فوق هام السحب ( الشعر الشعبي) على متن القوافي

[الحمدان]

‏ان دعيتك نجمة السيح والا خشف ريم
‏تزعل نجوم السماء والبلاجيك الطوال

‏مثل ما الله حط فالبيت زمزم والحطيم
‏حطك الله آية الملح وايقونة جمال

‏افزعي للي على باب وصلك مستهيم
‏كل ماقلتي هلا جاك يحسبها تعال

....

[الحمدان]

بين زيف الوجيه وطول بال السنين
ضاق صدر الفضيله بين حرّاسها

كل ماقال واحد راحوا الطيبين
أشعر أن الصداقه تلفظ أنفاسها

.....

[الحمدان]

على الأمل نزرع بساتين الاحلام
‏عسى المزون تمرها في وعدها

‏تروي عروق ٍغرها صيف الاوهام
‏لولا الأمل ماتت ضمى في مهدها

.....

[الحمدان]

‏ودّي إني في الليالي كلها متواجد
‏عاد قلبي مانساك وعاد كبدي ولها

‏السوالف بيني وبينك حلاها واجد
‏عادنا لاذعذع النسناس بنكملها

.....

[الحمدان]

‏كل ما شان الدهر قلت لابدّه يزين
‏
كثّر الله خير صبري ويا مال الغناة

.....

[الحمدان]

مايضاهي عزّة النفس بالدنيا غناة
عن دروب الذل ياخطوة العز إنتحي

مشكلتنا كل مخطي نبرّر له خطاه
نستحي في وقت فيه البشر ماتستحي

.....

[الحمدان]

‏دام الزمن ياصاحبي يمشي سريع
وش لي بتفتيش الصدور الخافيه

يامنوتي محدٍ بهالدنيا يضيع
غير المبادي والقلوب الوافيه

.....

[الحمدان]

يوم أجي على المخدّه لا عليّ ولا لي
‏أستريح من المشاكل وأهتني بأحلامي

‏السعاده مطلبي ولا الرصيد المالي
‏ماملكته تنفقه سبّابتي وابهامي

.....

[الحمدان]

‏إلى هِمت فسنين الظمأ والصبر كذّاب
‏ولا فيه شجرْة خلّت الظل من حظّي

‏تجي ضحكتك في بالي المرهق المرتاب
‏مثل لفحة النسناس في وجه متوضئ

.....

[الحمدان]

‏أشكر الله على كل شي صار بزماني
‏ودّك العبد يشكر ربّه بكل مرّة

‏بعض الأحيان من بطن المسرّة تعاني
‏وبعض الأحيان من بطن المضرّة مسرّة

.....

[الحمدان]

‏اقنع بحالك والظروف المحيطه
‏دام السعاده والرضا بالمقادير

‏بسيط وتحب الحياة البسيطه
‏خلك على هالقاعده وابشر بخير

.....

[الحمدان]

‏خذاني غرامه بالمحبه شوي شوي
وجاني على نوّي وجيته على نوّه

وأنا خابرٍ ماني بصيده وقلبي حي
لكن مالنا فالحب حيله ولا قوّه

.....

[الحمدان]

‏العز ماهو بشت او ميلة عقال
‏العز تختصره فعايل يدينا

‏مو مشكلة حنا نسويك رجال
‏بس الخطأ انك تمرجل علينا

.....

[الحمدان]

‏ابعتذر مادام آسف تردك
‏عن كل زلة شوق بينك وبيني

‏وخليني امسح بالاحاسيس خدك
‏يمكن تحسين بحرارة يديني

‏اذوب لاحطيت يدي بيدك
‏واموت لاحطيت عينك بعيني

.....

[الحمدان]

‏أنا ظلك وأنا كلك وأنا مشوارك المعهود
‏من أضغاث الحياة القاسيه لأحضان ضحكاتك
‏
.....

[الحمدان]

‏مرت ثلاث شهور نفسي طايبه والحال حال
‏وين القدا يالي تعرفون القدا وين القدا

‏من كثر ماجربت فالدنيا ومن سود الليال
‏اعذرت في بعض الامور وراحت احلامي سدا

‏ماشفت شيً يغري العالم مثل خشم الريال
‏يقدر يرد الي من اول مايردون الندا

‏ياهيه يالي مشغلن عمرك ترى مالك مجال
‏تضحك لو ان عروق قلبك داخلً فيها صدا

‏اسلم وسلم لي على الي معرفتهم راس مال
‏ولا تسلم لي على الي معرفتهم راس الردا

.....

[الحمدان]

‏اذكر يوم اخفى عبايرها تحنحنها
‏قالت وأنامل يديها تازن عقالي
‏
‏فمان من يعتق الانفس ويسجنها
‏وقامت تبسّم ودمع العين همّالي
‏
‏وتلفّتت فالجدار اللي موازنها
‏مثل اللي يقول لا تتركني لحالي

‏انظر لها نظرة اللي ما يواطنها
‏ماكنها اول طموحي واخر آمالي

.....

[الحمدان]

‏عاتبتني بأقسى لغه وافصح لسان
‏مافيه شي من الزعل مانقصنا

‏الاختلاف من ابسط حقوق الانسان
‏لكن حرام انه يضيّع فرصنا

‏حاولت ألبي رغبتك قدر الإمكان
‏وأسدل ستار آخر فصل في قصصنا

‏وبديت احب اللي تحبه على شان
‏اصير اعاف اللي تعاف وخلصنا

.....

[الحمدان]

‏ياضمير ٍ فيك من جاير الفرقاء رسوم
‏وبينك وبين الشقاء مابقا الا فاصله

‏دام ترهقك الطواري وتسهر كل يوم
‏لو تدوّر راحة البال ماهي حاصله

‏ادري انك صاير ٍ ماش والصبر معدوم
‏والحزن له مدّه يواصلك وتواصله

‏مبطي من السجّه اللي تنسيّك الهموم
‏والمزاج الزين والنومه المتواصله

.....

[الحمدان]

‏وترحل مالحقك إلا القصِيْد وشرهة الطلاب
‏وقلبٍ مايخونه في الحياة إلّا تجاريبه
‏⠀
‏أنا ماني بعاقلك الدروب ولا رضيت أحباب
‏حزين إني أشوفك حقّ وأنت تشوفني ريبة
‏⠀
‏لو إن الغيمة أقفت ماتلحقت الهبوب عتاب
‏أنا حتى الجفاف إن كان في طارفك راضِي به

.....

[الحمدان]

اعتبرني معطيات الواقع اللي يستثيرك
‏وحبني مثل الخيال وخلني مثل المخيله

‏بعترفلك بالحقيقه كامله وانت وضميرك
‏بعد ماخضت الحياة بسكة الصبر الطويله

‏يوم مرتني حياتي كلها ماشفت غيرك
‏انت صورة كل مشهد وانت قصة كل ليله

.....

[الحمدان]

‏صدفتك في طريقي مثل الإطمئنان للمذعور
‏وانا ترهقني أسئله السنين وسطوة جيادي

‏هلابك ياشعورٍ عقبه الأرض عجزت لاتدور
‏لقاك اسعدني بوقتٍ شحيح يذبّل إسعادي

‏لقيتك بين خطوات القدر نورٍ بعد ديجور
‏لقى ماهو بعادي في زمانٍ ماهو بعادي

.....

[الحمدان]

‏يكفيني رحلت ولا حصل مني خطا وقصور
‏وانا حتى وداعي فيه بصمه تثبت اخلاقي

‏تخير فالديار اللي يغشيها ظلام ونور
‏وفرق النور بالظلمه يبين غلطة فراقي

‏تمرك ليلة تطغى مشاعرها على المغرور
‏تدور فالبشر مثلي ولكن صعبه تلاقي

‏فمان الله يا اخر محطه والسنين تدور
‏فمان الله والهقوه تخيب هقوة الهاقي

.....

[الحمدان]

‏وانا احسبنّي في فراقه تعافيت
‏وان عبرتي من مدخل الزاد زاحت

‏اللي يحسبنّي عن البعد سجيت
‏والا ان عيوني للرقاد استباحت

‏ياليتني من قبل لا أحبه أقفيت
‏والّا دروبي عن دروبه تناحت

.....

[الحمدان]

يضيق صدر الغريب إليا فقد داره
‏ويضيق صدر الحبيب إليا فقد غالي

‏ياليت بين البشر والخافق ستارة
‏وماتقدر تشوف هذى الحزن عذالي

‏لو أمسح الدمع تارة وأتركه تارة
‏من يمسح الذكريات اللي على بالي

.....

[الحمدان]

‏تغلا بكيفك لو تصير المحبه غلّ
‏لكن لاتساوم من يحبك على قدره

‏توريني ابواب المفارق وانا مادل
‏مثل من يورونه قبل موتته قبره

.....

[الحمدان]

ماعرف أخادع ولا أضحَك علىْ غيريْ
‏واكرَه صفات الأوادم عندي الغيبَه

‏أبكفيْ الناس شري ويآ عسىَ خيريْ
‏من عقب موتيْ كثير الناس تحكيْ به

[الحمدان]

مكاسب الدنيا حظوظ وتوافيق
‏وحكم القدر كل البشر يجهلونه

‏والرزق لاساقه ولي المخاليق
‏ماحد قدر ياقف من الناس دونه

.....

[الحمدان]

‏اهتديت لباب وصلك وانا عابر سبيل
‏ايْه يازين الهدايه عقب طول الضلال

‏جيت في ثوب البشاره بعد صبرٍ طويل
‏مرحبا يا قالط النور فلاج الليال

‏ردني لمسامر الليل وعتاب الخليل
‏قد خذيت من الغرابيل فصْل من الدلال

‏اثر عاد البدر وضاح والغربي عليل
‏والعمر فرصتْه مره وزينته الوصال

.....

[الحمدان]

‏الليل حالك والمساري موحشة والدرب خوف
‏والذكريات أشياء يستعصي عليّ إتلافها

‏أثر الأماني وارفات ظْلال دانية القطوف
‏والأمنيات أكثر مايخشى الحالمين إسرافها

‏على رصيف الصبر ملّ المنتظر طول الوقوف
‏وين الحياة اللي تخيّلت ولمحت أوصافها

.....

[الحمدان]

المسا هذي تفاصيله وهذا لونه
‏التحف بشته علوّ الديره وطامنها

‏كل مامرّت نسايمه الشجر وغصونه
‏تبعث اللي في قيود الصبر من مكمنها

‏الهوى ماينعذل قلب المهاوي دونه
‏والقنوع ان ذاق لذّات الحياه ادمنها

.....

[الحمدان]

‏زملوني عن غلاه وعن طيوفه
‏وعن هبوبه في ضلوعي لا أستهبّت

‏وأستروا قلبٍ تولته الحسوفه
‏لين راجت في عروقه ثم شبّت

‏الهوى ماله على العاشق مروفه
‏شف لياليه القديمه ويش خبّت

.....

[الحمدان]

الله رفعنا في جميع المواجيب
والناس مايلحقهم الذم منا

ان جاء مجال الناس شرواهم الطيب
وان جاء مجال الطيب شرواه حنا

.....

[الحمدان]

‏ماكنت أقصر فيك من كثر الإعجاب
‏يومك تساوي عندي الكون كله

‏كنت القريب وكلهم كانوا أغراب
‏حتى القمر لاغاب شفتك محلّه

‏خلاص لاترجع ترا خاطري طاب
‏الخاطر اللي كنت عايش بظله

‏رح واعتبرني واحدن أذنب وتاب
‏ماني بثوب تلبسه ثم تملّه

‏مايجتمع بالحب صادق وكذاب
‏رزقي على الله وأنت رزقك على الله

.....

[الحمدان]

مع دورة الدنيا يقلون الأصحاب
‏واليا صفى الصافي تريح فؤادي

‏بقى بجنبي محزمي وقت الأنشاب
‏وبقى معي راع الوفاء والمبادي

.....

[الحمدان]

‏لاطابت النفس العزيزه من انسان
‏ماعاد يسوى في نظرها ولا شي

‏تجوز عن رفقته لو كان ماكان
‏وتقفي كما يقفي عن الميت الحي

.....

[الحمدان]

‏طرف الليل والذكرى القديمه هواها
‏يستفز السكوت ويستثير المساري

‏كل ماقلت بسلا من طواري غلاها
‏مرّني طيفها واقتاد معه الطواري

‏ان تغاضيت كبدي من يبرّد لظاها
‏وان تجاهلت من يقدر يرد اعتباري

‏كل ما اذكر ليالينا وذروة صفاها
‏كن جوفي عليه اتحدّ حدب الشباري

.....

[الحمدان]

‏رميت وجهي على كتفك شوي وغفيت
‏والغفوة اللي ثواني فوق كتفك عُمر

‏لو إنك من أول الدنيا معي ماشكيت
‏مافاتنا نستحقّه بس ما الله أمر

‏لو مرّ عمري معك برد وسلام اكتفيت
‏هذا وجنبك ربيع العمر عيّا يمر

‏دامك معي لايهمّك لو ضحكت أو بكيت
‏كتفك لحاله يكفّي لين يقضي العمر

.....

[الحمدان]

‏ودي ارد قلبي بالغزل ياغزاله
‏لايسوي سوات اللي يهمّل رفيقه

‏الهوى لذّته في طيشه وفي هباله
‏ولذّة اول شعور وربكة اول دقيقه

‏وجهٍ اللي يشوفه ينبهر من جماله
‏وطلةٍ تجعل الرجال يشرق بريقه

‏ودي امثل مثول المتهم للعداله
‏ماعلي دامني بين اليدين الرقيقه

‏العفو ياشبيه اللي جفل من ظلاله
‏نظرتي في التفاصيل الدقيقه دقيقه

‏انت حتى الذهب يزهاه جيدك لحاله
‏ويتلاشى على غيرك ويفقد بريقه

.....

[الحمدان]

‏دام المساء يجمع على الود غاليين
‏يسعد مساء نبض المشاعر والاحساس

‏ويسعد مساء من يسكن القلب والعين
‏ويسعد مساء باقي المواليف والناس

.....

[الحمدان]

عزوم الرجال تبين فالموقف الغصاب
‏وعن نفعة الضابط يبا ايسدّك الجندي

‏يمال الغنى يامجمل الربع والاجناب
‏ابو خنجرٍ تفعل وابو جبهةٍ تندي

.....

[الحمدان]

‏لاتلوم اللي بعدكم غدت عشره ثمان
‏المحبه تسفه العاقل وتضحك عليه

‏هذا أنا لي أربع سنين أجي نفس المكان
‏يوم شفتك فيه صدفه وأحسبنك بتجيه

‏آه لو تدري عن اللي يحبك كان .. كان
‏ماتخليه يتضايق ولو عذرك وجيه

‏المكان اللي جمعنا وقف فيه الزمان
‏أنت جيته مرّه ورحت وأنا عشت فيه

.....

[الحمدان]

القلوب يريبها طول الجفا والليل دوبه
‏يتهادى عطره الحسّاس وأحظى بإهتمامه

‏كل وجهٍ قد طويت اوراق ماضيه بصعوبه
‏تحمل الانسام بالغ شوقه ووافر سلامه

‏وين ابهرب والثواني واقفه شبه مغصوبه
‏عدني ياليل شرهاتك واعديك الملامة

‏الضمير الحي ماتسكن من اللهفة حروبه
‏تربكه حتى نسانيس الهواء مدري علامه

‏من ترك لي صورةٍ فالبال ماهيب محجوبة
‏يتشجر في زوايا القلب وده واحترامه

‏يدري إني كل ماتاخذني الخطوات صوبه
‏مستعد أرضي غرور الغرة اللي فوق شامه

‏يارهيف الحس كيف أصد والصدة عقوبة
‏وانت يغري عودك بميلة ويغري بإستقامة

‏لاتسيل الدمعة العذبة واسيل من العذوبة
‏الدموع تكبّل العشاق وتزيدك وسامة

‏أهيفٍ لو تبتسم تسلب من الرجال ثوبه
‏ابتسم واقول لك لله در الابتسامه

‏من تخيّر دربك المهجور عن باقي دروبه
‏لاقيٍ بعيونك الثنتين مضياف وكرامه

‏لاتلومه لو تشوف الصمت ذنبٍ من ذنوبه
‏وش يقول اللي يشوف إحساسه اكبر من كلامه

‏واحدٍ مهما تضيق بعينه الارض الرحوبه
‏مايبين في عيون الناس ضعفه وانهزامه

.....

[الحمدان]

ألا يالله اني طالبك مع صباح الخير
‏أبا اليسر والتوفيق والفوز والجنه

‏أنا عبدك اللي مامعه بالامر تخيير
‏سوى خيرتك ياكامل الجود والمنه

.....

[الحمدان]

‏أسولف مع الأوهام لكن بليا صوت
‏ولو أمي بتدري عن طواريّ مانامت

‏أنا من كثر ماخفت مما يسمى موت
‏أصلي صلاة الشكر لاشفتها قامت

.....

[الحمدان]

اللي صنع ساهر بلا شك حرّيف
‏ساهر ضروري للأمن والسلامه

‏ياليت به ساهر لعوج السواليف
‏وتنزل على رقم المسولف غرامه

‏ونسلم من أهل الكذب والغش والزيف
‏ويحـسب على من هو تكلم كلامه

.....

[الحمدان]

ماهو ضروري كل الاذواق تعجبك
‏بس احترامك ذوق غيرك ضروري

‏انظر وميّز واختر اللي يناسبك
‏بالسوق ياباني وصيني وكوري

.....

[الحمدان]

ليتني لامن عرفت الطيّبين اجمعهم
‏لو على عود ازرق و فنجال خولانيّه

‏اربعه ودّي اشوف وجيهم واسمعهم
‏الكريم العارف المـنعور صافي النيّه

‏واربعه عيّت علاقتي لاتضبط معهم
‏الرّدي والنغل والبوّار والنفسيّه

.....

[الحمدان]

من منطلق كل ٍ تحكمه ظرووفه
‏ياللي جهلت الناس رايح على وين

‏ماكل رجالٍ يشابه وصووفه
‏كم واحد ٍ فعله يجمل وهو شين

‏مثل اللذي سواد عينه نشوفه
‏وإليا نشدنا الناس قالوا حمر عين

.....

[الحمدان]

‏عليك باللي يلحق القول بافعال
‏والا الردي خله وجنّب مساره

‏أنا اشهد انه ماكذب واحدٍ قال
‏من لايعدك ربح عده خساره

.....

[الحمدان]

‏على اني من اللي يعشق الصبر والإلحاح
‏لكن الليالي ماتبي صبر وفتوه

‏ياكم حاجةٍ صديت عنها عشان ارتاح
‏مهوب اي حاجة لازم تصير بالقوه

.....

[الحمدان]

‏تسيّرني مقاديري على القسوة
‏مع إني ماقسيت إلا على أحلامي

‏عسى مابيني وبين الفرح فجوة
‏عسى ماينتهي صبري وأنا ضامي

‏.....

[الحمدان]

لاتذل النفس دايم وترضى بالنزول
‏ولا يجي منّك رخامه وتحريض وريا

‏مستحيل تحصل العز وتنال القبول
‏وانت ماعندك كرامه ولا عندك حيا

.....

[الحمدان]

ترى الحكي صوب القلوب المصّده
‏مثل المطر فوق السحال المجفاه

‏ومن لايعدك في الزمن لاتعدّه
‏جعله ذلوف مقيط واللي تقفاه

.....

[الحمدان]

عساي ما اثقل على قلب مخلوق
‏ولا اسوي مايسبب عتابه

‏انا احب الذوق وادور الذوق
‏عند التعامل والحكي والكتابه

.....

[الحمدان]

‏كانك تعرف الأدب والذوق والذايقه
‏أعرف طريق السنع وأصحى وخلك ذكي

‏عليك بالطيّبه والكلمه اللايقه
‏العرف ماله مدى والفعل غير الحكي

.....

[الحمدان]

‏دام الزمن ياصاحبي يمشي سريع
وش لي بتفتيش الصدور الخافيه

يامنوتي محدٍ بهالدنيا يضيع
غير المبادي والقلوب الوافيه

.....

[الحمدان]

‏قال من شاف الحياة وعافها في ظرف ساعه
‏منحيٍ وجهه ذعاذيع الهوى والليل بادي

‏يدري إن الناس والأيام مافيها طماعه
‏شابعين من المجامل والتكبر والتمادي

‏من هداه الله وشاف النور ماملّ إتباعه
‏علم اللي راح عمره هايمٍ في كل وادي

.....

[الحمدان]

‏للصدور اقفال وابوابها مخرج هروب
‏توخذ بعين اعتبار المشاعر والعبر

‏ودي اعرضه صفق النسايم والهبوب
‏لين يبرا جرحي ولين كسري ينجبر

‏اعتذر لحلامي اللي ماتوصلها الدروب
‏واعتذر من كل حاجه تبي مني عذر

‏لمتى والحظ زاهد ومنظوره شحوب
‏لاهو بطيب مجاني ولا طايل شبر

‏اخذني من كل حاجه على الصدر الرحوب
‏ومد لي يمناك واضحك يابو وجه سفر

‏مابقى لي غيرك اليوم يالريم اللعوب
‏لا استزاد الوقت ضدي ترا عندك خبر

‏من كثر ما اخشى الموادع وتفريق القلوب
‏ودي ان صبر المهادي على صبري صبر

‏كل يوم اودع الشمس في وقت الغروب
‏احسب انها كل يوم تحول في قبر

.....

[الحمدان]

سلامي عليك ورحمة الله وكيف الحال
‏يابو ضحكةٍ ماهي مع الناس منتشره

‏معك راح عمري قو صمله وطولة بال
‏وعلى درب وصلك جبت عشره على عشره

‏لو انك معي مابين غيبه وبين وصال
‏تهاون غيابك لين ماهانت العشره

‏وحدود الكرامه ماتساوم وانا رجال
‏اليا اقفيت عنك وانت غافل فلا تشره

.....

[الحمدان]

انت وينك عن مساء الأشواق قلي
كيف عايش ياجميل الروح دوني

في غيابك ياحبيب الروح من لي
انت اجمل من سكن داخل عيوني

.....

[الحمدان]

‏لك الوفاء والشوق بالشعر مرسول
‏ولك الورود أشكال من كل نوعي

‏بيني وبينك بحر وجبال وسهول
‏وروحك قريبه في حنايا ضلوعي

.....

[الحمدان]

‏بعض الصدف لو تجمع الحي بالحي
‏مثل الحزن عمره مارد المصيبه

‏يؤسفني ان باقي من الواجد شوي
‏ويعرف كلٍ وش يخبي نصيبه

‏إن لم تعد هقواتنا مثل ماهي
‏عدنا كما كنا غريب وغريبة

.....

[الحمدان]

‏ضيقةً في خاطري عقدها حبله جويد
‏ماتفرج لين ياخذ بي الجيب انهوٓه

‏في سنع بدوٍ تناحوا بمضنوني بعيد
‏دونهم للجيب روحة ومسرى واضحوه

.....

[الحمدان]

‏لنا مشاريه وعلينا مشاريه
‏ولا كل رجالٍ عليه انتشره

‏نشره على الطيب لاغير مباديه
‏والا الردي شرهاتنا ماتمره

.....

[الحمدان]

‏الوقت يكشف لك الاصحاب بالمرّه
‏لو كان صبرك على الايام فولاذي

‏اللي ماهو معك في الحلوه وفي المرّه
‏لاعاد ترجيه في هاذيك وفي هاذي

.....

[الحمدان]

يالله بنور مثل وضاح الصباح
‏اللي يشق الليل الاظلم لاصعد

‏وحظ يبادر بالسعادة والنجاح
‏ويوم يبشر بالغنايم والسعد

.....

[الحمدان]

عن المجامل وكسب الناس ورضاها
‏رضا ضميري على نفسي مكفيني

‏العمر يسلب من الدنيا مزاياها
‏ورغباتي تقل كل مازادت سنيني

‏أشياء ياكثرها كنت اتمناها
‏والحين ماعاد تسوى شي في عيني

.....

[الحمدان]

‏يابرد الشتاء خل الحنين القديم يموت
‏امانه معك لاتبعث الشوق من قبره

‏انا من كثر ماني بمتضايق ومكبوت
‏لو يقول احد وش فيك غصتني العبره

‏اذا الناس تحتاج اكسجين وشراب وقوت
‏انا احتاج جبرة خاطرٍ مالقى جبره

.....

[الحمدان]

‏اقلطي يامرحبا والليل توه بادي
‏لايروح الليل دام انتي وانا من دونه

‏باللسان وبالعيون وبالمشاعر نادي
‏اسمع مناداك قبل الناس لايوحونه

‏من سمع صوتك ولا جاوبك هذا غادي
‏ودك الله يحرمه سمعه وضحك سنونه

‏هايمٍ في عينك وصوتك وضارب وادي
‏واديٍ من هام فيه الله يكون بعونه

.....

[الحمدان]

‏كنت أظن إنه شعور ٍ من زمان وعدّا
‏وأثر باقي له بقايا في حنايا صدري

‏والله إني مادريت إني حزين ٍ جدّا
‏لين قالوا وين راح وقلت والله مدرري

.....

[الحمدان]

‏الكلمة الطيبه بالقلب مرساها
‏تضفي عليه الفرح وتنوّر احساسه

‏كم كلمةٍ شيّدت بالنفس مبناها
‏وكم كلمةٍ هدته من ساسه لراسه

‏أحدٍ علومه على التجريح مبداها
‏واحدٍ كلام النقا والطيب نوماسه

.....

[الحمدان]

‏صباح الرضا وان كان ودك صباح الخير
‏اشوف الصباح بدون وجهك حكي فاضي
‏ㅤㅤ
‏انا والنسيم وطلة الشمس حتى الطير
‏من البارحه نرقب سنا وجهك الراضي

.....

[الحمدان]

‏على الهون يابرد شديد علينا اليوم
‏معالييق صدري كلبوها تجاريه

‏ترا ليلي البارح قضيته سهر وهموم
‏ولاني بقدك يالهبوب الشماليه

.....

[الحمدان]

‏يسعد مساء الحب في قلب الحبيب
ويسعد مساء الشوق في قلبي انا

اللي خياله في خفوقي مايغيب
عسى مساه خير وأيامه هنا

.....

[الحمدان]

عزالله إني دريت إنه الوداع الأخير
‏وإن هذا آخر عناق وهذا آخر لقا

‏حسيت في نبرتك وبنظرتك شي غير
‏فيها كلامٍ ورا حدب الضلوع إتقا

‏من أول إن جيت شفت بنظرتك كل خير
‏واليوم والله ماشفت بعينك ألا الشقا

‏الظاهر إنك مشاور نفسك ومستخير
‏جايً تبي تقول ماعقب الفراق إلتقا

‏عزمت تبعد وتتركني لبئس المصير
‏من بعد ذيك المحبة والغلا وش بقا

‏بتروح رح لكن الرجعة ترا ماتصير
‏لايُمكن العاشقين يعوّدون أصدقا

‏ليتك وضعت إعتبار لما مضى يالعشير
‏على الأقل كان فاسلوب الفراق أرتقا

‏ليتك يوم إنك نويت إن ذا الوداع الأخير
‏علّمتني إن هذا هو آخر عناق ولقا

.....

[الحمدان]

خصرها معزول من حد الترايب
لو تعرض للهوى يمكن كسرها

هايفة خصر وحشا فيها العجايب
مابقى الا بطنها يلمس ظهرها

.....

[الحمدان]

ياللي تبي مني نصيحه وبرهان
‏اخذ نصيحه للزمن وانتهجها

‏خل البشر في شانها وانت في شان
‏الناس ماتقدر تعدل عوجها

.....

[الحمدان]

يدور الزمان ويثبتون الكبار كبار
‏على مرجله وفعول وسلوم ومروهم

‏فلا كل من ناداك يستاهل المشوار
‏ولا كل من خاواك يستاهل الخوه

.....

[الحمدان]

‏قدر الرجل من طيبة النفس تنقاس
‏مايقاس في ماله وكثرة طعامه

‏إن جيت له يخجلك من طيب الأنفاس
‏ومن قولة أرحب لين مع السلامة

‏فلة إحجاجه كنها ضو نبراس
‏وعليه من وسم المراجل علامة

.....

[الحمدان]

‏يالله بشيكٍ من كثر مابه أصفار
‏لاجيت ابستلمه تنافض يديني

‏قبل يجيني عنه تنقل لي أخبار
‏وعييت اصدق لين اشوفه بعيني

.....

[الحمدان]

أحاسب الدنيا وهي مالها ذنب
‏غفلْت وذنوبي عليّ مْحسوبه

‏يارب خلّيت الأماني على جنب
‏ماعاد أبي غير العفو والمثوبه

.....

[الحمدان]

‏نسيناك يوم اقفيت وابطيت بالجيه
‏وحتى مشاعرنا القديمه نسيناها

‏مثل ضو بدوٍ هملوها وهي حيه
‏وقام الهواء يلعب بها لين طفاها

.....

[الحمدان]

‏ندري ان اللي حصل مكتوب والمكتوب جاري
‏من ظروف الوقت مامعنا ولا معكم حصانه

‏كل مايجري على الأقدام يجري له جواري
‏ماسلم حتى الفطين اللي معه عرف وذهانه

‏من ضحك لابد له من ساعه يهل العباري
‏ومن بكى لابد له من ساعةٍ تضحك ثمانه

.....

[الحمدان]

واليُوم بنسى مثل ما الناس ينسُون
والنار في قلبي مع الوقت تطفي

بعلمك وشلون الاححرار يقفُون
واعلمك وشلون الاشواق تقفي

.....

[الحمدان]

ابيك حب مامتلك قلب انسان
‏وابيك قلب مانبض غير فيني

‏وابيك شعر غامض دون عنوان
‏محدٍ قراه الا رموشي وعيني

‏ ابيك دنيا اعيشها طول الازمان
‏ وابيك شوق كثر مابيه يبيني
‏
‏وابيك حب ماشعر فيه انسان
‏وابيك عشق بين قلبي وعيني

.....

[الحمدان]

‏مارقدنا ليلة البارح سهارا
‏والزمن كنّه على الفرقا متعمّد

‏لو لبسنا ياحبيبي كوت ZARA
‏حضنك الدافي غرام إللي تجمّد

.....

[الحمدان]

اقبل الليل والليلة سناء البدر ضاوي
‏طيب ياخاطري وأقطف ثواني سهرها

‏كيف أوصفّكْ ياوجهٍ بحسنه سماوي
‏وأنت حسنك ملى سمع الحياة وبصرها

‏جادلٍ يوم جات الريح في ثوب غاوي
‏كل ماجت تعرّيها سترها شعرها

‏ضاع عقل الرزين وتاه طرف الحياوي
‏بين لولو قلادتها ولولو ثغرها

.....

[الحمدان]

‏فالمحبّة مايفيدك لاميول ولا استقامه
‏كان ماشدّك غلا ماهيب جاذبتك حميّا

‏ياتباشير الغلا والشوق ماحولي ملامه
‏كل يوم ارقب مجيّك من هناك ومن هنيّا

‏انت من نسل البشر ولا القمر ولا الغمامه
‏ولا من نسل الورود اليانعه ولا من ايّا

‏فيك عنق وفيك خصر وفيك جيد وفيك شامه
‏وفي من عين الوحَش لفته وفيك مْن العبيّا

‏لو ما اشوفك من خيار اهل البلد قدر ووسامه
‏كان ماكنت في كنف حبّك من الحزن اتفيّا

‏والله ان اقسى ليال العمر واكثرها ندامه
‏يوم ارتب لي معك فرصة وصال ولا تهيّا

‏ينتهي عقد الشغف وتموت كلمة وابتسامه
‏كان مالي من وجودك حظ ياسمح المحيّا

.....

[الحمدان]

مايكلفك ربي فوق ماتستطيعه
‏سج ياقلب عن ضيق الحياة وحزنها

‏وما تزحزح جبال وما تغير طبيعه
‏ومرجلة راسي اللّي ماتنازلت عنها

‏ولو تشح الدروب ولو تضيق الوسيعة
‏أضحك مْن السنين اللّي تخافون منها

.....

[الحمدان]

حظ من يحظى بتقدير ورعايه
‏يصبح ويمسى لاحاضر ولا ماضي

‏إن عجزتو حدثوني ولو بآيه
‏يوجع الرجال صبرٍ على الفاضي

‏العرب تزعل وآثر للزعل غايه
‏من وصل غايته عوّد علي راضي

.....

[الحمدان]

‏الصاحب اللي ينصحك لاتعاديه
‏وباب الوفاء من صاحبك لاتسده

‏الطيـّب اللي ماتغير مباديه
‏هو راس مالك بالزمن لاتهده

‏احرص على خوته ولا تجافيه
‏ودايم على كل الاصاحيب بده

.....

[الحمدان]

كذّبت قول الحي بيواجه الحي
‏وصدقت فعل الدعوه المستجابه

‏ماجابته سود الليالي ولا شي
‏أنا دعيت الله يجيبه وجابه

.....

[الحمدان]

سلامات يارقم حذفتك من الجوال
لاتشره عليّ وصاحبك طاح من عيني

رميتك بعد زال اهتمامي وقدرك زال
ومن زال قدره راح ماعاد يعنيني

.....

[الحمدان]

‏مع صورتك ياما سريت وسريتك
‏لك وجه عدّى بي حدود المجرّه

‏ويوم إلتقت عيني بعينك لقيتك
‏أحلى من الصورة بمليون مرّه

.....

[الحمدان]

اضحك وخل النرفزه والعن ابليس
‏حسن المقابل من صميم العباده

‏قبلك تلاشا ملك كسرى وبلقيس
‏وقبلك عوى ذيب السرا فألحماده

‏لو السعاده تنشري بالقراطيس
‏فازو بها قبلك مشايخ وساده

‏العمر رحله والمراجل مقاييس
‏واجمل مقاييس الحياه السعاده

.....

[الحمدان]

‏انا منحرج من راعي ابشر وراعي تم
‏وضايق من الديان لامن طرى ديني

‏عسى الله يرزقني رصيد ولا ادري كم
‏يخلي مدير البنك ياقف يقهويني

.....

[الحمدان]

بعض العرب عند العرب مايستساغ
‏والا بعضهم ربي اللي قابله

‏شخص ماجيه الا على وقت الفراغ
‏وشخص آتفرغ له عشان آقابله

.....

[الحمدان]

‏ناطحيني ياذعاذيع الهبايب
‏كود صدري لا أونس النود يتبرد

‏يوم ناظرت الحياة بعين شايب
‏اكتشفت أنها ماتسوى البدع والرد

‏مستريح اللي عن الشرهات تايب
‏تاركٍ كثر المعاتب للمقرّد

‏المجافي جعل ماقدمه صعايب
‏والمواصل حبل وجدانه مورد

.....

[الحمدان]

ويمر طاريك ويهب الهوى من شمال
‏ويعكر الصفو قلبٍ يطلب إعانته

‏ماغيرت منزلة حبك صدوف الليال
‏جوارحي لو يطول البعد ماخانته

‏ما أحبّك إلين تاخذك السنين الطوال
‏أحبّك إلين ربي ياخذ آمانته

.....

[الحمدان]

‏تذكّر ترى الذكرى مثل ردة المعروف
‏لاهب البراد وجمرة الشوق وهاجه

‏مجيك على ايّة حال ماهو مجي ضيوف
‏مجي العزيز الي يبي عرشه وتاجه

‏تجي لأي حاجه شوق ضيقه غرام ظروف
‏أنا لأي حاجه تاخذك لي في حاجه

.....

[الحمدان]

‏انت الشعور الصادق وغيرك سراب
‏وانت المقرّ الثابت وغيرك ممر

‏غلاك بضلوعي تربّع ليين ذاب
‏يفوح مثل العود من فوق الجمر

‏يا أغلى البشر وجهك علاج الإكتئاب
‏ومواصلك مثل السحاب المنّهمر

‏حتى ولو قلبي شَعر بالإغتراب
‏انت الوطن واجمل ملذّات العمر

.....

[الحمدان]

‏أحبّه ولو إن الزّعل بيننا له باب
‏يسكِّر مزاليجه ليا من ضحك سنهّ
‏
‏وأحبّه وأنا راضي وأحبّه عليه عتاب
‏كثر مايحب المؤمن الزَّاهد الجنهّ
‏
‏ولا يحيي فؤادي ليا من محلّه غاب
‏سوى مواصلٍ يسقى يباسه ليا حنّه
‏
‏جعلني هواه ليا تنهّت وهو مرتاب
‏أضيع بفؤاده كل تنفاسه وكنّه

.....

[الحمدان]

‏الصيف ودّع شمسه وعوّد البرد
‏وعادت صباحات المطر والنسايم

‏قم ياصباح الغيم والعشب والورد
‏شف وش كثر نشتاق لك وانت نايم

.....

[الحمدان]

كل علـى قده همومه تضده
‏وكل بعظم ارياه تعظم دعاويه

‏وكل بزود غناه يزداد وده
‏وكل بعد خطاه تبعد هقاويه

‏إن كان ماتصبر على كل شده
‏لامرقب ٍ ترقاه ولا قصر تبنيه

‏من لايودك صادقٍ لاتوده
‏ومن لايداري خاطرك لاتداريه

‏القلب يجفل من وجيهٍ مصده
‏أنا أشهد إن القلب دليل لراعيه

‏وما فات من دنياك صعب مرده
‏خذ لك من الماضي عباره وتوجيه

.....

[الحمدان]

الطيب خصله فيه مجموعة خصال
‏ماينحصر بين الرخامه والظفر

‏مير الردي مثل الصفر على الشمال
‏لو تضربه فأكبر عدد يبقى صفر

.....

[الحمدان]

‏اسم مع اهل المرجله ماهو سريع الاحتراق
‏يوم الاسامي بعضها بالانقراض مهدده

‏يكرم عن الهفوات والزلات والهرج الدقاق
‏لاهان راس تعب الاجيال قبله وبعده

‏يسعى لفعل الخير والمعروف والحق الحقاق
‏من يحتزم في المحزم المليان يبشر بسعده

.....

[الحمدان]

‏يالمعنق لو تماديت لاتاخذ قرار
‏رحلة استجمام موتي واقعة في حينها

‏شاعرك غاوي بشعره ويكره الانكسار
‏وده إنْه يهيم في واديك وتغنينها

‏بين نفله وأقحاونه وربله والعشار
‏راودت نفسه لنفسه أسئلة تضمينها

‏لو تمادت رشة العطر وش ذنب الزرار
‏مايفرّق بين ريح الزهور وبينها

.....

[الحمدان]

‏إقتنعت إن الليالي متاحف ذكريات
‏يوم تبطي سجّة البال بين أسوارها

‏اللي ظاهرها سعادة و باطنها شتات
‏وحشةٍ ما ملّت النفس من تكرارها

‏ما لفقدك غير نعمه وحيدة فالحياة
‏باحت الدنيا بعدك بجميع أسرارها

‏العيون تداري الدمع من كل الجهات
‏مثل الأم اللي تداري شعور صغارها

.....

[الحمدان]

‏يامبعد عن شوف عيني مسافات
لاتحسب انه يخلف البعد ظني

حبك بقلبي شامخ ما بعد مات
وما هزته بعد المسافات عني

لو نبتعد روحي وروحك قريبات
حب جمعهن غصب عنك وعني

.....

[الحمدان]

احنا طبايعنا في السلم عقال
لكن ترونا في الوازم مجانين

رجال مافينا سوى كل رجال
يسوى من العربان وحده ثمانين

بالعز قهويني من الموت فنجال
عليه ربوني نشامى ميامين

.....

[الحمدان]

اجبر بخاطر من تعزه وتغليه
واهده شعور الجبر من طيب خاطر

واعط الغلا من يستحق منك تعطيه
لين الغلا يضهر بفيض المشاعر

واوفي بوعدك من عطا وعد يوفيه
لاتوعد الا وانت ع الوعد قادر

ومن عطيته بالوفا عهد يرضيه
اوفي معه بالعهد غايب وحاظر

والصادق الي بالمشاعر تجاريه
اقوى وابلغ من مجاراة شاعر

.....

[الحمدان]

‏ياما صبرنا على اللي شينه طباعه
فضلا عن اللي طباعه نفتخر فيها

وياما حملنا زمان الجور واوجاعه
ولا شكينا ولو جارت علاويها

والليل لو طال عاد الصبح مطلاعه
يشرق ويبدي لك القصة وما فيها

.....

[الحمدان]

ياخي وينك من زمان اسأل عليك
قل لنا هو شي لذ الغيبة طرف

حتى لو في آخر الدنيا أجيك
وانت عارف كلمتي كلمة شرف

اسالك بالله واتوسل اليك
لاتخليني عليك اعلن نكف

كل يوم يمر وانا احتريك
اتحرى الموت واشعر بالتلف

كلما حولي يسلم لي عليك
وانت سلم لو تسجلها هدف

لو تسويها اجيك اركض اليك
الا لو قلبي من الفرحة وقف



من ديوان سحايب شوق
عن الدار المصرية السعودية

[الحمدان]

يابو نوايا طيبه وين اوديك
ماعاد حد من طيبين النوايا

آثارهم من كل زوه تناديك
والوقت ضيق من جميع الزوايا

صحوة ضميرك واحترامك مباديك
ما تختلف حسب اختلاف الروايا

حاولت اهديهم وحاولت اهديك
واطماع بقعا اللي تسوي سوايا

أسود تتمرق على بيضة الديك
وكلب يتعشى الغنم فالحوايا

صالح الأحمدي

[الحمدان]

ناس يخجلني وفاهم حل في قلبي غلاهم
مالك الملك اصطفاهم للمقامات الرفيعه

وناس ربي لاسقاهم زودوا قلة حياهم
لا اسلمونا من اذاهم لا ولا اعطونا ذريعه

في تعاملنا معاهم لن نصل لمستواهم
بل نقول الله هداهم يغلقوا باب القطيعه

خيرة الناس اتقياهم والنبي حامل لواهم
يحشروا بعد انبياهم والسعيد احمد شفيعه

.....

[الحمدان]

حبيبي ترا شاعرك ما يسمع الحكاي
يسمّعك بيته قبل يسمع جماهيره

يكفّيه رايك ما يبي غير رايك راي
يا ملفى القصيد العذب وابلغ تعابيره

الالهام ينبع من غيا حسنك الغواي
ويزدان في محيّاك بدعه وتصويره

.....

[الحمدان]

الا ياحمام فوق الاغصان جرّ النوح
ترفق علي اشوي لاتبحث الخافي

تهيضني بنوحك وانا ماعرفت ابوح
على صاحبً طاريه وسط الحشى غافي

.....

[الحمدان]

ليت الخيال اللّي يوقّف بي على برّ الأمان
ماهوب يوعدني ورا الهقوه ويقصر دونها

وقفت ادور للّي اسقتني من انهار الحنان
ماشفت غير الظلمه اللي مثل كحل عيونها

.....

[الحمدان]

اصيب واخطي واعتذر كل ما اخطيت
وان جيت تقدير وغلا جيت كلي

لكن متى ماشفت ماعفت صديت
صدة جفى ماهيب صدة تغلي

.....

[الحمدان]

ماقد شغفني هـوى وشعور قلبي وليد
تحت عيوني تمر العالم بدون أسم

إلا أنت واسمك مربع في عيون القصيد
كنك على راحة أحساسي تؤدي القسم

.....

[الحمدان]

لبيه لبيه ياصوتٍ يناديني
لبيه من بدة اقاصين والداني

لبيه لبيه من قلبي ملاييني
لبيه لبيه ثم لبيه بلساني

ماهوب لبيه ياصوت المزاييني
لبيه ياصوت ابوي يوم ناداني

كفي لك فراش ولحافك هدب عيني
مادمت انا حي تامرني وتنهاني

.....

[الحمدان]

‏لك وحشة تلفني شوق وعتاب
وإن جيت تسكني حنان وطرابه

علمتني إن الوفا طبع الاحباب
ورسمت عمري وردتين وسحابة

خذني لوجودك ضمني بين الاهداب
عمري بدونك ما اتحمل عذابه

......

[الحمدان]

المحبة من الله والغلا والقبول
‏لاتكلّف شعورك فوق مايُحتمل

‏لاصفالك زمانك قول اللي تقول
‏ولا تكدر مزاجك حاصره بالامل

.....

[الحمدان]

‏عينك بعيني يابعد خافقي قل
‏ياللّي هوى العشّاق منّك تعلّم

‏كان إلتزمت الصمت والله ما أمّل
‏مثل القمر نهواه لو ماتكلّم

.....

[الحمدان]

ياللي شريت البعد ماغاب طاريك
حتى لو أن البعد سوى سواته

كن الطيوف تقول وش حال غاليك
وأقول راح ومابقى إلا غلاته

.....

[الحمدان]

‏لبيه يامن عطاني صادق احساسه
‏واسقاني البن الاشقر من معاميله

‏اي والله اعشق لماه وطيب انفاسه
‏واعشق مشاريب كيفي من فناجيله

.....

[الحمدان]

‏مابيننا غير شاشه في تعاملنا
مع بعض لكن نفرض بيننا الاحترام

من طاب طبنا معه وان مال ماملنا
نبقى على الطيب والهقوه ونهج الكرام

.....

[الحمدان]

‏بعض الجروح تطيب لو هي اليمه
والبعض الاخر طال همه مع دواه

والحب له بين المخاليق قيمه
وقليل من يعرف حقوقه ومعناه

.....

[الحمدان]

‏لاطاحت دموع عينك واغرقت خدك
لاتحتري الناس ترحمها وتمسحها

ماكل من يسألك يغليك ويودك
اكثرهم يجيك يسأل ويش طيحها

.....

[الحمدان]

يابو العيون الناعسه فكنا منك
‏حنا بنضرات العيون ابتلينا

‏الله يعمي عين راع الحسد عنك
‏ويكفيك من شر الحسد ويهدينا

.....

[الحمدان]

يطوي خفوقي حنينه كل ما اشتقنا
‏وروحي على ماضيات أيامنا شفقه

‏رافقت طيفك سنين ولا تفارقنا
‏ليتك تجي مثل طيفك صاين الرفقه

.....

[الحمدان]

صدورنا ماهيب دايم رحيبه
‏ياللي زعلت من الكلام الصحيح ارض

‏نصمت عن اللي فيه شكه وريبه
‏خبلٍ آليا سمع السوالف دخل عرض

‏سوالفه مابين نمه وغيبه
‏اما شذب عرقوب ولا هتك عرض

‏ونمسح خطا الطيب على شان طيبه
‏وإلا الردي لا اخطا مسحنا به الأرض

.....

[الحمدان]

لاحضورك علاج ولا غيابك مرض
‏عيش عمرك لنفسك وأترك الآخرين

‏لاتحبّ الحياه أكثر من المفترض
‏ولا تخاف الفراق وكلّنا راحلين

.....

[الحمدان]

من ضيقة الخاطر ومن ضيقة الكون
‏ريح المواجع في فضا الصدر عاتي

‏علقت هقواتي على يمكن ويكون
‏وخابت وقمت اسعى لتطوير ذاتي

‏حاولت والاحوال من دون في دون
‏ولا استفدت من كثر محاولاتي

.....

[الحمدان]

الهرج واجد والنوايا مطايا
وكل حسب تفكيره يعامل الناس

ناس مظاهرها بعكس الخفايا
وناس على وضح النقاء ترفع الراس

.....

[الحمدان]

يوم العواذل فيك لاموني
‏اقفّل اذني واغمض عيوني

‏اجيك كلّي واسري بدوني
‏وانام بعيونك وانا سالي

‏خالفت سلم اهلي وجدّاني
‏اللي على شانك على شاني

‏قطعت حبل الناس من داني
‏يم الصحاري واشهب اللالي

.....

[الحمدان]

‏يشبهني الليل في ثقلي وفي صمتي
وأشبه صباح الربيع بزحمة ألوانه

يامن سألني علامك مابعد نمت
النوم فيني غريب وفاقد أوطانه

.....

[الحمدان]

سراب الأعذار مايقطع ضمّا الوارد
‏في عينه الأرض جردا والسماء زرقا

‏ردودك الباردة وأسلوبك البارد
‏كنّها تورني المنـهاج والفرقا

‏وأعذارك الواهـيْه من ذهنك الشارد
‏أغصان هجر"ن" عليها ناحت الورقا

‏من دون طيحة غلاك حروب ومطارد
‏والعين ماطاح منها مستحيل يرقا

.....

[الحمدان]

حذرى من الجوال يابنت الاجواد
كم بنت راحت والسبايب رساله

كانت تظن الحب له ساس وبلاد
ماتدري انه مثل شرب البياله

اذا شربها اللاش ماهو بنشاد
عن الغريق الي تقطع احباله

بنت تهين النفس للهون تنقاد
لو هي من بيوت الشرف والأصاله

عقب المعزه تمسي بهم وأنكاد
هذي نهاية الهوى والجهاله

.....

[الحمدان]

الظروف الي كوتني على الضلع القصير
علمتني كيف اعدل الحمول المايله

كان ظني في الليالي وفي حظي كبير
لين ورتني الليالي نجوم القايله

من يظن الخير في واحدن مافيه خير
مثل من يرجي دوام الحياة الزايله

.....

[الحمدان]

ياشين طبعٍ عند بعض المخاليق
يظن فيك السوء قبل الحقيقة

على كلام الناس سريع تصديق
وينسى العلوم الطيّبة في دقيقة

.....

[الحمدان]

اغضيت يوم اقفيت ياناعس الطرف
اربع سنين ولا قدرت اتناساك

لاوالذي سواك يالمرهف الترف
لاعيش احبك واتلذذ بطرياك

هاويك ياللي زارفً خافقي زرف
حتى عيوني لو تغمض تحلاك

نسيت كيف انساك والحال في جرف
روحت يامضنون قلبً تمناك

وانا بحط رسالتي داخل الظرف
باسمك تسجل بالنهاية ومبداك

فديت زولك يالغضي ملهم الحرف
ياللي ترافقني بطيفك وذكراك

.....

[الحمدان]

عليك السلام ورحمة الله والرضوان
ياقلب تعب واخفى عن العالم اوجاعه

.....

[الحمدان]

قصر بال وشح وصل وقل دبره
والسؤال اجاوبه بادري ومدري

والله اني حاسدٍ مثقاب الابره
يومه اوسع للهواء من ضيق صدري

.....

[الحمدان]

عسانا نموت ولا نشوف المذله شوف
ولا نشكي الحاجه ولا نسمع المنّه

ومن يسوي المعروف ويمّن بالمعروف
مثل من يكب الفرض ويسوي السنه

.....

[الحمدان]

مالك من ايامك الا صالح اعمالك
والا انت جثّه واعز الناس يدفنها

.....

[الحمدان]

العزلة وتسطيح كلّ العلاقات
اخر حلول النفس وإن كان طابت

ماعاد يغرينا الهوى والصداقات
كلّ الأماني فالمحبّين خابت

.....

[الحمدان]

ناري ماتطفى ولا نارك طفت
وعِيني گبلك تبچي إذا عينك بچت

شعر عراقي

[الحمدان]

نخسر بشر بس مانخسر مبادينا
ودروبنا صوب فعل الطيب مندفعه

مانلتفت للكلام اللي يجي فينا
نفوسنا عن كلام الناس مرتفعه

......

[الحمدان]

مادخلت الحب من باب التسلي
‏والله أن يبطي أحد ياخذ مكانك
‏
‏لاتهملني وتنساني وأنا اللي
‏مهمل الدنيا بما فيها عشانك

.....

[الحمدان]

اصبر على المكتوب لو فيه مافيه
لو ضاقت الدنيا على الله فرجها

واللي كتب ربك على العبد ياتيه
مايمنعه حل العباد وحيلها

جرح المصيبة صبرك اللي يداويه
وربك يهونها على من صبرها

والمؤمن اللي يحتسب له ينسيه
كم كسرة رب الخلايق جبرها

احدٍ صبر واحدٍ تهزه بلاويه
والله يجازي كل نفس بعملها

.....

[الحمدان]

زحمة شعور ولخبطة بال وظنون
تاكل من الضيقه يدين الكفايه

كم للأمل في رمل الاحزان مدفون
وسيلتي فـكري والأوجاع غايه

.....

[الحمدان]

‏تعال نتكلم دقايق على الخاص
ابغى معاك انسى التعب والكئابه

حديثك مهدي من بروفين الاقراص
وعلاج قلبي الدردشه والكتابه

اشتقت لك شوق المقيد بالاقفاص
شوق السجين اللي تمنى هرابه

وونات قلبي مثل شكمان الارباص
من كثر شوقه لاتزود عذابه

.....

[الحمدان]

‏ياقلب لاتنجرح وفر لي احساسك
‏انا ادري انك تجي دايم على النيه
‏
‏لاتفكر تحب شيل الحب من راسك
‏كل العلاقات هاليومين وهميه

.....

[الحمدان]

‏أبشرك سكرت من دونك الباب
ولا عاد يشملك السكن والضيافه

اسلم وسلملي على كل من غاب
الخاطر اليا عاف له شي عافه

.....

[الحمدان]

‏بالأمس معطيني عهود ومواثيق
يقسم بربه مايخون الأمانه

واليوم فارقني وعلمني الضيق
إن الثقه في الحب مثل الخيانه

.....

[الحمدان]

‏الزمن مشكور كثّف لي دروسه
وانت من ضمن الدروس وْلا جهلته

حُبك اللي قد جرح قلبي بموسه
عن سبب جرحه بَموت ولا سألته

ماهقيت الحب تتعبني طقوسه
لين جربته وعفته واعتزلته

.....

[الحمدان]

تاريخنا هجري على روس الاشهاد
واعيادنا عيد الفطر والضحية

ماعندنا في شرعنا يوم ميلاد
على كتاب الله وسنّة نبيّه

عيد الكرسمس للنصارى يا الاجواد
ماهو لنا يا اهل الشرف والحمية

بقلمي

[الحمدان]

بعض الغلا يعرف مفاهيم الاشواق
من نظرة عيونك يترجم كلامك

الحب ماهو كله اعتاب وفراق
الحب يازين لذته في غرامك

.....

[الحمدان]

ماني من اللي يطرد انسان ناسيه
ولاني من اللي لاجفيته تجيبه

انا من الي لاحشمته وتغليه
يرخص لك الغالي وتصبح حبيبه

انا عزيز النفس ياهيه ياهيه
ضاري على الفرقا ولاهي غريبه

من باعني بعته ولاني بشاريه
وترى المحبه ماتجي بالغصبيه

.....

[الحمدان]

‏وش بقى في الشعر شيٍ ماكتبته
ووش بقى بالشوق أكثر من أبيك

ووش بقى بالحسن زودٍ ماوصفته
واحلف إنّه مايليق إلاّ عليك

.....

[الحمدان]

لاتشتكي همّ الصدر للمخاليق
السرّ يفسد لاخرج عن نطاقه

لاضاق صدرك أطلب الرب توفيق
وأصبر على ماقدّر الله وساقه

.....

[الحمدان]

‏ﺗﺎﺑﻊ ﻭﺃﻧﺎ ﻟﺠﻠﻚ ﺑﻨﺸﺮ ﺑﺎﻻﺷﻮﺍﻕ
ﻭﺃﺳﻤﻊ ﻣﻊ ﺍﻟﻤﻨﺸﻮﺭ ﻗﻠﺐٍ ﻳﻨﺎﺩﻳﻚ

ﺗﻘﻮﻝ ﻟﻲ ﻭﺷﻔﻴﻪ ﻭﺃﻗﻮﻝ ﻣﺸﺘﺎﻕ
ﻭﺃﻥ ﻗﻠﺖ ﻟﻴﻪ ﺃﻗﻮﻝ ﻭﺩﻩ ﻳﺤﺎﻛﻴﻚ


.....

[الحمدان]

لاصرت مشتاق لك لاتطول القصه
مشاعر الشوق فيني مالها مرجع

تغانم الشوق دام الشوق له فرصه
الشوق مثل العمر لاراح مايرجع

.....

[الحمدان]

‏لبيه ياصوتٍ سمعته وفزيت
‏فزت غريب سامع صوت غاليه

‏من كثر حبي له على طول رديت
‏قال السلام وقلت مرحب ولبيه

.....

[الحمدان]

‏ياجماعه كان لي حقٍ عليكم
‏أدعوا أنّ اللي على البال يتحقّق

‏ضايقٍ صدري وأنا منكم وفيكم
‏كن قلبي بين الأضلاع يتشقق

.....

[الحمدان]

‏يهبّ فيني حنين بكل هبّة نسيم
والذكريات القديمه طارفٍ بابها

غشاني الشّوق ياوجهٍ فبالي مقيم
اشتقت لك والمشاعر حثّت ركابها

.....

[الحمدان]

في دفتر أيام عمري كل شي محسوب
‏لـي قصةٍ لا أختليت بنفسي اقرأ بها

‏مؤمن وهذي هي الدنيا نجاح ورسوب
‏القسمه اللي من الله لازم أرضى بها

.....

[الحمدان]

‏صحيح الخطأ وارد لكن الأسف مطلوب
‏ماهو عيب لازليت ثم جيت متأسف

‏لكن لاتحاول تلبس الثوب بالمقلوب
‏تزيد الخطأ بعناد وتصير متحسف

شافي الهاجري

[الحمدان]

‏ياصاحبي مادام للحب موضوع
احفظ وبكره حصة الدرس تسميع

انا غلاي اصلي من الحب مصنوع
ماهو من اسواق المحبين تجميع

.....

[الحمدان]

‏علمي به العام يومٍ جوّنا صافي
قبل يجي جونا ناسٍ يحوسونه

‏يا اهل السواليف مدري عن سوالفكم
فيني من الضيق شيٍ ماتحسّونه

.....

[الحمدان]

‏ياوردةٍ ماعاشت الا في دلال
‏يغار منها الورد في روضة خريم

‏خليتي الترفات ربات الجمال
‏حياتهن حسره وعيشتهن جحيم

‏هذا الصحيح ولا نقاش ولا جدال
‏ يدري به العاقل ويجهله الغشيم

‏ابوك شال الطيب عن كل الرجال
‏وانتي خذيتي الحسن عن كل الحريم

.....

[الحمدان]

مافيه داعي للزعل والانفعال
‏ومجادل الجاهل وكثر اللجلجه

‏خلك على ماقيل شيال الثقال
‏واللي يبي يزعجك صمتك يزعجه

.....

[الحمدان]

سلام الله لمن يقرأ سلامي
ويسلم من يبادلني سلامه

سلامي يرتوي به كل ضامي
وفي الوجدان تبقى له علامه

ويشفي من بقلبه جرح دامي
ويزرع في الوجوه الابتسامه

مني لكم مع التحية

[الحمدان]

انتي بوجهي من الدنيا لايلحقك خوف
‏مصيرها تضحك الدنيا لنا لو تضيق
‏
‏مادامني حي حطيني بوجه الظروف
‏انا الابو والاخو وانا الولد والصديق

.....

[الحمدان]

كانت افكاري تحب احلامي الورديه
‏وتالي اكثر لون افكر فيه لون الشاهي

‏كل شي ابيه واجد صرت ابيه شويّه
‏النزول بسقف رغباتي جعلني راهي

.....

[الحمدان]

جيت مثل السحابة يا اللطيف الجميل
في شفاهك بروق وفي كلامك رعد

بين قدّ ٍ ليان وبين طرف ٍ كحيل
مالوجهك مسمّى غير وجه السعد

.....

[الحمدان]

على كل ماقد فات جعل العوض بعدين
‏يسوق الله الغيث اللي يعدل أوضاعي

‏هذي عادة الأيام وأنا أعرفها زين
‏ماتحلا لي إلا عقب ماتغسل شراعي

.....

[الحمدان]

أحب الرفيق اللي تجي رفقته بإنصاح
‏اللي عن غلاي وزود قدري يصارحني

‏نصوح صريح محزم ينذخر وسلاح
‏الى طبت يفرح لي والا اخطيت ينصحني

.....

[الحمدان]

‏يامعاتب الناس لاتعتب ولا تشره
موارد الطيب بين الناس معروفه

والي تجاهل حقوق وواجب العشره
اجعل حقوقه من التفكير محذوفه

.....

[الحمدان]

جاب طاري الوداع وقلت مالك لوا
كل شيٍ نطيعك فيه غير الوداع

كافر الشوق والفرقا لعينه ثوا
شف لنا حل غير البهذله والضياع

.....

[الحمدان]

بعض المشاعر محال الفكر يعسفها
تعجز تعابير حرفي تكتب احساسي

حقيقة الحب كيف الشعر يوصفها
مدام حبه بقلبي وداخل انفاسي

.....

[الحمدان]

‏عن مناكيف الهمُوم ومراويح الصَبر
‏كل يوم اودّع الهم واجلس واحتريه

‏اثر لي نفسٍ جموحه ولي صدرٍ ضجر
‏وجد حالي وجد من صكت الدنيا عليه

‏اتوزع بين الافكار ويجفّ الحبر
‏صرت مثل المال لامن تولاه السفِيه

‏لاعرفت ارضَى بواقع ولا ازعل من قدر
‏مشكله لاصدت النفس عن ماتشتِهيه

.....

[الحمدان]

ابتدينا رفاقه وانتهينا خصام
‏وانا من طاح من عيني معاد ارتجيه

‏انا حتى الحبيب الي عليه الغرام
‏شاف نفسه علي وشفت نفسي عليه

.....

[الحمدان]

‏من لايعيش العمر سامي ومتغاضي
‏ماهيب دايم ظروف الوقت خادمته
‏
كنز القناعه غناة النفس للراضي
‏يعيش دنياه فاهمها وفاهمته

.....

[الحمدان]

الجمس أحبّه حبّ غالٍ لغاليه
‏حبٍّ عظيمٍ حبّ نمرٍ لوضحاه

‏هو ميتن فيّ وانا ميتن فيه
‏ولو هو جديد أحب شوفه وطرياه

‏لاقمت المّس فوق بديه واداريه
‏بلا شعورٍ قمت ادوّر شفاياه

.....

[الحمدان]

من يحسن الظن بالله يبشر بظنه
سبحان رب فتح لعباده ابوابه

يارب يسر لنا التوفيق والجنه
وتجيرنا من عذاب القبر وأسبابه

.....

[الحمدان]

ياوجهي أسلم من تقلّاب الوجيه
‏ومن الشكوك ثقالها وخفافها

‏حنا من الشيمة نعَاف اللي نبيه
‏تعيش أسامينا على مشرافها

.....

[الحمدان]

‏مني مساء الخير والفل والورد
‏والحب والبسمه ونبض التفاؤل
‏
أدري بأن الجو مايل إلى البرد
‏بس المشاعر دافيه بالتواصل

.....

[الحمدان]

على الهون ياسود الليالي تراني ماش
‏ونفسي من ظروف الزمن باح خافيها

‏عيوني على حظي وحظي طريح فراش
‏والآمال ماندري على وين تاليها

.....

[الحمدان]

‏ياجميله...

‏ياجميله قام يطوي الحال طاوي
‏والله ان كبدي على شوفك غليله
‏سعد ابن جدلان

‏ياجميله ليا خابت كبار الهقاوي
‏دوري لي من اسباب الرضا ياجميله
‏بندر الدويش

‏ياجميله من اللي حط للشعر قمة
‏بعد قمة حياة الاكلبي ياجميله
‏فهد قطنان

[الحمدان]

ياجميلة واخذي من الصدر طرّاف المحاني
‏واسهري فيها وشبّي من ضلوع الصدر نارك

‏لو أكابر عن هوى عنقك وسلسالك تراني
‏أخذ من الليل ثلثينه سهر وأمر دارك

‏وش فعل جارك عشان يجاورك وأنا مكاني
‏أكبر أمانييّ أرضي خالقي وأصير جارك

.....

[الحمدان]

خلك على الوجه الأبيض وأصلح النيه
‏لا تقول هذي لأجل هذي مسويها

‏قل جعلها حسنه تقضي على سيه
‏الّناس مهما تسوي صعب ترضيها

‏يالله بذكر جميل وسمعةٍ حيه
‏والوقفه اللي تبيض وجه راعيها

.....

[الحمدان]

‏ياحي من جاني وفي عينه الشوق
‏ياحي منطوقه وياحي شوفه

‏الغالي اللي بالغلا منزله فوق
‏كل المشاعر في حضوره شغوفه

.....

[الحمدان]

‏انا لو اني كل ماحدتني الدمعة بكيت
‏ان كان اببلش في جروحٍ مايلاقى طبّها

‏ان مالقيت اللي تحب لازم تحب اللي لقيت
‏اصعب حياة تعشيها ماعندك حياة تحبّها

‏محمد المقحم

[الحمدان]

‏يالله بحض جديد مثل عام جديد
‏وافوز بالأمنيات اللي تمنيتها

‏تعكيرت الجو في الدنيا وقل الرصيد
‏ثنتين تلعن حياتك كان مريتها

.....

[الحمدان]

لاتشوف المزايا كلها والعيوب
خل فاللي تعرفه جانبٍ تجهله

.....

[الحمدان]

‏لاتغيّر شي من طبعك لجل محبوبك
‏الحبايب راضيه بأحبابها ومرضيّه

‏العيون اللي تحبك ماتشوف عيوبك
‏لو خطاياك أكبر من الكورة الارضيّه

.....

[الحمدان]

ودعتك الله فمان الله وأذكرني
بالخير لامرت الأيام من دوني

.....

[الحمدان]

‏جيتك من الحب شاعر وأنت جمهوره
‏ماتقبل الفكره إلا من مخيلته

‏يرسم جمالك قصيد وتصعب الصوره
‏ومن لاتخيّل جمالك عاد مشكلته

.....

[الحمدان]

‏ياللي تقول ان الغلا ياسع اثنين
‏مخطي سواءً جاهل او كنت جاحد

‏مايجتمع في جوف الانسان قلبين
‏هو قلب واحد ياخذه بس واحد

.....

[الحمدان]

تعلمت السهر بعدك وانا قبلك رفيق النوم
‏ولا جاب السهر طيفك ولا عوّد علي نومي

.....

[الحمدان]

‏حتى ولو دونك مسافه لاتشك إنك بعيد
‏مافيه روحٍ جسمها ماهو يباري ظلها

.....

[الحمدان]

‏عطني يدينك وانثر الليل مجدول
‏خلّه يطير أسراب ويعوّد أسراب

‏واضحك وفرّق جمرتينك عن اللول
‏بفتح لك سموعي قبل ما أفتح الباب

.....

[الحمدان]

‏ياما وقفت بوجه الأيام ماطحت
‏وياما وثقت بناس والناس طاحو

‏مشيت يالدنيا وتعلمت وارتحت
‏اهل المصالح لاخذوا شي راحو

.....

[الحمدان]

خلّ عندك فالاوادم نظرة واحتياط
‏لاتكبّر هقوتك بالضعوف وتنصدم

.....

[الحمدان]

‏حنا الوفي من صافي الود نسقيه
‏ومن زادنا بالطيب حنا نزيده

‏واللي طرانا ساعة الضيق نطريه
‏ونكون عونه بالظروف الشديده

‏نغليه والله راعي الجود نغليه
‏ونصون قدره لو دياره بعيده

.....

[الحمدان]

‏لك مساء مني وناداك الخفوق
‏بالمحبه قلب يهديك السلام

‏وانت ذوقك غير فايق كل ذوق
‏لك محبه وسط قلبي واحترام

.....

[الحمدان]

‏المال في جيب الكفو عابر سبيل
‏إليا جلس يومين في جيبه رحل
‏
‏لكن لامن طاح في جيب البخيل
‏يقضي حياته كلها راعي محل

.....

[الحمدان]

‏أسافر بلا توديع وارجع بلا استقبال
‏ولا احس بالفرقا لو ان الزمن عكسي

‏ما احب الوداع اصلاً لأنه يغث البال
‏فلا حد يودعني سوى صاحب التكسي

.....

[الحمدان]

‏لاتاخذك شكه مع اللي يشكون
‏مانيب لامرخص ولاني بجاحد

‏قلبي لو ان حوله من الناس مليون
‏مافيه غيرك ساكنه وانت واحد

.....

[الحمدان]

‏تعبت اداري واجاري ذهنك الشارد
‏وانا تعذرت يوم اخطيت حزتها

‏وزودتها بالقسى واسلوبك البارد
‏مابي العلاقه معك تفقد مكانتها

‏صحيح انا خطيت يوم ان الخطا وارد
‏لكنّ الاحباب لاتجرح كرامتها

.....

[الحمدان]

‏والله اني فالمحبه مشتريك
‏خل قلبي ياخذ اللي ماخذا

‏أعشقك وأغليك واحبك وابيك
‏وش تبي أقول أكثر من كذا

.....

[الحمدان]

‏الحزن ماهوب يصلح لالمحته عليك
‏لو انك الجارح اللى مابعد سرني
‏
‏متعلق بشطر يطري لي وكنّه يعنيك
‏عندك مايثبت غلاتي عجّل وورني
‏
‏لاعاد تشكي علي لو يثر الحزن فيك
‏سولف علي بابتسامه وجهك وجرني
‏
‏سلمني شعور قلبك لاتلوح يديك
‏ومنين ماضقت من جور الزمن طرني

.....

[الحمدان]

‏ناسٍ تبيّن لي مع كل شدّه
‏وناسٍ توارت يوم محدٍ زهمها

‏وناسٍ عدمها من حياتي مسدّه
‏وناسٍ لا والله جعلني ما اعدمها

.....

[الحمدان]

‏الكلمه اللي ماتجملنا على وجه العموم
‏ابرك لها تقعد وشرهتها على حنجورها

‏اليا سكتنا ماسكتنا الا على شان السلوم
‏وان شانت الدعوه ضربناها على دنقورها

‏ اليا قعدنا تقعد الدنيا ولاقمنا تقوم
‏مالله خلقنا نرضي العالم وناخذ شورها

.....

[الحمدان]

‏على البال ياسيد الشوارد فداك البيت
‏طواري تمر الأولويّات وتخطّر
‏
‏لكن قبل سرقة ماتبقى من التوقيت
‏فدتك العيون وعرض الأزوال والخطّر
‏
‏عسى الليلة اللي كنت فاضي وفيها جيت
‏عوض ليلة اللي كنت غايب وانا مضطّر

.....

[الحمدان]

‏ماغبت عن قلبي ولا هان طاريك
وما فيه أحد يقدر يكون بمكانك

لاجاتك الضيقه وشانت لياليك
تذكّر اللي باع عمـره عشانك

.....

[الحمدان]

ماتستريح العين والبال مهموم
ولا يستقر الحال والقلب خايف

غديت مثل الي بالإعدام محكوم
مامات لكنه من العمر عايف

.....

[الحمدان]

‏فتنه أنوثه طاغيه تأخذك لين
تضيع وسط أعيونها من حلاها

ومن الدلّع والغنج والملح والزين
الله حرم بعض البنات وعطاها

.....

[الحمدان]

‏جرحك اللي ماهقيت انه يصير
‏منه حزن الكون في صدري قلط

‏غلطتي اني أحبك من ضمير
‏والمحبه من ضمير أكبر غلط

.....

[الحمدان]

‏اضبط لسانك بالحكي واحسن الظن
‏حتى مع العالم يزيد احترامك

‏ترا اللطافه والادب تعتبر فن
‏ألزم حدودك ترتفع في مقامك

.....

[الحمدان]

‏كثر الحكي مافيه غير المضرّه
والصمت به حكمه وهيبه ومقدار

مايندم العاقل على الصمت مرّه
ويندم على كثر الحكي عدّة أمرار

.....

[الحمدان]

‏دوّر على اللي يموت ولا ظهر زيفه
‏يبقى لك اقرب من اخوك وولد عمّك

‏وخلّك من اللي مشاريهه على كيفه
‏اليا رضا يمدحك واليا زعل ذمّك

.....

[الحمدان]

عليك في طيب النوايا والصلاه
‏ولا تنشغل في ذا الحياه الفانيه

‏ترا الحياه الاوله ماهي حياه
‏رتب أمورك للحياه الثانيه

.....

[الحمدان]

‏جعل ماحنا على الشامتين بشامتين
‏وجعلنا واللي نحبّه من النار اعتقا

.....

[الحمدان]

‏صبرنا على ماجابه الوقت زين وشين
‏ولا حطمت صكات بقعاء عزايمنا
‏
‏نحشم الرفيق ولا طردنا ورى المقفين
‏وعلى نخوة الناخين نحذف عمايمنا

.....

[الحمدان]

كثر الوله والشوق صرت اتحراك
وكثر الغلا ياكثر شوقي لعينك

وكثر القصيد اكتبك والناس تقراك
وكثر انتظاري ياهوى البال وينك

.....

[الحمدان]

‏ياخاطري لاباح صبرك ومليت
‏مالك عن المقسوم صده وحيله

‏ان زان حظك جاب لك ماتمنيت
‏وان شان خلا الهينه مستحيله

.....

[الحمدان]

إن شانت الدنيا ترا العمر مقسوم
‏محدٍ حياته جت على مايريده

‏دايم تفائل بالامل واترك اللوم
‏عش لحضتك واللي مضى لاتعيده

.....

[الحمدان]

كل ليلة موجسٍ بالنفس خيفة
‏لين صوت الحق يصدح واتطمن
‏
‏الليال رياح والعالم خفيفة
‏والكلام اللي على البال يتثمن
‏
‏مشغلٍ نفسي على الروس المنيفة
‏من يراقب فعل غيره مات هماً

.....

[الحمدان]

‏ليت طبع الناس من طبع الغصون
‏إن تعلّت ظل وإن طاحت حطب

.....

[الحمدان]

‏الكلام أذواق والذوق يبغى له نبيه
‏يدري إن ماكل كلمة مودة لايقه

‏مثل بيتٍ فيه قوه وبيتٍ لك عليه
‏مايفرّق في بعضها عديم الذايقه

.....

[الحمدان]

‏فالعمر بين التراجع والتمادي
‏عقلك احذر لاتنقّص من مقامه

‏اعتذر عن كلّ شي الّا المبادي
‏واعتدل في كلّ شيّ الا الكرامه

.....

[الحمدان]

‏أطلق حجاجك لقبل الخاطر وحيّ
‏بشاشة الطيّب كرامة ضيوفه

‏سعد بن جدلان

[الحمدان]

‏اتركوني ضايق البال مكسور الجناح
‏اتثاقل قومتي واتحالا للمطيح
- مدغم ابو شيبه

‏أتركوني في متاهات الخيال الجرهدية
‏لين أسوي صلح بين الممكنة والمستحيلة
- حزمي بن سعد

[الحمدان]

‏بري حالي عقب عسرات الليال أزعجته
‏والعرب ماقدرو صمتي وبحّه صوتي

‏لابغيت اسج قالوا مايكب ادوجته
‏وان جلست المجتمع يستغرب البيتوتي

‏عناد الشيباني

[الحمدان]

‏توالفت أنا والهم والهاجس الورّاد
‏وأفكارٍ بعضها يوجع الراس ويدوّخ

‏أشوف المسا خيمه وأشوف الجبال أوتاد
‏وأشوف الصبر هرش فتر حيله ونوّخ

‏وأنا والسعاده مثل عاشق وبنت أجواد
‏بغاها ووقّف دونها راعي مجوّخ

‏عبدالله بن مشهور

[الحمدان]

‏شاعر مرهي وخادمني لساني
‏مستعد احط هامه فوق هامه

‏أن مدحت أرفع ليا سهيل اليماني
‏وأن هجيت ادفن تحت ساحل تهامه

‏وصل العطياني

[الحمدان]

‏قالت العرب قديماً
إكرام النفس هواها
ومن جهه اخرى

‏- يقول مطحس بن حمد
عط الراي قلبك شف هوا القلب وين وهاو
‏ترى السعي في غير المشاهي هو التوههْ

[الحمدان]

‏عن لبته يوم رد اطراف مجدوله
‏تقول بدرٍ فتق جنح الدجا الدامس

‏أشعر لاشفته شعور اللي بعد جوله
‏توه نزل في مطار محمد الخامس

.....

[الحمدان]

‏لك مكان لو عرفته ماهنى نومك وطاب
ولك حنين في فؤادي من لهيبه احترق

إن بغيت اكتب شعوري انقفل للبوح باب
ولاذكرتك بين ناسي غاب فكري وآنسرق

.....

[الحمدان]

‏تغانم الشوق دام القلب تحت امرك
مشاعري فيك ماتشبع إذا جاعت

لادار وقتك وطوّل ربي بعمرك
عرفت وش قيمة الفرصه ليا ضاعت

.....

[الحمدان]

‏هوجاس قلبي لأتلع الجيد نزاع
‏وقلبي على شانه يحب الهواجيس

‏ابو رموش بابيض الخد شراع
‏بعده يغصب دموع عينٍ محابيس

.....

[الحمدان]

‏ياحبيبي بدون أدنى شكوك وطلايب
‏والله وبالله اللي كوّن الكون كله

‏إنك الحاضر اللي كنّ ماهو بغايب
‏وإنك الغايب اللي ماتغيّر محله

.....

[الحمدان]

كيف اعبر عن محبتها وانا رجلً حياوي
مايداني يشرح احساسه ولا يظهر ميوله

.....

[الحمدان]

عُمر الشكل مازاد قدر الرياجيل
‏الرجـل بأخلاقه وطيبه وثقْله

‏كم واحدٍ بالشكْل يفرق عن الجيل
‏وأخف من ريش العصافير عقْله

.....

[الحمدان]

‏ياللي عيونك وساع وخدك يشع نور
‏قلبي يحبّك لو انك لانشدته جحد
‏
‏دورت فيك التواضع بس شفت الغرور
‏اللي مخليك ماترخي عيونك لاحد
‏
‏ليتك على عيونك اللي كنها عيون حُور
‏ثلاث مرات تقرا قل هو الله احد

.....

[الحمدان]

‏العمر رحله واكثر العمر لحظات
‏فيها اماني وامنيات ورجاوي

‏لاحد يقول ان المفارق بالاوقات
‏الوقت وقتك والمشاعر هقاوي

.....