحظة سماعه
ودك معه تقضي حياتك على طول

لا صار راسك يشتكي من صداعه
يغنيك قربه عن حبوب البنادول

لا من عطيته شبر يعطيك باعه
طيبه معك مع مر الايام محصول

وبعض العرب ودك وصاله قطاعة
كل ما اتصل بك قلت لاحول لاحول

قربه يدمر لك جهاز المناعة
تجيه وانت بخير وترد معلول

لولا المراجل والسنع واتباعه
ودك تقرب له مع التمر ديتول

.....

[الحمدان]

رحلت عني وطيفي مارحل عنك
مازال حبك معشعش داخل اعماقي

ياباهي الحسن في سحرك وفي فنك
هواك حرم منام العين بحداقي

اخلصت لك بالمحبة والغلط منك
تركتني احترق واذوب بشواقي

فرحت من فرحتك حزنت في حزنك
لليوم مازال عهدي بالوفاء باقي

رغم اني اوفيت لك ماخاب بي ظنك
وللأسف خنت بعد الود ميثاقي

نسيت اني من اول يوم مستنك
وكنت أعز البشر من بين عشاقي

.....

[الحمدان]

علمتني ياوقت كل التجارب
لكنني مازلت قاصر بعلمي

بس اتضح لي كل مخلص وعايب
وبان لي من هو منافق ونشمي

عرفت معنى الصبر عند المتاعب
وكيف اكافح لاجل تحقيق حلمي

عرفت قدر الأهل في كل واجب
وفضل ابي واخواني الكل وامي

عرفت معنى الجد ياكل طالب
وادركت ان الفوز واقع وحتمي

فهمت قهر الجيد وقت النوايب
وكيف اداري عند حربي وسلمي

عرفت معنى الحب عند الحبايب
وايقنت مالي غير حظي وقسمي

عرفت ان الحمد خير المكاسب
وان الأماني قد تجي عكس سهمي

عرفت حرقة من يراعي لغائب
وكيف دمع الشوق في الخد يهمي

عرفت كيف اختار للوقت صاحب
واصون قدره بين لحمي ودمي

عرفت معنى اللين عند التخاطب
وكيف اقول الحق واضح بفمي

عرفت ان الكذب سم العقارب
وان الاخاء في ترك سبي وذمي

عرفت ان الكبر أم المصايب
وفعله المشؤوم يقتل ويعمي

عرفت حجة كل مخطي وصائب
وقيمتي عند الخلايق وحجمي

عرفت حسرة كل مذنب وتائب
وان الحياة واقع مزيف ووهمي

خلاصة الأيام في رأي كاتب
لازال في التعليم جاهل وأمي

صلوا على المختار والآل قاطب
ذكراه تجلي كل ضيقي وهمي


دارس الجرمي

[الحمدان]

‏خاطري ماهو بطيب ولا مرتاح بال
والعرب معاد لي شفٍ في منطوقها

أتظاهر بالسعاده وأقول الحال عال
ولا أنا ضايقٍ والأخلاق طايح سوقها

.....

[الحمدان]

بعض العرب لا حــب بالحيل ينحب
وبعــض العــرب ما يقتله غير حبه

أعظم جروح الحــب لا خانك محب
وأكبــر ذنــوب الحــب فرقـا الاحبه

.....

[الحمدان]

بـعـض الـعـرب لا قـام يـنـعـش صـبـاحـي
وبـعـض الـعـرب لـيـتـه مـن الـنـوم مـا قـام

.....

[الحمدان]

تشهد لكم يرموك وقلاع حطين
وابن الوليد وابو عبيدة نديمه

الشام منباع الكرام السلاطين
نسل الصحابة والرجال الكريمة

.....

[الحمدان]

ما همَّني العَالم وأنتي معي
العالم للعَالم وأنتي حياتي

.....

[الحمدان]

مـــاعــاد لي هاذي السنــة اي تهذيب
جمـري طفى وأصبـح مجــرد رمـاده

الحزن خيّـــم فـوق كتفي بـلا ريـب
والعيــــن يحـــــرم نومها مــن سهاده

من وقـت قاسي فـيه شدّه وتصويب
أقسى الدروس اللـي تجي مـن وداده

بنيت أيـــــام العمـــــر دون تخـــريب
جانـــي الـوهنّ يهـدم ويعلـن فسـاده

خذ للنصيحة لجـل تحيا كمى الذيب
دونّ بها بيـــــن الورق فـــــي أفـــاده

العمـــر يمشـــي ماوقف عنــد ترتيب
ياسعــد مـن نـــال الهناء في حصاده

والوقـت منجـم لا مضى دون تنقيب
تخســر حياتــك يـــوم أخــذ الشهاده

أن غاب نجمـك فـي سنين التجاريب
لا عـــــد تســـــولف للقمــر مــن بعاده

عاتبت أنـــــا الأقلام فــي كـل تعقيب
والحبـــر دمعـــي دم داخــــل مـداده

عشت الليالــــي مثلمـــا كاشـر النيــب
واليــــوم يعلــــن فــي عرينـه حـداده

بـلال عـواض

[الحمدان]

دنياك يبن ادم غرور ومتهات
وعمر الفتى محدود رحله قصيره

مرصوده لك من جميع المحطات
من اول المشوار حتى الأخيره

حنا عيال اموات واجدودنا اموات
والدرب واحد ولا بعد فيه غيره

لو حاش بالدنيا قصور وعقارات
لابد من يومن يدرهم بعيره

وهناك تلقى جميع السجلات
ما تنسي لو كان حبت شعيره

منهم سؤال ومنك رد الايجبات
لازم تجاوبهم بعلمن وقصيره

اما من الدنيا بوسط جنات
ولا تعذب فوق نارٍ عسيره

.....

[الحمدان]

‏بعض العرب يسعدك في حرف حرفين
‏من دون منطوقه ومن دون صوتـه

‏يأخذ ويعطي بالسوالف معك ليـن
‏تفــرح بجيّـاتـه وتكـره سكوتـه

.....

[الحمدان]

ياناس احبه وانا مــــــــن كثر حبي له
حبيت حتى الـقـــــروب المشترك فيها

واحب إسمه وبيت الشعر والجـــــزله
شعره، حضاره لحاضـــــرها وماضيها

مابين صمتي ونار الشـــــــوق والعله
اتابعه كل ليله مــــــــــــــــــــن لياليها

ياليت يعرف ويفهم بعد ذا كـــــــــله
اني احبه وهو للروح غــــــــــــــاليها

عــــساه طبعهه رحيم يمــد لي حبله
نبني محبه وتربطنا مــــــــــــــباديها

الحب ماهو لمن حـــــــطه ومن شله
الحب يبغي قلـوب الطيب يطويها

ماتعرف المكر ولا الكــــــــذب والزله
تمشي بصدق النيّه مـن عذب صافيها

ياليل با لله بــلغ فاتني قله
النفس له كيف مـــــــايبغى يمشيها

لو قال اخالف شــــروع الدين والمله
لي ما يبيها مــــــــن الأشــياء فمابيها

.....

[الحمدان]

‏أحيان نفسي تنطوي مثل الحرير
وأحيان لا والله أشدّ من السيوف

.....

[الحمدان]

‏احدن حياته على ما يشتهي جاته
واحدن يردد عسى ربي يزينها

.....

[الحمدان]

‏بداية طريق الحب ضحكة من الأعماق
و نهاية طريق الحب للعاشق مصيبه

.....

[الحمدان]

الناس ماتدري وش اللي ورانا
وما كل شي داخل القلب ينقال

نعطيهم الضحكه ونخفي عنانا
نسكت ونحمد ربنا على كل حال

.....

[الحمدان]

‏إشـتقت لـك والـشوق حـرق ضنيني
يـا ويـل قـلبي مـن حريقه والأشواق

لـيـتـك قبالي بــس تـنـظر لـعـيني
تعرف بأني أشتاق لك موت وأشتاق

.....

[الحمدان]

لا تناولني الكلام العذب ناولني الحقيقة
السراب لو ملا عين العطاشى ما رواهم

.....

[الحمدان]

‏عيا يوالف خاطري بعض الأوناس
‏حاولت بس الناس ماهم بناسي

.....

[الحمدان]

ماقلت لك زارني طيفك وطيفك عظيمّ
فج الضلوع بقدومه واستباح الحشا

في وحشة الليل والعزله عذاب وجحيم
جاني يبعثر سكون الذكريات ومشا

.....

[الحمدان]

الله يعين اللي يردد كل يوم الله يعين
يطرد ورا حلمٍ قضى عمره وهو ما حققه

.....

[الحمدان]

واضيق لامنه غدى الليل ليلين
يرسم ملامح من حرمني رقادي

هو الوحيد اللي معاه أعرف اللين
مع إني أنا طبعي عنيد وقيادي

.....

[الحمدان]

‏أسهــر على صوره وذكــرى قديمة
واكتب قصيـدي وانتظـر نـور بكـرى

أصعب مواقف هالحيَــاه الأليمة
لا غاب عنك إنسَـان وأعطاك ذكـرى

.....

[الحمدان]

تفاهمنا على حسم الأمور و كلّنا راضين
‏و توادعنا ما كنّ قلوبنا خضر و هواويّة

.....

[الحمدان]

مالي ورى الناس لا مطلب ولا حاجة
‏مَـا دام رايي وجيه ومنهجي طيّـب

.....

[الحمدان]

‏درسن تعلمته ولاني بناسيه
درسن من الأيام كله فوايد

عنوانه الرفقه و منهو تخاويه
ونهجه مناهيج العرب و العوايد

من لايرافق صاحبن يحتمي فيه
ويبين في وقت القسى والشدايد

يقعد لحاله وأفضل اللي مسويه
مارافق ضعيفن يحب المحايد


فتى الجوف

[الحمدان]

‏الوقت ما يضمن على الزين والشين
والناس فوق الارض جايع وشابع

اهل الكلام حدود سـبعة مـلايـين
واهل الـفعـول نـعـدّهـم بالاصابع

سلمان بن دبسان

[الحمدان]

‏تسامحوا ياناس عن كل مافات
يالله عسى المعبود يقبل عملكم

العفوا خير وفيه للرب مرضاة
مافيه داعي لايطول زعلكم

تجاهلوا عن كل غلطه وزلات
وخلوا طريق المصطفى هو مثلكم

انتم بشهر المغفره والمسرات
واطلب عسى المولى يحقق أملكم

سعود عايد الحربي

[الحمدان]

ياللي بديت تحب شفني تخرجت
واخذت الاول مع شهادة ندامه

تدري وش عيوب المحبه ليا احتجت
يا تبيع حبك يا تبيع الكرامه

.....

[الحمدان]

جعل عيني ما تشوف إلا عيونك
وجعل حالي ما يضمه غير حالك

انت قل لي ويش هالـــدنيا بدونك
والله ان مــــــــابه حياه إلا وصالك

.....

[الحمدان]

لبيه لبيه من روحي الي روحي
لبيه يا اغلى من الدنيا ومافيها

لبيه احبك كثر ما تعشقك روحي
لبى حياتك من اولها وتأليها

.....

[الحمدان]

‏ياشوق لا تقسى على عيونه السود
انا دخيلك لا تعذب جفونه

ما زال في عمر الصبا ناعم العود
حرام غير الكحل يلمس عيونـه

.....

[الحمدان]

يامدور عن عيوبي منت لاقي في عيوبي
غير وقفه ماتوقفها انت واللي خلفوك

.....

[الحمدان]

عظيمه كنها قصرٍ تعلّى نايفات السور
رقيقه كنها وردٍ تفتّح وسـط بستانه

.....

[الحمدان]

ابتعدتي ولا حصّلت عقبك نديم
غير الابيات يوم اقف على بابها

آخر اللي بقى لي منك عطٍر قديم
اثر عمر الهدايا أطول من اصحابها

.....

[الحمدان]

خلوه يزعل لين ترضيه الايام
وعقبني الفنجال لارحت اراضيه

اللي زعل باوهام ترضيه الاوهام
خله على الصده ولاني براجيه

تركي العريدي

[الحمدان]

والله اني عارفن ما على الدنيا مقام
من رجاها مثل راجي سراب القايله

الحظيظ اللي توجه لربه واستقام
واشترى الدار الاخيره بدارن زايله

دهلان شداد السبيعي

[الحمدان]

هو مات بس انا في داخلي حي
وشلون يموت وداخلي ذكرياته

يارب نوّر قبره بكامل الضي
اللي عجزت لليوم استوعب وفاته

رحمك الله يا سلطان

[الحمدان]

احب المكان اللي يبعدني من اعداي
ومن عشرة اللي ما تحمل معاشرته

وان جيت بمكان وفيه من وده بفرقاي
اجنب مكانه واترك الداب وشجرته

.....

[الحمدان]

يامل قلب ٍ يلوعه طاري الفرقا
كما يلوع الحمام الورق شيهانـه

إن حوّلن حوّلت وإليا رقن ترقـا
متعليّتهـن وهـي حدمه وجيعانـه

على وليفٍ نحا مع روق عن برقا
عليه عيني بصاف الدمع غرقانه

أبوثـمـانٍ رهــاف ودقــةٍ زرقـــا
موتي ولا صدته عني وهجرانـه

.....

[الحمدان]

خِف نفسك للخوي والعواني والضيوف
وان لقيت اللي يَبا يزم نفسه ِزمّها

لا تراخى فالمواجيب وتطيع الضعوف
خَمّةٍ تمشي عروق الردا في دمّها

اقِف في موفقك لو كان ممنوع الوقوف
وان نصحك قليّل العِرف يا ويل أُمها

مطلق بن دعيج

[الحمدان]

لا قل عرف آلعقول وطاح سعر آلكلام
سلم على آلصمت لا منه حفظ قيمته

متعب بن مرزوق

[الحمدان]

عسى الحاجه الي تحطنا بموقف الاحراج
يجي ضرف طاري قبلهاونتجنبها

وعسى من يرد بخاطر الي يجي محتاج
تحده ضروف الوقت يمه ويطلبها

.....

[الحمدان]

أرحبي يا قشر الأيام ترحيب القشر
واقلطي في حضرة القوم مقلاط الضيوف

العمر تاليه قبر و موازين و حشر
ان سعدنا و ان شقينا نهايتنا الحتوف

ان حضرتي بالبشاير فلا زلنا بشر
وان لفيتي بالخساير على الشده وقوف

.....

[الحمدان]

المراجل ماتجي من ورث ابوك ومن فلوسه
المراجل ماتجي لك غير لا ذقت النوايب

لا تصير اكبر همومك بيت مملوك وعروسه
ولاتصير اكبر همومك بعد واهمال القرايب

الزمن يعطيك دايم من غثاه ومن دروسه
يا تجي رجال قادح يا تجي مذلول هايب

مسعود القحطاني

[الحمدان]

تعايش مع العالم وطنّش كثير علوم
وبابٍ تحس إنه وراه الغثى سدّه

.....

[الحمدان]

هون على قلبك ترى الوضع عادي
‏شفني من طعون الليالي تعلمت

.....

[الحمدان]

يآ ليتنا نجـرح مثل باقـي الناس
ونكسر خواطر من كسرنا ونقسى

لكننا مــن كثر ما نملك احساس
نجبـر خواطر مــن كسرنا وننسى

.....

[الحمدان]

لو كان الغلا يا زين بالكون محدود
‏ترى غلاك عندي تعدا حدوده

‏وإن كان عشق الناس ماهو بموجود
‏عِشقي لأجل عينك يفرض وجوده

.....

[الحمدان]

عسى الكفو ما يشتكي ضيم الايام
ولا تمنعه عن طيب راسه ظروفه

آمين

[الحمدان]

‏كان عندك لي غــلا لا يلمحونك
‏يا بعيد الــدار يالقلــب القــريب
‏
‏عاشقك ميت على طاري عيونك
‏كيف ينعَم في مناظَرهــا غريب

.....

[الحمدان]

‏ياخذني الشوق لعيونك واجي گلّي
‏يدفعني الحب جعل الناس يفدونك
‏
‏لو گان طيفگ مخاويني مثل ظلّي
‏أشتاق لمصافحگ واشتاق لعيونك

.....

[الحمدان]

‏أشتاق لحروفك وحسّك وطاريك
وأشره على نفسي واعدد خطاها

قلبي يصفق لك وعيني تراعيك
وكبدي على شوفك ذبحها ضماها

.....

[الحمدان]

‏لا ني بلا ناكر ولاني بجاحد
‏ ذاك الغياب اللي جعل وجهك يتوه
‏
‏الحبّ دوم ايجيك في وجه واحد
‏ بس الغياب ايجيك في عدّة وجوه
‏
.....

[الحمدان]

القلب عالقلب شاهد والمحبه دليل
والعشق لوحال عاشق ماعرف مستواه

ياغايبً في غيابه كل شي مستحيل
الحب جنه ونهر الحب عالي وفاه

بسماتك اشعال وغيابك وصدك جميل
ليت الجمالات تهدا من دمي لا دماه

دخيل قلبك وقلبي فيك وحده دخيل
ودخيل روحك من الفرقا وتالي نباه

كثر الصدود اشعلت قلبي وانت الوكيل
وحسبي الله على من راح ناظر وراه

بوصلك اتخيل الأحباب في كل ليل
وفي غيابك اشوف الحب يشكي مناه

روحي بروحك رهينه وانت مالك بديل
والحب ماله بدل والقلب قلبي فداه

مالي من الأرض في غيبتك لوهو قليل
وما ودي الكون ودي قربك اللي اباه

.....

[الحمدان]

‏يامدعي بالعشق واالحب والشوق
‏اعطني دليلك بالغلا والموده

‏الحب وصل وشووق واخلاص وحقوق
‏ماهوب بشوق ولعب مده ومده

.....

[الحمدان]

يا هلا بالنور واوراق الزهور
يا هلا بالغارقة وسط البحور

كل ما شفتك تذكّرت السرور
وانفجر في مهجتي كتلة شعور

.....

[الحمدان]

‏فمان الله لا ترسل ولا تسأل
‏وانا بكمل الباقي مع طيوفك

‏فشلت اني اكون بدنيتك اجمل
‏وحالت بيننا الاقدار وظروفك

.....

[الحمدان]

‏يعدل مزاجي كل ما خربوه الناس
‏انا وين ابلقى واحدٍ كـنه الشاهي

.....

[الحمدان]

‏صباح المحبه والغلا والقبال الزين
‏على اللي ليا غردت دايم يتابعني

‏يأكد متابعته برتويت رتويتين
‏يثبت غلاه وله بالاحساس يدفعني

.....

[الحمدان]

‏قلبي مثل جيري وطيفك مثل توم
‏ وياكثر ما ينحاش من توم جيري

‏لابوك ياطيفٍ يجي حزّة النوم
‏ يطري علي كل ماغفيت بسريري

.....

[الحمدان]

يسعد مساك وصباحك كل ما اصبحتي
‏ويسعد عيون ٍ تحـرى شوفة اعيونك

‏وينك فديتك على الشاشات ما لحتي
‏من زعلك جعلهم في الناس يفدونك

.....

[الحمدان]

‏بعض الرسايل مغير هموم ومعاتب
‏ودك قــبل تفتح الجــوال تمسحها

‏وبعض الرسايل تقول رسالة الراتب
‏اللـــي ترحب بهــا من قبل تفتحها

.....

[الحمدان]

‏من الود مدري دافع الحب والاعجاب
‏معاه الكلام يطول وازريت لا اختصره

‏يقول انت تستعبط مثل غيرك وكذاب
‏وهو نخبة النخبه على جيله وعصره

‏انا طر جيبي من سبايبه وضني خاب
‏مثل حسني مبارك على شعبه ومصره

‏احبه وقلبي عاده من الهوى ما تاب
‏مو لازم مثل ماحبه يحبني بصره

.....

[الحمدان]

‏يا دهر مالك ومال الكبرياء والطاعة
‏لا تلحقني زرايا بندقي وسعفتي

‏لفّني مثل الزقارة واقدح الولّاعة
‏ما معك رهبان قس ولا سماحة مفتي

‏لك عليّ الصبر وعزوم الشجاع وباعه
‏ولي عليك أن الغنايم منك ففتي ففتي

‏ياوجودي يالهنا والراحة اللمّاعة
‏يوم كنت أظلل أهل الطايلة بأكنفتي

.....

[الحمدان]

‏لا صرت واحد من النخبة وشاعر عظيم
‏نادر تحصل من الشعّار قدر و غلا

‏بتشوف في معظم الشعار غيرة حريم
‏لا شافوا الشاعر المبدع يجيهم بلا

.....

[الحمدان]

عوبا ومزيونه وللخاطر دوى
وإن روقت كتلة مشاعر مع حنان

وإليا زعلت صارت ملعونه ثوى
إبليس منها يشتكي زود الجنان

.....

[الحمدان]

‏رميت الاحلام في وجه الزمان البخيل
‏وعزيت نفسي وعز النفس عصيانها

‏وعن الحضور المهمش مرحبا يالرحيل
‏ما دام تحفظ كرامة نفسي وشانها

.....

[الحمدان]

‏طالت عناقيد الغلا وأينع الغرس
‏هبي بعطرك يارقاق الهبايب

‏من يوم خلانا الجفا نحفظ الدرس
‏وحنا مثل كل الحبايب حبايب

‏إن رحت راح الليل حبرٍ على طرس
‏وإن جيتني محدٍ من الناس غايب

‏من علم عيونك تسولف وهنّ خرس
‏علمني أرفى عن خطاك السبايب

.....

[الحمدان]

‏الهوى دربه طويل وحرّ شمسك جايزٍ لي
‏كلما ازداد الشعور تقل لرضاك المسافة

‏لا تحاول يا بعد كل الأحبة خاطر اللي
‏ ما تلدّد في ديارك غير من كثر الحسافة

‏إن رضيت أجيك كلي وإن زعلت أجيك كلي
‏أنتِ ذنبٍ لو يُعاد الوقت بأعيد اقترافه

.....

[الحمدان]

‏عاد لك فالبال ذكرى وفالخافق مكان
‏يابعد عمر السنين الشحاح الممحلة

‏ ماتنسيني لياليـك طيّات الزمان
‏وانت في يوم من الأيام سيّد مرحلة

.....

[الحمدان]

المسا يا الغالية مع ضحكتك غير
تنعش مـساي ضحكتك وأهتنيها

أنتي المسا وضحكتك يالغلا خير
كلمة مساء الخير مقصودة فيها

.....

[الحمدان]

‏مغترب عن ديرة احساسي وعن مربى شعوري
‏لي ثلاث سنين أدوّر لي على منفى و ديرة

‏لا تثاقلت الحضور اغوص في غبّة بحوري
‏لين أجيب الدّر من قاع الغياب المستنيرة

.....

[الحمدان]

‏تعال دونك واترك الدنيا وراك
‏صدقني الفرقا ماهي من صالحك

‏انا الضمير اللي يردك من خطاك
‏وان قلت سامحني ترى بسامحك

.....

[الحمدان]

أتمادى في حضورك وأتودَّد
‏يا بعد من يَنسج الغيمة قلايد

‏فيك أمدّ الصوت والليل يْتمدَّد
‏لين أحبَّ الوجنتين أمّ الرغايد

‏كيف أبى أتخيَّر سناك وليش أحدَّد
‏والسنين مسيَّرة والعمر بايد

‏آه يا ملح اللّيالي لا تصدَّد
‏أنت صدَّك ما تخفّفه القصايد

.....

[الحمدان]

‏يانصف عمر الحياة ومبتغى نصفّ دين
‏من عاش بك حاضره ماخاف مستقبله

‏يادعوةٍ مستجابه من حدا الوالدين
‏يافرحة اللي ضحك حظه وطاب عمله

‏مايَكفي العمر لو عشته معك مرتين
‏والعمر مرّه ولا يعتاض وانت أجمله

.....

[الحمدان]

‏شفت الوله مابين حرفك وعينك
‏من غير لاتحكي فضح بك غرامك

‏يا معاند أشواقك لعب بك حنينك
‏ليه المكابر دامي كل إهتمامك

.....

[الحمدان]

‏ماتدري الشوق يامكثر عذاريبه
‏اقل مافيه ضيقه داخل انفاسك

‏واللي تعذر يقول الشوق ماليبه
‏هذاك يالحب مادنق على كاسك

.....

[الحمدان]

‏الهوى غلاب والعذال مرضى
‏والتغافل شيمتي وأحلا صفاتي

‏يزعل اللي يزعل ويرضى اللي يرضى
‏إنت أجمل شي شفته في حياتي

.....

[الحمدان]

‏مطارد الأحلام يبغى وسع بال
‏وشلون نحكي لك ومن وين نبدا
‏
‏صديقي الحالم ترى بعض الآمال
‏تحوّلك من كائنًا حرّ عبدا
‏
‏لا تصير حاجة فارقة صير رجّال
‏المرجله من كل رغباتك أبدى
‏
‏الركض خلف الصيت والمجد والمال
‏يخلّي الرجال من غير مبدا

.....

[الحمدان]

‏عادتك ما تترك لغـيرك مجال
‏يختفون الكل اذا نـجمك لمع

‏يضربون بنـورك الطاغي مثال
‏منزلك عالي وشانك مرتفع

.....

[الحمدان]

‏حاوطيني يا نسانيس الهواء وسط المدينه
‏يكفي إنّي بين لمّة هالعرب كنّي لحالي

‏من يبيع من السنين الماضيه ليله ثمينه
‏مستعده أشري اللي فات وَاعيد الليالي

.....

[الحمدان]

‏تهب الهبوب وقصدها خاطري بالذات
‏تعكّر مزاج البال وتفرّح الشامت

‏اقوي عزومي واتناسى عن اللي فات
‏واشادي جروح القلب لا منّها قامت

‏شعوري مع الاحياء وقلبي مع الاموات
‏وعيوني عليهم لا تهنّت ولا نامت

‏يقولون ساكت ليه ماتسمع الاصوات
‏وانا لي حوالي عام اسولف على الصامت

.....

[الحمدان]

‏دنا من عناقيد الطواري لضيق البال
‏مايملى عتيم الليل وقلوب سماره

‏تلاشى الكلام وهل غيث الشعور وسال
‏وتمادى الحنين و طلت عيون نواره

‏سمية قنا عذبة موارد عصيّة جال
‏تباشر على ميلادها الريف واشجاره

‏ربت مع بنات الريح والشعر والامثال
‏عنود الريم وبنت شرهه وقهاره

.....

[الحمدان]

‏حتى لو تمثّل لي ان منت بحزين
‏انا ادري ان الحزن ياكل منك اكل

‏مثلك مايستاهل جروح ودمع عين
‏ضيّعتني منك وانا مالي شكل

.....

[الحمدان]

السعي في الحاجات ومساعد الغير
‏هـذا الرصيد الباقي اللي يسرك

‏وان كان مالله قدّرك تفعل الخير
‏على الاقل امنع عن الناس شرك

.....

[الحمدان]

‏إن شانت الدنيا ترا العمر مقسوم
محدٍ حياته جت على ما يريده

دايم تفائل بالأمل واترك اللوم
عش لحظتك واللي مضى لا تعيده

....

[الحمدان]

‏طيبك مع آلطيب يزيده نقآوه
مثل آلذهب ينفعك دآمك حشمته

وطيبك مع آلخايب يزيده غبآوه
من ضعف عقله يحسبك ما فهمته

.....

[الحمدان]

‏لا تفتش في الملفــــات القديمه
‏لا ذبحت الداب فأدفن معه سمه

‏الرجل لا يصبح لســــانه خصيمه
‏يهلك الرجـــــال من منطوق فمه

‏كلمة يمكـــن تفكــــه من جريمه
‏وكلمة يمكـــن تســـبب له مطمه

.....

[الحمدان]

اقطف ثمر دنياك وابعد عن الياس
‏اضحك وعيش و تـــالي العمر بايد

‏مهما تسـوي طيب ما ترضي الناس
‏من خلقة الدنيـــا رضى الناس كايد

.....

[الحمدان]

‏ليه أعاتب وأتضايق و أنقهر
‏وانت قلبك في غيابي مستريح

‏كنت أشوفك في ملذات العمر
‏شخص تفداه القصايد و المديح

‏و إنك واحد بس تكفي عن عشر
‏وأن غيرك لي خطا وانت الصحيح

‏جيت لك صادق بدربك مستمر
‏مندفع لك مهتوي واضح و صريح

‏ليت قلبي عن هوى قلبك نفر
‏مارجعت من الهوى ضايقٍ جريح

.....

[الحمدان]

‏على النقا مانيب من تحت لي تحت
‏طلـيـق وجـهـه وعـني الـشـك زايـل

‏يشق سيف الوقت صدري ولاصحت
‏و تـمـايل حمولـي و انا مـاتـمايـل

‏كاتم و عـمري للمخـالـيق مابحت
‏و لو طالت الايـام مـاني بقايـل

‏ابـيـهم يـقولون بكرا ليا طحت
‏بلاه والله كثر ما كان شايل

.....

[الحمدان]

‏الظمأ هذي مشاوِيْره على الغصن المدلَّي
‏كم مضى له في حنايا خاطري روحه وجيَّه

‏جِيت أشدَّد خطوة الأيَّام في دارك وأهلَّي
‏وأرتمي بَيْن الكثير من الغلا والقابليَّة

‏بس عيَّتْ عن ثمين أوْقاتنا لحظة تغلِّي
‏وعدت أشيل أغلى معاذيْر المحبَّة في يديَّه

.....

[الحمدان]

‏يالله تجعل لي حضور مشرّف
‏واجعل حروفي بالقصايد جزيله

‏والهمني الحكمه وحسن التصرّف
‏وابعد خطايه عن دروب الفشيله

.....

[الحمدان]

‏من باعني بالدين في سوق الاحباب
‏بأبيع قربه كاش للي يسومه

‏ومن حطني في وسط عينه والاهداب
‏عليت قدره بالسما مع نجومه

.....

[الحمدان]

‏حسسيني بقربك قد ماتقدرين
‏واكبري في عيون ضنوني الخايبه

‏من برودك معي ما اخاف لو ترحلين
‏انتي اصلاً كذا ولا كذا غايبه

‏ما افترقنا ولكن شبه متفارقين
‏مدري اهمال ولا نفسونا طايبه

‏المهم ان خذاك الطيش لاترجعين
‏انا قد الفراق ولاني بهايبه

.....

[الحمدان]

‏يقولون لاتدعي على الكافرين بخير
‏وانا اقول جعل مسوي الهاتف الجنه

‏ليّا صرت فى دارن وخلك بدارن غير
‏يسولف عليك وكنّك قريّبٍ منه

.....

[الحمدان]

‏الغايب اللي غيابه زاد عن حده
‏ليته يرد لخفوقي بسمة ايامي

‏مايدري اني بعد فرقاه والصده
‏زايد عليه الحنين وزايد هيامي

.....

[الحمدان]

‏يا قلبي اللي تحاول قد ما تقدر
‏تلحق على اللي بقى لك من بقايها

‏اعوذ بالله من كئابة المنظر
‏هذي سكاكينها ولا هداياها

‏يبدو لي ان ما لنا مسلك ولا معبر
‏كل الطرق صارت تودي لذكراها

‏احلامنا اللي كتبناها على الدفتر
‏تبكي على احلامنا اللي ما كتبناها

.....

[الحمدان]

‏يارب دبرنـي علــى خيــر تدبيـر
‏وعاملني برحمتك واقبل صلاتي
‏
‏وانك توجهني على منهج الخيــر
‏وانك تحقـق لي جميـــع امنياتي

.....

[الحمدان]

‏جيتك وتسبقني عيوني ل لقياك
من لهفتي تاهت بروحي معانيك

قريت شوق وهاجس الشعر لباك
لحظة حنين وفي حروفي تغنيك

.....

[الحمدان]

الناس ماهم بالمظاهر والاشكال
الناس بالأفعال تحكم عليهم

ناسٍ كما غيثٍ به الوبل همّال
وناسٍ تحب الشر لاخير فيهم

واترك كلام اللي يغرك ليا قال
وابعد عن الانذال واحذر تجيهم

ياما تشوف بقربهم ضيقة البال
ماتقضي الحاجات مدة يديهم

.....

[الحمدان]

‏اليا فعلت الطيب في غير راعيه
خلٌه لوجه الله جلا جلاله

لاتلتفت لاهل العتب والمشاريه
الطيب طيبك وانت راع الجماله

.....

[الحمدان]

‏تجمّل مع العالم و خلك حسين أخلاق
جميلك هو اللي لامن اقفيت يبقى لك

.....

[الحمدان]

‏من وقاري يحسبون إني بليد وما أتشرّه
وإلا أنا مبدا التغاضي والتعامي من وقاري

.....

[الحمدان]

‏اللي من الدنيا يبي شيً كثير
إليا مرض ما يبغي إلا العافية

.....

[الحمدان]

أنا لا لاح لي زولك نبت حول الطريق أشجار
لو إني أمشي بصحراء ربيع الوقت جافيها

.....

[الحمدان]

عطاك ربي على زين المحيّا قبول
وأعطاك عذب الكلام وفارقه وأندره

.....

[الحمدان]

‏غلبتني بالكلام وكثر بربرتك
وأنا غلبتك بفعلٍ يوجعك دايم

والناس في ذمتي تدري وخابرتك
‏لكّن تسفهك طِيب ومالها لايم

.....

[الحمدان]

ما يموت الحب في قلب المحب
ولا يموت الشوق لو طال الغياب

.....

[الحمدان]

متحسف ومستسلم وبين اياديك
ما للعتب داعٍ وانا جيت مهزوم

.....

[الحمدان]

وادعيني واتركيني عسى دربك سماح
القناعه كنز عند الضمير المستريح

اتركيني ضايق البال مكسور الجناح
اتثاقل قومتي واتحالا للمطيح

.....

[الحمدان]

سبحان من حط الحلا في عيونك
ووزّع على باقيك حلو التواصيف

كيف اقنع ابيات الشعر يوصفونك
وانت ابجمالك فوق كل التعاريف

.....

[الحمدان]

ودك تحب إنسان مايعرف الكذب
مشاعــره لا قالها ما سـرقها

من قبل لا تسأل فؤاده عن الحب
تشوف أحبك في عيونه نطقها

.....

[الحمدان]

لغةغلاك اللي طغت داخل البوح
ترسم لعشاق الهوى مفرداتي

دام الشعر يتنفسْك داخل الروُح
ارتاح يانبض الغلا وسط ذاتي

.....

[الحمدان]

‏اللي يدور ورى المقفي رضا واهتمام
‏ كنه يدور كلام الحق عند الخبل

.....

[الحمدان]

لو الغلا يـاخذ ويعطي على الكيف
تـرى الغــلا منـي لـك اول هـديه

هرجي معك صـادق ولا اظن به زيف
مقصد شرف مالي مقـاصـد رديـه

.....

[الحمدان]

إبتسم حتى لو تقسى آلظروف
من سحآب آلكون مآ ضآقتْ سمآ

كم كفيف قلبه آلمبصر يشوف
وكم بصير قلبه آلميتْ عمآ

.....

[الحمدان]

‏في قلبها معنى العفو والتسامح
‏وفي خدها لمحه من الشمس بدري

‏لها ثمان سنين نفس الملامح
‏وشلون ماتكبر مع الوقت مدري

.....

[الحمدان]

‏ياعبيد وان غاب الشفق واقبل الليل
‏ ادن البريق وصب لي منه كاسه

‏ما عندنا ما نذخره للمقابيل
‏خذ ثار حزنك من ليال الوناسه

‏من يقبل العيله يبي يقبل الميل
‏ولا تنصدم بالناس كل ً وساسه

‏رجلً يدير الهرج بين الرياجيل
‏ورجل ً يديرون الرياجيل رأسه

.....

[الحمدان]

من زينها ما هي تشبّه على الريم
الـريـم هـو اللي يشبّه عليها

فيها من الورده و فيها من الغيم
وفيها الحياه وسكرة الموت فيها

.....

[الحمدان]

شعوري اللي بدونك بين وحشه وخوف
‏شعور شايب توحش في عزا آخر صديق

.....

[الحمدان]

ثنتين تاخذهـــا بعـــين الاعتبار
‏في كـل حــالاتك ولو مالك جلد

‏وقت الغضب لاتغلط وتاخذ قرار
‏وبنشـــوة الافراح لا تعطي وعد

.....

[الحمدان]

‏ما يصبر على الوقت غير رجّال
وما يسرج العنقا غير خيالها

ما كل من قال للمرجله فعّال
ولا كل من طلب المعالي نالها

.....

[الحمدان]

‏جيتك وانا كلي بقايا طموحات
‏رغم العجاف المؤلمه جوف ذاتي

‏اسج بأفكاري عبر رحلة الذات
‏بين الحياة وبين موعد وفاتي

‏طوق الأمل عانق مسار المجرات
‏يرسم على اللوحه صفه من صفاتي

‏تلحفت في تربة البعد غايات
‏لفة بقايا ما بقى من شتاتي

.....

[الحمدان]

‏ماطحت في غيابك لكن كل شي طاح
‏دمعي وصبري والطموح اللي أطمّح

‏أكلمك وأنا على باب الأفراح
‏واللمح والأفراح مدري وش ألّمح

‏قل لي كلام زين يمكني أرتاح
‏ولا كلام شين يمكني أسمّح

.....

[الحمدان]

‏و أنا أموت فيك وصال و أموت فيك غياب
‏و هي موتـةٍ وحده مع فارق التشبيّه

‏أحبك ولا تسأل حبيبي عن الأسباب
‏أنا لو أعرف أسباب حُبك قدرت أنهيّه

‏ألا يا معـرّض رجل مغليك للمرقاب
‏أثر بالطوال تفرج الهم يا راعـيّه

‏أنا بسألك هو صحيح الهوى غلاب
‏أنا بنصح إلي مثل شرواي لا يمشيه

.....

[الحمدان]

‏انا استودع الله فيك ياقلبي المخطوف
‏وداعة من مسلّم حياته من البارح

‏مع الفارع اللي تجعل السمع مثل الشوف
‏ووجهٍ يرد الجرح من نيّة الجارح

‏تلافح بروحي كنّها ماتعرف الخوف
‏وادوّر مماتي من يديها وانا فارح

‏ولا عاد عندي شي غير انّي الملهوف
‏خذتني سواة الانتباهه من السارح

.....

[الحمدان]

معك من وين ما ودّك بلا مرسى ولا ميقاف
‏معك لو مالت اوراق الشعور المنهك الذاوي

‏معك حتى لو سنين الحنين الماضيات عجاف
‏معك حتى وانا مدري علينا الوقت وش ناوي

.....

[الحمدان]

‏من يقول دعْ عنك السهر قول هات نْعاس
‏عمومًا بعيد من السهر ليه ما نسهر!

‏طموحاتنا شااابت و هقواتنا جلّاس
‏و قليل المهاره قام يضحك من الامْهر

‏و علاج الصداع النصفي اللي يمرّ الراس
‏على قوته! ما يقدر يعالج الأبهر

‏يحدّد مسيري فالطرقات شكل الناس
‏طُرقاتنا تبْهرّ إذا شكلنا ابْهر

.....

[الحمدان]

‏أحبك وأتحفى طواريك و ذكراك
‏ويشيلك قلبٍ أبيض فيك متباهي

‏تحلويت السنين اللي قضت وياك
‏وتملكت الشعُور الفارق الراهي

‏ولا في عيني اللي مِثلك و شرواك
‏وعينك ما لقت من حولها أشباهي

.....

[الحمدان]

‏ودي اهديك السنين اللي تسمى سرمدية
‏مرخصٍ لك عمري اللي من يدي قام يتطلّق

‏عقدي الثالث تراه لجيدك الفاتن هدية
‏وأعظم إنجازات عقدي أنه بجيدك تعلّق

.....

[الحمدان]

‏تباهي وغني واضحكي لا يهمك شي
‏لا مالت ظروفك فيك لك من يعدلها

‏بتلقين لك في جوف قلبي براد وفي
‏هنا منزلك والناس تعرف منازلها

‏ماتقدر تزعلك الليالي وراسي حي
‏لو تزعلك سود الليالي بزعلها

.....

[الحمدان]

‏من دورة الوقت والايام فيني ذهول
‏محتاج راسي من الثنتين سبعة رتب

‏اتسابق القلب دقاته مسابق خيول
‏شيٍ ما شفته على الواقع ولا فـي الكتب

‏العام تلقى لاجل قل المواصل حلول
‏واليوم مني تشوف ان التهاني عتب

‏عشان وصلك يطوّل جعل عمرك يطول
‏ضحيت باحلام عمري بس ما الله كتب

.....

[الحمدان]

‏ِ
‏فيني الهدوء اللي سكن فيه الأزعاج
‏نرفز حدود الصـبر واجتاح حـدي

‏سجين فكر وغفوة عيوني ازعاج
‏واللي بودي ماهو بكيـف ودي

‏أنام وابني في سماء أحلامي أبراج
‏واصحى وتصحى عيون الأيام ضدي

‏محتاج اعيش العمر ماني بمحتاج
‏ولو باح سـد الناس ما باح سـدي

......

[الحمدان]

‏عاد للذكرى القديمه محلٍ فـ الضمير
‏كل ماجا الليل جـات الطـواري ساريه

‏صورتك واسمك وطاريك فـ الثلث الاخير
‏كيف اواجهها بصـدرٍٍ ضلـوعه عـاريه

.....

[الحمدان]

‏عروق قلبي لك دلالٍ مباهير
‏صفيتها دلّه و دلّه و دلّه

‏مدري صباح الخير وإلا مساء الخير
‏بس الوكاد بوجهك الخير كله

.....

[الحمدان]

‏أسامر وجهك السحري وادم الماضي المقبور
‏أبيك احساس ياخذني على عمرٍ بدا ثاني

‏يا ويلي ليه ما احبك واحسك شي يبني قصور
‏تسيد ضلع وجداني وانا للحب ضمياني

.....

[الحمدان]

‏باب السوالف يدخلونه ملايين
‏و باب الفعايل بس لأهل الفعايل

.....

[الحمدان]

صباح المحبه نبتدي يا صباح الخير
‏صباح يفـرح كل غالـي بمضنونه

‏صباحٍ بدهن العود باللفظ والتعبير
‏يعم الكرام اللي مع الصبح يقرونه

.....

[الحمدان]

‏انا البارحه سرّيت ليلي مع المسباح
‏ارتب كلام قد له سنين في بالي

‏الانسان مهما حقق الحلم ما يرتاح
‏ولا فيه شخص عاش وقته وهو سالي

‏انا لاطرا لي جيل كسابة الامداح
‏تصاغرت كل الناس في وقتنا الحالي

‏سقى الله زمان راح جيله وعزه راح
‏يسولف به الاول على جيله التالي

.....

[الحمدان]

كـل من واصل على دربٍ وصل
‏وحـظ منو درب للجنة مشى به

‏كــل ما صـــدره تضــايق اتصل
‏بالذي ما صك عن طـــلاب بابه

‏ولا بغيت تخـاطب الرحمن صل
‏ولا بغيت يخــاطبك اقـــرأ كتابه

.....

[الحمدان]

‏كُلُّ الصعابِ بلطفِ الله هيّنةٌ
‏طمّن فؤادكَ لا حزنٌ ولا قلقُ

‏كلُّ الأمور جوار اللهِ رائعةٌ
‏بشِّر عيونك لا دمعٌ ولا أرقُ

‏كلُّ الدروب بغير اللهِ موحشةٌ
‏تخيفُ من دونهِ الأيام والطرقُ

.....

[الحمدان]

والله إن ماعاد فالوقت شيٍ نشتهيه
غير زخات السحايب ونسناس الهوا

.....

[الحمدان]

ليت الطواري كلها طاريك يالوجه السموح
وليت الطريق اللي يودّي لك ما عاد يردّني

.....

[الحمدان]

ياطير سلفني، جناحك، ولو يوم
تدري حياة، الارض هم، وكئابه

ياطير،والله نفسي اجرب الحوم
ونثر هموم القلب، فوق السحابه

.....

[الحمدان]

وانا معي خاطرً يسمح وقلبً ثقيل
ماهـو بيرجع على الحاجه ليا عافهـا

.....

[الحمدان]

ياوجودي لا اقبل الشوق بالشي القديم
واقبل الليل وظلامه بذگرى فايته

.....

[الحمدان]

لك الشوق ياذنبٍ تركته لوجه الله
عسى سيئات الشوق ماهي بمحسوبه

.....

[الحمدان]

ما للمشاريه الثقيله غير رحبات الصدور*
وما للحمول الكايده يا كود من يركي لها

.....

[الحمدان]

ترى الفخر بالعقل والعِرف والدين
قبل الفخر باسمك وجيبك ولبسك

بتشوف نفسك حـاول تشوفها زين
لوشفت نفسك زين ماشفت نفسك

.....

[الحمدان]

يــــاسلام الله على اللي يردون السلام
والـوفـــــا يجزي وفا والتحيه وافـيه

مالقيت ازين من الطيب ومزوح الكلام
والنـوايــا الطيبـــه والصـدور الصـافـيه

.....

[الحمدان]

بعض البشر مثل الذهب في جرامه
غـالـي ومـتميز علـى الـصدر بـراق

لــه قـدر عـالي فوق عالي الـغمامه
بين السما والأرض وشعاع الاشراق

.....

[الحمدان]

رضيت بأسلوب الاوادم ما شكيت ولا زعلت
‏والناس تزعل يوم أعاملها بنفس اسلوبها

.....

[الحمدان]

لا تجاهلني تراني على الصدّة جسور
من عطاك الوجه يقدر يلقّيك ظهره

.....

[الحمدان]

يابلسـم اجراحـي وطبي وعمـري
يـاورد فـي يـدي زرعتـه وسقيـت

مابتـركــك لـو يـوضعـوني بقبـري
هـذا وصيـة قلتـهـا لـك ووصيــت

لاقـــدر اللـه علـي ومــت بــــدري
انثـر بـذور الـورد لايـوووم مريـت

حسسني انك من سكن وسط صدري
لاتحسـب ان الحي مايسعـد الميـت

.....

[الحمدان]

اسهري بين المشاعر وارقدي بفوادي
و اعشقيني عشق ابوك لـ بسمتك يابسمه

في حَوَر عينك وصلت لـ غايتي ومرادي
يافديت عيونك النعسانه المبتسمه

.....

[الحمدان]

ما يداوي عله القلب والله العظيم
واحدً حطيت عمري على راحه يده

آه يالطرق الحياوي ويالخد الوسيم
وآه يا سگر وصاله وتوته وشهـده

.....

[الحمدان]

ولا كنت أحس بلوعة الحب قبل أهواك
ولولا عيونك ما كتبت أجمل ألحانـي

.....

[الحمدان]

من تخير دربك المهجور عن باقي دروبه
لاقيٍ بعيونك الثنتين مضياف وكرامه

.....

[الحمدان]

مثـل القمـر والشمس كنّك وكنّـــي
أعكس شعاعك وأسهـر الليـل عنّـك

.....

[الحمدان]

لا تخليني نديمٍ يشتكي فرقى نديمه
وانت حبّك قد وسمته في معاليق الحنايا

وين ما لديت فكري شفت لك صوره قديمه
ووين ما وجّهت وجهي شفتك بكل الزوايا

.....