فوق هام السحب ( الشعر الشعبي) على متن القوافي

[الحمدان]

دكتور قوللي وش علاج المحبه
وين العلاج اللي يداوي المحبين

لافادني المرهم ولا الف حبه
ولا المهدي والابره والبروفيين

القلب شاغلني ومغرم بحبه
واخاف نصبح بعد فتره مجانين

.....


جواب رد من ابوشاجع

عندي عـــــلاجك يالـمتيم وطبـه
لك ياكحيل الـعين يالحالي الزين

دكتـور مـــختص للمحبين طبـه
خبيــر و اعــالج جميــع المحبين

رقم العــياده هو عالوتس ذي بـه
دق الرقم ورسل شكاويك ذلحين

كـل الفــحوصـات والتحليل كبـه
دام والعلاج عندي لكل المصابين

[الحمدان]

يامساء الـشوق وإحـساس الغياب
ويا مساء إللـي ذكـــر خلّه بخير

مــن ذكـرته انـفـتـح للمساء بـاب
ھـمـّي المعتاد والـشـوق الـكثير

.....

[الحمدان]

مِتولعَـه بـالشِعـر واحسَاسهِا غير
وكل ماعَجبهآ بِيت قَالت عَلى الجرْح

محدن يِشـابـهآ بكل الـغنِاديـر
في زينَهآ واحساسها يصعب الشرح

.....

[الحمدان]

‏القـلب بيتـــك والغـــــلا ورد وزهـور
يفـوح عـطر الشــوق لحظة مـرورك

جـاوزت لعـيـونك مـحطات وبحـور
من قبل أصافــح بالمعاني سطورك

ياخل غرامــك صار فالروح منثور
في الدم يجــري به غلاك وشعورك

وانت نبض القلب والشمس والنور
ولو غاب كل الكـون يبقى حضورك

.....

[الحمدان]

اعشق حروفك واعشق اسمك والهدف
.واعشق دلالك والدلع واعشق غلاك

اعشق عيونك ذا بها كل الشغف
واعشق عنادك والعتاب واعشق غواك

اعشق حماسك في الهوى لاقد عصف
واعشق زعل قلبك وحين اطلب رضاك

.....

[الحمدان]

‏غالـــي وتبــطي داخل الـقلب غالـي
‏تعال عــندي وأفــتح القلب وتشوف

‏لامرنــي طيــفك وداعـب خيـــالـي
‏أسكت وأقول بخاطري حيّ ذا الشُوف

.....

[الحمدان]

‏أعاتبها ويلمع دمعها واغير الموضوع
أنا الغلطان دام السالفه تاصل مدامعها

.....

[الحمدان]

اقـنـع بحـالك والظروف المحيطه
دام السـعاده والـرضا بالـمـقـادير

بسيط وتحب الحياة البسيطـــه
خلك على هالقاعده وابشر بخير

.....

[الحمدان]

كافحت بالدنيا وخضت التجاريب
وعِرفت منتـوج العمر من كفاحـه

أكبر سبب يجلب عدوات ويجيب
للناجـح المـوهـوب قـوة نجاحـه

.....

[الحمدان]

يارب زدني تمسك بالشيم والمبادي
بدون بعض المبادي ما للانسان قيمه

سفر الدغيلبي

[الحمدان]

‏لا تكتم شعورك وانا شابع سكات
‏لا أشتقت لي قلّي وباقول لا اشتقت

‏وصوّر لي عيونك على مر الأوقات
‏مردّها بْتقفِي عيونك مع الوقت

.....

[الحمدان]

‏ياللي عن أنـظـار المضافين خافي
‏مالي على التغريد بـغـيابكم شف

‏والنـاظر المـحـزون للنـوم عــافي
‏لا تطول الغـيـبات في حـالتي رف

.....

[الحمدان]

طرف الليل وانقاد النسيم وتنبه
‏خاطرٍ من صواديف الزمن فيه حرّه

‏ليت قلبي ذعاذيع الغلا ما تهبه
‏وليت عيني تجود بدمعها ما تثره

‏كيف ابسلا وانا اطا كل ليله مربه
‏وتعترض صورته واقول لله دره

‏تهت مابين عنق وبين منحر و لبه
‏وعين حر وجديلٍ ضافي وخصر حرّه

‏قد طلبته وانا المطلوب مانيب احبه
‏وقد تبعته وانا مانيب تباع جرّه

‏يوم شفته نوا الهجران من دون سبه
‏وقام يكثْر علي من العتب و يتشرّه

‏قلت درب الفراق اللي تطريه ذبه
‏واخذ معك الغلا الباقي بخيره وشره

‏قال قلبك قسى بعد الوفاء ؟ قلت صبه
‏ما بقى في مداهيله للاشواق جرّه

‏من طروق الغرام ومن دروب المحبه
‏سامحٍ خاطري ماعاد لي شف مره

.....

[الحمدان]

‏ذقنا ملذات الهوى حب وفراق
‏وشفنا من صدوف الزمن واكتفينا

‏وعشنا ثلاث سنين بالضبط عشاق
‏احلى ثلاث سنين مرت علينا

.....

[الحمدان]

‏ماتركته في حدود الممكنه والمستحيله
‏كنت اداري خاطره لو خاطره مدري علامه
‏
‏إن ثقل همّه على متنه فـ انا اوّل من يشيله
‏وان تمادى بالسهر ليله فـ انا اخر من ينامه

‏يدري ان الدمعه اللي في طرف عيني ثقيله
‏وادري ان عيونه اللي صدّت ابلغ من كلامه

.....

[الحمدان]

‏لعنبو من ذل نفسه لغــير امه وابوه
‏لو تــروح الـروح نفس الفتى ما ذلها

‏علموا من هان نفسه لمطمع علموه
‏شيمة الرجـــال تســوى حياته كلھا

.....

[الحمدان]

‏أصل البكا يا صاحبي من كذا نوع
‏مره وله ومره حزن ومره إخلاص

‏إحدٍ إليا منه بكا طـــاحت دموع
‏وإحدٍ إليا منه بكا طاحوا آشخاص

.....

[الحمدان]

‏عذرك تحبين القصايد وعذري
‏انك طموحات القلوب النبيله

‏أنا اختصرت الناس بإبداع شعري
‏وانتي اختصرتي كل أنثى جميله

.....

[الحمدان]

‏عطوني اللي مرّها ماهو مثل مرّ الحياة
‏ما كنّها الّا ترفةٍ يستر زعلها زِينها

.....

[الحمدان]

‏وقفة الطيّب اكبر من حدود الكلام
‏الذهب مايصدّي والمواقف محك

‏عـادة الوافي اللـــي يدفعك للامام
‏كل ماضــاقت الدنيا بعينك ضحك

.....

[الحمدان]

‏منطق لسانك يكشف السر للناس
‏عن تربيتك وساس جدك ومعدنك

‏لو كـان للطيب علامــه على الراس
‏مـا قـيـل مـن لا يعرفك مـا يثمنك

.....

[الحمدان]

‏يا خليل القلب ماعاد يصلح له خليل
‏ غيرك الله يلعن اللي ليا عاهد يخون

‏ لاتجاملني ترا قلبي أحساسه ثقيل
‏ لو تقول أهلاً وسهلاً يحس انه يمون

‏أنت لوتدري بحبك طلبت المستحيل
‏مستحيل عندك وعندي أهون ما يكونّ

.....

[الحمدان]

إليكم مع التحيه...

أهلاً بكلِّ مُتابعٍ ومتابِعَةْ
بقناتِنَا الشعريةِ المُتَوَاضِعَةْ

موسوعةٌ جمعت قصائد جمة
فكأنها بحرٌ عميقٌ في السِّعَةْ

أبياتها كلآليءٍ قد أُفْرِغَتْ
فيها كأمثالِ النجوم اللامِعَةْ

طوبى لمن قد بات فيها متابعاً
يقتصُّ من هذي الثمارِ اليانِعَةْ

[الحمدان]

العز له ساسه وراعي الطيب معروف
والـصبر فـي بـعض الـمواقف رجـوله

الـلي يـجامل تـالي الـوقت مـكشوف
والـمـجـد مــاهـو أي واحـــد يـطـوله

.....

[الحمدان]

‏حظ من حطك بجوفه وسكرّ غطاه
‏حتى صوتك ما وده بالعرب تسمعه
‏
‏من يحبك وربي من غرامك عطاه
‏وش يبي من حياته غير شوفك معه

.....

[الحمدان]

كان عندك عيوب وكان عندي عيوب
عيبك انك سكتّ وعيبي اني مشيت

.....

[الحمدان]

‏حُبك عطاني درس ماني بناسيه
درس هدم أحلام عمري بـ ثواني

مهمّا تحب وتخلص لشخص تغليه
تلقى النهاية يحب له شخص ثاني

.....

[الحمدان]

السنافي ليت راسه مايشيّب
وليت عمره يندبل تسعين مره

والردي ليته من الدنيا يغيّب
دام خيره مايعادل ربع شره

.....

[الحمدان]

ارفق ترا النفس العزيزة عيوفه
‏ماكل عذر ٍبأقبله منك لا أخطيت

.....

[الحمدان]

اخوي لا ضاق الفضا والدهر شان
يبقي علي سود الليالي عضيدي

اضرب بسيفه هيبة الانس والجان
واسقيه لامنه ظما من وريدي

.....

[الحمدان]

انا الكبير بعين من يعرف الناس
وانا الصغير بعين من يحتقرهم

تدري وش الافلاس لا قِيل الافلاس
اللي عرف له طيبين وخسرهم

الأمير خالدالفيصل

[الحمدان]

والنوم لي وقت لاجيته ولاجاني
يرسل علي والسهر يذبح مراسيله

ماعندي الا القصيد يترجم احزاني
اصرف شعر واعتصم بالله واشكي له

سفر الدغيلبي

[الحمدان]

‏يالعفاف المهذّب والحيا والحشيمة
‏والجمال الحقيقي والوقار المهيّب

‏كل عينٍ ماتشبع من عيونك كريمة
‏ما لحسنك شبيه ولا لزينك معيّب

‏ماتهون المصايب والجروح الأليمة
‏لين شعرك من العود المعتّق يطيّب

‏وكل فكرة تغنّى فيك فكرة عظيمة
‏لين راسي يشيب ولين قافي يشيّب

.....

[الحمدان]

‏عزي لحال اللي من الفقد مفجوع
‏مــن كثـر مامر بحيــاته وواجه

‏صار الحزن في داخله نبت مزروع
‏تسقيه ذكرى وسمها في حجاجه

‏لاحول لا قوه ولا صوت مسموع
‏ من كل حاجه ناقصه الف حاجه

.....

[الحمدان]

‏يـالله ياللي نطلبـك حزة الضيـق
‏وللضيـق عنـدك ياكريم انفراجه

‏تفرج لمن همه عن الضحكه يعيق
‏فاقد شعاع الشمس طافي سراجه

‏همه ثقيل ٍ وان حكى ييبس الريق
‏بعض المواقف زودت بانـحراجه

‏عليك يشكي الحمل ما يقدر يطيق
‏فيك التجى وحدك وعندك عـلاجه

.....

[الحمدان]

‏ياصفحة الخذلان ماعاد نبغيك
‏قصة حياتي ماتحمل هزيمه

‏وان كانها لابد شوفي مراميك
‏في داخلي باقي علامه قديمه

.....

[الحمدان]

‏أحبّك و أنا اللي لو جميلك علي شوي
‏قدرت أتناسى ليلةٍ ما أنت ناسيها

....

[الحمدان]

‏ملامح عفيف النفس ما تقبل التاويل
‏عن اللي حياه العفٌ يمنعني أقوله

‏ما بين أرتكازة معتدل وأنحدارة ميل
‏وخصرً هذا ضيقه وعنقً هذا طوله

‏سحاويً يروح الشفق لا انولج فالليل
‏مثل وجنته لا دسهّاا تحت مجدوله

‏نحيل القوام اللي قطاته قطاة الخيل
‏يا حظ اشقرً يقتضّ ويلف من حوله

.....

[الحمدان]

‏ودّي أسلي شوقي إللي كل ما تركد غصونه
‏هبّت الذكرى من الماضي القديم وحركتها

‏وإنْ بغيت أنسى غرامك وقّفت ذكراك دونه
‏وردت أركاب المحَبه فالخفوق وبرّكتها

.....

[الحمدان]

‏لولا الحياء والملام وهرج عذّالي
‏لاقول بيتٍ يراودني وخبّيته
‏
‏فلان كل الوجيه اللي على بالي
‏وفلان كل القصيد اللي تغنّيته

.....

[الحمدان]

‏لاعاد تنشدني عن فلان وفلان
‏حيين لاكن عندي انهم توفو

‏علمي بهم نمشيى سوا مثل الاخوان
‏لكنهم يوم استوى الدرب لفو

‏معاد بالدنيا لا خوه ولا امان
‏لاصار مابه مصلحه منك قفو

.....

[الحمدان]

‏اعتذر من صاحبي حتى لو أنه مخطي
‏والخطا لاجا من الغالين تحت أقدامي

‏بس تدري وش يجنني ويرفع ضغطي
‏واحد يحكي وراي ويبتسم قدامي

.....

[الحمدان]

‏البارحــة مـرني طيفك بنص الكلام
‏واشتقت لك لين قالوا كمل السالفة

.....

[الحمدان]

‏لا تدقق في الامـــور ولا تبرق
‏بارك الله فالبساطه والسهوله

‏الكـــلام الـزين يجمع ما يفرق
‏والكلام الشين ودك ما تقوله

.....

[الحمدان]

كن مـثل ما ودّك تكـــون لكن لاتصير
‏مثل من يجهــل مكانه ولاّ ينشــد عنه

‏وانتبه لا تحقــر صغـــير وتجادل كبير
‏الصغير اضحك معه والكبير استح منه

.....

[الحمدان]

‏اليوم ما عاد به صكات ومواجه
‏في ساير الناس لا اشكك ولا ارّيب

‏لاشفت من غيرت الايام منهاجه
‏جزعت منه جزوع امجري الهيّب

‏مالي ورى الناس لا مطلب ولا حاجه
‏ما دام رايي وجيه ومنهجي طيّب

.....

[الحمدان]

ريحت شمــاغ ابــوي لاجاء من الذود
‏وريح الجـــلال اللـــي تصلـــي به امي

‏اطيب من اغلى نوع في المسك والعود
‏وعـــلاج صـــدري كـــل مــا زاد همي

.....

[الحمدان]

‏الأم موطن حب وإحساس وأمان
‏يـدري بها اللي في حـياته فـقدها

‏تجمع شتات البيت مابين الأخوان
‏وفـي عينهـا أغلى الـخلايق و لدها

‏عد وتخــير في البشر كـل من كان
‏كم خـرجـت إنســـان ناجح بيدها

‏الناس تلهى عنك في بعض الأحيان
‏وأمك مـدار الوقت تسخي جهدها

.....

[الحمدان]

‏تمر الشعور وتسكن الصوت حين دْعاه
‏وتستوحش دْروب أنتظاري مشاويرك

‏يا ذنب الشعور اللي متى ما تتوب خْطاه
‏تعثِّر له الذكرى على درب تكفيرك

‏يمرّون غيرك فوق موق العيون أشباه
‏فتنت الليالي لين عافت عوض غيرك

.....

[الحمدان]

‏اهم حاجه ما قال الله وقال الرسول
‏يا راجي الناس عند الناس وش ترتجي

‏الزود زود الثقه والنقص نقص العقول
‏مهوب نقص الفلوس اللي تروح وتجي

.....

[الحمدان]

‏حزن كبدي لا طرت ذكريات الراحلين
‏حزن عودن هل دمعه على قبر ولده

.....

[الحمدان]

‏لاتحسبني حـريصً عند حب الظهور
‏يا صاحبن فـي نهار المعضله ذاخره

‏اجامل الناس وامـثل مع الضحك دور
‏ودي تـسافر هـمومي في ظهر باخره

‏احيان تلهيـني الدنيا واحس بقصور
‏وشلون ارد الزمان من اوّله لآخره

‏يارب طاعتك الاولى عن جميع الامور
‏عساي ما انسى الكفن والقبر والآخره

.....

[الحمدان]

‏شرايد المدخول ننطح بها ضيف
‏والّا نسلّفها رفيقٍ سنافي
‏ْ
‏ما نقدر نخطط على سفرة الصيف
‏الراتب يجينا له الفين قافي
‏ْ
‏خلك تمشّى بين باريس وجنيف
‏والمجلس الرسمي من العام طافي

.....

[الحمدان]

‏الحمدلله صرت متعوّد على كل الظروف
‏لو كان نفسي في بعض الأحيان تتبع غيّها

‏حتى الحياه إللي من أول كنت الحّقها حسوف
‏ما عاد أفكر لا فواجدها ولا فشويّها

‏سلمي مع ظروف الليالي مثل سلمي للضيوف
‏لا جاتني صكات بقعا قلت يالله حيّها

.....

[الحمدان]

يالله لا تجعل المعروف لي سيه
ولا تشمت بحالي تو عدواني

من العدم مالقيت حواية الدله
الا بعودن سلف من عند جيراني

.....

[الحمدان]

‏صار التعامل صعب جداً مع الناس
ماعاد تعرف صاحبك من عدوّك

حاول تصير انسان ماعندك احساس
يمكن يزين الوضع وتعيش جوّك

سعيد العلياني

[الحمدان]

ساس الرجوله كلها دين وافعال
ومن غير هالثنتين ماهي رجوله

ماهي تراها بالمهايط ولا المال
ولا هي بكبر المرتبه والحموله

المال كل يملكه حتى الانذال
والمرجله ماكل رجلّ يطوله

لان المراجل ماتجي بأي رجال
الا الذي تشهد لهرجه فعوله

.....

[الحمدان]

ياكثر كرهي للعفون اللي مثل شغل النمل
اللي تجمع للـــوريث ولا تـــــسر نفوســها

وياكثر حبي للرجال اللي يلــــمون الشمل
اللي يصادمها الزمان ولا يلـــــــين روسها

الراي يبغاله رجل والحـــمل يبغاله جمل
والطيب يبغاله رجال ماتــــــصر فلوسها

مفلح الرقابي

[الحمدان]

‏خذني على قد قلبي خل عقلي بعيد
‏العقل مهما كبر فالحب وش دخله

‏مشاعر الناس ما تمشي بعقلٍ رشيد
‏تمشي بحكم الغلا والعاطفه والولَه

.....

[الحمدان]

‏قلبي سنافي ماهوب أدناة ما جابه
‏ما جابه الا قرامة قلبك النشمي

‏ يوم أنفرد به على جنب وتلوّى به
‏وبغى المحبه وقال أبشر على خشمي

.....

[الحمدان]

زينة الدنيا القلوب اللي وفاها عاده
‏والعيون اللي ليا أخطينا تغاضت عنّا

....

[الحمدان]

‏خواطر العالم تبي شخص فاضي
‏تزعل و ترضى دون سـبّه وبرهان

‏نمشي عن الزعـــلان نلقاه راضي
‏ونرجع على الراضي ونلقاه زعلان

.....

[الحمدان]

‏تمكّنت في عوج المحاديب وأستوطنت
‏وبان الغلا وأشوف بعض العرب فاطن

‏وخليت صدري موطن ماسكنه إلا أنت
‏ولا فيه غير القلب في حكمك مواطن

.....

[الحمدان]

وش جاب طاريّه مع وقت المغيب
‏ياحي ذا الطاري وحـي الله نباه

‏يالعنبا اللي يحسبون الحب عيب
‏وهـو تنـاقله الـرواه من الرواه

‏وشلون احب بلا رقيب ولا حسيب
‏وقلبي لامنه حب يسرف في عطاه

‏غير الرقيب الذاتي ابغى لي رقيب
‏خـايف رقيبي لا يـضيّع الاتجـاه

‏احترت بين القلب والعقل اللبيب
‏في حب من حيرني بحبه جفاه

‏احرمني من الوصل والعذر النصيب
‏واكرمني من الهجر يامال الغناه

‏عقلي يقول ابعد عن الحب المريب
‏وقلبي يقول ايحبك وهذا جزاه

‏تـرا الجفا مـايعتبر منه غريب
‏عوايده دايم يسوي ذا السواه (؛

‏زعلان والزعلان لويخطي مصيب
‏حقه مهوب تجفاه حقه في رضاه

‏الهجر مايرضي حبيبً من حبيب
‏لكن حبيبك والله ان عذره معاه

‏انا المجرب فالمحبه والطبيب
‏عندي شهاده من وفاك ومن وفاه

‏كـلش يـهـون الا غـيابه لايغيب
‏وان صمم انه يغيب ياخذني معاه

‏نعيش وظـنون المحبه مـاتخيب
‏ويجرح على كيفه عسى جرحي فداه

‏كل الجروح اتطيب والجرح العطيب
‏من واحدن غلا جروحه من غلاه

‏مابي الجروح اللي تجي منه تطيب
‏ابي جروحه باقيه مدى الحياه

.....

[الحمدان]

‏كنها إللي كل ما أقفيت قالت لي تعال
‏وإكشفت ذرو اللّثامه وبيّن خدّها

‏مبسمً ما بين غمّازتين ودق خال
‏إذبحتني لعنبوها على أبو جدّها

.....

[الحمدان]

‏يا بعيد الدار و أقرب من ضلوعي
‏أسقني حبك ومن صافي حنانك

‏لو تجي دنياي في كيفي وطوعي
‏ كان ما يبعد مكاني عن مكانك

.....

[الحمدان]

تخيّر وخاو من الرياجيل نادر نوع
‏يعزّ الخويّ من المناقيد ويحنّه

‏ولا تخاوي اللي كنّه التاير المرقوع
‏يمشيك لكن ما أنت متطمّنٍ منه

.....

[الحمدان]

خطاياك واجد والعذر ماقدرت القاه
‏جروحك يحس بضيقها من مجربها

‏ولو الغلا يدمح خطايّاك في مأواه
‏ترى النفّس في حفظ الكرامه مدربها

‏تحمّلتك الين الصبر طاح من مركاه
‏واخاف انفجر من شي تافه واخربها

.....

[الحمدان]

بعترف لك بالحقيقه كامله وانت وضميرك
‏بعد ماخضت الحياة بسكة الصبر الطويله

‏يوم مرتني حياتي كلها ما شفت غيرك
‏انت صورة كل مشهد وانت قصة كل ليله

.....

[الحمدان]

رمى ورد الحبايب خلفه وقال الجفى قدام
‏تركني لأمري الواقع مابين الجرح وضماده

‏بدون أسباب معروفة تناسى سالف الأيام
‏تصاغرني وأنا أكبر من حفظ له ملحه وزاده

‏دريت أن القطيعه رغبته وأن الغرام أوهام
‏وأنا اللي كنت أظن الحب حنا سادة أسياده

.....

[الحمدان]

مرهقني الشوق واجد والسهر والبعاد
‏ياعمري اللي بقناعاتي غصب عشتك

‏ خل الزعل لا نطوّل بالزعل والعناد
‏ للحين أحبك لو اتعب من مناقشتك

.....

[الحمدان]

ليه نضعف كل ما مرّ الحنين
وليه نتعب كل ما نذكر احد

وليه ماضينا حكايا راحلين
وليه نوفي والزمن فينا جحد

.....

[الحمدان]

يـامنبع النور بنت الغيم لا تزعلين
‏علامي اشوف لمعت عينك الواسعه

‏محبوبك الطرب دايم صار جداً حزين
‏والكـون كله بعد ضيقتك مـا ياسعه

‏نحتاج مـوعد غرام الساعه اللي تبين
‏إما على الثامنه ولا على التاسعه

.....