فوق هام السحب ( الشعر الشعبي) على متن القوافي

[الحمدان]

الرسوم الناعمه والجمره المعسوله
والرموش الفارسيه والعيون الخدّر

والخدود اللي من ألوان الغسق مغسوله
والجبين اللي مثل ضي البدر لا بدّر

من بيوت المشيخه والرايه المحموله
والأصايل ما تحب إلا الحرار الندّر

......

[الحمدان]

اصـبـر عـلى اصحـابك ولابـد الايـام
تكشف لك الطيب ومتظاهر الطيب

موعـدك ويـاهـم عـلى الدرب قدام
لاتسبق الاحـداث مـاتـعـلم الغيب

اليا حصـلك فـالـزمـن شــدة حـزام
تكشف لك الشده جميع العذاريب

وقـت الرخى ماهـو مجـال للأحكام
سـواد لـيـلٍ ظـلـمتـه تستر العيب

......

[الحمدان]

يالله فرّج ضيق صدري إذا ضاق
واجعل مطاريق الحزن لاتجيني

والخير دايم في دروبي والارزاق
يااارب واغفر زلتي واقض ديني

......

[الحمدان]

‏تدري وش اللي غير الناس يافلان
شـرع المصالح وانعدام الصراحه

صرنا نجامل بالخطاء كـل غلطان
لين اكـثر الغلطات صارت مبـاحه

نمدح كـلام فلان من دون بـرهان
وفلان نجــرح بالتجاهل نجـاحــه

......

[الحمدان]

والله ماأنسى صاحب مانساني
لو طالت الغيبه وضاعت نواحيه

يبقى معي مابين قلبي وعيني
والنفس من بد المخاليق تغليه

وأنشد عن أحواله بعاصف سنيني
وأرتاح لازانت وطابت لياليه

......

[الحمدان]

‏الحرف حرفي والمعاني معانيك
والقلب قلبي والنبض فيك ينطق

يالي ملكت الروح بالحب اهنيك
ماغير حبك بالعشق صرت اعشق

......

[الحمدان]

من يقــول إن الغــلا حده حــدود
ومن يقول إن الهوى جامـل أحــد

جيـت لك بالوعـد با أحلى الوعـود
جيــت لــك بالشــوق واللهفـه بعــد

......

[الحمدان]

‏زرعت لك في داخل القلب احساس
ونثرت لك بالحرف عـذب القوافي

ياللي غلاك مخالطٍ عـذب الانفاس
يالله عساك لنبض روحي عـوافي

دامك سكنت الروح من بد ذالناس
شـعر الغـزل يزهاك والقاف وافي

......

[الحمدان]

والله أنك في ثنايا القلب ساكن
وان غلاك يزود فيني ويتطور

والمشاعر عن قدر حبك تحاكن
عن غلاتك فوق ماكنت امتصور

......

[الحمدان]

نسيم الشوق في ليلي ليامن هب
‏يفوح الطاري بـ ذكرْك شذا النوّير

‏حبيبي كل ما طرّف مجال الحب
‏أحبك والشعور أكبر من التعبير

......

[الحمدان]

‏اصد بكرامه لكن انساك لا بالله
‏وخذتني الحياه اللي كثيره معابرها

‏لكن بنصحك مني نصيحة لوجه الله
‏لا تنكر مواثيق الغلا وأنت خابرها

......

[الحمدان]

عيش يومك لا بدى صبحه و غنا طيره
و جدد أحلامك و غلفها بصبر و دعوه

و ظن في حاضرك دايم كل خير و خيره
للتفاؤل طعم حتى لو تخيب الهقوه

......

[الحمدان]

يا الله بصبحٍ فيه رحمة وتوفيق
‏من عند ربٍ مَـا انقفل يوم بابه

‏صبح السعة مافيه همٍ ولا ضيق
‏فيه البشاير ودعوةٍ مُستجابه


بقلمي

[الحمدان]

سوْ ما ودّك حبيبي لا يهمّك
من يشوفك حلم ما ودّه يفيقك

ما حسدت إلاّ عيون أبيك وأمّك
والتراب اللي وطيته في طريقك

ألثمك من واهج اللهفة وأشمّك
أنت ما أحلى من شهدْكْ إلاّ رحيقك

الدفى ما يجهله صدر يضمّك
و الظماء ما يعرفه من ذاق ريقك

......

[الحمدان]

كل ما سجيت جابت طاريك الهبوب
لاسلى قلبي من الحزن وعيوني بعد

جعل ماجاني من الحزن كفارة ذنوب
وياجعل ربي يبشرني يوم بالسعد

......

[الحمدان]

ماهو ضروري كل حاجه لها اسباب
مرات تكره شيء من دون سبه

والصمت ماعمره فتح للغلا باب
اللي تحبه قله انك تـحـبـه

......

[الحمدان]

عيونك ليا هام البصر في حورها تاه
نواعس تقول إنها من الخمر مسقيّة

لك الحق تِدْلّل وقلبك عليّ رْضاه
عليك الدلال وللجمال الأحقيّة

......

[الحمدان]

انا ادري لو يطاول يقيني مكانة لوّ
ابموت ما عاون رشا الذاكرة دلوَه

يقول الزمان اضحك و انا اقول هذا هوّ
ايساوم احلامي على الكيل و الملوَه

تركته يخآيل دمع عيني مخآيل نوّ
و تخلويت و علاج المعيفين فـ الخلوَه

بعد قال عقلي عش حياتك و عمرك توّ
الايام مهما درهمت للفقر حلوَه

......

[الحمدان]

‏جعلني ما أندم على شي تركته
‏والله يجعلها مع الأيام خيره

‏وجعلني لا تبت عن شي وخسرته
‏يرزق الله خاطري في شي غيره

......

[الحمدان]

‏كتبت لي جملة على شاطيئ الشوق
وعبرت فيها عن مضامين شوقي

يوم احتضنها موج الانظار عن ذوق
واستلهمت احساس فكري وذوقي

اخذت لي مع سجة البال طاروق
وغنيت لحن استاحشت به عروقي

......

[الحمدان]

‏تراني طالب القهوة بلا سكّر
دخيلك هات لي صوتك يحليها

ابسمع لو صباح الخير واسكر
قبل لا تبرد القهوة واخليها

......

[الحمدان]

الطيب فطره والشجاعه من الله
‏والمرجله ماهي بمنصب ولا مال

‏والعاقل اللي كاف خيره وشره
‏ماهو مثل طبع الردي القيل والقال

......

[الحمدان]

‏أشغلتني ماعاد أدري وين انا رايح
ضيعت دربي وغيرت إتجاهاتي

لعبتني لعبة المزمار و الرايح
أروح وأرجع ولا هديت خطواتي

حتى هواي أختلط في عطرك الفايح
وأدمنت عطرك بروحاتي وجياتي

......

[الحمدان]

ياحي من جاني وفي عينه الشوق
ياحـي منطـوقـه وياحـي شـوفه

الغالي اللـي بالغَـلا منزله فوق
كل المشاعر فـي حضوره شغوفه

......

[الحمدان]

‏غلاك فطره وحبك شي من حالي
والشوق يمك ياروح الروح يدفعني

انت اول الناس يوم اصحى على بالي
وانت اخر انسان قبل انام في عيني

......

[الحمدان]

‏بعض البشر اجمل من الشعر و البوح
واجـمل مـن الوان الرسـم و المعاني

بعض البشـر ترد في نبضك الروح
مـن تبتسـم لك يبتـدى عمـر ثانـي

......

[الحمدان]

‏الله عطاني حب ناسٍ قريبين
وناسٍ على قلبي بعيدين واقراب

نمشي على حد السنين بطريقين
مابين فرقى وقرب حنا والاحباب

......

[الحمدان]

‏احيان ابوح وداخلي روح شاعر
‏واحيان شاعر بس خالي من الروح

‏ماني من اللي يجرحون المشاعر
‏حتى ولو قلبي من الكل مجروح

......

[الحمدان]

‏عساي ما اثقّل على قلب مخلوق
‏ولا اسـوّي ما يسـبّـب عـتــابه
‏.
‏انا احـب الذوق وادوّر الذوق
‏عند التعامل والحكي والكتابه

......

[الحمدان]

تدري وش اللي يقهر بـ عالم الشوق
إذا عطيت القلب*لـ*إنسان جاحد

لايحفظ إحساسك ولايعرف الذوق
يختار عشره ووأنت مختار واحد

......

[الحمدان]

اضحك مع العالم مثل مايريدون
‏وإترك لهم على الهوامش مساحة

‏اثنين في هذا الزمن ما يعيشون
‏راعي الضمير ومن يقول الصراحة

......

[الحمدان]

‏العمر كلّ ما زادت أيامه نقص
‏والنَّفس تكسب طيبها بأخلاقها

‏كم واحدٍ قلبه على الدّنيا حرص
‏واقفى وخلاها وهو ما ذاقها

......

[الحمدان]

يامشعل الليل نوره خفف سراجك
ارحم ضعيف النظر لا توجع عيونه

البرق برقك وقلبي جف محتاجك
انثر عليه المطر يا غيمة مزونه

......

[الحمدان]

تدري وش اللي ما له طب و علاج
الصدمه اللي دون ذنب و خطيه

وتدري وش الي سبب لفكري إزعآج
إني وفيت لنآس مآهي وفيه

......

[الحمدان]

المعارف فالعمر حظ ونصيب
والأسف بعد الخطا من يصرفه

مايجيك الجرح من واحد غريب
مايجيك الاّ من الّي تعرفه

......

[الحمدان]

نأتي إلى الدُنيا و نحنُ سواسية
طفلُ الملوكِ هُنا كطفلِ الحاشية

و نغادر الدنيا و نحنُ كما ترى
متشابهونَ على قبورٍ حافية

......

[الحمدان]

فِي القَلبِ أشيَاءٌ تَثُورُ ولَا تُرَىٰ
لَو أنَّهَا سَالَت لَفَاضَت أبحُرَا

لَو أنَّ مَا فِي القَلبِ مِن حُزنٍ سَرَىٰ
نَهرًا لَأذبَلَ كُلَّ شَيءٍ أخضَرَا


نسيبة الكِيلاني

[الحمدان]

‏يارب ندري عندك الباب المفتوح
لـ الجنه اللي تقصر النفس عنها

نفس الآبن آدم مثل ماذكر فاللوح
على الخطا والسوء تامر و تنها

والرابح اللي راسه بسمن ممسوح
ونفسه مهذبها وماااسك رسنها

إن كاني مارحت لك وين ابى اروح
الناس عيت تسلم الناس منها

......

[الحمدان]

فديت صوتك لا وصلني سلامك
وإن جيت تفتن عيوني خطاويك

كل شيء منك حلو حتى ملامك
أشتاق لك وأشتاق عطر ابتسامك

وإن غبت عني نبض قلبي يناديك
الله لا يحرم خافقي من غرامك

......

[الحمدان]

حي طرقاً كل ماهزها الشوق وحكت
الهوى يطرق ثغرها ويضّحك سنها

ضحكها يمزّع معاليق قلبي لاضحكت
كنّها تملك مفاتيح قلبي كنّها

[الحمدان]

تركت خلك في بحور الحزن غارق والهموم
اقل شي مـن قــبل ترحـل بالبقاء لاتوعده

هذا انا احب الاشـياء فــي حــياتي ماتدوم
مشكلتي اني كـل ما حــبيـت لي شي افقده

[الحمدان]

الغيمة اللي ســرت تسقي عروق الزهـــور
طـارت بحســـــي وشــلتني مــع برقــــها

في عاصفة فــوجها ينفخ رماد الشــــعور
ذي عاد من محرقة روحي قفــى حرقــها

شبت بي الريح ما بين الســـماء والطيور
من مغرب الشـمس تذلف بي على شرقها

وسفينة الحلم ذي كانت تجوب البـحور
قبطــــانها ساقــته نفســــه على خـرقـها

يا راقي الجــــرح ومجـبر حطام الكسـور
بعطـيك روحـي وجـــــــبّر كسرها وارقها

شف كلما اطـرق على بابك بغيـت العبور
تتـفتح ابــواب مـــا فـــكرت في طـرقـها

......

[الحمدان]

يا الله يامن رحمتك مثل وصفك
يامستجيب لكل داعــي دعاويه

حقق لنا كل الامانـــي بعطفك
وجودك اللي مالجودك يجاريه

يارب كل انسان طامـع بلطفك
وكل من له حلم نفسه تساويه

يامن امانـي كل واحـــد بكفك
يارب حقق مـن دعا لك امانيه

......

[الحمدان]

لكل اخ يراعي خواته

اختك شعر وجهك وسترك ومبداك
الاخت تلجأ قبل ابوها لـ اخوها

خلك ظهر لاختك على طول تلقاك
وان مات ابوك الواجب تكون ابوها

[الحمدان]

ياهو لگالك من تبچي ترتاح
هاي انضحك بيها على المساكين

ألدمع ماله علاقة بنار الگلوب
المطر لو طـاح ميطفي البراكين

شعر عراقي

[الحمدان]

‏إهزميني بالجمال الطاغي المتعالي
‏المسا كوني قمر والصبح صيري غيمه

‏بعثريني وابشري باغلى القصيد الغالي
مايميت الشاعر المبدع سوا تنظيمه

......

[الحمدان]

ياروعة المساء فـي طـلـة مساكم
يانـفـحـة الورد والأشواق نسقيها

أجمل ورود المساء في كاس لقياكم
أبيات شعر توصف لكم معانيها

[الحمدان]

لا تجبر الناس فـي رايك اذا قلته
‏الدرب يمشي عليه الدال والتايه

‏ان ايدوك العرب فكرك و وصلته
‏وان عارضوك العرب كلٍ وله رايه

......

[الحمدان]

الصمت عن بعض الحكي دفعة بلا
‏لا تعـــترض للصـــادره والـــوارده

‏وان كـان خفّــاقك من الضيقـه غلا
‏عـــرّض ضلـوعك للهبــوب البارده

بقلمي

[الحمدان]

يالله بــرزقٍ لا قليـــل ولا كثــــير
‏ايمشي الأحـــوال ويسد الظروف

‏ما ودي اطلــع لا غنــــي ولا فقير
‏فالحــالتين يصيبني خشيه وخوف

‏خايف يزيد المال ويموت الضمير
‏وأخاف مالقى ما يقـــدم للضيوف

......

[الحمدان]

نصادم الايـــام و نطيح و نقوم
‏و نواجه الدنــيا بـ صبر وجلادة

‏سود الليال تزيدنا طيب وعزوم
‏اليا تردى الوقــــت طبنا زيادة

......

[الحمدان]

نضيق والضيقه لهــا وقت واسباب
‏لاحدٍ يقــــول الضيق من دون سبه

‏اما يجيك الضيق من بعض الاقراب
‏والا قصــــور الشخص بحقوق ربه

......

[الحمدان]

‏الى هنا وامورنا ماهي تمام
‏الواضح ان اللي بقى منا قليل

‏الايام هذي شكلها مسك الختام
‏لايامنا الحلوه وللعمر الجميل

‏روحي ولا يقفاك من صوبي ملام
‏اما اني ابكي من فراقك مستحيل

‏بكيتك ايام المحبة والغرام
‏للي يكفي للموادع والرحيل

......

[الحمدان]

بعض العرب تلقاه في كل شِدّه
و بعض العرب للغشمره و الهزاوي

روس خلقها الله لـ نوم المخدهُ
و روسٍ خلقها الله لـ يوم العزاوي

......

[الحمدان]

‏ليت رد الجمايل مثل رد السلام
لكنْ الله جعلها مثل دين وقضى

كنّها في يدين اللاش برد وسلام
وكنّها في يدين الكفو جمرة غضى

بقلمي

[الحمدان]

‏سقى الله ذاك الوقت الاول وذاك الجيل
‏يوم إن القلوب نظاف والنّاس مجتمعه

‏يوم إن الحياه القاسيه بين حط وشيل
‏زمان الوفاء والطيب والجود والفزعه

ذائقة

[الحمدان]

عجزت لا اناظر الدنيا بعين انكسار
‏ادعس على غارب الأيام واهينها

‏ما يعتذر بالظروف إلا عديم القرار
‏وما يبكي من الحياة إلا مساكينها

......

[الحمدان]

آن سرينا الليالي ماعرفنا اي خوف
ون بداء الصبح فيناء ما نهاب اللقاء

من بغانا لقانا حول داره نطووف
من غزانا يعوود وكلمته لا سقا

......

[الحمدان]

على دروب العز تمشي خطانا
لاعاش راس يقبل الذل لاعاش

تكرم شواربنا وتكرم لحانا
عن نظره الخايب وعن نظره اللاش

......

[الحمدان]

ليالي تكلفنا مواجيبنا كلاف
علاشان لايدفن براهينها السافي

وليله علا حمر الوبر نبدي المشراف
وليله نوردها علا المنهل الصافي

......

[الحمدان]

‏إن شفتك مبادر على الوصل للحين
‏شرّعت لك بيبان صدري هلا بك

‏و إن شفتك مقفّي بـدرب المقفّين
‏اِشره علي إن جيت طقّيت بابك

......

[الحمدان]

سلامي على المتحكمه بـ زعلي و رضاي
‏و على الغره اللي طوّقتني على غره

‏و لا هان عودٍ شوفته تطلق محيّاي
‏نسيم الهبوب يداعبه كل ما مره

......

[الحمدان]

كن شوق الأماكن يوم غنّى ابو نوره
‏ايقظ الجرح في قلبي وينزف وريده

‏جيت فرصة عمر وسط الضمير معموره
كل طاري يجيبك لي فرصة سعيده

......

[الحمدان]

صباح الرضا والستر والحب والتقدير
‏صباح اليقــين برحمـــة الله وغفرانه

‏على حسن تدبير أكرم الأكرمين نسير
‏والارزاق بأمــره والتـــوافيق سبحانه

بقلمي

[الحمدان]

علّـــم اللـــي كل يـــومٍ يدور له رفيق
‏الرفاقه ماهي بـ عقـد شهري واشتراك

‏لي رفيقٍ لا ذكرته وصـــدري مستضيق
‏ابتسمت وقلت للضيق هات اللي وراك

الحمدان ....

[الحمدان]

‏ﺁﻟﻠـﻲ ﻳﻬـﻴﻦ ﺁﻟﻨــﺎﺱ ﻵﺑـﺪ ﻳﻨﻬــﺂﻥ
‏ﻣﻬﻤـا ﻋﻠﻰ ﺑﻴـﻦ ﺁﻟﺨـﻶﻳﻖ ﻣﻘــﺂﻣﻪ

‏ﻓﻲ ﻣﻌﺠﻢ ﺍﻷﺣﺮﺁﺭ ﺗﻌﺮﻳﻒ ﺍﻵﻧﺴﺎﻥ
‏ﮔاﺋﻦ ﻳﻤﻮت ﺁﻥ ﻣا ﺗﻨﻔـﺲ ﮔﺮﺍﻣــﻪ

......

[الحمدان]

‏ِعُمـر الشكـل ما زاد قدر الرياجيل
‏الرجـل بـ أخـــلاقه وطيبه وثـقْلـه

‏كم واحدٍ بالشكْل يفرق عن الجيل
‏و أخف من ريش العصافــير عقْله

ذائقة

[الحمدان]

‏يـا مالك الملك يَارحمٰن سبحانك
‏لـِي خمس دعوُات يا ربي تحققّها
‏
‏جودك وسـترك وعافيتك وغفرانك
‏والخامسة روحـي مـن النار تعتقها

......

[الحمدان]

‏ياللي عيونك وساع وخدك يشع نور
‏قلبي يحبّك لو انك لا نشدته جحد
‏
‏دورت فيك التواضع بس شفت الغرور
‏اللي مخليك ما ترخي عيونك لـ احد
‏
‏ليتك على عيونك اللي كنها عيون حُور
‏ثلاث مرات تقرا قل هو الله احد

......

[الحمدان]

‏القلوب اللي على الفطره تودك
‏إزرع الخيرات والمعروف فيها

‏والقلوب اللي على الصعبه تحدك
‏لا تـخاويـها ولا تـشـره عـلـيـهـا

......

[الحمدان]

‏علمني الوقت ما ازعل على غالـي
‏ولا اتشره على العالـم اذا صـدت

‏ان جابـه الشوق ولا يابري حالـي
‏عمـــر المشاريـًه لاجابــت ولا ودت

......

[الحمدان]

‏يالله بصبحٍ على التوفيق ياخذنا
‏نفرح بخيره ونسلم من غثا شره

‏ويالله على كــل زلــه لا تواخذنا
‏حنا عبــادك وغـــيرك مالنا مره

......

[الحمدان]

‏العمر رحله واكثر العمر لحظات
‏فيها اماني امنيات ورجاوي

‏لاحد يقول ان المفارق بالاوقات
‏الوقت وقتك والمشاعر هقاوي

......

[الحمدان]

‏حاولت لين ازريت انا اكافح الجرح
‏ساعة لفاني مـن حبيبن نصحته

‏وضحتله ما أريد واوجزت بالشرح
‏وجاني يعـانـد كني اللي فضحته

‏فكري يقول ابعد وخلك قوي صرح
‏ونفسي تقول ارجـع بعد ما جرحته

......

[الحمدان]

‏جيتك من الماضي مواجيع وجروح
‏جيتك وقلبي راس مالة جروحي

‏جيتك تسابق خطوتي نزعة الروح
‏جيتك قبل لاياخذ الموت روحي

.....

[الحمدان]

يا حبيبي والمحبة بدايتها سؤال
‏والنهاية قسوةٍ تكسر الغصن الندّي

‏والذي فضل جمالك عَلى كل الجمال
‏ أنك اغلى من عيوني ومن دم جسدّي

‏معك جربت الهداية وجربت الظلال
‏ قلبي أعلن لك ضلاله وعقلي مهتدّي

‏أخذني من واقعٍ ما عرف قدر الرجال
‏ السنافي فيه يغصّب عَلى شور الردي

‏يمدحون اللي يعْبد المناصب والريال
‏ومن كفى شره وخيره يقولون أجودّي

‏عن ضجيج الناس والمجتمع جاني جفال
‏كنّ ما ذولا بـ ناسي ولا ذي بـ بلدّي

‏والهروب أحيان نوعٍ من انواع النضال
‏ لا وطّت رجلك طريق الضياع السرمدّي

‏ جيت محتاجك وفيني كلامٍ ما يقال
‏ اتعززّ وارفع الصوت وامشي واعدّي

‏حطني في وجه حضنك من صدوف الليال
‏تايهٍ لا اخطيت من ضمتك وين أغدي

‏مستعد أبيع عمري لاجل كلمة تعال
‏في رجا ليلي وصبحي و ريحة معْبدي

‏والعيون اللي هدبها ينادي للقتال
‏صوّبتني بـ اللواحظ و بيّحت جهدي

‏وأن شعرت بيوم في حبنا بـ الابتذال
‏ ردني لأول جروحك ترى صبري مدّي

‏غبّ على كيفك وانا بين هَقوات الوصال
‏اتحرّى لك وروحي عَلى راحة يدي

‏و اكتبك بشعر والشعر دوامة خيال
‏يتّضح فيها بعيد المدى والمبتدّي

‏وكاني مارويّت الأسماع بالسحر الحلال
‏طحت من عين الثريا ومن عين الجدّي

......

[الحمدان]

‏لحفي صدرك ترا برقه شعاني
‏كل صبح ينوض وعيوني تخيله

‏ودبلي لبسك عليك بلبس ثاني
‏لا تموت عزوم قلبي يا جميله

‏كنت بثقل غير ضيعت اتزاني
‏واستخف القلب عندك يا ثقيله

‏علّمي صدرك ليا منه لقاني
‏لا يضيّعني وانا اسوى لي قبيلة

......

[الحمدان]

‏انتي اطهر ذنب واجمل غلط واشجع قرار
‏حطّك الله في ليال العمر ليلة قدر

‏الهزيمة في عيونك بطعم الإنتصار
‏من يقاوم سحر عينك ورمشك لا خدر

‏مادريت إنك مسحتي دموعي بالخِمار
‏لين قالت رعشة إيديك يامجنون إدر

‏إدفنيني في بياضٍ نشع فيه الخمار
‏عاشقٍ فارق حياته على مفرق صدر

[الحمدان]

‏لاصرت مانت بكفو لاتدق لي صدرك
‏يعوضني فيه صدر الجادل الطرقا

‏اللي لو اقول يازينك وياندرك
‏خلت معاذيرها وغنت مع الورقا

......

[الحمدان]

‏هذا الصــباحُ جميلٌ
‏وأنتـمُ مِنْـهُ أجمَـــلْ

‏قد جاء يحمِلُ بُشرى
‏ووجــهُـهُ يتـهَـــــلّلْ

‏فصــافحــوهُ بِعَــزْمٍ
‏حِينَ اســـتهَلّ وأقبَلْ

ذائقة

[الحمدان]

يا معذربين الهرج وش فادنا الصمت
‏حنــا سكتــنا لين فـــي اللاش ضعنا

‏الهـرج ما نقّص هل العرف والسمت
‏لا صــار بــه حكمــة ومنطق ومعنا

......

[الحمدان]

الطيب كايد واللـيالي محاصيل
‏والطيّب اللي للظروف ايتصدّى

‏واللي تعـذرّ عن لـزوم الرياجيل
‏ابـرك من اللي قـال تـم و تردّى

......

[الحمدان]

اللي مسخّر للظـروف العوامـل
‏تدبيــر ربّي لا ذهــانه ولا حرص

‏ان مـا لقيـت بدنيـتك شيّ كامل
‏ترى الرضا هو دايم يكمّل النقص

......

[الحمدان]

‏سولفت للغيمه عن البعد الطويل
‏ودمع السما في ديرة الفقد إنتشى

‏كان الهوى بير وجفافه مستحيل
‏دلو الوصال اليوم مقطوع الرشا

‏ماقلت لك حظّي من الدنيا قليل
‏وسيف الحنين يدل عنوان الحشا

‏من قال باقي عزم للـ حمل الثقيل
‏عزمي معك سلّم على القلب ومشى

......

[الحمدان]

‏مدري خطا ولّا صواب
‏سلّمت نفسي للجفا

‏ما شفت حاجه بالذهاب
‏للبُعد تستاهَل أفااا

‏شايل على كتف الغياب
‏آمالي و حلم ٍ حفا

‏بين الحقيقة والسراب
‏وِطْموح عن حلمه عَفا

......

[الحمدان]

دقت الساعه على مَوعد لقاك
و العيون من الفـرح يرثى لها

من كثر ما خَافقي عَاشر غلاك
ضَم كل طيـوفك وَ غنى لها

......

[الحمدان]

‏يامايس القد لا تحرمني المستحيل
‏نار المحبة تعبت آطى على جمرها

‏انفاسك تداوي وبسمتك من سلسبيل
‏راضي لو ابيع عمري في رجا خمرها

‏لك فضل يشملني ويشمل بحور الخليل
‏يا ملهم الروح انت اللي وليت أمرها

‏فيك القصايد تجي من حالها والدليل
‏الأربع بيوت ( هذي ) .. كاتبه عمرها

......

[الحمدان]

‏عسى كل العلاقات القديمة والليال السود
‏فدا بنتٍ مشاعرها جليد وصوتها دافي

‏أنا وشلون أقفّي وأتجاهل كل ميلة عود
‏وأنا أشوف أنها لذة حياتي وأول أهدافي

......

[الحمدان]

‏أرْوَيت غَصَن الكلام و لاَذ
‏صوت القَدَر و أَثمر بْـ حلَّه

‏و تْشَكّلت هالحياه أفلاذ
متراكمه بـ آحرف العلّه

‏عن قصة الغَيم لـ رَذَاذ
‏عن وحشة الهالك بـ ذِلَّه

‏كل ما إنكسر نُصفي الأَخّاذ
‏أَخذت نُصفي إلى خله

‏لا جمع بيدي ولا إستحواذ
‏بس أغلبي تِيْه وأدلَّه

‏للماثله بـ الغياب الشاذ
‏قبل أنْتفض و أصرخ بـ غلّه

‏يا مأخذه كونِي إستلذاذ
‏كم قلت لك بالحزن كله

‏الصَبَح تغريبة الشحاذ
‏واللَيْل موضع حدود الله

‏يآ من مضَيتي بلا استيعاذ
‏وأَدْرَكت ما جيتي مْطله

‏قلبك صَخر طُرّز بْـ فولاذ
‏والمآ على صدرك مْولّه

‏كيف أَشْعَل إحساسي النفاذ
‏و ضلوعك أخشاب مبَتْلَه

‏بسَّ اذكري كان فيه أستاذ
وزَّع على يابسك ظلْه

‏من رّق هَدل السحايب لاَذ
‏خلف الهوَى و أَمطر بـْ حله
‏
......

[الحمدان]

‏مــن يرخصـك لاتلتفت له وترجـاه
‏خلــه مـــع الايـــام ربـــــك حسيبه

‏هذا الردي يوم الرّخا الطيب ينساه
‏مــايذكــرك ليـــن الشـــدايد تجيبه

.....

[الحمدان]

‏انا ادري ان الشووق ماله مواقيت
‏ولا له علاج و لا طبيب استشااري

‏من العصر وانا ادرّج خاارج البيت
‏ولـ الضيق في وجهي رسوم ومواري

‏ليين اذن المغرب وصلّو وصليت
‏ويطررري علي من الطواري طواري

‏حاولت اقاوم لهفة الشوق وازريت
‏ودقيت سلف الموتر وجيت ساري

......

[الحمدان]

‏مرتاح لو قالو مضيّع ومنجوم
‏ولاني مدوّر لـ الدلاله دلايل

‏من شاور بعمره هل الأرض محروم
‏لو شاف بعيونه نجوم القوايل

‏وأنا* لو آخذلي ليالي عن النوم
‏في عالم العشاق راعي صمايل

‏ياسيدة شعري فدى وجهك اللوم
‏ترى جروح الحب فيها جمايل

‏تمر سكينك على الجرح وأقوم
‏أضحك وأنا دمي على القاع سايل

‏لو تطعنيني خمس طعنات باليوم
‏مادامني مامت فالشك زايل

......

[الحمدان]

‏وشلون برضي غُروري فيك و أبدا منين
‏وانا أعطي افكاري التعبير ويخونها

‏دوّرت لك في كلام الحب عبر السنين
‏من جيل هالوقت لـ ليلى و مجنونها

‏كل الكلام اللي قد قالوه ماهوب زين
‏في حضرتك ياهدب عيني ويانونها

‏و أحبك إستنزفوها واجد العاشقين
‏محتاج كلمة جديده ما يقولونها

......

[الحمدان]

‏اتعلم من صواديفي وخيبة ظني
‏والخطا مانيب اعيده لا فعلته مره

‏والله اني مانويت فراقكم لكني
‏زادت اوجاعي وصدري قام يغلي حره

‏يمكن انها خيرةٍ من رازق المتمني
‏وانت وصلك شر وان الله كفاني شره

‏رح عسى دربك سفير وفارح ومتهني
‏وان وطاك الوقت لاتنسى حبيبك مُرّه

......

[الحمدان]

‏ناسً دفعت العمر فيهم بليا وعي
‏والي جنيته عيونً تنكر احبابها

‏تبرت طيوفهم منهم وراحت معي
‏لله در الطيوف اوفى من اصحابها

......

[الحمدان]

‏ترى عاد وجهك للقصايد وطن وبلاد
‏تدلّك مثل ما ادلّ حسنك لا ضيّعتك

‏لا تزعل من العذال والا من الحساد
‏لو ابيع عمري بعت عمري ولا بعتك

......

[الحمدان]

‏إذا جاد السكوت ولا لقيت إلا القصيد أفواه
‏ابكتب لين ما أوراق الدموع تْصير مبتلّة

‏ما عدت المستريح اللي طرب ناسه بحلو أحكاه
‏بديت أشعر بـ أن قلبي سار أرض محتلة

‏أشوف إن الطموح اللي تمنيته ماعدت أهواه
‏كرهته و أجمل أشيائي عليها الدمع منهلّه

......

[الحمدان]

‏لو هو صحيح الاوادم تفهم الخافي
‏ما كان قال المثل والخافيات أعظم

‏أهم شيّ كلمتي والموقف الوافي
‏والناس تفهم مثل ما ودها تفهم

......

[الحمدان]

‏لا تسولف لي عن أخبار الربيع
‏وأنت مرباع الخفوق ومطلبي
‏َ
‏َمشتهي في ساحل عيونك أضيع
‏لو تخالف مذهبك مع مذهبي

......

[الحمدان]

‏لا تعوّدني على شي وتغيّر
‏أَبسط أَبسط من ظنونك مطمعي

‏طبْ بين جروح مَفتونك تَخيّر
‏إدفن اقساها و ريّح مَسمعي

‏غنّ لي يا قبلة النّور المذيّر
‏انثري مِن طول ليلك واجمعي

‏لك وطن صدري تحت حكمك مْسيَّر
‏استبدّي واستردّي واقمعي

......

[الحمدان]

‏انا رفيقي لو تغير ما اذمه
‏اقفيت عنه ولا ذكرت الردى فيه

‏ماني عليه مكلفٍ في مهمه
‏عن حاضره صمتي وقاراً لماضيه

‏حفظت قدره عن دروب المذمه
‏ماني على بعض المواقف مجازيه

‏اما حشمته حشمتي لبن عمه
‏والا تجاهلت الخطا من تواليه


......

[الحمدان]

‏إستعذت من الدروب اللي نهايتها حسافه
‏قبل ترميني ملذات الزمن في جوف غِبّه

‏ما يخاف المؤمن اللي فيه من ربه مخافه
‏مصدر الخوف الحقيقي واحدٍ ما خاف ربه

......

[الحمدان]

‏يا محاصرني بـ ذكرك من الأربع جهات
‏ما تركت لـ ساحة البال سجه و لهوه

‏ارتبط وجهك مع الورد و الما والنبات
‏وارتبط طاريك مع كل فنجال قهوه

......

[الحمدان]

‏لو يكشف العبد المصير وشاف شيٍّ ما يبيه
‏يمكن يعيش العمر كله والحياة بلا طراه

‏ما ودك إن الواحد تسابق خطا رجله يديه
‏يرضى بما قدِّر عليه ويشكر الله لا عطاه

......

[الحمدان]

‏زورني في غمرة الليل والعالم رقود
‏بين خِدر من النسايم وضو من القمر

‏خابرٍ لي عندك إما أربع أو خمسّة عدود
‏واحدٍ منهم عسل صافي وواحد خمر

‏ومد لي من وجنتك شي من زاد الخلود
‏ودي آكل توت مليت وأنا أكل تمر

‏وميل يا غصنٍ ليا مال يذبل كل عود
‏يا قبالٍ ما يحاليه بيض ولآ سمر

......

[الحمدان]

‏قامت على الليل الادهم بالنحر والشقار
‏ومعنق جاعله ربي ربع طولها

‏تلتف به حولها من كل صوب ومدار
‏ماهي بحاجة مرايتها ومن حولها

‏خلوني اروح معها من دمار لدمار
‏انتو لو انكم مكاني كان رحتو لها

‏حتى الهبايب تنازعها يمين ويسار
‏تقول ما قد لقت زول مثل زولها

.....

[الحمدان]

‏ما بعد عاش الحياه وراح منها سالم
‏غير ناسٍ عاشت وماتت ما ندري عنها

‏من يظن ان محسن النيّه يعيش مسالم
‏والله ان يكّفن جروحه قبل يدفنها

‏قبل لا تزرع ثقه في انسان خلك والم
‏الليالي والبشر ما فيه احد يضمنها

‏دايم الشخص اللي واثق في جميع العالم
‏ينصدم له صدمةٍ ما عاد يصحى منها

[الحمدان]

‏تفاصيل وجهك و ابتساماتك الرحبه
‏يعيشون أمّه كامله في تأملّها
‏ㅤ
‏عسى كل صبح يمر وجهك يصبّح به
‏و عسى كل خير يمر يدّك يقبّلها

......

[الحمدان]

‏يالله بصبـــحٍ فيه رزق وتوافيق
‏وعلمً يسر الخاطر ويفرح العين

‏يا محيي الميت ويافارج الضيق
‏يا قاري الابيات قل بعدها آمين

بقلمي

[الحمدان]

بين هـذاك معطى وذاك مالله.عطاه
‏وبين عيش الكفــــاف وعيشة ٍفاخره

‏مكسب ٍمن حصل له راس مال وغناه
‏عــــافي بالحــــياه وعفــــو بالآخره

‏سِعد من هو رصيـده بالحساني ملاه
‏في رصيف النجــــاه مرَسّــي الباخره

......

[الحمدان]

توقعت الغياب ولا توقعته بدون أسباب
‏وعدتيني زمانك ما يغيّرك وتغيرتي

‏غريب اللي لحقني منك واللي زاده استغراب
‏على كثر الظروف اللي تعذرك ما تعذرتي

‏نسيتي حبّنا ولّا نسيتي نظرة الإعجاب
‏تذكرتي زمان الطيش ولّا ما تذكرتي

‏تقولين الديار بعيد واقول القلوب إقراب
‏يسافر لك خيالي وين ما رحتي وسافرتي

‏انا ما اقابلك مرتاب ليه اقابلك مرتاب
‏طريقي واضح ومبداي ثابت واعرف آخرتي

‏اطير من الفرح ودموعي تحوّل من المرقاب
‏واشوفك ساكته ما طاحت دموعك ولا طرتي

‏عطيتك كثر ما شالت يدين الكادحين اتعاب
‏وسامحتك كثر ما خنتي العشرة وقصّرتي

‏وحبيتك كثر ما بكّت الغربه عيون أغراب
‏واحبك فوق ما تتخيلين وما تصورتي

‏يا كم شبّو لك الدنيا وكم شبّو معك شيّاب
‏ويا كم قلب عنّيتي ويا كم عين سهّرتي

‏تلدّين العيون وتسرقين القلب والالباب
‏ياليتك يوم قالوا لك كبرتي ما تكبرتي

‏ابطلع من حياتك بسّ دلّيني طريق الباب
‏بعد ما جارت الدنيا علي وقطّعت كرتي

......

[الحمدان]

لمع ضوّ القمر واثره عكس نور الضياء وطل
‏علي اجمل من اللي شفته بنوره ولا ادري كيف

‏اثر جفنه على رمشه جفير وسلّته لا سل
‏يذكرني بفتوحات وحكايا مالها توصيف

‏عجزت ألقى لمثلي حل من عنده لمثلي حل
‏ويفتي لي على النظرة فتاوي تقبل التحريف

‏انا ذاك الوحيد اللي عشق له في حياته ظل
‏وانا ذاك الوحيد اللي حلم بإنّه يعانق طيف

......

[الحمدان]

‏وقفت مع نفسي كثير و تحيرت
‏ماعاد احس ان فيه حاجه مثيره

‏الوقت متغير او انا تغيرت
‏احس ماتت فيني اشيا كثيره

......

[الحمدان]

لا تلومني لا جيت كلي من أقصاي
مافيـه غيرك لا تضايقت جيتـه

جيتك ولا غيرك ذكرته بمسـراي
جيتك وكل إنسان غيرك نسيتـه

جيتك وأنا ماني بـ أنا تايه الـراي
جيتك وأنا مدري وش اللي بغيته

......

[الحمدان]

‏عن الاعترافات بـ هزيمه الحب

سعود مبارك :
أنهزمت وقلت أحبك وهذا أكبر دليل
ما يهزم أكابر القوم غير قلوبها

جابر النشيرا :
أطيح طيحة قوي ماهي بـ طيحة ضعيف
طيحة شجاعٍ هزمه الحب لين أعترف

سعود مهدي :
معك عشت أول هزيمة بطعم الإنتصار
والعيون تشوف ضحكتك ضمن حقوقها

[الحمدان]

‏لا تطري الحب و يضيق المكان الرحيب
‏ولا تسرق إعجابي بطبعك ولامواخذه
‏⠀
‏أخاف لا اعشق تفاصيلك و اشوفك حبيب
‏و احطّ قلبي على كفّي ولا تاخذه

......

[الحمدان]

بعض الرسائل خطها ينعش الروح
لاجات من غالي وقلبك يوده

تشفي عليل النفس ان كان مجروح
وتخلي اوقاته رخاء بعد شده

ترى الغلا ما بين الاثنين مسموح
ما احد تحكم في فؤاده بيده

......

[الحمدان]

خاطري ماهو بـ طيب ولا مرتاح بال
و العرب معاد لي شفٍ في منطوقها
⠀
أتظاهر بـ السعاده و أقُول الحال عال
والا أنا ضايقٍ و الأخلاق طايح سوقها

......

[الحمدان]

الله على جـو الغلا والمحـبـه
لاصار صافي بين غالي وغالي

تعال يا نبض الغلا وانت طـبـه
لك منزل في داخل الروح عالي

......

[الحمدان]

من حـقـها ترقص وخطوتها غـرور
ماهي بحي الله فرس مـن زيـنـهـا

مهره على التصفيق تلعب للحضور
تلعب غرور ولا ملى احـدً عـيـنـهـا

......

[الحمدان]

سرى الليل وعيون المولع على الجوال
يراقب ظهوّر الصاحب اللي على باله

يخاطب نجوم الليل لامن ليله طال
لعل النجوم تطمن القلب عن حاله

......

[الحمدان]

الغلا اللي تبيّن قيمته بالوجيه
هو وقود الحياه ومصدر إلهامها

اشهد ان لك غلا لو اكتبه واحكيه
بح صوت الحروف وجفّت أقلامها

......

[الحمدان]

جذبتني بالحب واعجبت ذوقي
وثورت بركان المشاعر والاشواق

وانا ليا حبيت صعبه افوقي
قلبي واعرفه زين لا حب مافاق

......

[الحمدان]

شيخة غلا قمّة حلا طيّبة ساس
ومعــرّبه ما بيــن عمك وخـالك

بقول لك كلمه من الراس للراس
نـذرٍ علي انّي احبك لـ حـالك

......

[الحمدان]

احسدوني عليك و ضيقوا صدري
وكل ما جيت ابيك عيونهم صوبي

تدري اني عشقتك و انت ما تدري
صعب ذوقي و حصلتك على ذوقي

......

[الحمدان]

ترتوي بك روح و عيون و ضلوع
كن صوتتك لأجمل اشيائي حياه

ايـه مـالـي عـن دفــا حـبـك رجــوع
وانتي مالك غير قلبي يا دفــاه

......

[الحمدان]

بنت الدلع بنت الغنج بنت الدلال
عضت شفايفها وسوت حبتين

اسج رجلي من يمين ومن شمال
حسبي عليها ما عرفت أروح وين

......

[الحمدان]

يا منبع الرقة و يا منبع ألزين
أنتي الأميره و البنات الجواري

يا ويل حالي كل ما قلتي أنزين
كني ملكت الكون بحر وصحاري

......

[الحمدان]

سلطانة الغيد يامجنونة افكاري
ولهان لعيون تذبحني بنظرتها

انتي هواي ومكانك داخل اشعاري
بالحب انتي الفضيله يامروتها

......

[الحمدان]

‏جالس لحالي على مركاي متمركي
‏أراجع اللي مضى وأبكيه وأفتكره

‏ما غير أردد قصيدة متعب التركي
‏توديع الأحباب مثل الموت له سكره

......

[الحمدان]

‏وأنت الذي زينت يا غاية الزّين
‏ حياتي اللي نورها من حياتك

‏أحب فيك الحب يا جامع اثنين
‏الزين وطبوعٍ تكمل حلاتك

‏وأحب فيك العطف واللطف واللين
‏وأحب فيك رضاك عقب زعلاتك

......

[الحمدان]

ماني بناسخ ولاصق كل ما جاني
‏ذوقي فريد ولا كل شي يعجبني

‏اما كلامن يحرك كل وجداني
‏والا سكوتي بصمت الذوق يكتبني

ذائقة

[الحمدان]

ماني ضعيف إيمان لكني انسان
تجرحني الكلمة ويقتلني الظن

قصة مشاعر خلفها الف خذلان
عاشت وكبرت مثل مايكبر السن

انا ضحية صمت في ظلم الأزمان
صابر واقول الجاي يارب احسن

ياكثر شرهاتي علئ ماضي كان
وياكبر هقواتي علئ احلام ماجن

......

[الحمدان]

اعمارنا تجري مع خط الاقلام
‏تطوي بها الأيام طي الوثايق

‏فيها الفرح مره ومرات أوهام
‏وهذا هو الواقع بجد وحقايق

......

[الحمدان]

ماكلّ غـايـــب عـن عـيــونـي فقدته
‏و ماكل شخص القاه يستاهل اغليه

‏مـن بـعْـــد ما قلبي شقيتــه وعدته
‏ما يسكنه غـيــــر الّـذي يعتني فيه

......

[الحمدان]

‏بكره تشع إن قالها الله أمانيك
‏مهما غفت في ليل الأقدار شمسك

‏لا يشغلك عن فرحة الجاي ماضيك
‏ولا يسرقك من واقعك صوت هجسك

‏ولا تيأس إن يبست منابت مساعيك
‏بكره يسيل الغيم ويطول غرسك

‏رضاك عنك عن رضاهم يكفيك
‏ويغنيك عن حب البشر حب نفسك

......

[الحمدان]

غرك اني في فضاء دنياك هايم
‏في سواك من البشر ما انا اتفكر

‏وغرك اني ما اتسمع فيك لايم
‏من مجاميع المؤنث والمذكر

‏تحسب ان قلبي ملكته ملك دايم
‏يوم شفته لا يخون ولا تنكر

‏انتبه من سجة القلب المهايم
‏لا نسى ينسى ولا عاد يتذكر

ذائقة

[الحمدان]

‏لاتحسب انك تخدع الناس بالهرج
الناس تعرف كل صادق وكذّاب

الكذب يلقى صاحبه موقفٍ حرج
والصدق نور ومن مشى فيه ماخاب

ولاخير باللي يتبع العوج والعرج
من عاش بالحيلات يخسر ولا طاب

......

[الحمدان]

ياصدري اللي على الكتمان متعوّد
ياكبر قدرك مادام الناس ما تدري

خلك على واقعك بـ الصبر متجوّد
لين الله يبدل الأحوال ياصدري

......

[الحمدان]

القلب صافي والنوايا سليمه
امزح مع هذا وادردش مع ذاك

عندي احترام الناس اكبر غنيمه
دربي سليم ماتنزرع فيه الاشواك

بقلمي

[الحمدان]

‏يا نفــوس العـز في دنيا الهمـوم
ما تشـوف الا المحـبة والجمـال

من وفاها ماليه بقعا عـزوم
صبرها يسفح على رووس الجبال

راسيه لو قامت الدنيا تقوم
واثـقه بــالله ولله الكمـال

......

[الحمدان]

‏ما عاد باقي لي مع الوقت مصلوح
الوقت حطم لي أماني كثيره

إلى متى حلمي* من الوقت مذبوح
إلى متى وحروف شعري أسيره

......

[الحمدان]

‏راع الغرام اللي بخل في غرامه
ماعاد من يمه علوم ومراسيل

قلّت مواصيله .. وقل اهتمامه
وحنا ما يرضينا قليل المواصيل

اما الغلا اللي ف بيض الايام شامه
والا الجفا اللي ينهي القال والقيل

......

[الحمدان]

يموت حب الناس والجرح مامات
ويسيل دمع العين دام الغلا حي

لاعاد ترجي رجعه الوقت لافات
أللي مضى لا يمكن يرجعه شي

......

[الحمدان]

ياحضره الصمت عبر كل مافيني
البوح عاجز عن التعبير له فتره

صوت التناهيت يطربني ويكفيني
واعاتب الواقع الملموس بالنظره

......

[الحمدان]

‏خسرت وآجد في حيآتي وتألمت
‏وعرفت آني دآيم آبقى لـ حآلي

‏غآبوآ عن عيوني كثير وتعلمت
‏أن آلزمن مآيآخذ إلا آلغوآلي

......

[الحمدان]

‏يسعد مساء ناس علينا عزيزين
‏قبل اللسان القلب ساق التحيه
‏
‏مكانهم عندي على الرأس والعين
‏واحبهم في الله ومن طيب نيه

بقلمي

[الحمدان]

يا قلبي أدري فيك طاهر و حسـّاس
لا بــآس و إن گانت جروحك گـثيره

حزنك و ضيقك و إنعزالك عن الناس
صدقني إنها بعض الأحيان خِـيـره

......

[الحمدان]

بين الأمل والياس عايش على لو
ليت الأماني تنتهي بالتمني

(حلمٍ) سكن فيني وأنا ساكنه تو
عشته خيال وخيب الوقت ظني

......

[الحمدان]

ﺣذر ﺗﺑﯾـع اللي ﯾﻋزك وﺷﺎرﯾك
في ﺫﻣﭠي ﻟو راح ﻋﻣرك ﺧﺳﺎره

ﻓي هاﻟزﻣن ﻣﻧﮬو ﯾﺣﺑك وﯾﻏﻟﯾك
ﺣﺎﻓظ ﻋﻟيه وﺧل ﻋﻧك ﺎﻟحقاره
​‏ ​‏ ​‏
......

[الحمدان]

‏الطـــيب للانسـان مــثل المـــناعه
يستخدمه لمكافحة بعض الامراض

واكــبر مرض واجب علينا انـتزاعه
الحقــد والغيبه وتشــويه الاعراض

......

[الحمدان]

ماجيت يم السوق لجل اتشرى
‏لا والله الا ضاق صدري ومليت

‏تاخذني الضيقة من البيت برى
‏واليا طلعت أرضى على ضيقة البيت

......

[الحمدان]

انا وصلت لمرحلة ما ابي شي
‏والمرحلة هذي ختام المراحل

‏لا باكيّن ميت ولا راجيّن حي
‏ولانيب متحسف على كل راحل

‏شفنا وعفنا وانتهت رحلة الغي
‏ماعاد به مركب ولا فيه ساحل

......

[الحمدان]

اما تسابقني على العز والطيب
‏والا معي يا صاحبي لا تردى

‏فلا تدوّر من ورانا عذاريب
‏حنا نشوف أهل الردى وانتعدى

......

[الحمدان]

الناس واجد واقرب الناس مني
رجلٍ يبادلني الغلا والحشيمة

شخصٍ ادور له عذر لا عزمني
وشخصٍ اجيه بلا اتصال وعزيمة

......

[الحمدان]

ياطير وسّع خاطرك فوق الاشجار
واصدح بزينات اللحون الجميله

لو بالخواطر ضيق واحزان واسرار
الصبر غايات النفوس النبيله

......

[الحمدان]

صبرنا وكافحنا ولابد ماتفرج
وتشرق لنا شمس الأمل بعد ماغابت

وضاقت وشانت بس لابد من مخرج
يزيل الهموم اللي على القلب تترابت

واذكر سنين الويل ايام كنت احرج
وقول الله لله كيف الايام وش جابت


......

[الحمدان]

‏بعض السوالف وقعها يدمغ الراس
من ناس ترفعها عن الشك والريب

والضُلم جمرة والأمل يقطع الياس
والحقد آفــة والنميــمة عذاريـب

......

[الحمدان]

الا يالله انــي طالبن طاعتـك ورضاك
وعلم ليا ذكروا هل الخير نذكـر بـه

انا في رجا عطفك وانا ملتجي لحماك
تفرج همـوم القلب يافارج الكـربـه

إلياذعذع الغربي وحرك غصون الراك
وناح الحمام وعالي الصوت يجهر به

تنهت مثل المضرم اللي لقا التمباك
تنهت صويب ٍمونسٍ لكزة الحربه

......

[الحمدان]

الا ياوجودي وجد بدوٍ حداها القيض
تحرا الربيع وطوّل الوقت ما جابـه

خذلهاخبير الطقس واعلن قدوم الفيض
والاقدار عيّت والتوقع فلا صابه

......

[الحمدان]

على فرصةٍ ضاعت على كاضمين الغيض
تعزووا بقو الباس والباس يرثابه

عسى الله يبدل سود باقي الليالي بيض
ويفتح بــ وجه المنتظر جملت ابوابه

......

[الحمدان]

‏مرت سنه فيها اشترينا وبعنا
شيٍ يدوم وشي ابلته الايام

كل عام والطيّب من الناس معنا
ولا الردي جعله يولي مع العام

......

[الحمدان]

‏اللي علـيه القصـيد منـثّر اعـجابه
اقول له صح زينك والشعر خلّه

ياقـصة الحـسن ياعينـه ومخـلابه
ياشمـسه الشـارقـه ياغـيمه وظلّه

......

[الحمدان]

زينك تعدا مرحلة صفوة الجيل
كنك خلقتي من فصيله لحالك

ملامحك مع العيون المظاليل
هذي علامه فارقه في دلالك

عاد الشعر لا فلته كنه الليل
غطى الردوف اللي تجيب المهالك

والخصر كنه يشكي الجوع والويل
متميزه في كل باقي خصالك

......

[الحمدان]

انـا تـمـنـيـتـك مـثـل ما تخيلت
لكـن لقيتك فـوق نظـرة خيـالي

مع البها بالملح واللطف سـيلت
ما مثل زينـك بالخـلايق حـلا لي

أصبحت بعيوني وبالقلب قيلت
واخذت نظـراتي وفكـري وبـالي

......

[الحمدان]

لعيـــون حسـادي تبسمــت للضـيق
مافيــه أحـد يقــــدر يعكــر مزاجي

اضحك مع اعدائي ولو نشفت الريق
وامرح ولو جـــوي غشـاه العجاجي

......

[الحمدان]

طبعي اكابـر واقلــب الضيـق ترويق
واعيـش حظــي في فـرح وابتهاجي

واحرق قلوب اللي بهم حقد تحريق
واغيـــض كل اللي يريـــد انزعاجي

......

[الحمدان]

يا لايمـين القلب في حـب نـوره
لو كان شـفتوهـا بعينه عذرتـوه

باللطـف والتقديـر دايـم تـزوره
باسبابهـا صافي مثل ما خبرتـوه

نوره سرور القلب واسمه ونـوره
هذي هي اللي في غلاها عذلتوه

......

[الحمدان]

يحــدني وقــتي عـلى شيّ مابيـه
وأمشـي على درب المجامل غصيبه

أشيل ضيقـات العتب والمشاريه
وأدفع من أعصابي وعمري ضريبه


......

[الحمدان]

‏لاضاق صدرك قول للضيق لاباس
بشكي لربي والقدر بكتفيبة

الصبر نعمه والحزن يوجع الراس
والعسر بعده يسر هاذاء الحقيقة

.....

[الحمدان]

الله يزيد الخير في ديره الخير
وعسى السحابه من وراها سحابه

غيم و مطر و اخبار خير وتباشير
يالله عسى دعواتنا مستجابه

......

[الحمدان]

لاتلبسين الخوف وأنتِ شجاعه
لو المواقف بعض الأحيان تنهاب

ولاتقبلين القل وأنتِ ..كثيرة
ولاتطلبين الحل وانتِ الأجابات

......

[الحمدان]

على تربيتنا كل جيلٍ يورث جيل
نشوف الحياه بكبرها مالها قيمه

اذا واسطتكم حبة الخشم والتطبيل
ترا واسطتنا عزة النفس والشِيمه

......

[الحمدان]

بين الصبر والصمت والخاطر الشين
‏ما قلت يا ليل العنا وش جرالي
‏
‏و من كثر صدماتي بناسٍ عزيزين
‏قمت أتحرى صدمتي من ظلالي

......

[الحمدان]

مافادني ياصاح كثر التنهات
قبلك بكيت من الحزن والمصايب

ياصاح لاتبكي على فايتن فات
عمر البكاء ياصاح مارد غايب

اللحظه اللي تحتريها ولاجات
هذا مقدر وللمقدر سبايب

......

[الحمدان]

ماعندي لـ كشف النـوايا مـرونة
من طاب فالجنة ومن خاب فالنار

أعــامل العــالم بمـا يظـهـرونـه
واترك خوافيهم لعـلّام الاســرار

.....

[الحمدان]

انا اشهد ان البعض ماله شبيهين
بافعاله اللي مثلما الطيب فاحت

غالي وحُبـــه حــل بين الشرايين
ومكانته وسط القلوب استباحت

......

[الحمدان]

يا لوعـتي من دهـري اللي بـلاني
وخلى فوادي جمرةٍ بين الاضلاع

أمشي ولا ادري وين همي رماني
كـني غريرٍ من يدي ميمته ضـاع

أقـول يا ربـعي وش اللي حـداني
على صروف الدهر والدهر لـوَّاع

......

[الحمدان]

لا تــتـرك الـهـذار يـاخـذ عـلـومك
يـحـط مـعـهـا مـثـلـهـا ويحـكيـها

واستر عن اصحاب الشماته ثلومك
تصـلاك مـنـهـم هرجـةٍ ما تـبـيـها

واحـذر تـجي راع الـردا في لـزومك
تـلـقى المـذلـه من يـده تـرتـويها

......

[الحمدان]

قدر مـقـام اللي يـقــدر مـقـامـك
واجـز الذي عاملك بالخيـر خيرين

وأحـذر تـنقص لـلـوفـي اهتمـامـك
مـا يجحد الـوافيـن غير الـردييـن

......

[الحمدان]

ياالله يلِّي من ترجـاك يعتاض
ياواحـدٍ ملـزوم نَتْبَعْ فروضه

يالله يارزاق ياخير عواض
لامِن بغيت العبد تاقف حظوظه

يامن شفيت أيوب من عقب الأمراض
تكتب لعبدك مارجاه ويعوضه

......

[الحمدان]

وش فيك ياصدر الشمالي تضايقت
والناس تضرب في سعتك المثايل

أفا ياصدري ضقت من جاير الوقت
خابرك ياصدري تشيل الثقايل

وش فيك علمني لك أيام مارقت
ضايق وفيك الهم صايل وجايل

......

[الحمدان]

‏التجاهل ما يعلّي لك مقام
والتغلّي ما يثبت لك وجـود

لذة الدنيا مواصل والسلام
والغرام يمـوت من كثر الصـدود

......

[الحمدان]

والله ما مثل التوكل على الله
يملا لك الدنيا سعاده وتوفيق

واللي يردد دايم استغفر الله
تلقاه مايدري عن الهم والضيق

ذائقة

[الحمدان]

‏يا الله توفقنا لـ طاعتك ورضاك
‏وتجعل لنا عفوك عن النار حاجب

‏يارب واجعلنا مدى العمر بـ حماك
‏عن الذنوب ولا نقصّر بـ واجب

؟؟

[الحمدان]

يارب وان ضاقت عليّ الوسيعه
‏انت الذي لا ضاق صدري اناجيه

‏وعبدك لو ان الوقت عيّا يطيعه
‏ما ينحني راسه لغيرك ويرجيه

؟؟

[الحمدان]

سجدت لـ اللي له الثنتين والمنّه
‏وبداخلي من مطاليب العمر واجد

‏ولا طلبته سوا الفردوس والجنه
‏طاحت من عيوني الدنيا وانا ساجد

بقلمي

[الحمدان]

صَفْ النوايا واترك الهرج للناس
الناس محد ٍ سالم ٍ من احـكاها

بعض الهروج اللّي تجي مالها ساس
تتعـبك لافـتّشت فـي محـتواهـا

لَـ تصير في بعض المواقيف حسّاس
الناس يبلـش مـن يـدَوّر رضـاها

......

[الحمدان]

‏لا صرت ماتمشي مع الناس محتاج
‏ولا جاك في بيتك من الناس ديان

‏ولا شلت في جيبك مواعيد وعلاج
‏هذي غناةٍ ما تقدر بالأثمان

...

[الحمدان]

حيل الله أقوى وش حنا مسوين
غير العلوم الطيبه فالقرابه

عزالله إنا للجماله حريصين
وإن هب ريح الطيب حنا هبابه

....

[الحمدان]

أَحْفَظ لساني عن يقول ويقولـون
لا احرجـت خلق الله ولايحرجـوني

مالي ومـال الناس واللّي يسَـوُون
وشْ لي بْكَسب ذنـوبها والظنوني

اخطيت واخطي والمخاليق يخطـون
وكثر التجارب والبشر علموني

....

[الحمدان]

عـيّت تزين ظروف الأقدار وياي
وان جيت ازيّنهــا بـ عـيني تشيني

حلمي ذبل من كثر ماتاهت خطاي
وطعـم الأسى واليآس بيـّح كنيني

ليت الزمن جاني على كيف مشهاي
ماكان ضاعت فرصي من يديني

....

[الحمدان]

إن سـكنت البعـد تبقى بالعيون
وان غديت اسـرار بعيـوني تبين

وان ملكت البال واشغلته تمون
وان تجـاهلت الغـلا تبقى ثمين

أنت شفي والسعاده والسـكون
والحبيب اللي مزاجي بك يـزين

....

[الحمدان]

عنّز على اللي قيمته ما تحدرك
وان جا مجاله قالو الناس رجال

والراي لا تعطيه من لا يشاورك
مالك وماله لا شكى لك ولا قال

....

[الحمدان]

‏كل الخساير عوضها عند رب الانام
واكبر خسارات خلق الله كراماتها

واهانة النفس عيب انكان ماهي حرام
وطرد المقفي علامه من علاماتها

....

[الحمدان]

يالله دخيلك من طعون المناقيد
ومن غلطة العاقل وقل المروّه

ومن كلمةٍ تفهم على غير ماريد
يمسك طرفها منْك خبلٍ مفوّه

....

[الحمدان]

لا تترك الحزن يستحوذ على قلبي
خـل المشاعر تـزور القلب وتحبه

لا صرت تدري بآحآسيسي وفي حبي
حرام تترك فؤآدي وانت ساكن به

....

[الحمدان]

مذكور بالخير ياشخصــن تمنيته
لو كان مايسمع الداعي ولا يوحي

انت اخر انسان في دنياي حبيته
وانت اول انسان بديته على روحي

....

[الحمدان]

يسعد صباحك عاد وش له النوم
النوم ماهو للحبايب ي خلي

الشوق جاك يصافحك ي آلغلا قوم
صحصح فديتك ي بعد كل غالي

....

[الحمدان]

‏الحظ سيف و ضربته في حيآتين
آمـآ تـعيش بـ عــز والا مـذله

يآوقت حنآ ضيوف فتره ومآشين
آرفـق وسيـفك بـ آلـردى لاتـسله

....

[الحمدان]

أغازل الريح و أغازل ظلال الشجر
‏و أغازل الشمس و أقبّل جبين الصباح
‏
‏أدوّر الرزق من ربّي وأدوّر الأجر
‏و أدوّر النور في وجهك ووجهك فلاح
‏
‏أنا لو أشوف وجهك بعد طول الهجر
‏يمكن إني أطير لو مالله خلق لي جناح

....

[الحمدان]

‏كل الخساير عوضها عند رب الانام
واكبر خسارات خلق الله كراماتها

واهانة النفس عيب انكان ماهي حرام
وطرد المقفي علامه من علاماتها

....

[الحمدان]

‏عليك باللي يلحق القول بأفعال
والا الردي خله وجنِّب مساره

أنشهد أنه ما كذب واحدٍ قال
من لا يعدِك ربح عدّه خسارة

....

[الحمدان]

أنا كنت مثلك ضايع الفكر بين و بين
لين ان اغلب الاصحاب بانت روابعها

و من العام و أنا طايح ٍ في نظام ٍ زين
لا شفت العلااقه ما تناسب لي اقطعها

......

[الحمدان]

دلني يارب درب الهداية والرشاد
حالتي ماهيب زينه ولاتسعد عدو

مره احارب هواء النفس واخذها عناد
ومره اتبعها معا الي وراء انفسهم غدو

....

[الحمدان]

يالله اغفر لي ذنوبي قبل يوم التناد
لاسمعت العين تشهد والاعظاء اشهدوا

ودي اني زاهدً في حياة اهل البلاد
ابدويً يفعل الخير ويحب البدو

......

[الحمدان]

اعيش في فترة تصالح مع الذات ​
ما عشتها قبل كذا في حياتي​

شفني وانا مقفي ما احب التلفات ​
لو التفت ضيّعت كل امنياتي

....

[الحمدان]

ليت الهموم اللــي تجينا تولي
وليت الحزن يطري علا القلب ويروح

وليت المواجـــــع بالحشا ما تضلي
وليت الزعـل ياصاح مايسكن الروح

....

[الحمدان]

ليت السعاده في سمانا تِحلي
وليت الفـرح يملا سكنا والاصروح

وليت الاماني بالبشاير تهلي
وليت الحظوظ تهب لنا كل مملوح

....

[الحمدان]

بـابٍ يـجـيب الريـح صـكـه واستريح
واللي يـسـبب ضـيقـتـك خـله يـروح

خلك مع العالـم ومع نفسـك صـريح
واحرص على صدق العباره والوضوح

واعرف حقيقه ما يصح الا الصحيح
واللـي خـفى لازم بـه الـدنـيـا تـبـوح

......

[الحمدان]

ناس ليا من طحت لفاظة انفاس
وناس طواري طيحتك تحتريها

‏خلك حديد إن ثقلوا ضربة الفاس
تراك لا خشبت بتروح فيها

....

[الحمدان]

‏تـجمّل وجامل واكـرم ولاتـشاور ضـيف
وخـلـك عـلـى صـكات الاقـدار مـتقوي

ومـن لا يـقدر حـاجتك والـزمان مريف
اجل لونصيته في الدهر ويش بيسوي

....

[الحمدان]

وقت اللوازم ينكشف وجه الصديق
وتبين وقفة صاحبك والمستوا

أما حسبته بالفعل نعم الرفيق
وإلا طلع راعي سوالف بالهوا

....

[الحمدان]

‏شـكيت بُعـدك واحتواني حضـورك
من غير مدري صرت عايش بذكراك

والعين عاشـت مع طيوفك ونـورك
والبـال عندك والمشـاعـر تـمـنـاك

والروح باحسـاس المحـبـه تـزورك
تمسي على حبـك وتصـبح بـرجواك

....

[الحمدان]

‏لاعاد تنشدني ورّا خاطرك شين
‏بالله خل اللي بصدري بصدري

‏ انا ادري انك يارفيقي حمر عين
‏ ولاتنشد الا كود من زود قدري

‏ غير الزمن يومي بنا يسار ويمن
‏ وانا تصدد منّك مبغاك تدري

‏ دايم نقول ان تالي الوقت بتزين
‏وان كان تبغى الصدق والله مدري

....

[الحمدان]

‏ِ
‏عليك السلام ورحمةْ الله والـرضـوان
‏ياقلب ٍتعب وأخفى عن العالم أوجاعه

‏يذوق الألم ومكابد الـضـيـق والأحزان
‏ولا يـشـتـكـي لـو تلـوي الضيقه ذراعه

‏توشح بصبر أيّـوب والصمت له عنوان
‏ولا غـيّـرت ضيقات الأيـام بـ أطبـاعـه

....

[الحمدان]

‏مثل نور الصبح لامزّع خيوط الظلام
‏الحقيقه في دجى الزور نارٍ تشتعل

‏اجتماعٍ مايجي فيه تقوى واحترام
‏كان جاله رايق البال عوّد منفعل

‏الظروف احيان سمحه وممشاها تمام
‏وفي بعض الاحيان عوجاً مثل قرن الوعل

‏ينخفض سعر المواقيف في سوق الكلام
‏ويرتفع سعر المواقيف في سوق الفعل

....

[الحمدان]

مرحبَـا وانت المبدّا والمولّا
‏عند من عينه لزلاتك ضريره

‏يوم جيت وحظي المعثور ولّا
‏الله اللي حط في يدينك مصيره

‏انت ربي خالقك من نور ولّا ؟
‏طحت من سابع سما فالمستديره

....

[الحمدان]

يا مالك ٍقلبي وعيني تراعيِك
‏لبّيت قلبي يوم هاض بغرامك

‏احترت من زوُد الغلا وين اوديك
‏حتى عيوني ما تليق بمقامك

‏والله لو صدري يضمّك ويحويك
‏لجعلك فوق القلب تبني خيامك

....

[الحمدان]

‏الكرم والطيب مايعرف الا الطيبين
‏والردي ما احدٍ يبي لاغداه ولا عشاه

‏الكفو مفتوح بابه على طول السنين
‏والردي ماينفتح بابه الا في عزاه

....

[الحمدان]

‏القلب مايمشي على وِد راعيه
حاولت أغصبه لـ المحبّه وعيّا

للحين يذكر شخص قفّى وناسيه
يبغى وصاله والوصل ما تهيّا

....

[الحمدان]

كثر الكلام يحط من قدر راعيه
والصمت له عاده يصون الكرامه

سلم على اللي ماتخونه معانيه
عن الخطأ والهزل ينقى كلامه

....

[الحمدان]

‏يطيح واقف راعي الطيب لو طاح
‏طيبه رصيده فالشدايد يشيله

‏يموت راع الطيب والطيب ماراح
‏يبقى مع الأجيال لو راح جيله

....

[الحمدان]

قربك من آلطيّـب لنفسك كرآمـه
‏وبعدك عن آللي مآ يودّك شرف لك

‏مآلك و مآل آهل آلحسد و آلرخامه
‏خلـك مـع آللي لآ نصيته وقـف لـك

....

[الحمدان]

تبي تشرف من تربى ورباك
ثلاث لاتسمع ولاتطيع فيـها

كرامتك ضميرك الحي ومبداك
ماتقدر اليا بعتها تشـتريها

....

[الحمدان]

‏رفقتك مثل الذهب بالهون والشده
‏ماتختلف .. بإختلاف العالم الحآلي

‏غيرك إليا غاب ما حسبه و لاعده
‏وإلا إنت غير البشر دايم على بالي

....

[الحمدان]

ارفع يدينك ومافي خاطرك قوله
‏من رحمة الله لا تيأس ولا تقلق

‏لا شفت قدامك البيبان مقفوله
‏بيبان ربي كريم الوجه ما تغلق

بقلمي

[الحمدان]

شيـهانـة فـوق وكـر الشياهين
مثل النداوي مانزل دون وكره

أحلامـهـا مابيـن بكره وبعدين
ترسم بقايا الامس لـ حلام بكره

....

[الحمدان]

‏الود نعمة والتواصل براهين
‏واجب تواصل كل شخصٍ تودّه

‏وان كان في الزحمة تضيع العناوين
‏يا طير خذ مني سلامي وودّه

....

[الحمدان]

صباحك انا واطيـاب عـــوده وفله
تطــري عليـــك وتنتثر ورد وازهار

يا اللي غلاك استوطن القلب كله
وخذ شعوري والمشاعر والاشعار

ياطيـر خـــذ مرسـول قلبي وشله
واعبـر بشعـري للذي قلبي اختار

....

[الحمدان]

مبطي احـبـك بس مـا ني معـلم
أخاف لو علمت في حبك احرجك

أمـر مـن حـولك وبالقلـب اسـلم
وانا بكل الحـب مع روحي ادرجك

ما غـير في حبك اهوجس واحـلم
دخلت في قلبي ولا ني بمخـرجك

....

[الحمدان]

ترى الشــاعـر الي ما يحلّق مع الأفاق
قصيده يموت وينتـهي لا دخل قبره

كلامـه على ميـزان جـزل الكـلام رقاق
لوّ انـه يقــدم فـ المنـابر ولـه خبره

....

[الحمدان]

ياطيب القصيد الي تلافت له الاعناق
عن الفكرة المستهلكه طايلً شبره

ترى نظرة المبدع مثل بنـدق التفاق
نهار التـحدي وقعها يلقـط الابره

....

[الحمدان]

ان كان فعلك طاب من طيب ذاتك
ماهو بـ شـرط توافقك كل الأذواق

تدري متى بـ تكون خاسر حياتك
لا صرت معدوم المبادي و الاخلاق

....

[الحمدان]

‏رغم صكات الزمن ماني بـ نادم
زودتني عزم واصرار وجساره

والله إني ماخسرت من الاوادم
غير من كانت معرفتهم خساره

بقلمي

[الحمدان]

ولا أنت يا أبو العيون الناعسات الوساع
سلهامها يأخذ العشاق لـ أبعد مدى
⠀
سهوم نظرتك ما يقدم عليها شجاع
حتى لو أنه من اللي ينطحون العدى
⠀
لعيونك معرضٍ عمري لدرب الضياع
واللي بقى منه واللي راح جعله فدى
⠀
أحنّك من الوداع و من جروح الوداع
مثل ما أحن الرفيق الطيّب من الردى

....

[الحمدان]

العز هيبة والشرف يرفع الراس
والكذب سلعة مالها أي قيمة

والبيت مايبنى على غير مقياس
لابد توضع له قواعد سليمة

خذلك من الدنيا تجارب مع الناس
واسلك دروب أهل العقول الحكيمة

واعلم بأن الناس آلاف الاجناس
والعيب يجلب لك عواقب وخيمة

....

[الحمدان]

‏ما تعوّدت أحني الرّاس من بين الصّفوف
‏ولا تعوّدت أتذرّى و أدوّر ليّ ذرى

‏إن وردت آرد على العدّ و العالم تشوف
‏وإن وقفت آقف على العزّ و العالم ترى

ذائقة

[الحمدان]

يالله استرني بـ لطفك دام سترك ثوبي
‏واغفر لـ عبد ٍكساه الذنب واصفح عنّه

‏مذنب ولا جيت اقارن رحمتك بذنوبي
‏اذكر ان ذنبي عظيم وعفوك اعظم منّه

بقلمي

[الحمدان]

مايهتني بالنوم قلب النداوي
تومي به الدنيا على كل مرقاب

لو هو على الاقراب عدٍ رهاوي
ما يامن الايام من قرصة الداب

ولاهو على الدنيا كثير الهقاوي
ان ما حدَاه القوم حدوه الاقراب

....

[الحمدان]

‏ﺍﻟﺼﺒﺢ ﻣﺎﻳﺤﺘﺎﺝ ﻏـﻴﺮ ﺇﺑﺘﺴﺎﻣـه
ﻣﺎﻫﻲ ﺑﺼﻌﺒـه ﻟﻮ ﺗﺒﺴّﻤﺖ ﻟﻠﻨﺎﺱ

ﺧﻞّ ﺇﺑﺘﺴﺎﻣﺘﻚ ﺍﻟﺠﻤﻴﻠـه ﻋﻼﻣه
ﺑﺈﻥّ ﺍﻟﺼﺒﺎﺡ ﺇﺣﺴﺎﺱ ﻣﺎ ﻣﺜﻠـه ﺇﺣﺴﺎﺱ

بقلمي

[الحمدان]

‏طوينا صفحت الماضي وتبنا
خذينـا اللي كفـانا وانتـهينا

وعن قولة نبي نصبر تعبنا
وعن اللي مايراعينا سلينا

بقلمي

[الحمدان]

‏وتدور الأيام و أحلامي هي أحلامي
عزيمتي ثابتة و الوقت متغيّر

عديت خوفي ما دام الحلم قدامي
مسيّرٍ بالخفا و بالظاهر مخيّر

و عيونك السود كانت مصدر إلهامي
في ليلها كنت أشوف وصولي النيّر

وأنا صغيّر أراقب سرعة أيامي
واليوم ليت الزمن خلاني صغيّر

....

[الحمدان]

علينا سلام ورفع قبعه وسبع انعام
قبائل اصيله ترفـع الـراس وتجمّل

نسـوق الجـمايل في دواويننا قدام
حملنا خطايا ناس مـاهي بتتحمل

ذائقة

[الحمدان]

عليها جمالٍ مابعد مرّ بالاجيال
‏جمالٍ على بيض الغنادير مطغيها

‏فرس حاكمٍ لا ميلت بشقرً ميال
‏قبل ماتميل كل قلبً يباريها

‏ترفع من الجهال وتضييع العقال
‏يروحون في سياتها من حسانيها

‏تقدم لها الارواح وتقدم الاموال
‏تهز الدول من شامها الى يمانيها

....

[الحمدان]

في صباحك تاقف الكلمات دور
وأختصرها وأسمع القول الاخير

لاعتبرتك في صباحي كل نور
اعتبرني في صباحك كل خير

....

[الحمدان]

يالله يالي فزعتك تكشف الضيق
في بحر عفوك ماتضيق المراسي

انا في وجهك من قليل التوافيق
ومن موقفن مايرتفع فيه راسي

بقلمي

[الحمدان]

‏مشكور يا بايع مشاعرك مشكور
‏العام ذنب وهالسنة ذنْب ثاني

‏وش عاد أقول ولا بقى شيّ مستور
‏ما طعتني يوم إبتسم لي زماني

‏لا تعتذر لو خاطري منك مكسور
‏لا تفتكرني دام قلبك نساني

....

[الحمدان]

مالقينا في الجفا حاجه تسليّ
وما حصدنا من وراه إلا الحسافه

ما لوّى يد الهوى غير التغليّ
وما كسر ضلع الغلا غير المسافه

....

[الحمدان]

‏يالله بحظٍ يرتفع للسـماء فوق
يزين وضعـه بعد ماكـان مايل

ياواحـدٍ تعلم خفى كل مخلوق
بأمرك وتدبيرك تهون الثقايل

يارب تحفظنا من الشـر والعوق
وتزيل همٍ داخـل الصـدر هايل

وشيٍ نبيه ايصير جاهـز وملحوق
والحلم يصبـح واقعٍ بالدلايل

....