فوق هام السحب ( الشعر الشعبي) على متن القوافي

[الحمدان]

‏اصـدق مشاعر قالها قلم شاعر
لاجمل حبيبــه فــي زمان المحبه

لاجلك اكـَن بداخلـي كم مشاعر
ولاجلك في اعماق المحاني اصبه

...

[الحمدان]

مو شرط لامنك تعلقت في شخص
تكون أسعد شخص في مجمل الوقت

ترى المحبه والفرح مالهم خص
أحيان جرحك يبتدي لاتعلقت

...

[الحمدان]

‏كيف ما تبغاني أتعب ولا أدوّر رضاك
‏وأنت مالك في عيوني وفي قلبي شريك

‏وإن تطرّقت القصايد ولا وفت غلاك
‏يكرم البيت المسكّت من البيت الركيك

‏أنت لو تطلب ماضمت ضلوعي قلت جاك
‏أسهج الضلع الموالي وأخذ ممّا يليك

...

[الحمدان]

‏يقول المبدع حمد ال جميله :
مرحبا في ذمتي بالرقم ذا اللي جاني
‏فاقده قدلي ثلاث شهور مادري عنه

‏الى ان وصل وختمها بـ :
مرحبا ياللي ملكت الروح لو مامداني
‏اتلاحق هاتفك والحق على اخر رنه

[الحمدان]

‏ليه أترك الحلم وأذرف من وراه الدموع
‏وأحلام الإنسان توخذ غصب ما تنعطى

‏تشكّلي يا ظروف الدهر ومن أيّ نوع
‏بـ أجيك هادي ومتوازن وواثق خطى

‏القلب ضد الكسر والراس ضد الخضوع
‏والمتن للشيل واليمنى لبذل العطا

‏جمال بندر

[الحمدان]

‏معك ربّيت المحبة على قد الطموح
‏والنصيب يحدها والجفى يوميلها

‏اثري الغيبه حقيقة وأنا احسبها مزوح
‏قامت الدنيا علينا وشدّت حيلها

‏ياحبيبي انشد الوقت والحظ الشحوح
‏من جدار البال صورتك كيف أشيلها

...

[الحمدان]

‏خاطري مملي كلام وغيبتك فيها غرابه
‏أزهر احساسي معك والورد يخشى من ذبوله

‏كم سؤالٍ ودّي اقوله وانا عارف جوابه
‏وكم جوابٍ ٍ ودي اعرفه ولا ودّي تقوله

...

[الحمدان]

مدري القصايد فيك وش ممكن تكون
لاصرت صفحه بالغلا مالـهــا طــي

ما أبيك تسأل كيف أنا أغليك وشلون
الحب كله فيك أنا أشــوفـه شــــوي

يكفي أشوفك كل شي بــهــالـكـــون
ويكفي أشوف الكون دونك ولا شــي

...

[الحمدان]

من كثر ما مروا على قلبّي كرام
‏وقفتهم بين الحقيقه والوهم
‏⠀
‏إلا أنت ياللي لك محطات أهتمام
‏أن لم تكن أنت المُهم أنت الأهم

...

[الحمدان]

اتعب على الطيب ترى رفقته عز
‏والاّ الردي مافاد نفسه يفيدك
‏
‏الصاحب اللي لا لمح جيّتك فز
‏هذا الذي لازم تعدّه عضيدك

...

[الحمدان]

وافي وذوقة راقي وصدق ينحب
لكن عيبة ف الجفى والقطاعة

وانا لو اني فيه مغرم ومعجب
نفسي عزيزة والمحبة قناعة

...

[الحمدان]

استفزي قلوب الحاضرين وتعدي
بالهضيم الهفيف وبالثقيل المعبّى

وإلعبي في مشاعرنا وحلي وشدي
لك هلاً ماتبيد ولك غلاً مايخبّى

واثبتي للعيون انك بشوط التحدي
شادنٍ ماتصاد ومهرةٍ ما تشبّا

أنتي ألين من الغصن الرهيف المندي
وأنتي أحلى وألذ من العسل والمربى

...

[الحمدان]

ما للشعور اللي وصلنا مواقيت
ارتاح يا خاطر ويا نفس روقي

ليه انبسط فـ احلامي اللي تمنيت
وانا ادري انها كانت ابسط حقوقي

...

[الحمدان]

‏ياويل قلبي منك ياكثر مغليك
أغلى من الدنيا ثرها وسماها

ياويل قلبي منك لاحل طاريك
نفسي وهي نفسي تشك بغلاها

انسى اسامي الناس واغلط واناديك
قلبي معك وكل الاسامي نساها

‌‎ياويل قلبي من شوق يداهمه
ان لاح منك ماضي كنت أخفيه

...

[الحمدان]

‏يامسعد وجه المـسـا ببتسامـه
يسعد مـساك والمشاعر تحييك

عليك من قاف المشاعر غمامه
تروي حضـورك والملامح تكفيك

...

[الحمدان]

‏ياسكون الليل بك ناس سهارى
يشتكون الشوق في وقت السكون

والوله مايرحم قلوب الحيارى
والسهر مايرحم أهداب العيون

...

[الحمدان]

‏الطيب فينا والشهامه طبيعه
والعز فطره والوفاء كنز مكنون

شموخنا فاق الجبال المنيعه
واصرارنا والعزم فوق الترليون

اللي شرانا بالوفاء مانبيعه
لو كان في بيعه مكاسيب قارون

...

[الحمدان]

في شرعكم ياناس تردوا الضيف
يحرم عليا لعد عرفت لك باب

كيف الهوئ ياناس خريف او صيف
شرع الوفاء في الحب صار كذاب

...

[الحمدان]

‏لاتنشد المشتـاق وشلـون يشتـاق
هذا السـؤال اللي بليا إجابه

الحب من ربي يجي كله أشواق
من غير ماتعلم وتحسـب أحسابه

...

[الحمدان]

‏يجهل الإنسان وظروف الحياة تعلم
‏والدروس موضحه لناس صوت وصوره

‏ والذكي يصبح لدورات الزمن متولم
‏ويتوقع دوم عكس الحاجة المذكوره

‏يمكن يمر الرفيق الغالي و ماسلم
‏ وهو يدرأ خاطره ويقدره ويزوره

‏وينزع الله حكمة الدنيا من المتعلم
‏ويمتلكها الفاشل اللي يمسح السبوره

...

[الحمدان]

ترغ‘ السنافر بالهوى احساسهم غير
ودرب الحسن من قدهم! هم سبيـله

الورد يقصر عن هوى لفحـة الطـير
واللـي يبـي شـم الـورد ينحـني لـه

رذاذ الحبر

[الحمدان]

تضيع اكثر أوقاتي على شي مايسوى
والانسان مهما كان يحتاج لـ الانسان

ابي اللي يعاوني على البر والتقوى
مابي اللي يعاوني على الإثم والعدوان

...

[الحمدان]

اكتشفت ان الحياه بكبرها قطعة مسافه
تغوي المفتون لين العقل يصحى ويتنبه

واستعذت من الدروب اللي نهايتها حسافه
قبل ترميني ملذات الزمن في جوف غبه

ما يخاف المؤمن اللي فيه من ربه مخافه
مصدر الخوف الحقيقي واحدٍ ما خاف ربه

...

[الحمدان]

يارب خذني من بساط الدالهين الغافلين
واجعل بنفسي لامشت درب الخطيه تنفره

وارزقني القدرة على التقوى، وبر الوالدين
أبي من الكره اخيره، وأبي من الخير اوفره

واجعل كتابي لاخذيته ما أخذ الإ باليمين
مع النفوس الراضية ومع الوجيه المسفره

...

[الحمدان]

‏ترا السعـاده من بغاها لقاهـا
‏عند الكريم اللي أمرنا بذكره
‏
‏وقلوبنا والله ما تشكي ظماهـا
‏إذا سقيناهـا بحمده وشكره

...

[الحمدان]

يالله بليل تستحي منه الاحزان
ويالله بوقت يطرد الضيق عنّا

ورزق مقدّر منك من دون حسبان
ومن دون لا قوّه ولا حول منّا

وبشرى يهلّ لكبرها دمع الاعيان
ونسجد لها سجدة شكر ونتهنّا

ياوالي الدنيا وياعالي الشان
وياعالم اللي بالضمير استكنّا

...

[الحمدان]

‏اي والله ابكي ليتني مافقدتك
‏واي والله انه ماجبر خاطري شي

‏كل ماسجدت لوجه ربي ذكرتك
‏يالميت اللي باقي بداخلي حي

....

[الحمدان]

يهدك الضيق وإلا الضيق ماهدك
أطلب من الله قليل ويعطي الواجد

ماتنفع الناس لو تكشف لها سدك
أشرح علومٍ بقلبك وأنت له ساجد

...

[الحمدان]

يابحر ليش الناس مايفهمونـك
لامن لزمت الصمت قالو تغيرت

شفهم مع الايـام مايرحمونـك
الله على دنياك ياكم تجرعـت

يابحر لاتزعـل ولايجرحونـك
دامك على درب الوفا ماتغيرت

...

[الحمدان]

‏على سبــيل الـصـمت يا مـكبر الـبـوح
‏والعين تـحـكي بـوح قـد طـال صـمـته

‏بـعــض الكـلام يعـانق الـروح ويــروح
‏وبـعــض الكـلام يموت بك ما نطقته

...

[الحمدان]

صمتك عن الزلات طيب وشجاعه
‏تكبر بعين الي على الطيب رباك

‏خلك سوات الضلع عزم ومناعه
‏لايزعلك هرج الردي لو تقفاك

...

[الحمدان]

يقـولـون متغير وانا ماتغيرت
من جيت للدنيا وهـذا مسيري

من عادتي لاضقت والا تحيرت
أصد وأكفي الناس شري وخيري

...

[الحمدان]

انتي أحلى بيت بصـدور القوافي
وانتي كل القصـد يارووح الشعر

أن وصـلتي القلب لايمكن يجافي
ياحظــور المـزن وصـوت المطــر

يا رقيق الروح واحساسك الدافي
يلـي ثغــرك ورد وانفااسك عطـر

دونك كل الخـلق انا قلـبي معافي
ما ابـي من غيـرك انا عمـري يمـر

...

[الحمدان]

‏على سبيل الصمت يامـــكبر البوح
والعين تحكي بوح قد طال صمتـه

بعض الكلام يعانق الروح ويــــروح
وبعض الكلام يموت بك ما نطقتـه

...

[الحمدان]

‏يسعد مساء طيفك وطلت محياك
يا حور في الارض ماحدن غيرك

ان قلت لك انت القمر نوره حياك
وان قلت انت الورد عطره عبيرك

...

[الحمدان]

يوم الوفاء يجمع شتات المخاليق
يطري على قلبي من الخلق مخلوق

فكري معك ي صاحبي له طواريق
منت برخيصٍ ي بعد كل مخلوق

...

[الحمدان]

‏لاضاقـت الدنيا قل الحمدللـه
حتى ولو إنـك مـن الوقـت هايـم
ٰ
ما خاب منهـو يحسن الظن باللـه
وما ضاق صدرن يذكر اللـه دايـم

...

[الحمدان]

لك المحبه صادقه دون تشكيك
محميةٍ عن كل نفسٍ رديه

عاندت فيك الغير والقلب شاريك
وصلك طبع حبك في قلبي وصيه

مايرسمك وصفٍ يحاول يساويك
غير الخيال اللي وصوفه نقيه

...

[الحمدان]

‏فن التغافل من فنون الدهايا
واليا تغافلنا ماهو نقص فينا

نكرم لحانا عن خباث النوايا
واللي يقولونه مايمشي علينا

عقّال ياموصّي مانبغى وصايا
وعقولنا مانشيلها في يدينا

...

[الحمدان]

جعل قدري معتلي وان ذكرت اذكر بطيب
‏وجعلني لا طحت ما اطيح من عين الكفو .

سلفوني وسع خاطر وخلوني اعيش
‏والله ان بعض الليالي تضيق خاطري

...

[الحمدان]

الفعلُ يمضي وليتَ الأمرَ مرفوعُ
أمَّا المُسمَّى بذاتِ النَّعتِ متبوعُ

كلُّ القواعدِ في إعرابها صُرِفَت
لكنَّ حسنَكِ في التّصريفِ ممنوعُ

قالت أمازلتَ في الأشعار تذكرني
قلتُ الغرام إلى العينينِ مجموعُ

إنَّ الودادَ بنبضِ القلبٍ متّصلٌ
لولا هواكِ لقلتُ الودُّ مقطوعُ

...

[الحمدان]

كيف السبيلُ لأن نحيا بلا ألمٍ
في عالمٍ باتَ فيه القهرُ عنوانا

كيف السبيلُ لأن نبقى سواسيةً
فكلُّنا من ترابٍ صِيغَ إنسانا

مهما علونا فبطن الأرض مسكَنُنَا
يا من تكبَّر ما جاوزتَ أدنانا

إن التَّفاضلَ بالتَّقوى فكن فطنًا
مهما دفعتَ من الأموالِ أثمانا

...

[الحمدان]

لعيون حسادي تبسمت للضيق
مافيه أحد يقدر يعكر مزاجي

اضحك مع اعدآئي ولو نشفت الريق
وامرح ولو جوي غشاه العجاجي

...

[الحمدان]

‏الذيب مايرضى مع النـاس قيـده
‏والقرم مايرضى المهونه بدنيـاه

‏والطير لا ثارت بواريـد صيـده
‏يكفخ ويترك دار عشـه ومربـاه

‏لاشفت جرح الغبن ينزف صديده
‏ماينفع المجروح بالناس شكـواه

‏ارحل وتلقى لـك ربـوعٍ جديـده
‏وتلقى الذي يحفظ حقوقك ويرعاه

...

[الحمدان]

جعل المساء اللي بدا خير وسرور
وجعل السعد من فالكم يا جماعه

اقولها من صادق احساس وشعور
الله يرزقنا الشكر والقناعه

بقلمي

[الحمدان]

‏طاب اللقا والشوق حانت قطوفه
‏والروح جاتك يالغلا وانت جيها

‏انت الوحيد اللي عيوني تشوفه
‏بين البشر وانت الذي حل فيها

‏حبري سكن لك يوم طالت حروفه
‏واعطيت حبري من دمي ينتقيها

...

[الحمدان]

‏حنا اختلفنا فالمشاعر والكلام
‏الوضع باين والعقول تصوره

‏تجيني تسلم وارد لك السلام
‏مع كلمتين وضحكتين مزوره

‏ما فيه داعي للتشره والملام
‏كلً ضميره ف الحياة ينوره

‏ان جيت عينت الغلا والاحترام
‏وان رحت قلبي ماقدرت تعوره

‏مانيب من متسولين الاهتمام
‏ان ماحصل ماجيت منك ادوره

...

[الحمدان]

‏ادري انـه راح فـي درب الغياب
وادري ان الـحظ دوونه مقطعه

ياسواد الليل لي عندك جواب
عـن وليف راح والـخافق معه

...

[الحمدان]

تدري من أنت
‏انت الذي عمري بدونك ولاشي
‏انت العروق ونبض قلبي والأحساس


‏تدري من أنا
‏انا بدونك لا حشى ماني بحي
‏روحي معك دايم وجسمي مع الناس

[الحمدان]

‏خواطرنا وسَاع وهرجنا ذرْب ونبانا زين
‏نحَشْم كبارنا ونقدّر اللي راح ونجلّه

‏أبوي اللي مربينا على حب الأدب و الدين
‏زرع فينا من الخير العظيم اللي على الملّة

...

[الحمدان]

‏السنين اللي مضت لي من سنينك
‏علّمتني كيف أعيش وكيف أموتك

‏كنت غرقان بـ غلاك ودمع عينك
‏وكانت أحبال النجاه أحبال صوتك

...

‏

[الحمدان]

‏أتغيشم لك وأنا ماني غشيم
والخطا مردود والزلّه بلاش

النقاش أحيان موضوعه عقيم
لاتلوم اللي قفل باب النقاش

...

[الحمدان]

‏أخذ من العمُر التجارب وينعاد
‏في خاطري نفس السؤال الرمادي

‏ليه البشر تبكي على موت الأجساد
‏وإن ماتت قلوب المخاليق عادي

...

[الحمدان]

‏إذا أعـجـبـك شيء بالإنـسـان صرّح به
وإن ما أعجبك كفّ عنه حكاك ولسانك

اللي مايعجبك بعض الناس يعَجَبْ به
وأكـبـر خـطـا تـحـكـم الـعـالم بميزانك

عبدالله بن رشيد

[الحمدان]

خارج الصندوق....

- الجروح تروح وترجع
- وكلّ عين لابد تدمع
- والزمن قسمه ونصيب
- مثل مايعطيك يوجع
- والحياة أخذ وعطا
- ومثل ما تاخذ بتدفع
- والگلام كلمه وجواب
- ومثل ما تتكلّم اسمع
- أمس ولّى وصار ماضي
- وكلّ ماضي صعب يرجع
- كلمه وخلها وسط بالك
ما كل الذهب يلمع

[الحمدان]

مشتاق له لاكن حروفي تكابر
واالخل مثلي طايحً في غروره

ودي رساله منه تسعد للنضار
مادام في قلبي وروحي حضوره

محتار من حبه انا سرت محتار
ما الحل قولو له مراقب مروره

...

[الحمدان]

‏لاتُعاتب أحد على قِلة الإهتمام
‏فَ الاهتمام الذي يأتي بعد العتب مجاملة
‏
يا جعل الايام ما تقسى على الطيّـب
‏ورعى الله صدورن محد يدري بـ خافيها

بقلبي

[الحمدان]

على شوگي ونفس جفني اليتانيك
أحِن وللزعل ما منطي لزمة

بموعِد جَيتك كون أندل الميل
وأسطي أعلة الدقايق حتى اقدمة

أنا مناطرك نظرة غصن چان
اخضر بس قِبلت تعوفة يضمة

بررلي سبب عطر البلا رُوح
ولِيش الشمِّس تطلع بيها عتمة

حرت وجهك يتراوالي مرات
واقع لو لإن مشتاگ ارسمة

اخر نظرة صوغة تضل بلعيُون
حد اليگضي شوفة وعينة تعمة


شعر عراقي

[الحمدان]

مَابيه حِيل أخِذ نفس
مَاعِندي وَاهِس لِلحَچي

مِن برّة تِلگاني أبتسِم
ومِن جوّه اطِك مِن البَچي

مَابيه أكمِّل هَالدَرُب
تعبَان خلوني أنتِچي

شعر عراقي

[الحمدان]

شبِيهآ عِيونچ ترِيدين تِبچين
سَواد بعِينچ و بِالگوآ تِحچين
شبِيچ أحچيلي لَتخافِين
لَيش هوُاي ذَبلآنه
شِنوو متَعِب مَعانيِيچ
أوَل مَرة أشُوفچ هيِچ كَبرآنه
أوَل مـَرة أشوُفچ مَكسُورة تِمشين
وآنه ألـي أعُرفچ أقوآ إنسَانه
شـگد مَكابرا وهَلكِثر تَعبانة

شعر عراقي

[الحمدان]

أوَل مَرة رَاضي عيوني يبچَن
أوَل مَرة أتيه گلبي عدمَن

أوَل مَرة أكود الطَيف للرَاس
أوَل مَرة أكسَر خَاطِر الناس

أوَل مَرة أجيب عيوني للضَيم
أوَل مَرة أكسَر وَاهس الغِيم

أوَل مَرة أحِس تَكرَهني الگلوب
أوَل مَرة أحِس بـ روحِي مَغلوب


شعر عراقي

[الحمدان]

چم زلة منك بينت
ماجيت اعاتب مرة

ومن عشرتك گلي ششفت
غير الألم والحسرة

انا ادري يهواك الگلب
بُعدك يعذب حالي

وادري اليحب ليلة صعب
هايم يضل للتالي

شعر عراقي

[الحمدان]

إسكن بقلبي وإحسب البيت بيتك
وفيه إعتبرني ضيف قاصد محياك

إن احتواك الشوق وإلا احتويتك
خذ ناظر عيوني على كيف ماجاك

وإن ما كفاك القلب روحي عطيتك
يفداك قلبٍ قلبه الروح تفداك

...

[الحمدان]

🇸🇦

عشتي يالمملكه بالعز محميه
تحت رأيه ملكنا نارنا حيه

[الحمدان]

ياسيدي سلمان ياحامي الأوطان 🇸🇦💚

عهدك عطاء الإنسان رؤيه حظاريه
ديرت هل العوجاء والمرقب العالي

[الحمدان]

انقش اسمك فوق صفحات الغلا
‏وانثر اللهفه لك بدروب الغرام

‏وانطق بصوتي هلا والله هلا
‏فيك ياللي صعب يوصفه الكلام

...

[الحمدان]

قلبي مع اخبارك وكيف الزمن فيك
‏وكيف الليالي معك ياجعلك بخير

‏بعدك يزيد الشوق يا جعلي أفديك
‏لك الغلا من بد كل البشر غير

...

[الحمدان]

كل شي في وجودك له حلآ
‏وكل حرف تكتبه يعني حضور

‏لو تغيب الخلق تبقى يالغلا
‏طلّتك عطري وأبياتك بخور

...

[الحمدان]

الشوق مايهدا على غير مشتاق
‏ياللي غلاك بداخل القلـب باقي

‏يا طير ياللي بالجناحين خفاق
‏بلغ سلامي والوفاء واشتياقي

‏للي خذا مابين جوفي والعماق
‏واللي ملك كل الشعور بلعماقي

...

[الحمدان]

ياللي بقلبي لك غلا ماله حدود
‏واعجز لو اني جيت اوصف حدوده

‏ليتك معي في كل الاوقات موجود
‏ربيع قلبي معك حنت رعوده

...

[الحمدان]

‏سلام ياملح الحبايب والأقراب
يامزين الدنيا وزايد حلاها


مثلك يهد الحيل فرقاه لا غـاب
أما حضوره للضوايـق شفاها

...

[الحمدان]

قالو تحبه قلت والله احبه
قالو يحبك قلت مدري وش اقول

بس اذكر انه قد حلف لي بربه
اني على باله ولو كان مشغول

...

[الحمدان]

صب فنجال الغلا واقعد قبالي
واسقني بيديك من كاس المعزه
‏
‏غالي يسكب غلاه بعين غالي
‏الله اللي حط لك قدر ومعزه

...

[الحمدان]

ماكلّ غـايب عن عيوني فقدته
‏و ماكل شخص القاه يستاهل اغليه

‏من بعد ما قلبي شقيته وعدته
‏ما يسكنه غير الذي يعتني فيه

...

[الحمدان]

ابسالك ماشفتي قلبـي حواليك
اهو يقول انه من الشوق عندك

انا ادري انه كل ليله يـوافيك
وادري يموت برمش عينك وخدك

...

[الحمدان]

رساله لي ولك....

علاقتك مَع الله
هِيَ العَلاَقةُ الوحيدَة
التي سَتنقذك مرتين
مَرّة فِي الدُنيا
وَمرة في الأخِرة
حَافظ عَليها

بقلمي

[الحمدان]

خارج الصندوق....

هل تعلم ان الدموع
تحتوي على مواد كيميائية
مسكنة للألم يفرزها المخ
عندما يبكي الإنسان

تشير أحدث الدراسات
التي أجريت في معامل
الأبحاث النفسية في ولاية نيسوتا
إلى أن ذرف الدموع ليس دليلا
على الضعف أو عدم النضج
ولكنها على العكس
تعتبر أسلم طريقة
لتحسين حالة الصحة
من حيث التخلص من
المواد الكيميائية
المرتبطة بالتوتر
والموجودة في الجسم
كما أنها تساعد في
إرخاء العضلات
وأن البكاء أسلوب طبيعي
لإزالة تأثير المواد الضارة
من الجسم.
أما كبت الدموع
فيؤدي إلى الإحساس بالضغط والتوتر
كما أنه يمكن أن يؤدي إلى
الإصابة ببعض الأمراض مثل الصداع
وقد أثبت أحد الأطباء
من خلال تحليل دموع البشر
إلى أن الدموع تحتوي على
مواد كيميائية مسكنة للألم
يفرزها المخ

بقلمي

[الحمدان]

قالو له موتك مؤاكد ليش الاصرار
قال لهم هذا شعاري الموت ولا العار

قالو له اعدامك ماينقل سرمن الاسرار
قال لهم بثو مباشر عبر الاقمار

قالو له اخبارك معروضه ع المستشار
قال لهم حتى وانا ميت نصنع الافخار

قالو له غادر ك لاجى وارحل في الحال
قال لهم عيب يقولوها وهذا م ما زال

قالو له الرجوله ماتنفع مرات هبال
قال لهم هلها انا ليها هاتو الحبال

قالو له الحبل اللي فعنقك مايجيبه مال
قال لهم خله يجيه يوم يجيبوه رجال

مما قيل في صدام حسين

[الحمدان]

‏مازلت لاهي وأنا من غيبتك ما ألهى
كنّي عن علوم غيرك فالعمر منهي

مازلت أناقش خفايا الروح واسألها
الحاجه اللي تعوض غيبتك وشهي

...

[الحمدان]

‏تقول اخاف اذا عطيتك غرامي
‏تذبحني الغيره وانا غيرتي فرض

‏واقول أنا لا عطيت شخص اهتمامي
‏أشوفه لحاله على كوكب الارض

...

[الحمدان]

بـعض الـبشر يكفــيك مـنه كلامه
فيه الأدب والطيب زايد والأخـلاق

يفرض على كـــل العباد احترامـه
حبه وقدره ينطبع وسط الأعماق

...

[الحمدان]

‏أنا ماحب الكلام الزايد ونقله
‏الناس ماهي فبعض الناس مسئوله

‏وترا الذي فاهم وشبعان من عقله
‏ما كل شين يعرفه لازم يقوله

...

[الحمدان]

‏لاجاتك الزله من اللي توده
‏فكر بحفظ الود واعرض عن الرد

‏واذا اعتذر عن زلته لا ترده
‏بحر العلاقه دايم الجزر والمد

‏حبل المواصل بين الاقراب مده
‏ارخه ليا شدوه واليا ارتخى شد

‏وإنس الخطا حتى تدوم الموده
‏من يذكر الهفوات ما يحفظ الود

...

[الحمدان]

مثل الاميره من حواليها حرس
تمشي دلع ومن الترف متعاليه

ماكل خيال يروض له فرس
مهره اصيله من حلاها غاليه

...

[الحمدان]

‏نقول للمقفي محلل ومسموح
‏حتى لو انه بـ بالنهايه خذلنا

‏من عادت الدنيا ابتسامات وجروح
‏حنا نعرف اطباعها ماجهلنا

‏اللي بيتركنا على الدرب ويروح
‏لايبتسم في وجهنا لا وصلنا

...

[الحمدان]

‏خاويت بالدنيا خلايق وفارقت
‏انا الوحيد اللي لنفسي بقالي

‏ماني بمحتاج البشر لاتضايقت
‏اقدر اكمل نص عمري لحالي

...

[الحمدان]

صحيح ماجتنا الليالي على الكيف
‏مره تجينا ثقال ومره خفافي

‏والحال مايحتاج نشده وتوصيف
‏ماكل يومٍ ينحسب لي عوافي

‏ظروفنا تشبه سحابٍ من الصيف
‏بعد المطر تهب صلف السوافي

‏واليا نشدنا من يحب السواليف
‏قلنا بخير ولا لحقنا خلافي

‏شيهانه السبيعي

[الحمدان]

تشبهين الخيل في كل الوصوف
‏في شموخك في غرورك فارقه
‏
‏ لاحظرتي كل خلق الله وقوف
‏ مثل شمسن في سماها شارقه

...

[الحمدان]

أن بغيت تعيش مرتاح الضمير
الحسد والحقد لا يطري عليك

وأن بغيت العز والمجد الكبير
طاعة الله ثم طاعة والديك

ذائقة

[الحمدان]

لي الشـرف وازداد عزه ونوماس
‏بمتابعة كل اجودي واجوديه

‏متابعة الطيبين تاجٍ على الراس
‏وانتم متابعتكم لنا اكبر هديه

‏بقلمي

[الحمدان]

اي والله ان الزمن غيّر عناويني
ماعدت انا الاولي ياوقتي التالي

اول ليا رحت ادوّر من يخاويني
واليوم ما ادوّر الا السجه لحالي

...

[الحمدان]

قال الحسن البصري رحمه الله تعالى

كلٌ نعيم زائل الا نعيم اهل الجنة
وكل غم زائل الا غم اهل النار

بقلمي

[الحمدان]

رسمت طيفــك فــي خــيالي أمــاني
يا مرتســـم ما بين جــفني وعـــيني

ما شفـــت مثلك في البشر حـد ثاني
انت الوحــــيد اللـي تحلـــي سـنيني

أشـــتاق لك واگــتب شعوري معاني
وارسـل لك احساسي ولهفة حـنيني

وادورك وألقـــــاك بين المحــاني
في وســـط قلبـــي منزلك يا ضنيني

عايش في گل نبضة غلا في گياني
واشعـــر بحــبك في عـروقي وفيني

...

[الحمدان]

‏محلا المساء بطلتك دامك النور
ولا تلومني لاقلت معك المساء غير

معك مسائي ممتلي شعر وشعور
الله يمسي وجهك النـّير بخير

...

[الحمدان]

ليت السحابه يوم هلت مطرها
أروت عيوني واشبعتها بشوفك

وتنام عين مبطيه في سهرها
وكفوف خلك ماتفارق كفوفك

...

[الحمدان]

الله يمسيكم من الخير بالخير
‏ويكتب لكم طيب الحياه وسعدها

‏ويكفيكم شرور الزمن والمقادير
‏ويرزقكم الجنه وزايد رغدها

بقلمي

[الحمدان]

‏وش يحدك لـ السهر دامه نساك
لحف أحلامك وطبطبها ونام

وإن رجع لك وان كتب بك ألف بيت
مد له جرحك وقل له مو حرام

[الحمدان]

عـرفنا صـروف الـدهــر هبة بهبة
وعشـنا وشـفنا في زمنـا تجـاريب

الاعمــار تفــنى والليـالــي مغبــة
ومن لا يخاف الله ما يعرف العيب

ومن لا قضاهـا بالرضـا عنــد ربـه
ما ينفعـه مدح العرب والاجــانيب

يسـعد صبـاح حــزومنا والجـهبة
ووديان اهلنا والشعوف المراقيب

فيها حصــون اجــدادنا مشــرابه
تلقـى مرابط خيلهم والمــراكيب

وصبيـان لو قد صـاح صايح تلبــه
على هيبة الجدعان تمسي مطانيب

من طــاب فيهـا نشــهد انا نحبــه
ومن خاب ما نقضيه نلقاه بالطيب


شعر يمني

[الحمدان]

‏سلام ياملح الحبايب والأقراب
يامــــزين الدنيا وزايد حلاهـــا

مثلك يهد الحيل فرقاه لا غـاب
أما حضــــوره للضوايـق شفاها

...

[الحمدان]

‏جيتك أمسي يامنــى الروح بالنور
وأقول ياقلبي هـلا وكيف حـالك

يالله عساك بخـير طـيب ومسرور
ويالله عساني مانحرم من وصالك

...

[الحمدان]

تعبت من نضم الهواجس والاشعار
والناس ماتعرف زماني حـــــداني

ماغير للابيات تنسخ وتــخــتار
والجيد منهم قال صحصح لساني

حطيت نفسي فا السما فوق الاقمار
وقلت يانفسي وجدنا مـــــكاني

ماعاد لي في صحبت الناس مضمار
يكفي زماني من جراحه كــــواني

حوطت قلبي با السلاسل والاسوار
والله في دربه يكون الـــرهـــــاني

دنيا دنيه حاويه كل غـــدار
والصدق منهم سار قوله امــــاني

...

[الحمدان]

ياصاحب اشرغه وينك ماتزاورني
مشتاق لك وانت للمشتاق ماترحم

والا معا الحب متــونس وناسيني
وانا معذب على هذا الوجع والهم

اذكرك بي اذا عاد انـــت ذاكرني
ياراعي القلب والاحساس والبلسم

...

[الحمدان]

‏يا طير حالة راعـي العشق حاله
يحب والمحبوب من دونه دروب

ياطير خذ له من ضميري رساله
قله بعدك الحال ضايع ومنكوب

...

[الحمدان]

قلبك العاشق ومن عشقه كساني

لو تبي هالروح ماتغلى عطيتك

اطلب البسمة وبك جرحي نساني

بس أبيك تكون في قربي رجيتك

جيت لك بأهديك عمري مع زماني

حيل أحبك يا سما عمري فديتك

حيل أحبك ما حد غيرك حواني

...

[الحمدان]

كنّي وانا ملتفت في غالي أشيائي
‏لفتة غريبٍ على صوت أمه مْشبّه

‏لو أقدر أني اصحّح ماضي أخطائي
‏ما قلت لـ اللي أحبه أنّي أحبه

...

[الحمدان]

‏تعبت اجامل وضعنا واتحراك
‏تعبت لين الشوق وصل لحده

‏فرقاك يوجع اخ من هم فرقاك
‏قطع عروق الشوق والحب هده

‏سافرت من دنياي طامع بدنياك
‏لكن ظروف الوقت تبغى مصده

‏قلبي الي يعشقك يا كم تمناك
‏لكن تقاليد العرب دومم ضده

‏ماهو بـ يخفاني ولا هو بـ يخفاك
‏بس الزمن ياصاح ماني بنده

...

[الحمدان]

في كل ليلة حكاية شوق عـنوانها
أنت الحبيب الذي ماغاب عن خاطري

قصه حزينه تعبت اعزف على الحانها
شِـعـري ودمرت من تأثيرها حاضري

بقلمي

[الحمدان]

لاتحسبوا كل منشور انشره
يا أصدقائي يمثل حالتي

بعض الرسـائل مجـرد فضفضة
اتطمنوا يا اصدقائي واخوتي

إحساس شاعر شعوره مزهره
لاحد يخـرب عليَّ فرحتي

بقلمي

[الحمدان]

أنبسط لاتعيش بذنب ماهوب ذنبك
‏حاول أنك تخطى لو يذكرك عطري

‏وكان دورت غيري لاتخبي بقلبك
‏قل لها عن ذكائي وأختلافي وندّري

‏وقل لها أي كلمه الا كلمة أحبك
‏وحبها ياحبيبي بس ماهوب كثري

...

[الحمدان]

شعوري معك يحتار يبدا معك من وين
‏تلوم السكوت ومن يشوفك معه عذره

‏لاعم الشعور الصمت ناظر عيوني زين
‏كلام العيون اصدق من الصوت و النبره

...

[الحمدان]

أنا وروحـي والـقصايد والأ لـحان
‏والـشوق والـقلب الـوفي كلنا لك

‏فديتك يا أغلى معرفه وأقرب إنسان
‏والـوصل وش الـوصل لولا وصالك

...

[الحمدان]

‏بعض البشر ورده على صفحة كتاب
‏وبعض البشر غيمة أمل من نظرها

‏للورد انفاس تداعب سما الاحباب
‏وللغيم روح تروي الروح من مطره

...

[الحمدان]

مساكم الله بالهنا والمسرات
الله يبقيكم ويسعدمساكم

إعداد ماتجري عموم المجرات
يااخواني زود الله غلاكم

اقبلت اغرد وان لقيتوا بالابيات
مايعثرالمعناسموحة رضاكم

[الحمدان]

‎سلم على المحترم واسلوبه الراقي
‌‏وجنب عن اللي علومه ما يثمنهـا
‌‏
‌‏أعامل الناس باسلوبي وباخلاقي
‌‏والناس باسلوبها تعرف معادنها

...

[الحمدان]

‏عاش الرفيق اللي حصونه منيعه
‏في لازمك ماهوب يذخر ولا شي

‏لو قلت له ضاقت علي الوسيعه
‏يقول تكفى لا اتضايق وانا حي

...

[الحمدان]

‏تبختري بالعز يا شيخة الزين
‏ياللي عيونك غير دربك كفيفه

‏الله عطاك العقل والثقل والدين
‏والستر والحشمة ونفسٍ عفيفه

...

[الحمدان]

‏في ذمتي ان كان للمرجله راس
‏انك على راس المراجل تساويت

‏مراجلٍ ماهي جديده على ساس
‏ساسن تدرّج من هل العز والصيت

للاب

[الحمدان]

‏أرحب تراحيب المطر عند مغليـك
‏حي الله الزايـر وحـي الزيـاره
‏
‏أقلط تربـع فالحشـا الله يحييـك
‏لك في صميم الذات دوله واماره

...

[الحمدان]

‏تعال نبحر بالهوى بس انا وانـت
اما سلكنا مع بعض او غرقنــــا

يا زين فيك الزين لو ما توازنــت
يكفيك رمشك من عربنا سرقنــا

...

[الحمدان]

مساءالخيـر في بالي
ارددها من البـارح

تخيّـل عاد لك مِنّي
مساء الخير كم مره

...

[الحمدان]

‏هذا هو اللي بقى لك واخر اعذاري
وصلك معاد امدحه والهجر ما اذمه

اقفيت وانا الصبور الساكت الداري
ان سود الأيـام وانتم مالكـم ذمّه

...

[الحمدان]

نستر عذاريبه وندمح خطاياه
‏ولا نبين عثرته وانحراجه

‏نصون رفقة راعي العز والجاه
‏ونطيب له تقدير ما هو لحاجه

...

[الحمدان]

‏مـودته مابـين ذا الضـلع وآلضـلع
ومحـبته مـن دفـع اﻵشـواق تـرقا

عندي هو بالذات آلشوف وآلسمع
فـرقآه مـوت و شـوفته غيـم بـرقا

...

[الحمدان]

‏سلام مني الفين كلن يسمعه
‏من بدو لا تقرأ ولا متعلمه

‏اما السياسه ماعرفنا شغلها
‏مانعرف الا كيف حالك سلمه

...

[الحمدان]

‏شفت انا رجال ضايع قالب العمّة عقال
‏والطلق قاذف ميادينه وضارب موقعه

‏والغنايم نالها الفرسان ومحمد منال
‏كل يوم يهد طيرٍ والطيور مبرقعه

...

[الحمدان]

‏المحبَه أنت وأنت الغير عادي
‏من عرفتك و المشاعر مستقرّه

‏يبتسم يومي و يطرب بك فؤادي
‏راحتي برضاك حلّت كل مُرّه

‏هاك قلبي وهاك عين وهاك غادي
‏دلّه لدربك وخذ خيره و شرّه

‏وش أبي بوجيه خلق الله و أنادي
‏وجهك الله خالقه طيب و مسرّه

...

[الحمدان]

الصمت بوح لبعض حالات الانسان
يشــرح لـه أحزانه ويشــرح سروره

حتى ترى الشاعر وهو شاعر أحيان
يحتاج له شاعـــر يترجــم شعوره

...

[الحمدان]

النفس لوعانَت مع الوقت تحتاج
تحتاج بعض الصبر ونقول لاباس

أثْر الزّمن ياصاحبي طب وعلاج
يخيط جرح ٍ مادروا عنّه الناس

...

[الحمدان]

اقنع بحالك والظروف المحيطه
دام السعاده والرضا بالمقادير

بسيط وتحب الحياة البسيطه
خلك على هالقاعده وابشر بخير

...

[الحمدان]

‏والله لو نتبع من الناس زلات
‏لاغير نبقى بالمجالس وّحدنا

‏لكن نصد ونحتفظ بالعلاقات
‏ونبقى على الخوّه ونوفي وعدنا

‏وصدورنا مثل الفجوج الوسيعات
‏وعن الدروب الغانمه ما ابتعدنا

...

[الحمدان]

‏مضاهر الناس لو تجذب وتخدعنا
‏تهون عند الذي يخدعك منطوقه

‏في ذمتي ما لعب فينا وضيعنا
‏إلا الثقه لا اصبحت عميا ومطفوقه

...

[الحمدان]

‏حي راسٍ ماتوطيه المصايب
‏يرتفع عند المصايب في علوه

‏خالقه ربي لوقفات الصعايب
‏الصعايب ما تزيده غير قوه

...

[الحمدان]

ماني ضعيف إيمان لكنّي إنسان
‏تجرحني الكلمة ويقتلني الظن
‏
‏قصة مشاعر خلفها ألف خذلان
‏عاشت وكبَرت مثل ما يكبر السن
‏
‏وأنا ضحية صمت في ظلم الأزمان
‏صابر وأقول الجاي يـاربي أحسن
‏
‏يا كثر شرهاتي على ماضـيٍ كان
‏ويا كبر هقواتي على أحلام ما جنّ

...

[الحمدان]

الكرامه فرض يوم الحب سنه
‏نحشم أنفسنا ويعجبنا التغاضي

‏من جرحنا نعذره ونصد عنه
‏ما نضيع وقتنا في شي فاضي

‏بعد ما نعطيه فوق الليّ يظنه
‏نبعد ونكتب على صفحته ماضي

‏مـا نقضي ليلنا ذكرى وونه
‏حنا مع سود الليالي في تراضي

...

[الحمدان]

من شافنا بعين الغلا والمعزه
‏يلقى المحبة والغلا والكرامه

‏ومن رز روحه وراس خشمه يرزه
‏مثل الذلول اللي بخشمه زمامه

‏حبل الرسن من فوق خشمه نحزه
‏نعطيه من وسم المذله علامه

‏انعامله بالمثل كزه بكزه
‏وهذا جزا اللي مايثمن كلامه

...

[الحمدان]

⁣‏مالله كتب لي بقربك ياحبيبي نصيب
‏وش عاد نقدر نسوي هذا حكم الزمن

‏كانك بدوني وحيد وفاقد لك حبيب
‏أنا بدونك غريب وفاقد لي وطن

...

[الحمدان]

""قلبي اللي عطيته لك حافظ عليه
‏ماعطيته لغيرك وانت تستاهله
‏
‏كم من الناس غيرك والله انه يبيه
‏كل من قال احبك لأجلك اتجاهله

...

[الحمدان]

‌‎الكفو مايحتاج له زود تعريف
بينه وبين الطيب عامل وراثي

مدح الكفو ماهو بكلمه وحرفين
قوله فعول وهمته دوم همّـه

...

[الحمدان]

ما لهذا الشوق اخر ولا هو بـ الاخير
غيبتك طالت ولكن عجزت اعتادها

اضحك بـ وجه الاماني وانا ماني بخير
ضحكهٍ لا في سنعها ولا ميعادها

...

[الحمدان]

⁣اللي يحبك بالكلام حبه على قد الكلام

واللي يحبك بالفعل حقق لعينه ما فعل

[الحمدان]

‏راح تذكرني اذا شانت سنينك
‏وراح تفقدني مع الايام ادري

‏الوعد قدام ما بيني وبينك
‏روح جرب غيري وتعرف قدري

‏حبي لك اكثر ترا من والدينك
‏يامشاركني تفاصيلي وعمري

‏ايه دللتك وكلهم حاسدينك
‏وايه ميزتك عليهم وانت تدري

...

[الحمدان]

لا تعيش بلا أمال ولا هدف
ولا تقول ان الزمن دايم بخيّل

أجمل الأشياء تلقاها صدف
والفرح دايم ورى الصبر الجميل

...

[الحمدان]

لولاك في كوني سكنت ومن سنين
يمكن تبرى دنيتي من بشرها

انا لو اكتب لك بحور ودواوين
تعجز دواويني ويعجز بحرها

كلام مضمونه يجي بين قوسين
( الحال من دونك) تعب واختصرها

...

[الحمدان]

وانا بجو الصمت مدمن به إدمان
أخفي ورا صمت المحاني كسوره

ماحـب احكي ما بقلبي من احزان
وصمتي يترجم كبر ضيقي وجوره

...

[الحمدان]

لاصار شفّك بعيد ومحزمك فاضي
والوقــتَ حملـه ثقـيل وعلّتـه علّه

لاتلتفتَ في حسايف وقتك الماضي
غامر على العّز والتوفيَق عندالله

...

[الحمدان]

القناعه كنز في وسط السطور
للسعاده وللحياه الصافيه

لو ملكت المال وانواع القصور
كلها تنباع لأجــل العافيه

...

[الحمدان]

الناس لو تسلم من القيل والقال
تبقى الخواطر والنوايا نظيفه

ترى هروج الكذب من طبع الانذال
ماتصدر الا من قلوب ضعيفه

...

[الحمدان]

لايقودك سوء ظنك مثل قود الذلول
مايقاد الا البهايم وعميان القلوب

من عطا عقله لغيره مغفل ومهبول
وظالم ٍ نفسه بظنه وحملها الذنوب

...

[الحمدان]

امسي عليكـم بالقصايــد والابيات
واجمل حروف الشعر واجمل قوافي

لكل غالـــي مسكنه داخـــل الذات
ومكانته وســـط الضلــوع الخوافي

بقلمي

[الحمدان]

‏الارض من بعض الاوادم تعاني
‏تدور وتدور الحياة وسننها

‏ودي اوقفها ولوْ لـ ثواني
‏وانزل اشباه الرجاجيل منها

...

[الحمدان]

اسقيتك العذب من طيبي وفنجالي
واسقيتني مر من غدرك وفنجالك

همي لحالك وما هميت انا حالي
وانت عايش وهمك بس في حالك

ياغبن قلبي تحاول تقطع اوصالي
وانا الحريص الذي مايقطع اوصالك

مشكور يامن حسبتك راسي ومالي
واسال من الله ربي يسعد احوالك

خلاص قلبي قنع منك وانا سالي
حلفت بالله مارثى لك ولا اجاملك

...

[الحمدان]

‏ليت الغرابيل جتني من عدوٍ لي
‏اما تقاضيت ولا بيتقاضى لي

‏لكن من واحدٍ ذكرة غناةٍ لي
‏ولا زلت احبه وبا احبه ولا بالي

‏لا مر طـرّق بـخـدراتـه ســلام لّي
‏كـنه يـسـلّـم علي ابصوته الـعالي

‏خلوني اسج عن موضوعه احسن لي
‏والا الغلا والله إن يبطي وهو غالي

سعد بن جدلان رحمه الله

[الحمدان]

اذا يضيع الدرب ما ضاع ممشاي
‏صدري سما لـ الضيق كله رحابه

‏انا الذي عايش مراسيم مثواي
‏الحزن و يا الفرح عندي تشابه

‏ملح العيون يعانده سكر الشاي
‏والاسئله ذابت بـ حضن الاجابه

الـغـانـمــي

[الحمدان]

‏في داخلي ونة وفي داخلي شوق
‏ومشاعري بين الحنايا سجينه

‏واسج بافكاري على كل طاروق
‏وابكي على لحظات بيني وبينه

‏انا اشهد انه حط في قلبي حروق
‏وانا اشهد ان الوقت عقبه ياشينه

الـغـانـمــي

[الحمدان]

تمر البال مع طارف قصيدي واحبسك بغنـاي
‏عن جياع القلوب وشرهة العذال والعاده

‏واسولف بك على قلبٍ يهوجـس بك بـلـيا راي
‏تفاوت بـك ظنون اللي عـجـز لا يـلحق مـــراده

‏فمان الماضيات وكل ضحكاتي وانا النسـاي
‏على بُــعد الطريق اللي خذلنـا دون ميعاده

الـغـانـمــي

[الحمدان]

عندما تستطيع أن تتخلص من أنانيتك
ستعرف وقتها
كم كنت تعذب روحك

جلال الدين الرومي

[الحمدان]

‏تدري وش اللي تعتبرها غريبه
إذا فقدت انسان غالي وهو حي

وتدري وش اللي تعتبرها مصيبه
إنك تضحي والمقابل ولاشي

...

[الحمدان]

وجودي وجود اللي يداري له ام حوار
يبي الرزق منها يوم دنيا الفنا عيّت

سبرها مع الجهمة قبل لايشب النار
ولقاها ترص الشبك وحوارها ميّت

...

[الحمدان]

على كثر ماشريط الذاكرة يطوى
مافيه وجهٍ ثبت في الذاكرة كثرك
سعد الحريص

قعدت اهلّ الدمع مثل الهماليل
أبكي على ذيك الليالي الجميله
عبدالله بن شايق

يحزّني أقول من بعد الغياب الطويل
مافيه ذكرى قدرت انسى تفاصيلها
العنود الواصليه

[الحمدان]

‏اضحك ترا الدنيا لها ايام وتروح
لاتشيل هم الوقت من فوق راسك

ومن زعلك قل له تراك انت مسموح
سَامح مادام ان العفو من صفاتك

...

[الحمدان]

‏اهلا مساء الورد ياطيف خلي
يامرحبا والشوق دايم يناديك

يشوقني شوفك وارحب وهلي
ألا مساء الحب ياحي طاريك

اقرب تفضل فالحشا لك محلي
في مجلس الأشواق الله يحييك

...

[الحمدان]

الى ارهت يمينك بالجمايل على المحتاج
بعد ما الله اعطاك وبعد زانت ظروفك

لاتنظر له انك غير وانسى وخلك ساج
اوصيك وانا خابرن ماهي تطوفك

تدور الدواير بين عبره و ضحك حجاج
لكن انتبه حتى والى كثرت صدوفك

تحد الرفيق اللي نفعته على الاحراج
وهو يمكن انه عاسره رد معروفك

...

[الحمدان]

‏تجوّد بي ولاترخي يدينك لـ بعاد الاقدار
‏انا بـ وجهك من صكات الليالي بما فيها

‏ابي اتباها بك واقول اني عرفت اختار
‏وليفٍ إليا جاته الزله يدمحها ويعديها

...

[الحمدان]

بنت الدلع بنت الغنج بنت الدلال
عضت شفايفها وسوت حبتين

اسج رجلي من يمين ومن شمال
حسبي عليها ما عرفت أروح وين

...

[الحمدان]

‏لاتنادي المقفي خل قلبك قوي
‏ادع له بالسلامه وادع له بالهنا

‏مايزيد المواجع غير غدر الحبيب
‏ومايجر المدامع غير فرقا الظنا

...

[الحمدان]

‏لو بأعتذر للوقت مافاد عذري
‏‌ادور الغلطه وأصافح أيديها
‏‌
‏‌ولو ترجع الايام واعيد عمري
‏‌بعض الأوادم ما اتعرف عليها

...

[الحمدان]

‏نصيحه....

امنح الرد لمن يستحق
‏وليس لكل من يتكلم
‏وأمنح الكلام لمن يفهم
‏وليس لكل من يسمـع
‏وأمنح الحــــــــب
‏لمن يمنحك قلبة

بقلمي
...

[الحمدان]

‏كم غايب ماغاب ذكره عن البال
‏وكم حاضر يشبه حضوره غيابه

‏ماكل من يبعد عن العين ننساه
‏بعض البشر طيبه يعوض مكانه

...

[الحمدان]

السعودية تساند فلسطين 🇸🇦

صبرا جميل وهوني يافلسطين
الكل يدعيلك ويرفع يدينه

بس اصبري لك وقت وانتي تشوفين
بالله وثم الي يقود السفينه

جا لك عديم يشتغلك من سنين
لو ان بعض ربوعكم جاحدينه

جا لك من العارض يرف الجناحين
حرٍ نشوف العز في ناظرينه

اي والله محمد حفيد السلاطين
محمد الي كلنا عند عينه

عبدالكريم الجباري

[الحمدان]

عزّت علي نفسي ونفسي عزيزه !
‏ماهيب ترضى موقف الذل والهون

‏الله خلق فيها الكرامه غريزه
‏ياكون في راس الهرم والّا ماكون
‏

سعد علوش

[الحمدان]

من حبك لزيـنك وغـره جمــالك
بكرهه يبي يشبع من الزين ويروح

ومن حب روحك وأقتنع في وصالك
يموت وحبـه لك من الروح للروح

...

[الحمدان]

ما احب اراعي نفوسٍ ما تراعيني
ولا احب اداري خواطرها واجاملها

احب اداري الرفيق اللي يداريني
اللي لو اخطيت غلطاتي تحملها

...

[الحمدان]

جتني حروفي لي تعبر عن الشوق
‏وتقول بوحي من شعوري وذوقي

‏بوح الحنين اللي خفا دمعة الموق
‏بين السطور دموع وجدي وشوقي

‏راسي شموخي عزتي دايما فوق
‏مجد الحنين اللي يغذي عروقي

...

[الحمدان]

رسالتي لك....

لاتجلس في مكان لاتجد فيه نفسك
ولا تصاحب من لا يعرف قدرك
ولا تضيع وقتك مع من لا يفهمك
وابتعد عن من يسيء الظن بك

بقلمي

[الحمدان]

‏من بقايا عطرك أنفاسي تعـيـش
ومع صدى ضحكك أقضى ليلتي

في حضورك شيطنة شعري تطيش
ولا أبتسمتي تكتمل لي حفلتي

...

[الحمدان]

للساقطه لاقط وللطايله ذيـب
وللدرب قصّاصه وللسيف سلّه

وللهرج ناس وللفعايل معازيب
واللي يبي درب المراجـل يدّله

...

[الحمدان]

من كان الجفاء أخلاقه طاب فراقه
ومن حسُنت خصاله طاب وصاله

[الحمدان]

وفّر كلامك ولا تنشد عن أخباري
لو ماني بخير قلت بخير وأفهمها

نفسي عزيزه وأظنك تعرف وداري
النفس ماتحشم إلا من يحشمها

...

[الحمدان]

عَليك الناسْ تسأل وَين ما وَين

وعسَاك بخير عَايش ياضوء العْين

هم ترجِع وتجمعنا ليَالي

وأشوفك مِن صِدگ گاعد گُبالي

بعد مَظل صَبر والصَبر لوَين

شعر عراقي

[الحمدان]

تعـال واشــرب مـن فناجيل الابداع
‏واقدع ثلاث بيوت من صادق البوح

‏دونـك دلال الشــوق يازين الاطباع
‏مـيـّل تقـهــوى وارد القـلـب والروح

‏صـب الغلا يشربك وينبت لك القاع
‏عشق وغلا واهات وطعون وجروح

...

[الحمدان]

‏اتعوذك يا ابليس من شــر بلواك
واستغفـرك يا الله من شر نفسي

لاخطيت او زليـت يارب رجواك
تغفر ذنوبي حين اصبح وامسي

بقلمي

[الحمدان]

‏بعض البشر لاغاب شوقك يناديه
وبعضهم لاغـــــــاب ترتاح منه

وبعضهم مجبور انـــــك تحاكيه
تجامله والقلب قـــد صد عنه

خلاصة الموضوع كله ومــا فيه
البعض قــربه نــار والبعض جنه

...

[الحمدان]

‏على كسر خاطري كنك موصّى وصاة
‏ما تذخر الكلمه الشينه على مسمعي

‏قبل امس اقلب صورنا في ملف الحياة
‏يادوب حصلت صورة وانت تضحك معي

...

[الحمدان]

خلك مثل طبعك جميل وتجمّل
وأرحم حبيبٍ بالهوى صار مغليك

ترا الغلا نفس الغـلا م تبدل
طال الزمن والا قصر مغرمٍ فيك

...

[الحمدان]

‏ياطير شيل الود وإحساسي الذوق
‏وصل عديل الروح حرفي وقله

‏يسعد صباحك كثر مابي من الشوق
‏ياللي غلاك اكبر من الكون كله

...

[الحمدان]

أغيب عنكم في مشاغل حياتي
‏وغالين لكن ردني منكم ظروف

‏ومنهو نشد مني متى هو بياتي
الشكر مايوفيه ببيوت وحروف

...

[الحمدان]

‏تخذلني ظنـوني وأنا أقول لاباس
ما الله على طـرد المقفي أمرني

الله يخلي من وصلني من الناس
والله يسهل درب منھـو ھجـرني

...

[الحمدان]

‏لك منزلٍ بين الرجا والتمنّي
ولك دعوةٍ مافارقت قلب ولسان

ادعي عساك تكون فيني ومني
عل وعسى مايملكك غيري انسان

...

[الحمدان]

لأتحسبون الحب ضحكه مع بنت
ولأتحسبون أن النساء ماتربّو

اللي هدم كلمة أحبك بـ هالوقت
أطفال شافو الحب لعبة وحبّو

بقلمي

[الحمدان]

‏تلاقت الأرواح في شرفة الليل
وتعانقت نظراتهم با ابتسامه

وصبوا سوالف شوقهم ف الفناجيل
كلٍ يعبر عن هواه وهيامه

...

[الحمدان]

‏استغفر الله كل مادق قلبي
واستغفر الله كل ماترمش العين

يـالله تغفرلي ذنوبي ياربي
وتغفر ذنوب اللي معي قالو أمين

بقلمي

[الحمدان]

‏إنس الهموم وبدل الحزن بـ افراح
إضحك وثقل الهم بالصبر تقواه

هلل وكبر واذكر الله ياصاح
محدن في هالدنيا نصيبه تعداه

بقلمي

[الحمدان]

‏ياللي تحاول تصـد وتعلـن الصده
اصبر وهاك الكلام اللي على بالي

ان رحت مانجبر الرايح على الرده
وان جيت غالي مثل ماكنت يالغالي

...

[الحمدان]

‏تمطـــر مشاعـــرنا مــن الود مالاق
لاهـل النفـــــوس الطيبــة والانيقة

اللي غلاهــم في صميمي والأعماق
ومكانهم وســط الخفـوق العميقه

يسعد صباحكم بالمحبـه والاشواق
واطيب ورود الكون واجمل رحيقه

خطيتها مــن هاجسي فوق الأوراق
مني لكم يا اهــل القلـوب الرقيقه

...

[الحمدان]

ارفــع مـقـامك فـوق لاتـقبل الـهون
يـالـلي تـبـي درب الـشرف والـمعزه

خلك مع اللي دوم بالطيب يمشون
ومــــن لايــعـزك بـالـعـرب لا تــعـزه

وليا طلبت اطلب رضا خالق الكون
وصَـلْ الـفروض الـواجبه كـل حـزه

ولا تـصـير بـغـيبة الـنـاس مـفـتون
والــرجــل كـلـمـة جــاهـلٍ مـاتـهـزه

...

[الحمدان]

علي يشهد الله مايوصف غلاه شعور
تعدا غلاه حدود الإدراك الإنساني

لا اقبل علي كأنه لقلبي يزور
انشهد انه سكن قلبي وشرياني

....

[الحمدان]

‏الله يـعين القلب لا ساقه الشوق
صوب الـديار اللي سكنها وليفي

الصدر من كثر الهواجيس مخنوق
والوقت ماجاني على كيف كيفي

...

[الحمدان]

‏لو كانت اعرافنا ماتشبه اعرافك
المعطي الله عطاك الملح والقبْله

حتى لو المعتمر في طوفته شافك
ضيّع طواف الوداع وضيّع القبلة


....

[الحمدان]

‏صديت عن بعض المخاليق بالعمد
‏لاهو كبر مني ولاهي حماقه

‏لكن بعض الناس يالله لك الحمد
‏ما فيه امل معهم تدوم العلاقه

....

[الحمدان]

‏الشعور المختلف دايم معاك احسه
ينعكس في وجهي و حلو الكلام اللين

أنت حبك لو ورى حدب الضلوع أدسه
لاضحك وجهي سعادة والله أنه يبيّن

....

[الحمدان]

بري حالي لادنا الليل ثم تاه الدليل
‏بين رجوى وصل والا هجر والا محال
‏
‏ي حبيبي ما خبرتك على عهدي بخيل
‏خابرك في ميله الوقت ترهي بالوصال


الـغـانـمــي

[الحمدان]

خلك على وقع الشدايد سنافي
لاتشتكي ضيقك وخلك طبيبه

ثلث الجبل ظاهر وثلثين خافي
ما هزته حتى الظروف الصعيبه

....

[الحمدان]

سرئ الليل واشــواقي تلاعب خيالي
وترسم وصال الروح من باقي الروح

وتتســابـق احـداثـي بشكل احتلالي
ولاشفت واقع وصلها غير مسموح

عــلا ويـن يـشواقـي تســوقيـن بالي
وعـزي عـلا المقـفيـن مايـقبل الروح


...

[الحمدان]

عيش العزوبيه بذا الواقع احلا لي
تعجبني العيزبه يا خوي واعجبها

لان الزواجه بها قيدي وكبالي
والحرية كنز تغنيني بمكسبها

...

[الحمدان]

يامساء الخير من بعد السلام
ويامساء الذوق ي اهلًا هلا

ي مساء الورد بالناس الكرام
ي مساء الشوق وحروف الغلا


...

[الحمدان]

حب الزمن هـذا تفاصيل بلواي
اخذ الحبيب الزين قلبي وشله

ماكنت متوقع من الشوق إغواي
وإلا عـذاب الحب يأتــي بعله

...

[الحمدان]

يامالك الكون من جاله الى جاله
رحمتك يامن خلقت الخلق تسجدلة

ماخاب من حط ذكر الله في باله
تمر الايام والمقسوم يكتب له

بقلمي

[الحمدان]

‏تمنعني الشيمه وبعض المشاريه
وصبراً لو ان الصبر مرٍ مذاقه

لو كل من يخطي علينا نجازيه
ضعنا بعجات الغضب والحماقه

...

[الحمدان]

شجاع لكن ما تبرى من الخوف
‏راعتني الدنيا بشتى الوسايل

‏اللي حياته كلها ظروف بـ ظروف
‏يخاف حتى من ظروف الرسايل

...

[الحمدان]

‏المشكله حاشمّك ماجاك تقليل
طيبٍ ترا مني ومامن طمايع

فن التغافل فيه فنان بالحيّل
أحسّسك إنك ذكي وأنت ضايع

...

[الحمدان]

يا مرحبا بصوتٍ ليا من سمعناه
زاد الامل والنفس يجلى كدرها

صوتٍ على قود المعارك خبرناه
ياكم سريه عقبه اسعد خبرها

...

[الحمدان]

كنت اضن اصعب ألم في الكون كله
هو الفراق اذا حصل بين الحبايب

لكن أصعـب من فراق الخل خله
موتــة الغاليـن او دفن القرايب

بقلمي

[الحمدان]

تطوي خطاوينا مسافات الأيام
‏وتجنح بنا الدّنيا وحنّا غافلين
‏
‏يالله تنجينا من دروب الظلام
‏وتختم لنا الدنيا وحنّا ساجدين

...

[الحمدان]

والله اني فوق هقوة كل غالي
‌‏لو قريب الظن بظنونه ظلمني
‌‏
‌‏والعمر مرّة ولو عشته لحالي
‌‏ما أحترمت انسان ماهو محترمني

...

[الحمدان]

‏ياعين نامـي مابقــى لك من الليل
لاتحتريــن اللي مـن الخلق ناموا

اظن مالك من وراهــم محاصيل
ولا ظنتي حســوا بشوقك وقاموا

ياشوق والله مابقـى داخلي حيل
من السهر واصــل عيوني تعاموا

اسهر طوال الليل بيـن المواويل
والشوق اللي ناره بقلبي تراموا

...

[الحمدان]

‏يا ما كتبـت اشعـار وابيـات وحــروف
ونشرتهـــــا ماشفــــت اي استجابه

وقلت في نفسي يجــي يوم ويشوف
اشعـــاري اللــي قلتهــــا في عتابه

اشعار تحكي قصـة انسان مشغوف
في عشـق من احــرق فؤادي غيابه

دونتها من شوق واحساس ملهوف
وقلب قاسىَ فــــي غرامــه عذابه


...

[الحمدان]

‏ناديت لك مــن بين الايام ويـــن انت
محتاج أفضفض لك حديث المحاني

تعال وابعدنـــي من الحــزن لاهنت
ماغيـــرك انـت اللي يلطـــف زماني

ياحب ضايـق خاطـري وانت مابنت
وشوفــك علاجــي لو مجــرد ثواني

يامــن بعشقك وسـط قلبي تمكنت
ومحبتـــك حلــت بداخـــل كياني

‎
...

[الحمدان]

ادري بيك تحبني ما داعي الكلام

وادري بدموعك صدك تبچيلي

من تجيني لاتكلمني بغرام

وعفية عوف الشوگ لاتحچيلي

انة ليلي بلاية واهس ما انام

شلون لو صرت انتَ واهس ليلي

شعر عراقي

[الحمدان]

عَودِتني أسنين عُمري

شلون أحِبهِن يوم يوم

عَودِتني شما أشوفَك

لو جِبل طاح إعلى مَتني

أذكِر عيونَك وأگوم

شعر عراقي

[الحمدان]

النفس طابت والحياه اجبرتنـــي
اساير أيامــــي على قـــدر المكان

والوقت قاسي والظروف اتعبتني
والحظ مايل عـــن مسارة ولا زان

...

[الحمدان]

اكبر مع الايام واشطب علاقات
‏واطوي يدين الوقت وامد ساقي

‏ما عاد تفرق سود الايام لو جات
‏اسود من اللي فات ماظن باقي

...

[الحمدان]

ياطيّب الراس خذ عهدٍ قديم ووثـيق
لو طـال صبر الكرييم وزاد دواجـته

صدورنا من خلقها الله وهي ماتضيق
الا لاجانا الرفـيق ولا لقى حـاجته

...

[الحمدان]

عرفت البكى فالضيق والله لايسقيه
‏وذرفت المدامع غصب والكبد منجرحه

‏عسى الله يبشرني بشيٍ ماكنت أرجيه
‏أنا ودي أبكي من سعاده ومن فرحه

...

[الحمدان]

يارب الأحلام وأحلامي تحدّاني
‏مالت على يدي وأزريت أحقّقها

‏ارزقني الفرحه الّلي يوم تغشاني
‏أحتاج فتره طويله لين أصدّقها

...

[الحمدان]

‏لاتزعجون الصدر في كثر العلوم
ماينقل الهرجه سوى عجز الضحى

الطيّب لـ ربعه ولو خابوا يقوم
وإلا الردي من فوقهم مثل الرحى

...

[الحمدان]

‏الحاجه اللي دونها الناس قشره
والحاجه اللي عند ربك سهاله

احدن طموحاته إلى يوم حشره
وأحدن طموحه ماتعدى عقاله

الصاحب النادر بع الناس واشره
إحرص على اللي عزته راس ماله

...

[الحمدان]

‏صديقك اللي ينصف الهم نصفين
ويشيل نصف الهم ماقلت شيله

‏ولو ماتشوفه بالرخا دايم العين
وتلقاه في وقت الشدايد دليله

‏هذا الصديق ومثل هذا قليلين
في ذمتي مثله يساوي قبيله

...

‏‌

[الحمدان]

‏لو نلتفت لأهل الحكي والمقاريد
‏أن كان متنا بين خذها وذقها

‏للسالفه لاجاتنا عندنا قيد
‏مايفرح اللي جابها يلتقطها

‏حنا نحب أهل النقا والاجاويد
‏وأهل الوفا والطايلات انعشقها

‏وقلوبنا ما تعرف الحسد والكيد
‏من فضل ربي صافيه من خلقها

....

[الحمدان]

يارب ياعالم بما تخف الصدور
ياكافل الارزاق من فوق السحاب

ارحم جميع الناس ذي وسط القبور
ونجَهم يا الله من نار العذاب

....

[الحمدان]

‏الحب لك في الروح اكثر من احساس
والعشــق لك في القلب معنى حياتي

انا معاك انسـان خالــي مــن الياس
وانا بــلاك انســــان فاقــــد حياتي

مهما وصفت غلاوتك صعب تنقاس
كيف اوصفك ياشخص ساكن بذاتي

انته الغلا والحــب من بين هالناس
وانته امــــل عمـــري وكل امنياتي

....

[الحمدان]

‏طلبت انا من صحتي الف صحه
لجل الحبيب اهديه مني العوافي

لاجاه من شر الزمان شي جرحه
ياليت هـو فيني وهو ضل شافي

....

[الحمدان]

‏اسمـع لقولـي واسمـع اخر علومي
يا نسمتي يا راحتـــي يا ضنيني

في ساعة الضيقه وساعة ضلومي
اتذكــرك وانسـى اســاي وانيني

....

[الحمدان]

‏ذبحني غيابــك يامـن الروح لك بيت
والقلــب فاقــد لك من اعماق ذاته

بكيـــت مـن بُعـــدك عليـا وونيت
ونت مصــاب اليـآس دمـــر حياته

في كـل لحظـــه لاذكرتــك ووليت
اصيــح لك من قلـب واضح شتاته

فيك الامـل ياللي في القلب حليت
وانت السلا للقلـــب وانت امنياته

....

[الحمدان]

‏يا فاتني قلبي تمنــــى ملاقاك
مشتـاق لك بالحيل ودي اشوفك

يا كـم سهــرت الليـل وانا تمناك
ودي بضـم ايدك وضمة كفوفك

قلبي غدا في نار من عُقب فرقاك
والعقــل متلهف يعانـق طيوفك

والروح مشتـاقــه لطلـه محياك
والعيـــن ولهانــه تمنى تشوفك

....

[الحمدان]

‏ياعين نامـي مابقــى لك من الليل
لاتحتريــن اللي مـن الخلق ناموا

اظن مالك من وراهــم محاصيل
ولا ظنتي حســوا بشوقك وقاموا

ياشوق والله مابقـى داخلي حيل
من السهر واصــل عيوني تعاموا

....

[الحمدان]

‏مـر الزمـان وراح عمـري ودهـري
وانا علـى وعدي ولا حيل او ميل

زادت جروحي واكتفى نار صبري
والدمع سالت من عيوني كما السيل

....

[الحمدان]

انت الذي قلت والله لو سماي امطرت
وتلاطم البحر بامطار السـحاب الثقال

ماحب غـــــيرك ولا الفرقا ببالي طرت
اما معك أنت ولا قبــــــر تحت الرمال

واليــوم يا للأســـــف اقوالك اتبخرت
وصرت عايش بعيد وصرت مرتاح بال

اما انا والقـــــسم لليـــوم ما اتغـــيرت
مشاعري نحـوكم لو طال فيها المطـال

....

[الحمدان]

سجت بي الذكري مع تالي الليل
اقلب الصفحات في ما مضى لي

طلعت باستنتاج بعد التحاليل
وامنت بالمكتوب فيما جرالي

....

[الحمدان]

من لا يبادلك التحيه والسلام
ما انته بملزم بالصله دايم معه

لاصار طيب له مكانه واحترام
حاول تخلي بينك وبينه سعه

بقلمي

[الحمدان]

‏ياليت عنـدي قلـــب ماعنـده احساس
من شان اطنـش من جرحنـــي غروره

واتجاهل اللـي شاف حاله من الناس
واصـد وجهـي واقهــــره في حضوره

بس انخلق لي قلـب طيب وحساس
فيه الوفــاء والطيـب ساكـن شعوره

مااحب اجرح من جرحني من الناس
ولا احب اعاتب مـن وصلني قصوره

....

[الحمدان]

‏ناديت لك مــن بين الايام ويـــن انت
محتاج أفضفض لك حديث المحاني

تعال وابعدنـــي من الحــزن لاهنت
ماغيـــرك انـت اللي يلطـــف زماني

ياحب ضايـق خاطـري وانت مابنت
وشوفــك علاجــي لو مجــرد ثواني

يامــن بعشقك وسـط قلبي تمكنت
ومحبتـــك حلــت بداخـــل كياني

....

[الحمدان]

‏الصـبــر يا قلبـــي على مُـــر الايام
لاتنطـــوي ياقلــب خليـــك رايق

مَنتة لحالك في همومك والاوهام
كم يابشر قلبـه مـن الحال ضايق

ياقلب هذا الوقت صابك بالاسقام
وحمــلك احمــال مَنتـه بِطـايق

لاكــن عسى بالصبـر تنزاح الآلام
وتنزاح من دربك جميـع العوايق

....

[الحمدان]

‏انا معـــي قلب طيـب لاكـــن اتعبني
وطيبتــي للبشـــــر زادت في اتعابي

اوفي مع الناس بـس الناس تخدعني
واكثر اكسار قلبـــــي من بلا اقرابي

كم يا متاعب فـــي اعماقي تعذبني
من جور طعنات اعز الناس واحبابي

وياكم جروحن بوسط الروح تحرقني
كانوا سببها رفاق العمــر واصحابي

....

[الحمدان]

‏القلــب لك مفتــوح يا مرحـبا فيك
اسكن بقلبي واحســب البيت بيتك

مادام قلبـــي عشقك الله محييك
القلب لك مفتــوح لجـلك فديتك

اقسم برب البيـت اعـزك واغليك
واهواك من لحظات مانا ألتقيتك

وحبيت قربك لي وحبيت طاريك
وسلبت عقلــي من مجـرد رأيتك

[الحمدان]

‏قلبي بلانــي في هــوى شخص دلوع
فيـه الدلـع من ساق ساســه لراسه

غنــوج فيــه الغنـج ثابـت ومطبوع
وعناد دايـــم ووسـط راسـه يباسه

لاكن احبــه واعشقـه عشق ممنوع
واعشـق غــروره والدلـع والغلاسه

وعشقةتمكن وسط قلبي والاضلوع
عشقـن مـن الاعمـاق لاخـر قياسه

....

[الحمدان]

خذينا مع اهل المرجله نجمتين وتاج
وكسبنا وســـام الطيب والعز منهجنا

نعز الرفيق ونكـرم الضيف والمحتاج
ولا نرخص النفس العزيزه ليا احتجنا

....

[الحمدان]

‏العين سد العين والصاع ب الصاع
لايرهبك عوي السباع المجيعه

الذيب ماياكل من الجيف لو جاع
شبحه بعيد وعظم ساقه سريعه

....

[الحمدان]

عرفت كيف اليوم يفرق عن الامس
‏وخذيــت عــن بعد المــحبين فكــره

‏ي ليت غيبتهم مثل غيبت الشمس
‏اللي تغيب اليوم وتبين بكــره

....

[الحمدان]

‏لاتجبر الناس فـي رايك اذا قلته
‏الدرب يمشي عليه الـدال والتايه

‏أن أيدوك العـرب فكرك ووصلته
‏وأن عارضوك العرب كلٍ وله رايه

....

[الحمدان]

‏عيني عليك اضحت من الشوف عميا
ماعاد تشــوف من المخاليق إلا انت

خليتها من باطـــل الشــــوق ضميا
واحرقتها من كثـــر تنشد عليك انت

غايــــــب عليها ايـام ما قلــت حيا
واحرمتهــا شوفـــك اسابيع مابنت

....