فوق هام السحب ( الشعر الشعبي) على متن القوافي

[الحمدان]

جف صوت الحروف وشح فكر الكلام
‏وانعقد حبل فوقه عبرة جانيه

‏كل ماقلت هانت بذكر الله وانام
‏ناخ ركب الجروح اللي لفت عانيه

‏كل ليلة بصدري مؤتمر للسلام
‏وينقصف مايكمل بالفرح ثانيه

‏الطف الكذب قولة بأن حالي تمام
‏والمعارك بصدري طحن متفانيه

بين خابت ظنوني بين كثر الملام
ارجي الله جزانا ثمرة دانيه

كيف بقنع عزومي تستمر للامام
وانا حكمة حياتي فانيه فانيه

.....

[الحمدان]

اذكرك ياقلبي قبل عده سنين
‏تعشق تفاصيل الحياة وصخبها

عايش بدون قيود وبدون روتين
‏تمشي ورا احلامك وتنسى تعبها

هاذا وتوك ماوصلت الثلاثين
‏موتت شغفك الغامضه وش سببها

.....

[الحمدان]

يسعد مساكم ياجميلين الأطباع
ويسعد مساء برنامج اللي جمعنا
‏
‏الموقع اللي فيه من كل الأنواع
ياما حفرتو فيه وياما حفرنا

بقلمي

[الحمدان]

احرص على وقتك ترى الوقت غالي
مافات من وقتك مقدّر ومحسوب

.....

[الحمدان]

‏في وقتنا اختلت جميع الموازين
والود بين الناس قصرت حباله

ليت الرداء يرسم بوجه الرديين
ونميز أهل الطيب وأهل النذاله

.....

[الحمدان]

‏لاصار لك شخص تحبه وتغليه
‏لاتدخله في كل طاري وسيره
‏
‏سكر عيون الناس لاصرت شاريه
‏محد في هذا الوقت يعطيك خيره

.....

[الحمدان]

‏ماعاد صدري على الطعنات يملك مجال
وماعدت ابي عذر يشفع له عشان اقبله

بنساه ولا اتناسى لكن باي حال
بتجاهله لو يذبحني عليه الوله

ماكنت اود الجفا بالعكس اود الوصال
لكن ابي حل يرضينا عجزت اصله

واقفيت باخر لقى يوم ازرق الدمع سال
وسلكت درب البعاد وكان يامطوله

.....

[الحمدان]

‏انا ما اعرف ليه انتظاري عليه يزود
‏مع انه عنيد وقاسي القلب ومكوبر

‏يواعد على انه في اكتوبر علي يعود
‏ياكذبة ابريل تنافسك كذبة اكتوبر

.....

[الحمدان]

افا يصدري ضقت من جاير الوقت
‏خابرك يا صدري تشيل الثقايل

‏وش فيك علمني لك ايام مارقت
‏ضايق وفيك الهم صايل وجايل

‏خابرك ماعمرك للأحزان رافقت
‏واليوم كنك شايل جبال حايل

.....

[الحمدان]

‏ياغايب عن عيوني خاطري يطريك
‏في كل لحظة عيونك كيف بانساها

‏لو غبت ماغاب طيفك عني وطاريك
‏كنك معي في خفايا الروح واقصاها

.....

[الحمدان]

أسترح في خافق اللي يعشقك وامرح به
‏واخذ ماتبغي بصدري كل مايحلا َلك
‏
‏كان قلبي يقنعك يفدا يمينك رح به
‏ماخلقه الله من بين الضلوع الاّ لك

.....

[الحمدان]

‏الناس عادات وقناعات وطبوع
وأنا ما أحب أزيد معهم كلامي

لاصرت أجاريهم في كل موضوع
لاشك بفقد هيبتي وأحترامي

.....

[الحمدان]

لاتبرر وترخص قيمتك وانت غالي
اجمع اللي لقيت من المعاذير وافنه

ماقدرت اتجاوز كلمةٍ قلتها لي
وزنها وزن ريش ومسها مس ثفنه

.....

[الحمدان]

تظاهرت بالراحه وأنا خاطري مكبوت
اسولف مع سالم واهون على هادي

ياجابر ياشين البكيه إللي مافيها صوت
هذي والله اللي يمكن تطلع فؤادي

له العهد فاللي عاد من عمري الموقوت
لاأسولف من أسمه لين يرثونه احفادي

لو ابسط حقوقه كلمةٍ كنها الياقوت
يسولف به التاريخ هجري وميلادي

.....

[الحمدان]

انا عيوني سود من قل الرقاد
وانتي عيونك سود من زود الحلا

صحيح بعيوني وبعيونك سواد
لكّن انتي من نعمه وانا من بلا

.....

[الحمدان]

طلّي علي من شرفه القصر من فوق
‏وتبسّمي لي وأضحكي في وداعي

‏أومي بكفين الغلا وأشعلي الشوق
‏في قلب شيخٍ جاك في ثوب راعي

‏حده غلاك يجيك ياشيخة الذوق
‏لو كان ماللحب والذوق داعي

‏وأقفى يتل القلب معلوق معلوق
‏في درب فرقاً ماوراها إجتماعي

مايتبع المقفين ياكود مطفوق
‏وأنا رصيدي ماتحوشه ذراعي

‏لو كنت ضايع كل مطرود ملحوق
‏يكفيني إنك كنت سبة ضياعي

.....

[الحمدان]

احيان ودك تكون بكلمتك واعي
‏ترا السوالف مع الجلاس منقوله

‏لاتذكر اشياء قيلت مالها داعي
‏ماكل شيٍ سمعته لازم تقوله

.....

[الحمدان]

‏دمعة ألم طاحت على نص الابيات
منها خجل قلبي ودفتر قصيدي

معها عزف قلبي على لحن آهات
كنه يقول لدمعة العين زيدي

.....

[الحمدان]

‏الكلمه اللي ماورى نطقها خير
الخير والله دفنها بالحناجر

العقل ميزانك وللوضع تقدير
بعض الكلام احيان مثل الخناجر

.....

[الحمدان]

يامحللين الهرج للهرج نقاد
‏وافضل مكانه للمودب سكوته

‏بعض الاوادم باول الهرج ينقاد
‏واصبح كما الكوره وكلاً يشوته

.....

[الحمدان]

خلك عزيز النفس لو همومك جبال
لاتشتكي للناس من حر مافيك

هذا الزمن ياصاحبي كله اهوال
يهدي لك البسمه ويرجع يبكيك

.....

[الحمدان]

‏مروعني الوقت لو ياخذ طموحاتي
‏وتروعني الناس في صدمة مباديها

‏بارد ولا شي يلفت انتباهي
‏تمرني أشياء ماتمشي وامشيّها

‏مسكر اذني ومقلل علاقاتي
‏تتساقط الناس من عيني واخليها

.....

[الحمدان]

راسٍ يبادلك الوفا حب خشمه
‏حطه علي يمناك وارفع مقامه

‏وراسٍ يقلل قيمتك لاتحشمه
‏لو زان في وجهك لقاه وكلامه

.....

[الحمدان]

الحاجه اللي دونها منة الناس
‏خليتها وأرجي من الله عوضها

‏الناس لو تقدر على كتم الأنفاس
‏كان امنعت حتى الهواء من بعضها

.....

[الحمدان]

قالت ثواني واتصل احذر تنام
تكفى حبيبي لازم تكون رايق

كانت ثوانيها قبل أربع اعوام
وشلون لو قالت حبيبي دقايق

.....

[الحمدان]

‏وان مر يوم ومابكيتك بصدري
‏ابكيك مره وارجع ابكيك ثنتين

‏يافقد عمرٍ راحت خطاه بدري
‏راحت وانا اسأل عنه واطالعه وين

‏هزيت بغيابك وانا اشوف قدري
‏وبكيتني لين انعمى للفرح عين

.....

[الحمدان]

‏ماحزنت الا على هقواتي وطيبي وظنيي
‏يوم كنت اظنه اطيب من على الدنيا لقيته

‏كنت اشوفه قطعة من قلبي وروحي ومني
‏وكنت اشوفه كل حلم وكل شي قد بغيته

‏ماهقيت انه بيحزني وعاده بيغبني
‏في وفاي الي وفيت وفي غلاي الي عطيته

‏ابتعد عني وهو ناذر نذر مايغيب عني
‏يقطع الله كل عهد وكل طيب قد هقيته

.....

[الحمدان]

ياليتني طفل وأجي له وأسلمَ
‏وأجلس بجنبه وأنشده عن علوُمه

‏محدنً علي ناقد ولا حدنً معلم
‏طفل يسلمَ لعنبوُ من يلِومه

.....

[الحمدان]

‏ولا تدوّر مثل قلبي ما أنت لاقي
القلوب اللي مثل قلبي قليله
عبدالعزيز العبلان


أنا ماني مثل غيري يجي ويروح
أنا مثل العمر لا راح مايرجع
عساف بن سعد

[الحمدان]

‏مرّ الخميس ولا سمعنا طواريك
ودخلنا الجمعه واصبح الوضع مربك

أبسالك بالله ومن دون تشكيك
هل انت تعشقني مثل ما أحبك

.....

[الحمدان]

الخطوة اللي ماتعزك بممشاك
لاتهتويها واقصر المشي عنها

لاصار ماترفع مقامك بدنياك
احذر تجاملها وترخص ثمنها

.....

[الحمدان]

‏ياكثر ماقلنا على الجرح لاباس
والوقت يكرب مـن شقانا حزامه

طابت خواطرنا من الوقت والناس
ماعاد نبغى الا الستر والسلامه

.....

[الحمدان]

يرقآ شعوري في سما عينك غْيوم
‏ويطيح من عين السما ألف شاعر

‏واليا إنهمر شعري على قاع ديموم
تنبت بشر تنبت ورود ومشاعر‏

.....

[الحمدان]

أبتسم للناس وأضحك للحياه
‏ولو تضيق اليوم قل بكره تزين

‏أعرف ان الله وحده لاسواه
‏قادر إنه يبهج الصدر الحزين

.....

[الحمدان]

ان جابها الله والمشاعر سليمه
يبغى لها حمد وشكر وتسبيح

وان ماكتبها الله فلا به هزيمه
حنا بشر نحتاج ونقوم ونطيح

.....

[الحمدان]

بين زيف الوجيه وطول بال السنين
ضاق صدر الفضيله بين حرّاسها

كل ماقال واحد راحوا الطيبين
أشعر أن الصداقه تلفظ أنفاسها

.....

[الحمدان]

الحاجه تدور المحتاج وتهينه
كم من كريم وطيب ماهو بخالي

ظروف الايام مثل السمعه الشينه
ماودك تشوفها في واحدا غالي

.....

[الحمدان]

والله اني بعض الأحيان ابتلش في حالي
‏من خطايا غاليٍ مايستحق اسبّه
‏
‏ودك أن الغالي اللي يدري انه غالي
‏مايقوم يكرر الغلطات وأنت تحبه

.....

[الحمدان]

‏عرفتك وسلمتك غلا ماعليه غبار
وشعور كثر مابطيت عنه تباطاني

تلاعب وفن وشي فاخر ولعب كبار
على شان عينك ماكتبته على شاني

طغيت بقصيد يطغي بساحة الشعار
مثل ماطغو في ساحة الحرب جداني

.....

[الحمدان]

اللي يعزك مايشوف الردا فيك
ومن يكرهك حتى بخيرك يذمك

ترضيه ماترضيه ماهو براضيك
لو هو من اقرابك ولحمك ودمك

.....

[الحمدان]

‏ابدع على كيفك ولا تجرح الناس
‏احفظ وقار الناس تحفظ وقارك
‏
‏واذا اعجبك ابداع غيرك فلا باس
‏وجهة نظر مافيه مانع تشارك

.....

[الحمدان]

خلك مثل فضل السحابه على القاع
تعطي ولا تاخذ من القاع حاجه

.....

[الحمدان]

لاصار اعز الناس يجرح مشاعرك
اجل عدوك طالبك لاتلومه

ومن لايقدر رفقتك لاجل خاطرك
كلمة فمان الله تقضي لزومه

.....

[الحمدان]

ماعاد باقي بالمجالس تعاليل
راحت سنين الفرفشه والوناسة

أن قلت هاتوسالفة يارجاجيل
كلن على الجوال دنق براسه

.....

[الحمدان]

وان بغيت تعيش في راحه وخيرات ومسره
أخذ لك نصيحتين ان طعتني واعمل عليها

المكان اللي تكز النفس منّه لاتمره
والوجيه اللي تشين النفس منها لاتجيها

.....

[الحمدان]

انتَ هَم حِس بأذيتي
بشوغَة كليبي عليَك

‏ضُعفي خوفَي إرتباكي
مايهَزن شعرة بيك

شعر عراقي

[الحمدان]

الحب دولة عظيمه ماوصفها لسان
ياقاضي الحب دون بالهوى عشقتي

احب وعشق ولي بالحب كل الحنان
وغيب واعود ماراح تختلف كلمتي

ليت الهوى ياحبيب الروح فينا زمان
وليت الأيام والعشاق من دولتي

لكي تبوح المشاعر من رياض الجنان
وتنقل الشوق قصة حب من دمعتي

ياللي تقولون هذا الحب ماله مكان
مكانه القلب والشريان له وحدتي

القلب بيته وعرشه فوق رمش العيان
والروح والدم له مرسا وسط مهجتي

الحب جنه ولاكن البشر بمتحان
وجنة الحب من بين الوفاء لوعتي

ان جيت وافي على حبك وصادق مصان
بتشوف الأحباب لك نظره ولك دعوتي

تعال ياللي نويت الهجر مني ثمان
القلب ينطق بأسمك انت ياقصتي

.....

[الحمدان]

تعاهدت أنا وياه لكن ياعزاه
تفاجأت من فرقاه وأقفى وخلاني

صويب من طعونه وحال القدر دونه
وقلت به ضعونه تركني وخلاني

هلي كيف أنا بنساه وأدله بعد ذكراه
وصبري وصل لقصاه وروح وخلاني

.....

[الحمدان]

جادك الغيث يادارٍ ربا فيك خلّي
‏كثر مَافشيت سرّك للهبايب وابحته

‏رحت كلّك بلا رجعه وانا رحت كلّي
‏يمكن الموت لوْ قدمي يعرّض نطحته

‏عايشٍ في رجا وصلٍ ماهو حاصلٍ لي
‏مابقى باب ماطقّيته ولا فتحته

‏الغلا بيننا ماهوب حاجة تغلّي
‏كم خطا من قبل لاتعتذر لي دمحته

‏الأكيد انّي كنت اشعر برفض وتخلّي
‏من كِذا رحت عنْك وموقفي ماشرحته

‏ليت لي حيلةٍ واحتال في طيفك اللي
‏وين مالدّت عْيوني بدربي لمحته

‏ودّي انساك بس شلون ابنساك قلّي
‏وانت من وين مايونس خفوقي جرحته

‏هاك قلبي تقاضى منّه ولا تخلّي
‏حاجةٍ في ضميرك باقيه لو ذبحته

‏لاتحنّه ولا تاويه واخذه تسلّي
‏اضرم النار في جوفه وفوقه وتحته

‏انت لـ اشفيت غلّك كنّك اشفيت غلّي
‏استبيح الخفوق وعاذرك لـ استبحته

.....

[الحمدان]

العذاري جلدها غضّ وشفيف
‏يستثير الشعر بعروق الورق

‏خفرة ٍ لو تلبس الثوب الرهيف
‏شفت وجه البرد يتصبب عرق

.....

[الحمدان]

مثل من يحجب بيده عن عيونه شعاع النور
‏انا وشلون بنفي فقدك وتأثيره وجوره

‏فقدتك كني أول من فقد غالي وعاش الدور
‏ولا احد قد فقد غالي قبله ويفهم شعوره

‏عبث تحضن خطاوي الدروب ودمعي المنثور
‏تطلعه ابتسامات الرضا والحب من طوره

‏كأني وان عرفت سرور قبلك ماعرفت سرور
‏او إن القلب زهّده الحزن واستكثر سروره
‏
‏اشوفك كل ماغنى على غصن الشجر عصفور
‏ولا عاد الشجر نفسه ولا غصنه وعصفوره
‏
‏يمر بعيني اشهی ماخلق ربي بدون شعور
‏صحيح إن القلوب جنود منهيّه ومأمورة

‏حبيبي مابقی دافع وسط بالي ولا لي دور
‏والارض اصلا كذا ولا كذا بالناس معموره

‏انا لو ذكرياتك ماتعمّر بالي المهجور
‏تعدّته الطواري من فزعها وانهدم سوره

‏على وجهك تحاسيف الزمان وصوتي المكسور
‏ياضيعة جرة انسامه من الصدر ومن كسوره

‏تركت من الجفا قلب يحبك راضي ومجبور
‏ولا ملله طول البعد منك ولا معي شوره

‏عسی الله لا يضيع لي سنين وجعلني مأجور
‏ولو ماتدمل اعذارك جروح القلب معذوره

‏احسك اقرب من اني اقول انّا ظلال وسور
‏واحس الأرض مادارت بعد عينك ولا دوره

‏ على صوره موقفني حنيني لي ثلاث شهور
‏وعيت لاتدور الأرض مادري عيت الصوره

.....

[الحمدان]

الاكتفاء من اركان الحُب حين تبلغ مرحلة من الاكتفاء حيث أن جميع من يمُر لايلفت الانتباه أعلم إن قلبك ليس مُلكك

‏يقول محمد المقحم :
‏تمر المره من عقبها كنّها رجال
‏ماوالله تحرّك شعرةٍ من شعر راسي

‏
وتقول ميلاف :
‏انت خليت الرياجيل في عيوني حريم
‏كن مافيهم مراجل ولا فيّ شهوه

[الحمدان]

في سكون الليل ناجيت علّام الغيوب
أسأله يربط على قلبي أسري في رضاه

ياتسابيح الدُجى ترجمي نبض القلوب
قد عزمت أسري مع الله وألبي ندائه

انطلقت أفزع مع الله في عز الدروب
واحتزم عونه وأواليه وأعادي عداه

......

[الحمدان]

ماحسبنا للزلايب ولا هرج الرخوم
خشمٍ نقدر جنابه وخشمٍ نلطمه

ومن علينا يحمل سلاح ويحرش خصوم
والله ان نسلب سلاحه ونخلع محزمه

.....

[الحمدان]

الناس تظهرها المواقف والأيام
والرجل تعرف قيمته من كلامه

رجلٍ يكفي فالمواقف ليا قام
ورجل جلوسه خير له من مقامه

.....

[الحمدان]

انا لك في نهار الشان درع وسيف ابوحدين
علينا الهقوه العاليا ولاخابت هقاوينا

.....

[الحمدان]

نضد الجمع ونضيم العدا ونخاصم الغاوين
ونتحدا الخطر وندوُس خشم الي يعادينا

.....

[الحمدان]

مافيه شيٍ يصير الا وله سـبه
‏والذيب عينٍ خلاف وعين قدامه

‏كم واحدٍ مـن رصاص القوم متنبه
‏ولاصابه الا الرصاص اللي من حزامه

.....

[الحمدان]

نبقى كبار وبيرق العز مرفوع
مهما يثيرون الصغار الزوابع

اهل السوالف كثار بكل موضوع
واهل الفعول تعدهم بالأصابع

.....

[الحمدان]

يالله ياللي فزعتك تكشف الضيق
في بحر عفوك ماتضيق المراسي

انا فوجهك من قليل التوافيق
ومن موقفٍ مايرتفع فيه راسي

بقلمي

[الحمدان]

مرّه نهالجها ومرّه بدون علاج
ومرّه نسبرها ومرات معتاجه

وليلة تسلينا وليله كدر واحراج
وليلة ظلام وليلة انوار وهاجه ‌ ‌‌ ‌ ‌‌ ‌ ‌‌ ‌ ‌‌ ‌ ‌‌ ‌ ‌‌ ‌ ‌‌ ‌ ‌‌ ‌ ‌
.....

[الحمدان]

على الشوق الملامه لاعليك ولا علي اخلاف
‏جماهير الجفا ماهمّها الجافي من المجفي
‏
وداعي معذره يالرحلين وللوداع اعراف
‏اعرف اشتاق ما اعرف اتمسك في يد المقفي

.....

[الحمدان]

‏ياشين الغياب إللي بلا سبّه وتبرير
‏غياب إللي مافكر بقلبي ولا حنه

‏يموت الغلا من قلة الوصل والتقدير
‏مثل موتة المعروف لاصار به منه

‏أنا مدري هو بخير ولا ماهو ببخير
‏عسى دورة الأيام ماغيرت ظنه

‏قولوله لاعاد يطاول البعد والتقصير
‏ترا البعد والتقصير مايدخل الجنه

.....

[الحمدان]

مع أنك رحلت بعيد لكن بقى التذكار
‏ليا شافته عيني تسابقً مدامعها
‏
‏دفنت الغرام بخافقي والقلوب أسرار
‏مشاعر هقيت إن الليالي تضيعها
‏
‏جحدت الغلا لين أمتلى بالخفوق وثار
‏قصايد عساها اليوم تطرق مسامعها
‏
‏يقولون ماودعك قلت الفراق وصار
‏والانسان روحه تنسلبٍ مايودعها

.....

[الحمدان]

لفاني على طرق الغلا والهوا مرسال
وانا من شعور وحب واحساس لبيته

هلا مرحبا باللي على الذاكره ما زال
اتجدد غلاه الذاكره لاتناسيته

عن البال ما قد غاب واشغلت فيه البال
احس اني اشوفه كثر ماتهييته

شعور التفاؤل يجعل الحلم طيب فال
ياكم ذاق حلمي سكرة الموت واحييته

.....

[الحمدان]

مانقدر نسوي مثل ماتسوون
‏تردنا عن فعلكم تربيتنا

‏انتم على مهونة النفس ترضون
‏وحنا لو اقفت عزة النفس متنا

.....

[الحمدان]

تعالي واتركي جرحٍ عليه من الدهور عتاب
أنا الواقف على درب اللقا ومعاند الفرقى

بعيدة يا هقاوينا العزيزة والجروح قراب
تهل دموعنا صمت وعزيمتنا معه ترقى

وش أقسى من مشاعرنا نمثل كننا أغراب
رغم هذا الجفاف اللي ذبحنا كلنا غرقى

.....

[الحمدان]

ليه أعاتب وأتضايق وأنقهر
‏وانت قلبك في غيابي مستريح

‏كنت أشوفك في ملذات العمر
‏شخص تفداه القصايد والمديح

‏وإنك واحد بس تكفي عن عشر
‏وأن غيرك لي خطا وانت الصحيح

‏جيت لك صادق بدربك مستمر
‏مندفع لك مهتوي واضح صريح

‏ليت قلبي عن هوى قلبك نفر
‏مارجعت من الهوى ضايقٍ جريح

.....

[الحمدان]

وانا احسب اني في فراقه تعافيت
‏وان عبرتي من مدخل الزاد زاحت

‏اللي يحسب اني على البعد سجيت
‏والا ان عيوني للرقاد استباحت

‏ياليتني من قبل لا احبه اقفيت
‏والا ان دروبي عن دروبه تناحت

‏اهون عليّ من البكا والتناهيت
‏واشلا من سدودٍ على الناس باحت

‏عرفت كيف الحي يفرق عن الميت
‏وعرفت قيمة نعمتي يوم راحت

.....

[الحمدان]

يوم الوفاء طبعك وانا عند ظنك
اعاتبك واشره ولارحت عودت

واليوم لاتشره لو ابطيت عنك
على كثر مافي وصالك تجودت

لاعاد تنشدني عن الشوق لانك
عودتني على الفراق وتعودت

.....

[الحمدان]

‏توادعت أنا واللي له القلب دار وخل
‏وداعٍ يجظ القلب والكبد ماسومه

‏الا ليت لو يرجع علينا زمانٍ زل
‏ماوالله عيوني تسهر الليل مهمومه

‏الا بيني وبين الهواجيس حط وشل
‏همومٍ توردني على الموت وسهومه

.....

[الحمدان]

ماطابت خواطرنا لكن للظروف أحكام
‏ وأنا في رجا الله يوم أنا من ضحاياها

‏ لي الحين عن لذة وصالك ثلاث أعوام
‏ وعن الضحكة الي يوجع الصدر ذكراها

‏ من الحب ما أعاتب طواريك قبل أنام
‏لها الحق يوم أسهر لها وأتحفاها

‏ولك في الضلوع الي تشيلك غلا وهيام
‏ خذاك القدر منها ولا عشت وياها

.....

[الحمدان]

يا اللي على درب المحبة تجافيت
وش غيرك عقب الغلا ياغلاتي

وشلون تجفاني وصدري تناهيت
ياجرح قلبي ياشقاي وسكاتي

اصبر واصبر في دموعي وانا ميت
واكذب على نفسي وباقول ياتي

لاشفت زولك ياحياتي ولا جيت
هلت دموعي واستباحت قواتي

الله حسيبك كان عني تخليت
والشكوى الله ياعذابي شكاتي

.....

[الحمدان]

طرا الطاري اللي لاطرا طار حلو النوم
‏على الضايق اللي ينجرح لاكشف كبته

‏عليه الطواري لا أظلم الليل جات تحوم
‏تعيد الجروح وتنتج ابداع موهبته

‏لاشفته وهو يضحك ووجهه عليه وسوم
‏تقول أن صكات المقادير منجبته

‏مايدري هو الظالم أو أنه هو المظلوم
‏أو أنه وقع وياك في سوء عاقبته

‏هذا جرحك البارح وذا جرح ذاك اليوم
‏وذا جرح مدري وين الأيام جايبته*
‏
‏بعد طاحت دموعك علئ صدرك المكتوم
‏تأكد بأنك ذنب للحين ماتبته

‏قسم ربي الفرقا وعشنا مع المقسوم
‏وقنع قلبي بهمه والاحزان ناسبته

‏واذا مرتك ذكرا الهوا وانجرحت بيوم
‏تعلم من اللي ماتعلم بتجربته

‏لاتشره على نفسك عداك العتب واللوم
‏أنا العاشق اللي في يده سلم ارقبته

.....

[الحمدان]

‏زاد محضار طيفه عقب ماغاب زوله
نادرٍ صيد مخلابه يطول جناحه

يوم شفت المخاطر والغرابيل حوله
مالي إلا أتجمل فيه وأطلق سراحه

.....

[الحمدان]

مطيحي فالهوا ماهو مطيح الدارج المعتاد
‏مطيح الفارس اللي طيحته تحزن معادينه

‏جريحك مالجرحه في مشاوير الليال اضماد
‏لاخلته الدروب اللي بغاها لاتخلينه

.....

[الحمدان]

الليالي تطلق عنان الحزن وتعنّه
‏والصدوف تحدّ بأسباب الفرح شلفاها

‏ماحداني للقصيد وللسهر والونّه
‏غير حزنٍ ماخذا روحي ولا خلّاها

.....

[الحمدان]

اوجعتني صواديف الحياه الكئيبه
‏والعرب عوّدت مابين مرشد وناقد
‏
‏السعاده على الابواب صارت غريبه
‏والغبينه تقلّط والسعيره تواقد
‏
‏كيف ابسلى وانا من مشكله في مصيبه
‏كيف ابى ادله وانا لي سبعة سنين فاقد

.....

[الحمدان]

عن اللي يكّن القلب يغني كلام العين
‏عيوني معاك أكثر صراحة من لساني

‏جهل قيمتي من يحسب إنّه عرفني زين
‏متى تِدرك إني غير ياباعث أشجاني

‏شعوري تجاهك فيه كيف أبتدي ومنين
‏عسى نبرتي تنبيك عن حجم حرماني

‏أنا مثل كلمة واضحة في عيون اثنين
‏من الشوق كلٍ ينتظرها من الثاني

.....

[الحمدان]

يابريئه وانتي ابعد مايكون من البراءه
‏تفعلين اللي تبينه بالخفى وأنتي بريئه

‏كل عاقل يابريئه كان واثق من ذكائه
‏في ذهابة يفقد اللي كان ملكه في مجيئه

‏ينظرك والكون كلّه مايفكّر في نسائه
‏والصبايا في عيونه كالنطيحه والرديئه

‏ياغرامه يامرامه ياعذابه ياشفائه
‏ياسريعه فالصدود وفالمواصل يابطيئه

‏دام حبك من نصيبي والقدر والرب شائه
‏حب مثلك كيف ما ارضابه وهو قدر ومشيئه

‏يحفظك ربي من الحسّاد واصحاب الإسائه
‏صانك الله عن هوى الشيطان ودروب الخطيئه

‏يامرام القلب يادمّه وياصافي هوائه
‏يا أمل ياشمعةٍ بانت على دربه مضيئه

‏مانظرتي بأم عينك فيه وشلون امتلائه
‏بالغلا وأيضا الجوارح كلبوها به مليئه

‏مانظرتي واعترفتي في غلاه وفي وفائه
‏كيف ياتي لك بلا ميعاد والخطوه جريئه

‏انكسر واحتار في الجيّه ووقفّ من حيائه
‏والحيا شعبه من الأيمان والأيمان بيئه

‏فالنهايه أكتشفت انك دواء قلبي ودائه
‏والحقيقه والله اني كنت احسب انك بريئه

.....

[الحمدان]

الحياة رحبة لاتكون عالق في مشهد نافذتك القديمة مهما كان بالغ الجمال لاتكُن أسيرًا

‏ومثل ما قال ناصر مناحي :
كل دربٍ تحسب ان مافيه غيره فيه غيره
‏لاتعلقها على شورٍ عطاك الله بداله

[الحمدان]

‏ماعادني بالحشيم الهادي الليّن
‏أركى علي الزمان وثقلت متوني

‏يارب هذا الحزن بالوجه لايبيّن
‏وش عذري من الشموخ ليا أنخطف لوني
‏
‏وانا إن شكى لي صديقي همه الهيّن
‏بانت على حد رمشي دمعة عيوني

.....

[الحمدان]

لا اندبل كبد البنادم ومل من القصيد
‏ما ازين من الغيبه الليل مايدرا وينها

‏الغياب ابرك من الحاجه اللي ماتفيد
‏والخواطر تنجبر لا انكسر روتينها

‏مابغيت اقاطع المجتمع واجلس وحيد
‏لين شفت النفس ما الله عليه يعينها

‏من تبع شف العرب من قريب ومن بعيد
‏ماقدر يملك رضاها ويملى عينها

.....

[الحمدان]

اكتسى الحزن بيتٍ قفلو بابه
والشبابيك قامت تجذب عواها

يوم ضفى عليها الليل جلبابه
ان طرقها الهوى الشرقي وبكاها

الزمان المولي دار دولابه
واهجرت ضحكته هلها ومرباها

وقام بيت القصيد يثبت اطنابه
في دهر حزنها وبجرة خطاها

.....

[الحمدان]

تلاشى مادام إن التلاشي هو آخر حلّ
‏وجودك ماعاد يفيد وغيابك إلزامي

‏فقدتك بما فيه الكفايه حبيب وخلّ
‏وأخذت أغلب أمالي معك وأغلب أحلامي

‏ويبدو لي إن تبع المقفي هوان وذلّ
‏عساني ما أضحي في مقام أسمي السامي

.....

[الحمدان]

ياروح روحي وجرح القلب وعلاجه
الطف بحالٍ عليك الهم ساهجها

قلبٍ يناجيك بأسلوب الهواء ناجه
يشكي لك الحال داخلها وخارجها

اما التفت له وتم الوصل بامواجه
والا بلا عشرتٍ هذي نتايجها

وش ينفعك من حنين القلب وخلاجه
وجروحٍ أسبابها أنت ولا تعالجها

.....

[الحمدان]

‏خلّ همك بصدرك مثل حبل الوكاد
‏مايشده شديدٍ لو بسيفٍ صقيل

‏من تردى لنفسه ما أشوفه جماد
‏ومن تغلى تخلى مانعده خليل

‏خلّ هيبة مقامك ماتجس الحياد
‏لايهزك كلامٍ من لسانٍ طويل

‏للأماني معالي وللمعالي عماد
‏وللمعزة مقامٍ مايحب المثيل

.....

[الحمدان]

مداهيل صدري خيمتك والضلوع أطناب
‏ولو إن وضعي شي يصعب علي شرحه

‏عليك العتب يالغايب اللي بدون أسباب
‏بعدك أتصنعّ وسعة الصدر والفرحه

‏ترى مايطيب الجرح لو إن وقتي طاب
‏ضريبة غيابك خلّت الكبد منجرحه

‏وأنا ماني بناقص فراق ووداع أحباب
‏ترفّق علي والود لاينهدم صرحه

.....

[الحمدان]

ايه طاوعت الصبر دامك تطاوع صبرك
‏من متى المجني عليه يشيل ذنب الجاني

‏اختبار الصبر اصعب حاجةٍ تختبرك
‏كان لوني واحد وصارت كثير الواني

‏نتجافى والثمن من عمري ومن عمرك
‏الجفا بين الاوادم فعل غير انساني

‏تنتظرني كل يوم وكل يوم انتظرك
‏غير ما الله عان احد منا يجي للثاني

.....

[الحمدان]

انا العي كما يلعي من الورق مفجوعـه
‏على بيضها اللي شافته وخذ من عشه

‏على صاحب منه العلاقات مقطوعه
‏عراوي فؤادي عقب فرقاه منحشه

‏احبه محبه داخل الصدر مزروعه
‏تغذى على دم الشرايـن والمشّه

‏هروج العواذل فيه ماهيب مسموعه
‏وراع الهواء من ينصحه كنه يغشه

تبين حقايق راعي الحب بدموعه
وتظهر علومٍ بين الاضلاع منخشه

.....

[الحمدان]

ليت الغرابيل جتني من عدوّ لي
اما تقاضيت ولا بيتقاضى لي

لكن من واحدٍ ذكرة غناةٍ لي
ولا زلت احبه وابا احبه ولا ابالي

لامر طرق بخدراته سلام لي
كنه يسلم علي بصوته العالي

خلوني اسج عن موضوعه احسن لي
والا الغلا والله ان يبطي وهو غالي

سعد بن جدلان

[الحمدان]

الصبر حكمه والامل يطرد الياس
والجد والاخلاص قيمة وشيمة

والعز هيبة والشرف يرفع الراس
والكذب سلعة مالها اي قيمة

.....

[الحمدان]

كلٍ أمام الزين يسعى لفتح الخط
وكلٍ يحاول أن يفوز بمرضاته

فَلَو قال حرف التاء يُكتَب بدون نقط
لقالوا بإن الياء سرق منه نقطاته

وأنت إذا حطيت في شيء ما ينحط
أعكسه وأقول للناس ذا من حسن ذاته

حجاب بن نحيت

[الحمدان]

‏ماعلى الجاهل أخطر من مثقّف كذوب
‏يستخف النفوس ويفسد أخلاقها

بين غسل العقول وبين غسل القلوب
‏مثل مابين قتل النفس وإعتاقها

عبدالله الطلحي

[الحمدان]

‏كل مايتعلّق بالبشر يظل ضعيفًا تجسّد ذلك موعظة البيت النبطي عند
بندر بن سرور:

‏احذر تخاف إلّا الذي كوّن الكون
‏رب السماء محيي العظام الهميدي

‏ويقين صالح بن سعود:
‏ماني بخايف بني جنس الإنسان
‏أقولها ماني من الناس خايف

‏خوفي من اللي كوّن الإنس والجان
‏عالِم خفيّات الضلوع النحايف

[الحمدان]

وسامحني أنا وقلبي سهرنا الليل وأغتبناك
وتسامرنا بحكي واجد لعلّ الدمع كفّاره

ضحكنا من مواقفنا سكتنا شوي وعاتبناك
ياليت أن البدايه سجنْ مانطلع من أسواره

تصارحنا أنا ويّاه من اللي ماقدر ينساك
وطاح القلب من عيني وأنا طايح من أنظاره

كتبنا لك جداريّه على ضلوع الصدر تزهاك
شف الدنيا بلا حسك وطن يستفقد أنواره

تخيّل رغم طعناتك تلاقينا على ذكراك
يموت اللي صدق بالحب طريح وماحدٍ زاره

....

[الحمدان]

تعالي يامدى حلم الغريب ودمعة الملهوف
‏ترى شمسي على باب إنتظار سنين موقوته

أنا صدري وطن مابه مواري للوجع والخوف
‏وملامح وجهك الطاهر على النسيان منحوته

تعالي والكلام أقدر أقوله لك بدون حروف
‏أنا اللي يقدر يترجم كلام العشق فـ سكوته

‏أمانينا على بال القصايد ترتمي وتطوف
‏وأنا اللي تاركٍ قلبه على السلسال ياقوته

....

[الحمدان]

على روضة يدك هذا الفراش اللي يطير احتار
‏يحط مْنين ماحط بْجناحه يلمس الفيّه

‏لقا بك شي لو تدرين ماهو فـ اجمل الازهار
‏برادٍ كنه الارض ان غدت بالديم مرويه

‏لو انه ما تبلل له جناح ولا عليه امطار
‏كشف عن ساقه وكفك كشف للصبح عن ضيه

....

[الحمدان]

يامن غرامك داخل الدم يسري
ووسط قلبي لك لحالك مساحه

بدري على بعد المحبين بدري
يامن خدوده ناعمه كالتفاحه

ياليت صدرك لو يعانق لصدري
في ضمتك جنه وفسحه وراحه

مافارقك لو سرت في وسط قبري
بعدك يسبب ياحبيبي انطفاحه

قلبي يحبك حب ان كنت تدري
يابدر لانور ملا كل ساحه

[الحمدان]

ماجاء ردى مني ولا جيت بقصور
‏طبعي كذا دايم مع الخلق كله

‏لي عزةٍ تطغى على كل دستور
‏من خلقتي والطيب عندي جبله

‏ياقلب من قفى عن العين معذور
‏نفسي عزيزة والمقفي تمله
‏
.....

[الحمدان]

لاهب الهوى ليته على صدري المخنوق
‏انا فاقدٍ لي فرحة ٍ كيف ابلقاها

‏أنا والرجا مثل البدو يتبعون بروق
‏ورى ديمة ٍ غابت ولا حصلوا ماها

‏تلاعب بنا الأيام وأثر العمر مسروق
‏طردنا ورى الدنيا ولا جابت اقصاها

‏نجي من تحتها وانتوايق لها من فوق
‏نقول انعرفها واثرنا ماعرفناها

.....

[الحمدان]

ردتك أنت وماردت غِيرك يحبني
ضمني گطرة ماي بيدك لا تذبني

شعر عراقي

[الحمدان]

من عيني لمن رحت ضليت أنا مناطِر
كتلي انت باچر تجي وخلص الف باچر

شعر عراقي

[الحمدان]

‏أحبك لو يموت الحُب وتصِير القلوب قبور
وأنا مهما منحتك من غلاي أشعَر بتقصيري

.....

[الحمدان]

عيش عمرك ونا قد فات فيني الاوان
ونت ماتستحق اتعيش عمرك حزين

فاقد احباب واقراب وْشعور وْامان
ودي آرتب احلامي واعيد السنين

والكلام الثقيل اللي بقى في اللسان
طاح من ثقل ما فيني ومن كل عين

لاتسولف وتقهرني على شيّ كان
ما يكفّي ضياع العمر هذا لمين

لاتعلّق احاسيسك بقلبي عشان
مايجي يوم تندم خلّنا عابرين

شفت فيك الشعور اللي فقدته زمان
وش يفيد العزا مارجّع الميتين

جيت بالحيل متأخر وفات الاوان
كاره آحب خايف انخذل مرتين

ادري انك حبيب وممتلي بالحنان
ليتني من زمان اعرفْك بس كنت وين

مفتقد كل حاجه الزمان المكان
عايش ابقلب ميّت تحت ذل الحنين

لاحياتي حياه وْلا احس ابامان
شوف غيري انا والله جداً حزين

.....

[الحمدان]

غيمه غلاك وسط قلبي لها رعود
لامن ذكرتك بلّ قلبي مطرها

.....

[الحمدان]

طشيتهن وتلملمن

ولميتهن واطشَرَن

يوم الردتهِن مالفَن

يوم العفتهن چودرن

يمي وعلية تراشدن

شنو السبب بَس ماحچن

جروحي حيل استهترن

ركصن ركص مثل الغَچر

هَزن خصر مايستِحَن

شعر عراقي

[الحمدان]

وحِيرة التهِي بطعنتَك
مِدري التهِي بثارَك

وشتگول أضُم الحَجي
لو أسولف أسرارَك

شعر عراقي

[الحمدان]

يا عذب
صار التريده وعودتني
يا نبع على العطش بيدك
علمتني يا سما جناحي انكسر
وتلولحت كدامك وما
عاونتني بيك الغربه تهنوا
وانه شمسك سومرتني
بعينك الميته شفتني
وما شفتني وبرد كلبك
وانه كتلك لو برد كلبك تكلي
وانت لا انت المفتهم
روحك ولا من فهمتني

شعر عراقي

[الحمدان]

كم عروسٍ بالفرح ماهي عروس
تبتسم لأجله وهي غيره تحب

وكم عريسٍ حبيبته ضمن الجلوس
حيل يعشقها وربك ماكتب

.....

[الحمدان]

ليت السفر بين المحبين ممنوع
تحجز جوازات المحبين بالذات

حتى لوأن السفر حق مشروع
المشكله لأهل الهوى حزن وآهات

لاغاب خلّك والرجاء فيه مقطوع
لابه رسايل توصلك وأتصالات

الخط مغلق كنّه الكرت منزوع
من ضيقتك تلعن جميع أشتراكات

تضرب على الكفّين والقلب مفجوع
تضيق بك عقبه جميع المساحات

في ليل دامس ضايعٍ مابه شموع
الفكر تايه فـي دروب المتاهات

العين تذرف بالدقايق له أدموع
والقلب عايش بين حسره وونـات

لو انك تجر الصوت ماهوب مسموع
ياطول مابينك وبينه مسافات

يمكن ظروفه مامشت له على طوع
ويمكن سلا فكره بروحه وجيّات

سايح بدار المغرب والأجر مدفوع
يسرح ويمرح بين سجّه ولذات

.....

[الحمدان]

لله درّي على الصبر و على الاعتياد
‏أواجه الوقت صلب وخاطري ماحكى

‏انا أكثر إنسان تشكي له قلوب العباد
‏وعلى كثر مايواسيهم ماعمره شكى

.....

[الحمدان]

حلمي كبير ورغبتي كنها طير
‏مايطوي الجنحان لاشاف قمه

‏ان قالها الله والليالي مداوير
‏لارقى سنام طويق والحلم اتمّه

.....

[الحمدان]

ليل الشتاء لاجاك يوقض مواجعك
‏ويحرّك اللي في دواخلك ساكن

‏لشتد برده لفحة الشوق توجعك
‏وتطري عليك دروب ذيك الاماكن

.....

[الحمدان]

في عيونك حزن واسرار وكلام
‏حزن قلبك كون وعيونك بكون

‏مستحيل يكون ذا برد وسلام
‏اصعب انواع الحزن حزن العيون

.....

[الحمدان]

ذاب الكلام وضاع حلم التعابير
‏وتزاحمت بالشعر كل الحناجر

‏بعض القصايد لانثرته نواوير
‏وبعض القصايد مثل طعن الخناجر

.....

[الحمدان]

‏القلب مجلس والمحبه تقهويك
‏فنجال ماتستاهله غير يمناك
‏
‏من قبل لاآشوفك عيوني تحييك
‏وشلون لو آشوف طلّت محياك

.....

[الحمدان]

دنىظ° الفجر وعيون المفارق على ماهي
سهيره وفيها من لظىظ° الشوق مافيها

ياعيني علام الحزن فيك غير متناهي
دخيلك دموع الحزن والقهر كُفيها

.....

[الحمدان]

لاتراقب ما أقوله من بعيد
وانت في كل القصايد مقصدي

كان تبغى مني اعطيك الجديد
إقترب مني ويا الدنيا اشهدي

إن حُـبك صار يجري فالوريد
من فؤادي لى دماغي لى يدي

وانك الحُب الحقيقي الوحيد
وان جُرحك لايزال فيني نَدي

أيه احبك بس يا الحظ العنيد
عاشقك ماهو سفيه ولا ردي

.....

[الحمدان]

لو فيه شيء بخاطرك قلي عليه
لو صرت غامض لاتحـسبنـي غبي

في ذمتك وشلون اعرف اللي تبيه
دام انت نفسك ما انت عارف وش تبي

.....

[الحمدان]

ليه صديت عني حسبي الله عليك
شـوف انا ما تركتك يوم ناديتني

بيض الله وجهي يوم فزيت فيك
وسود الله وجهك يوم خليتني

.....

[الحمدان]

خل عنك السوالف وارخ جفنك ونام
أسهرك كثر خـوفك لين ليلك سرى

التعب في عيونٍ مثل عـينك حرام
وانت لا ابطيت عني كل طاري طرى

يفضـحك دمع عينك لو منعت الكلام
وما تطيعك جفونك لو بغيت الكرى

كان قصدك محبتنا علي الحرام
وحدك اللي تعيش من الظلوع وورى

.....

[الحمدان]

لاتجحد الماضي ولا تامن الجاي
يحفظ لك الله نعمته لىٰ حمدته

يمكن تقدر صحبتي عقب فرقاي
لاجاك ليلٍ سرمدي مارقدته

ماراح تعرف قيمتي وانت وياي
الماء تحس بقيمته لافقدته

.....

[الحمدان]

خذني على قد عقلي في طريق الغرام
‏إن كانك أعمى بصيرة خذني أعمى بصر

‏من كثر ما نرتحل بين الديّر والأنام
‏ماعاد ندري نصلي جمع ولا قصر

‏إن كان حبك هزيمة فالهمام الهمام
‏يامرحبا بالهـزيمة في طريق النصر

‏انا اغرب إنسان فالدنيا عليّ الحرام
‏عجزوا على ذبحي اعداي وذبحني خصر

.....

[الحمدان]

جئنا نؤَدّي دورَنا ونُغادِرُ
والكُلّ لو طال الزمانُ مسافرُ

لاشيءَ يبقى غير ذِكرٍ طَيِّبٍ
تُحكَى بهِ بعد الرحيل مآثرُ

تاريخُ عمرك أنت مَن يُعنَى به
إن شئتَ فاجعلْ مَن يراهُ يُفاخِرُ

أيامنا كتُبٌ ونحنُ سطورُها
تَمحي وتُثبتُ ماتشاء دفاتِرُ

.....

[الحمدان]

اللي يبيك يجيك لو دونك قيود
‏يكسر على شانك خشوم الصعايب

‏واللي يبي فرقاك لو دربك ورود
‏ماجاك لو انك من ادنى القرايب

مساعد الرشيدي

[الحمدان]

ياقلب حبيتك ولك حب صافي
خط الوفا حبك وفيه احتريته

حنان قلبك يجعل القلب دافي
ياكنز في دنيا المواجع لقيته

انت الذي للقلب دكتور شافي
وانت الهوا والحب منك طريته

وانت النشيد المنبهر والقوافي
وانت الشرف ذا يلمع اليوم صيته

وانت الوفا في يوم ماعاد وافي
وانت الذي وحدك بقلبي هويته

وانت الشرف والطهر وانت العفافي
بك مكتفي قلبي وفيك اكتفيته

ماهما تشوف القلب لوا وطافي
يعود لك مادمت له كل بيته

حلق خيالاتك معي في ضفافي
ياللي نصع قلبي بطلقه رميته

ماعاد من دنيا المواجع نخافي
مادام قلبي وسط قلبك حميته

راحت سنين القهر راح الجفافي
من مثل حبك فا الهوا لاسقيته

حبو وعيشو الحب دامت عوافي
ومن يحبك فا الخفوق احتريته

.....

[الحمدان]

‏الناس والدنيا منازل بلا ساس
رحيلها وان طولت مقتفيها

هذي هي الدنيا وهذي هي الناس
خسران من علق هقاويه فيها

.....

[الحمدان]

اقلط تسيد في ايسر الصدر من فوق
هذا مقرك وانت تعرف مقرك

الا ان مالك في الغلا شف وطروق
قلها واغادر عنك بحرك وبرك

انا الرفيق ولا ارخص القدر وابوق
وتغيب مايقفاك وان جيت سرك

.....

[الحمدان]

هذاك كل الخطاوي تِتجه صوبه
لو غاب عني أحسه في شراييني

هذاك حتى كلامه غير وأسلوبه
مدري على وين لاسولف يودّيني

.....

[الحمدان]

نفسي عزيزه مارضت بالمعاذير
ولا ني معودها على الذل مره

امشي عزيز محسبت المخاسير
وأثمن المشروه لو مااتشره

م تنثني ساقي بدرب المعاسير
و لاينحني راسي ولا يموت حره

على النقا ما ننحدر بالمحادير
نظراتنا صوب الجدى والمجره

نشوم عن درب الخطا والمحاذير
وما نلتفت للي عزوومه تغره

عالوفاء نمشي سوات المداوير
ممشا شجاعن فاقد اليوم حره

يمشي ولايحسب حساب المخاطير
ويفرح اليا بانت مع القاع جره

صامل ونفسه متعف المشاوير
ودرب المراجل بالوازم يسره

مطنوخ راس وممتلي بسعاطير
وظربه بعدونه عطيبن مقره

وانا عزيز وراضين بالمقادير
ونفسي تعف ومنت الناس مره

ومتوكلن بالي يسوق التباشير
ومن يتكل بالله يلقا المسره

.....

[الحمدان]

ياصباح السعاده والرضا والسرور
وياصباح التفائل بالهنا والعطا

فيك يا أجمل صباح نعيش اجمل شعور
وفيك دايم نجدد حلمنا لو بطا

من توكل على الله في جميع الأمور
ماتعرقل طموحه لو زمانه سطا

كل طيرن وقسمه منذكر بالعصور
دام ربي معاك رزقك بيبسطا

.....

[الحمدان]

قلبي لامنه شراء قلب ما باع
وانت الله الله فيه والعمر موقوت

لا للفراق ولا تجديد الاوجاع
ونعم نعم للوصل لو كان بالصوت

.....

[الحمدان]

علمتنا الليالي واختلاف السنين
‏لين شفنا الصحيح وبانت الخافيه

‏تكتشف معدن الانسان في حاجتين
‏لاتولى الفلوس ولا اونس العافيه

بقلمي

[الحمدان]

حتى ليالي الشتاء جابت طواريك
بين القمر والغيم ترسم طيوفك

.....

[الحمدان]

أنت في قلبي رفيعٍ مستواك
في صميم القلب ماتملك شريك

والله أنك فارض فيني غلاك
خطوتي تمشي وتجبرني عليك

.....

[الحمدان]

غرقت لي في بحر مافيه ساحل
‏وأنا بحور أهل الهوى محترفها

‏الحب أعرفه وأعرف إنه مراحل
‏لكن وصلت لمرحله ما أعرفها


.....

[الحمدان]

‏شوقي يسافر بي على غير ميعاد
وخوفي يعـود بي على غير عاده

نعيش في الدنيا جماعات وافراد
وكلن على الغبراء يروم السعادة

وياهل المواقف بين صادر ووراد
ماكل من هو يسرج المهر قـاده

ويا مدور الهين ترى الموت حصاد
ماحد على الدنيا يحصل مراده


.....

[الحمدان]

‏أنا ياحلوةَ العينينِ
بعدكِ فاقدٌ وطني

هدمتُ مدينتي سهوًا
فهل أهتمُّ بالمدنِ

بلادي كلها فوضى
بلا امرأةٍ تُرتبُني

بدونكِ لستُ أُشبهُني
أنا المنفيُّ في بدني


.....

[الحمدان]

أهل الشهامه دوم تاخذ وتعطي
افكارها متجدده من عطاها

واهل الملامه دوم تخطي وتخطي
يعني طبيعي لو تجدد خطاها

إذا الوعا مفتوش كم حد يغطي
النار ماتأسف على من وطاها

من احتكم للصبر فالصبر يبطي
وكل حجه ماعذر من غطاها

صالح الاحمدي

[الحمدان]

‏على مذهب الخيال قود الرسن شمال
وعلى عادة الجمال يمناه للجمل

ومن لايرد الفال للحق والعدال
تسحب به الخمال في العيب والزلل

تظل الحياة اثقال ماتكسر الرجال
وتبقى الرجال افعال في السهل والجبل

‎.....

[الحمدان]

ياسحايب شوق ودي للحبيب
السلام وبلغيه احلى مساء

غيرهم ماله في الطيب نصيب
مايطيب ولو قسي زدنا قسى

هو غريب وانا في عينه غريب
مفلسآ مني وانا منه افلسا

مثل صايح في الخلاء ماله مجيب
في عجاج الصيف ورمال الحسا

‎.....

[الحمدان]

ياحاكم الشوق قلبي يطلب انصافه
بكرة انا وانت موعدنا مع القاضي

‌اما تجيني بطب القلب واسعافه
والا نخلي المشاعر والهوى ماضي

.....

[الحمدان]

بفضل الله دخلنا في حماه
وحررنا حلب والبنت درعا

ومن حارب معانا زاد غناه
ومثلك ياحلب حنجيب صنعاء

.....

[الحمدان]

ياواثقه في مشيتك كنك الخيل
‏انتي شموخ العز وانتي سنامه


‏نفرح بشوفك فرحة البدو للسيل
‏عشق بدوي يافرحتة ياغرامه

‏
نظرة عيونك تجذب الليل وسهيل
‏والفارس اللي ملك وانتي مرامه

.....

[الحمدان]

لاشفت رقمه متصل انبسط وروق
ولاغاب عني صارت النفس مزنوقه

برفوق ياروحي على القلب برفوق
كبدي على شوفتك يازين محروقه

.....

[الحمدان]

هيه ياللي غرك الليل واغراك النديم​
هيه ياللي هزك الشوق والمسرى ضياع​

وقفي بين الخطا والصراط المستقيم​
والهبي بين التراحيب وكفوف الوداع​

وسولفي مثل المشاريه في صوت الحشيم​
واسكتي مثل الشفايف لاطاح القناع​

واضحكي مثل النواوير في روضة خريم​
واغرقي مثل المزاجات في غرب الرفاع​

وابعدي مثل المتاهات في حلم اليتيم​
واضربي بين السوالف وكتفي والذراع​

وانظري لي نظره الشوق والشي القديم​
واغرقي بالدمع الازرق مظاليلٍ وساع​

واصبري مثل المسافات في صدر الحليم​
واسمعي صوت الهوى يوم فليت الشراع​

يوم صرتي عود ريحان ورضاي النسيم​
واصبري يانجمه الصبح مال الصبح داع​

قد طلبت الله وانا بين زمزم والحطيم​
شوفتك ياغلى ثنيه الى صرتي رباع​

العيون تجوع لك جوع والله العظيم​
والعشا في عيونك السود وعيوني جياع​

ان عطيتي قلت مايرد الكريم الا اللئيم​
وان بخلتي قلت تكفين والدنيا متاع​

اقبلي مثل التباشير في وجه الكريم​
وارحلي مثل التعازي على موت الشجاع​


ضيدان بن قضعان​

[الحمدان]

‏جعل القلوب اللى له القلب يشتاق
‏تصبح وتمسي بالهنا والسعاده

.....

[الحمدان]

اتابعك في صمت واكره غيابك
وارتاح وستانس ليا صرت موجود

ودايم على بالي اراقب حسابك
واقرا كلامك ذوق واشتاق لك زود

.....

[الحمدان]

لاتكسر قلوب الأوادم على شان
تكسر بها غيرك وترضي طموحك

خذها ترى لو تجرح بعمرك إنسان
بكره جروحه راح تصبح جروحك

.....

[الحمدان]

أحذر تهين النفس لو كنت محتاج
كرامتك ماهي بسلعه رخيصه

الناس لو تعطي مثل بير هداج
ماهي على بعض المشاعر حريصه

.....

[الحمدان]

‏ليت حبك بأختياري وأستخير
وأترك الأحلام في مشوارها

جيتني صدفه وحبيتك كثير
والصدف مافيه أحد يختارها

.....

[الحمدان]

رغم ابتعادي عن مراسيء تلاقيك
تبقى على ضفة فؤادي سفينه

أحيان اشوفك في خيالي واناجيك
وأحيان فصل الشوق يمطر حنينه

.....

[الحمدان]

‏موج الغلا في داخلي حرك الشوق
‏وقلبي تحرك من يساره يمينه

‏ليت الغلا بالكون انسان مخلوق
‏في كل لحظة كنت اقبل جبينه

.....

[الحمدان]

‏إن غاب يترك في غـيابه فراغات
‏وإذا حضر يحجب حضور البقيه

‏مثل القُمر لو غاب بالليل حزات
‏واذا حضر غطى النجوم المضيه

.....

[الحمدان]

‏ماغيرت بعد المسافة غلاتك
‏لو تكثر الاميال مابيننا البين

‏حتى الحروف بشوقها اليوم جاتك
‏ياقربك لقلبي وبعدك عن العين

.....

[الحمدان]

‏اخاوي اللي ماتغيّر مباديه
‏واسرارنا بالعمر بير وغطاها

‏ترا الخوي الصدق من طاب طاريه
‏له وقفتن جعل الخلايق فداها

.....

[الحمدان]

شفت الغلا بين عشاق الهوى كله
لو تجمعه مايساوي عشقك لحالك

محبتك فارقه عن كل خلق الله
ارتاح لاقلت لي لاينشغل بالك

.....

[الحمدان]

‏لك مكان لوعرفته ماهني نومك وطاب
ولك حنين في فؤادي من لهيبه احترق

إن بغيت اكتب شعوري انقفل للبوح باب
‌ولاذكرتك بين ناسي غاب فكري وآنسرق

.....

[الحمدان]

‏بعض الفراق يمر فالقلب عادي
‏يطري على الخفاق لحظات ويفوت

‏وبعضه لو انه مر فالقلب هادي
‏يشبه ونين الروح في سكرة الموت

.....

[الحمدان]

‏غاب لكن ذكرياته لها دبك وصهيل
‏اجعلتني أشعر أني أشوفه وأسمعه
‏
‏ودك أن اللي تحبه لاعزم بالرحيل
‏يجمع أجمل ذكرياته وياخذها معه

.....

[الحمدان]

‏كيف اصيغ الكلام اللي من الشوق والف
‏وشوفتك بعد طعنات المفارق قويّه
‏
‏وش تبي بالكلام ووش تبي بالسوالف
‏دنيةٍ ما انت فيها مالها قابليّه

.....

[الحمدان]

‏ياطير خذ مني سلام وتحايا
واقصد بها ناس على العز رابين

ناس لهم طبع المحبه سجايا
وفيهم من أصناف الكرامة عناوين

ماقول فيهم شعر أبغي جزايا
لنهم عن الأشعار ياناس عالين

.....

[الحمدان]

خل مابيني وبينك مثل خط الطبيب
مايعرف قراية حروفه الا الصيدلي

.....

[الحمدان]

ياعاشق الليل وش خليت لعيوني
لو هامت بالليل تنشد نظرة عيونك

ماهي عداله بحب اثنين مفتوني
امّا انا او سمو الليل مفتونك

.....

[الحمدان]

ياما على وصلك ركضت وتعنيت
وفتحت لك قلبٍ من الحب تايب

وياما كسرت خاطري كل ماجيت
ارجع ودمعي فوق خدي سكايب

والحين عنك ياهوى البال صديت
حال الفراق وخاطري منك طايب

.....

[الحمدان]

‏أنا البارحة ياطول ليلي غدا ليلين
‏تبيّن شعاع الشمس مارتحت برقادي

‏أعد النجوم الساريه والعرب ممسين
‏وأعد الأسامي وأرفع الصوت وانادي

‏سرى النوم من عيني مع هجعة التالين
‏وصارت هجوس القلب سرداد مردادي

.....

[الحمدان]

القناعه كنز في وسط السطور
للسعاده والحياه الصافيه

لو ملكت المال وانواع القصور
كلها تنباع لأجل العافيه

.....

[الحمدان]

‏لاتشتكي لي جرح مثلك أعانيه
‏لوكان بيدي شي داويت جرحي
‏
‏مادامني فاقد دوا كيف بعطيه
‏لافادني صمتي ولافاد شرحي

.....

[الحمدان]

‏يارب يسّرها على كل ضايق
وارفع ستار الهم عن كل محزون

لو كان في درب السعاده عوايق
تهون مع رحمتك ياخالق الكون

....

[الحمدان]

‏ابدع على كيفك ولا تجرح الناس
‏احفظ وقار الناس تحفظ وقارك
‏
‏واذا اعجبك ابداع غيرك فلا بأس
‏وجهة نظر مافيه مانع تشارك

.....

[الحمدان]

المحبه والموده كلها له
لو يطول البعد ما ينقص وفانا

من غلاته لو بغى روحي حلاله
والله إن الشوق من عقبه طوانا

أتمنّى كل يوم إني قباله
والظروف من اللقا دوم اتحدانا

.....

[الحمدان]

‏اجمل ثلاثه شفتهم في حياتي
الورد والبسمه وطيش المحبين

واسوى ثلاثه ياعساها ماتأتي
الضيق والدمعه وتفريق شخصين

.....

[الحمدان]

‏لايفلت لسانك علي شين منطوق
ولا تشيل في قلبك من الحقد ذره

وقت السعه كل الأوادم تجي ذوق
وب الضيق تعرف منه خيره وشره

.....

[الحمدان]

عشت قبلك فالمعاناة يالوجه السموح
والشعور الزين جاه الزمان وجمّده

جيت عندي كنّك البلسم اللي للجروح
كل جرحً من يدين الليال تضمّده

.....

[الحمدان]

واحدً ربي من الزين والقبله اعطاه
يستلم عرش المحبه ويلبس تاجها

مثل مايحتاج الانسان للماء فالحياه
الدروب اللي تودي عليه احتاجها

.....

[الحمدان]

يـامرحبا ياهلا واللّه يرضى عليك
مع إنك ابطيت لكن يامرحبا ياهلا

تصدّق إنّي نويت اسوق عمري وأجيك
لكن دفعك الغلا حتّى دفعت البلا

.....

[الحمدان]

ياطير ياللي حايمن في سما نجد
بلغ سلامي للغضي في محله

بلغ تحيات المحبه بلا حد
للصاحب اللي شد قلبي وتله

.....

[الحمدان]

ترا عزيز النفس لامن عاف عاف بلا كلام
والله لو أنه وطن ماعاد له حب وولا

ماينتهي كثر الغلا إلا بقل الأهتمام
وإن جيتني بعدين مالك لا حضور ولا غلا

.....

[الحمدان]

لبيه لو كان برد الليل سوى سواه
ف الجادل اللي تكيّفني على مودها

واقول يابرد مالك في حشاها حياه
مادام نار المشاعر يصطلي عودها

.....

[الحمدان]

خيّبوا ظنك هل الضعف ياراس المديح
‏أنت كبّرت الهقاوي فخلّك قدها

‏كان غرّتك الهواين وقومت الطريح
‏الهواين حتى حيّز فراغ يسدّها

‏لنَ ترى معادن الناس بالشكل الصحيح
‏لين تبلغ مجريات الظروف اشدّها

‏كان تبغى تعيش باقي حياتك مستريح
‏خل عنك الطيبة الزايدة عن حدّها

.....

[الحمدان]

‏الاصحاب واجد كل واحد وراه علوم
على الفايت اللي فاتّ ماعاد يمدينا

بعضهم نعلمه الرمايه وينصى القو
وبعضهم نعلمه الرمايه ويرمينا

.....

[الحمدان]

‏عامل الناس بالحسنى ولين الجناب
لاجل ترضى عليك وتكسب قلوبها

وقبل تفتح لذكر عيوب الأجواد باب
لد عينك لنفسك واصلح عيوبها

بقلمي

[الحمدان]

‏سلم على اللي فاقده ولا فقدني
وقله كثر ماقلت لعيونه اشتقت

محلله عن گل وعدٍ وعدني
ومسامحه عن كل ليله تضايقت

.....

[الحمدان]

احفظ لسانك لا بلوك المعاثير
‏والكلمة اللي دون ميزان خفها

‏يجوز ترمي كلمةٍ دون تفكير
‏والصبح سودان القلوب تخطفها

.....

[الحمدان]

مؤسف إنّه على قلبي وقلبه يجور
ومحزن إنّه قريب وما قدرت اقربه

باروا الناس واللي ماهقيته يبور
سرّه البعد والصوت الحزين اطربه

.....

[الحمدان]

‏خل عنكْ الكلام اللي يقولون عنه
البشر مايعرفوني ولا يعرفونك

ان بغيت الصحيح وهرج مافيه منّه
والله اني عجزت اعيش عمري بدونك

.....

[الحمدان]

تكفون خلوني ترا منزله غير
خلوني اسلا لايجي له مجالي

قفى وعذره فوق كل المعاذير
عذره معه حتى والوغاب غالي

.....

[الحمدان]

من البداية كنت اخاف النهايات
‏مستقبل الاوهام ماجف له ريق

‏حنا انخدعنا في جمال الّبدايات
‏واحلامنا تحتاج وقفة وتحقيق

.....

[الحمدان]

‏عن نسيم البرد والليل روحِي في ذراك
كل ليله فالشتاء معك ليلة دافيّه

.....

[الحمدان]

مايدور الزلات غير ابتر الصيت
‏اللي علومه ماتعدى محله

.....

[الحمدان]

‏اقلطي وسط الضلوع اللي تهلي مرحبا بك
والمكان اللي جمعنا قبل مدّه عارفينه

قبل نبدأ بالسلام بنظرة عيونك عتابك
والطهر والحزن واللوعات وانتي والسكينه

جابك الماضي المعتّق بالشعر والليل جابك
والحزن في كل مره يلمسك تبّت يدينه

.....

[الحمدان]

يسعد مساكم بالقصايد والابيات
‏واجمل حروف الشعرواجمل قوافي

‏لكل غالي مسكنه داخل الذات
‏ومكانته وسط الضلوع الخوافي

‏مني سلام الود واجمل تحيات
‏مخصوص توصل كل انسان وافي

‏بالورد والنرجس على شكل باقات
‏من قلب صافي للقلوب النظافي

.....

[الحمدان]

‏ترى الكرامة سلعة مالهاسوق
‏مايشتريها المال ياصاحب المال

‏لاصرت ماذليت نفسك لمخلوق
‏أنت الغني لو كان ماتملك ريال

.....

[الحمدان]

‏لاشفت برق الخيانه في عيون الصديق
‏فارق ضعونه فراقٍ ماش عقبه لقا

‏خله يهف بطريق وشف لنفسك طريق
‏أخير من صحبةٍ ماهي بصحبة نقا

.....

[الحمدان]

‏تبغى تصير إنسان عايش براحه
‏لاتشغل التفكير بأوضاع غيرك

‏واصنع لنفسك في حياتك مساحه
‏وابعد عن العالم وريح ضميرك

.....

[الحمدان]

‏جيتك ورق مكشوف مافيه تمثيل
‏ حفظت حبك مثل حفظ الأمانه

‏ مارحت أسولف فيك للقال والقيل
‏حتى ولو بيني وبينه ميانه

.....

[الحمدان]

‏ياليل لي مخلوق غالي على البال
دايم مع صمتك خيالي يراعيه

هـو يسهرك مثلي قصايد وموال
سلم على قلبه وداعب امانيه

.....

[الحمدان]

‏دفنت الهوى في داخلي والقلوب أسرار
‏مقادير حظي واقفه ضده وضدي

‏عليه الغلا والود لو شانت الأقدار
‏وعليه المدامع بالخفا بيحت سدّي

.....

[الحمدان]

‏لاتلوم اللي رفع صوته يهلي
‏يوم شافك مادرا بالناس حوله

‏عقب فزّ القلب كيف ابقى محلّي
‏واتجاهل فرحة القلب وذهوله

‏اتجاهل وانت شمسي وانت ظلّي
‏من يقوله ياحبيبي من يقوله

‏خلّهم يدرون بإنك كل كلّي
‏من متى خلّك يفكّر في عذوله

.....

[الحمدان]

‏انا ادري ان المظهر احيان مطلوب
‏لكن مهوب مطلوب في كل الأحوال

‏علامة الرجال ماهيب في الثوب
‏اهم شي يكون في الثوب رجال

.....

[الحمدان]

يسعد مساء من هو كما معدن الماس
‏اعشقك واعشق ضحكتك مع مزوحك

‏ويسعد مساك الممتلي برد واحساس
‏ويسعد مساء قلبك وعمرك وروحك

.....

[الحمدان]

تلعب طرب وانا بنومي هواجيس
ماسهرك بالليل كثر الهمومي

أسهر إلى نامت عيون الهداريس
بالليل اراعي ساهرت النجومي

أونس بقلبي مثل صلو المحاميس
الله يلوم اللي لحالي يلومي


من قصيدة الشيخ والشاعر تركي بن حميد

[الحمدان]

مابين جشة حصان وبين هدرة جمل
‏وفِي وجه سبع يحوف الركب والدرب شوك

‏مامال متن عليه من الليالي حمل
‏لوقصرت من الثقال ايدين عوج الحنوك

‏ياحادي العيس مال المفردات مهمل
‏لاقالو اختار بين وقوفها والبروك

‏علاقة الوقت ذا كنها علاقة عمل
‏ان جيتهم رحبوا وان غبت منهم نسوك

.....

[الحمدان]

‏قالت أنت تموت فيني وقلبك مايخون
‏والتفت لها من اعماقي وصارحتها

‏قلت انا ميّت وميت وميت ومغبون
‏يعني فوق الارض احبك واحبك تحتها
‏‌
علي الدعية⁩

[الحمدان]

موت الأنسان فالأنسان هو المطمّه
‏وأنا ماني بميت فيك ميّت قليلة

‏أبتعدنا ولا زلتي للإحساس يمّه
‏مُلهمة كل يوم وسالفة كل ليلة
‏‌
فهد قطنان

[الحمدان]

‏انشد اللي على الدنيا قديم وخبير
‏ثاقبٍ ماخذا الدنيا على شكلها

‏في الملذّات لاتستعجلون الأخير
‏اصطياد الفريسة أجمل من أكلها

‏‌سعد علوش⁩

[الحمدان]

‏تمرد الليل واحتاج الضمير النزيه
‏للحظة اللي تخفف همه المنتشر

‏كم له وهو يحتريها مير عيّت تجيه
‏الحظ تعبان وظروف الليالي قشر

‏تخفي كلامٍ يفكر راعي العقل فيه
‏وتنشر مواضيع ليست قابلة للنشر

.....

[الحمدان]

‏مرحبا من سبب والّا بليَّا سبايب
‏ياسبب كل جرح ويا دوا كل علّة

‏ياحبيبي بدون أدنى شكوك وطلايب
‏والله وبالله اللي كوَّن الكون كلّه
‏
‏إنك الحاضر اللي كن ماهوب غايب
‏وإنك الغايب اللي ماتغير محلّه

‏وأنك أغلى من أغليته وسيد الحبايب
‏دام قلبي يحب وربي وربك الله

.....

[الحمدان]

‏يامبعد عن شوف عيني مسافات
‏لاتحسب أنه يخلف البعد ظني

‏حبك بقلبي شامخ مابعد مات
‏وماهزته بُعد المسافات عني

‏لو نبتعد روحي وروحك قريبات
‏حب جمعهن غصب عنك وعني

.....

[الحمدان]

‏علاقة العربي بالقهوة علاقة سرمديّة وثيقة يتقهواها كيف ويكتبها شعور

يقول مدغم أبو شيبة :
‏أما أني أنساها نسى الله من نسى ذاك القبال
‏ياصبّ روحي صب دلتها على فنجالها

‏ويقول ضيدان بن قضعان :
‏ ‏لو بقى للهيل صبرٍ على فوح الدلال
‏مابقى للقلب صبرٍ على شيء يرتجيه

[الحمدان]

اللي يبيك يجيك لو دونك قيود
يكسر على شانك خشوم الصعايب

‏واللي يبي فرقاك لو دربك ورود
‏ماجاك لو أنك من أدنى القرايب

.....

[الحمدان]

انا مشتاق اي والله انا مشتاق
وهذا الشوق متماكن ومتلازم

وانا لاشتقت نفسي تشين والاخلاق
تصير اضيق من الرجعه على الجازم

بدونك مرت أيامي تعب وارهاق
ويلاوعني حنين غث مترازم

يارب شوف لي صرفه مع الأشواق
انا قاعد احن اكثر من اللازم

.....

[الحمدان]

‏لاتبدي أسرار قلبك عند هذا وذاك
‏لو كان بين الضلوع العوج نار ولهب

‏متى مابينت سرك للأوادم تراك
‏سلمت نفسك لهم على طبق من ذهب

.....

[الحمدان]

‏طاب ليل القصيد وخاطري منك طاب
لاعرفت ابتديك ولا قدرت انتهيك

بين سين السؤال وبين جيم الجواب
لحظه ازعل عليك ولحظه ارضا عليك

ذيك فيها ملام وذيك فيها عتاب
وذيك فيها مايطعن في تفاصيل ذيك

واكثر اللي من عيونك يجيب العذاب
نظرة اللي ابيك ونظرة اللي ما ابيك

.....

[الحمدان]

تكتب عيون الشوق والقلب يقرا
من غالي الابيات حس ومشاعر

قصايد المشتاق من كل سطرا
ويترجم احساس الغلا كل شاعر

.....

[الحمدان]

وده يصارحني وأنا ودي ابوح
والكل منا يذبح الخوف شوقه

إلى متى يبقى الحيا مالك الروح
والصمت يحرم كل واحد حقوقه

.....

[الحمدان]

‏إليا زعلتوا فأزعلوا لين ترضون
‏وإن مارضيتو جعل فالأمر خيره

‏مايلحق الواثق مشاريه وظنون
‏ولا به كبيرٍ يلتفت للصغيرة

.....

[الحمدان]

‏غلاك مايحتاج توثيق وحلوف
‏والله خلق حبك من الحب فيني
‏
‏وعزفت نغمة عشق عن كل معزوف
‏وسكنت في قلبي وروحي وعيني
‏
‏واغلى المشاعر جتك في شعر وحروف
‏قلبي كتبها قبل تكتب يميني
‏
.....

[الحمدان]

‏لاتلتفت لاضاق صدرك لمخلوق
‏ناج الذي يعلم خفايا ضميرك

‏الله على سبع السماوات من فوق
‏يقدر برمشة عين يقلب مصيرك

.....

[الحمدان]

‏حبيبي والسوالف بيننا لوم وزعل وعتاب
‏أنا ساکت غلا ماودّي أندم في تواليها

‏أنا مدري بعينك هو أنا الصادق أو الكذّاب
‏لكنّي جيت لك والناس مالي غايةٍ فيها

‏معي عمر وبقايا أمنيات وضحكتين وباب
‏معك مفتاحه لحلو الحياة اللي أنا أرجيها

.....

[الحمدان]

مصير الأيام تكشف لك كنين الصدور
‏كانك تشوف الوجيه وتجهل قلوبها

‏قلبك دليلك ليا اشتبهت عليك الأمور
‏لاتقرب اللي يجيك الشك من صوبها

.....

[الحمدان]

‏لاشفت من يزعل بليّا خطا منك
‏حاول عن اسباب الزعل لاتقصّى

‏أمّا لقى نمّام مسولف عنك
‏والّا على ماقيل خبلٍ موصّى

.....

[الحمدان]

يابو ضحكةٍ ماتعترف في وطن وحدود
تمر القلوب الصادقه دون تأشيره

وانا واحدٍ قلبه نظيفٍ وعِرفه زود
مهو بلاحقك شرّه إذا ما الحقك خيره

يشوف السنين اللي معك هي عمر ووجود
وباقي السنين اللي بليّاك تقزيره

جعل وجهك أبيض من كثر مايديك تْجود
ياويش الشعور اللي معي منك تأثيره

.....

[الحمدان]

استفدت من الذيابه ومن نبح الكلاب
واستفدت من الرغا واستفدت من الهدير

ولا كسبت الا معرفة عزيزين الجناب
ولا خسرت الا معرفة عديمين الضمير

.....

[الحمدان]

الطيب فطرة والمجالس أمانات
يستامن الرجال وش دار فيها

ماينقل علوم العرب والإشاعات
غير الرخوم اللي قصيرة يديها

.....

[الحمدان]

يالله بدعوة مالها دونك حجاب
يالي بوجه العبد ماصك بابه

تفتح لها ياخالق الكون الابواب
في ساعه يالله فيها اجابه

العبد في رجواك يارب ماخاب
ادعيك وانا موقنن بالاجابه

اسألك يارحمن ياخير وهاب
يالله عساها دعوتن مستجابه

.....

[الحمدان]

جميلك يشوفه من يشوف الجمايل دين
يحفظ الجمايل وفعل طيبك نصب عينه

وتضيع الجمايل في ردي الوفاء والدين
لو أنك تصب السمن في راحة يدينه

.....

[الحمدان]

مدري من الرابح ومن فينا خسر
‏حتى عجزت أشرح لنفسي موقفي

‏ياخيبة ظنوني ويا كبر القهر
‏ودي اقول لدورة الارض اوقفي

‏لاتبدأ اعذارك انا اللي بعتذر
‏واستسمحك باقي سنيني واختفي

‏من عادة الدنيا ومن طبع البشر
‏ضريبة الخذلان يدفعها الوفي

.....

[الحمدان]

‏الاشتياق اللي يجي الانسان من حين لحين
‏خلاني اترك حاضر ايامي واعوّد لك ورى

‏كأنه سرى ليلك بدون شعور واحساس وحنين
‏انـا على الاشياء القديمه بيننا ليلي سرى

‏افتّش الذكرى وادور لك وانـا جرحي دفين
‏كني اصحي ممسي اوجاعي وجرح مابرى

.....

[الحمدان]

‏تفاصيل شخصيتي لو اخذ عليها زوم
‏يجوز اكتشف لغز التناقض ولا احلّه

‏غموضي يوضحني وصمتي سوالف قوم
‏ورحيلي بدون عتاب واسباب وادلّه

‏تكاثرت خذلاني وقفّلت باب اللوم
‏ملامي على روحي وصبري على حِله

‏من العمر كله ما اعرف كم باقا لي يوم
‏لكن جعل باقي يوم يسوى العمر كُله

.....

[الحمدان]

‏من دافع الاهمال والا مراعاه
‏بديت احس ان الامل بالقطاعه

‏وعشان اعيش اللي بقالي بلياه
‏حطيت في نفسي بهجره قناعه

‏على الاقل اقنع ببعده وفرقاه
‏ولا اتشفق للوصل كل ساعه

.....

[الحمدان]

‏عطاني علومه كلبوها ورحت وراح
‏ولا طحت من عينه ولا طاح من عيني

‏ياليته جرحني قبل يقفي عشان ارتاح
‏ولا قال عند موادعه لاتخليني

‏لكنها ظروفٍ محكمه والظروف شحاح
‏مصير القدر يرضيه قدام يرضيني

‏قطعت الرجا من يوم برق الموادع لاح
‏وغدت كل حاجه ماتبكي تبكيني

.....

[الحمدان]

‏حبيبي مابقى عندي صبر يتحمّل التأخير
‏رحلت وعقبك الدنيا غلاها طاح من عيني

‏تصدّق والا ماتصدّق أنا عاجز عن التفكير
‏تعال وشوف في عينك غيابك وش عمل فيني
‏
‏أجاوب اللي يسألني عن أخباري وأقول بخير
‏وأنا لاخير بغيابك ولا حاجة تهنيني

.....

[الحمدان]

عشقنا الطناخه وارتفعنا عن المنقود
‏رقينا على عرش الكرامة ولازلنا

‏طموحاتنا بعزومنا تبلغ المقصود
‏وعلوم القلوب الحاقده ماتنزلنا

.....

[الحمدان]

‏عود لسانك في حياتك على قول
‏شي يفيدك في نهاية حياتك

‏سبح وكبر واذكر الله على طول
‏هذا الـرصيد اللي يفيد بمماتك

.....

[الحمدان]

‏حاولت أداري خاطرك وأتبع رضاك
‏وهذا هو اللي زوَّد الطّين بلّه

‏تخطي واعدّيها واطوّف خطاياك
‏طوّفت لك تسعة وتسعين زلّة
‏
‏هذا وعد مني ليا رحت لأنساك
‏وامحي وجودك من على الكون كلّه

‏كنت متعلّق فيك وأخاف فرقاك
‏واليوم لا أحبك ولا قالها الله

.....

[الحمدان]

‏تدور الليالي والمقادير خيل وجيش
‏ولولا الصبر ماكان رحنا ولا جينا

‏رمتنا الليالي في نعيم الطرب والطيش
‏وشلنا على ركب الهقاوي هقاوينا

‏طوينا سجلّاتٍ كثيره عشان نعيش
‏ماندري إن سجلّات المقادير تطوينا

.....

[الحمدان]

‏الشجاع يشوف معنى الحياه مغامره
‏ان ربح وان ماربح حكمته بكره تزين

‏والجبان يشوف كل الحياه مؤامره
‏البشر فيها عِدا والفرح فيها كمين

.....

[الحمدان]

صبرنا على ماجابه الوقت زين وشين
ولا حطمت صكات بقعا عزايمنا

نحشم الرفيق ولا طردنا ورى المقفين
وعلى نخوة الناخين نحذف عمايمنا

.....

[الحمدان]

تحتار في وصفك قواميس الالقاب
بحر الكرم والا محيط الكرامه

اوصفك شمس تنتشر نور ماغاب
وإلا نجوم بوجنة الليل شامه

وإلا سحاب ابرق على الليل بإعجاب
خيم وعيا الكوس يطوي خيامه

أنتي بوجودك للزمن صرتي أسباب
يخذل بها من يعلنون اتهامه

.....

[الحمدان]

‏تبي الصحيح أني بلياك مفقود
جسمي هنا والروح عندك وهايب

تفداك عين تنظرك وأنت موجود
ويفداك قلب يذكرك وأنت غايب

.....

[الحمدان]

‏سرحت بخيالي فيك وأسهبت فالتفكير
وطلّعت كل اللي مخبّى ورى صدري

ماتمنعني حدود المسافة عن التعبير
أنا توّي مسولف معك وأنت ماتدري

.....

[الحمدان]

ليلةٍ فيها على قلبي زبنتي
ليتني غايب هذاك اليوم عنها

كنت احبك واستلذك يوم كنتي
مهرةٍ ماضاع من كفّي رسنها

ان وزنتي منطقك وان ماوزنتي
مالعبرات العيون الا وطنها

الزمن وقّف على ذكراك وانتي
غلطةٍ عيّا العمر يدفع ثمنها

.....

[الحمدان]

أن كنت لازلت يالغالي علي ممشاك
لاحن حبايب ولا الايام تجمعنا

لو كان ترعى وليفك مثل مايرعاك
كان الزعل ماحصل منكم ولا منا

اظاهر أني تركتك وأبتديت أنساك
لولا بقايا من الماضي تذكرنا

ياشين صدك وياشين الزعل وياك
الله علي نار هجرانك يصبرنا

.....

[الحمدان]

لاتخليني نديم يشتكي فرقى نديمه
وانت حبّك قد وسمته في معاليق الحنايا

وين مالديت فكري شفت لك صوره قديمه
وين ماوجهت وجهي شفتك بكل الزوايا

جابر الربعي

[الحمدان]

إن مزحنا لجل تخفيف الطعون
إبتلشنا بالصدور الضايقه

وإن سكتنا مامزحنا يزعلون
ماعرفنا كيف نرضي الذايقه

.....

[الحمدان]

فيك طيش وفيك زمّه ولك عقلٍ رزين
‏ياشبيهة مهرة الشيخ في يوم الطراد
‏
‏مثل ماخذتي من الريم عنق ووسع عين
‏ماخذٍ رمشك من قلوب حسّادك سواد

.....

[الحمدان]

‏الحلم له نافذه والرزق بابه كبير
‏لاتقفل الباب وتعوّد على النافذه

‏لايشغلك طير غيرك وانت طيرك يطير
‏ياتيك رزقك ورزق الناس ماتاخذه

.....

[الحمدان]

‏ان تتحول العلاقه إلى الرسميه مع الشخص الذي كانت بينكم اقصى مراحل الميانه لايوجد اسوء منها وكانه شخص غريب
‏وعلى هذا السياق
يقول جابر النشيرا :

‏رغم الثقة تعتريني شكّة المستريب
‏واقول جعل الليالي بالجهل ماتدور

‏ياوجدي ان عود المألوف مثل الغريب
‏ذي والله الحاجة اللي تستفز الشعور